زلزال 92

 

معرفش ايه اللي فكرني باليوم ده ؟ يوم 12 اكتوبر 1992 يوم جيلي لا يمكن تنساه

الساعه 3.09 اللي كان نايم واللي كان بيستحمى واللي كان بيتغدى زي حالاتي والقاسم المشترك بيننا كلنا هو فكره ان البيت بيقع هيه بس اللي جت في بالنا كلنا

لاننا كمصريين قبل اليوم ده عمرنا ما عرفنا يعني ايه زلزال غير من كتب العلوم والجغرافيا

عن نفسي كنت لسه راجعه من المدرسه وبنتغدى وفجاه لقينا فازه فيبر جلاس فوق التلاجه في المطبخ بتقع وبعدين ماما قالت الحقوا البيت بيقع , فاكره كويس اننا انا واخواتي اتسمرنا في مكانا وماما مدت ايديها حوالينا كانها بتحضننا , بابا جري على البلكونه يشوف ايه اللي حاصل وسمعت الجيران عالسلم نازلين جري

اطول تلاتين ثانيه في الوجود ومن اعنف زلازل مصر 5.8 ريختر , فضلنا قاعدين في مكاننا لحد ما خلص وبعدين ماما لبست ونزلنا نشوف ايه اللي حصل لقينا الجيران كلهم في الشارع بهدوم البيت ستات ورجاله بكل االاشكال اللي ممكن تتخيلوها

بعد كده افتكر التيلفونات باظت وماكنش فيه موبايلات فنزلنا على جدتي عشان نطمن عليها , جيران جدتي بالصدفه كانوا مخرجين عفش في الشارع باين بيعزلوا ولا ايه معرفش المهم واحنا داخلين الشارع ماما صرخت وقالت البيت وقع !!! برضه !! ولما قربنا اكتشفنا الخدعه الكبيره وان كل حاجه تمام , اخويا كان عنده 3 سنين وقال لجدتي بيت البلد وقع , الغريب انها اهتمت باللي قاله وقعدت تساله عن تفاصيل قالها لها وطلعت صح !!! وانا قعدت اتريق قالتلي خدوا فالكم من عيالكم , بعده بيومين تلاته بيت البلد فعلا وقع !!!

اليوم ده بين ايه هيه اهتمامات كل واحد اللي جري عالفلوس واللي جري ينجو بنفسه واللي ساب ولاده ونزل مالبيت واللي فضل ساتر نفسه ومانزلش واللي زي حالاتي كان لسه شاري كتب خارجيه في كيس وكان حياخدها معاه وهو نازل !!!

كل وحد جري باغلى حاجه عنده !!!

بعدها بيوت ومدارس كتير وقعت وكلها في رايي المتواضع كانت اولى علامات انهيار البلد من جوه تعليم ومدارس وبيوت وناس وشخصيات مخوخه من جوه وفي نفس الوقت اللي اتبرع بفلوسه واللي اتبرع بدمه واللي استضاف ناس عنده وفي اللي عاش في فوبيا من اي رجه للبيت حتى من ترله معديه هو فعلا زلزلنا من جوه قووي

زلزال 92 علامه فارقه في شخصيه جيل السبعينات والتمانينات واللي عمره ما نسيه , حد يصدق ان اليوم ده كان من 22 سنه !!!! انا عديتهم على ايدي من كتر ما كنت مش مصدقه !!! 
 ها انتم بقه ايه ذكرياتكم عن اليوم ده ؟

 



أمل وجورج النسخه المصري أم الأجنبي(4):

خلصنا الخطوبه عالجهاز عالفرح وشهر العسل وراحت السكره وفضلت الغدره زي المثل ما بيقول

جورج عايز يفطر فول بالزيت الحار وامل عايزه باتيه وكرواسان أو عيش سن وجبنه قريش لزوم الدايت

جورج متعود في العيد عالفته بالخل والتوم وامل اساسا ما تعرفش بتتعمل ازاي

جورج كل ما يروح لمامته يقولها وحشني اكلك فمامته تزغر لها وهيه تكتم في نفسها

امل نسيت تغسل الفراخ وتنضفها فالشربه والاكل كله طلع زفر فجورج ساب لها الاكل وقعد يبرطم على انه جعان وتعبان وكان نفسه في لقمه كويسه

أمل ما بتعرفش تكوي فهدومه طلعت مكسره

أمل غسلت الالوان مع الابيض ففستانها الاحمر بوظ قمصانه البيضا

امل حامل وبتتوحم ومش طايقه الاكل ولا ريحته وجورج زهق خلاص , امل نفسها في البطيخ في الشتا !! جورج زهق من الدلع

أم جورج جت زارتهم ومعجبهاش التراب اللي على الكونسول اصل امل عندها شغل كتير ومش فاضيه تاخد اجازه عشان الست تيجي تنضف ,جورج يقرر انه كفايه شغل كده وبلاش بهدله ,أمل تقوله احنا متفقين اني اكمل شغل بعد الجواز و انت مش بتحترم كاريري اللي تعبت فيه ولا ايه ولا هيه طنط سخنتك , الكلام ماعجبش جورج وسابلها البيت تلات ايام

أمل دبت خناقه مع جورج عشان ما خرجهاش من تلات اسابيع فجورج سالها هيه مامتك جت وانا بره ولا ايه فامل معجبهاش الكلام وقعدت تعيط وجورج ما صالحهاش, واحده بواحده  من الخناقه اللي فاتت !!  

الفلوس خلصت وقسط الشقه ما اتدفعش  

جورج نفسه أمل تكون زي مامته , أمل بتقول لجورج دادي ما كنش بيعمل كده معايا
جورج وأمل نسيوا ان باباها ومامته كنوا زيهم بالظبط من 30 أو 40 سنه
جورج وأمل بس نفسهم قصير وصبرهم قليل

فاقوا من كل الاحلام والعصافير اللي بتصوصو وصحيوا على ديون واقساط الفشخره اللي عملوها عشان يرضوا الناس والمظاهر

فاقوا على انهم يمكن ما يكونوش عرفوا بعض كويس

فاقوا على ان لو فعلا مفيش بينهم الحد الادنى من التفاهم ممكن الدنيا تتقلب عشان ملح زياده ولا قميص مش مكوي كويس

فاقوا انك لو بجد ما اخترتش صح ممكن ما تستحملش الي قدامك لان مزاجك مختلف عن مزاجه , الموضوع محتاج انك تكون عايز تستحمل عشان اللي قدامك يستاهل مش لانك مضطر تستحمل

اصل الحكايه صعبه واحد بيحب ينام في الضلمه والتاني عايز سهرايه

واحد بيحب الملح زياده والتاني اكله دلع

واحد اتعود يصحى بدري والتاني عايز يسهر

امزجه واذواق مختلفه في الاكل والشرب والتلفزيون والخروج فلو الحد الادنى من التفاهم مش موجود الخناقات حتكتر من اقل مشكله وعلى اتفه سبب

أمل وجورج في محكمه الاسره وافلام الشقه من حق الزوجه أو اريد خلعا , او اريد حلا  شغاله قدامه !!!!

جورج يفوق قبل ما يتقدم لامل فتساله كنت عايز ايه ؟ قالها حلو البارفان بتاعك اسمه ايه اصلي عايز اجيب زيه لنينه !!! أمل مش مصدقاه  أصل الرادار الانثوي لقطه من بدري نديله فرصه تانيه بكره ينطق , ومصيره ينطق  بس لما يضمن ان امل حتعمل undo  لكل الحاجات اللي خايف منها في سرحته الطويله قدامها !!!  اصل جورج ما يستغناش عن امل وامل ما تستغناش عن جورج !!!

امل وجورج النسخه المصري أم الاجنبي (3)

تبدا بخناقه على تمن الكوافير والفستان اصل جورج يا عيني جيوبه اتنفضت ومش ناقصه المزين بتاع امل اللي عايزله يجي 5000 جنيه عشان يمكيجها ويلبسها الطرحه بس الناحيه التانيه أمل شايفه ان منظرها وطلتها اهم حاجه في الدنيا ماهو الكوافير والفستان لازم يكونوا عالعريس امال هيه لابساهم لمين المهم تعيط شويه فجورج ما يستحملش دموعها ويسبل لها شويه بغمازاته الفظيعه ويدفع الفلوس وهيه تزقطط وتنتهي المشكله . ده دون الدخول في تفاصيل الفستان وثمنه !!!!

يوم الفرح لازم امل وجورج يدخلوا القاعه على انغام اسماء الله الحسنى بتاعه هشام عباس ويبدا اذاعه الاعاده رقم 33339866 لنفس بروجرام كل افراح المصريين

وزفه الشربات , وزفه الشبكه, واصحاب امل اللي الديجي حيخليهم يعملوا دايره حواليها واصحاب جورج اللي حيرموه في الهوا ويبهدلوا القيافه

وبعدين يبدا الديجي باذاعه اغاني حكيم على اوكا واروتيجا على عمرو دياب الجديد على عمرو دياب القديم على الزين والزينه بتاعه علي الحجار ثم الفستان الابيض ثم فقره الفيلم القصير للعريس وزيه للعروسه ونقفل بسهر الليالي , اه ونسيت فقره الدبكه من صفين ولاد قصاد بنات وكل واحد من المعازيم في الفقره دي يحاول يظبط البنت اللي عجبته تيجي قدامه في الدبكه " فراغ والله"

ويقعد جورج وامل يرقصوا يجي 24 ساعه في الفرح لحد ما يقعوا من طولهم

ثم تيجي زفه التورته ثم فقره الجيرب ثم البوفيه ثم شويه رقص ثم شويه رقص تانيين ثم يروح العريس والعروسه وهمه مش شايفين قدامهم

ثم لازم العيله كلها تروح معاهم وياخدوا لهم صور وكان الصور اللي اتاخدت مش كفايه ثم اخيرا ام الفرح خلص وتسمع أمل شخير جورج من تاني شارع .

في الصوره : تفتكروا هيه بتزقه ولا ماسكاه لا يجري بعد كل اللي حصل في التلات حلقات اللي فاتوا ؟!!
الحلقه الجايه : أمل وجورج بعد الجواز !!!
https://www.facebook.com/#!/562451227215431/photos/a.562476710546216.1073741828.562451227215431/588673921259828/?type=1&theater

أمل وكلوني النسخه المصري أم الاجنبي (2)

فعالم تخيلي امل علم الدين وجورج كلوني حبوا بعض واتقابلوا في مصر ودي الحلقه التانيه من امل وجورج النسخه المصريه:

 

تبدا رحله تجهيز عش الزوجيه واللف على محلات العفش الولاد عايزين مودرن بس الامهات عايزين ستيل , هو ايه اللي مودرن بلاش فرفره المهم الخشب الزان اللي يعيش بلاش قله عقل وتحصل هنا سيطره راس المال امال ايه مش همه اللي دافعين يبقى لازم العفش يجي ستيل من دمياط كمان !!!

نخش بقه على الرفايع : طقم صيني للضيوف وطقم اركوبال للضيوف القريبين وطقم تالت للاستخدام اليومي !!! يعني كده امل تدخل بيجي 1000 طبق وكوبايه , ونفس الشيء في الكوبايات والكااسات والمعالق والشوك والفضيه وفناجين الشاي والقهوه  وطقم الخشاف اهم حاجه طقم الخشاف اللي امل ممكن تعيش وتموت وما تستخدموش !!! ويبقى النيش اهم واكبر مشكله في حياه امل وجورج اصل من غير النيش الجوازه ما تمشيش

خش بقه عالفرش عشارتاشر ملايه ومفرش وفوط وبشاكير وبرانس وجو خزعبلي ملهوش نهايه , بالنسبه للبس امل لازم ترمي كل هدومها القديمه حتى لو لسه جديده ونجيب يجي مليون فستان وبلوزه وجيبه وكله مستورد عشان القيامه

يوم الشبكه تنزل امل وجورج وباباها ومامتها وباباه ومامته والعيله كلها ينزلوا ينقوا الشبكه مش بقه اتنين عايزين حاجه معينه تلمس معاهم ويفضلوا فاكرينها العمر كله , لاه بحسابات الحموات الفاتنات بتكون المنظره والفشخره لما الشبكه تطلع عالمونيتور في الفرح والناس تتفرج عليها ولازم تكون شبكه ما حصلتش ولا حتحصل في تاريخ العيله كلها

بعد البيت ما يتفرش ويتجهز وتتم الطقوس العفركوشيه من بخور والذي منه يقعد ابو امل مع جورج في موقعه القايمه اللي مكتوب فيها منديل الكيلنكس اللي حيعطس فيه جورج لما يجيله برد ويمضي سيادته على اللي جابه واللي ما جابوش والكاسات والصيني اللي أمل ذات نفسها حتكسرها لما تشوف صرصار في ارض المطبخ ويقوله معلش يا ابني انا بامن مستقبل البنت انا مش حاعيش لها العمر كله مش واخد باله ان اللي يامن مستقبلها مش شويه صيني وقزاز يمضي عليهم جورج وبعد ده كله يقوله احنا برضه بنشتري راجل , امال لو كنت بتفرطوا فيه كنتم عملتم ايه !!!

 

لو امل قرفت من جورج حترمي الجمل بما حمل ولو جورج قرف من امل حيزهق اللي خلفوها عشان تتنازل عن محتويات القايمه

الفكره في القايمه والمؤخر هيه عمليه تعقيد الخروج من العلاقه exit barriers زي ما بتوع البزنس بيقولوا بس في النهايه مش هيه اللي حتحافظ عالجوازه باللعكس قد تزيد المشاكل بين أمل وجورج

ارحموهم وسيبوهم يختاروا مستقبلهم وعفشهم وشبكتهم وشكل حياتهم بسيطه بقه ثريه همه حرين بلاش مناخيركم انتم والمجتمع تدخل في تفاصيل تفاصيلهم

الحلقه الجايه الفرح J وعقبال عندكم 

القاهره سلخانه اوبن اير

من اكتر المشاهد استفزازا في حياتي هو يوم العيد الكبير وكل واحد ناده الجزار بتاعه وبيدبح قدام بيته او محله في الشارع وفجاه تتحول الشوارع لحمامات دم وقمه النظافه اللي ممكن تتعمل ان الناس تسيب ميه او تراب مكان الدبح

وبعدين تيجي مرحله التعليق الدبيحه وتشفيتها في الشارع نهارا جهارا وصوت الساطور عالاورمه اللي يصحي النايم من احلى نومه

شويه وتلاقي بياعين الروبابيكيا بصيحتهم الشهيره في العيد الكبير " جلد للبيع فروه للبيع" طول النهار والليل باعلى حس وبدوشه مستمره منقطعه النظير

انا غير معترضه عالدبح وانه من شعائر الدين ولكن المستفز في الموضوع هو كم الهمجيه وقله النظام والتصرفات الغلط اللي بنعملها مش بس المنظر المقزز ولا الاخطار الصحيه من الدم والدبان ولا الريحه ولا مضايقه الجيران مع العلم ان الدوله عامله الدبح في السلخانات ببلاش يعني بصراحه عداهم العيب وقفز بس هو اللي بصراحه اللي ناقصهم انهم فعلا يدفعوا اللي بيدبح في الشارع مخالفه لما يعمل كده
السعوديه اللي هيه قدوه ناس كتير في الامور الشرعيه مانعه الدبح في الشوارع ومخصصه اماكن في كل حي للموضوع ده

لا انسى مره قررت فيها انا واختي ننزل نتمشى شويه مش فاكره كنا بندور على ايه المهم البنت دروخت وقرفت ورجعت البيت والقيء اشتغل من المناظر والريحه , انا بصراحه من ساعتها بطلت اخرج يوم العيد الصبح لما كل الناس تخلص الدبح

ملحوظه في فتوى من دار الافتاء المصريه بس عشان المتفزلكين :

ما حكم ذبح الأضاحي في الشوارع وترك مخلفاتها في الطرقات وعدم القيام بتنظيف هذا؟
الجواب: العمل المسؤول عنه من السيئات العِظام والجرائم الجِسام؛ لأن فيه إيذاء للنا...س ، قال تعالى: ﴿وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا﴾ [الأحزاب: 58]، وفاعل ذلك إنما يتخلق بأخلاق بعيدة عن أخلاق المسلمين، عَنْ عَبْدِ اللَّهِ بْنِ عَمْرٍو رضى الله عنهما عَنِ النبي صلى الله عليه وسلم قَالَ: (( الْمُسْلِمُ مَنْ سَلِمَ الْمُسْلِمُونَ مِنْ لِسَانِهِ وَيَدِه)) أخرجه البخاري في صحيحه.
والذابح للأضاحي أو غيرِها في شوارع الناس وطرقهم مع تركه للمخلفات فيها يؤذيهم بدمائها المسفوحة التي هي نجسة بنص الكتاب العزيز، ويعرضهم أيضًا لمخاطر الإصابة بالأمراض المؤذية، وأين هؤلاء من حديث رسول الله صلى الله تعالى عليه وآله وسلم الذي رواه أَبو بَرْزَةَ رضي الله عنه قَالَ قُلْتُ:يَا نبي اللَّهِ، علمني شَيْئًا أَنْتَفِعُ بِهِ . قَالَ :(( اعْزِلِ الأَذَى عَنْ طَرِيقِ الْمُسْلِمِينَ)) أخرجه مسلم في صحيحه

وكما أن إماطة الأذى صدقة، وهي من شعب الإيمان، فإن وضع الأذى في طريق الناس خطيئة، وهو من شعب الفسوق والعصيان؛ وإن ذلك ليجلب الأذى لفاعله في الدنيا والآخرة؛ وبرهان ذلك ما رواه معاذ بن جبل رضي الله عنه قال: قال رسول الله صلى الله عليه وسلم: ((اتقوا الملاعن الثلاثة: البراز في الموارد وقارعة الطريق والظل)) أخرجه أبو داود في سننه.
فإن هذه الخصال تستجلب لعنَ الناسِ لفاعليها، وما نحن فيه -مِن تقذير شوارع الناس ومرافقهم وتعريضهم للأمراض والأخطار- مثير لغيظ الناس واشمئزازهم وحنقهم على فاعليها ومرتكبيها، فالواجب القيام بهذا الذبح في الأماكن المعدة والمجهزة لمثل ذلك، والواجب الحرص على الناس وعلى ما ينفعهم، والنأي بالنفس عن كل ما يُكَدِّر عيشَهم أو يؤذي مشاعرهم وأبدانهم.

أمل وجورج النسخه المصري أم الاجنبي (1):

من ساعه حكايه جورج كلوني وامل علم الدين وكميه القلش والقر شغاله الله ينور

تخيلت لو الاتنين دول وقعوا في غرام مصر وقرروروا يعيشوا تجربه الجواز بتاعتهم دي عندنا  في مصر كم الهذي اللي حيتعرضوا له ممكن يصيب اي واحد فيهم بالجنون

مشهد 1 : جورج يسبل لامل ويقرر يتشجع ويطلب ايدها بعد كام مره شافها فيها : الحقيقيه انت فاجئتني وتعمل مكسوفه وتقوله افكر وتلطعه اسبوع وبعدين تقوله مستنيينك يوم الخميس الجاي

مشهد 2 : من يوم التلات بقه في بيت امل الكنس والمسح والتلميع على ودنه ويمكن يبيضوا البيت , الصيني يطلع هو والكريستال وممكن نغير عفش البيت لو لزم الامر

مشهد 3: امل عند الكوافير يوم الخميس (خدت اجازه مرضي من الشغل) والبكل على دماغها والكوافير ومساعديه شغالين في كل حته

مشهد 4: جورج يوصل بيت امل يوم الخميس شايل تورته نص شكولاته ونص فاكهه من دار الدفاع الجوي ويخبط ويدخل البيت ومعاه امه واخته ويتمجلس في الصالون وباباها يلبس بدله كامله في بيتهم معرفش ليه والست الوالده تلبس اللي عالحبل اما امل فتتاخر جوه قال ايه مكسوفه

المهم الضيوف يقعدوا يحكوا في اي وكل حاجه والست ام جورج تجيب امل من ساسها لراسها حته حته

امل تدخل بصينيه القهوه ام وش وام امل تزغرط !!!

مشهد 4 : جورج في بيتهم مع الست ام جورج , ها مقلتيش رايك ايه يا نينه , تقلب وشها وتقوله حاقولك ايه اصل مرايه الحب عاميه واللي ياكل على ضرسه ينفع نفسه مش البت سميره بنت خالتك كانت اولى اهه القسمه وخلاص , وبعدين البت دي معصعصه قوي انا عارفه عاجبك فيها ايه , ولا الضب بتاعها ايه يا خويا ده ما كاتش عارفه تعمل له تقويم مهم غناي وعلى قلبهم قد كده شكلهم بخلا شوفت الجاتوه اللي قدموه مكنش طازه !!!! وبعدين تعالى هنا ملقيتش واحده اكبر من كده تتجوزها يا اخي شوفلك واحده صغيره شويه عشان تخلفلك عيل ولا اتنين مش معقوله كده عايزه اشيل عيالك قبل ما اموت

مشهد 5 : بيت امل هاه يا بابا ها يا ماما  ايه رايك في جورج ؟ ترد مامتها وهيه مش طايقه نفسها يغور من وش امه يا شيخه دي عليها سحنه تقطع الخميره مالبيت حتتعبك الوليه دي انت حره انا مالي , بس الواد حليوه ومقطقط , يقاطعها ابو امل : ولا حليوه ولا حاجه ده دمه يلطش جته البلا !!!

مشهد 6 : يوم قرايه الفاتحه: وجلسه الاتفاقات : شوف يا ابني اللي اوله شرط اخره نور بنتي لازم يجيلها شبكه زي بتاعه بنت خالتها مش اقل منها , الشقه لازم تكون 370 متر في التجمع الخامس في الكمبوند بتاع اختها , المهر ما يقلش عن %^^*((__ اما المؤخر فما يقلش عن #%)(÷ وان كان على اجره الماذون نقسمها سوا !!!!

انتوا اوضه واحنا اوضه والمطبخ عليك , والستاير عليك والنجف اللي يجيب اوضه يجيب نجفتها بس طبق اوضه النوم والحمام برضه عليك !!! , جورج يبلع ريقه ويفك الكرافته ويقوله انا تحت امرك يا عمي , يرد عمه : وحنكتب قايمه وتمضي عليها زغرطي يا ام امل , تقوم ام امل تزغرط

الحلقه الجايه تجهيزات الفرح J

https://www.facebook.com/browsegroups/?category=membership&ref=bookmark_header#!/562451227215431/photos/a.562476710546216.1073741828.562451227215431/587434661383754/?type=1&theater

جورج وامل , او بالاحرى أمل وجورج

ايه كم النفسنه والقر اللي حصل اليومين دول على امل علم الدين وجورج كلوني ؟

هو ايه العجيب ان الممثل المشهور اللي مجنن بنات العالم كلها يتجوز بنت عاديه مش مشهوره ومش امريكانايه ؟

وايه العجيب ان جمالها بالنسبه لناس كتير عادي ( انا عن نفسي شايفاها بنت جميله مستقله شخصيه وبسيطه وانيقه)

الناس دي مش شايفه ان واحد زي جورج كلوني تعامل مع اجمل بنات العالم واجمل بنات وستات هوليوود وانه لو بيدور على البنت السوبر دووبر او حتى ملكه جمال الكون وطلب يتجوزها ( او حتى ما يتجوزهاش ) كانت وافقت !!!

لكن واحد زي ده مفهومه عن الجمال بعد السنين دي كلها وبعد تجربه طلاق سابقه يختلف عن ثقافه الراجل اللي بيدور على " مزه وخلاص" اللي زي ده بيدور على جمال الروح والشخصيه والتفاهم , على جمال العقل والتفاهم بينهم كناس ناضجه مش اتنين عيال بيدوروا على الجمال المادي او نزوه وقتيه

عجبني قوي تحليل اتكلم عن " الممثل زوج امل علم الدين " وانها بيه ومن غيره حتكون شخصيه ناجحه ومؤثره وانه هو ده بالظبط اللي جذبه ليها وخلاه يختارها استقلالها, شخصيتها , انها بتؤمن بنفسها وعايزه تخلي العالم مكان اجمل , انها ما استنتش اي واحد والسلام ومحطتش لنفسها deadline  وندبت حظها لان عمرها 36 سنه ولسه ما اتجوزتش اشتغلت على نفسها براجل ومن غير راجل  

يا بنات العرب والمصريين قبل ما تقروا على امل علم الدين انها خدت جورج كلوني لما تبقى اي واحده فيكم زيها اكيد ربنا حيديها اللي زي جورج كلوني أو احسن منه

وبعدين في دعاء كده لطيف " اللهم بارك لها فيما رزقتها واشملنا بعطاياك " قولوه يمكن ينفعكم

يا ساتر عالقر انا خايفه يطلقوا زي ما حصل مع محمد منير ايه ده استقيموا يرحمكم الله

كوني "امل" يكن " جورج"

https://www.facebook.com/#!/562451227215431/photos/a.562476710546216.1073741828.562451227215431/586823754778178/?type=1&theater