برونتس يجلس تحت الشجره ويلاعب الاطفال !!!

في حديث لطيف عن الثانويه العامه ولجان التصحيح وان المصحح اصلا ممكن ما يكونش مدرس للمنهج فينزل له نموذج اجابه لقيت امي بتضحك ضحك هيستيري وتحكي لي قصه تصحيح دبلوم معلمين في احدى الدول العربيه من اكتر من تلاتين سنه وان جمله الترجمه كانت

Parents should do their best to educate their children

وتحكي والدتي عن ان جهابذه الترجمه قرروا الاتي كلمه Parents  تبدا بحرف capital  يبقى معناها انها اسم فتترجم الى برونتس

كلمه their  شافوها tree  وترجموها شجره

كلمه children  معناها اطفال مفهومه يعني

فالترجمه الاجماليه تبقى مع وضع التاتش بتاعهم : برونتس يجلس تحت الشجره ويلاعب الاطفال !!! واللجنه كلها تغشها وتكتبها كده !!!

الكلام ده من اكتر من تلاتين سنه وامي تقرر ان العيال دي مش نافعه وغشاشه كمان وتديهم كلهم الصفر المتين فتقرر رئيسه اللجنه ان البنات دي اصلا قرار تعينهم صادر من قبل ما يمتحنوا وانهم لازم ينجحوا عشان في قرار بتمكين اولاد البلد من التعيين والتخلص من المتعاقدين اللي بعضهن اصلا شتمتهم في ورق الاجابه تخيلوا !!!

على النقيض بتحكي ان مثلا في تصحيح الثانويه العامه في نفس البلد كان معظم البنات من ابناء المتعاقدين وعشان كده كانوا خطوطهم واجاباتهم عظيمه جدا بس هيه السياسه التعليميه حكمت بما سبق ومع الوقت يمشي فعلا المتعاقدين الا من تخصصات زي الرياضيات والانجليزي عشان صعوبتهم ويتم تعيين الجهابذه اللي فوق ودول همه همه اللي يعلموا الاجيال اللي بعدهم

في رأيي المتواضع مشاكل التعليم في بلادنا مصدرها الاصلي تاهيل المعلم اللي اصلا لا متعلم ولا مؤهل وبالتالي المنظومه كلها فاسده ومفسده الا من رحم ربي ونفضل نلف في دواير مفرغه من الجهل والتخلف الى ان يقضي الله امرا كان مفعولا او القيامه تقوم ونخلص بقه

 واتاري كان معاه حق لما قال في مسرحيه المشاغبين انجليزي ده يا مرسي !!!

الى غلابه الثانويه العامه

والله ما هيه اخر الدنيا ولا يوم القيامه , انا عارفه التعب والسهر والفلوس بس في النهايه كل ميسر لما خلق له وكلها في النهايه اسباب انا شخصيا الثانويه العامه دي كانت اغرب شهر عشته في حياتي وحسيت فيها بقدريات ما حصلتش ليه في اي وقت تاني من حياتي

خد عندك مثلا يوم العربي وكعادتي باني بابدا بسؤال النحو واللي كان في اخر ورقه قال ايه عشان احله بتركيز وانساه , واحله فعلا وكله تمام بس ما ارجعش للورقه بتاعته واتاريني ناسيه سؤال كامل في الادب !!! , القصه ايامنا كانت عن احمد شوقي وكانت اكتر من ممله وكانت كلها بيوت شعر وكده ولاني اصلا كنت انا وخالي طول النهار نقرا شعر ونحلله اتفقت معاه اني مواهبي الشعريه حتخليني الوش في الاسئله واجاوب واوفر الوقت اللي حيضيع في مذاكره القصه للفيزياء , وقد كان جاوبت كل اسئله القصه صح من غير ما اقراها!!! وبسبب سؤال الادب (طبعا مع التعبير ) جبت 44 من 60 !!!

الفيزياء اللي كنت هاريه نفسي فيها وكتبتلكم عنها انبارح اهه عدت وخلاص بس اتقص مني فيها 8 نمر ازاااي ما اعرفش

الكيمياء والاحياء والرياضيات  كنت شاطره اه بس ما اعرفش جبت النمره النهائيه ازاي الصراحه !!

الجبر مثلا مدرسي يكلمني الساعه اربعه الصبح بعد صلاه الفجر ويقولي على فكره مساله عمري ما حلتها ولما ادخل الامتحان الاقيها !! ولما اساله يقولي جيتي لي في الحلم بتعيطي وتسالني عنها وعمر ده ما حصلي فكلمتك !!!  والجبر اللي الجمهوريه اندبحت فيه قفلته , ملحوظه بنته كانت زميلتي وما قلهاش عالمساله دي !!!

المستوى الرفيع بقه كان انجليزي ولان ماما مدرسه انجليزي هيه ذاكرته قال ايه عشان تديني الزيتونه ليله الامتحان قوم ايه بقه ليله الامتحان النور يتقطع وما نذاكرش!!!  ويكون الحل ان عمي يسجل البرامج التعليميه في الدقي ويجيبهالي اشوفها الصبح قبل الامتحان وخلاص واخش واجيب ست نمر من غير مذاكره !!!

الرياضه مستوى رفيع دي بقه كانت اغرب حاجه في الدنيا المدرس اعتذر في اخر لحظه وكلمت صاحبتي قالتلي عمها حيقعد معاها بعد الامتحان ساعتين واروح واحضر الحصه ويقولنا روحوا نامو نتقابل بالليل وامشي على انها حتتصل بيه فالتلفون يبوظ فما تتصلش فاكتفي بالبرامج التعليميه وادخل وبرضوا اجيب 6 نمر من الهوا

حتى امتحان القدرات اقعد شهور اخد دروس مع زميله ماما وجوزها ويجي ليله الامتحان يقرر يديني حاجه مختلفه عشان انا موهوبه تقوم هيه اللي تيجي في الامتحان بالرغم من ان المنظور الداخلي ده كان نادر انه يجي اصلا واخد لائق ازاي ما اعرفش في حاجه اول مره اعملها انبارح

واجيب 12 نمره مستوى رفيع يعوضوا الفيزيا والعربي برضو ازاي ما اعرفش

وافتكر كلمه مدرس الرياضه بتاعي ليكي كليه مكتوبالك في السما من قبل ما تتولدي بس انت ذاكري واعملي اللي عليكي عشان ربنا يديهالك تنقص في حاجه حتجيلك من حته تانيه بس هو ربنا بيختبر صبرك وايمانك

والله ما هيه نهايه الدنيا ولا بالكليه ولا بالمجموع قولوا يا شغل ويا مكان كويس وفي النهايه كل ميسر لما خلق له ياااه رجعنوني سنيييين كتير يا ولاد الذين

فيزياء 95

بعد هوجه الثانويه العامه ما خلصت وبعد التسريبات والغش والالغاءات والتسريبات والغش وهلم جرجر 

الثاويه العامه لحد قريب كانت الشيء الوحيد ذو المصداقيه في مجتمعنا التعيس

الحاجه الوحيده اللي فعلا وبجد كانت بتيجي بمجهود الغلبان واهله وبس وطول عمرها فعلا عنق الزجاجه

مش بناقش ده صح ولا لاه بس مثلا في جيلي وبالمناسبه كنا اخر دفعه من النظام القديم وكان دايما مدرس الفيزياء يقول اللي مش حيشوف فيكم ثانويه السنه دي مش حيشوفها عمره وكم الحصص والملازم والمراجعات الغير نهائيه في كل المواد

بالمناسبه كانت اول واخر مره في حياتي اخد دروس خصوصيه مش لاني محتاجاها ولكن اهلي كانوا بيخلصوا ضميرهم تخيلوا مامتي مدرسه انجليزي كانت عايزه تديني درس فيه !!!

ايامها خدت كيمياء وفيزيءا واحياء ورياضه وخالي اداني العربي وماما الانجليزي

بس كله كوم والفيزياء كانت كوم تاني كنت باذاكرها تلات ساعات كل يوم وكنت تعمقت فيها وبشده ودايما كان المدرس بتاعي يتنبا ليه بالدرجه النهائيه وكان شخص سليط اللسان وبيشتم فكنت باتقي لسانه واذاكر عشان ما احرجش نفسي

يوم الامتحان كويت الفستان الفوشيا اللي كنت باتفائل بيه (واللي كانت اخر مره البسه بالمناسبه !!! ) وفطرت فطار ملوكي ونزلت الامتحان واللي بالمناسبه كان سهل لحد مذاكر كويس زي حالاتي بس فجاه اللجنه باظت وقال ايه المراقب كان بيخدم البنات فسابهم يغشوا !!! وكحد ما بيعرفش يركز في الدوشه وملهوش في الغش فقدت التركيز وما عرفتش اجاوب خاااالص

ودي كانت صدمتي بعد تلات ساعات وبعد مجهود سنه مش حاجيب الفول مارك وخرجت من اللجنه زي المجنونه وباعلى صوتي من الدور التالت خبطت عالسور وزعقت وقلت اللجنه كان فيها غش وانا حابلغ الوزاره

جريت روحت وكان تاني يوم عدنا رياضه واتاري رئيسه اللجنه تعرف المدرس بتاعي فبعتت لي معاه انها عايزاني قبل الامتحان بكره وطيبت خاطري عشان ما ابلغش عنهم وانها حتحوله للتحقيق وبالفعل اتمنع من المراقبه (عالاقل من لجنتي تجنبا للمشاكل)

اللطيف بقه اني بقه متوصي عليه من كل المراقبين واللي اعوزه يحصل والهدوء والراحه كلهم في الفصل اللي بامتحن فيه

انا فاكره في امتحان الانجليزي صدعت فطلبت اغسل وشي واخد اسبرين المدرس بعت جاب طشت فيه ميه عشان اغسل وشي وانا قاعده عشان ما اتعبش وجابلي شاي واسبرين لحد الديسك اللي قاعده فيه !!!! خافوا كلهم مني وعالنقيض اهلوا كانوا بيخافوا جدا عليه لاحسن حد ياذيني بسبب الشوشره اللي عملتها !!  

وعدت الامتحانات وجبت فيها 42 من 50 ودي كارثه بكل المقاييس ولما مدرسي كلمني قلتله 47 شتمني !! اه والله !!!

اللي يقارن ده باليومين دول يحس ان كل حاجه في البلد قياسا بلجنه الثانويه العامه انحدرت واتدهورت ما اعرفش ليه وللاسف بلدنا سبب بهدلتها نظام التعليم الفاشل اللي ما بياهلش اي طالب ولا خريج لاي حاجه بس حتى الحاجه الوحيده اللي كان ليها مصداقيه لحد وقت قريب هيه كمان فقدتها وللابد بوزير تعليم ما بيعرفش يكتب كلام مرتب وباخطاء املائيه في كل تويتاته !!! لك الله يا مصر 

ليله القدر

كل سنه وبعد ما العشر الاواخر يخلصوا ويجي العيد تنتشر بوستات من نوعيه متى كانت ليله القدر هذا العام , او تلاقي ناس مصوره الشمس العشر ايام ويبداوا يقارنوا بينها ويقررورا

او يطلعلك حد عامل دراسه ان ليه دوره ثابته وانها اخر ليله اربع في رمضان او انه درس لمده عشر سنين الظواهر وقرر انها 

ثابته وانها ليله 29 او انها في الاوتار او انها ممكن تيجي 24 او انها بتتحرك من سنه لسنه

اجتهادات وسفسطات وحواديت كعاده العرب في الغوص في الغيبيات ويطلع لك كل واحد يقولك انا حسيتها 21 التاني يقوله لاااا ما كنش زي 25 وواحد يقولك اصل سوره القدر كلمه هي جت الكلمه رقم 27 تبقى ليله 27

كم من المناقشه والاجتهاد اللي قد يصل للسفسطه احيانا

في رايي المتواضع ربنا لما خباها كان عايزنا نجتهد وبس والجايزه والثواب من عنده هو وبس مش بوقفت كام ساعه ولا كريت كام جزء لا بامتى كنت مركز وحاضر بكل جوارحك واللي في رايي حاجه مش سهله خاالص

في ناس رزقها في ليله دعوه ودمعه وفي ناس في ليله رزقها في ايه تلمس معاهم وبس وفي ناس في ليله من تعبهم يروحوا في سابع نومه لان ربنا حس بيهم وكتبهالهم وهمه مرتاحين وفي اللي ربنا يرزقه بمريض يزوره او حد يقضي له حاجته وفي اللي ربنا يرزقه بصدقه او ركعتين خفاف بس فيهم البركه

كل واحد في رايي المتواضع له ليله القدر بتاعته , العتق في التلاتين ليله واستجابه الدعاء في التلاتين ليله والجنه في التلاتين ليله

عمري ما نسيت كلمه اتقالتلي ليله القدر ما بتجيش بقيام ليله بتيجي في اجتهاد سنه كامله فتتوفقي في ليله وفي اللي ربنا بيكرمه لو حتى نشن وجت معاه بالصدفه

ربنا ما بيحاسبش بالورقه والقلم ربنا بيحاسب بالتقوى والقلب ربنا رب قلوب  

انا وجنه وسندريلا

في يوم من ذات الايام واثناء استعدادي للنزول للاوبرا لحفله باليه , الاخت جنه هانم وقفت وحطت ايدها في وسطها وقالتلي رايحه فين فقلتلها , الظاهر حست ان القوه مش حتجيب معايا قوم ايه بقه اتشحتفت كده وطلعت الدراما كوين وقالتلي وهيه بتعصر عينها هو انت ليه مش حتخديني معاكي؟ قوم انا اتضحك عليه وقوام وعدتها اني حاخدها معايا المره الجايه !!! ملكه الاونطه البنت دي

فات كام شهر وكل الباليهات المعروضه غير مناسبه لطفله في الثامنه من العمر وفجاه ينزل باليه سندريلا , ما كدبتش خبر وجري حجزت ليه وليها

لا اخفيكم سرا انوا كان بيبهرني الاهالي اللي بتاخد ولادها الاوبرا وجمالهم بالفساتين والبدل واني انا شخصيا كان نفسي اخد الست زقرده معايا, من قبل الحفله باسبوع نبهت على اختي ما تقولهاش عشان عنصر المفاجاه

يوم ما سحر قالتلها لولو عملالك مفاجاه السوسه قالت لها اكيد حتاخدني الاوبرا !!!

جت الست الهانم من يومها الصبح وكلت دماغي بقصه سندريلا بس الصراحه الروايه بلسان طفولي زي السكر ومن الساعه 2 هو احنا حنروح امتى كل ربع ساعه !!!

من خمسه قررت ادلعها ولاني كنت مرهقه جدا ما قدرتش انزل بيها للكوافير فقررت اعملها شعرها في البيت ودي تقمصت دور الليدي جنه وفطستني من الضحك وهيه بتسبسب شعرها وترميه يمين وشمال وهيه بتتكلم

وقت اللبس قامت واتانتكت واكتشفت ان الشنطه السحراويه بتاعتها منفده عالدولاب : برفان وحلقان واساور وخواتم وزبده كاكاو قال يعني روج !!!

وبدات تصربعني من قبل العرض بساعتين لدرجه اني نسيت الموبيل , ولما قلتلها مش حنعرف نتصور راحت قايلالي حته ننننننننعم واصرت ارجع اجيب الموبيل عشان تتصور

الصراحه انا اتثبت وللحظه كنت حارجع بس اكتشفت ان الوقت مش حيسعفنا لان الدنيا زحمه جدا , فقررت اتصور مع اي حد واتفق معاهم يبعتولنا الصور

المهم وصلنا والاقي ابن خالتي يا عيني واقف مستنينا بالموبيل !!! والله حركه جدعنه مش حانساها

ويبدا العرض ويبدا التتنيح والتبريق وكم الانبهار على وشها عمري ما حانساه , تبع ده كم من الاسئله الغير نهائي خصوصا انهم لاعبين في الحدوته لدرجه ان جدو اللي جنبها زغدها من زهقه وانا مت من الضحك , شويه وقمت جبت القصه ولقيتها اخدت مكاني فقعدت بينهم فصل قوات اصل هو كمان احفاده من الناحيه التانيه هاتك يا اسئله برضو

ويخلص العرض وننزل جري نتصور في الكواليس بس ما لحقناش البريمادونا المهم اتصورنا كام صوره وركبنا العربيه ودي رااااااحت في النوم في لحظه

لا اخفيكمم سرا اني لم استمتع بالعرض لانه كان مش مخدوم قوي بس البهجه في عينيها والفرحه في وشها كانت اكبر مصدر للسعاده في اليوم ده  

مسيحي ؟ وده من ايه؟

في زياره زقرده الاسبوعيه لبيتنا باقول لاختي عندي فرح النهارده , تقوم اللمضه تقولي " كبت كبات ولا ايه" قلت لها لاه فرح في الكنيسه, كشرت كدهون اللي هو مش فاهمه  قلت لها العروسه صاحبتي مسيحيه وفرحها في الكنيسه عادي يعني

سكتت كده وقالت مسيحيه زي عمو رافت جارنا

قلتلها انت فاهمه يعني ايه مسيحيه , كنيسه , ممممم راحت سكتت فقلتلها حنروح الفرح سوا وحافهمك

قبل الفرح بيجي ساعتين الاسئله بدات هيه العروسه عايشه في الكنيسه ؟ هيه حتلبس فستان فرح ولا لاه ومن ده ده بقه صداع من الاسئله

قلتلها المسيحين ناس زينا عادي خالص بيعبدوا نفس ربنا بتاعنا بس بطريقه تانيه , عندهم كتاب زي القران اسمه الانجيل وبدل الجامع بتاعنا عندهم كنيسه , سهله اهي

رجعت سالت هيه عايشه في الكنيسه ؟ قلتلها هو انت عايشه في الجامع؟ احنا بنروحه وقت الصلاه وهمه كمان

طول الطريق في ترقب وانتظار واول ما وصلنا علامات الازبهلال بدات في الظهور من رسومات الكنيسه ونجفها ومراسم الجواز

مع ان معاها زمايل مسيحين في الفصل بس استغربت جدا جدا كم الاسئله وقت المراسم واللي كتير منها ما كنش عندي انا شخصيا اجاباتها

فكرتني بكميه الاسئله اللي اتسالتها من بعض اصحابي الأجانب هو انتوا بتتجوزا اربعه على طول , هو انتوا بتصلوا ازاي , ولما دخلت واحده عليه وانا بشعري استغربت اني مش قرعه !!! وغيرها كتير قوي لما مثلا اصلي بيقعدوا يتفرجوا عليه لو يعرفوني

ولو مش عارفيني بيخافوا مني لاحسن اكون حافجر قنبله وانا ماشيه ولا حاجه (حدث بالفعل في ناس بعدت عني وعن شنطه ظهر كانت قدامي وانا باصلي وسابوا المكان خاااالص)

كلنا في الهوا سوا من جهل بالاخر كبار كنا او صغيرين وكلنا مسؤلين عن المسافات والاسئله الكتير اللي ملهاش اجابه عندنا كلنا , اخترلك حد من الاخر يفهمك كل اللي مش فاهمه عشان عيب والله

افتكرت موقف كوميدي جدا لابن خاتي وهو ابن تلات او اربع سنين لما في الساحل اتصاحب على جون فجاي لخالتي يقولها هو انت ما سمتنيش جون ليه الاسم ده حلو قوي , فطنط قالت له ما ينفعش عشان الاسم ده مسيحي يقوم يرد كده ببرائه واستغراب وده من ايه ؟

بقلمكم : خليك زي حرف ال آي

بقلمكم : النهارده بدايه حقيقيه ل"بقلمكم " اي حد عنده فكره عايزها تتنشر عالبلوج يبعتها وحانشرها باسمه , قبل كده كانت محاولات بسيطه بس دي بدايه بجد 

صديقه الطفوله من زمان (مش من زمان قوي ) اميره قنديل حتنورنا بمقالها اللذيذ , اتمنى يعجبكم وتعملوا زيها , استمتعوا بيه معايا يالا

خليك زي حرف ال آي

النهاردة عايزة اكلمكوا علي حرف   i   ، حرف غريب اوي طول عمرة واحنا صغيريين كان حرف مالوش لازمة وحرف سهل وصغيركدة ولما كنا بناخدة كان اسهل حرف بيتكتب عصاية وعليها نقطة حتي الكلمة اللي حفظناها للحرف سهلة جدا كانت دايما   i   اينك و كان حرف مش باين في وسط الحروف من كتر ما هو صغير.

 وسبحان الله فجأة وبدون سابق انذار حرف    بقي مشهور جدا بقيت كل حاجة حلوة ومهمة  تبدأ ب.    i ..بقي حرف i  ا لية شنة ورنة والاولاد الصغيرين عايزين يمسكوا اي حاجة تبدأ ب  ... i

معقول! معقول من حرف    i  مش باين لأشهر حرف في الحروف يا تري مين اللي اكتشفة مين اللي خد باله منة واخد بالة انة ممكن يبقي حاجة كبيرة ..

عارفين دة معناة اية!! معناة ان ممكن يكون حد وهو صغير انسان عادي جدا ومالوش اي اهتمامات و لما يكبر يبقي حاجة كبيرة علشان حد اكتشفة وعرف يطلع احلي ما فية وممكن يكون شاف فية حاجة صغيرة ممكن تتنمي وتبقي حاجة كبيرة.

يعني المدرس مينفعش يهمل اي طفل لمجرد انة طفل هادي ومش متفاعل او طفل شقي ومش بيذاكر  او او ..لازم يدور في كل طفل علي احلي حاجة فية ويحاول ينميها ويظهرها لباقي الاولاد ممكن يكون السبب ان الولد دة يبقي حاجة كبيرة.

يعني المدير مينفعش يلاقي موظف مبتدأ ومحتاس ويقول دة مفيش منة امل، لأ لازم يحاول معاة ويشجعة ويخلية يطلع احسن ما فية  واكيد الموظف دة حيفضل يدعي للمدير دة طول العمر لانة خلاة يكتشف نفسة من اول وجديد ويكتشف انة ممكن يعمل حاجات كان عمرة ما يتخيل انة حيعملها بس نتيجة تشجيع المدير وتحفيزة ليةعملها.

يعني الام وما اجمل الام اللي تعرف تفهم ابنها و وتكون عارفة ان تربية الاولاد دية تحدي وكفاح لان كل طفل سبحان الله غير التاني وكل واحد فيهم محتاج معاملة خاصة وكل واحد فيهم طباعة مختلفة والام محتاجة انها تتعلم وتدرس علشان تفهم ابنها وتكتشف مواهبه مهما كانت صغيرة اكيد مع دعائها وسعيها حتخلية احسن طفل في الدنيا

وكل دة بقي حيرجعا  لحرف الأي الجميل بتاعنا دة  وناخد منة العبرة ونتعلم نكون زية ويحاول كل واحد يقلدة ويكون مهم زية كدة.

علشان كد خليك زي حرف 

بقلم:اميرة قنديل