يوم من عمري: أول عمره لوحدي

كاي حد اتولد زي حالاتي في السعوديه , العادي انك رايح جاي على مكه مرتين تلاته في السنه

بس بعد ما بترجع مصر الموضوع ده بيتنسى شويه شويه

مره بعد  ما رجعنا مصر بيجي 14 سنه  كنت لسه متحجبه من كام شهر وانا باتفرج على التلفزيون وكان ناقل الصلاه من الحرم قلت لماما تصدقي انا نفسي قوي اروح قوي ووقتها اخواتي كانوا لسه صغيرين وكنا في وسط السنه فا مينفعش يجوا معايا  المهم ليه عمي الحبيب كان دايما يروح في رمضان فماما قالتلي قومي كلميه يمكن يطلع السنه دي مكدبتش خبر واتصلت بيه قعد يضحك وقالي رايح وعمك التاني وزوجته كمان رايحين وبكره اخر معاد للتقديم !!!

المهم طلعت معاهم ومش حانسى عمي الكبير لما انجني انا وطنط كل واحده من ناحيه ودخلنا الحرم معرفش ليه كنت خايفه انسى الدعوه اللي كان نفسي فيها وخفت من ربكه رؤيه الكعبه ما ادعيش وطنط كمان بيتهيالي حست بكده فبصينا في الارض وقلنا له لما نوصل الكعبه قلنا وفجاه اول مره احس بجمال الاسود فعلا الاسود يليق بها واول مره احس فرحه اللون الاسود وجلاله وعمقه وطيبته وحلاوته وحنيته كله في وقت واحد  ودعيت الدعوه اللي ان شاء الله مستجابه

كنا في ليله 25 رمضان سنه 2003 وصلنا الساعه 2 بالليل والطواف مكنش في اسهل منه وبكيت بكى كاني اول مره اروح وفي وسط الزحمه والدوشه مكنتش سامعه غير دعواتي وشايفه غير دموعي دموع تحس انها بتغسل روحك من جوه وراحه ملهاش زي ابببببدا

 وبعدها صلينا الركعتين وزمزمنا والفجر اذن وبعدين كملنا العمره بعد الصلاه  .

العمره دي مكنش في زيها لا قبلها ولا بعدها , حتى بعدها بكام سنه طلعت مع بابا وماما واخويا بس برضه مكنش في زيها  معرفش ليه يمكن عشان في رمضان , ولا الصحبه مختلفه , ولا بعد الحجاب على طول ولا ايه معرفش يمكن كمان عيد ميلادي قضيته هناك , جايز انا فاكره كويس اني حتى عيد ميلادي نسيته ويومها عمو محمود لقيته بعد التراويح بيقولي تعالي ودخلنا موفنبيك واكلني ايس كريم وبعد ما خلصت قالي مفيش تورته في رمضان انا مش مركزه فبقوله ليه فقالي كل سنه وان طيبه النهارده عيد ميلادك !!! عمري ما نسيتها وده كان احلى عيد ميلاد ليه في حياتي
 

بصراحه عمو سابني براحتي اكل وقت ما انا عايزه (انا اصلا باعمل زي السعوديين في رمضان وباكل بعد التراويح) اصلي لوحدي ما ارتبطناش ببعض في اي مواعيد وده يمكن السر الححححححريييييه والاحساس بالكنترول اللي خلاها احلى عمره ليه

عملت بعدها بكام يوم عمره لجدي الله يرحمه وكان في سيل وقت الطواف وكانت ليله ختم القران ووليله 29 . جدو بعدها جالي في الحلم   وشكرني !!

وتفضل عمره 25 رمضان من احلى عمراتي وعمري ما نسيتها يا رب عقبال الحج

 

 اللَّهُمَّ زِدْ هَذَا الْبَيْتَ تَشْرِيفًا وَتَعْظِيمًا وَتَكْرِيمًا وَمَهَابَةً ، وَزِدْ مِنْ شَرَّفَهُ وَكَرَّمَهُ مِمَّنْ حَجَّهُ وَاعْتَمَرَهُ تَشْرِيفًا وَتَكْرِيمًا وَتَعْظِيمًا وَبِرًّا " . .

اللهم امين 

Fantasy: Time machine

Now it is your life time opportunity I found the Time machine and I will allow you to use it!!!

·        Which time era would you go to (past or future)?

·        Why?

·        If you can be another person; which character would you play?

·        Why?

·        Whom would you take with you when going or coming back?


To start with myself I would choose to go to 60-70s (ayam el rawa2an ) to attend one of Om Kolthoum concerts . I would still choose myself because I am satisfied for who I am , I would get a picture of me with Thoma  when coming back!!!

 

Or
I may go to 19 century , in the English Country and attend a Walls dance like those in old movies , wear their nice dresses that make sound when you move !!! . I would still choose myself  but in 19 century style !!! when coming back I may get with me a Mr Darcy of Pride and Prejudice and see how he can act in 21 century .

COME ON be imaginative lets have some fun

الناس المفروسه من مرور المحروسه

 

اه والله ماهو اصل مرور المحروسه ده مليان عجايب وغرايب , مثلا احنا البلد الوحيده اللي بعد الشارع ما يترصف يفضل برضه مليان حفر وكأن الحفره علامه مميزه عشان الشارع ما يتوهش

احنا برضه اللي تلاقي البلاعات قي الشارع مش على نفس الخط مع انه نظريا هما متوصلين بنفس ماسوره الصرف فلازم يكونوا ورا بعض بس الظاهر همه بيقصدوا يسلوا اللي سايق عشان ما يزهقش

حدانا في المحروسه حتلاقي اي حد يطلع في مزاجه يقفل الشارع الجانبي ويحوله لجراج من غير ظابط ولا رابط مش بس كده يعمل مدخل خصوصي وبوابه كمان

احنا اللي بدعنا المطب الصناعي بتاع الاهالي يعني مش بتاع الحكومه , واحد مثلا من باب الدعايه عايز العربيات تهدي ناحيه المحل بتاعه يعمله مطبين تلاته عشان الناس تهدي قوم ايه تشوف المحل وتنزل تشتري . واختراع اننا نخططه طيب لحسن في الضلمه الناس تلبس فيه لا لا دي كماليات ما بنفكرش فيها !!!

واحنا برضه اللي بدعنا اختراع اليو ترن بدل التقاطعات قال ايه عشان الناس ما تقفش كتير قوم نسليهم ونلففهم حوالين نفسهم بالذات في مدينه نصر معرفش ليه

اليوترن ده بقه في اليومين اللي فاتوا اتحول للفراشه ترن حاجه كده منبعجه اخترعوها معرفش ازاي عباره عن اتنين يوترن لازقين في بعض موطنها الاصلي عند جامعه الازهر وقسم مدينه نصر تلاقي فجاه الشارع بقى اتجاه واحد بيصب في الفراشه ترن وبصراحه الحته دي عايزه مزيكه الموالد لانها فعلا بقت مراجيح مولد النبي وقال ايه عاملين لوح استرشاديه هاندميد تعر بلد بالمديريات اللي حواليها قال ايه عشان الناس ما تتوهش !!!

في شوارع المحروسه حتلاقي الاسلاك الشائكه ايفري وير ولما نقرر نفتح الشارع مش نشيلها بقه  , لااااااا نخليها على جنب عشان لما نعوزها نلاقيها من باب الاحتياط

واحنا برضه اللي ماليين الشوارع متاريس وورا المتاريس دشم كاننا في حرب , ما تقفلوا الشارع وتريحونا وتريحوا نفسكم ما هو كده كده مقفول وملوش تلاته لازمه

عندنا برضه الاختراع الهعظيم المسمى عسكري المرور اللي بيبوظ المرور ماهو يا عين امه برضه من كتر الوقفه في الحر والبرد والهباب اللي بيشمه كل يوم جاله تخلف , ففجاه تلاقيها قفلت معاه زي الدومينو ويستعين باي صديق من العربيات اللي حواليه يفض الاشتباك اللي حصل !!!!

احنا اللي لازم تلاقي عد مدارس البنات دوريه راكبه قال ايه عشان المعاكسات , وهمه همه اللي بيعاكسوا البنات برضه !!! دوريه فول اوبشن !!!

احنا اللي المرور عندنا لما يحصل حادثه اخر حد يوصل وبرضه امين الشرطه عايز الاكراميه بتاعته وفوقها شويه خدمات

واحنا اللي نمره النجده ما بتردش على الموبيل, لازم تتصل من نمره ارضي طب انا لو سايقه ولا عملت اي مصيبه ولا حد طلع عليه اعمل ايه , دور على رقم ثابت اتصل منه !!!

احنا اللي الناس من زهقها من الزحمه ممكن تتصاحب على بعض لما كل واحد يبطل عربيته وينزل يمشي رجله شويه

واحنا اللي اغلى اعلانات دلوقتي بقت في الراديو وقت الزحمه

واحنا اللي الحارات في الشوارع ممسوحه من كتر ما الناس مش بتستخدمها فالمرور بيوفر البويه ماهو اصل الاوبشن مش نازل لنا

واحنا اجدع ناس تلزق في عربيه الاسعاف في الزحمه عشان تخلص منها بسرعه

البوز بيز ده بقه اختراع مصري اصيل حط بوز عربيتك الاول تبقى لك الاولويه حتى لو ماشي معاكس

 

واحنا الشعب الوحيد اللي عنده شتايم بالكلاكس والنور فعادي جدا تتشتم وما تفهمش ايه اللي اتقالك وتكمل طبيعي جدا زي حالاتي 

مش بقولكم مفروسه من مرور المحروسه !!!!

ام رجب

طول عمرها في العماره اللي جنبنا زوجه الحارس بتاعها بس عمرنا ما سمعنا عنها غير في يوم صحينا على صويت لما جوزها مات وصحيوا الصبح لقيوه ميت ومن هنا ظهرت على الساحه

الست الجدعه اللي بميت راجل تقوم الساعه 6 الصبح تمسح العربيات ومش اي مسح بمنتهى الضمير والحنيه مش تدلق ميه والصاج يصدي لاه بفوطه مبلوله وبعدين تنشف وتلمع ولا كانها عربيتها ومن كتر احترامها لما حاولنا نخليها تمسح عربياتنا رفضت عشان الحارس بتاعنا ما يزعلش مع انها محتاجه الفلوس.

وبعدين تقعد زنهار على باب العماره للطالع والنازل ولا يمكن تسرح ولا ترغي زي باقي ستات الحراس في العماير التانيه والساعه عشره بالليل بالدقيقه تقفل البوابه ومحدش يدخل ولا يخرج الا باذنها امال ايه في نظام

ربت ولادها اللي يمكن خمسه او سته وما شغلتش بناتها في البيوت زي باقي العماير ولا هيه كمان خدمت في البيوت

ومفيش مره تشوفها غير مبتسمه وراضيه بجلابيتها البلدي الجميله وطرحتها السوداء الشفافه اللي تحتها التربيعه الفلاحي الجميله وسنتها المكسوره اه بس بتضحك قوي

ام رجب في نظري بعث للست الفلاحه اللي في تمثال نهضه مصر الست المصريه الجدعه اللي وقفت جنب جوزها وعمرها ما ظهرت في الصوره طول ماهو موجود لكن لما الظروف حكمت عليها كانت بمليون راجل وعمرها ما مدت ايدها ولا كسرت نفس ولادها بالعكس راسها عاليه ومرفوعه قوي اكتر من ناس كتير من البهوات والهوانم

ام رجب هي زي كتير من المصريات الاصيلات اللي موجودين وحيفضلوا موجودين ويمكن ماحدش ياخد باله منهم بس همه مش بيعملوا ده لاي حد همه بيعملوا ده لولادهم

بس هيه لو تبطل تغسل العربيه ام انذار اللي بتصحيني قبل المنبه بخمس دقايق تبقى مفيش منها !!!

مش عايزه اتجوز

مش عايزه اتجوز لمجرد ان العريس "مواصفاته كويسه"

مش عايزه اتجوز عشان معرفش يقى عندي كام سنه

مش عايزه اتجوز عشان الناس لازم تتجوز

مش عايزه اتجوز عشان لازم الحق اخلف

مش عايزه اتجوز عشان ابويا وامي عايزين يفرحوا بيه

مش عايزه اتجوز عشان لقيت نصي التاني

مش عايزه اتجوز واحد لقاني احسن عروسه في اللسته اللي والدته جابتهاله

 

عايزه اتجوز عشان لقيت انسان مناسب ليه لافكاري وعقلي وطموحي

عايزه اتجوز عشان لقيت واحد معرفش اعيش من غيره

عايزه اتجوز عشات لقيت واحد يملى عيني وعقلي وقلبي

عايزه اتجوز عشان انا كامله وراضيه بنفسي بيه ومن غيره ويكون هو كمان كامل وراضي بنفسه بيه ومن غيري  

عايزه اتجوز واحد عايزني انا ومحدش غيري انا

 

العريس الصالوناتي !!!

بعد البوست اللي فات لقيت صاحباتي بيحكوا عن العجب اللي عدى عليهم فققرت اعمل البوست ده , من ناحيتي حاحكي عن اشهر الانواع اللي وردت عليه بس انتوا كمان لازم تكتبوا معايا

والله والله ما هو من باب التريقه بس من باب ان الواحد يحس ان كلنا في الهوا سوا وان دي مشكله جيل بحاله مش حاجه شخصيه , ومن الناحيه التانيه من باب النصيحه لاي واحد بيتقدم لواحده يعرف البنات ايه اللي بيقفلها ويفصلها في القعدات دي

ويا ريت لو حد يشاركنا بالروايه الذكوريه لنفس الحدث اهه برضه نفهم من كل الزوايا , مش حارغي كتير نخش في الموضوع:

اول مره جالي عريس صالوناتي كنت في تانيه كليه ولان اهلي ما تعرضوش للموقف ده قبل كده قال ايه قررورا يصورا اختي صوره الاعداديه وبالمره كمان انت تتصوري فتعملي شعرك وتظبتي حالك ودخلت عليه وقال ايه بعد الصوره ما تيجوا نروح النادي وهناك نتقابل صدفه على الباشا , بصراحه دخلت عليه والمضحك في الموضوع انه لم يعنيني الناس اللي معرفهمش اللي شفناهم فقعدت طول القعده اقرا مجله النادي  بس بعد كده قرون الاستشعار بقت تشتغل في اي حاجه مريبه واتفقنا انه ما يصحش ابقى فرجه لوحدي طب ما هو من حقي انا كمان اتفرج ولا ايه ؟ فمحصلتش غير مره واحده اللي هيه كانت تاني مره دي بقه تفاصيلها حتزعل ناس فبلاش منها

بعد كده الدغري اقصر الطرق فبقيت انزل وانا عارفه , بصراحه والواحد لسه ورور كانت بتبقى موتره جدا وبتبقى مش عارف تتصرف ازاي ولا تقول ايه بس بعد كده خلاص الواحد جتته نحست !!!  فنصيحه لاي واحد البنت بتبقى محتاسه خصوصا لو لسه صغيره فحاول تتعامل بذكاء وبلاش التطجين في الكلام

نيجي بقى لبعض الانواع اللي عدت على الواحد :

·        مدمن الشغل : ومش دي المشكله ما انا كمان كده بس المشكله انه عمل زي حنفي في سك على بناتك  اللي جالي مطبق ومش متغدي فكان بياكل الجاتوه بشراهه مفزعه والكريمه لزقت على وشه فبقيت مش عارفه ابص له لحسن اضحك, المهم عدت بس في تاني قعده نسي المعاد وفكره تاني يوم من كتر ماهو مشغول !!! طبعا ابويا اتجنن من الحركه دي وهيه بصراحه ما تصحش

·        المتشرط : اتحجبي الاول : ما ينفعش تعمل كده عشان الحجاب ده علاقه بيني وبين ربنا ولو عملتها عشانك ما تبقاش عباده وانا ببساطه مش بعبدك انا باعبد ربنا

·        المتشرط 2: ده بقى اتقدم بعد ما اتحجبت (غير اللي فوق) وقبل ما يجي : تبطل تلبس بناطيل وحنعمل فرح اسلامي وتقعد من الشغل اصل والدته داعيه اسلاميه فواحده من الاخوات كانت جايبه مكافئه ليه على الحجاب !!!  : يا اخي ما تدخلش الدخله دي مش كده امال حتعمل فيه ايه بعد كده (ايه المواطن ما تجيش وما قابلناهوش اساسا )

·         النصاب: ده بقه اللي كان حكايه بالمناسبه كان وكيل نيابه !!! ودخل دخله محققين واستجواب مش مقابله تعارف , المهم في وسط الكلام جبت سيره والد صاحبتي اللي معاه في نفس مكان الشغل واني من ضمن الاماكن اللي بنخرج فيها نادي القضاه وده ركبه العصبي وقام , بعد كده عرفت من اللي كانت جايباه انه اتقدم لواحده تانيه ونصب عليها وخد منها عربيتها اتاري الباشا خاف مني لاحسن لو عمل كده معايا يوصل الكلام ده شغله

·        ابن امه : وده كان كتير قوي : تلاقيه قاعد لازق لها , ما يتكلمش غير لما هيه تفتح المواضيع , طول القعده يتكلم على ماما وهكذا : يا ابني البنت بتبقى عايزه تستقل وتحس بحياتها فما تحسسهاش ان الست الوالده حتيجي تتحكم في كل تفاصيل حياتكم مش كده , مهم قوي تحترم والدتك بس ما تبقاش "ابن امك" !!!

·        العبيط : مثال عليه واحد ظريف قوي جاي المقابله بالليل بنظاره شمس !!! وعينيه ما فيهاش حاجه بس عشان ما تقولوش عليه سيئه النيه , اصله قعد ربع ساعه بالنظاره الشمس (غالبا كان بيعاين بعمق يعني !!! ) وبعد شويه قلع النظاره , ايه الهبل ده !!! قفلني من اول خمس دقايق

·        الغير واثق من نفسه : اول ما عرف اني معايا ماجستير وبشتغل في شركه مالتيناشونال والجو ده اتشنج وما كانش طايق نفسه , ملحوظه : كان دكتور في الجامعه يعني انا مش احسن منه في اي حاجه بالعكس  !!!

·        الخجول : وده اول ما قعد ودانه احمرت ووشه جاب ميت لون ومابقاش عارف يتكلم طب حنكمل القعده ازاي يعني , راح ولا جاش

·        اتقدم لي انا وصاحبتي في نفس ذات الوقت : شوفتوش البجاحه !!! ما كانش عارف اننا اصحاب , بتحكيلي على عريس جايلها واذ بي اكتشف انه كان عندنا من يومين , للنهارده صاحبتي ما تعرفش , احنا الاتنين فركشناله بالمناسبه . الفكره انك ما ينفعش تشوف اتنين في وقت واحد , واحده واحده مش كده ولو عرفوا وقعتك سوداء .

·        ده بقه اللي حدوته: كانت مديرتي جايباه ليه وجابته المكتب وما كنتش قايله لنا وكل شويه تبعت تنده واحده فينا كانه شو عرايس . يا ست الكل ما ينفعش تعملي كده وما يصحش اصلا تحطينا في الموقف ده , المهم ايه انا كان عندي مشكله مع حد في الشغل وقعدت اشتكي واعيط عندها فطبعا قفلته هيه بعد كده قال ايه بتقولي اهدي شويه  وما تاخديش كل حاجه على اعصابك اصل اللي كان عندي كان عايز يتقدملك بس انت بالقواق ده قفلتيه !!!! قال ايه انا السبب و طاااايب

·        فيه بقه ثاني اكسيد الكربون : شفط الاكسجين من المكان المفتوح اللي كنا فيه : وقعد يحكي عن صناعه المؤامره والبلد واللي هيه فيه كميه طاقه سلبيه غير طبيعيه , وبعدين ست البنات والعبايه ام كباسين وايه اللي وداها هناك !!!! والدبابات اللي الجيش ما داسش الناس بيها في ماسبيروا وان اي حد ممكن يسوق الدبابه !!! (كان ظابط جيش) فقلت له هات الدبابه معاك المره الجايه !!!

·        البخيل : في الكلام , المعلومات , كل حاجه وده بقه كان جايب والده يتكلم بالنيابه عنه وشفته تلات مرات بنفس الطقم ( ملحوظه كان مرتاح ماديا بس واضح انه بخيل في كل حاجه ) . يا باشا زي ما من حقك تعرف عني كل حاجه لازم كمان تساعدني اكتشف سيادتك, ووالدك ما ينفعش يتكلم بالنيابه عنك وبحبحها شويه

·        الشخص الصح في الوقت الغلط وده واحد وحيد وكان perfect match  بس ما كنش في نصيب للاسف L

·        جاي في السريع : فاكرين فيلم ماجد الكدواني: نازل اجازه وعايز يخطب في اسرع وقت دول بقه حدث ولا حرج واضح ان الجدول كان بيقى فيه عروستين تلاته في اليوم . نفس الفكره اللي اتقالت قبل كده ما ينفعش each at a time  بالراحه  

·        اقعدي من الشغل: هو انت ليه عايز تلغي حياتي قبل سيادتك , ما ينفعش شغلي جزء مهم من حياتي وجزء من الpackage  زي اهلي وشكلي وطباعي , وزي ما مينفعش اقولك غير صحابك او اهلك او شغلك سيادتك برضه لازم تحترم كل ده عندي

الفكره ايه : انك ما ينفعش تمثل عشان حتتفقس, ما ينفعش تتشرط , وما ينفعش تشوف عروسه من غير علمها , ما ينفعش تشوف كذا عروسه في وقت واحد, وما ينفعش  تغير من شغلها ونجاحها البنت الناجحه المستقله المتعلمه دي اضافه ليك وحتكون co-pilot   لسعادتك فدي ميزه مش عيب واقولك سر: بتكون زهقت قوي من انها هيه المسئوله دايما فبتبقى مستعده تتنازل عن القياده بس لو شافتك جدير بيها فلازم تكون كده وعمرها ما حتتنطط عليك  كلام في سرك دي حركات بنات وحتحطك فوق راسها بس لو كنت جدير بالمكان ده فلازم تكون

البنات مش يتدور على شقتك وعربيتك وساعتك الغاليه ولا بتدور على وظيفتك الفظيعه , البنات بتدور على واحد يملى دماغها وعينها وقلبها , البنات بتدور على اب لولادها تفتخر بيه ويبقى نفسها ولادها يكونوا زيه  ولو ربنا ما قدرش الولاد لاي سبب يكون هو كفايه , البنات بتدور على سواق لعربيه حياتها تطمن من سواقته ما تبقاش على اعصابها للعربيه تخيش في الحيطه , وتنام وهو سايق وتروح في عاشر نومه لانه سواق شاطر وواثقه فيه

افهموا بقه

مستنيه تجاربكم بس مش من باب التريقه وسامحوني لو مسحت بوست حسيت انه تريقه لاني والله ما قصدي التريقه ولا السخريه بس فعلا عايزه افهم وافهم الناس كل زوايا الموضوع متفقين؟

اه اللي عنده مشكله كومنت في البلوج انبوكس الكومنت وانا حاضيفه واكتب اسم صاحبه او صاحبته

جواز الصالونات

سيناريو 1: يرن التيلفون عاده بين سبعه وتسعه(معرفش ليه) شويه وتلاقيهم يندهوا بسعاده غامره كده (برضه معرفش ليه) وتعرف ان طنط من الطناطيت جايبه احد معارفها المحترمين كعريس واحيانا ما بتكونش تعرفه !!! اه والله ما بتكونش تعرفه تلاقي واحده من معارفها تعرف واحده من معارفه وفي قعده نميمه في النادي ولا شات روم على النت جابوا في سير الناس ومنهم سيادتك وسيادته قوم ايه قررورا يوفقوا راسين في الحلال!!!

سيناريو 2: حد من زمايلك الولاد حب يخدمك ويفك عقدتك (اصله يا عيني مفكر مفيش في دماغك غير العقده دي !!! فقرر يساعدك ويكسب فيكي ثواب ) فيقولك عايزك في الميتنج روم وتبقي متوقعه مصيبه في الشغل تلاقيه يدي مقدمات ازاي انتم صحاب واخوات (وعاده هو بيبقى مكسوف اكتر منك !!! )وبعديين يقعد يحكي لك عن حد من صحابه وازاي هو لقطه اللقط وماجابتوش ولاده ويقعد لحد المعاد اللي تحدديه ياكل دماغك انت واللي خلفوكي عن صاحبه او قريبه السوبر دوبر ويرفع سقف توقعاتك لحد ما دماغك تلبس في السقف

سيناريو 3: واحده من صحباتك المنفسنين تقولك ايه اصل انا (او حد من قريابها او اخواتها لو كانت متجوزه) اتقدملي (او اتقدم لها)معرفش مين بس انا مش حبااه او اصلي مرتبطشه ومش قايله لاهلي وقلت ايه اكسب فيكي ثواب (قصدي انت اولى الملافظ سعد يا مرزوق) وكيت وكيت وكيت ولكلكلكلكلك

المهم في التلات سيناريوهات يبدا عرض لسته المواصفات الفظيعه من شقه ووظيفه وعربيه  والطول والوزن !!!!  والذي منه واهله واخواته ومين في عيلتهم شغال فين ومين الباشا الفلاني اللي عدى جنب شقتهم من سبعه الاف سنه وهكذا (كل ده ما يدخلش دماغي ببصله اصلها مش بيعه وشروه دي حياه وشراكه ومستقبل مش مين حيدفع كام مقابل ايه !!!!) وما هواش job offer والله ده مستقبلك لاخر العمر

 وبعد ما سيادتك تحددي المعاد (من باب الاخذ بالاسباب مش اكتر لانك مش مقتنعه بالطريقه العجيبه دي) تلبسي وتتشيكي اهي فرجه ببلاش !!! والسيد الوالد يضرب البدله التمام والست الوالده تديها الذهب والمجوهرات وتنزلي في مكان المقابله ( ما بحبش ادخل حد بيتنا يتفرج عليه) ويا سلام بقه لو الواسطه ققرت فجاه يبقى عندها ذوق وتنسحب (قال يعني اصل دي خصوصيات !!! ) فتبقي فعلا رايحه ( blind date) على اصوله مش عارفه شكل المحروس ايه (مش بقولكم ايام سودا)

وفجاه تخبط دماغك في السقف !!! وتزهقي بعد خمس دقايق من ال interview العظيم اصله يا عيني ما بيبقاش لاقي حاجه يقولها فتلاقيه كانه رايح مقابله وظيفه يقعد يحكي تاريخ حياته وشغله مش واخد باله انه مش جاي يشتغل ده جاي يتجوز!!! ده لو جاي لوحده اما بقه لو جايب الست والدته ولا اخواته ولا الاتنين دي بقه اللي بتبقى فرجه ومنظره وفشخره كدابه من الطرفين !!!!

المهم عاده بيبقى فيه اشاره لاهلك انه مش مبلوع عشان يقوموا بقه وكفايه وش, فهمه يقرروا يدوكي فرصه !!! ويقعدوا شويه وانت مش طايقه ويا سلام بقه لو قرروا يتفرجوا على النادي ويسوبوكي معاه لوحدك (دي بقه بتبقى نيله النيله !!! )

في بقه اللي يقعد يسبلك ويقولك دي عنيكي ولا عدسات ( لا مؤاخذه اتنيل انت تعرفني منين عشان تسبلي !!!) , وفي اللي يسالك عن الطبيخ وبتعرفي تعملي ايه (فتستحضري نور الدمرداش في صغيره على الحب) , وفي اللي يسالك لما نتجوز عايزه كام عيل (هو سيادتك دخلت بيتنا اشاساسا عشان تتكلم في الامور دي!!!!! ايه الفصلان ده ؟؟؟ ) وفي اللي من رحم ربي يسالك عن شغلك او سفرك او كليتك او يحاول يوجد مساحه مشتركه قدر الامكان او اي موضوع عام اهه مبلوع شويه, وفي اللي بيتكلم في السياسه ويقول كل حاجه وعكسها فتكتشفي انه ضايع وفي وفي وفي اشكال والوان يا ما ورد على الواحد المهم حبقى اعملكم حلقه مخصوص عنهم تغلب عايزه بلوج اتجوز !!!! المهم تخلص القعده و تروحوا ويا دار ما خلك شر

في بقى اللي يتصل تاني او تالت يوم , وفي اللي ما يتصلش (رضينا باهم والهم مش راضي بينا !!!) وفي اللي يتصل يعتذر (ودول باححترمهم جدا لانه احترم وقتك وعلى الاقل قرر يحترم لقاء محتمل بالغلط والدنيا اللي صغيره )

وعادي يا جماعه زي ما هو ممكن ما يعجبكيش وارد جدا انك ما تعجبيهوش nothing personal ) )!!!

المصيبه لو قرر سيادته يشوفك تاني يا اختييييييي دي بقه اللي بتبقى غرزه خصوصا لو ما بلعتيش حضرته فبتبقى مش عارفه تتصرفي ازاي ويا سلام بقه لو اهلك ققرورا يجي البيت , يا لالهول !!! وسيادته يضرب التورته المتينه , والصيني والكريستال يطلع من النيش (النيش ده لوحده قصه لا تنتهي!!!) والفضيه والي واللي واللي

ونقعد نتمنظر على بعض بالعيله وعيله العيله واي كلام مش اتنين يمكن يكونوا محتاجين يعرفوا بعض اكتر!!! ده المفروض انه لو الموضوع كمل حيشوف سيادتك بعبلك وانت لسه صاحيه من النوم , وحيشوفك في المطبخ والبصله في ايدك , وحيشوفك وانت قامطه القمطه لو الست بتنضف عندكم ووووووووو وانت كمان حتشوفيه وهو بيشخر وهو نايم , وهو دقنه طويله وهو ناكش شعره يبقى ما ينفعش نمثل على بعض

المهم على احسن تقدير القعده الاولانيه لن تزيد عل ساعه وقولوا التانيه ساعتين يعني مطلوب من سيادتك لو سيادته حن عليكي ورضي بيكي تقرري حياتك ومستقبلك بناء على تلات ساعات تمثيل وتلاقي الباشا بيتصل قال ايه عايز يحدد قرايه فاتحه !!! ما تختم القران كله بعيد عني انا مال اهلي !!!!

ولما تقولي لاه (لو ما عجبكيش : لحد دلوقتي ما صادفتش الي اقول عليه ااه) يقعدوا ينكدوا عليكي (مش بالضروره اهلك ممكن واسطه الخير ) وعلى اللي خلفوكي وعندك كام سنه وجالك كام عريس وانك معندكيش رفاهيه الاختيار والهري ده , ولو حد من قرايبك للي جايبه العيله كلها تعرف وتتصيتي !!!

الفكره في يتصل او ما يتصلش الفكره انه ازاي في القرن الواحد والعشرين لسه في حد متخيل ان البنت اللي اشتغلت واتعلمت

وسافرت وشافت رجاله اشكال والوان لسه ممكن تتجوز بالطريقه دي ده كل عيلتي اعمام وخيلان وخالات ما اتجوزوش كده وكان في سابق معرفه او استلطاف قبل العريس ما يشرف يبقى عايزيني دلوقتي اروح كافيتريا او نادي ادور على واحد قاعد في كافتريا ولابس بدله معرفش لونها ايه وحاطط كتاب ولا ورده ولا اي علامه مميزه اشوفه واتجوزه واعيش عمري معاه بدون سابق معرفه !!!! طب ازاي ؟؟؟ لا وكمان المطلوب لو جنابه عايز يقعدني في البيت اقعد, ولو عايز يسافر اسافر هو انا اعرفك منين عشان اعمل كل ده ؟؟

ده حتى بنظريه الاحتمالات : اعجبه وما يعجبنيش, يعجني وما اعجبوش, ما نعجبش بعض من الاساس , نعجب بعض احنا الاتنين, نعجب بعض واهالينا ما يعجبوش بعض, ...... او كل ده يحصل وبرضه ما يبقاش في نصيب او او او !!!!! يعني بنسبه صغيره بنتكلم في 20 -30% على احسن تقدير !!!! وبعد كده نقول نسبه الطلاق معرفش كام في الميه ولا الخيانه ولا الفتور ولا ولا ولا

انا مش معترضه على اللي مقتنعين بالطريقه دي همه احرار بس همه كمان ما يعترضوش على قراري او عدم اقتناعي ويا سيدي ويا ستي كل واحد حر وربنا محلي له دماغه اللي مريحاه فيطلع من دماغي اللي برضه عجباني و مريحاني وساعه ما النصيب يجي محدش عارف حيكون ازاي (تبقى نكته لو كان صالونات) مش حاعترض عليه لانه ساعه القدر يعمى البصر !!!!

ارحمونا وسيبونا في حالنا ربنا يعمر بيتكم

https://www.facebook.com/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431?ref=aymt_homepage_panel#!/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431