الا لعنه الله عالدايت

تسرح كده في الشوربه السخنه ام تتبيله وحبهان بيضا كده من غير اي حاجه وتفتكر كده اعظم الاكلات المصريه وتشم وتستطعم كل اكله منهم !!!

تشم كده خبيز كيكه البلح ام قرفه وشكولاته وقلبتها في طبق جنان وتقطيعها والبلح يلسوع بقك 

ثم يخطر ليك القراقيش وكحك العيد وريحه الحواج مختلطه مع ريحه الخبيز  واللي تشمها وانت طالع من باب العماره 

وبعدبن بقه كلموني عن خلطه المحشي وهيه بتستوي وريحه الخضرا ماليه البيت ويا  سلام لو في محشي فلفل وكوسه بريحتهم المميزه وهيه معبقه البيت 

طب كلموني عن طشه الفته في العيد الكبير بالرغم من اني مش من هواه العيش ابو ميه ده إلا أنها بيوحشني جدا ولازم أدبه في العيد 

طب تومه السبانخ والملوخية ام كزبره ناشفه 

او بطايه كده متدلعه ومعمول على شوربتها قلقاس بالخضره  أو كسكسي جنبه يخني غلي لما قال يا بس وشربته بقت بني من كتر ما غلي

بلاش ده كله قولوا لي عن فرخه بلدي متحمره في سمنه بلدي ومرشوش عليها ملح وفلفل بعد ما اتحمرت 

او حمام محشي وجنبه ملوخيه خضرا في عز الموسم 

ولا صينيه رقاق مظبطه ومفلفله 

طب في خلاف عالمحرمش في صينيه مكرونه بالباشميل او حتى الرز الملسوع

يا جدعان ده حتى دقه الكشري أو بصله البصاره بعد ما تخمى على قلبك !!!

الاحلى بقه بعد اي اكله من دول كوبايه شاي تقيل بالنعناع وتانتخ وتضحك وسط لمه البيت 

صحيح ما نقدرش ناكل الكلام ده كل يوم انما بجد وحقيقي الاكل لذه ونعمه واستمتاع

كل ده عدى في خيالي وانا باشرب شوربه الفراخ المتبله وهيه لسه نازله من على النار ، مافقتش غير في اخر معلقه !!! 

الا لعنه الله عالدايت 

الجمال النائم

لاحدى الفرق الايطاليه الشهيره Balletto del Sud

التشويق بدا بان كاتالوج الباليه لا يحتوي على ملخص القصه !!! وهو اغرب شيء حدث فعلا , الاظرف ان كل واحد تخيل ان كاتولوجه هو اللي ناقص صفحه الحدوته !!!

قلت لنفسي طب نشوف كده حنفهم ايه ؟ فهمت شويه بس كشخص مولع بالتفاصيل ما قدرتش !!!  فورا دخلت اونلاين وجبت الحدوته بالتفصيل 

يبدا العرض بظلام كامل للمسرح وتصاعد رائع للموسيقى لمده 5 دقايق عالاقل  بالرغم من عدم وجود اوركسترا مصاحب للفرقه ليترك لخيالك دخله الممثلين

الديكور في المجمل بسيييط جدا كعاده العروض الاجنبيه , معتمد على بوسترات وادوات بسيطه , لكن الجميل فيه هو غلبه اللون الرمادي بدرجاته على كل الممشاهد ليظهر الوان ملابس الفرقه التي تراوحت من اشد الاولوان زهاء في مرحله طفوله البطله لالوان ناعمه جدا جدا في مرحله الرومانسيات والاحلام 

الحدوته حدوته ميلاد اميره صغيره للملك والملكه (  اكتر الشخصيات حيويه بين شخوص العرض) , ووقت الاحتفال يظهر ساحر يسحرها لقتلها الا ان الساحره الطيبه تقلل من شده السحر بانها بدل ما تموت يوم عيد ميبلادها ال 16 تنام 100 سنه هيه وكل اللي في الحفله . وتصاعد الصراع بين الساحر الشرير والساحره الطيبه لينهي المشهد الاول

الساحر الشرير كان ابن نكته وكوميدي بشده والاغرب انه في نهايه العرض حاز على اطول تصقيف !!!

يوم ميلادها  اللي بالمناسبه من اكتر اللوحات ابهاج والوان زاهيه لملابس الراقصين واللي اظهرها فعلا الديكور الهادي جدا في فالسات غايه في الجمال والرقه والسرعه في الحركات  , يظهر الساحر في صوره انسيه كوميديه ويهادي الاميره بهديه تعيد تاثير السحر فتنام وينام كل اصحابها وحضور الحفله

تظهر الساحره البنفسجيه وتحاوطهم بثلج يحافظ عليهم لمده 100 سنه بتوع التعويذه

يظهر الامير وتقوده الساحره البنفسجيه للاميره وتظهر تابلوهات موحيه ليهم همه الاتنين وانه بيحبها وفعلا يوصل لها ويقع في غرامها ويفك السحر

اخر التابلوهات هو حفل الزفاف بفالسات ودويتهات من اجمل ما يمكن واللي في القصه الاصليه يفترض احتوائها على كل شخصيات الاميرات fairy   talesلكن  للاسف لم تظهر في العرض ما اعرفش ليه , بس وماله نشوفها اونلاين ربنا يخلي يوتيوب

ينتهي العرض بزواج الامير والاميره ومزيد من الفالسات الناعمه بالالوان الهادئه الرقيقيه بشده من مجاميع الاصدقاء بعد فك سحرهم

الفرقه رائعه,  الباليه يتميز بتصاعد الاحداث سواء في الرقصات او في ايقاعات الموسيقى , الرقصات غايه في السرعه مع الخفه لتعكس تمكن الراقصين بشده

استمر تصفيق الجمهور ربع ساعه في نهايه العرض من شده جماله ليعاد اضاءه المسرح ويعود الحضور لارض الواقع من جديد !!! لينتهي باليه من اجمل ا شاهدت على الاطلاق

 

هذا المكان احبه

انا شخص عاطفي جدا يرتبط بالاشياء والاماكن بطريقه قد لا يصدقها البعض 

من هذه الأماكن دار الاوبرا المصريه ، لها طقوس خاااصه جدا ، عاده افضل الذهاب لها بشكل دوري سواء توفرت صحبه ام لا  ، اختار الحفلات يوم الاجازات قدر الامكان يبقى كده الواحد نايم ومريح ومبسوط 

قبل الحفله بساعتين ونص البس واتشيك واظبط نفسي جدا وكاني خارجه في معاد مع نفسي 

وبعدين اشرب كوبايه قهوه عالريحه أو شاي مظبوط وانزل قبل الحفله بساعتين عالاقل 

عاده باخد نفق الازهر واستمتع بوسط البلد واشعل موسيقى حلوه خفيفه او حتى اغنيه للست عاده اغدا القاك 

اعشق دخله الجزيره من بدايه كوبري قصر النيل ومشهد المسرح الكبير واضائته وتمثال سعد زغلول في الواجهه واضاءه كوبري قصر النيل وعمقه والنيل على الجانبين 

والكوبري والحناطير والعرائس والعرسان والفنادق عالجانبين اللقطه دي من اجمل لحظات اليوم بتكون 

اوصل الاوبرا واشرب كمان شاي في العربيه وانزل برواقه واوصل نص  ساعه عالاقل بدري 

اشوف البرنامج واسعد بيه واترقبه 

واتفرج عالناس حواليه ، قمه الشياكه والرقي واللطافه ، ستات شيك والماظات وشعر معمول عند الكوافير ، رجاله متشيكه ولطيفه وعندها ذوق ، اطفال جايه مع أهاليها ويعرفوا يتصرفوا على قد المكان ، مصر باشوفها جميله وشيك وصوتها واطي امال مين اللي بره دول ؟! 

الحفلات حقيقي كل نوع له طابعه الخاص أن كان موسيقى عربيه ولا باليه او حتى اوبرات 

ويضلم المسرح ويبدأ العرض وتسعد بيه  وكل لقطه تعلم فيك 

وفجاه ينور النور ويخلص العرض وتخرج حقيقي عامل دماغ مختلفه وتركب عربيتك وتشغل الست عاده الاطلال معرفش ليه  وتمشي في شوارع وسط البلد تاني ويا سلام لو شتا والدنيا مطر ، اللللله ساعتها تبقى بجد كملت الدماغ العاليه 

احيانا من فرط السعاده مش بانام واقعد من اللحظه دي استنى الحفله الجايه

شاي بالنعناع كمان وكمان

 زي النهارده من اربع سنين اعدت افتتاح البلوج بعد هجرها شويه حلوين والحقيقه انها شافت معايا صعود وهبوط واحداث كتير

البلوج ازهى عصورها كان اول سنه وبعدين نقدر نقول ثبتت بعد كده من حيث عدد البوستات المنشوره

اعتقد انه شيء طبيعي زي ما بيقولوا الغربال الجديد له شده فطبيعي جدا ان اول سنه انشر 118 بوست وده عدد حقيقي كبير وما قدرتش انشر اكتر من نصه خلال ال3 سنين اللي بعدها

المحتوى كمان اصبح اقصر وبطلت ارغي عالفاضي والمليان ( بس لسه بارغي اكيد)

السنه اللي فاتت دخلت الخواطر الصياحيه وقرات لكم لاني اكتشفت اني باعمل ريفيو تقريبا لكل الكتب اللي باقراها في اخر صفحه من كل كتاب , فاحيانا في كتب بتسعدني لدرجه اني باختار اشرككم معايا في هذه السعاده واصبح باب جديد عندي في البلوج استحدثت باب جديد للافلام والعروض اللي باحضرها واللي مش باتكلم عنها كلها الا ما يستفز فيه الكتابه

ويظل الولا حاجه اهم حاجه اكبر باب في البلوج !!! وكانه بيصر دايما يقولي انه فعلا الولا حاجه اهم حاجه !!!

اعترف بكسلي واعترف بافكار كتير في داغي مش باكتبها واعترف اني اصبحت شخص كسول لاقصى درجه في كل حاجه وكان حتى مناقشه الافكار اللي بتتخانق في دماغي مبقتش بتستفزني زي زمان باسيبهم على بعض يمكن اخلص منهم بس الحقيقه الخناقه مستمره شكلها للابد

كل سنه وانت طيبه يا بلوجي العزيز ذات الاربع سنوات , حندخلها كي جي وان بقه يمكن تفلح

يسعد مساكم واحلامكم سعيده وتصبحوا على فرحه (تفاؤل اهو ) 

حليب اسود

للجميله اليف شفق 

تستمر في ابهاري بسلاسه اسلوبها وقربه للقلب ونفاذه للعقل ببساطه وتلقائيه ولكن هذه المره في تجربه غايه في الشخصيه والرقه والعذوبه 

القصه سيره ذاتيه للكاتبه العاشقه للكتابه والتي نشات مع ام مستقله ، قويه وانعكست عليها

شخصيه محبه للعمل ، الخيال ، السفر ، شخصيه متنوعه وخلاقه لدرجه خلقها لسته سيدات مثل عقله الاصبع تحيا داخل عقلها وتمثل جوانب شخصيتها المختلفه : الروحانيه، المثقفه، العمليه، الطموح وفي رحلتها لدراسه الادب النسوي تستعرض لنا كاتبات مختلفات حول العالم وسيرهن الذاتيه وارائهن في رحلات قصيره وخاطفه وغايه في التثقيف ثم يحدث داخلها ذلك الصراع مع كل كاتبه ومع سيدات عقله الاصبع داخلها لاختلاق احاديث نفس تثري الصراع الذاتي داخلها بين حب الكتابه ، الحياه ، المجتمع وفكره الانوثه والزواج والانجاب واصفه ذلك الصراع الداخلي لكل بنات حواء 

فجاه تلتقي بزوجها وتنقلب حياتها وتظهر عقلتي اصبع جديدتين طالما اخفتهما وهن بلو بيلي بوفاري (الانثي ) وماما الرز بالحليب (جانب الامومه)  ليزيد الصراع داخلها بين خوفها من الزواج والانجاب وحبها لهما!!!  وللكتابه 

ثم تتزوج وتنجب ليظهر لنا شخصيه جديده وهو اللورد بوتون ( جني اكتئاب ما بعد الولاده)  لتشرح احاسيسها وكل بنات حواء المعانيات لهذا الاكتئاب ثم انتصارها عليه وخروج عقله الاصبع مره اخري لحياتها ولكن بشكل متزن لا يغلب فيه جانب علي جانب 

في وجهه نظري المتواضعه الكتاب حاله انسانيه راقيه لخصتها باننا كبشر عموما وبنات حواء خصوصا تم اسرنا في فكره الاستقلاليه والسوبر وامن التي لا تقهر ولا تطلب المساعده ، عندها تتسلط علينا كل انواع عقله الاصبع وكل ابناء اللورد بروتون وهو ما تجنبته الامهات والجدات قديما بنتهي البساطه بطلب المساعده عندما احتجنها وعدم اعتبارهن ذلك نوع من النقص او الخلل ولكنه طبيعه انسانيه لكل من الرجل والمراه تختلف فقط في الكم والكيف والتوقيت 

شاهدت لكم : wonder

في خروجه تامه العشوائيه رحت السينما ودخلت فيلم  wonder  للجميله جوليا روبرتس

الفيلم بيجكي قصه طفل مصاب بمرض وراثي شوه وجهه وكم العمليات اللي عملها لتحسين النظر والسمع والشكل غير منتهي لدرجه ان الام عملت لوحه لاساور المريض اللي لبسها ابنها كل مره دخل فيها المستشفى

فجاه بعد نهايه المرحله الابتدائيه تقرر توقف التدريس المنزلي له وتدخله مدرسه طبيعيه لادماجه في المجتمع

وفي شكل انساني جدا مدير المدرسه يعمل له مجموعه دعم من تلامذه مختلفين لتهيئته قبل المدرسه ( الطفل المتحذلق الغني, ممثله الاعلانات الرغايه والطفل اللطيف جدا ) اللي ياخدوه لفه في المدرسه قبل الدراسه واللي تتابين ردود افعالهم من شكله كمجموعه صغيره فما بالنا بباقي الطلبه !!!

يظهر اول يوم في الدراسه والعيله كلها تروح توصله المدرسه وكم الدعم من الاب والام والاخت وكم الرفض من زملاؤه في المدرسه ومواقف غايه في الانسانيه والسخافه معا

الطفل تربى على تخيل الاحسن ولبس خوذه رجال الفضاء فكل ما حد يضايقه يتخيل نفسه في مكان افضل والناس بتشاور عليه وتجري عليه

الام المتفانيه في تعليمه خلته اشطر واحد في العلوم فبدا يساعد زمايله ويغششهم في الامتحان وبدا يكون له اصدقاء فعليين

ثم يبدا بعرض حياوات باقي الافراد : الام , الاخت , الاصدقاء ليظهر معارك جانبيه يحياها كل من في الفيلم

ينتهي الفيلم بتقبل المجتمع للطفل وتخليه عن خوذه رجال الفضاء اللي كان بيستخبى وراها ومفاجاه مذهله ابكت كل من في السينما وانهت الفيلم بسعاده بالغه

الفيلم انساني رااااقي جدا مبكي ومبهج في نفس الوقت اهم ما فيه الام اللي افنت حياتها لرعايه ابنها وتطويره , دور المدرسه العظيم والملفت للنظر والمدرس المعتني بالاطفال ودور الصداقه في تجاوز الالم لكل الابطال

اهم ما فيه هو رساله تقبل المجتمع للمختلفين عن الطبيعي وتصوير نفسيه واحتياجهم للتقبل والانخراط مع المجتمع مهما كان نوع هذا الاختلاف سواء كان لاعاقه زي الفيلم او حتى اي نوع من الاختلاف لان كل واحد عنده نوعيه اختلافه الخاااصه جدا واللي نفسه بس نفسه الناس تتفهمها وتتقبلها لانه هوشخصيا بيعاني منها سواء كانت اختلافات في الشكل, الديانه, التفكير, او حتى الاولويات لان كل واحد له معركته الخاصه اللي محدش داري بتفاصيلها غيره , ارحموا الاختلاف وتقبلوا معارك الاخرين هي رساله الفيلم

ودمتم سالمين

https://www.youtube.com/watch?v=ngiK1gQKgK8

٢ يناير

فاتت ٢٠١٧ وفات اول يوم في ٢٠١٨ وتاني يوم بيشطب 

ايه بقه الفرق بين ٢٠١٧, ٢٠١٨ ؟ 

ولا اي حاجه 

تمام بالظبط زي موظفه الحكومه اللي بتقولي النهارده انت اتاخرتي عن معاد السنه اللي فاتت ودي مشكله ، فطلعتلها الورقه وقلتلها ٣١ ديسمبر من ٢ يناير ابقى اتاخرت ؟ 

بلمت كده وفتحت بقها وسكتت قالتلي انا بصيت عالشهر والسنه ، قلتلها ولا يهمك بس صعب عليها تطلع غلطانه فمشورتني ساعه وربع عشان ٥ جنيه ، ما علينا 

احنا بقه اول امبارح كل واحد قعد يذم ويشكر في ٢٠١٧ وبوستات من هنا وبوستات من هناك والواحد حقيقي كان كأنه ماسك الريموت وقاعدة يقلب القنوات اه والله زمبؤلك كده 

شخصيا عندي بوست سنوي only me باراجع فيه السنه بحلوها ومرها وامانيها مرتين ، مره يوم عيد ميلادي ومره يوم ٣١ ديسمبر من باب إذا بليتم فاستتروا ما هو مش لازم يعني افضح نفسي ، ولو كانت النتيجه ايجابيه بلاش عشان الحاجات دي بتتحسد !!!

انما نقعد نسب ونلعن في الأيام ، ذنبها ايه ، احنا اللي بندور على شماعه لاخطائنا أو بنتلكك عشان نتفائل مع أن اللي قبلنا قالوا لا تذم ولا تشكر غير بعد سنه وست اشهر يعني بأي حال من الأحوال مش حنلحق ال ١٢ شهر بتوع اي سنه 

ما علينا يجعلها بيضه عالكريم ، سوداء عاللئيم منيله بستين نيله عاللي ينكد عالحريم 

دمتم سالمين