الوصله الاولى والوصله التانيه

مش باتكلم عن وصلات الست في حفلاتها لاااا ابسولوتلى نات

انا باتكلم عن وصلات الطفاسه المنزليه , الوصله الاولى هي تلك الوصله التي تتم اثناء ما الحاجه بتجهز اكلاتها الشهيه

عندكم مثلا المسقعه على بال ما ماما تقلي الدنجان يكون نصه خلص , ويا سلام بقه لو كان في الموضوع فلفل محمر كمان ورغيف عيش طازه يبقى تمام التمام

عندكم كمان المكرونه بالباشاميل لازم طبق ضغنون فيه شويه مكرونه على شويه باشامل ومعلقه عصاج وعيشوا حياتكم هو احنا لسه حنستنى الصينيه والتسويه ؟

ولا كفته الرز وما ادراكم ما كفته الرز اللي بجد ممكن تتقرقش كلها وما تتطبخش ابببدا دي حتى كانت تخصص الطفاسه المسائيه مع جيرانا في السعوديه اخر النهار قدام الكارتون

ولا لو ماما بتسبك باميه مثلا حد فيكم جرب سندوتشات التسبيكه السخنه على وش العيش مش ساندوتش عشان ما يتبرلوش !!!

وزيها سندوتشات العصاج

البطاطس والشيبسي اللي عاده بيخلصوا قبل الاكل و البطاطس المحشيه قبل ما تدخل الفرن في ناس غاويه كمان تاكل خلطه المحشي حتى من غير تسويه

ووش تسييح السمنه قبل ما تستوي والمورته بعد ما تستوي

السمبوسك والكوبيبه واخواتهم من الجلاش والرقاق  

ولو مفيش اي حاجه من دول يبقى الكريمه بعد تزويق التورته او صوص الشكولاته اللي بيفضل قال ايه زاد وشبههم بواقي حله تسويه المهلبيه والرز اللي بلبن وكل واي حلويات زي كده قمر الدين بقه ولا كاسترد ما يضرش

ممكن جدا تكون صباعين محشي من الحله قال ايه بنشوفه استوى ولا لسه او كشري معلقه من كل مكون عالسريع على سبيل انك بتشوف الحدق لا يكون ناقص ملح !!!  

بالنسسبه للوصله التانيه هي تلك التزويده بعد الاكل بسيكا وخصوصا في رمضان بعد التراويح : محشي دافي , حته مكرونه بالباشاميل ما يضرش , كالنولي ولا رز بالخلطه بطاطس محمره ولا فشار

في ناس بقه اعرفهم عندهم نظريه تانيه خالص مسماه بالعك الليلي وهو ذلك الهفه اللي بتيجي وهمه سهرانين ويقوموا يفننوا طبيخ بعد 12 بالليل بيتزا بقه , اندومي, فطاير بالجبنه , بطاطس محمره , جبنه رومي سايحه في الميكرويف ولا حتى مكرونه او عصاير همه والهفه ما تطلب وهمه عارفين نفسهم كويس جدا !!!

المصيبه الكبرى في كل انواع الطفاسه دي اللي عمرها ما بتبقى هيلثي ولازمن وحتمن ولا بد تكون من الانواع العالي في الكالوريس واللي بجد بيودي في داهيه

بس هيه الحاجات الصغننه دي اللي بتحلي الحياه مش همه بيقولوا على اللي بيحب الاكل بيحب الحياه؟؟

الله يخربيت الريجيم !!

انتخبوا ابن الدايره

المتجول في شوارع القاهره الكام يوم اللي فاتوا حيجيله فزع من كم مرشحي البرطمان ( على راي صاحبه مامتي الطيبه اللي على نياتها ) وكان كل واحد صحي من النوم حط صورته على بانر وعلقها ونزل الانتخابات

عندك الوجوه القديمه المصديه اياها هيه هيه حتى ما غيرتش تسريحه شعرها من 30 سنه ونازله برضو زهقنا بقه من اشكالكم

وعندك كتييير جدا من الوجوه القديمه نزلت بversion جديد متمثله في ولادها وبناتها قال يعني الشباب وكدزه !!! وكاننا داقين عصافير

وفي كمان المرشح ال creative اللي اختار رمز الاسد وعمل مجسمات للاسد ونزل لف بيها على عربيات نقل  حاجه كده شبه الاسد في مسرحيه شاهد ما شفش حاجه وده ما يتقلش له غير ابنك عيط يا حج !!!

عندكم كمان الاخ الظريف اللي اختار رمز النسر وطالع في كل الصور حاطط نسر على كتفه . هو ده الهبل اللي طلع الجبل

وفي كمان المزه اللي رسمت علم مصر على قورتها وطبعته بوسترات . شكلها كده رايحه  تتشقط في ماتش مصر النهائي في كاس الامم الافريقيه اه والله زمبولك كده !!!!

في كمان واحد ظريف جدا شكله لا يقل عن 80 سنه ويقولك فكر جديد , والله تسلم ايد اللي بيلفها لجنابك

وفي " البرلماني السابق" قال يعني بقه ده انت اتشالت في البرلمان اللي اتحل في مفيش بقيت البرلماني السابق . يا رااااجل

وفي اللي الناس قلبت في دفاتره القديمه وطلعت له جوازه بواحده ثورجيه كان نفاها من كام سنه وطالع اليومين دول يقول جواز شرعي ومعلن ومحدش يسيء ليه ولمراتي , هو انت مش كنت نفيتها ولا انت كداب ولا بتستهبل الناس ولا ايه النظام ؟

عندكم كمان "نصير الغلابه والمستضعفين " اه والله وعامل لوح بطول العماره طب اكل الغلابه والمستضعفين بفلوس الانتخابات يا جدع

وفي الصحفيه المثقفه اللي نازله في حي شعبي وعامله لنفسها رمز البيانو !!! يعني مرات البواب اللي عملو لها الرموز الانتخابيه عشان ما بتعرفش تقرا وتكتب تروح تدور عالبيانو !! يااااا شييييخه بيانو ايه بس طب خليها بيانولا طا !!!!

اغرب وابجح واحد شفته هو احد النواب السابقين واللي سبق اتهامه بمعركه الجمل قال ايه نازل في وسط البلد يا عينك يا جابيرك يا اخي طب شوف دايره تانيه تكون الناس ما انكوتش باللي عملته حتى لو طلعوك براءه منها

وفي الظراف اللي ماشيين باغاني وعمالين يطبلوا وكم من الازعاج الغير منتهي وتسل الايادي

وفي ناس عمرنا ما سمعنا عنهم في طبق اليوم حتى

وفي بياع الجرايد اللي على ناصيه شارعنا نزل الانتخابات هو يعني ملهوش نفس ؟!

رحمه الله على اول انتخابات بعد الثوره لما قضينا ليلتها نذاكر ونقارن بين الاحزاب والافراد ونسال ونتناقش على فيسبوك , وندخل على applications  تحلل الاحزاب وتوجهاتها وتساعدك تختار الاقرب ليك

دلوقتي النداء اللي شغال " انتخبوا ابن الدايره " سؤال بس بريء ولا مؤاخذه ما هو المقصود بالدايره ؟ ومين هو ابنها ؟ خلي بالك يا عبيط دي شتيمه

حلوان رايح جاي 3

باص م نصر بقه ده خد من الواحد راقات كان بيجي لي اول الشارع بتاعنا وكان تقريبا مكاني هو مكان اي حد فاته الباص من المحطات اللي قبلي فكان بيركن عندي شويه

السواق كان اسمه طارق وكان كلاكسه مزعج جدا وكان غاوي يخض نهى اللي بتركب قبلي وهيه بتعدي الشارع لانها دايما كانت بتقابله وهيه بتعدي الشارع ودايما تقوله حاركبلك كلاكس عصافير يا طارق

كان بياخد نهى ويسرا وهاني ونجوى قبلي وعندي كنت انا ومحمد وبعدين نعدي على مدينه التوفيق ناخد رشا واحمد ورانيا ومروه وبعدين نركن شويه عند نادي السكه نلم اي حد وقع من  قبل كده

كانت ايامها الموبايلات طلعت وكنا ممشينها ميسدات عشان نستنى بعض

فاكره كويس الاغاني اللي كان بيشغلها شرايط هشام عباس ايام التسعينات ويا ليله ايام ما طلعت وكان عليه شويه شرايط منوعات سميره سعيد على ميكسات نكد كنا مسمينها كوكتيل النكد وده كان بيشتغل ايام الامتحانات والشيتات اللانهائيه للكليه بتاعتنا

ياما اتعمل فيه لجان استماع لشريط عمرو دياب الجديد و تصدقوا اني سامعه وشايفه هزارنا والاغااني شغاله في الخلفيه دلوقتي !!ّ!ّ

ياما كلنا اجمعنا على لبس الاسود بدون اتفاق ايام الامتحانات

وياما ضحكنا وهزرنا وكلنا سندوتشات بعض

وياما سلخنا نهى واحمد لانهم كانوا اصغر اتنين في الدفعه وكانها كانت شتومه انهم مواليد 79

وياما لطم أ. ر على الغسيل اللي على الحبل لو الدنيا مطرت في النص لانه كان عايش مع اخواته وبس وهو ست البيت اللهلوبه

ياما اترتب فيه لرحلات اللي نجح منها واللي فشل

وياما اتلمت فيه فلوس لشيتات ومحاضرت

وياما ولاد رسموا فيه على بنات وبرضو ياما بنات دلقوا فيه ولاد

كان لشله م نصر الكنبه الاخيره دي بتاعتنا بالسلم بالكام كرسي الفرداني اللي في الاخر واللي احيانا بتوع هندسه كانوا يستظرفوا وياخدوهم بس الدنيا كانت بتمشي

وايام امتحانات الشفوي كنا بنيجي الكلبه على سنجه عشره بنات وولاد وكانت الجامعه كلها تعرف ان صيدله عندهم شفوي

الباص ده شاف احلى ايام حيتنا وشاف كائبه الامتحانات وضحك وبكاء النتايج

ياااه حلوان رايح جاي خمس سنين من اجمل ايام الواحد وي اريت يرجع منها ولو يوم واحد بس

هاه يا دفعه 2000 لو رجع منها يوم واحد بس حتعملوا فيه ايه ؟

حلوان رايح جاي 2

في يوم من ذات الايام هل علينا باص من هندسه (دي في حلوان ذات نفسها) كان بيطلع من حلوان الساعه 3 ويجي الجامعه 3.15 يلم اللي فيه النصيب ويعدي على نادي السكه وافتكر بيدخل بعدها العباسيه

بالرغم من انه مش احسن الحلول من حيث المواعيد ولا المكان بس اهه كان بيقربنا وخلاص , فاكراه قوي باص عم محروس ده من باصات السبعينات بتاعه فيلم الحفيد وكان صاحب مزاج قوي مزوقه من جوه بفستونات قطيفه ومعلق صوره ممثله اجنبيه وهيه بنجري وراه افتكر كان مشهد في فيلم كان هو سواقه

الباص ده كان لامم كل الكليات وكل الاشكال والالوان وكان زحمه جدا وكان نادر جدا لما نركبه لان عمرنا ما بنخلص 3.15 دي بس اهه كان اول الغيث

العادي اننا كنا بنطلع من الجامعه بعد السكاشن نلاقي المترو على بعضه فنضطر للحلونه وهو اصطلاح الاتجاه لحلوان عشان نركب المترو من اوله ونقعد مع بعض بدل ما نقضي الساعتين كل واحد بيكلم نفسه

الحلونه كانت تستغرق من نص ساعه لساعه الا ربع لاننا بنعدي المترو من السلم الداخلي (او من عالقضبان !!! ) ونستناه ونروح بيه لحلوان وبعدين نشوف انهي مترو راجع نجري نلحقه وندنجل ال24 محطه رجوعا لكوبري القبه (ولاء كانت بتنزل حدايق حلوان وكانت دايما تذلنا انها بتركب محطتين وتحلون معانا , فاطمه جمال عبد الناصر , غاده وساميه رمسيس , انا كوبري القبه ومروه حدايق الزيتون )

الطريق في المترو كان مليان بالحكاوي والحواديت واحداث اليوم , ولا يخلو من عده تشريح او كيس ضفادع في الشنطه او سناكس للطريق او ننزل السيده نجيب ادوات المعمل للسكشن بكره ونشرب قصب وناكل كشري (اياااااااااام والله )

اخر زياره لغاده من كندا كان احد امانينا هو اكله كشري على ترابيزتنا في كشري نور الصباح في السيده بس للاسف الوقت كان ضيق وما عرفناش نعملها , يالا ملحوقه

احيانا كان بيقى ايس كريم من الصمدي في المعادي او كنتاكي في التحرير اللي ياما شاف ايام سوداء من الكاتشاب والفرايز والفضايح يالا ان الله حليم ستار بقه

المترو ايامها خلانا ماشيين على قضبان , كان لازم اي خروجه يدخل فيها المترو وكان الواحد خفيف بينط من هنا لهناك قبل ما العربيات تكسحنا !!!

بعدها عملوا باص تاني لمصر الجديده ده بقه كان بيوصل لنادي الزهور ومدينه التوفيق واول عباس العقاد وده كان قمه التمدن والتطور وكان بيطلع من الجامعه 4.30 ومش فاكره اسم السواق بس كان الطف وبدانا نظبط مواعيدنا عليه ومشي الحال

شويه ويوم عيد ميلادي تم تاسيس باص م. نصر الكلام ده كان 16 نوفمبر 1996 وده بقه دخل م التوفيق وعباس العقاد ولحححححد اول الشارع عندنا وكان بيطلع من الجامعه 5.30 عز الطلب ده بقه له حوااااااديت خلوها للبوست الجاي

 

حلوان رايح جاي 1

الغلابه اللي زي حالاتي خريجي جامعه حلوان العتيده واللي دخلوها في تسعينيات القرن الماضي قبل هوجه الجامعات الخاصه من هنا وهناك يعرفوا قد ايه هيه جامعه مؤسسه حديثا ومدرجاتها جميله ومساحتها الخضراء شاسعه الجمال والبراح هنا وهناك بجد من اجمل جامعات مصر على الاطلاق (القطه اللي في الصوره متاخده من صيدله  الكشك اللي الزاويه اللي تحت شمال ياما قعدنا على سلمه نستنى بعض )

وقتها ما كنتش شايفه ده كله لان المشوار كان عظييييييم بكل ما تحمله الكلمه من معاني , ايامها سنه 1995 ما كنش لسه حتى بقى فيه ميكروباصات العباسيه ونادي السكه كتير ولو موجوده مش امان فكان الحل الوحيد هو المترو لان حتى اهلي لم يعترفوا بانه ممكن اسوق الطريق الصحراوي ولا حتى الزراعي لحلوان

فاكره كويس جدا اول مره بابا خدني وروحنا الكليه وكان ايامها مجبس ايده وحب يوريني طريق الجامعه بالمواصلات ركبنا باص من اخر الشارع نزلنا كوبري القبه عشان نركب المترو لان دي اقرب محطه لبيتنا , فاكره كويس كلمه ماما كل واحد بيسكن او يشتغل جنب جامعته شوفي بقه حتشتغلي فين وازاي (اصلها سكنت واشتغلت في م نصر قريب من كليه البنات بتاعتها , وخالتي سكنت واشتغلت جنب القصر العيني برضو , ما كانتش عارفه اني فعلا حاشتغل جنب محطه المترو دي بس بعد عشر سنين )

ما اطولش عليكم ر كبنا المترو ورزعنا 22 محطه لحد ما وصلنا لحلوان , اتاري الجامعه في عين حلوان لفينا ورجعنا تاني محطه , وبعدين عدينا السلم اتاري الجامعه مش جنب المحطه فركيبنا باص (بعد كده عملوا محطه جامعه حلوان بس بعد التخرج يجي ب5 سنين) ووقفنا في طابووور عظيم للدخول بورقه مكتب التنسيق مع البطاقه , كنت لابسه تايير جل بيج وجزمه وشنطه هافان بس الجزمه كانت جديده بهدلت رجلي , المهم عملنا الكشف الطبي ولفينا ورجعنا

المره اللي بعدها روحت لوحدي وبابا ماشي ورايا عشان يشوفني حاعرف اروح لوحدي ولا لاه وركب عربيه المترو اللي جنبي وهكذا لحد ما وصلت حلوان سابني ورجع وبرضو كان لسه بالجبس

المشوار كان تقريبا ساعتين الا ربع رايح وزيهم راجع فكان يوم الاجازه بيروح فالنوم شويه شويه الجسم بيتعود وخلاص غير تعب وقفه السكاشن والمحاضرات بس همه كانوا ظراف الحق يتقال ادونا يومين اجازه مع الجمعه يعني الواحد كان بيروح الجامعه اربعه ايام في الاسبوع بيفوتو بالطول والعرض وخلاص

وبعدين محاولات كل شله ساكنه في منطقه للبحث عن وسيله اسهل في المواصلات يعني مره سواق تاكسي مره ميكروباص وهكذا كلها باءت بالفشل لان مواعيد الناس ما كانتش ماشيه مع بعض وعلى مالسواق يلف عليهم كلهم كان بياخد وقت كبير خصووصا ان كلهم مش نفس الدفعه او السكشن ده لخبط الدنيا فعلا

باصات الجامعه كانت محدوده جدا وما كانتش بتدخل لا مصر الجديده ولا م نصر لحد الخبر السعيد ما حصل , هو ايه حاحكيلكم عليه المره الجايه

https://www.facebook.com/قعده-شاي-بالنعناع-562451227215431/?ref=aymt_homepage_panel#!/562451227215431/photos/a.562476710546216.1073741828.562451227215431/795735917220293/?type=3&theater

عن الممبار وسنينه

في ناس كده فقريه جدا ما اعرفش ليه

يعني مثلا مثلا ممكن يزوغوا من خروجه زحمه ودوشه في مكان رااقي جدا ويحنوا لمكان بسيط بس بيرتاحوا فيه

وياكلوا الدره المشوي والحرنكش والتين الشوكي ويطنشوا الشكولاته السويسري

ما يحبوش الدوشه ولا حتى الموسيقى الكلاسيك وتاسرهم اغنيه لعبد المطلب بس متقاله برواقه كده ومزاج

ما يفرقش عندهم المارون جلاسيه من البطاطا المشويه ويمكن يحبوا البطاطا كمان اكتر

ما يتلزقوش في ذوي المناصب اللي ممكن ينفعوهم ويجروا على غلبان يجبروا بخاطره

يطنشوا اللي حاطط مناخيره في السما ويتباسطوا مع عامل بسيط

ممكن جدا يبقى دولابهم مليان هدوم من اغلى الماركات ومن كل حته في الدنيا وما يرتاحوش غير في تي شيرت من بتوع العامريه

يسيبوا اللحمه والفراخ والبط والرومي ونفسهم تروح لطبق كشري بالدقه

ما يشيلوش من حد وينسوا اي دقه نقص او نداله وخلاص بقه احنا ولاد النهارده بالظبط زي حبهم للممبار بغض النظر عن ماضيه

الناس دي لو اتكعبلت فيها ما تستغربهاش ولا تحاول تغيرها همه كده خلقه ربنا ومهما اغتنوا او حتى افتقروا حيفضلوا زي ما همه , همه همه ولا حيتحركوا سنتي لانهم ببساطه اصصصصلي مش تقليد دول بقه امسك فيهم بايدك وسنانك وصدقني مش حتندم ابببببدااا

عن الكليشيهات واشياء اخرى:

في يوم من ذات الايام باتفرج على حلقه من مسلسل مش متابعاه ومش فاهمه اي حاجه منه

حيث يتقدم الحليوه عمرو يوسف للمزه انجي المقدم بالزواج وهمه قاعدين في مكان لطيف وهيه قال ايه تقول له سيبني افكر وتلطعه شويتين وهيه مزقططه اصلا وتقوله انت فاجئتني وسيبني افكر !!!

سرحت في الكليشهات المتبعه في مسلسلاتنا عموما وحياتنا احيانا !! بقه هو لو شاكك في لحظه انها ممكن ترفضه كان كلمها خبط لزق ولا كان بعت مرسال واستنى الرد

ولا هيه لو كانت متردده للحظه كانت قالت له سيبني افكر ولا هو التقل صنعه

احد الكليشهات الاخرى: خلينا اصحاب احسن !!! هو ينفع الاحباب يبقوا اصحاب؟ ولا ينفع الاصحاب يقلبوا احباب؟

كليشي تاني: انت زي اخويا وهنا يحضرني تيمور وشفيقه لما قالتله لا يا تيمور احنا مش اخوات ابوك اسمه (كان اسمه ايه نسيت) وابويا اسمه ميمون !!! ما تصطعبتش يا ابن رجاء الجداوي (هيه كان اسمها ايه؟)

نيجي لكليشيه تاني بس المره دي عند الاهالي: اتعب وانت صغير عشان ترتاح وانت كبير!!! الحقيقه انك يا ضينايا حتفضل تعبان لان ببساطه اشكالك من اللي اتعودوا عالشقا همه لقمه ظريفه جدا للبرشطيه اللي بياخدوا كل حاجه عالجاهز وذوي ال communication and self marketing skills  بلا خيبه !!!!

كليشيه تاني مشهور قوي للاهالي: يا ابني اللي بينفع بينفع نفسه !!! لا بينفع كمان صحابه وقرايب قرايبه من الدرجه الخمسميه في ظل الكوسه بالباشاميل اللي غرقانين فيها وكل واحد له شله ومحسوبين ورجالته

خدوا كمان عندكم البلد دي احسن من غيرها : طب شوف غيرها واختار بلاش حجج

وفي كمان حجه البليد مسح التخته : سوري الديسك !!! لا بقت السكه زحمه والنت واقع والكمبيوتر هنج !!!

خمس دقايق وحتلاقيني قداك وهو اصلا نايم في بيتهم

ولا صوتك بعيد يقوم اللي على الخط التاني يقول طب كده احسن يرد الاولاني اه وهو ما عملش اياتوها حاجه اساسا

وبعد هذه السرحه الطويله صحيت على تتر النهايه بتاع المسلسل اللي مش متايعاه وهو بيخلص

بس يا خوفي لتكون حياتنا هيه المسلسل اللي مش متابعينه !!! واللي نصحى وتتره نازل ربنا يستر