رمضانيات: تخاريف صيام

مدمنين الشاي اللي زي حالاتي بيبقى عندهم مشكله اول كام يوم في رمضان اعراض انسحاب على تخريف على قله تركيز و اصل بعيد عنكم الكيف بيذل !!!

انبارح كنت مضرب الامثال في الحكايه دي : واقفه مع صاحبتي فزميلنا فراس بيسلم عليه قلتله ازيك يا معاذ ( اهو اي اسم مش دارج وخلاص) اللذيذ انه ضحك ومشي

شويه وزميل تاني بيقولي كل سنه وانت طيبه فرديت وقلتله الحمد لله!!!

روحت البنك كان عندي مشكله في الفيزا والماستر كارد لخبطه كده , فمديره الفرع كشفت على الحسابين وقالتلي على اللي حصل اتاريني اشتريت بواحده ورجعت اللي اشريته على التانيه المهم تقنع فيه مفيش وانا مفيمه على الاخر لغايه ما قالتلي بصي يا لميا انتي بعد الفطار تعملي كوبايه شاي وكحكايه وتفتحي الحسابين وانت حتفهمي !!!

اللذيذ اني اكتشفت اني مش لوحدي , فمثلا واحده زميلتنا بتلبس الصندل بعد صلاه الظهر مش عارف تقفل الابزيم فلقيتها بتقولي انا مش حالبسه تاني في رمضان قلتلها ليه يا بنتي فقالتلي اصله في لفه ومحتاج تفكير !!!

واحده تانيه بتقفل باب اللوكر فتقيل قوي مش عارفه تقفله فبصت للباب حته بصه مميته من الضحك وكان ناقص تتخانق معاه

اخر حاجه حصلت اني بعد ما دفعت فلوس في البنك وخدت الوصل فضلت واقفه كتير خمس دقايق فالموظفه بتقولي حضرتك حتعملي اي عمليه تانيه فقلتلها لاه قالتلي طب واقفه ليه قلتلها مستنيه الايصال قالتلي الايصال معاكي من خمس دقايق !!!

اللطيف اني بعد الفطار شوفت اعلان موبينيل بتاع موكا ولا كابتشينو لقيتني باضحك بهستريا لاني فعلا ما ببقاش مجمعه !!! تمام زي الاعلان

اصل بعيد عنكم الكيف بيذل !!!

رمضانيات: بيت العيله

ارتبط بذهني وانا صغيره بيت العيله بأول يوم رمضان , أول يوم العيد, مولد النبي , وكل واي مناسبه معديه من الشباك

كان جدو سيد لسه عايش وكان بيجمع امي وخيلاني وخالتي ويتلكك على التجميعات دي, جدودي لابويا ماتوا واحنا صغيرين قوي فموعاش على البيت الكبير في بنها . بس بيت شبرا عند جدو سيد كان له طعم مختلف

نروح يمكن من عشره الصبح وما نبطلش ضحك وتهريج وزغزغه معاهم كلهم , وماما وخالتي وجدتي يدخلوا المطبخ

في رمضان بالذات كان له طعم مختلف وكان الله يرحمه يحب الاكل على الارض فنفرش مفرش السفره على الارض في الصالون ونقعد بالظبط بنفس رصه السفره بس ارضي

ناكل ونحلي ونضحك ونتفرج على نيللي وشيرهان

اخر سنه قبل ما يموت جمعنا اول يوم رمضان , والغريب ان اليوم ده محدش جه كتير لان خيلاني كانوا اتجوزوا وكتير منهم كان عند اهل مراته فمرحش غيرنا . بعد ما فطرنا هو حتى كان زعلان , سنتها دخل المستشفى 5 رمضان ومات 25 رمضان الله يرحمه

بعد موته ما بقتش التجميعه تحصل 100% اللي مسافر واللي معزوم في حته تانيه وسنه في سنه بقينا نتقابل بالصدفه وجدتي مش عايزه تضايق مراتات ولادها اللي عايزه تروح لمامتها تروح ففركشنا التجميعه دي

الاول زعلنا واتاثرنا بس شويه شويه بقى بيتنا هو بيت العيله وبالذات بعد جواز سحر اختي

انا فاكره انها اتجوزت قبل رمضان بشهر تقريبا واول يوم رمضان كانت عند حماتها بابا كان زعلان قوي  انها مش معانا حتى يومها قلتله هيه مش مسافره ما هيه جايه بكره ولا انا مش ماليه عينك بس جت اليوم اللي وراه على طول

دلوقتي فكره اول يوم ما بقتش تفرق اول تاني يوم ,أول جمعه المهم اللمه وخلاص حتى في العيد

الفكره هو احنا ليه Obsessed  بفكره القطفه الاولى ؟ اول يوم رمضان, أول يوم العيد, أول مرتب , أول اي حاجه ؟ مش مهم الاول المهم الفكره اللي بتدور عليها والفرحه اللي بتحس بيها فلمه عيله او صحاب أو اي حاجه

سحر جايه النهارده فالنهارده في بيتنا كانه اول يوم رمضان !!! مش بقولكم  احنا شعب Obsessed  بفكره القطفه الاولى !!!

رمضانيات : حوده جابلي فانوس

انا من الجيل اللي كان الفانوس بتاعه ستانلس ستيل وفيه كتكوت اصفر وده كان قمه التطور وقتها

من كتر قعادنا بره مصر ما اتعودتش العب بالفانوس ولا اشوفه كتير

بس كان عندي واحد في مصر ابو كتكوت اللي لسه قايله لكم عليه

كنا بننزل مصر اوقات في رمضان وكان معظم الوقت بنقعد عند جدي لانهم كانو بيوحشونا قوي فمكتش بالعب بيه

بعد ما رجعنا في سنه من السنين طلعت في دماغ بابا يجيب فانوس كبييير قوي نحاس من القدييم ده  كان تقريبا طوله متر وكنا بنعلقه في منشر الغسيل في الشارع ويفضل منور طول رمضان

بعد كام سنه القزاز بهتت الوانه فجبنا الوان ولوناها وبرضه علقناه

سنه ورا التانيه الفانوس اتركن في المخزن واتكومت عليه كراكيب كتيره قوي

السنه دي معرفش ليه افتكرت الفانوس وقعدت ازن على بابا يطلعه ونلونه ونعلقه زي زمان  كسل وقالي بلاش معيله , طب نجيب زينه ونعلقها , طب هو ليه احنا مش بنزوق العماره

معرفش ليه نقحت عليه الحاجات دي السنه دي , المهم خدت لي شويه تريقه وسكت وخلاص

انبارح صحيت من النوم بعد العصر لقيت محمود قاعد في الصالون مستنيني اصحى ولقيته بيقولي تعالي ورايا

دخلت اوضه المكتب لقيته جايبلي فانوس

ومش بس كده الديزاين اللي انا كنت حاشتريه لنفسي اول رمضان واتكسفت اعملها لحسن يتريقوا عليه

انتوا مش متخيلين انبسطت بيه قد ايه

حوده جابلي فانوس !!

يوم من عمري : اول يوم رمضان بره مصر

 

سنه 2012 حبكت اني اكون مسافره لتدريب بره مصر وجه عليه رمضان هناك قضيت 6 ايام هناك

مش متخيلين مدى سخافه الاحساس باول يوم رمضان لوحدك

اولكش كان اخر يوم في اول تريننج ويوم امتحان شوفتوش غلاسه اكتر من كده !!!

انا ايامها سالت ولقيت رخصه الافطار ففطرت لان اليوم كان بتاع 18 او 19 ساعه صيام مش فاكره

المشكله مش في الصيام المشكله انك لا لاقي حد تكلمه ولا تعيد عليه  ولا في فوانيس وهيصه بتاعه مصر ولا اي حاجه خاااالص

خلصت الامتحان وروحت بدري قلت استغل اليوم فرحت متحف مفتوح في ضواحي بازل اسمه Augusta Rica  عباره عن انقاض بلد يوناني كانت هناك وهمه كملوها بالرسومات ومجسمات في شكل يشبه  treasure hunting  كده , يديك خريطه تمشي عليه فتعيد اكتشاف المنطقه باختصار عملوا جاكته على الزرار على راي سمير غانم بس مكان تحفه  

الفكره تحفه وتنفيذها يجنن والهوا كان ملهوش حل بس المشكله ان الجو قلب وادتها مطره من كل حته ومفيش صريخ ابن يومين ولازم تكمل عشان ترجع لنقطه الصفر اللي عليها المواصلات , كتير ؟؟؟ ساعتين تلاته !!!!

المهم خلصت ورجعت ولسه الدنيا نهار والساعه 8 واختكم قال ايه مكسوفه تاكل في نهار رمضان مع ان معايا رخصه بس قال ايه اتكسفت اقابل حد بحجابي ده يعرف ان المسلمين صايمين واني مش صايمه (ساذجه قوي انا مش كده ؟)

بس الجوع كافر , باتمشى لقيت مطعم سوري قلت ما بدهاش واللي شجعني ان الجارسون شخصيا كان واقف يشرب سجاير !!!

دخلت وطلبت محشي ورق عنب وتبوله وبابا غنوج وطعميه (اصل موضوع اللحوم بره ما بيرحينش بصراحه)

اكلت وحليت ببقلاوه وشاي بالنعناع , كل ده الساعه ما جتش 9 ( المغرب كان 10.30) !!!!

روحت قلت زمانهم في مصر فطروا اكلمهم واقعد معاهم شويه وفتحنا السكايبي والست جنه بنت اختي ادتها هرتله وشغل اراجوزات , وجابوا صينيه الكنافه قطعوها وكلوها قدامي من غيري !!! شويه وسابوني ونزلوا التراويح

انا كل ده مستيه العشا عشان اصلي التراويح ومفيش فايده اليوم مش عايز يخلص في الاخر روحت في النوم وخلص اليوم بس ايه ما اقلكوش اسخف اول يوم في رمضان في الوجود

بلدنا حلوه قوي , وبالذات في المواسم دي  ما تفرطوش فيها وحبوها قوي
 

 

رمضانيات : ليله الرؤيا

اللليله ذات المنظر المعتاد من كبار رجالات الدوله وهمه قاعدين في دار الافتاء مستنيين نتيجه الرؤيا بكره صيام ولا لأه

ويطل علينا المفتي بمقدمه وديباجه شهيره انه ثبتت أولا لم تثبت الرؤيا وان بكره اول يوم في الشهر الكريم ولا المتمم لشعبان وبعدين ينزل التلفزيون المصري بباقه التهاني واغنيه عبد المطلبب الجميله " رمضان جانا " سواء بتصوير فيديو أوا كارتون حسب انهي جيل تنتمي ليه سيادتك

مش ده اللي اقصده خالص , اقصد مكالمات التليفون من هنا وهناك قبل الابتلاء المسمى السمارت فون اللي خلى التهاني واتساب وفايبر وتاج على الفيسبوك

وجدي لما كان يتصل بينا واحد واحد يعيد علينا

وانك تبقى عايز تسبق الناس اللي عايز تقولهم كل سنه وانتم طيبين قبل ما همه يتصلوا بيك

وازاي شبكه التيلفون والموبيل كانت بتهنج بس الاتصالات مستمره

وماما لما تقوم تجهز لاول (فول) قصدي  سحور من التلاتين (فول) قصدي سحور

ليله الرؤيا قد تثير شجون بعض الناس زي مثلا اللي مات له حد عزيز وده اول رمضان من غيره ببس حاقولك هو(هي) في مكان احسن

او حد كان نفسه في حاجه قوي رمضان اللي فات وكان نفسه فيها رمضان ده بس حاقولك ما هيه لو كانت من مصلحتك كانت حصلت , يبقى اللي جاي احلى

او حد مسافر ومقضي رمضان بعيد عن اهله  حاقولك قدر النعمه دي وانهم كويسين وبصحه كويسه حتى لو انت مش معاهم  وان شاء الله لما ترجع تقضي معاهم باقي رمضان

بالنسبه لي الشجن الي بتفكرني بيه ليله الرؤيا هو اعلان نتيجه مجلس الكليه سنه 2001 واني ما اتعينتش في الجامعه , كانت يوم 28 شعبان , بتقل شويه شويه مع الوقت بس لسه فيها نقطه شجن , وحمد لربنا في نفس الوقت !!!

على الناحيه التانيه ليله الرؤيا يعني فرحه ان ربنا اختارك ودخلك رمضان دون عن ناس كتير ماتت في الكام اسبوع ولا شهر اللي فاتوا فمتضيعوش في شيشه وتمثيليات وقرب من ربنا قوي محدش عارف السنه الجايه فيها ايه

ليله الرؤيا لو بكره رمضان يعني تقوم جري تحضر نفسك لأول تراويح وتسلم على اصحاب الجامع اللي يمكن بقالكم سنه ما اتقابلتوش

يعني تسمي وتفتح المصحف وتبدأ أول ختمه في المصحف وتنوي تختمه اكتر من مره ان شاء الله

يعني يبدا السباق ونشوف مين حيسبق مين بس اقولكم على حاجه كلنا كسبانين ومحدش ان شاء الله خسران

قوموا كلموا بعض بالتيلفون وبلاش جو الفيسبوك والواتساب ربنا يخليكم , حسوا شويه بانسانيه التهاني بالتيلفون على الاقل , واللي حيقولي السنه الجايه تكوني في بيتك , احب اقولكم انا في بيتي . واللي حيقولي نفرح بيكي قريب , احب اقولكم انا فرحانه بنفسي

بطلوا غلاسه وما تخلنويش ابطل اتصل بيكم !!!

كل سنه وانتم طيبين

رمضان كريم

 

خدلك سيف , كمان سيف , طب كمان سيف !!!!

اخر الساعه....... قدم الساعه .......  طب كمان مره عشان البيه اخر الساعه  

النهارده كان عندي امتحان وغيرت الساعه على الموبيل قبل ما انام وظبطت المنبه , بس الظاهر التيلفون بتاعي سمارت قوووي يعني قام هو ماخرها كمان ساعه وصحيت 5 الصبح ببص في ساعه اوضتي ما بقيتش عارفه هيه على القديم ولا الجديد والموبيل لقيته راجع ساعتين نزلت الشارع بدري احتياطي ووصلت الجامعه ساعه بدري والشوارع كانت فااااضيه اتاريني مش عارفه الساعه كام وقعدت طول اليوم متنحه من لخبطه النوم

 طول عمري كنت بحب التوقيت الصيفي اصله كده ببساطه بيطول اليوم ويخليه  في بركه حلوه

بس الكلام ده قبل ما نقلب جو الخليج والزهق والحر اللي لا يطاق

بعد شويه مع دخول رمضان على الصيف بدات الناس ترجع الساعه على دخول رمضان وترجع تاخرها تاني , قال ايه الداستور يستثني رمضان من التوقيت الصيفي

شويه وبعد الثوره قرروا الغاء التوقيت الصيفي لانه وفعلا ببساطه ما بيفرقش في حاجه لان الناس ببساطه ما بتخرجش غير بعد المغرب والصيف بيحب السهر والتكييفات هيه هياها يعني اصلا كده كده مش فارقه

قوم بعد الثوره التانيه يقرروا يرجعوا التوقيت الصيفي لييييييييه ما عرفش وكم القلش والتريقه اللي جت على الفيسبوك ملهاش اخر

وبعدين على دخله رمضان نرجعه وبعد رمضان نرجع تاني للتوقيت الصيفي وبعدها بشهر نرجع للتوقيت الشتوي , ايه الجنان ده !!!!

سيبكم بقه من لخبطه الساعه البيلوجيه , ولا لخبطه الطيران والرحلات الدوليه ولا تريقه الدنيا على التخبط اللي احنا فيه , وان عدد ساعات الصيام في الاخر هيه هيه مفيش فيها اي تغيير

بس اللي فعلا يغيظ اننا في اقل من شهرين غيرنا الساعه 3 مرات من غير اي دراسه ولا تفسير وفي اتجاهنا للتغيير الرابع بعد رمضان بشهر للتوقيت الشتوي !!!!

عمل زي الفيلم : خدلك سيف , كمان سيف , طب كمان سيف !!!! لما ما كانش لاقي حاجه يقولها ولا يعملها

 

دخله رمضان

يعني ايه دخله رمضان بالنسبه لكم ؟

بالنسبه للعبد الفقير لله ضيف جميل جه ومشي من سنه وكروتنا من غير ما نحس فبنقعد نستناه كل سنه على امل انه ما يجريش مننا السنه دي وبرضه مفيش فايده

يعني تلاقي الشوارع اتملت شوادر بيع الفوانيس اشكال والوان

يعني تلاقي الشوارع مليانه زينه وفوانيس على حسب مستوى الحي الاجتماعي من اول الشراشيب المقطعه المعموله بالايد  لاغلى الالوان وافخم فروع النورالمستورده  !!!

يعني ننزل الفانوس الكبيييير بتاعنا ونلونه لو الوانه بهتت ونعلقه في البلكونه

يعني مامتي تنزل تجيب الديك الرومي اللي لازم يكون على سفره بيتنا اول يوم رمضان

يعني جدتي ترجع من المقر الصيفي للحكم (البلد) وترجع اخيرا بيتها في القاهره

يعني بابا يجيب اكبر علبه بودره سوبيا في الدنيا عشان كل يوم قبل الفطار بيبقى زهقان فيقوم يعمل احلى كوبايه سوبيا في الدنيا بس مش كل يوم يا حاج اصلي بزهق منها !!!

يعني نجهز ونعمل شنط رمضان ونفرح الناس اللي حوالينا بيها

يعني اطلع عبايات الصلاه واغسلها واجهزها للتراويح

يعني اطلع المسك واظبط موضع السجود في كل مصليات البيت لزوم الدعاء والتهجد واجهز شنطه الجامع وقزازه الميه بتاعه التراويح

يعني حد ناصح يهاديك بعلبه تمر قبل رمضان ياخد بيها ثواب افطار الصائم طول الشهر

يعني تخلي عندك ذوق وتتصل بالناس اللي بقالك ميت سنه ما كلمتهومش وكفايه  texting on watsap and facebook  كلموا بعض ربنا يخليكم

يعني تجهز لك كام دعوه تزن على ربنا بيهم لمده تلاتين يوم فرصه عمرك وجتلك ما تضيعهاش (بس ما تنسوش تدعوا لي معاكم !!)

يعني لو ربنا كاتبلك عمره وختمه في الحرم يبقى رمضان عمرك ما تنساه وتفضل تفتكره وتدمع زي حالاتي , وتفضل مستني يوم السفر على نار

يعني ضيف جميل ما تلحقش تقعد معاه وبرضه يزوغ منك وما تحسش بيه

يعني الحب والموده والتسامح وطلب الرحمه والمغفره والعتق من النار

كل سنه وانتم طيبين

نسيت اقولكم اني محضره شويه مواضيع عن رمضان ليها العجب حاسميها رمضانيات ما تنسوش تتابعوها وان شاء الله تعجبكم

كل سنه واحنا بخير ومصر احسن يا رب