قص ولزق

مره سالت هو ليه الوان واشكال البشر مختلفه مع ان الاصل واحد : ادم وحواء ؟ يعني جينيا المفروض كلنا نبقى شبه بعض !!!

مش فاكره مين قالي ان ربنا ارسل جبريل يجمع حفنه تراب من كل قاره قبل نفخ الروح في ادم (معرفش اذا كان الكلام ده صح ولا لاه)

عشان كده تلاقي الاصفر والابيض والاسود ..... اشكال والوان يعني الاصل في الانسان التنوع

مش بس كده ده لا يمكن تلاقي صباع زي التاني ولا حاجب زي التاني ولا نص الجسم اليمين زي الشمال وده في الانسان الواحد ده حتى التوائم المتماثله لازم يكون بينهم اختلاف

امال ليه عايزينا نطلع نسخه واحده من بعض؟

تلاقي في العيله الواحده بقارنوا الصغير بالكبير

في المدرسه يقارنوا الاطفال ببعض

الاهالي عايزه ولادها كلهم يطلعوا الاول (امال ين حيطلع التاني بس)

كلنا لازم نذاكر ونجيب الدرجات النهائيه عشان ندخل ثانوي عام , وبعد كده عشان ندخل الجامعه, ومش بس كده الجمهوريه كلها عايزه تدخل طب

ما قالوش ان البلد محتاجه التعليم الفني زي الما محتاجه الثانوي العام  , ولاالخريجين محتاجين الطب والهندسه والزراعه والحقوق ومعهد التعاون كمان

وبعد كده كلنا لازم كلنا نشتغل في شركات مالتيناشونال , امال مين حيشغل الحكومه, والاعمال الخاصه

كلنا لازم نتجوز بنفس الطريقه والعريس لازم يجيب شبكه زي معرفش مين قريبتهم وتفاصيل الجهاز معرفش زي ميين تاني

كلنا لازم نجيب عيل واتنين وعشره

وكل الناس عايزه الولد ونعيده تاني من الاول في الجيل اللي بعده

ونفضل كلنا copy and paste  من بعضنا ونعيش ونموت بنجري في نفس السبق مع ان اللي بيسبق ده اكيد عمل حاجه مختلفه عن الباقيين يبقى ازاي كلنا لازم نبقى استنساخ من بعض ؟؟؟ 

وتفضل حدوته الانسان العادي اللي عاش عااااااادي واتعلم عااااااادي , واشتغل عااااااادي , واتجوز عااااااادي, وخلف عاااااادي, و برضه مااااات عااااادي L

 

الحجر الاسود

الحجر الاسود هو حجرنزل من السماء من الجنه  عن طريق جبريل عليه السلام لما سيدنا ابراهيم اتم بناء الكعبه الا مكان الحجر وبه تم بناء الكعبه

 

الحجر ده كان نازل ابيض واسود من ذنوب بني ادم ياااااه ده احنا وحشين قوي

وهو اللي الرسول عليه السلام جمع كلام بني قريش لما اعادوا بناء الكعبه واختلفوا مين اللي يضعه في مكانه فوضعه على ثوب وجعل كل واحد يمسك طرف الثوب ووضعه بايده الشريفه في النهايه

وهو يمين الله في الارض من استلمه سواء تطوع او في الطواف فكانما سلم على الله عز وجل تخيلوا !!!!

ريحته لا وصف لها وملمسه انعم من الحرير موضوع في اطار فضه في ركن الكعبه

اول مره استلمته  يمكن كان عندي سبع او تمن سنين , انا فاكره امي شالتني ودخلتني ليه ولان راسي صغيره دخلت كلها في الاطار ده وشميت ريحته اللي عمري ما نسيتها

بعد كده لما سافرت لوحدي في رمضان من شده الزحام ما لحقتش اوصل له بالرغم من المحاولات المستميته للوصول له بس ربنا كريم قوي العمره اللي بعدها كانه عوضهالي مرتين بالصدفه البحته وكانه عوض اللي فاتت

انا فاكره كنا في الفجر ونزلت بدري عشان الحق اعمل تحيه المسجد (سبع اشواط طواف) وفجاه الاذان اذن والناس كلها خرجت من حوالين الكعبه ولقيت كان انفتح لي طريق ودخلت بمنتهى السهوله واستلمته , انا من فرحتي ضيعت الشبشب  ورجعت الفندق حافيه !!!

المره التانيه بعده بيومين وكنا وقت صلاه العصر ولقيتهم عاملين صفين واحد سيدات والتاني رجالي والستات كل اللي تدخل من الزحمه يتفك اشاربها اترددت شويه بس لان من طبعي بلبس ايشاربين مهمنيسش المهم واقفه في الركن اليماني وقلت مش مشكله اهي دعوه مستجابه في الحته دي حتى لو ما وصلتش  وبرضه فجاه طريق انفتح ودخلت بمنتهى الاحترام وخلصت وطلعت معرفش ازاي !!! اصله كريم قوي

في المرتين دول كنت بحس فيهم ان ربنا بيطبطب على الواحد ويقوله لسه الدنيا شايله افراح ومفاجات حتيجي حتيجي بس نرضى ونعبده صح لاني في المرتين ما قصدتش اوصله !!!

عن عبد الله بن عباس عن النبي صلى الله عليه وسلم أنه قال: «والله ليبعثنه الله يوم القيامة له عينان يبصر بهما، ولسان ينطق به، يشهد على من استلمه بحق» امين يا رب

يوم من عمري : في زياره المصطفى

وصلنا المدينه المنوره الساعه 10 بالليل يوم 18 رمضان سنه 2003  ووقتها كان الحرم بيقفل بعد التراويح مكنش لسه 24 ساعه

زعلت قوي لاني عارفه ان من اداب زياره المدينه اول حاجه تعملها تزور الحبيب

المهمم وصلنا الفندق وقلنا حنتسحر بدري وننزل قبل الفجر بشويه , بس انا ما جنيش نوم عارفين اللي مستني معاد حبيبه انا كنت كده ما جاليش نوم من انتظار الحدث ده

بالرغم من عيشتنا في السعوديه وعمراتنا الكتير الا اني عمري ما روحت المدينه في دي كانت اول زياره ليه

بعد السحور نزلنا انا وعمي وزوجه عمي ورحنا الحرم وزي ما انتم عارفين ان زياره الستات بمواعيد وكان اول معاد بعد الشروق واختكم مش نايمه صليت الفجر وقعدت اقرا قران للشروق في انتظار ال  rendevouz   بتاعي !!

وللي ما رحش : عاده في حركات تمويه انهي باب اللي حيفتح للزياره للسيدات , اصل بيني وبينكم الستات بيعملوا مهازل هناك فبعد ما وقفت عند باب فتحوا ابعد واحد فجريت عليه قبل ما يقفلوه ودخلت يمكن اخر واحده وفي الاتجاه للمسجد القديم انت حاسس انك بتقرب على هدف جميل وقلبك عمال يدق ورجليك تخبط في بعضها المهم وصلنا للمسجد القديم وبعدين هناك بيقسموا الناس افواج فقعدت استنى الفوج بتاعي وفجاه برضه : هجووووم المهم بقوه الدفع وصلت وفجاه السجاد الاحمر بقى اخضر اعلانا بدخول الروضه

 

فرحه ما بعدها فرحه و والله الجو اتغير والهوا معرفش جاي منين وراحه وسكينه لا حدود لها , اصلها حته من جنه ربنا ياااااه احساس مختلف. السلام عليك يا رسول الله , السلام عليك يا خليفه رسول الله , السلام عليك يا امير المؤمنين عمر بن الخطاب مع ان الجزء المفتوح من الروضه هو غرفه عائشه وليس القبر (احنا بندخل من ورا مش من جهه القبر)  يومها زعلت قوي اني ما دخلتش من ناحيه القبر بس تعرفوا ربنا اصله كريم قوي بعد كده انا دخلته في الحلم وشوفته بالظبط زي التلفزيون !!!   

من الزحام صليت وانا واقفه احلى ركعتين في حياتي !!! بعد شويه فضي مكان قدام فصليت بسجود وركوع ومن الزحمه الماليزيات فكروني منهم فعملوا كردون حواليه عشان محدش يدوس عليه !!!  

اللذيذ في الموضوع ان زمايلي في مصر كانوا كاتبين لي ورقه فيها اسم كل واحده والدعوه اللي هيه عايزاها , ف وانا بقرا الورقه نسيت مين دول !! مين مروه ومين مها ومين ومين ومين ....... بس دعيتلهم بجد والله

اكتر حاجه بقه وجعت قلبي يوم مشايانا من المدينه : لازم من اداب المدينه اخر حاجه تسلم على الرسول وتستاذنه بالرحيل دي بقه اللي بكتني من قلبي وانا باعملها

بس عارفين ربنا اللي دخلها لنا في الدنيا لا يمكن يبخل علينا بيها في الاخره اصله كريم قوووووي

السلام عليك يا رسول الله , السلام عليك يا خليفه رسول الله , السلام عليك يا امير المؤمنين

https://www.facebook.com/#!/562451227215431/photos/a.562476710546216.1073741828.562451227215431/585870421540178/?type=1&theater

 

يوم من عمري: أول عمره لوحدي

كاي حد اتولد زي حالاتي في السعوديه , العادي انك رايح جاي على مكه مرتين تلاته في السنه

بس بعد ما بترجع مصر الموضوع ده بيتنسى شويه شويه

مره بعد  ما رجعنا مصر بيجي 14 سنه  كنت لسه متحجبه من كام شهر وانا باتفرج على التلفزيون وكان ناقل الصلاه من الحرم قلت لماما تصدقي انا نفسي قوي اروح قوي ووقتها اخواتي كانوا لسه صغيرين وكنا في وسط السنه فا مينفعش يجوا معايا  المهم ليه عمي الحبيب كان دايما يروح في رمضان فماما قالتلي قومي كلميه يمكن يطلع السنه دي مكدبتش خبر واتصلت بيه قعد يضحك وقالي رايح وعمك التاني وزوجته كمان رايحين وبكره اخر معاد للتقديم !!!

المهم طلعت معاهم ومش حانسى عمي الكبير لما انجني انا وطنط كل واحده من ناحيه ودخلنا الحرم معرفش ليه كنت خايفه انسى الدعوه اللي كان نفسي فيها وخفت من ربكه رؤيه الكعبه ما ادعيش وطنط كمان بيتهيالي حست بكده فبصينا في الارض وقلنا له لما نوصل الكعبه قلنا وفجاه اول مره احس بجمال الاسود فعلا الاسود يليق بها واول مره احس فرحه اللون الاسود وجلاله وعمقه وطيبته وحلاوته وحنيته كله في وقت واحد  ودعيت الدعوه اللي ان شاء الله مستجابه

كنا في ليله 25 رمضان سنه 2003 وصلنا الساعه 2 بالليل والطواف مكنش في اسهل منه وبكيت بكى كاني اول مره اروح وفي وسط الزحمه والدوشه مكنتش سامعه غير دعواتي وشايفه غير دموعي دموع تحس انها بتغسل روحك من جوه وراحه ملهاش زي ابببببدا

 وبعدها صلينا الركعتين وزمزمنا والفجر اذن وبعدين كملنا العمره بعد الصلاه  .

العمره دي مكنش في زيها لا قبلها ولا بعدها , حتى بعدها بكام سنه طلعت مع بابا وماما واخويا بس برضه مكنش في زيها  معرفش ليه يمكن عشان في رمضان , ولا الصحبه مختلفه , ولا بعد الحجاب على طول ولا ايه معرفش يمكن كمان عيد ميلادي قضيته هناك , جايز انا فاكره كويس اني حتى عيد ميلادي نسيته ويومها عمو محمود لقيته بعد التراويح بيقولي تعالي ودخلنا موفنبيك واكلني ايس كريم وبعد ما خلصت قالي مفيش تورته في رمضان انا مش مركزه فبقوله ليه فقالي كل سنه وان طيبه النهارده عيد ميلادك !!! عمري ما نسيتها وده كان احلى عيد ميلاد ليه في حياتي
 

بصراحه عمو سابني براحتي اكل وقت ما انا عايزه (انا اصلا باعمل زي السعوديين في رمضان وباكل بعد التراويح) اصلي لوحدي ما ارتبطناش ببعض في اي مواعيد وده يمكن السر الححححححريييييه والاحساس بالكنترول اللي خلاها احلى عمره ليه

عملت بعدها بكام يوم عمره لجدي الله يرحمه وكان في سيل وقت الطواف وكانت ليله ختم القران ووليله 29 . جدو بعدها جالي في الحلم   وشكرني !!

وتفضل عمره 25 رمضان من احلى عمراتي وعمري ما نسيتها يا رب عقبال الحج

 

 اللَّهُمَّ زِدْ هَذَا الْبَيْتَ تَشْرِيفًا وَتَعْظِيمًا وَتَكْرِيمًا وَمَهَابَةً ، وَزِدْ مِنْ شَرَّفَهُ وَكَرَّمَهُ مِمَّنْ حَجَّهُ وَاعْتَمَرَهُ تَشْرِيفًا وَتَكْرِيمًا وَتَعْظِيمًا وَبِرًّا " . .

اللهم امين 

Fantasy: Time machine

Now it is your life time opportunity I found the Time machine and I will allow you to use it!!!

·        Which time era would you go to (past or future)?

·        Why?

·        If you can be another person; which character would you play?

·        Why?

·        Whom would you take with you when going or coming back?


To start with myself I would choose to go to 60-70s (ayam el rawa2an ) to attend one of Om Kolthoum concerts . I would still choose myself because I am satisfied for who I am , I would get a picture of me with Thoma  when coming back!!!

 

Or
I may go to 19 century , in the English Country and attend a Walls dance like those in old movies , wear their nice dresses that make sound when you move !!! . I would still choose myself  but in 19 century style !!! when coming back I may get with me a Mr Darcy of Pride and Prejudice and see how he can act in 21 century .

COME ON be imaginative lets have some fun

الناس المفروسه من مرور المحروسه

 

اه والله ماهو اصل مرور المحروسه ده مليان عجايب وغرايب , مثلا احنا البلد الوحيده اللي بعد الشارع ما يترصف يفضل برضه مليان حفر وكأن الحفره علامه مميزه عشان الشارع ما يتوهش

احنا برضه اللي تلاقي البلاعات قي الشارع مش على نفس الخط مع انه نظريا هما متوصلين بنفس ماسوره الصرف فلازم يكونوا ورا بعض بس الظاهر همه بيقصدوا يسلوا اللي سايق عشان ما يزهقش

حدانا في المحروسه حتلاقي اي حد يطلع في مزاجه يقفل الشارع الجانبي ويحوله لجراج من غير ظابط ولا رابط مش بس كده يعمل مدخل خصوصي وبوابه كمان

احنا اللي بدعنا المطب الصناعي بتاع الاهالي يعني مش بتاع الحكومه , واحد مثلا من باب الدعايه عايز العربيات تهدي ناحيه المحل بتاعه يعمله مطبين تلاته عشان الناس تهدي قوم ايه تشوف المحل وتنزل تشتري . واختراع اننا نخططه طيب لحسن في الضلمه الناس تلبس فيه لا لا دي كماليات ما بنفكرش فيها !!!

واحنا برضه اللي بدعنا اختراع اليو ترن بدل التقاطعات قال ايه عشان الناس ما تقفش كتير قوم نسليهم ونلففهم حوالين نفسهم بالذات في مدينه نصر معرفش ليه

اليوترن ده بقه في اليومين اللي فاتوا اتحول للفراشه ترن حاجه كده منبعجه اخترعوها معرفش ازاي عباره عن اتنين يوترن لازقين في بعض موطنها الاصلي عند جامعه الازهر وقسم مدينه نصر تلاقي فجاه الشارع بقى اتجاه واحد بيصب في الفراشه ترن وبصراحه الحته دي عايزه مزيكه الموالد لانها فعلا بقت مراجيح مولد النبي وقال ايه عاملين لوح استرشاديه هاندميد تعر بلد بالمديريات اللي حواليها قال ايه عشان الناس ما تتوهش !!!

في شوارع المحروسه حتلاقي الاسلاك الشائكه ايفري وير ولما نقرر نفتح الشارع مش نشيلها بقه  , لااااااا نخليها على جنب عشان لما نعوزها نلاقيها من باب الاحتياط

واحنا برضه اللي ماليين الشوارع متاريس وورا المتاريس دشم كاننا في حرب , ما تقفلوا الشارع وتريحونا وتريحوا نفسكم ما هو كده كده مقفول وملوش تلاته لازمه

عندنا برضه الاختراع الهعظيم المسمى عسكري المرور اللي بيبوظ المرور ماهو يا عين امه برضه من كتر الوقفه في الحر والبرد والهباب اللي بيشمه كل يوم جاله تخلف , ففجاه تلاقيها قفلت معاه زي الدومينو ويستعين باي صديق من العربيات اللي حواليه يفض الاشتباك اللي حصل !!!!

احنا اللي لازم تلاقي عد مدارس البنات دوريه راكبه قال ايه عشان المعاكسات , وهمه همه اللي بيعاكسوا البنات برضه !!! دوريه فول اوبشن !!!

احنا اللي المرور عندنا لما يحصل حادثه اخر حد يوصل وبرضه امين الشرطه عايز الاكراميه بتاعته وفوقها شويه خدمات

واحنا اللي نمره النجده ما بتردش على الموبيل, لازم تتصل من نمره ارضي طب انا لو سايقه ولا عملت اي مصيبه ولا حد طلع عليه اعمل ايه , دور على رقم ثابت اتصل منه !!!

احنا اللي الناس من زهقها من الزحمه ممكن تتصاحب على بعض لما كل واحد يبطل عربيته وينزل يمشي رجله شويه

واحنا اللي اغلى اعلانات دلوقتي بقت في الراديو وقت الزحمه

واحنا اللي الحارات في الشوارع ممسوحه من كتر ما الناس مش بتستخدمها فالمرور بيوفر البويه ماهو اصل الاوبشن مش نازل لنا

واحنا اجدع ناس تلزق في عربيه الاسعاف في الزحمه عشان تخلص منها بسرعه

البوز بيز ده بقه اختراع مصري اصيل حط بوز عربيتك الاول تبقى لك الاولويه حتى لو ماشي معاكس

 

واحنا الشعب الوحيد اللي عنده شتايم بالكلاكس والنور فعادي جدا تتشتم وما تفهمش ايه اللي اتقالك وتكمل طبيعي جدا زي حالاتي 

مش بقولكم مفروسه من مرور المحروسه !!!!

ام رجب

طول عمرها في العماره اللي جنبنا زوجه الحارس بتاعها بس عمرنا ما سمعنا عنها غير في يوم صحينا على صويت لما جوزها مات وصحيوا الصبح لقيوه ميت ومن هنا ظهرت على الساحه

الست الجدعه اللي بميت راجل تقوم الساعه 6 الصبح تمسح العربيات ومش اي مسح بمنتهى الضمير والحنيه مش تدلق ميه والصاج يصدي لاه بفوطه مبلوله وبعدين تنشف وتلمع ولا كانها عربيتها ومن كتر احترامها لما حاولنا نخليها تمسح عربياتنا رفضت عشان الحارس بتاعنا ما يزعلش مع انها محتاجه الفلوس.

وبعدين تقعد زنهار على باب العماره للطالع والنازل ولا يمكن تسرح ولا ترغي زي باقي ستات الحراس في العماير التانيه والساعه عشره بالليل بالدقيقه تقفل البوابه ومحدش يدخل ولا يخرج الا باذنها امال ايه في نظام

ربت ولادها اللي يمكن خمسه او سته وما شغلتش بناتها في البيوت زي باقي العماير ولا هيه كمان خدمت في البيوت

ومفيش مره تشوفها غير مبتسمه وراضيه بجلابيتها البلدي الجميله وطرحتها السوداء الشفافه اللي تحتها التربيعه الفلاحي الجميله وسنتها المكسوره اه بس بتضحك قوي

ام رجب في نظري بعث للست الفلاحه اللي في تمثال نهضه مصر الست المصريه الجدعه اللي وقفت جنب جوزها وعمرها ما ظهرت في الصوره طول ماهو موجود لكن لما الظروف حكمت عليها كانت بمليون راجل وعمرها ما مدت ايدها ولا كسرت نفس ولادها بالعكس راسها عاليه ومرفوعه قوي اكتر من ناس كتير من البهوات والهوانم

ام رجب هي زي كتير من المصريات الاصيلات اللي موجودين وحيفضلوا موجودين ويمكن ماحدش ياخد باله منهم بس همه مش بيعملوا ده لاي حد همه بيعملوا ده لولادهم

بس هيه لو تبطل تغسل العربيه ام انذار اللي بتصحيني قبل المنبه بخمس دقايق تبقى مفيش منها !!!