حكمه الصغار

مقالي رقم ٢ في مجله نون

http://www.nooun.net/article/1960/

عيدنا احلى من عيدكم يا موكوسين !!!

ليله العيد الصغير اللي هيه اخر ليله في رمضان كنا عاده بنقضيها عند جدي لماما وعلى ما افتكر كنا بنبدا عمل الكحك من بعد الفطار لحد الفجر تاني يوم ك الاصناف ورا بعض  ورا بعض ورا بعض

وكانوا يضحكوا عليه بحته عجينه اقعد اشكل فيها والعب بيها طول النهار , المضحك اني كنت باشوفهم يحطوا دقيق فالعجينه تكبر ولما اطلب انا كمان اعمل كده يتقالي حرام اللعب بالاكل فتفتق ذهني لحاجه كده بيضا تيته بتحطها على الحوض (الفيم ) ولقيته بيكبر العجينه فبقيت العمل بيه , عملت زي لينا وخدت من اللي فوق الحوض!!! شويه ولما بدات اكبر بدوا يخلوني اعمل حته العجينه بتاعتي بشكل مميز عشان لما تتخبز انا بس اللي اكلها وقال ايه كانت احلى حته في الصينيه . بهجه العيد وريحه الخبز دي اتنقلت بيتنا شويه بشويه بس مامتي بتعملها من نص رمضان مش ليله العيد ويفضل البيت ريحته ريحه الخبيز وحواج الكحك والشمر والينسون بتاع القراقيش وحتى النشادر بتاع البسكوت اللي مش بحب ريحتها خااالص لانها بتفكرني بمعامل الكيمياء وبتدوخني فعاده مش بحب اليوم ده

تكبيرات العيد وصلاه العيد جزء مهم جدا من العيد وبهجته وفرحته ده انا حتى فاكره نقشه سجاد الجامع القديم اللي كان لونه روز عجيب بس بحبه وتفضل تفتكر توسعه الجامع حته حته لحد ما وصلنا ليه دلوقتي من اكبر جوامع المنطقه والحلول المؤقته اللي اتعملت بتاع سبع تمن سنين لحد ما بقى بوضعه دلوقتي وكل سنه كان بيكون شكل الجامع في العيد غير اللي قبله وغير اللي بعده

يوم العبد الصبح زمان كنا بنقضيه في بيت جدي لماما ولمه العيله والخاله بولادها والخيلان قبل وبعد جوازاتهم باولادهم واللعب والهزار منهم كلهم كان بيكون يوم ظريف جدا , اخر النهار نطلع على اهل بابا في بنها وكل اعمامي تتجمع هناك باولادهم ونعدي على خال بابا وبعدين جدي وبعدين عماتي وبعدين صاحب بابا وبعدين اخوات جوز عمتي في بيت عيلتهم وركوب الحنطور وفسحته الجميله وتكعيبه العنب على الروف عند جدي ومنظر النيل عند خال بابا وجنينه المحافظ من شباك بيت عمتي وسهرنا في البلكونه عندها والضحك والبهجه اللي ليس لها اخر , وكل بيت تروحه لازم يشربك السخن والساقع والحلو والحادق لدرجه انك على اخر اليوم ما تبقاش قادر تتنفس

العيديه ايامنا كانت لطيفه جدا عباره عن عشره جنيه فئه العشره صاغ فتكون 100 ورقه عشره صاغ حاجه كده باكو فخيمه تقعد تتمنظر بالبواكي على الناس !!! وفي اخر العيد ماما تلمهم كلهم وتحوشهم لينا لانها كانت بتبقى مبلغ معتبر

البمب وما ادراك ماالبمب كان قرطاس كده عظيم طول الدراع ومعمول من سلك وورق الجرايد وتقعد تنفخ فيه ميت سنه وفي الاخر ما يفرقعش (امان وسلامه برضو) ولما كنا نحب نتشاقى نرميه من البلكونه ونطلع نجري قال ايه بنعاكس الجيران وننزل اخر اليوم نلم اللي ما ضربش ونحاول فيه تاني

لبس العيد وشراب العيد الابيض الدانتيل ابو كوله شيك والجزمه البيضا اللميع والفستان القصير المنفوش كلها مظاهر اساسيه للعيد ونعمل شعرنا على جنب ولا بفيونكات وشرايط ولا ماري انطوانيط دي بقه ما اعرفش كان ايه مزاج امهاتنا فيها بس كانت لطيفه والله

عمتي رحمه الله عليها كانت مشهوره بالترمس والحمص والبلح عشان ما نكترش من الكحك ونظبط الهضم

لما الواحد يفتكر المظاهر دي للعيد ويقارنها بشماريخ دلوقتي اللي تصحيك مفزوع في نص الليل ولا الصواريخ اللي ممكن تطير ايد ولا عين اللي بعملها ولا حتى الموتسيكلات الهارلي اللي فزعت الواحد انبارح من احلى نومه تحس ان العيد ايامنا كان مبهج وبسيط وصوته واطي ويتسرسب لروحك وماتنسهوش لحد دلوقتي مش التحرش والدوشه والزحمه اللي في شوارعنا دلوقتي

وتقولها بمنتهى الحزن الى جيل الافينات وطالع عيدنا احلى من عيدكم يا موكوسين !!!

 

انت اي مشروب رمضاني؟

المصريين شعب مبدع في تفانين الصيام والافطار

يعني كان موائد فطارنا ناقصه من المحمر والمشمر لا كمان المشروبات اشكال والوان , باحس ان كل مشروب من دوول له شخصيه مميزه له هو وبس

الخشاف: مين الرايق الفايق اللي مزج كل اشكال والالوان الفاكهة المجففة دي مع بعض , مش بس كده الرايقين اللي زي مامتي تعمل بعدد الافراد من كل صنف ووقت توزيعهم في الكوبيات توزعهم صنف صنف عشان كل كوبايه يبقى فيها كل الاصناف, انا شخصيا باحس انه مشروب ابن ناس جدا بس برضو متكلف جدا ويخلو من البساطه حاجه كده ذواتي ومتكلفه بمزاج بس مش من طبيعتي خاااالص , اصلا على بال ما تخلص كوبايه الخشاف بتكون شبعت !!!

 العرق سوس : وده الناس عاده بتستسهل شراه بالرغم من عمايله في البيت ممتعه جدا بدا من تخميره ولحد كيس العرقسوس المخصوص اللي بيتربط في الحنفيه وتنزل عليه الميه نقطه نقطه عشان تستخلصه بروقان وفوقان كده ملهمش زي , مش كل الناس بتحبه بس انا باشوفه عامل زي الدنيا اول شفطه ممكن تكون مره بس تشوف كل الحلاوه بعد ما تشربه , ملحوظه ممنوع لمرضى الضغط والسكر وممتاز لمرضى القرحه

 السوبيا : ميكس لبن على سكر على جوز هند , المقرر في بيتنا كل يوم عشان بابا بيموت فيها وبيحط فيها خلاصه زهقه وعطشه وجوعه قبل الفطار , من كتر ما بيعملها بنزهق منها ومحدش بيشربها بس بجد احلى كوبايه سوبيا تشربها من ايد الحاج

 القمر الدين: المفضل عندي, حاجه كده رايقه وفايقه وبنت ناس وفي نفس الوقت بسيطه , فكره المشمش مع السكر والتلج المجروش بتجنني وبحس انه لخص اليوم في بله ريق شيك وبسيطه جدا . ويا سلام بقه لما رمضان يجي في موسم المشمش والحاجه تعمله اصلا من المشمش مش من مركزات فيتراك ولا قها

 

الكركديه : البهججه على راي محمود عبد العزيز حاجه كده فرفوشه ونعنوشه من اول لونه لحد طعمه وجماله

التمر الهندي: بصراحه ما بفهموش بس هو حلو

العناب: كركديه على تمر هندي وهو قمه في الجمال والروقان واللطافه

البلح باللبن : البلح الناشف مع اللبن الحليب ده اخترااااع بصراحه اظبط حاجه للهضم والامساك وكله فوايد غذائيه

البلح الرطب: السننننه واللي هو ابسط واحلى حاجه في الدنيا وهادي وبسيط كده وابن ناس لا يلكمك ويقفل معدتك ولا يزهقك من كتر السكر اللي فيه البساطه كما يجب ان تكون

 المايه الساقعه : احلى واهم حاجه تتسرب لكل خلاياك وتروي عطشك وتفرحك مع انها لا طعم ولا لون بس هيه كده وجعلنا من الماء كل شيء حيا

 على غرار العاب الفيس بوك لو انت مشروب رمضاني انت مين؟

طعم البيوت

حضرت talk  عن تدوين التراث الشعبي لاكلات المصريين حول الجمهوريه

وانواع وتقاليد الاكل عند القبائل والبلاد المختلفه عند المصريين , واننا كشعب عندنا انواع عيش بس قد انواع الجبنه الفرنساوي !!! وان ازاي ستات البيوت في ارجاء المحروسه ليهم طقوس وطرق مختلفه للاكلات دي من سيناء, لبحري, لقبلي, لحلايب وشلاتين وان حاجه زي الكشك الصعيدي طعمه بيتغير من قريه لقريه عشان انواع البكتريا اللي بتدخل في تصنيعه بتتغير على حسب المكان وبالتالي بتغير طعمه من حته لحته وانه لازم يجي من لبن جاموسي والجاموسه ليها مواصفات مخصوصه وبتاكل اكل مخصوص عشان تدي اللبن المتميز اللي بيعمل طعمه المميز!!!  

ازاي الفريق ده اخد على عاتقه توثيق الكلام ده ما تضيعش الحاجات دي زي حاجات كتير في حياتنا

سرحت كده واكتشفت ان مش بس البلاد ليها طعم متميز ده البيوت كمان ليها طعم متميز , كل بيت بيورث اكلاته وتاتشاته من جيل لجيل واللي بتختلف من عيله لعيله ومن بيت لبيت جوه نفس العيله وانها بالظبط زي الجينات بتتغير مع الزمن لما العيله بتتجوز عيله تانيه فيبداوا يغيروا في اكلات بعض وتاتشات بعض

في عائلات بتحب التوابل وعائلات بتحب الثوم وناس تانيه ليها اكلات محدش بيعملها زيهم وبتتنقل من الجده للام للبنت للحفيده , والطعم المميز للبيت اللي بيجي من تفاصيل العمل الصغيره اللي بتفرق من بيت لبيت

زي مثلا تسييح السمنه وتبخير البرطمانات القزاز بحرق قشر البصل والمورته واللبن الابيض اللي طالع في اول تسييح السمنه اعتقد ما بقاش حد يعمل ده

ولا ريحه الشبت والبقدونس وخلطه المحشي المميزه لمامتي وزيت الزيتون وعصير الليمون في محشي ورق العنب بتاعها , هو اصلا في حد فاضي يعمل محشي دلوقتي ولا حتى يسويه لو جاله جاهز, اهو انا واختي اول من حيضيع التراث العظيم ده !!!

ولا اكلمكم عن خبيز العيد الصغير و حواج القراقيش بالشمر والينسون , او ريحه الكحك ذات الخلطه السريه لبعض البيوت ومنهم بيتنا اللي ماما بتحوجها على ايدها وعمرها ما تشتريها جاهزه واللي انا واختي حتى ما نعرفش بتعملها ازاي !!! وكانه know how  سري ممنوع من النشر !!

ولا جدتي لما كانت لسه بصحتها وتعمل الفطير المشلتت بنفسها والمش والعسل وتلمنا كلنا في يوم عظيم من الفطير المشلتت , ماما مثلا تعرف تعمل الفطير بس كل فين وفين لما تاخدها الجلاله وتعمله , انا واختي مثلا عمرنا ما اهتمينا نشوف الحكايه دي بلا وجع راس , ونؤمن بشده ان شرا العبد ولا تربيته

عندكم كمان مسقعه البدنجان الابيض اللي ناس كتير اصلا ما تعرفهاش ازاي ما اعرفش

ولا الكسكسي ويوم عمايله ده مثلا ماما تحكيلي انهم عند جدتي كانوا بيعملوه بالمنخل , ماما دلوقتي بتعمله بالكبه ولما في مره باحكي لصاحباتي عليه ما استوعبوش انه ينفع يتعمل في البيت !!! ده المنخل بتاعه لسه عند تيته لدلوقتي مش تقولولي الكسكسي عايز مصنع !!!

ولا مثلا جدتي لما راحت لجارتها الجريجيه ولقتها بتسلق الكرنب سليم وقعدت لما اتفرجت عليها عملتها ازاي ورجعت جري سلقت كرنبه عشان ما تنساش اتعملت ازاي وعلمت ده لمامتي وخالتي وهمه علمونا الموضوع ده , انا لما مره حكيت عن الكرنبه اللي بتتسلق سليمه على اعتبار انه شيء عادي ومسلم بيه لقيت الناس فتحت بقها !! واكتشفت ان ده سر لتيته وماما وخالتي واحنا وراهم !!!

مش عايزه احكيلكم عن مش ماما اللي زمان عملته واحنا في السعوديه من كل انواع الجبن اللي في الدنيا واللي لما تزهق منها ترميها في برطمان المش اللي بدا بصفيحه جبنه بيضا طعمها كان حادق شويه فقلبتها مش ودخلت فيه جبنه نستو ورومي وفلمنك واللي ماما شخصيا دلوقتي ما تعرفش تعمله تاني !!! مش حد من جيلنا !!! دي هيه بتحكيلي ان اول ما سافروا ما كانوش في السعوديه يسمعوا عن الجبنه البيضاء وانها كانت بتعمل الجبنه البيضا في البيت وتاخد المنفحه معاها من مصر !!! دلوقتي اصلا بتكسل تاكلها مش تعملها من اللبن !!!

المشكله بقه في ان جيل زي جيلنا مشغولون اليومين دولون جدا في الحياه السريعه بتاعتنا والدليفري والاكلات الجاهزه والنص جاهزه ده حيكون سبب رئيسي في اندثار كل الحاجات دي واللي اي سايح او خواجه لما يجي بيوتنا يحس بدفا وطعامه للاكل ما يشوفهاش في اي حته تانيه غير في بيوتنا  

بس المهم اننا من وقت للتاني نرجع طعم البيوت وما نفرطش فيه لان لو طعم البيوت راح الحياه كلها طعمها راح وبلاش الميكرويف والاكلات النص جاهزه تنسينا اكلاتنا الجميله وتضيع زي حاجات كتير ما ضاعت وضيعت طعم الحياه معاها 

ام شارلوت وام شربات من لوندره للقاهره :

الاختين الحلوين اتولدوا توام بس يا عيني اتخطفوا من مامتهم واتباعوا عن طريق الغوله اللي بتتاجر في العيال  واحده اتربت في القاهره والتانيه عيلتها الجديده عاشين في بلاد الفرنجه في لوندره

وكبرت البنات واتجوزوا في نفس ذات الوقت مش بس كده بنت المحظوظه اتجوزت اميرابن امراء  وبالصدفه ولانهم توام في كل حاجه بقوا حوامل في نفس ذات الوقت

رجعت المصريه لجوزها بفرحه انها حامل فاول ما عرفوا قرروا ما يتكلموش عشان الحسد , اما الاميره عرفت الدنيا كلها مش بس كده عملت life event  على فيسبوك انها حامل وبدات الجرايد تاخد لها صور من هنا وهناك

المصريه فضلت تلبس هدومها هيه هيه عشان الحسد برضه  ولما اتزنقت خلاص لازم تلبس هدوم حمل راحت جابت الدريل الجنز المتين لبسته تسع شهور كل ساعه وكل يوم على راي الست , اما الاميره  بدعت في سلبوتات الحمل وفساتين اخر دلع وشياكه

المصريه عماله تاكل هنا وهناك , اومال ايه مش بتاكل لاتنين , اما الاميره  متابعه حمل ومسانده نفسيه ودورات تربيه اطفال وقرايه  واستعدادات ملهاش اخر ومساعدين ومساعدات يعملوا لها كل حاجه

المصريه بتصلي عالكرسي من اول شهر اما الاميره بتروح وتيجي وتلعب رياضه واخر حيويه ونشاط ويوجا وهولا هوب واخر انسجام

المصريه قبل الولاده غسيل ومكوه وترتيب وملت التلاجه اكل وخزين ومغات  وظبطت البيت عشان الباشا ما يحتسش وهيه عند مامتها الكام اسبوع بعد الولاده, اما الاميره هانم معززه مكرمه ولا في دماغها اصلا

المصريه ولدت شربات  زغاريد هنا وهناك وممرضات بتاخد الحلاوه والعيله وعيله العيله على دماغ اللي خلفوها في المستشفى لحد ما الاوضه تتطرشق من الزحمه والعيال اللي عايز بيبي واللي عايز ياكل واللي نام جنب الحيطه

اما الاميره سمت المولوده شارلوت  هيه وجوزها وبس بلاش زفه كدابه

أم شربات  قاطعه النفس من الانيميا ووشها اصفر ومحتاسه  واول ما تفوق لازم وحتما ولا بد مكان العيل ينزل جوز فراخ بلدي وحله مغات امال ايه مش بترضع ونفسه  , اما أم شارلوت  اخر شياكه وحيويه وطقم الشعر والمكياج جاهز لتجهيز جنابها للتصوير لحظه خروجها من المستشفى  ونظام تغديه على اعلى مستوى 

أم شربات  عمالين يزنوا عليها : رضعي السرسوب , وطوطي البنت !!! والخرزه الزرقاء والبخور , والواد او البت متكلفتين ومش باينين لا يتحسدوا

أم شارلوت بقه خرجت للعالم كله يصورها هيه والمولود

أم شربات  عملت سبوع والمغات وبدره الملح والسبع حبات ويلموا الدهب ويحطوه في صنيه ويجيبوا الابريق ويولعوا الشمع طول الليل مش مهم بقه يقوم حريقه ولا لاه وتنزل السلم وتلف العماره ويحطوا المولود في الغربال ويدقوا له الهون لما يجيله صرع بيتهيالي شربات دلوقتي عماله تشتمهم وتقول حلوا عني يا غجر !!!

أم شارلوت   بقه عملت حاجه ذواتي بيسموها baby shower  يجيبوا له party planner  ويطبعوا له دعاوي ويتعمل بره ويتجابله تورت ويتعمل فيه مسابقات ويوزعوا عالمعازيم هدايا وياخدوا الهدايا اللي الام كتبتها في baby list  من قبل ما الناس تيجي عشان يجيلها اللي هيه عايزاه

الغوله وهيه بتموت ضميرها صحي وقررت تبعت لام العيال عناوين بناتها ام شارلوت وام شربات , والجده جمعتهم ويوم ما شافوا بعض همه توام وزي بعض بس جالهم ذهول من الextreme  اللي لقيوا بعض فيه فقرروا يعملوا نفسهم مش واخدين بالهم وام شارلوت رجعت لوندره اما ام شربات فضلت في ام القاهره

ملحوظه : هذا البوست هزلي خاااالص ولا يمت للواقع بصله !!! ما تودوناش في داهيه 

شارلوت اليزابيث ديانا

كيت ميدلتون ربنا نتعها بالسلامه وخلفت الوريثه الرابعه للعرش 

وكم الصور ليها قبل وبعد الولاده وكم القر والالش والنفسنه من المصريين قبل الولاده " بقه دي في التاسع " بعد الولاده" قامت امتى ولبست وعملت شعرها ومكياجها
وايه الحيويه والجمال والنشاط ده"

ولا ليه اتسمت تلات اسامي ولا مين شارلوت ومين اليزابيث ومين  ديانا وقلش المصريين عن كيت اللي عايزه تسميها شارلوت علي اسم بنت خالتشي وويليام اللي عايز يسميها ديانا علي اسم المرحومه والجده الحيزبونه اللي طلعتلهم في البخت فسموها الاسم العجيب ده !!! نفسنه شعب عادي جدا 

كل ده مش مهم خااالص , ولا الاضاءه والاحتفالات البينك
 اللي ملت ارجاء العاصمه لوندره بقدوم الاميره السعيده 

دي جدا مش ملوك وبيحتفلوا؟ حقهم وزياده 

الملفت للنظر فعلا تلك البنوته بنت المحظوظه اللي فعلا من يوم ما اتولدت فعلا في بقها معلقه دهب حرفففييياااا وانها خدت لقب اميره من قبل حتى ما تتولد ومش بس كده ده ليها ترتيب و succession plan  في وراثه العرش وحتى سبقت عمها اللي هو اقرب للملكه في وراثه العرش!!! ارزاق والله !!!

تفرق ايه عن طفل اتولد في مخيمات لاجئين حتى نار للدفا مش لاقيين ولا اي حاجه همه الاتنين صرخوا ساعه الولاده وضربوهم على ضهرهم وغسلوهم ولفوهم في فوطه وادوهم للام !!! وهمه الاتنين حيعملوا بيبي على نفسهم على الاقل سنتين , برضه عادي جدا 

بس  الفكره انها يا والداه ابوها امير  وامها ,لا حتى امها مش من عيله ملكيه ولا حاجه  بس هيه فعلا حظوظ وارزاق لما البت كيت اعجب بيها الامير واتجوزها وهيه عادي من عامه الشعب عشان تولد الاميره شارلوت اليزابث ديانا ده حتى الاسم ملكي كده وابن ناس ويمكن كمان يطلع موضه اه والله ممكن يطلع موضه وبواب عمارتنا يسمي بنته بيه اه ماهي الاسامي ببلاش ولا همه ملهمش نفس يعني ؟!

يمكن تلاقي احسن رعايه واحسن صحه واحسن تعليم , وحتلاقي قصور وجناين تجري فيها وحتلف الدنيا يمين وشمال وتلاقي خدم وحشم في اي وكل وقت بس ولا حاجه من دول تضمن انها حتكون سعيده ولا سويه ولا لاه مين يعرف مين نصيبه ايه ؟! ويمكن طفله عاديه اتولدت في نفس اليوم والساعه يكون حظها من السعاده اكبر بكتييير من الاميره الصغيره ولا ده كلام عامه الشعب اللي زي حالاتي في الظروف اللي زي دي؟ يمكن !!! بس اللي فعلا لا ينسى عمنا جاهين في رباعيته اللطيفه دي:

يا طير يا عالي في الســــــما طظ فيك 

ما تفتكرشي ربنا مصطــــــــــــــــفيك

برضـــــــــــك بتاكل دود و للطين تعًودً

تمـــــــــص فيه يا حلو .. و يمص فيك

نادي الفيديو

نادي الفيديو

بنهرج مع بعض فقال ايه حد بيوصف لحد وصفه فبيقوله حتلاقي سكتين يمين وشمال بعد ما تاخد اليمين حتلاقي عمارتين فوت الاولانيه وخش من عند التانيه المهم حاجه كده شبه العمده في الليله الكبيره " الوصفه سهله الوصفه هايله "

قعدت اضحك قوي وبقولهم انتوا عملتوا زي فؤاد المهندس في عشان خاظر عيونك افتح الباب حتلاقي دهليز انزل ما الدهليز حتلاقي باب افتحه حتلاقي دهليز انزل مالدهليز .....

لقيت معظم الموجودين مش عارفين الافيه بتاع المسرحيه , قولت في عقل باني ياااااه ده المسرحيه دي تقريبا انا حافظاها عن ظهر قلب ايام ما كانت التسليه الوحيده فيلم ولا مسرحيه من نادي الفيديو قبل الدش والقنوات الكتير لان التلفزيون في السعوديه كان اكتر من ممل

كنت كل يوم العصر اشغلها واقعد اشوفها واقلد رقصاتها واغانيها لحد ما حفظتها , بعدها بكام يوم بالصدفه اتعرضت في التلفزيون ولقيتني فعلا بقول الحوار معاهم !!!

وازاي نادي الفيديو كان بيجيب حلقات ليالي الحلميه ورافت الهجان في رمضان يوم بيوم بعد عرضها في مصر لانه بيسجلها من جده اللي كانوا بيلقطوا التلفزيون المصري كويس جدا

ونادي الفيديو اللي بيجيب الافلام والمسرحيات قبل حتى من تنزل في مصر وان كان له اشتراك شهري والفيلم يقعد عندك 3 ايام قبل ما ترجعه

وازاي ايام ريا وسكينه ما نزلت الرياض كلها جابت فيديوهاتها لبابا عشان ياخدوا نسخه منها فكانت النتيجه اكتر من 10 فيديوهات متوصله بالفيديو بتاعنا لنسخ المسرحيه , بابا لسه عند الصوره دي لحد النهارده لانه كان عندو وصله واحد لعشره فيعرف ينسخ عشر نسخ مره واحده !!!

ولا لم حد جاب فيلم سمك لبن تمر هندي ما ارتحش غير لما قال انه حلو جدا عشان كل الناس ما تفهموش زيه ولما سالناه ليه عملت كده قال اومال انا بس يتحرق دمي !!!

ايام بسيطه وجميله يا ريت ترجع تاني , انتم ايه ذكرياتكم مع نادي الفيديو ؟