هو احنا شعب طفس؟

كل سنه تاني يوم شم النسيم تلاقي مانشيتات الجرايد : المصريون يحتفلون بشم النسيم في الحدائق والمتزهات (ومتسالنيش ايه الفرق بينهم !!!) , وتلاقي الصفحه اللي بعدها ازاله معرفش كام طن نفايات من حديقه الحيوانات

الحكايه مش في شم النسيم ولا الفسيخ ولا الرنجه ولا الناس اللي بترجع لعصور ما قبل الاتاريخ وتلاقيهم في النادي عاملين بقليله من هنا وبقليله من هنا , ولا الست الشيك قوي اللي تلاقيها بتاكل راس البصله الخضرا في قطمه واحده تنزل مزلقان على معدتها ونسيت الشياكه والالاجه ولا حلل المحشي في جنينه الحيوانات ولا اي حاجه خلي الناس تنبسط

الفكره ان كل مناسباتنا مرتبطه بالاكل خد عندك : رمضان تلاقي السفره تتمد على اخرها كل انواع اللحوم والطيور والمحاشي والرز والمكرونه في نفس ذات الوقت مع ان صنف واحد من كل دول كفايه , وبعد الفطار كل انواع المشروبات والحلويات والتسالي ويقولك اطعام صائم , والله الصائم كفايه عليه صنف واحد

تعالى على العيد الصغير: الكحك والغربيه والبيتيفور والقراقيش وغيره وغيره وبكميات غير طبيعيه ونوزع هنا وهناك والقرايب والنسايب والجيران  ويفضل للعيد الكبير من كتر كمياته وبعد كده ندور نعمل ريجيم

العيد الكبير: اللحمه والفته والرقاق والمحاشي وايه وايه

مولد النبي: حلاوه المولد اشكال والوان والكميات الغير طبيعيه لحد ما تنشف وتلم النمل

عاشورا مناسبه صيام وشكر عملنا لها صنف حلويات !!!

اي خروجه نخطط لها : حناكل ايه وفين وايه

اي عزومه نتعزم عليها : حناخد للناس ايه تورته ولا جاتوه ولا حلويات شرقيه ( طب سمعتوا عن الورد طيب؟؟)

حد عيي ودخل المستشفى : الشكولاته والعصير

واحده ولدت: الموغات والسبوع والملبس والعقيقه (اساسا معموله سنه للتوزيع احنا بقه بناكلها احنا والضيوف طفاسه مش كده ؟)

افراحنا : حدث ولا خرج عن البوفيه المفتوح والاطباق المعممه اللي بيترمي نصها

ده حتى اللي بيعملوا ختمه قران بيدوروا على العشاء

المياتم بيجيبولها شيفات للبوفيه ويصوروه كمان ده ايه ده هو انتم فيكم دماغ لايه ولا ايه , ده حتى من السنن المهجوره اطعام اهل الميت عشان مش فاضيين مش اهل الميت اللي يدبحوا ويجيبوا شيفات !!!

انا مش ضد الاكل والاستمتاع بالحياه بس العقل زينه برضه وما ينفعش ارمي نص الاكل اللي بتمنظر بيه وفي ناس بتاكل من الزباله ربنا حيسالني عليهم

ده حتى ربنا بيقول "وكلوا واشربوا ولا تسرفوا " ولا ايه؟

Imagine

Imagine your life as a story (and it is) and you are its writer (and you are) but now you are writing it with ms word:

Did you start to imagine? Tayeb:

What would you:

·        Undo, redo?

·        Delete?

·        Save?

·        If you have picture tools : what would be the picture you draw for your life?

·        If you already have pictures which would you print and which would you save for later? And which would you delete?

·        Which part of the story would you write in bold, large font, small font?

 

PS1: now you are the author of the post so please comment in the blog not FB

PS2: ew3o teksefony we matrodosh ;)

روبابيكيا

بياع الروبابيكيا ده كان سابق عصره واوانه يعني من يجي ميت سنه هو اللي اكتشف اعاده التدوير او يمكن اخترعها , وعرف كويس ان اللي انا مش عايزه غيري عايزه وبالعكس

كان يمشي يلم من البيوت كل واي حاجه بازهد الاسعار ده كمان بيدفع للناس فلوس فيها

مع الوقت اتطورمن كارو بحمار وعجل خشب لعربيه نص نقل وميكروفون لبعد كده اوبن دايس في النوادي وسايتس على النت

لكن الملفت للنظر انه بالرغم من وجود المبدا عندنا وترسخه من سنين الا ان بيوتنا لسه مليانه كراكيب اشي برطمانات قديمه (يمكن نعمل مربى ولا مخلل واحنا افشل ما يكون فيها)

تلاقي اكياس محلات تحت المراتب (لنعوز كيس نحط فيه اي حاجه) ولو من العاديه تلاقي المطبخ فيه كيس كبيييير مليان اكياس (برضه لنعوز اي حاجه منها)

عند جدتي تلاقي الصندره دي مليانه العجب (لحد دلوقتي فيها الحلل النحاس بتاعه زمان طب يا ستي مخلياها ليه متعرفش)

تلاقي هدوم ماليه الدواليب بقالها ميت سنه ما اتلبستش ومش حتتلبس طب مخلينها ليه , انا شخصيا عندي كميه جزم مش بالبسها ومش بطلعها مع اني بطلع هدوم غاليه جدا بس عند الجزم ما بقدرش

تلاقي هدوم اطفال دلوقتي بقوا شحطه او حتى اتجوزوا وخلفوا طب مخلينها ليه متفهمش

وهكذا وهكذا

نيجي لنوع تاني من الروبابيكيا: روبابيكيا العقول :

خوف من الحسد, الجن, الزمن, تشاؤم وتفاؤل , عادات وتقاليد :  خرزه زرقاء وكف ازرق, ولبس قديم نلبسه لمولود عشان يعيش, ولد نلبسه حلق ليتحسد , عريس ما يشوفش عروسته يوم الفرح ليتنحسوا , بنت ما اتجوزتش تفرش فرش العروسه عشان الحظ, بخور يوم الجمعه ساعه الصلاه , اسماء الله الحسنى قبل الفرح وبعد كده الديجي يهد الدنيا , رز بلبن يتعمل يوم راس السنه الهجريه , قله تتكسر يوم راس السنه الميلاديه ,  واكتر حاجه موتتني من الضحك : الراجل ما يدخلش على مراته وابنها اللي بيرضع لو لسه حالق قال ايه اللبن يتقطع , او ضيف زهقان منه حط في المقشه ابره واكنس الحمام !!!!! ايه الجنان ده وغيره كتييييير

المشكله مش في الروبابيكيا اللي ماليه البيوت المشكله دي باعتبار ضيق المساحات والكركبه حتقل مع الوقت لكن المشكله  في الروبابيكيا اللي ماليه العقول ومش بتسيبها , افكار عتيقه عفى عليها الزمن في كل مجالات الحياه طب ما هيه دي بتشغل مساحه من الهارد ديسك اللي حينفجر من كتر الداتا اللي فيه طب نعمل ايه ؟

جنه

في يوم تلاتين رمضان 2008 صحينا على ماما بتجري وتقول " قوموا اختكم بتولد" طبعا محمود نط من السرير وفي خمس دقايق كانوا لابسين ونازلين ووصلوا المستشفى في المهندسين في ربع ساعه وسابوني في البيت ارتب واحضر للمولود اللي حيطلع من المستشفى علينا

بعد نصف ساعه اتصلوا بيه وقالوا لي بنوته اتولدت , نزلت بعد الفطار لقيت اختي والمجرمه بنتها في اوضه المستشفى

حب من اول نظره ووجه ملائكي تبارك الخلاق فيما خلق وبدا النقاش حنسميها ايه وكان راي جوز اختي انها جت في اخر يوم رمضان يبقى زي جايزه ربنا لينا الجنه هيه كمان حتكون الجنه وسميناها جنه

يوم عن يوم الست جنه تكبر ونصور فيها أغرب الصور (الصور دي عندي انا بس حتى مامتها وباباها مش معاهم) مره في شنطه اللابتوب ومره يوم شم النسيم تتصور بحزمه بصل اخضر ومره بسبحه وزعبوط اشكال والوان من الصور المسخره المضحكه جدا

يوم عيد ميلادها الاول كان حدث جلل حتى قدمناه يومين عشان كنت مسافره بعده , وبقت هديه عيد ميلادها بيترتب لها ولازم تتجاب من بره

 

وكبرت البنوته وبدات تمشي ونصور فيها وبدات تتكلم ويوم ما قالت لولو كانت تجنن لولو كده بعمق " طنط شفيقه ستايل بتاعه بوجي وطمطم !!!" وبدات اللامضه والحركات والقفشات

يوم جمعه نكون بنفطر في امان الله تلاقي اللي بيخبط على الباب بايده ورجله " افتحو الباب ده : متشرده "

مره تانيه اكون جايه من بره وتكون عندنا تقف في البلكونه تسيطني وأنا طالعه , تستخبى وقال ايه تخضني , نكون بنصلي تتحشر في النص وتتبشنق بالاشارب وتسجد بالعرض , عادي جدا !!!

ايام مااختي سافرت العمره كانت بتحكم عليه تروح النادي كل يوم قال ايه عشان تاكل وانا شخصيتي قويه جدا قدامها وبرضه ما كنتش بتاكل , ويوم ما راحت جنينه الحيوانات اخدت اجازه في تقفيل الشهر عشان الهانم حتموت من قله الاكل والاكتئاب ووقف اليوم علينا بصباع كفته بعد اسبوع من قله الاكل !!!! والا لما جبنا لها الصلصال وقعدنا نلعب بيه !!! (سحر بقالها تلات سنين بتنسيه لها!!!) واصبح الصلصال التسليه الاكيده لها واستخدمناه للمكافئه لو اكلت !!!!

مره كانت عندنا وكنت معزومه على فرح وشافتني وانا بالبس واحط مكياج ودي مسكت زبده الكاكاو اللي بالفراوله بتاعتها وعملت الواجب في وشها تقولوش سعاد حسني في فيلم الزواج على الطريقه الحديثه بس يا خساره ما صورتهاش في اليوم ده

دلوقتي الهانم بقه بتقف قدام المرايه وتحط مكياج ولا الفنانين وتختار اللبس وتوفق الالوان وكمان بتعمل مقالب وحركات

خالو محمود الشهير بحوده  بالنسبه لها احد العابها ممكن تكومه في الارض وترشه بالميه او تركبه حصان او حتى حمار , لا يمكن تنزل الشارع على رجلها لازم تركب على ظهره وتخبط على راسه وتبقى في منتهى السعاده وكتير تغمي عينه !!! 

اخر مقالبها في "حوده"  لزقت اللبانه في الكوتشي من جوه ولما جدوا شافها واتفقوا ان ده سر بينهم وشالوها من سكات كانت قاعده بتضحك بخباثه من تحت لتحت !!! وطول ما محمود ماشي بالكوتشي الشراب يلزق فيه اصلها ما شالتهاش كويس !!!!

بتمسك الموبايل بتاعي وتفتح الفيسبوك وتعمل فريندركوست لناس ما اعرفهاش ولما زعقتلها تقوم تقولي : ليه كده يا لولو الولد كان

 

اموو(لدغه في الراء) وكنت عايزه اكلمه !!!

وبقى لازم عندي بوست في الويكاند عن اخر نوادر جنه في زيارتها الاسبوعيه لينا !!! وله fan club  كبير من زميالي وصحابي !!

ويفضل عيد ميلادها يوم تلاتين رمضان زي شفيقه في فيلم تيمور وشفيقه بس يا ترى تيمور بتاعك شكله ايه ده اللي امه داعيه عليه  يا جنه هانم ؟

الافراح والليالي الملاح

طول عمر البنات بيموتوا في الافراح

اولكشي لو جيت على اي طفله صغيره يعني بدايه من 5 سنين حتلاقيها بتنبهر قوي بالعروسه وتجري وراها وتقلدها كمان

بعد كده تبدا تتزوق وترتب حالها وهيه رايحه اي فرح والفستان المنفوش والجزمه البيضه والشراب ابو دانتيل

شويه وفي اعدادي كده تبدا تحط مكياج طبعا مش رايحه فرح

على الجامعه كده تلاقيها بدات تتعزم على افراح وخطوبات اصحابها ونبدا في خناقه عايزه فستان سواريه , وكوافير والذي منه (الشباب اكيد مش حيفهموا قصدي ايه)

وتلاقيها رايحه الفرح كما لو كانت هيه صاحبه الفرح

شويه وتتعزم تاني وتالت فتبقى عايزه فستان سواريه تاني وتالت وتبدا الخناقه مع مامتها على الفستان والكوافير , ومع باباها او اخوها على طول الفستان أو الفساتين وشكل شعرها والشال اللي اوعي تقلعيه عشان الفستان كت !!

وبعدين تبدا البنات في الفرح تنظر على الجرب بتاع العروسه , وفي بنات بتبقى بتنظر على عرسان كل واحده وإمكانيتها , وفي اللي بترقص بعزم ما فيها قال ايه بتجامل العروسه يا شيخه عيني في عينك كده !!!

بعد كام سنه حتبدا تضحك على كل الحركات دي وتهدا وتبنبط وحتى ما تقومش تحاول تجيب الجيرب اصلها خدته كذا مره والاسطوره ما فلحتش !!!

نيجي بقه على الناحيه التانيه : العروسه : وكميه التفاصيل اللي بتاكل دماغها : لو خطوبه يبقى لازم الاشارب (لو محجبه ) يكون لون كرافته العريس

الكوافير, الميكاب , الجزمه , الخاتم, الديجي, التصوير, الفيديو , الورد, الجيرب, الورد على الترابيزات .... ومؤخرا استوردنا شويه تقاليع من الافلام الاجنبي والمسلسلا ت التركي: خد عندك مثلا : الجيست بوك, الصوره اللي لازم تتاخد وتتحط في مدخل القاعه, الكليب اللي بيتعمل للعريس وزيه للعروسه, الاساور اللي بتتعمل مخصوص لاصحاب العروسه, وصيفات الشرف , ازاي حتدخل القاعه, حتنزل من السما ولا حتتطلع من الارض ولا حتدخل بكارته ولا عربيه جولف , ولا حتطلع من الحيطه ,ولا ولا ولا ولا

تفاصيل التفاصيل , الشمع البدره, الشمعدان, الكوشه , الصور , الجرب حترميه ازاي ولمين (اصل بيبقى في تربيطات في الامور دي) . نسيت كمان اقولكم التورته وما ادراك ما التورته : كام دور وشكلها ايه وتصميم مين والماستر بيس اللي فوقها . غير الشو الروسي ولا الرقاصه معرفش مين والمطرب مين ده حتى الديجي بقه له اسامي بتتطلب بالاسم

ده كمان الموضوع من كتر ما هو معقد بقت سبوبه الويدنج بلانر دي بتأكل جاتوه وبقلاوه كمان

كل ده وما اتكلمناش عن الفستان وتصميم مين والطرحه ازاي وجايه منين والعروسه اللي تلف عليه في مصر كلها وفي الاخر تسافر تجيبه من بره او تشتريه اونلاين  ده فيه ناس بتشتري الفستان قبل حتى ما تتخطب وكان الغايه هو الفستان مش اللي حيتلبس له الفستان

نيجي بقه للمعازيم  قرايب قرايب القرايب , وزمايل زمايل الزمايل , وكل حد عايزه تغيظه العروسه او تتمنظر عليه , انا اعرف ناس بعد ما جابوا الفيديو معرفوش نص المعازيم اللي اتصوروا معاهم !!!

وفي الاخر يطلع بعد الهلك ده كله الفرح ساعتين وتجيب الفيديو تلاقي الناس بتتناوز وتتكلم على صحاب الفرح , ومين كانت احلى من العروسه والعريس ليه ما اخترهاش , ومين كان احلى من العريس والعروسه حلقتله وشغل عواجيز الفرح يشتغل

 

كل ده وما اتكلمناش عن شهر العسل والفوتوسيشن !!!

ايه كم التفاصيل والصرف والاستهلاك اللي بيحصل في الافراح دي وكأن العروسه من يوم ما اتولدت لحد يوم جوازها مفيش في حياتها ولا تفكيرها غير اليوم ده وتختزل حياتها في ساعتين

انا مش ضد الافراح والله ولا معقده ولا غيره بس الاهم من الفرح والفستان البني ادم صاحب الفرح اللي حيتلبس له الفستان

بالنسبه لي الفرح لازم يكون من ابسط ما يكون بالنهار اوبن اير  في مكان هادي وملموم , ما يتعزمش عليه غير الحبايب وبس مش عواجيز الفرح بالنسبه لي الفرح يختزل في انجاجيه مع بابايه وهو بيسلمني لحبيبي اللي لسه ما اعرفوش  ولحظه ما حيرفع الطرحه من على وشي

مفيش ابسط من كده  استقيموا يرحمكم الله

 

 

بنت فوق التلاتين

بتكلم مع صاحبتي النهارده عن رقم الثلاثين عند البنات فقالت لي انه شبح ورعب وكلام من ده ضحكت قوي وقلتلها دي كانت احلى سنه في حياتي هيه السنه اللي خلصت فيها الماجستير , وهيه السنه اللي اشتغلت فيها في الشركه اللي طول عمري باحلم بيها وهيه السنه اللي اشتريت فيها اول عربيه , وهيه السنه اللي سافرت فيها بره مصر لوحدي لاول مره وهيه السنه اللي المجرمه بنت اختي اتولدت فيها

بس فعلا قبلها كانت شبح ورعب معرفش ليه وتسال اي بنت تتخض من الرقم ده برضه معرفش ليه

لكن في الحقيقه بعده الظاهر جتته الواحد بتنحس وما بتفرقش

انا بقه اقولكم يعني ايه بنت فوق التلاتين في مجتمعنا العظيم تحبوا نبدا بايه الحلو ولا الوحش ؟

حابدا بالوحش لانه حيقلب حلو معرفش ازاي

يعني ايه بنت فوق التلاتين في مجتمعنا العظيم ده؟ يعني الكل بيتخض لما يسمع الرقم ده معرفش ليه , مش بس كده في بنات بتعتبره قلبه للعداد !!!

يعني في كل مناسبه او في الغالب من غير مناسبه كل طنط من الطناطيت تقولك ايه بقه مش حتفرحينا قريب , شدي حيلك , اتلحلحي شويه وكلام من ده تقولش حانزل اشتري العريس من السوق !!! ما تتلمي يا ست منك ليها والغريب ان منهم اوقات بيكونوا اتاخروا في الجواز يعني باختصار جايين يفكوا عقدهم عليكي

يعني لما تروحي مكان جديد شغل مثلا تلاقي الناس بتبص على ايدك بتعاينك يعني متجوزه ولا ايه طب  هو في ايه ما تتلم يا اخ منك ليه

يعني انت اخر واحده بتعرف بخطوبه او جواز أو حمل حد من زمايلك أو قرايبك , غلابه مفكرين الرزق فلوس وجواز وبس مش عارفين انه سكينه ورضا وراحه بال وحاجات صغيره بتبسطتك يمكن همه ما سمعوش عنها

يعني  مثلا غلطتي وفكرتي تشتغلي وتتعلمي وتتشتغلي على نفسك يتقاقلك " خفي شويه عشان مش حتلاقي حد يناسبك" هو يعني انا لازم اصغر نفسي عشان ااجي على مقاسكم !!!

يعني تحضري افراح الاطفال اللي شيلتيهم وهمه صغيرين فجتتك تنحس وتقلب معاكي تهريج كل ما حد يغلس عليكي فيتغاظوا وانت تبقي في منتهى السعاده

يعني صحباتك أو زمايلك اللي اتجوزوا لما يتناوزوا عليكي ويقولوا لك "معلش اصلك مش متجوزه ومتعرفيش حاجه " تقولي لهم الحمد لله الذي عافانا من ما ابتلى به غيرنا اصل اللسان احيانا بيكون ابتلاء على صاحبه وهمه بيكونوا كده بالظبط

يعني تقابلي ناس وتتعاملي مع ناس وتقدري تعرفي انت عايزه ايه بالظبط ومش عايزه ايه بالظبط

يعني تشتغلي وتتعلمي وتكبري دماغك وتقري كتير وتسافري وتبقي شخصيه متنوعه وعميقه مش سطحيه وهايفه

يعني تشوفي زمايل كتير اتجوزوا جوازه والسلام عشان خايفين من البعبع بتاع 30 ده وتلاقيهم مش سعداء فتحمدي ربنا

يعني شوفتي صحبات كتير اتطلقوا وتستفيدي شويه او تتعقدي شويه بس برضه بتبني خبرات مهمه في اختيارك وحكمك على الامور

يعني برضه شوفتي من زمايلك اللي جوزها مش مالي عينها فبدات تعرف عليه ناس وتتعلمي ان العريس اللي مش حيملى عينك حيوصلك لنموذج انت ما ترضيهوش لنفسك فما تقبليش باي شكل من اشكال الضغط

يعني تتصاحبي على نفسك وتخرجيها وتفسحيها وتعزميها على الغدا والسينما كمان وتتعلمي ان سعادتك لازم يكون مصدرها نفسك ومش اي حد تاني

يعني في الاول تكرهي عيد ميلادك لانه بيكبرك سنه بس بعد شويه تكتشفي انه حيقربك كل سنه لاحلى يوم اللي لسه ما جاش

يعني تكتشفي انك لسه ليكي احلام وطموحات نفسك تعيشيها ولازم تحقيقيها سواء في خاتم في ايدك او لاه

يعني كل رمضان يجي عليكي تعتبريه بونص كمان سنه قبل الجواز والعيال غصب عنك يمكن  يقعدوكي من التراويح والقيام وتصلي وتجتهدي كانه اخر رمضان

يعني يبقى عندك وقت تقري وتذاكري وتتعلمي وتعملي خير وتفرحي اللي حواليكي غيرك مش لاقيه

يعني عندك طاقه حب وحنان للي يقدرها اما اللي يدوس عليكي ما يستهالهاش حتى لو كان من اقرب الناس ليكي

يعني عندك دايره صحاب ومعارف مش لازم يكون سببها انك بتدوري على عريس لاه لانك عايزه تعرفي ناس , تستفيدي من خبراتهم , تعملي معاهم خير

يعني تبقي صاحبه الكل لانه احيانا بتكوني اكبر واحده في الشله فاكيد مش منظره على واحد اصغر منك بس فعلا عايزه يكون لك صحاب كتير ومتنوعين وكتير من الاوقات بتكوني البير الغويط اللي شايل حواديت ومشاكل اللي حواليكي او اللي حتى بيشوف حواديتهم وهيه بتبدا يمكن من قبل ما همه حتى يخدوا بالهم اصلهم بيبقوا مفقوسين قوي  

يعني يا ما ورد عليكي اشكال والوان عرسان صالونات وغيره  بس انت مش بتتنازلي عن الشخصيه والتفكير والعقل وبرضه الحيويه وحب الحياه اللي عايزاهم في شريك حياتك

يعني تقدري تميزي بين اللي بيستظرف والمحترم واللي بيضيع وقت او اللي حتى متخيل انه ممكن يجدد شبابه معاكي لانك على حد خياله المريض ممكن تقبلي باي حد

يعني تتعلمي تقبلي حياتك زي ماهيه وتفرحي بحاجات غيرك مش عارف يستمتع بيها ويمكن كمان يكون بيحقد عليكي فيها ولو جه الباشا اللي مش عارفين راح يجيب ورقه البوسطه منين خير وبركه اما لو تاه في السكه هو اللي خسران انت مكمله بيه ومن غيره

يعني التلاتين مجرد رقم والاربعين والخمسين حد يصدق ان عمرو دياب 53 سنه ؟

 

العمر لحظه

في لحظه كده تيجي تلاقي فيها كل الدوشه اختفت وتلاقي فيها هدوء وسكينه وروحك متواصله مع اللحظه اللي انت فيها

وتنسى كل اللي حواليك , وتنسى الدنيا باللي فيها , ومتسمعش غبر الحاجه اللي روحك اتواصلت معاها

اللحظه دي تيجي في لحظه وكمان تمشي في لحظه بسبب دوشه تظهر فجاه تطلعك منها

لحظه ما روحك تعلى قوي وانت بتسمع القران في التراويح في وسط قرايه طويله وتيجي ايه تدوسلك على جرح او تطمنك قبل ما واحد يعطس جنبك !!!

لحظه ما تسمع جمله موسيقى حلوه وتنسى الايقاع ووترواحد بس يعزف على روحك وقلبك قبل ما حد يصرخ جنبك !!!

لحظه ما تدعي جامد وروحك وقلبك تحس انهم رقوا قوي ودموعك نزلت قبل ما  التيلفون يرن!!!

لحظه ما انت قاعد على البحر وفجاه ماتسمعش غير صوت الموج قبل ما الدي جي يشتغل !!!

لحظه ما طفل يبصلك ويضحك لك  من غير سبب قبل ما يكشر فجاه وبرضوا من غير سبب !!!

لحظه ما تتفرج على فيلم وتتوحد مع احداثه قبل ما طفل يصرخ ولا موبيل يرن!!!

لحظه ما تتفرج على صور قديمه وتضحك من قلبك قبل ما حد يفكرك بموقف بايخ حصل في اليوم ده !!!

لحظه سهر مع صحابك في رحله قبل ما بابا يتصل يقول كفايه كده اطلعوا بقه !!!

لحظه ما تكون بتكتب البوست ده في الضلمه قبل ما النور يرجع !!!

اللحظه دي لازم تمسكها بايدك وسنانك لانها لحظه وفجاه تتسرق منك أو حد فصيل يفصلك بس بتبقى حلوة قوي

مش همه بيقولوا العمر لحظه؟