غاب القمر يا ابن عمي يالا روحني !!

 

معرفش مين الجهبذ في وزاره الكهرباء اللي قرر يرشد الاستهلاك بانه قرر يخلينا نعتمد على نفسنا في تنوير الشوارع واضح ان الفاتوره    بعد اخر زيادات كانت جامده شويه في مشهد سيريالي عبثي من هو اللي بنعمله في الناس حيتعمل فينا ولا ايه :)

يا سيد الناس طب والشوارع اللي مفيهاش بيوت ولا محلات تتنور ازاي؟ وماذا عن الناس اللي بتعدي من أي حته ويا سلام لو لابسين غامق دول حينولوا الشهاده على ايدك اكيد

بلاش العربيات اللي بتقرر هيه كمان توفر اللمضات وتطفي النور ولا اللي عكسهم ينوروا النور العالي ويعموا اللي حواليهم ولا اللي جاي في العكسي وضارب نوره في الضلمه في وشك كل دول حيطسوا في بعض واهو نخلص من شويه سكان مع اللي كان بيعدي قوق ونبقى قللنا الكثافه السكانيه شويه

طب حضرتك ليه مثلا ما تفكرش في حلول مبتكره زي السخانات الشمسيه اللي تشحن الفوانيس بالنهار وتنورها بالليل, او مثلا تنور عمود اه وعمود لا  سمح الله طريق السويس اللي منور نور ضهر ده كله نخفه شويه ونبعت شويه نور للناس التانين

طب حد فكر مثلا ندهن العواميد بحاجه فسفوري تاخد نور العربيات وتنور هيه وتعتمد على نفسها برضو

او امتياز لكام شركه إعلانات يعملوا إعلانات وينوروا اللوح وناخد منهم ضرايب بالمره

كل هذه الأفكار جات في دماغي وانا باسمع الدلوعه شاديه وهيه بتقول غاب القمر يا ابن عمي يالا روحني وانا ماشيه في احد المحاور العظيمه في التجمع الخامس مش في اي قريه في الاقاليم

بس ده كان حداهم في البلد عشان ما عندهمش عواميد نور انما احنا غاب القمر, والفوانيس, والاضاءه والعقل ومعاهم المنطق واحنا سنه 2024 ولا جايز معتمدين ان القاهره منوره بناسها

اه والله زمبؤلك كده

فطير الطاسه بالسكر

فطير الطاسه بالسكر

هفت عليه فطاير مقليه بتاعه زمان قبل ما كل حاجه تبقى موجوده في السعوديه لما يهفنا الشوق غلى فطير كانت ماما تعملها 

فطاير بسيطه سريعه تتقلي في الزيت في الطاسه وتترش سكر او تتاكل

بالجبنه

مش طعم الفطير المشلتت بس بتبقى مفقعه كده من قليه الزيت ومش دسمه زيه 

ميكس البساطه واللذاذه

كان خالي بيزورنا وفكرت ماما بيها وقعدت هيه وخالي يفتكروا الطريقه ويعلوا على بعض عشان جدتي برضو كانت بتعملها لهم

صحيت النهارده لقيت ماما عاملها عالفطار وعلى ما غسلت وشي كانت قاليه بتوعي

انا جريت ابص عليهم والضحكه من الودن دي للودن دي وعيوني لمعت من السعاده

وقعدت كلتهم برواقه كده وحسيت اني رجعت عيله بضفاير في ابتدائي وكانوا مليانين بطعم الزمن اللي راح دفا وحب وبساطه ومفيش اي خاجه ورا الواحد يوم الجمعه غير خروجه الحي الدبلوماسي في الرياض ثم بنده نشتري طلبات الاسبوع وناكل ايسكريم ونروح ننام عشان عندنا مدرسه بكره

جايز ما اشتقتش لطعم الفطير بس اشتقت لزمن ما كنا بناكله او ما حول الفطير من

ذكريات لزمن جمبيل

ننوس عين امه، الحيله بسلامته

امبارح واقفه في طابور في مصلحه حكوميه الست قدامي جايبه باكو ميني كاب كيك للولد وزيه للبنت

الولد ياكل ويرمي الورق مره ٢، ٣ استفزني بصراحه باقوله حبيبي كده غلط واماطه الاذي عن الطريق وبلا بلا بلا

تقوم البنت الصغننه ما تصدق توريني انها ما رمتش حاجه وماسكه الكيس وما رمتوش هللت لها وبرافو وقمر وبلا بلا

تقوم الام تقولي اصله الصغنن الدلوعه وهمه الفرق بينهم اصلا سنه مش اكتر

 وقاصه له قصه ومخليه شكله بنت اساسا وهنا انا سكت منعا للخناق ومارست أقصى درجات ضبط النفس

شويه والمحروس خلص اكل و فضل الكيس الكبير تقوم تقوله حطه عالارض لما عمو يجي يشيله!!! هو عمو شغال عند حضرتك يعني؟ 

يا وليه بدل ما تخليه يلم الورق بتخليه يرمي تاني انا حقيقي لم استوعب الاريحيه اللي هيه فيها وتصالحها مع مزبله ابنها

انا شفت ننوس عين امه في المستقبل مفخد واخته بتخدم عليه

وشفت بنت قمر واخده علي دماغها واخوها الدلوعه هو اللي متدلع

وشفت زوجه حيطلع عينها من ننوس عين امه وحماه مفتريه عليهم كلهم

وهنا جه الدور عليه وانا ماشيه باحوقل عشان احنا في لقسم اصلا ومش عايزين نتحجز في التخشيبه

مايسترو عن مايسترو

انا من عشاق حفلات الموسيقى العربيه اللي الاوبرا بتعملها لدرجه اني وصحابي بقينا بنختار الحفله من سمعه المايسترو 

في المايسترو الرايق اللي بتبقى من هدوءها مثيره للنوم وفي اللي عنده طاقه مبهجه ومعديه وده اللي بنختاره

من وسطهم كلهم تصاعديا حازم القصبجي ثم احمد عامر ثم مصطفى حلمي على القمه:  يناكش الاوركسترا ، المغني او حتى الجمهور والكل يكون في غايه السعاده

اخر حفله مكتش حتى لها بطل او بطله مخصوصه كانت من شباب الموسيقى العربيه بس البطل كان المايسترو مصطفى حلمي واللي كان متالق كالعاده 

لما وصلت وشفت البرنامج اتخضيت من دسامته الحقيقه بدايع فوزي وفريد، عبد الوهاب، الموجي وسيد مكاوي ، برنامج مرعب والله 

وكلهم كانوا احلى من بعض ومع تصاعد الجمال في النص الاولاني الحقيقه حفله مستقله بذاتها خلصت ١٠ مع اعظمهم كلنت غاده ادم  كانت في نهايه الفقره الاولى اغدا القاك وكانت حاله كده لوحدها 

بعدين النص التاني بدا والطاقه تهدى بشكل مش مفهوم قلت يمكن الاغاني حزينه او انا تعبت 

فجاه قبل اخر مغني يمسك  المايسترو المايك ويعلن ان المغني ( الشب الطرب على راي حد من اصحابي) تعب واتنقل المستشفى بس همه حينفذوا البرنامج عشان الناس تفضل مبسوطه ازاي معرفش

في ناس مشيت وانا بصراحه اعتبرتها قله ذوق وقعدت فضولا واحتراما للراجل والفرقه اللي عايزين يبسطونا افتكرت افيه انت اللي حتغني يا منعم وقلت عل وعسى تكون فرصه لتقديم ناس مختلفه مكنتش حتتشاف في العادي

اول اغنيه نفذها بالكورس وكانت تجنن.الاغنيه التانيه قرر ان عازف الناي يبقى صولو سماعي وقام العازف الشاب وهو خايف وصوت الناي كان واطي مع كل دقيقه بيعلى ويجلجل وكانت بديعه الحقيقه

الاغنيه التالته قدم حد من الكورس مغني رئيسي وكان لطيف والله

ثم احد مغني الاغاني السابقه تقدم وغنى قارئه الفنجان اللي كان بديع ( نفس المغني في اغنيته قلت في سري صوته حلو بس مفيش حضور للاسف) لكن الغريب بقه انه جلجل في الاغنيه اللي مكنش محضر لها اصلا  !!! 

وكان القدر بتعب الشب الطرب قرر يقدم عازف الناي اللي اتوقع له صولوهات كتير مستقبلا، والكورس يمكن بشيء من التدريب يشق طريق مكنش حيحصل لما صديقنا قليل الحضور اتسمع بشكل مختلف وحقيقي محتاج فرصه حقيقيه 

اما المذهل هو اداره المايسترو للمفاجاه وازاي نفذ البرنامج لاخر اغنيه بدون اي مشاكل وازاي ادار الحفله لاخر لحظه اللي هو كمان لو كان التعب حصل في الاول كان خلى اغاني النص الاولاني مكان التاني عشان يسيب الجمهور من غير خطط بديله في اخر لحظه او ينهي بغاده ادم مثلا ( عاده اتقل مغني بيتساب للاخر ) 

 لكن واضح ان التعب حصل في البريك بعد اكتر من نص الحفله ما كان فعلا اتعرض 

الحفله والاوركسترا في الحقيقه ماهي الا فريق والمايسترو هو مدير الفريق ومرض الشب الطرب ماهو الا ازمه اديرت بمعلمه 

والوضع كله ماهو الا صدفه قابل فيها التجهيز فرصه لتقديمه

Luck is when preparation meets opportunity 

مايسترو عن مايسترو فعلا يفرق تحيه وتقدير للمايسترو مصطفى حلمي بصراحه 

قصر البارون

سنين رايحه جايه عليه ولما بداوا يجددوه اتصدمت من اللون الجديد بس اتضح ان ده اللزن الاصلي بتاعه

قررت النهارده ازوره وصلت وركنت على غير العاده بسهوله

المدخل بعد كده عرفت انه كان الاصطبل اللي شخصيته فعلا ظهرت وانا خارجه

الحديقه كبيييره جدا جدا ومعتنى بيها ومنسقه بروعه

القصر عللى ربوه عاليه يتطلع ليها بسلالم كتير وكل ما تقرب تكتشف الروقان والذوق بتاع صاحبه

تماثيل للقصص الاغريقيه والرومانيه الواجهه كلها رموز وشخصيات هنديه وتنانين وتعابين وكم التفاصيل فيها حقيقي يخليك تسرح معاه

تدخل القصر المكون من بدروم للخدم والمطبخ متحول حاليا لاداره المكان

الدور الاول لاستقبال الضيوف, الدور التاني للسكن والاخير شرفه واسعه تطل على مصر الجديده كامله

القصر فارغ تماما بس استغلوا ده لسرد تاريخ وصور مصر الجديده وكل من شارك فيها وازاي كان عنده رؤيه لما لقى الاراضي حةالين النيل اسعارها زادت لدرجه خلت اسعارها مقاربه لاسعار باريس لما الخديوي قرر يجعل القاهره عباره عن باريس يس فيها نيل

يقوم البارون يخرج عن المالوف ويقرر يشتري اراضي كتير في الاماكن النائيه ويحولها لمكان متميز ويخططه على مزاجه واول حاجه يعملها الترام عشان يضمن سهوله تواجد العمال في المكان المطلوب

اما قصره فاكتشفت انه سابق التجهيز واتركب في مصر حتى التماثيل اللي ماليه الوحهات

رابط كل القصر باسانسير لسهوله حركه اهل البيت واسانسير للاكل اللي فكرني بمسلسل the watcher  فبعد ما قربت عليه خفت وبعدت !!!

نطلع لفوق الدور التاني عباره عن قوض تؤدي لبعض حوالي 5 غرف الارضيات باركيه والاسقف متزينه باويمات غايه في الرقه والشياكه ومليانه تفاصيل تجنن التيمه العامه ليها الزهور والملايكه

السلم الخشبي الدوار للسطح حدوته لوحده والنجفه الضخمه الواصله التلات ادوار حكايه وتطلع فوق تبص على مصر الجديديه كلها منها

القصر فاضي بس وزاره الاثار ملته صور ومخططات لمصر الجديديه وتاريخها والمشاريع الترميميه الحاليه كنوع من التوثيق مع افلام في اوض مختلفه للترميمات اللي حصلت وقبل وبعد

احلى حاجه في فراغه من الاثاث هو الخيال انا شفت حفلات وفساتين منفوشه وبيانو بيعزف في البهو تحت

وشفت اوض راقيه وبسيطه في دور السكن وبلكونات داير داير للاسف مقفوله تخيلتها مفتوحه ومدخله الشمس من كل مكان وهواء يجنن

شفت خدم وحشم بينضفوا ويلمعوا طول الوقت شفت ناس بتستمتع بالشرفه في شمس الشتاء وهواء الصيف بالليل واصطبل فيه خيول صاحبها رايح جاي في الجناين الشاسعه بتاعته

ما طلعش بيلف ولا حاجه ولا فيه سراديب سريه ولا اي خيال من اللي اتقال بس هو في المجمل مكان بيحكي قصه ورؤيه صاحبها نفذها بذكاء وتخطيط وكثير من الحب

حاطين في المدخل عربيات انتيك وعربيه من اول مترو اتنفذ من سنين كتير

روحوا حتنبسطوا هو مش متعب ولا مرهق هو ساعه بالكتير

عتابي بس ان سع تذكرته غالي نسبيا مقارنه بكل المتاحف والمناطق الاثريه في مصر بس تجربه مختلفه مليانه خيال للناس اللي بتسرح زي حالاتي

وش وضهر

 

الحقيقه الناس طلعت بيها السما خلتني اتفرجت عليها وخابت كل التوقعات

مليانه تضرع ودعاء للاولياء وده شيء خطير حقيقي في بلد اصلا مليان جهل وخرافات

واحد حرامي سرق فلوس وراح انتحل شخصيه دكتور وساب مراته متعلقه

وواحده محجبه الصبح ورقاصه بالليل ولما غضبت من زعيم الفرقه راحت هيه كمان انتحلت شخصيه ممرضه ومشيت معاها عادي

وصاحبتها شرحه وماشيه مع زعيم فرقه مسرح ستات وبنات وحملت منه في الحرام

ايه القيم والنماذج اللي بتقدموها دي ؟!

٩ حلقات بيكسب ويعالج ويكدب وحلقه واحده اتمسك واتحاكم امتى بقااا لما مراته عرفت وراحت عملت له قضيه تبديد وهو من خوفه اعترف بكل حاجه زي الشوال ؟! لا وايه بيقولك على لسان المحامي قضيه التبدبد اللي مراته الاولانيه عملتهاله اصعب من قضيه ممارسه الطب وان اخره حياخد فيها سنتين وغرامه لا تزيد عن 200 جنيه كتر خيركم والله

كده بنقول لاي فاشل كداب روح اعمل فيها دكتور وما يهمكش , ويقطع العلم غالتعليم والطب والسهر والمذاكره ما اللي معاه اعداديه اشتغل دكتور عادي

مورال اوف ذا ستوري خاف من الستات واوعى تكدب عليهم همه اللي حيكشفوك ويجيبوك الارض

الاهرام

الهرم 

اخر عجايب الدنيا السبعه

كان معايا ناس اجانب والحاجه الوحيده اللي اهتموا بيها يلحقوا يعملوها كان الهرم

لدرجه ان واحده رجلها مصابه كانت سعيده بمجرد الغداء في مطعم له فيو عالهرم

الراجل دخل ٣ وربع والدخول اخره ٤ ، التذكره ٢٠٠ جنيه والرش جوه ٤٠٠ 

بحسبه صغيره سريعه ساعه الخروج انا شايفه مش اقل من ١٠ الاف انسان خارج وده اخر ساعه 

يعني دهل مصر في ربع يوم حتى من الهرم ٢ مليون رسمي و ٤ اقتصاد التيبس اللي بالمناسبه بين السياس وامناء الشرطه والعساكر

يعني كده حسبه ٦ مليون رسمي و  ١٢ غير رسمي 

طب ما ننضف الواغش والسياس والقرف ده ونديره بشكل احترافي واعمل التذكره ٥٠٠ مش ٢٠٠ وقدم خدمه تليق بالمكان 

حقيقي على قد ما كنت مبسوطه على قد ما كنت مكسوفه 

الحقيقه انا ما دخلتش معاهم وفضلت مع الست اللي رجلها مصابه في المطعم بس كمان شنطه العربيه كانت كلها شنط سفر وما اتفتتش على قول السائق نظير كرمشه في ايد امين الشرطه !!! اللي هو مش مستوعب خطوره واهميه المكان والاهم عنده اللي خده من السواق 

غير الباعه الجائلين والشحاتين عند المدخل منظر مقرف وغير حضاري بالمره

الناس دي لازم تفهم خطوره واهميه مكانهم ، الهرم لازم يدار بذكاء اكتر من كده

سفروهم ودربوهم وفهموهم خطوره مكانهم واهميته 

ده جدو فرعون لسه بيصرف علينا واحنا مش مقدرين ده 

يارب اصلح احوال مصر وتدار بحب وذكاء اكتر من كده 

وبلاش سياسه اهبش واجري

 

فرق توقيت بيمبو

حلقات عربيه لطيفه جدا استوقفتني وشدتني فوق التصور الحلقه اسمها فرق توقيت البطله شيرين رضا وماجد الكدواني 

شيرين رضا ممثله مشهوره تغضب من جوزها في نص الليل وتطلب اوبر اللي هو ماجد الكدواني صيدلي محترم بس الدنيا غلبته وباع كل حاجه واشتغل على اوبر

 يوصلها المطار اللي فاضل علر طيارتها سبع ساعات 

وسكك وزحمه مصر حتى في انصاص الليالي وتحويل الطرق المهم يعني تعوز تدخل التواليت فيوديها بنزينه ويطللب لها قهوه وهمه بيشربوها تشوف بيمبو وتتعجب انه لسه بينزل وتاكلها باستمتاع غريب 

فلاش باك هيه وهو يقتكروا ذكريات الطفوله مع بيمبو ودريل المدرسه  القصير الغريب بتاع جيلنا الرمادي الكئيب ده وتحته قميص ابيض ساده وكرافت افتكرته كويس وازاي لما حبيت اروش مامتي طرزته بالمكنه بتاعتها ومكنش زيه في المدرسه والسنه اللي بعدها بقى بليسيه وف ثانوي اعلنت العصيان وخليته جيبه ما المدلرسه كلها لابسه جيبه اشمعنا انا اللي ملتزمه بالدريل يعني !!! 

وكان لازم الكرافت تتربط صح وتتقفل للاخر برضو معرفش ليه 

نرجع للبيمبو بقه وده كان احد علامات جيلنا مدرسه وجامعه فاكره مره شفته في كارفور واشتريت كرتونه منه عشان اوديه لصديقتي العزيزه لما ازورها, الزياره اتاخرت وولاد اختي قفشوه عندي وواحده في واحده خلصنا الكرتونه 

لما جيت بعدها ازورها ما لقيتش كرتونه بدلها وفضلت حاسه بتانيب الضمير لحد ما قلتلها وخليتها تسامح في كرتونه البيمبو اللي كلتها !!! 

نرجع بقه للحلقه ويقعد كل واحد يفتكر البيمبو من وجهه نظره لحاااااد  الاخر نكتشف انهم كانوا بيحبوا بعض زمان وبيبعتوا لبعض جوابات على ورق البيمبو بس هو لما سالته انت كنت في مدرسه ايه غير المدرسه عشان ما تتعرفش عليه 

ترجع في كلامها وتقرر ترجع وتقوله وديني اكل فول من عربيه جاردن سيتي اللي حكيت لي عليها وبصراحه النهايه كانت مش حلوه كان سابهم كل واحد راح في سكته وخلاص وساب الناس في حاله النوستالجيا البديعه اللي الحلقه عملتها 

احنا بقه مكناش بنبعت جوابات على ورق البيمبو احنا كنا بناكله في رحله الشقاء المضحكه من حلوان لبيوتنا بس كان قبله سناكس بتاعه هريدي او فلامنكو اللي برضو لما بالاقيه بالصدفه في النادي بافتحه واصوره واعمل تاج لغاده ومروه واقولهم في صحتكم 

ايااام جميله شفت الحلقه وكتبت البوست وانا باكلم صحبتي وهيه راجعه كندا وقعدت اضحك عالصدفه دي 

تروحي وتيجي بالسلامه يا دودي 

غرام في الكرنك

غرام في الكرنك

فيلم بسيط تصويريا وامكانيتيا 

لكن مفيش مره يتعرض غير لما تسيب اللي في ايدك وتعمل كوبايه شاي مزاج وتقعد بمنتهى الاهتمام تتفرج كانها اول مره 

رقصات كلها اتقان وخفه وتناغم بين الرقصه واللحن  مش معتمده على عصعصه الراقصات ولا لبس ملفت ولا غيره كانوا زيهم زي اي بنت في الشارع جسم عادي ولبس عادي كان تفصيل زي كل جيل امهاتنا ولا وارد الخارج ولا اونلاين 

بنات زيهم زي بنات جيلهم كلهم 

الفيلم كان سابق عصره مثلا لما خلى رقصه كامله عالمترنوم بس ورقصه تاتيه تيمتها طرقعه الصوابع لما رقصوا لفرعون رقصه حلاوه شمسنا اللي لاول مره شفت فيها الثلاثي المرح

الاغنيه اللي قعدت مثلا سنين باسمعها وانا رايحه المدرسه على اذاعه الشرق الاوسط ودي كمان كانت اذاعه مميزه جدا زمان بفواصل سناء منصور وايناس جوهر قبل ما تملاها الاعلانات وتتمسخ هيه كمان زي بقيه قنوات الاذاعه وتفقد تميزها 

الفيلم طلع مصر لما كانت مصر فاضيه ورايقه وناسها لسه مش متقطعه هنا وهناك وممكن تحجز تذكره تتفرج على رقص فنون شعبيه حتى المعابد اللي بقالها الاف السنين تحسها كانت لسه ما اتبهدلتش 

لما كان في حد مش بيستسهل و بيدور في كل المخافظات عالرقصات واللبس بتاع كل محافظه ويطلع منها درر مازلت موحوده بس كسلانين وبنستسهل نقلد الرقص الاوروبي والامريكي ونسينا تميزنا وده اللي عمله محمود رضا عشان كده كان مميز 

باستغرب جدا راحوا فين وليه ما كملوش اللهم الا محمود عفيفي لما عمل رقصات الفوازير سنين طويله ومات اظن من سنه 

هو الفيلم على بساطه امكانياته حقيقي كان ومازال جميل والواحد بيتسمر قدامه معرفش عشان هو جميل ولا  احنا اللي اتملينا نوستالجيا ولا الدنيا فعلا مبقاش لها طعم ؟! وما 

بنصدق نشوف حاجه حلوه

 

الشهد والدموع

ناس كتير قوي استغربوا اني لسه يادوب باتفرج عليه 

مكنتش ومازلت مش غاويه تيلفيزيون قوي يا جماعه اعذروني

الحدوته التقليديه بتاعه صراع الخير والشر المتمثله في الاخين اللي اختلفوا وواحد اكل فلوس اخوه وصراع الزوجه مع الاخ الظالم اللي في اخر الجزء الاولاني تحصل المواجهه مع سلفتها دولت هانم ونكتشف ان كل الكيد ده سببه ان شوقي رفض يتجوزها وقررت تنتقم منه في مراته وولاده وكيد يستمر على مدار 36 حلقه مجموع الجزئين!!! ان كيدهن عظيم صحيح !!! 

زينب شربت المر وشربته لولادها باستمرار في انتظار انهم يكبروا وينتقموا وعلى الناحيه التانيه يستمر نمو ثروه حافظ بالكيد والظلم وكل الوسايل 

يحب المؤلف يلطف الجو شويتين بقصه الحب بين احمد وناهد وحسين وسوزان واللي للاسف نكتشف انها هيه كمان كانت جزء من خطه الانتقام وبشاعه ونداله احمد مع ناهد اللي يتوازى بالنكسه وتنعكس النكسه على كل الشخصيات كل على حسب احواله حاول يحكي انكسار المصريين كل واحد حسب شخصيته ودي حقيقي كانت جميله  

مش حاحكي الحدوته ما كلكم عارفينها وانا بس الل اتاخرت معلش 

تنتهي الاحداث بانقلاب الدنيا على حافظ واستمرار سلسلال الشر في نجيه وجوزها ونعيده تاني 

العجيب فعلا ان مثلا المؤلف ورانا ان اللي عاش حياته كلها في حقد ورغبه في الانتقام فعلا كان بيربي نار جواه ما حرقتش غير نفسه متمثله في تعاسه زينب وحسين واحمد وحافظ ودولت ومختار وغيرهم  

وان اللي قرر ينفصل عن كل ده ويبص في ورقته ويبص قدام هو بس اللي نجا سواء من ولاد حاظ  (هاني المنبوذ اللي فعلا نجح في الاخر) وبنات شوقي الاتنين وما خدش باله انه نقض نظريه ان اللي معاه فلوس لازم ولاده يبوظوا والتاني ولاده يبقى مفيش كده ناسي انه لاتزر  وازره وزر اخرى وزيها المثل الشعبي يخلق من ضهر العالم فاسد والعكس في روايات اخرى ويسقي لنا بالمعلقه المشهد الاخير بتاع حافظ مع ابو زينب وانه خسر وانه حسبها غلط وبلا بلا بلا مع كثير من التمثيل المسرحي وتضخيم الصوت ليوسف شعبان !!! وطبعا عشان الرقابه لازم حافظ يتدروش ودولت تتشل !!!  وكانه بيخلص شر 35 حلقه ونص في ربع ساعه     

وبرضو فجاه يصعب عليه المشاهدين انهم يروحوا زعلانين فيقرر يصالح احمد وناهد في اخر مشهد من الحلقات ولمه العيله في البيت الكبير حوالين غدوه ظريفه بمنتهى الرومانسيه الغير منطقيه !! وقال ايه زينب تقرر ان لو دولت ضاقت بيها الدنيا بيتها يساعها !!! ياااا شييخه !!!

بس هو مسلسل حلو وكله نوستالجيا عالاقل من الجيل اللي اتربى عليه لا انكر هذا وفي بساطه الديكور واللبس بالظبط زي حياتنا زمان مع تترات على الحجار العظيمه شيء لا يمكن تجاهله الحقيقه   

المشكله ان  المؤلف نسي تماما ان في الحياه مش لازم الشر ينطفي ويخسر او الخير يستمر ويكسب عادي يا جماعه ماهو مش لازم يعني واللي عابش بفلسفه انه مستني العوض وانتصار الخير لو دول ما حصلوش حيفقد ايمانه وحتبقى المصيبه اكبر فبلاش تضخموا في الناس وتصعبوها عليهم الهي يعمر بيتكم لاننا شعب غلبان بيستمد ثقافته اصلا من المسلسلات فبلاش توجهوه في سكه ضلمه ممكن تنتهي بيه في مشكله مع قيم الحق والعدل والجمال احنا مش حصه فلسفه لان الحياه اصلا مش منطقيه  

اتمنى حقيقي نخرج من القوالب دي والرقابه تسمح بشيء من المنطقيه في الاحداث ونبطل نظريه ال24 قيراط اللي خواتونا بيها لانها حقيقي مش موجوده ومش لازم تحصل هو انتو ما نزلتوش الصعيد ولا رحتوا معاهد ومستشفيات الحكومه وشفتوا الماسي اللي فيها ؟؟ فين ال24 قيراط بتاعه الناس دي ؟ لازم نفهم الناس ان الدنيا اصلا دار ابتلاء ومحطه قصيره في رحله اطول مش لازم نركز قوي فيها حتعدي ونخلص بمزاجنا او غصب عننا  

واتمنى كمان نبطل نسقي الناس ان اي واحد غني فهو حرامي ولازم في اخر حلقه يتسجن او ولاده يحجروا عليه عادي جدا يكون فلوسه حلال وممكن يصرفها في الخير وحياته تكون كويسه او لاه برضو مش شرط نطلع بقه من ام القالب ده هو كمان  

ونبطل بقى فكره حافظ وشوقي او فراويله وعباس الضو وغيرها كتير الا اذا كان كتابنا وتيلفزوننا بس بيصبروا الناس ويحاولوا بدور الرقيب او الراوي يقولوا الهدف في اخر حلقه بعد ما زهقنا بكل اشكال الشر في 36 حلقه 

او ممكن اجزاء كتير ويقعد يزهق اللي خلفونا حكم ومواعظ زي ما حصل في مسلسلات تانيه 

بوظت ذكريات الطفوله وتمثيليات الشباب؟ اني اسف بس نكبر بقه ونستوعب ان التلفزيون ده معظمه فاساكونيا مش باقولكم مليش فيه وطلع معايا حق والله 

تتمسوا بالخير 

دقي يا مزيكا

مديرتي قررت ان كل ميتنج حنحط اغنيه من بلد حد فينا خلفيه للميتنج

المره الجايه مصر 

تفتكروا كده نحط ايه 

جماليات عبد الوهاب او بليغ مع ام كلثوم

ولا بدايع فوزي 

ولا ايه من الجديد 

جديد ولا قديم ومين

واكتشفت ان عندنا تنوع عبقري وحاجه كده غنيه جدا 

ومن كتر التنوع احترت 

وحافضل افكر للميتنج الجاي

الرجل ذو البدله البيضاء الشركسكين وقائع خروج اسره يهوديه من مصر

كتاب تأريخي عن مصر من الثلاثينات حتى عصرنا الحالي.

الاسره اليهوديه السوريه التي نزحت لمصر وصار ابنها من رجال الاعمال والمجتمع على لسان لولو ( الكاتبه ) والابنه الصغرى لهذه الاسرة 

وعرض لحياتهم اليوميه ومشاهد من حياه المصريين وزواج الابن وولاده ابناؤه والحياه المختلطه المنفتحه لكل الثقافات والجنسيات

ثم قيام الثوره واضطهاد اليهود واضطرارهم للخروج من مصر وتصفيه الاعمال 

وسفرهم لباريس وحياتهم هناك لمده سنه لحين عمل إجراءات الهجره لامريكا او اسرائيل 

عرض لنقيض حياه البذح والرفاهيهةفي مصر لحياه اللاجئين في فرنسا ثم الهجره لامريكا واعتبارهم من الفقراء والمعدمين !!! مرورا بنمو المجتمع الامريكي وانخراط الابناء فيه مع رفض تام للاب لهذا المجتمع ومحاولات نقل نماذج وأسر مصريه للمجتمع الجديد بلا جدوى 

ثم وفاه الاب والام والسماح للابنه بالعوده مره اخرى للقاهره

حيث تزور بيتهم القديم وتستعيد ذكرياتها فيه مع رؤيتها القاهره الحديثه المزدحمه الخانقه والشارع والبيت اللذان اصيبا بالشيخوخه والاهمال ومحاوله الرجوع للبيت بصورته القديمه بلا جدوى 

تشبيها لاي انسان يعود لمكان او ذكرى قديمه لتذكرنا بتلك الجمله المليئه بالسجن  " وان اعادوا المكان من يعيد الرفاق"

لتتسائل هل الاماكن هي من تغيرت ام كانت بمن كان فيها ويلقى السؤال بلا جواب 

كتاب مليء بالصور الجميله المليئه بالحنين لمصر الجميله في الاربعينات مصر التي ظل الاب يصرخ رجعونا مصر وحقيبته الدائمه التجهيز للعوده التي لم تحدث 

وتتسائل ماذا لو عاد ليون لمصر هل كان سيسعد بهذه العوده ام انه كان محظوظ وبشده بانه مات وهيه بالنسبه له قاهره الستينات التي احب والتي كان سبحزن لو عاد ولم يجدها؟ وتحدث له صدمه اضعاف صدمه لولو عندما عادت لتجد الشوارع مزدحمه خانقه فقيره وشوارع وسط البلد حول المعبد اليهودي مليئه بالمحلات الرخيصه والشحاذين حتى جروبي مقهى الاجانب والملك تحول هو الآخر لمسخ لم تستحنه عندما عادت له !!!

كتاب مليء بالانسانيه والكثير من الحنين والنوستالجيا 

والمعلومات الغزيره عن اليهود وطقوسهم هنا وهناك 

كما انه اثار الكثير من الحزن عند التفكير في اي انسان ينزع من جذوره غصبا وقهرا او حتى يعود لاماكن قديمه بعد تغيرها او تغيره هو الاخر 

ارجو ان يكتب كتاب مماثل عن الفلسطنين وتهجيرهم بالمخيمات وبلاد العالم بالمثل لعرض نفس الصوره لاصحاب الارض المحتله وسماع نسختهم من المعاناه الا انهم لا يجدون منظمات يهود العالم كله لمساعدتهم واعاده توطينهم مع الفارق في نسخه لولو ان مصر سمحت في النهايه ل لولو بالعوده وكتابه ونشر قصتها 

من امتع ما قرات ومن اكثر النهايات شجننا على الناحيه الاخرى 

 

البنك ده توماتيكي ؟ توماتيكي توماتيكي

البنك ده اليكتروني ؟!

توماتيكي توماتيكي

قررت بما اني في سيتي ستارز عشان تجديد الرخصه وبالصدفه شفت الفرع التوماتيكي توماتيكي بتاع البنك دوكها اللي مالي التلفزيون بقه بازاي اتطور واتنجر وبقى توماتيكي توماتيكي

دخلت صباح الخير عايزه الغي الbank statement الورقيه وكفايه اليكترونيه

ليه يا فندم

الفرع قالولي لازم فرع اليكتروني

انهي فرع ده ومين ونحقيق

ليه ؟ اصل اي فرع يقدر

ماعلينا الغيها حاضر البطاقه.اتفضل

ايه ده ، ده حضرتك مواليد الخارج

ايه المشكله لازم شهاده الميلاد

ينفع الباسبورت

اه

طب حاجيبهالك ثواني وكلمت البيت ابعتولي الصوره

طيب على ما الصوره تيجي واتساب مممن اقدم على توكن

لا معنديش

طب نعمل طلب واجي استلمه

لا حضرتك تقدمي عليه في الفرع

يادي النيله

وصلت صوره الباسبورت

بص عليها : لا مش حتنفع

ليه يا سيدنا

اصل اللي صورها حط صباعه على الورقه

احيه !!

طب نشيل الحته دي

لا مش حينفع !!!

طب يعني نحدث بيانات مش حينغع ، نلغي الbank statement الورقيه مش حينفع ، ناخد توكن مش حينفع

انا مخدتش بربع جنيه خدمه

يا سيدنا هو مش صوره الباسبورت بس عشان تطمن اني مش مواليد امريكا وانت اتطمنت ؟ حدث ام البيانات والغي البانك ستاتمنت

لا مش حينفع

واضح اننا يوم جمعه وجنابك مش عايز تشتغل وكل حاجه رميتها عالفرع الوحش اللي ورطك مع واحده زيي

تييييييييت

قالك توماتيكي توماتيكي

عندك بربع جنيه خدمه

لا يا فندم مفيش

يخربيت اللي فهمك التطوير انه اعلانات ويونيفورم والعقول مصديه ومفيش فيها امل

بكره احكيلكم حكايه تجديد الرخصه  

جدو

قاعده في النادي جه جدو وحفيده قعدو كده بهدوء ورواقه وقاعد جدو يقرا قران بنكهه الشيخ الحصري والحفيد ذي السبع سنوات يكرر وراه بمنتهى الود والحب والهدوء 

فكرني بجدي رحمه الله عليه في جلسته الصيفيه في بيت  شبرا على كنبه اسيوطي في اوضته وقت العصر وهو مقعدني على حجره وبيذاكرلي عربي او يسمعلي قران 

الجلسه دي رجعتني سنين طويله وملت عيوني دموع وشوق وكنت حاقوم اقولهم واقول للحفيد احفر القعده دي قوي في ذكرياتك عشان حتوحشك وبعدين ما رضيتش اضايقهم او افصلهم وانا واثقه ان في يوم حيحصله نفس حاله النوستالجيا دي لوحده

سكت وكتبت البوست وقريت له الفاتحه رحمه الله عليك يا 

جدو سيد  

سهره شريعي ، عزت ابووعوف

 لقاء عزت ابو عوف وعمار الشريعي 

مش اول مره اشوفه وكل مره باتفرج عليه باضحك وانبسط اكتر كن اللي قبلها 

الغريب ان عزت ابو عوف في دمه الفن والمزيكا من سن 5 سنين والاب الظابط وبرضو الفنان سابه وعلمه الموسيقى وجابله مدرسين ودخله اول دفعه في الكونزرفاتوار وسابه يعمل فرقه وخد اخواته معاه وعمل اغاني ومسلسلات وكان ناجح جدا  وهذا شيء عظيم على ظابط صعيدي الحقيقه 

لكن عند الجامعه نقطه نظام دخل طب وساب الموسيقا  الا انه لف ورجع ومثل وساب الطب نهائي 

طب ليه التعسيف ووجع القلب ودراسه الطب مش سهله 

ولو كان اشتغل بالطب مكنش حينجح 

غريب قوي والاغرب انه لم يشعر بضياع وقت ولا حزن على السنين دي ، مارس الطب 5 سنين كمان يعني حسبه 15 سنه عالاقل راحوا منه !!!

شكرا عمرو دياب

 

مانيش من هواه عمرو دياب ، اسمعه بس ما ادورش عليه ، معنديش له سي دي في عربيتي ولا فولدر في الكمبيوتر 

لكن على مدار سنين طويله كان ومازال شريط او سنجلايه عمرو دياب حدث سنوي مميز ممين ما تروح تلاقيه شغال 

بقينا بنعلم احداث وسنين باغانيه ، دي الاغنيه سنه الثانويه العامه، اتخرجت في سنه الاغنيه دي، فلانه رقصت في فرحها عالاغنيه دي ، علانه كانت بتحب الاغنيه دي وقارفانا بيها في كل حته وهكذا 

في جلسه رايقه في يوم مشمس في النادي وقاعده اقرا ومستمتعه قرر صاحب الكافيتريا من بعيييد يتحفنا بمكس لعمرو دياب 

الصوت جاي من بعيد بدون ازعاج ، قررت اقفل الكتاب واسمع واذ بي مع كل اغنيه افتكر موقف او سنه او حد والحقيقه كان مستوى الصوت والذكريات عالي ولطيف بشده 

لحد ما المغرب قرب والجو برد واضطريت اروح 

شكرا عمرو دياب على كل هذا المخزون من الاحداث والذكريات 

عيد سعيد

من غير رغي كتير 

كل سنه وقعده شاي بالنعناع طيبه 

العيد السابع 

يعني البلوج في تانيه ابتدائي !!

صوره في فيسبوك ميموريز

فيسبوك ميموريز النهارده طلعتلي البوم مجمع لاصدقاء الطفوله ابناء عمي محمد السرنجاوي ولنا بوست او بوستات مفصله عنهم لاحقا 

البوست كان عباره عن اعياد ميلاد مختلفه لكل واحد فينا على مدار السنين صورتها من صور حقيقيه عندي لان ايامها طبعا مكنش في لا فيسبوك ولا ميموريز  

اللافت للنظر والمشترك بينها جميعا البساطه، الضحكه، الاكل البيتي وصدق المشاعر وبساطتها 

ايام زمان قبل الفيسبوك والتشيك اين والمحلات المشهوره كان العيد ميلاد عباره عن ترابيزه مستطيله 

يوضع عليها تورت بيتي واحده شيكولاته والتانيه بالاناناس والكريز معرفش ليه 

واطباق سندوتشات بيتي صغننه عاده كفته او فراخ مسلوقه بالزبده والفلفل الاسود وبعد كده بقينا نحط عليها مايونيز 

ممكن صينيه بسبوسه ولازم قزايز بيبسي وميرندا وتلتف الاطفال ويتم التقاط الصور وكل واحد عينه على حته في التورته حتطلع للابد في الصور او نتجمع ونهف الشمع سوا وبرضو نفضل بنهف في الصوره للابد 

وتجري السنين وتفضل الصور متجمده في لحظات سعيده كلها براءه وطفوليه شديده 

اول عيد ميلاد ليه امي حكت عن انها عملت يجي 12 تورته اشكال والوان وزينه حركات ( مازالت محتفظه بيها وزوقنا بيها البيت يوم تخرجي من الجامعه واتشالت تاني) 

وعزمت الرياض كلها واخر اليوم بقى عندها اوضه كامله مليانه لعب معرفتش مين جاب ايه 

مكنش لسه في تصوير فيديو ولا موبايلات ولا اي حاجه 

اذكر عيد ميلاد وحيد اتصور لحد من اصحابنا ولقينا الفيديو بتاعه بالصدفه ويوم ما امي ادته ليهم كانوا طايرين بيه

 وتفضل حبه صور الوانها تبهت مع الزمن بس عمر مشاعرها ما تبهت والقاسم المشترك فيها البراءه والسعاده وناس حلوه عمرك ما تستغنى عنهم تجري تعملهم منشن ونضحك سوا حتى لو مفيش فيديو ولا صور كتير لانها محفوره مش في الذاكره ولكن في القلب من جوه جدا 

باي باي 2020

كل سنه اتعودنا نترجى الجديده تكون كويسه ويمكن نلوم ونعاتب السنه اللي ماشيه لاي حاجه زعلتنا 

السنه دي مكنتش سهله على كل الناس ، في ناس اتالمت جدا ، في ناس فقدت شغلها او احلامها او قرايب او صحاب 

كل واي حد فينا عدت عليه بحاجه مكنتش سهله 

كفايه قوي الحبسه والخوف والقلق من كل واي حاجه 

وكلنا صناديق مقفوله على اشكال والوان تعب وحزن مايعلم بيها الا اللي خالقها 

بس نحمده ونشكره على كل حال وانه ادانا اللي نستحمله 

دروس كتير قوي الحقيقه في اللي بنتشارك فيه وفيه اللي بنخبيه 

الدرس الاهم فيها بالنسبه لي ان في ناس بتيجي وتمشي ما نعرفش حكمه ربنا منهم وفي ناس بتعرفنا قيمه نفسنا وفعلا الناس معادن في ناس الماظ وناس ذهب وناس صفيح وفي ناس بترجع لاصلها التراب اللي ربنا بينثره في عينك عشان تدمع شويه مش عشان انت وحش ولا عايز يعذبك ولكن عشان يشيل غشاوه عن عينك ويجلي نظرك ويكشفلك طبيعه الاشياء والناس حواليك يمكن في يوم تعرف الدرس ويمكن تعيش وتموت ما تعرفوش 

سنه 2020 مكنتش أسوأ سنيني بالعكس تماما كانت سنه المكاشفه وال self reflection الاصعب للان واللي كان بالمناسبه مؤلم ومحزن نفسيا وجسديا لكنه كان ضروري واعتقد لحكمه من ربنا اكيد اكيد حيحصل بعدها حاجات كويسه وكويسه جدا 

شكرا على كل الدروس وشكرا لله على جميل ستره وفضله وثقه كل الثقه في عدله وحكمته 

يجعلها سنه بيضه عالكريم سوداء عاللئيم منيله بستين نيله عاللي ينكد عالحريم 

كل سنه واحنا طيبين وبستره وفضله عايشين 

حمام الدار

حمام الدار 

قصه غريبه حقيقي غريبه 

حاله مختلفه معقده لاقصى درجه وتصيب القاريء بالملل احيانا التشويق احيانا التفكير كثيرا 

هيه في حقيقتها 3 روايات لا تستطيع تميز علاقتهم ببعض 

غالبا هي روايه داخل روايه بماضي وحاضر وماضي ابعد 

الراوي او الكاتب هو الخاضر المقيم وحيدا مجترا ذكريات الطفوله ثم الطفوله الابعد 

واثناء صياغه القصه لا تكتمل فتبعث وتتجسد احدى الشخصيات لاستفزازه اما للانتحار أو استكمال ما بدا لتكتشف ان نفس الشخصيه كانت في القصه الابعد ماهي الا معزه في الدار!!! 

حمام الدار في الروايه الحاضره تسليته الوحيده في وحدته والتي عند طيرانها ذكرته بحمائمه الصغيره في القصه الابعد او القصه الاولى 

وبصيره الجده العجوز التي لقنته فكره ان حمام الدار لا يغيب وافعى الدار لا تخون 

لا ادري حقيقه القصه الاولى هي ماضي القصه الثانيه او مجرد هذيان شخص مكتئب مقبل على الانتحار 

حمائمه الصغيرات زينه ورحال ضاعوا في القصه الاولى 

وكانوا رمز لاخوته الاربعه بتركهم المنزل في القصه الثانيه  وفي القصه الاخيره اكتشفنا انهم توائم انجبهم وتوفوا غرقا في نهايه القصه وانهم سبب انهيار حياته ورغبته في الموت 

لتنتهي بفكره ان حمام الدار يغيب وافعى الدار تخون وان الفراق هو سنه الحياه رغم كل تشبثنا بافكار من نوعيه حمام الدار لا يغيب وافعى الدار لا تخون 

عميقه ، كئيبه، محيره ، مثيره لتساؤلات القصه الاولى ممله ، القصه الثانيه شيقه ، ليربط بينهم جميعا روايه الراوي او الكاتب لتظل محتار في ترتيب الاحداث هل مترابطه ام هذيان ام قصه داخل قصه ام مجرد حلم لتنتهي الروايه بانها لم تنتهي واصيب الكاتب بملل ورماها في الدرج السفلي برغم من محاولات الشخصيات استفزازه لاستكمالها !!!