بوك بوك بوك بوكسراته

هو انا من كتر الكلام على إعلان قطونيل دخلت شفته 

هو ايه يا جماعه انتو مستغربين ليه بس 

بلد بتعتبر التحرش روشنه وبياكل مع الاتنين ستات ورجاله 

بلد بتشوف التحرش وتسلك المتحرش قبل البوليس ما يجي ده لو فرضنا أن البنت قررت تبلغ وساعتها بيتهموها انها هيه اللي مش تمام وان البنت المتربيه تبلع التحرش وتمشي من سكات عشان سمعتها وما تردش أو تخاف على ابوها ولا اخوها اللي ماشي معاها ولا يمكن تقوله أن حد ضايقها عشان يروح سليم 

البلد الوحيده اللي عندها شتائم بالكلاكس ونور العربيه 

انتو مستغربين بقه دلوقتي ليه ، هذا ما صنعه المجتمع اصلا أما انكم عالم عجيبه والله !!!

تراهنوني أن بعد الهوجه دي كل اللي حيحصل أنهم حيسيبوا الاعلان لحته بوكبوكبوك وخلاص كده ، المخرج ولا المؤلف كان اكيد متوقع الدوشه دي وعمل حسابه وقال يشوف ايه اللي حيحصل 

الماركتنيج بالصدمه !!!

ومازال نفس السؤال السنوي اشمعنى رمضان قوطونيل بتكتر إعلاناتها فيه هو لا مؤاخذه الناس ما بتشتريش غير في رمضان ؟! صباح الفل !!!

يتعافى المرء ، يتعافى المرء ، يتعافى المرء ب ......

النهارده كان المفروض الافنت السنوي لشنط رمضان للسنه ١٤ 

لغيناه للاسف عشان أحداث كورونا خوفا من انتشار المرض بين المتطوعين أو من المتطوعين للناس اللي رايحه لها الشنط 

حاولنا نتصرف في بدائل لكن ما نفعش فاتكلنا على الله ولغينا بالرغم من حزن الواحد على يوم من الجنه زي ما ساره صديقتي بتوصفه 

صحيت الصبح عندي اختيارين اني كل كام ساعه اقول كان زمانا دلوقتي بنعمل كذا 

أو اني ارضى بقضاء الله وخلاص 

بس اخترت اشيل من على كتفي زن ذكريات اليوم وأكره في ربع ساعه واخلص من زن ذكريات اليوم وأكمل بحاجه ظريفه بقيه اليوم 

كنا بنتقابل ٨ الصبح في مكان الباكنج واعلق لست المحتويات وأرص نصبه الشاي والمشاريب

واقعد اعمل شويه باكنج مش اكتر من ساعه على الناس ماتوصل لأن باقي اليوم بيكون دوري تنظيمي وتنضيفي كنت امشي الم الاكياس والزباله والكراتين لان لو ماعملتش كده الناس حتختفي وسط الزباله واعمل الستيشن وانظمها تجهيزا لتجميع الشنطه 

الف بين الناس وأشوف اي مشاكل واحلها أو اغير في اي حاجه لازمه لضمان سلاسه اليوم 

وأمسك الصفاره مع كل إعلان أو طلب ودي كانت بتعصب ناس كتير وتضحك ناس اكتر 

قبل الضهر كنت بامشي الرجاله للصلاه والبنات يقوموا يصلوا ويشربوا شاي وكيك ، حفله شاي سريعه ونكمل شغل 

يوصلوا الرجاله نكون قربنا نخلص نبدا تجميع الشنطه وباذان العصر نتصور صوره جماعيه ونبدأ تسليم الشنط بالأرقام اللي بيستمر يمكن ل١٠ بالليل ونروح هلكانين 

اكتشفت أن في مدار ال ١٣ سنه اللي فاتوا كان فيها سعاده  لا تحصى،  ناس كتير مكنش الواحد يشوفهم غير من السنه للسنه بس بينا روابط رهيبه ومتينه 

ناس تمشي وناس ترجع وناس ثابته ، ناس من بصه يعرفوا عايز ايه ويعملوه، وناس متعبه حفظت تتعامل معهم ازاي 

ناس بتسند وتتقل عليها من غير ما تقلق وناس عادي بقه اهو موجودين 

ناس جايه بقلب وحب ومن اول لحظه لاخر لحظه وناس بتتصور 

اسر كامله عاملاه فاميلي اكتيفيتي ولازم تتم ، اطفال كبروا قدامك وبقوا من عيله رمضان 

صوره تشوفها سنه عن سنه وتلاقي الضحكه هيه هيه لأنها صافيه وطالعه من القلب وجايه من خير كتير حصل في اليوم 

مزيكا واغاني رمضان اللي ماليه اليوم بهجه وسعاده ، بلالين وبونبوني وفوانيس تتوزع مع الشنط وتملا العيون فرحه 

يوم كله فرهده وعرق وتعب بس بتروح راضي عن نفسك وتستناه من تاني يوم 

وتفتكر مقلب لازم وحتما يحصل كل سنه وتعدي منه اقوى وعندك خبره وما يتكررش 

مره الشنط تتقطع ، مره تخلص، مره ما نلاقيش شنط وتقلب على اشوله ، تقفلها ازاي حد يجيب كوليهات العربيه وتبقى دي الطريقه اللي تكملوا بيها وتتعلم من اخطاءك سنه عن سنه

مره ٤ طن مكرونه يتقلبوا عالطريق ليله التسليم وتبقى على اعصابك ويوصل البديل قبل الضهر وتتعلم تنزل حاجتك من قبل باسبوع 

بلح يخلص ، قمر الدين ما يكفيش وتتصرف وتعدي 

اشوله مقاسها يجي صغير ليله الشنط وإحساس داخلي أنها فيها حاجه غلط  وتجري تقيسها على عينه فاضله ونتأكد وتعرف ده ١٢ بالليل وتلحق تغيرها ( موقعه الشوال) 

ناس تنسى تاخد شنطها ويحصل معاهم مشكله لانك بعتها الصعيد وتتحل بعدها باسبوع وتعمل تاني وتراضي الكل 

ليله الشنط في سنه تشك في زايده وتتنقل المستشفى وتقرر تعمل successor وتدبس اخوك فيها ٣ سنين تدريب تحسبا لأي ظرف مناسب ويشيلها ويعملها احسن منك كمان 

مشاكل في التسليم وتعمل ارقام وتمشي بنظام ومحدش يجرؤ يطلب استثناء بعد كده 

تنوي تعملها في مكان ما اوتوماتيك ويقرر رئيس مجلس الاداره يلغي قبلها بيومين دون إبداء أسباب وتكون ماعندكش طلبيه وتعمل شله دبرني يا وزير ويحولك البيت ونقعد نظبطها ل ٢ الصبح والشنط تتعمل في معادها احمد امين وعلاء ابراهيم هذا الموقف لن انساه ما حييت على فكره

جراج بيتكم يصغر فتخرج من البيت وتكبر الشنطه وتتنوع 

تخلص اليوم وتبص عليهم وتصورهم وتضحك كده في سرك اصلي حاستظل بيها يوم القيامه مش كل واحد في ظل صدقته وعينك تتملي دموع 

جراج يتقفلك مخصوص في اسبوعين ويبقى مقرك مش اقل من ٥ سنين ، المهندس سامي رحمه الله عليك ويبارك في اولادك واحفادك يارب 

مع خروج اخر شنطه تصلي وتشكر ربنا على اداء الامانه وتلاقي اصحابك قلبوها ديش بارتي مجرمين ونضحك ونخطف الاكل من بعض وحاجه اخر مسخره سعادتك 

مع كل صنف يخلص في الباكنج نزغرد ونضحك ونتصور 

الحمد لله عندي ذكريات جميله ومشاكل عديتها وناس فرحتها وقوافل طلعناها وناس سترناها 

كل ده موجود وعايشين عليه لحد ماربنا يأذن ونعملها تاني حتى لو متضايق انك ملكش فيها نصيب السنه دي  

حتسالنوي ايه الحاجه الظريفه اللي قررت تعملها في اليوم : سحلت نفسي في محشي ورق عنب خد اليوم كله وانا باتفرج على صاحبه السعاده ماهو لازم الواحد يتعافى من الحزن ، وايه احلى من ورق عنب يتعافى المرء بيه في يوم كان حيعدي حزين وكئيب اكتر من كده واستغفر وتحوقل كل ما الكئابه تهل 

لله الامر من قبل ومن بعد ويسامحنا لو استسهلنا ولغينا ويرزق الناس من عنده ماهو كده كده رازقهم بس للاسف مكناش السبب السنه دي 

بوك مارك

عندي كميه بوكماركس رهيبه 

منها ذكريات جواز اصحابي ( اه اصحابي بيعملوا giveaway جوازهم بوكماركس ) ، تذاكر اوبرا، هدايا دور نشر ، تذاكر متاحف بره ، كل حاجه فيهم لها ذكرى مميزه 

المهم كلهم فجاه اختفوا لاني حاطاهم في ظرف كبير غالبا اتدفس ومش لاقيه 

بامد ايدي ورايا شديت حاجه تنفع بوكمارك لقيتلكم ايه تذكره فيرونا اللي بعدها طلعت على فينيسيا 

بصيت لها كده وافتكرت اليوم في غمضه عين 

وفجاه تضحك من الودن دي للودن دي وترجع تغوص مع الغيطاني في ذكرياته 

الاجمل أنه بالصدفه ومن غير ما اقصد الكتاب اللي معايا امتداد طبيعي لكتاب التجليات وكأنه مصر يحكي لي ويكملي الحدوته 

ومن كتر ما باتفرج عليه كل يوم على دريم لقيتني بإقرا الكتاب بصوته كانه هو اللي بيحكي لي بنفسه حدوته كل يوم 

رحمه الله عليك يا جيمي زي ما ابنه في الكتاب كان بينده عليه 

الغوريه فاضيه !!

انا من الناس اللي كانت يتضايق من زحام القاهره القدبمه، الفوريه وشارع المعز 

وكنت بانشن في نزولي الجمعه بدري أو الحد عشان الزحمه 

الا أن صورها وهيه مهجوره حقيقي توجع القلب وتعمل غصه في الحلق 

هيه بعبلها وزحمتها ودوشتها ، هيه دي بلدنا وجمالها وشخصيتها 

ربنا يفرج الازمه ويطلعنا منها احسن واقوى وياما دقت عالراس طبول 

كله حيعدي وحارجع اشرب شاي من نصبه الراجل البسيط صديقي المثقف بالفطره اللي قدام وكاله الغوري

من ذاق عرف

مع حمله خليك بالبيت حقيقي معجبه مبادره د ايناس عبد الدايم بعرض كنوز حفلات دار الاوبرا المصريه كل يوم الساعه ٩ 

دخلت كده منشكحه وسعيده وجدول عظيم منزلينه من حفلات الموسيقى العربيه وباليهات ومهرجان الموسيقى على حبه عروض اوركسترا القاهره السيمفوني تشكيله عظيمه الحقيقه 

زمان ايام حفلات اضواء المدينه وليالي التلفزيون كنا بنسهر للصبح نتفرج 

الايام دي بقه لما بدأت اتابعها حسيت بالفرق العظيم الحقيقه بين فرجه البيت دلوقتي وزمان ، فرجه البيت وحضور العرض في الاوبرا 

يعني مثلا مثلا ازاي اسمع عمر خيرت وانا بالبيجامه على السرير واقعد العب بالموبايل واهيس انا واصحابي ؟! 

ولا ازاي اسمع حفله لسليم سحاب وفي نصها عادي حد ينده عليه أو اقوم اخش التواليت 

أو مثلا يغلبني النوم من ملل المونتاج وسخافه التقطيع !!! 

الاوبرا لها كده اعدادات : تاخد اجازه ، تشتغل من البيت اليوم ده ، تختار حفلتك يوم جمعه ويبقى دماغك رايق وتلبس وتحط مكياجك وتشرب قهوتك وتنزل بالرايق تسمع حاجه حلوه وتمشي في وسط البلد وتوصل برواقه تشربلك كمان شاي وتقفل الموبيل وتنسط بكل جوارحك وتستمتع 

وفي الرجوع من كتر ما انت سعيد وفائق ممكن ما تنمش كويس وتقعد تتفرج عالصور اللي خدتها سرقه من الحفله 

من ذاق حضور حفله في الاوبرا فعلا عرف الفرق 

يالا معلش بصوت دلال عبد العزيز 

سفاااااااري

رحله السفاري جزء لا يتجزأ من رحله سيوه 

اول ليله في الرحله قبلها كانت عشاء في وسط الصحراء وورونا السفاري على صغنن 

تسلطت عليه فكره اني حاتخبط وسناني حتتكسر وقررت ما اطلعش وفي الوقت ده كان اصلا بيجيلي motion sickness من اي حركه فقلت بلاش قله قيمه 

المهم اسماء صديقتي قالتلي فرصه  وبيقولوا جميله  والدنيا على غير العاده مطرت وقالوا لي كده السفاري حتبق ابسط ولقيتني خاقعد لوحدي  في الفندق قلت اطلع وربنا يستر بس طلبت عربيه وسواق هادي قالوا لي طيب اتاريهم كانوا بياخدوني على قد عقلي والسواق اصلا كان شكله شارب حاجه ،ةبس ما علينا هو كان شخص كوميدي ومتنح الاتنين في نفس ذات الوقت !!!

نطلع السفاري وأشد الحزام واحكم عالعربيه كلها يتحزموا عشان ما ناذيش بعض وهمه سمعوا كلامي بصراحه

كنا ٥ بنات واورجانيزر وسواق في عربيه جيب 

ويطلع السواق ويبدأ السفاري 

وكل محطه يلموا ويستنوا بعض بس كانت حقيقي تجنن ونشغل مزيكا عاليه ويهبد بينا العربيه كل هبده والتانيه مع ارتفاع الكثبان ينزل بسرعته دريييييب ونصوت ونضحك ونطلع كل الطاقه السلبيه حقيقي كانت فظيعه 

اول محطه كانت بئر واحد وده في عز السقعه كانت ميه سخنه والناس بالمايوهات عادي جدا 

ونكمل تاني المراجيح لبئر ٢ وده ميه عذبه ساقعه زي العسل في وسط الصحراء ازاي معرفش 

وبعدين جت فقره الsand surfing ودي كانت ضحك بس ، بس بصراحه خفت اتدقلج فقررت استمتع بهدوء وغروب الصحراء لوحدي بعيد وكنا يوم جمعه فقعدت ادعي دعوتين ينفعوني مع كثير من التأمل لحد الشمس ما روحت ودي كانت من اجمل فقرات اليوم بصراحه 

نزلت الجرف العالي على رجلي بلاش تهزيق !!! وهنا بدأت فقره التهييس الجماعي عملوا راكيه شاي عالحطب وسوداني ويوستفندي وقعدنا نغني ونتصور وبعدين غنا شعبي عالنار كلام نصه امازيغي بس كان لحنه حلو وقعد يترجمه بس كان جميل بصراحه 

من كتر راكيات الشاي في الرحله دي فضلت شامه ريحه الحطب بتاع اسبوعين بعدها في كل هدومي اللي راحت معايا واللي ما راحتش 

بس احلى شاي في الدنيا تشربه منها الكوبايه بقين بالعدد وشاي صعيدي مغلي بميه الله اعلم ايه بس مش مهم  ، مع سكر من كتر غليته يكرمل ويبقى عسل ، معاه نعناع وويزا واشرب عدد لا نهائي من الشاي ولا يهمك 

ونخلص السفاري ونرجع بس بجد احلى حاجه في سيوه وحقيقي كنت حاندم لو ماطلعتهاش وخدت شويه صور اليوم ده من احلى صوري بجد 

#يوم_من_عمري_قعده_شاي_بالنعناع

اليوم العالمي للمرأه

 

8 مارس , اليوم العالمي للمرأه وظيطه بقه وناس تتصور واقوال ماثوره زاشتغالات للصبح !!! بس نفسي قبل ما تحتفلوا باليوم العلمي للمراه عايزاكم بس تشوفوا المراه دي عايشه ازاي

-        وهيه طفله اكسر للبنت ضلع يطلع لها 24

-        وهيه مراهقه مطلوب منها تخدم اخوها الشحط عشان هيه بنت وهو راجل

-        وهيه في الجامعه ما تتاخريش ما تصاحبيش ما تعليش صوتك واخوها متساب باشا يعمل اللي على مزاجه

-        لما تبدا يجيلها عرسان احنا مش حننقي الناس , البطران اخره قطران , عيشي عيشه اهلك

-        والناحيه التانيه اي بيه حواليها يتقاله اقعد عالبساط واختار ست البنات والراجل ما يعيبوش الا جيبه لا اخلاقه وتعامله يعيبوه ويعيبوا اهله كمان  

-        تتجوز تسمع الكلام ولا تناقش ولا تجادل , عيشي عشان ولادك , معندناش بنات تتطلق

-        يطين عيشتها وهيه تشتغل جوه وبره انما هو يرجع البيت يريح اعصابه , ايه مش راجل

-        تودي تمارين وتمرض عيانين , تنضف وتروق, تطبخ, تشتغل زيه زيها وفي الاخر يتقال الست ست والراجل راجل, انا بس عايزه تعريف للرجوله بصراحه , حضرتك لما تسيب لها كل حاجه مش بتعلمها تعتمد على نفسها لا بتعلمها تستغنى عنك !!!

- ما اتحوزش يتقال عليها وتتعاير في الرايحه والجايه ويتمرر عيشتها عشان يخلصوا منها أو في احسن الظروف كل كبيره وصغيره في حياتها يبقى سببها أو نتيجتها انها ما اتجوزتش ودخلت المنظومه العظيمه بتاعتكم 

-        في الشغل الترقيه والتفضيل للراجل مع انه عادي ممكن يكون بيتدلع ويتمرقع طول النهار انما لو ابنها سخن ولا تعب ولا عازت اجازه يتقال ادي الستات وشغل الستات ويوم ما تمد اجازه الوضع يققلوا التقييم السنوي ليها

-        حتى لو بقت وزيره تتحط تحت الميكروسكوب وكل شارده ووارده يتعلق عليها والدنيا تقوم ما تقعدش

-        ده عن الحضر , تعالوا بقه في الريف والصعيد : الغلبانه تصحى تخبز وتروح الغيط وتربي ماشي, تنضف تحتهم, تطبخ وتغسل وتشيل بيتها وبيت عيله جوزها وفي الاخر يتجوز عليها او يهجرها بعيالها وما تلاقيش حد يصرف عليها

-        الانيل ان بنتها عايشه وشايفه اللي بيحصل وبرضو الدايره مكمله والحياه تستمر في حلقه الظلم اللا نهائي دي

-        الاغرب بقه انه ما بيظلمش الست اكتر ظلم غير ست  زيها ويتقالك ما كنا قدكم وعملنا كل حاجه , انتم جيل بايظ

-        ترتاح بس يوم ما يتاويها التراب في بلد بتغني للبنات البنات الطف الكائنات

-        قبل ما تحتفلوا باليوم العالمي للمراه افهموها وقدروها وساعدوها مش تحطوا عليها وفي الاخر تحتفلوا بيها كام ساعه تضحكوا بيهم عليها

-        قالك اليوم العالمي للمراه , قال !!!