غاب القمر يا ابن عمي يالا روحني !!

 

معرفش مين الجهبذ في وزاره الكهرباء اللي قرر يرشد الاستهلاك بانه قرر يخلينا نعتمد على نفسنا في تنوير الشوارع واضح ان الفاتوره    بعد اخر زيادات كانت جامده شويه في مشهد سيريالي عبثي من هو اللي بنعمله في الناس حيتعمل فينا ولا ايه :)

يا سيد الناس طب والشوارع اللي مفيهاش بيوت ولا محلات تتنور ازاي؟ وماذا عن الناس اللي بتعدي من أي حته ويا سلام لو لابسين غامق دول حينولوا الشهاده على ايدك اكيد

بلاش العربيات اللي بتقرر هيه كمان توفر اللمضات وتطفي النور ولا اللي عكسهم ينوروا النور العالي ويعموا اللي حواليهم ولا اللي جاي في العكسي وضارب نوره في الضلمه في وشك كل دول حيطسوا في بعض واهو نخلص من شويه سكان مع اللي كان بيعدي قوق ونبقى قللنا الكثافه السكانيه شويه

طب حضرتك ليه مثلا ما تفكرش في حلول مبتكره زي السخانات الشمسيه اللي تشحن الفوانيس بالنهار وتنورها بالليل, او مثلا تنور عمود اه وعمود لا  سمح الله طريق السويس اللي منور نور ضهر ده كله نخفه شويه ونبعت شويه نور للناس التانين

طب حد فكر مثلا ندهن العواميد بحاجه فسفوري تاخد نور العربيات وتنور هيه وتعتمد على نفسها برضو

او امتياز لكام شركه إعلانات يعملوا إعلانات وينوروا اللوح وناخد منهم ضرايب بالمره

كل هذه الأفكار جات في دماغي وانا باسمع الدلوعه شاديه وهيه بتقول غاب القمر يا ابن عمي يالا روحني وانا ماشيه في احد المحاور العظيمه في التجمع الخامس مش في اي قريه في الاقاليم

بس ده كان حداهم في البلد عشان ما عندهمش عواميد نور انما احنا غاب القمر, والفوانيس, والاضاءه والعقل ومعاهم المنطق واحنا سنه 2024 ولا جايز معتمدين ان القاهره منوره بناسها

اه والله زمبؤلك كده

فطير الطاسه بالسكر

فطير الطاسه بالسكر

هفت عليه فطاير مقليه بتاعه زمان قبل ما كل حاجه تبقى موجوده في السعوديه لما يهفنا الشوق غلى فطير كانت ماما تعملها 

فطاير بسيطه سريعه تتقلي في الزيت في الطاسه وتترش سكر او تتاكل

بالجبنه

مش طعم الفطير المشلتت بس بتبقى مفقعه كده من قليه الزيت ومش دسمه زيه 

ميكس البساطه واللذاذه

كان خالي بيزورنا وفكرت ماما بيها وقعدت هيه وخالي يفتكروا الطريقه ويعلوا على بعض عشان جدتي برضو كانت بتعملها لهم

صحيت النهارده لقيت ماما عاملها عالفطار وعلى ما غسلت وشي كانت قاليه بتوعي

انا جريت ابص عليهم والضحكه من الودن دي للودن دي وعيوني لمعت من السعاده

وقعدت كلتهم برواقه كده وحسيت اني رجعت عيله بضفاير في ابتدائي وكانوا مليانين بطعم الزمن اللي راح دفا وحب وبساطه ومفيش اي خاجه ورا الواحد يوم الجمعه غير خروجه الحي الدبلوماسي في الرياض ثم بنده نشتري طلبات الاسبوع وناكل ايسكريم ونروح ننام عشان عندنا مدرسه بكره

جايز ما اشتقتش لطعم الفطير بس اشتقت لزمن ما كنا بناكله او ما حول الفطير من

ذكريات لزمن جمبيل

ننوس عين امه، الحيله بسلامته

امبارح واقفه في طابور في مصلحه حكوميه الست قدامي جايبه باكو ميني كاب كيك للولد وزيه للبنت

الولد ياكل ويرمي الورق مره ٢، ٣ استفزني بصراحه باقوله حبيبي كده غلط واماطه الاذي عن الطريق وبلا بلا بلا

تقوم البنت الصغننه ما تصدق توريني انها ما رمتش حاجه وماسكه الكيس وما رمتوش هللت لها وبرافو وقمر وبلا بلا

تقوم الام تقولي اصله الصغنن الدلوعه وهمه الفرق بينهم اصلا سنه مش اكتر

 وقاصه له قصه ومخليه شكله بنت اساسا وهنا انا سكت منعا للخناق ومارست أقصى درجات ضبط النفس

شويه والمحروس خلص اكل و فضل الكيس الكبير تقوم تقوله حطه عالارض لما عمو يجي يشيله!!! هو عمو شغال عند حضرتك يعني؟ 

يا وليه بدل ما تخليه يلم الورق بتخليه يرمي تاني انا حقيقي لم استوعب الاريحيه اللي هيه فيها وتصالحها مع مزبله ابنها

انا شفت ننوس عين امه في المستقبل مفخد واخته بتخدم عليه

وشفت بنت قمر واخده علي دماغها واخوها الدلوعه هو اللي متدلع

وشفت زوجه حيطلع عينها من ننوس عين امه وحماه مفتريه عليهم كلهم

وهنا جه الدور عليه وانا ماشيه باحوقل عشان احنا في لقسم اصلا ومش عايزين نتحجز في التخشيبه

مايسترو عن مايسترو

انا من عشاق حفلات الموسيقى العربيه اللي الاوبرا بتعملها لدرجه اني وصحابي بقينا بنختار الحفله من سمعه المايسترو 

في المايسترو الرايق اللي بتبقى من هدوءها مثيره للنوم وفي اللي عنده طاقه مبهجه ومعديه وده اللي بنختاره

من وسطهم كلهم تصاعديا حازم القصبجي ثم احمد عامر ثم مصطفى حلمي على القمه:  يناكش الاوركسترا ، المغني او حتى الجمهور والكل يكون في غايه السعاده

اخر حفله مكتش حتى لها بطل او بطله مخصوصه كانت من شباب الموسيقى العربيه بس البطل كان المايسترو مصطفى حلمي واللي كان متالق كالعاده 

لما وصلت وشفت البرنامج اتخضيت من دسامته الحقيقه بدايع فوزي وفريد، عبد الوهاب، الموجي وسيد مكاوي ، برنامج مرعب والله 

وكلهم كانوا احلى من بعض ومع تصاعد الجمال في النص الاولاني الحقيقه حفله مستقله بذاتها خلصت ١٠ مع اعظمهم كلنت غاده ادم  كانت في نهايه الفقره الاولى اغدا القاك وكانت حاله كده لوحدها 

بعدين النص التاني بدا والطاقه تهدى بشكل مش مفهوم قلت يمكن الاغاني حزينه او انا تعبت 

فجاه قبل اخر مغني يمسك  المايسترو المايك ويعلن ان المغني ( الشب الطرب على راي حد من اصحابي) تعب واتنقل المستشفى بس همه حينفذوا البرنامج عشان الناس تفضل مبسوطه ازاي معرفش

في ناس مشيت وانا بصراحه اعتبرتها قله ذوق وقعدت فضولا واحتراما للراجل والفرقه اللي عايزين يبسطونا افتكرت افيه انت اللي حتغني يا منعم وقلت عل وعسى تكون فرصه لتقديم ناس مختلفه مكنتش حتتشاف في العادي

اول اغنيه نفذها بالكورس وكانت تجنن.الاغنيه التانيه قرر ان عازف الناي يبقى صولو سماعي وقام العازف الشاب وهو خايف وصوت الناي كان واطي مع كل دقيقه بيعلى ويجلجل وكانت بديعه الحقيقه

الاغنيه التالته قدم حد من الكورس مغني رئيسي وكان لطيف والله

ثم احد مغني الاغاني السابقه تقدم وغنى قارئه الفنجان اللي كان بديع ( نفس المغني في اغنيته قلت في سري صوته حلو بس مفيش حضور للاسف) لكن الغريب بقه انه جلجل في الاغنيه اللي مكنش محضر لها اصلا  !!! 

وكان القدر بتعب الشب الطرب قرر يقدم عازف الناي اللي اتوقع له صولوهات كتير مستقبلا، والكورس يمكن بشيء من التدريب يشق طريق مكنش حيحصل لما صديقنا قليل الحضور اتسمع بشكل مختلف وحقيقي محتاج فرصه حقيقيه 

اما المذهل هو اداره المايسترو للمفاجاه وازاي نفذ البرنامج لاخر اغنيه بدون اي مشاكل وازاي ادار الحفله لاخر لحظه اللي هو كمان لو كان التعب حصل في الاول كان خلى اغاني النص الاولاني مكان التاني عشان يسيب الجمهور من غير خطط بديله في اخر لحظه او ينهي بغاده ادم مثلا ( عاده اتقل مغني بيتساب للاخر ) 

 لكن واضح ان التعب حصل في البريك بعد اكتر من نص الحفله ما كان فعلا اتعرض 

الحفله والاوركسترا في الحقيقه ماهي الا فريق والمايسترو هو مدير الفريق ومرض الشب الطرب ماهو الا ازمه اديرت بمعلمه 

والوضع كله ماهو الا صدفه قابل فيها التجهيز فرصه لتقديمه

Luck is when preparation meets opportunity 

مايسترو عن مايسترو فعلا يفرق تحيه وتقدير للمايسترو مصطفى حلمي بصراحه 

قصر البارون

سنين رايحه جايه عليه ولما بداوا يجددوه اتصدمت من اللون الجديد بس اتضح ان ده اللزن الاصلي بتاعه

قررت النهارده ازوره وصلت وركنت على غير العاده بسهوله

المدخل بعد كده عرفت انه كان الاصطبل اللي شخصيته فعلا ظهرت وانا خارجه

الحديقه كبيييره جدا جدا ومعتنى بيها ومنسقه بروعه

القصر عللى ربوه عاليه يتطلع ليها بسلالم كتير وكل ما تقرب تكتشف الروقان والذوق بتاع صاحبه

تماثيل للقصص الاغريقيه والرومانيه الواجهه كلها رموز وشخصيات هنديه وتنانين وتعابين وكم التفاصيل فيها حقيقي يخليك تسرح معاه

تدخل القصر المكون من بدروم للخدم والمطبخ متحول حاليا لاداره المكان

الدور الاول لاستقبال الضيوف, الدور التاني للسكن والاخير شرفه واسعه تطل على مصر الجديده كامله

القصر فارغ تماما بس استغلوا ده لسرد تاريخ وصور مصر الجديده وكل من شارك فيها وازاي كان عنده رؤيه لما لقى الاراضي حةالين النيل اسعارها زادت لدرجه خلت اسعارها مقاربه لاسعار باريس لما الخديوي قرر يجعل القاهره عباره عن باريس يس فيها نيل

يقوم البارون يخرج عن المالوف ويقرر يشتري اراضي كتير في الاماكن النائيه ويحولها لمكان متميز ويخططه على مزاجه واول حاجه يعملها الترام عشان يضمن سهوله تواجد العمال في المكان المطلوب

اما قصره فاكتشفت انه سابق التجهيز واتركب في مصر حتى التماثيل اللي ماليه الوحهات

رابط كل القصر باسانسير لسهوله حركه اهل البيت واسانسير للاكل اللي فكرني بمسلسل the watcher  فبعد ما قربت عليه خفت وبعدت !!!

نطلع لفوق الدور التاني عباره عن قوض تؤدي لبعض حوالي 5 غرف الارضيات باركيه والاسقف متزينه باويمات غايه في الرقه والشياكه ومليانه تفاصيل تجنن التيمه العامه ليها الزهور والملايكه

السلم الخشبي الدوار للسطح حدوته لوحده والنجفه الضخمه الواصله التلات ادوار حكايه وتطلع فوق تبص على مصر الجديديه كلها منها

القصر فاضي بس وزاره الاثار ملته صور ومخططات لمصر الجديديه وتاريخها والمشاريع الترميميه الحاليه كنوع من التوثيق مع افلام في اوض مختلفه للترميمات اللي حصلت وقبل وبعد

احلى حاجه في فراغه من الاثاث هو الخيال انا شفت حفلات وفساتين منفوشه وبيانو بيعزف في البهو تحت

وشفت اوض راقيه وبسيطه في دور السكن وبلكونات داير داير للاسف مقفوله تخيلتها مفتوحه ومدخله الشمس من كل مكان وهواء يجنن

شفت خدم وحشم بينضفوا ويلمعوا طول الوقت شفت ناس بتستمتع بالشرفه في شمس الشتاء وهواء الصيف بالليل واصطبل فيه خيول صاحبها رايح جاي في الجناين الشاسعه بتاعته

ما طلعش بيلف ولا حاجه ولا فيه سراديب سريه ولا اي خيال من اللي اتقال بس هو في المجمل مكان بيحكي قصه ورؤيه صاحبها نفذها بذكاء وتخطيط وكثير من الحب

حاطين في المدخل عربيات انتيك وعربيه من اول مترو اتنفذ من سنين كتير

روحوا حتنبسطوا هو مش متعب ولا مرهق هو ساعه بالكتير

عتابي بس ان سع تذكرته غالي نسبيا مقارنه بكل المتاحف والمناطق الاثريه في مصر بس تجربه مختلفه مليانه خيال للناس اللي بتسرح زي حالاتي

وش وضهر

 

الحقيقه الناس طلعت بيها السما خلتني اتفرجت عليها وخابت كل التوقعات

مليانه تضرع ودعاء للاولياء وده شيء خطير حقيقي في بلد اصلا مليان جهل وخرافات

واحد حرامي سرق فلوس وراح انتحل شخصيه دكتور وساب مراته متعلقه

وواحده محجبه الصبح ورقاصه بالليل ولما غضبت من زعيم الفرقه راحت هيه كمان انتحلت شخصيه ممرضه ومشيت معاها عادي

وصاحبتها شرحه وماشيه مع زعيم فرقه مسرح ستات وبنات وحملت منه في الحرام

ايه القيم والنماذج اللي بتقدموها دي ؟!

٩ حلقات بيكسب ويعالج ويكدب وحلقه واحده اتمسك واتحاكم امتى بقااا لما مراته عرفت وراحت عملت له قضيه تبديد وهو من خوفه اعترف بكل حاجه زي الشوال ؟! لا وايه بيقولك على لسان المحامي قضيه التبدبد اللي مراته الاولانيه عملتهاله اصعب من قضيه ممارسه الطب وان اخره حياخد فيها سنتين وغرامه لا تزيد عن 200 جنيه كتر خيركم والله

كده بنقول لاي فاشل كداب روح اعمل فيها دكتور وما يهمكش , ويقطع العلم غالتعليم والطب والسهر والمذاكره ما اللي معاه اعداديه اشتغل دكتور عادي

مورال اوف ذا ستوري خاف من الستات واوعى تكدب عليهم همه اللي حيكشفوك ويجيبوك الارض

الاهرام

الهرم 

اخر عجايب الدنيا السبعه

كان معايا ناس اجانب والحاجه الوحيده اللي اهتموا بيها يلحقوا يعملوها كان الهرم

لدرجه ان واحده رجلها مصابه كانت سعيده بمجرد الغداء في مطعم له فيو عالهرم

الراجل دخل ٣ وربع والدخول اخره ٤ ، التذكره ٢٠٠ جنيه والرش جوه ٤٠٠ 

بحسبه صغيره سريعه ساعه الخروج انا شايفه مش اقل من ١٠ الاف انسان خارج وده اخر ساعه 

يعني دهل مصر في ربع يوم حتى من الهرم ٢ مليون رسمي و ٤ اقتصاد التيبس اللي بالمناسبه بين السياس وامناء الشرطه والعساكر

يعني كده حسبه ٦ مليون رسمي و  ١٢ غير رسمي 

طب ما ننضف الواغش والسياس والقرف ده ونديره بشكل احترافي واعمل التذكره ٥٠٠ مش ٢٠٠ وقدم خدمه تليق بالمكان 

حقيقي على قد ما كنت مبسوطه على قد ما كنت مكسوفه 

الحقيقه انا ما دخلتش معاهم وفضلت مع الست اللي رجلها مصابه في المطعم بس كمان شنطه العربيه كانت كلها شنط سفر وما اتفتتش على قول السائق نظير كرمشه في ايد امين الشرطه !!! اللي هو مش مستوعب خطوره واهميه المكان والاهم عنده اللي خده من السواق 

غير الباعه الجائلين والشحاتين عند المدخل منظر مقرف وغير حضاري بالمره

الناس دي لازم تفهم خطوره واهميه مكانهم ، الهرم لازم يدار بذكاء اكتر من كده

سفروهم ودربوهم وفهموهم خطوره مكانهم واهميته 

ده جدو فرعون لسه بيصرف علينا واحنا مش مقدرين ده 

يارب اصلح احوال مصر وتدار بحب وذكاء اكتر من كده 

وبلاش سياسه اهبش واجري