الصندوق الاسود هو اللي فيه اسرار اي طياره
وقعت وهو اللي بيبداوا يدوروا عليه بعد اي حادثه
عمرك فكرت في الصندوق الاسود بتاعك ؟
طب هو عمرك كان ليك صندوق اسود ؟
لازم يكون لك صندوقك الاسود مش عشان بعد
انهيارك لا سمح الله يجيبوه ويعرفوا ايه اللي حصل
بس عشان اساسا تمنع الانهيار
فكره الصندوق الاسود هيه فكره انك اول باول
تخلص من اي وكل حاجه مضايقاك عشان ما تتراكمش جواك وتنهار بسببها
وكل واحد وصندوقه الاسود
فيه اللي بفرغ ده في رياضه يطلع فيها كل
الطاقه السلبيه
وفي اللي بيدور له على صاحب مؤتمن يحكيله كل تفاصيله
اللي مضايقاه
وفي اللي بفش غله في شغله بس ده غالبا بينتهي
سايب شغله بعد ازمه قلبيه لانه بيبقى عنده ضغوطاته مع ضغوطات الشغل فتقلب معاه
باوفر دوز
في اللي بيقلبها تهريج وضحك وهزار وده تعرف
انه اتعس خلق الله لانه اصلا مش عارف انه محتاج الصندوق الاسود
في اللي بيفرغها في كتابه او شعر حتى لو محدش
قراها وفي الحاله دي في ناس كتير بتقول عليها اصدق القصص هي القصص غير المنشوره
لانك في الحاله دي بتكون بتكتبها لنفسك وبس ولو رجعت قريتها بتسترجع معاها كل
تفاصيلها المفرحه بقه او المحزنه وممكن تبكيك زي اول مره كتبتها او اكتر
طب تصدقوا ان الصندوق الاسود مش لازم يكون بالضروره يعني بير النكد , اه والله بالذات لو كان صاحبك هو صندوقك الاسود اصل الفرح والضحك هو الحاجه الوحيده اللي لو اتقسمت بتكبر وتزيد
انت بقى من انهي صندوق اسود؟ ولا لسه معندكش صندوق اسود ؟ نصيحه دورلك على صندوق باي لون وارمي فيه همك وحزنك أو حتى فرحك وضحكك اول باول , اصلها بجد مش مستاهله سهله مش كده ؟!
صحي من النوم زي العاده على صوت عربيه
الزباله اللي بتدوش الدوشه شخصيا وبرضه ما بتلمش الزباله
دخل الحمام ملقاش ميه زي العاده اصلها مقطوعه
من يومين تلاته مش فاكر بالظبط ماهو ده بقى ال default عنده فاستخدم الكوز ميثود بس لان الميه مقطوعه من كتير
خلص اخر شويه في الميه المتحوشه
جه يحلق دقنه اكتشف ان النور كمان مقطوع فقرر
يمشي على موضه الديرتي تشين كام يوم اهي تجربه
فتح التلاجه لقاها منفضه والاكل اللي فيها بايظ من كتر مالنور بيقطع راح قافلها من سكات واهو يفطر مع زمايله في الشغل والامر لله , جه يعمل كوبايه شاي افتكر ان النور مقطوع راح رامي المج في الحوض اللي مليان مواعين معرفش يغسلها من قله الميه .
لبس في االسريع ونزل جري يلحق اتوبيس الشغل
كان فاته فركب ميكروباص , الميكروباص زي اي حاجه حوالينا مليانه تلوث سمعي وزحمه
ودوشه بس اهه احسن من اتوبيسات النقل العام
سرح في الراجل اللي في العربيه اللي جنبه انه
راكب عربيه في التكييف ومشغل مزيكا بصوت عالي بس هو كمان عنده مشكله كارت البنزين
اللي طلع عينه عشان يعمله وبعد ما عمله غلوا البنزين وطنشوا الكارت , وتموينه التانك بالشئ الفلاني
ومبقتش تكفي الاسبوع باينهم بيخفوه بعصير قصب ولا ايه متعرفش , والداي يوز في
الحرفيين لما الميكروباص يريح عليه وهو ماشي والدوخه مع شركه التامين والصنايعي
فحمد ربنا على تذكره الميكروباص ام جنيه
فقرر يسرح في بلاد الواق واق اللي الحنفيه
فيها لسه بتنزل ميه , واللي اللمبه فيها لسه بتطلع نور فما يكتشفش في نص اليوم انه
لبس الشراب فرده وفرده لانه لبس في الظلمه
بلاد الواق واق فيها الاتوبيس فاضي وبمواعيد
مظبوطه , بلاد الواق واق محدش بيثبته وهو راجع من الاوفر تايم اخر الليل عشان ياخد
منه الموبيل اللي اصلا عطلان ومش نافع بس اهه بيرن وخلاص
في بلاد الواق واق مش حيقف في طابور العيش
ولا يعمل اوفرتايم عشان يعرف يعيش , وفي بلاد الواق واق الشغل بيخلص 5 والمحلات
بتقفل 6 عشان الناس تعيش وتقعد مع ولادها ويناموا بدري عشان عندهم شغل تاني يوم
سرح في اجازته السنويه اللي ممكن يقضيها في
الريفيرا ولا ماليزيا اصله اول كل سنه هو والمودام " اللي لسه ملقهاش "
بيقرروا حيروحوا فين السنه دي ولان عندهم فائض دخل كل سنه بيروحوا حته في العالم
اه والله منين ما تمشي تلاقي شوادر الاضاحي
من اول المعيز لحد البقر والجاموس في الشارع كده كانه بيت اللي خلفوهم , مش بس
كدهده مستعدين للذبح والسلخ والتقطيع
كمان يعني لو سيادتك عجبتك بهيمه ولا مؤاخذه ممكن تشتريها وتاخدها او حتى تدبح
وتسلخ في الشارع عادي جدا !!!
والشاوادر دي من قبل العيد بيجي 15 يوم ولحد
تالت يوم العيد
بدون رقابه لا من المرافق لان ده ما ينفعش
ولا من وزاره الصحه لان ده بياثر على صحه
العالم
ولا من وزاره الداخليه لان نص المواشي دي
مسروقه
ولا من وزاره الزراعه (الطب البيطري تبعها )
عشان صحه البهايم ولا مؤاخذه
وعادي يعني ما تعقدوهاش سيبوا الناس تسترزق
والعالم تضحي مفيش ايتوها مشكله
دون النظر كمان لكم المضايقه من الروايح
والمناظر والازعاج لاي حد حظه النحس خلى البيه صاحب الشادر تطلع في نفوخه يعمل
شادر جنب بيت صاحبنا ده مش مهم اي حاجه المهم شويه البلطجيه دول يبيعوا ويشتروا
ويقرفوا العالم ولا حد يحاسبهم ولا يراقبهم ولا ياخد منهم ضرايب !!!
عمرنا مثلا ما فكرنا نعملها بطريقه منظمه وتحت الرقابه وبعيد عن المناطق السكنيه ولا اي حد تفتق ذهنه مثلا لانه يعمل مكان كبييير قوي تشتري فيه الدبيحه وتسيبها ليوم العيد تاكل وتشرب بدل ما تتحول البيوت بعد كده هيه كمان لزرايب من كتر الاضاحي اللي فيها سواء بقه في الجراجات او الاسطح او حتى جوه البلكونات
ازاي يعني الناس تعيش مع كائن حي بهيمي ياكل ويشرب ويعمل بيبي عادي يعني في شقتهم ايه البلا الأزرق ده
ماله صك الاضحيه ما نضيف وزي الفل وبلاش ولا مؤاخذه زروطه !!!
مره كان عندي مدير الماني كان متعجب ومستاء
جدا من المنظر المتخلف ده وبصراحه معرفتش اقوله ايه معاه حق ولا ايه
قبل اول يوم دراسه ليله المدرسه , حيث يبدا
مشوار المكوه والحموم وتضفير الشعر عشان يبقى سهل تسريحه تاني يوم , وتجهيز التوك
والفيونكات او الشرايط كل واحد وظروفه بقه
ليله الدراسه هيه الليله اللي كل اهالينا
كانوا شايفين اننا لازم ننام بدري عشان عندنا مدرسه الصبح !!! مع انك قالب يومك
بقالك تلات شهور فمن الطبيعي انك مش حتعرف تنام بدري وتفضل تفرك في السرير من
الساعه 8 لحد الصبح ترقب بقه فرحه , غم, قلبه يوم كل واحد وظروفه بس اللي فعلا
عمري ما فهمته ازاي كنا بننام من 8 بالليل طول السنه مش بس اول يوم !!!
أول يوم بقه يوم كان له طعم خاص , ايام ما
كان لسه شهر تسعه بدايه الشتاء ولسعه البرد الصبح ويمكن الجيليه الكات عشان برد
الصبح
البنات بقه ليهم طقوس لذيذه قوي يعني مثلا
لازم الشراب ابو دانتيلا وفي ثانوي لما الجيب قصرت سنه كان تحتها كولون وفوقيه
الشراب ابو دانتيلا قال يعني كده رجلينا
مش حتبان !!!
وساندوتش اول يوم لازم يكون متحضر كويس جدا
تشكيله الجبنه الرومي والزيتون واللانشون واللحوم والفاكهه والعصير وزمزميه الميه وكاننا داخلين معركه مش مدرسه اللانش بوكس ده كان بايخ قووي واساسا نص الاكل ده بيترمي او ترجع بيه وتبدا ماما توصف قد ايه تعبت في تحضيره واننا لازم ناكل الاكل كله وما نرجعش بيه فيبقى عندك دم وتاكله فعلا يا اما توزعه على اصحابك الطفسين !!!
اول يوم ده كل المدرسين لازم يجوا بلبس جديد
وتبدا رحله استكشاف المدرسين لو ما عدوش عالواحد قبل كده وتبدا كل واحده من اللي
ليها اخوات اكبر تتعامل على انها العام ببواطن الامور وقال ايه تعرف المدرس او
المدرسه كويس والفتي يشتغل !!!
يدخل المدرس من دول بلسته الطلبات من كراريس
والوان الجلاد وشكل التيكت والجو الفاكسان ده ( بعد كده بقت المدرسه تجهز اللسته
قبل الدراسه عشان توفر الكام يوم اللي بيروحوا في قصه ان لسه ما جبناش الكراريس
ولا لسه ما جلدنهاش)
اول كام يوم بقه تبدا انتخابات مجلس الفصل
ورائده الفصل , ومجموعات الانشطه من اذاعه , خطابه , قران, موسيقى, مسرح معرفش اذا كانت الحاجات دي لسه بيعملوها ولا لاه
انا شخصيا كنت راشقه في الاذاعه المدرسيه طول عمري
ثم تبدا رحله شراء الكراريس وتجليدها كانت
بتبقى من اسخف ما يكون
وبعدين رحله شراءالكتب الخارجيه اللي في رايي
نظام موازي للتعليم الطبيعي في وجود منظومه فشل التعليم !!!
عندك كمان لبس الالعاب والكوتشيهات
هبه فجاه تلاقيك داخل على امتحانات اول شهر
معرفش ازاي
وشهر في شهر يكر التيرم واجازه نص السنه تيجي
بالسلامه بعد طول غياب !!! يااااه ايام
والله !!!
بقرا النهارده خبر عن نيه اداره مترو الانفاق المبجله عن نشغيل موسيقى هاديه في المترو قال ايه عشان تهدي اعصاب المشتركين ويا ريت وقفت عن كده كنا قلنا والله فكره مش بطاله بس اللي يغيظ انهم قال ايه ناويين في المقابل يزودوا سعر التذكره !!! اصل الموسيقى من اساسيات الشعب المصري ما يقدرش يروح الشغل غير وهو بيسمعها
نسيوا ان الركاب اعصابها تعبانه من سوء الخدمه والشحاتين وتجار الشنطه اللي ملوا المترو اللي زمان كان مثال للانضباط والقانون
افتكرت حدوته عن مترو دبي اللي اتحكى لنا ان الحكومه ادت امتياز الاعلان لاربع شركات لاربع محطات وبس وصرفت بيهم على المشروع كله والكلام ده من قبل ما يعملوا المترو اصلا
والله صعبت عليه البلد وأهلها وافتكرت مثل كانت جدتي بتقوله : ما لقيوش عيش ياكلوه جابو عبد يلطشوه ( وفي روايه اخرى جابو قرد وسلسلوه و او حمام وطيروه !!! ) يا اخي حرام عليك ده اللي يعوزه البيت يحرم عالجامع مش تقولي مزيكا !!! اقولك عايزين مراجيح وبلاي ستيشن ومساج كمان
يمكن البوست ده شخصي حبتين ويمكن مش كل الناس
تحبه بس بما انها مدونتي بتاعتي يعني ما يضرش نوجب شويه مع اجدع صحاب
شله من بنات غايه في الاختلاف والتناقض في بعض الاحيان
!! ويمكن ده اللي خلانا نكمل مع بعض لاننا فعلا بنكمل بعض (في الجنان أو في بعض
الاوقات في العقل, ما علينا)
م.ع : اللذوذه الفرفوشه النعنوشه اللي في اي
وقت تعوزها تلاقيها في التواليت بتسرح شعرها !!! واللي في الرحلات كلنا كنا بناكل
اكلها , واللي دخلت الشمسيه جامعه حلوان !!! واللي بتقف في سكاشن صيدله سبع ساعات
باعلى كعب في الدنيا , ليها مشيه مميزه بالشمسيه تعرفها من اول الجامعه !!! واللي
دايما لما نحب نندل مع حد تقول " لا الا دي مش اصول ابدا" عمرها ما خلصت
ماده لاخرها بتاخد من المواد اللي يكفيها , واللي دخلت الترنتال جدول المذاكره
عشان تعرف تطبق اخر تلات ايام قبل الامتحان واللي دايما مجمعانا في بيتها واللي
عمري ما برتاح غير في بيتها , اروح واقعد بالساعات ولا كاني في بيتي افك الايشارب
وامشي حافيه كمان (مع اني في العادي مش بامشي حافيه !!! بس هيه الاريحيه في بيتها
منقطعه النظير) واللي يا ما مامتها رحمه الله عليها استقبلتنا واكلتنا احلى
اكل عندها. م.ع دي طول عمرها نفسها تشتغل مدرسه وفعلا عملت كده طب كان لزوم وجع
القلب في صيدله ايه يا امي؟ الظاهر عشان تصاحبنا . ذات الهدايا العمليه بطريقه غريييبه يعني
ممكن تشتري لحد فينا في عيد ميلاده دسته شرابات مثلا (عملتها مع حد فينا)او اقلام وكراريس كده يعني . استاذه في المرواح لحلوان عشان ناخد المترو عشان نقعد سوا وفي الاخر برضه ما بنقعدش سوا !!! يوم ما ماتها توفت اتصلت بيها من غير سبب "حسيت بيها معرفش ازاي وجريت ادور على ايشارب ساده عشان اروح لها اصل اليوم ده الايشارب الحمر الملعلع كان حابك معايا!!! لما روحت عمره انا واهلي (كانت لسه في المدينه ) استقبلتنا هيه وزوجها وقضوا لنا مشاورينا والله لو اختي يمكن ما تكونش حاتعمل كده معايا وللنهارده ابويا وامي مش ناسينها الحركه الشيك دي , افتكرت كمان حاجتين : حدفتلي الجرب يوم فرحها بس طلع اونطه !!! طلبت مني افرش لها اوضتها قبل ما تتجوز في تقليد بناتي بين الصاحبات ما عملتوش غير معاها وبعدين اختي
غ.اس. المعيده المنتظره اللي دايما كانت
بتتقمص دور المعيده المستقبليه واللي كانت بتقعد في المحاضرات تشوف احلى حاجه عند
كل دكتور عشان تعملها واوحش حاجات عشان تتجنبها , عمرها ما ردت على حد في التيلفون
ليله الامتحان " نداله !!!" بس جدعه وفرفوشه وتدخل قلبك من اول وهله ,
تسافر وتيجي وتتصل وتلمنا واللي عمر ما كان حلمها السفر بره مصر وكانت اول واحده
تسافر !!! وقت الجد ولد بقفشات لذيذه جدا , معرفش كان ايه حكايه النظاره الصفرا
عندها واللي لما غيرتها بقت بمبي . اي وقت تنزل وسط البلد لازم تجيب ايشارب ,
وكانت بتناطح المعيدين وتغلس عليهم معرفش ليه . طول عمرها نفسها تتعين في الجامعه
وفعلا عملت كده . انا وهيه كنا مسجلين خطر في كنتاكي التحرير
!!! حيث يوجد الكاتشاب والبطاطس تلاقينا !!! ونستهلك كميات غييير طبيعيه سوا أنا و غ.اس يا ما فطسنا ضفادع في سكاشن الفارماكولجي وياما لعبنا في الBioassya بلاش اقولكم بايه عشان ما تقرفوش !!! وا TS في الpharmacognosy تشهد علينا !!!
و.م من ساكني حلوان جنب الجامعه على طول واخر واحده توصل المحاضره
!!! دي بقه اللذاذاه كما يجب ان تكون كل لما اشوف علا غانم افتكرها , سماره قماره ,
صاحب جدع وابن بلد , اول واحده عندنا تفتح صيدليه واول واحده تقفلها !!! مش لانها
فشلت لا سمح الله بس سافرت بعد كده . يوم ما بابها مات اتصلت بينا ولما رحنا لها
قلبت القعده تهريج من كتر ما صدقت تلاقينا وتحكيلنا على حزنها ومن كتر ما ارتاحت
في قعدتنا قلبتها تهريج . جدعه اوفرسيز يوم ما عزنا حاجه لحد من صحباتي هيه ما
تعرفهاش قامت بالواجب وزياده , ام العيال المحتاسه بس برضه لسه زي ماهيه فرفوشه
ونعنوشه
س.ع اغرب انسان ممكن تشوفه في حياتك الجدعنه
والقوه والرقه والقسوه احيانا في نفس ذات الوقت , عاقبت نفسها ترم كامل ما روحتش معانا عشان ما
جابتش التقدير اللي هيه عايزاه واللي لما ما اتعينتش ما استسلمتش فضلت وراه لحد ما
حققته و في يوم من الايام حكتلي عن مصيبه عملتها وانا اللي اتخضيت ووقعت من طولي
مش هيه !!! بس عندها ثبات انفعالي منقطع النظير ولا فرق معاها وعدت الحكايه الحمد
لله
العبد الفقير لله انتوا بقه قولوا لي مين انا!!!
أنا , و م.ع , و و.م بينا كلمه سر اسمها صيدناوي دي بقه اللي لما بنقولها بنفطس من الضحك اصل ليها حكايه همه بس اللي عارفينها من رحله اسكندريه زمان . ان الله حليم ستار بقه !!! مره تانيه روحنا ل و.م في المستشفى اللي كانت شغاله فيها وسابت النبطشيه وخدتنا وروحنا اوضه النبطشي واديناها رغي لاخر الشفت كان يوم مش متخطط بس راااائع !!!
أما بقه و.م , و غ.اس اتجوزوا في نفس التوقيت تقريبا فجبتلهم نفس الهديه تقريبا , هديه انا نفسي ما كنتش اتخيل اني افكر في هذا التفكير والغريب واللي مش حانساه النظره اللي على وش كل واحده منهم (تقريبا نفس رد الفعل ) لما اديتها لها !!! همه بس اللي فاهمين !!!!
الغريب في الشله دي الناقض في كل حاجه , وكمان ماشاء الله كل واحده فينا اشتغلت ووصلت للي هيه عايزاه وبس وزي ما كانت بتفكر في الكليه .
الأغرب في الشله دي اننا نبعد نبعد بالسنين
ويوم ما نتقابل كاننا كنا سايبين بعض انبارح نفس الكلام والضحك والروقان , ما تخدش
راحتك الا معاهم ولا تتكلم من قلبك الا معاهم ولا تشتاق لحد الا ليهم كانهم انت
وانت هم !!! اخر مره اتقابلنا كان يناير اللي فات والله ما كنا عايزين نمشي وكانت
عزومه فطار من اجمل ما يكون (سلطانيه القهوه اللارج في كوستا تشهد !!! )
حاليا عاملين جروب على فايبر مسمينه فعلا
اجدع صحاب ويوماتي ننكش بعض من مصر عالكويت على كندا !!! الغريب بقه اننا انا و
م.ع في مصر واخر كسل ما بنتقابلش غير لما حد يجي منهم ونتقابل مع انها في اخر
الشارع من شغلي !!! تلاهي الدنيا ووحشه عالاخر
الحواديت ملهاش اخر بس ان الله حليم ستار بقه !!!!
بس فعلا لما باسمع اغنيه اعز اصحاب بافتكرهم !!! اسمعوها معايا ودمعوا معايا !!! بحبكم كلكم وربنا ما يحرمنا من بعض انا نشرت البوست من ساعتين وكل شويه ادخل ازود حاجه ومستمتعه بيه لابعد الحدود
لفتره طويييله جدا كان بيمثل لي غطا على
الراس جبرونا عليه في المدرسه في السعوديه وقلب بنقاب من اولى اعدادي !! وقمه
الشيزوفرنيا اني اطلع من باب المدرسه اكشف وشي ولما اخرج مع اهلي ممكن اطلع قصه من
تحت الطرحه , واني لما انزل مصر البس اللي على مزاجي بس وانا راجعه لازم البس
العبايه في الطياره !!!
الشيء ده هو اللي المطوع ضربني في السوق وانا
في رابعه ابتدائي عشان كاشفه وشي وهزق ابويا وقاله بالحرف " بنتك صارت مره ما
يصير تكشف وجهها "
نزلنا مصر وفي المدرسه استمر الجنان ده
باجبار البنات على لبسه وقتها المدرسه اللي دخلتها كانت من احسن المدارس فاهلي
دخلوها لي وقالوا لي ابقي اقلعيه بره
وزاد كرهي ليه واللي زاد الطين بله زي ما
بيقولوا زن بعض ناس قرايبنا في الرايحه والجايه عالحجاب !!! مع ان عمر ما اهلي
جبروني عليه " في حدود المدرسه في مصر والسعوديه بس كنا مجبرين عليه"
اللي زود الحكايه بقه لما اختي الصغيره قررت
تتحجب ودي بقه كانت الطامه الكبرى والزن والكلام زاد معرفش ليه ما كل واحد حر
الغريب ان عمري ما كنت من البنات اللي
مزودينها في لبسهم وانا مش محجبه اللهم الا في بعض المناسبات القليله جدا
وامتحانات الشفوي في الكليه لكن بصفه عامه كنت من المحترمات جدا حتى وانا مش محجبه
لا انكر ان دماغي كانت رايحه وجايه بتفكر فيه
وربطات الايشاربات , وشكل دبابيس الطرح والوانها والتفاصيل النمنم اللي بعض زمايلي
كانوا بيعملوها وكانت بتعجبني
ما تفهموش ايه اللي حصل يوم من ذات الايام
قررت الصبح وانا نازله البسه وبدون اي مقدمات !!! لدرجه ان زمايلي كانوا لسه معايا
في الجامعه الامريكيه لحد 10 بالليل من غير حجاب وسبعه الصبح تاني يوم لقيوني
محجبه !!!! لاول وهله تخيلوا اني غسلت شعري وملحقتش الفه او انشفه !!!
ولبست الحجاب وانا معنديش غير حاجتين تلاته
بكم وخدت ايشاربات من مامتي واختي وبعدين بدات اشتري هدوم !!! وكنا في بدايات
الصيف يعني الموضوع كان صعب
بعدها باسبوع جالي ايشارب هديه فزميلتي
بتقولي عايزه اجربه فسبتها تجربه وبعد ما قاسته قررت انها تلبسه وكنت الحمد لله
سبب في حجاب واحده صاحبتي من غير تخطيط !!! صحيح قلعته بعدها بكام سنه بس اهي
لبسته شويه
الفرض عشان يبقى فرض والواحد يعمله لازم يجي
من جوه الواحد مش من براه لا من المجتمع ولا من المدرسه ولا من المطوع ولا من
العيله ولا من اي حته غير نفس الواحد وبس والا حفك النقاب اول ما اطلع من باب
المدرسه , واقلع الحجاب في مصر والبسه في السعوديه !!
والحمد لله عمري ما ندمت على لبس او تسريحه
شوفت واحده مش محجبه عاملاه لاني انا اللي اخترته مش انجبرت عليه
عشان كده عمري ما انكرت على اي واحده عدم
حجابها ولا حتى انها قلعته بعد ما لبسته في النهايه هيه حره لان اكتر ناس كانت
بتضايقني كانوا اللي بيزنوا عليه فيه واكتر ناس شجعتني عليه الناس اللي عمرهم ما قالوا
لي البسيه بس لبسهم وتصرفاتهم كانت شيك وبتدعوا ليه ببساطه وتلقائيه
ما تحكموش على الناس بمظاهرها ياما محجبات
شمال وياما مش محجبات زي الالف وفي النهايه ربنا اللي بيحاسب مش البشر ولا المجتمع
والمقصود بالاشياء هنا : الجماد , الحيوان,
النبات , او حتى الاماكن !!! غرام من نوع خاص وعلاقه غريبه بين الانسان والاشياء
مش كل الناس بتقتنع بالموضوع ده بس بيحصل
فعلا وبشكل مش مفهوم
سمعت عن عربيه تعطل وتبوظ لما حد غير صاحبها
يسوقها؟ او حتى يفكر يبيعها؟
طب سمعت عن ناس بتكلم الزرع وهيه بتسقيه
وتنضفه وينمو ويزدهر مع شخص واحد بس
طب سمعت عن حد بكى وهو بيبع عربيه بالرغم من
انه طلع عينه في بيعها
ولا حد يحب مكان قوي وما يعرفش يقعد وينبسط
غير فيه
في ناس بتحب شارعها ومدرستها ومحل العصير
اللي فيها
في ناس لما قطهم مات في الساحل بطلوا يروحوا
المكان ده لانه بيفكرهم بحزنهم عليه
في واحد كان مربي غيه حمام ولما مات سرب
الحمام طلع وراه لحد المقبره
طب في واحد قريبنا دايما بيقول لما يكون ليكي
املاك لازم تروحي تزوريها عشا ما تزعلش وتبوظ !! ويسيب عيلته وولاده ويروح بيت
البلد أو شقه اسكندريه يفتحهم ويشقر عليهم ويتنه راجع ولو ما عملش كده الزياره
اللي بعدها يلاقيهم فيهم حاجه خربانه !!!
مستغربين ليه مش الرسول كان بيقول احد جبل
يحبنا ونحبه , طب والله حبيته لما شوفته ووقفت عنده
ولا الغصن اللي الرسول طبطب عليه بعد ما كل
اللي في المسجد سمع انينه لما الرسول نقل المنبر من عنده
حاجات غريبه بس فعلا بتحصل هيه حب ووود بين
الانسان والاشياء بدون سبب او معنى واضح بس هيه حاله وبتحصل ولا انا اللي اتجننت ؟! يمكن !!!
في يوم من ذات الايام عرفت ان محكى القلعه
شغال فسالت اصحابي على فيسبوك لو حد عنده تفاصيل ومواعيد الحفلات , واحده صاحبتي
ردت عليه من بره مصر بجدول الحفلات , المهم الموبيل ما فتحش الصوره فنسيتها
بعد ما روحت واتغديت ورغيت مع اهلي افتكرت
الحكايه دي فدخلت شوفت الجدول لقيت ان في حفله لعلي الحجار فزعلت انها فاتتني شويه
وببص لقيتها 10 بالليل وانها لسه ما خلصتش , الساعه كام يا حلوين 8.30 فبقول لاهلي
ما تيجو اللي قالي تعبان واللي قالي مليش مزاج وماما قالت لي انا عارفه من الصبح
بس قلت انك مش بتحبي الزحمه وان ممكن يكون في صيع وكده هناك
دخلت على جروب الفيس بوك لقيتهم بيتكلموا ان
الناس هناك معقوله وان نوعيه الحفلات دي ما بتستهويش الواغش وان الجمهور محترم
اتشجعت جدا وكلمت ولاد خالتي الساعه 9.00
نتقابل بعد 10 دقايق يا لقينا تذاكر يا لفلفنا شويه بالعربيه وسمعنا حفله لام كلثوم
وتننا راجعين
وصلنا ومن شده الزحمه ما دخلوناش بالعربيه
فنزلت مامتي وخالتي وانطلقت في رحله البحث عن ركنه , ركنت فين بقه ؟ في السيده
عائشه ورجعت ده كله مشي !!!
جو القلعه كان ساحر ولعب الاضاءه والجو كان
بديع اتصورنا صور تحفه وفضلنا نمشي من الباب لاعلى مكان في القلعه اللي فيه الحفله
قعدنا ماما وخالتي وقلت لولاد خالتي تعالوا
بس حنقعد قريب وحننبسط وطبعا همه اتريقوا عليه لان الزحام كان رهيب والناس كانت
واقفه
قربنا من المسرح ودخلت بين الصفوف معرفش ليه
كنت مقتنعه ان اللي خلاني اشوف الجدول والحق اوصل قبل المعاد والاقي ركنه اكيد
يعني حيخليني اقعد وقريب كمان من المسرح فجاه لقيت كرسي بين عيلتين اتنسى في
الزحمه قعدت عليه انا وبنت خالتي وخدنا حته من الكرسي اللي جنبنا لان كان قاعد
عليه طفله , فين الكلام ده في الصف التامن !!!
شويه واللي ورايا بتقول لاختها لازم نروح عشان
الوقت اتاخر فقعدت بنت خالتي واخوها عليهم , شويه والكراسي قدامي فضيت فلقيت نفسي
في سابع كرسي من النص
مش عايزه اوصف لكم روعه الليله والغنا والجو
والاضاءه وعلي الحجار وحضوره وابتسامته وجمال الجو العام واللي احلى من كل ده
المفاجاه الي مش مترتبه , انا من شده الفرحه من المفاجاه والجو العام والصوت البديع دمعت مع كلمات بعض الاغاني
اكتشفت ان لسه في حاجات بتبسط الوحد وان
الحفله بالرغم من بساطتها فهي جميييله جدا وان ممكن فجاه يومك يتغير 180 درجه بدون
سابق ترتيب وفجاه تنبسط قوووووي قوووووي من حاجه بسيطه وفي جو بسيط , وان مش لازم الحاجات تكون غاليه عشان تبسطك
بس الاهم من كل ده انك تؤمن بده وانك لما
تعوز حاجه قوي بتحصل قوي وبالتفاصيل اللي
شوفتها وامنت بيها بس المهم تشوفها عشان فعلا تتحقق !!!!
روحت الليله دي الساعه 1.3 صباحا ومن كتر
الانبساط ما جاليش نوم
Once I was invited to a friend's wedding ceremony , I looked
at myself in the mirror and said wooow
you are beautiful today !!!
I decided to take a nice photo and to change my Facebook
profile picture after that
When I went to the ceremony, I asked a friend to
take a picture at the entrance of the hall between the flower punches and I
wanted to be in the middle of them
It seems that my friend was not a very well trained photographer
, or even my mobile did not work properly and the pictures were not as I wanted
them to be , I took her the picture I wanted for myself and she was very happy
with them and me too for her smile
After going home I decided to crop the pictures even at face
only and let’s forget about the big picture, and surprisingly I found nice
details I even did not see there :I
found two nice pigeon statues that were so romantic and nice, the crystals
hanged around the couple’s photos with light reflection on them, the reflection
of the marvelous garden in front of me on the mirror behind me that looked very
real in the picture !!! And my smile !!!!
Although the big picture was not as good as I wanted it, but
the tiny fine details even made me happier !!! , by the way uploading that picture in facebook had a big number of likes and comments like no other picture had !!!
It is the same for our lives, you may not be that happy with
the big picture, but for sure your life will have the needed tiny details that
eventually will make you happy
The most important thing is YOU to be satisfied and grateful
for these tiny details that will make all the difference
