جت الحزينه تفرح

في نقلتي من صلاح سالم الاوتوستراد بنعدي جوه مقابر بس عادي الناس رايحه جايه وعادي 

فجأه كده من بعيد زحمه ولمه ودوشه في حته مفترق طرق قلت يمكن جنازه وواقفين يجمعوا بعض عشان الدنيا ليل وكده 

لما قربت اكتشفت انها عربيه نص نقل خبطت عربيه ملاكي والبنت لوحدها والناس ملمومه 

صعبت عليه بس حقيقي خفت اقف ولا اعمل حاجه وكملت طريقي ولا يكلف الله نفسا إلا وسعها 

شويه واكتشفت زحمه عربيات بس ما طلعتش بقه جنازه طلعت زفه عفش عروسه وكميه عربيات نقل سائله جهاز البنت وكميه عربيات ملاكي وكلهم واقفين 

اتاري ايه بقه العربيه النقل بتاعه الحادثه طلعت من ضمن عربيات الجهاز بتاع الغلبانه اللي حظها خلاهم يعدوا بجهازها وسط الترب وسواق غبي عمل حادثه بيه 

البنت صعبت عليه لأنها اكيد حتتشائم ، وممكن جدا عريسها يفضل العمر كله يحكي القصه دي حتى من بابا النكش أو التندر اوحتى الجهاز في وسط الزيطه يتقلب من الناس الملمومه دي 

ونسيت اصلا الغلبانه اللي عملت الحادثه 

اكيد المولد حينفض والعربيه حتتصلح وجهاز العروسه خيتفرش بس حيفضل نغزه كده تتنغز بمناسبه أو من غير كل فتره عشان سواق غبي أو حتى واحد قرر يختصر الطريق ويخش بعفش عروسه وسط الترب 

اييييييه دننننننيا

جت الحزينه تفرح ما لقتلهاش مطرح

قصه الحضاره

بقرأ في قصه الحضاره قد ايه الطبيعه والموارد زمان كانت متجدده وكل الناس عايشه رايقه ومش محتاسه وبتجري عالفلوس 

اه كان في طبقات مطحونه بس بلغه الايام دي برضو مرتاحين 

يمكن لان الناس كانت قليله والأرض لسه جديده والناس رايقه وبتبني حضارات وآثار روقان 

يا ترى لو اكتشفوا كوكب جديد وقررورا ينقلوا الارضينن له حيختاروا مين يروح ؟ حنروح بفكر الأرض الاناني برضو ونكرر الماساه ولا حيفرمتوا دماغ اللي خيسفروهم ونعيد قصه الحضاره 

ولا انا دماغي لسعت ولا رافضك يا زماني يا مكاني يا اواني انا بس عايز اعيش في كوكب تاني ؟! 

اي كلام

يوم تلات

فتحت الراديو على عمرو دياب بيغني ليوم التلات بس الحقيقه على "واحده واحد عليه بتميل " بس انا سمعتها بتنيل !!! قلت ماشي بدايه ظريفه ليوم تلات ذو المشوار الاسبوعي من كل اسبوع من اقصى القاهره لاقصاها

بس الحقيقه فرحه الهضبه بيوم التلات ما ساعدتنيش خالص في كم العبث والكوميدياء في الشوارع واللي بيعكس كم العشوائيه والانانيه للشعب المصري وكل واحد متخيل نفسه ووقت اولويه وطظ في الباقي

المشي عكس الاتجاه, البوز بيز , التكاتك اللي ماشيه في كل اتجاه, ناس ماشه حرفيا في نص الشارع , ناس نايمه وشبه بتحلم كمان , عامل فرن بلدي شايل طاوله عيش سخن مفقع وماشي يترقص ما تعرفش مبسوط ولا سكران بس عايز تنتش منه رغيف سخن تاكله حاف

موتوسيكلات وعجل وعربيات مشهد سريالي عبثي الحقيقه مع كثير من البلاليع المفتحه والشوارع المدغدغه واللي موجوده في كل حته وفي كل طريق واللي ما فرقش معاها خالص انك نازل من 7 الصبح عشان تخلص وتوصل شغلك في ميعاده ولا فرقت

سيبوكوا بقه من كل ده ويكتمل العبث بشخص ظريف جدا او مجنون جدا قرر يتبول في نص الشارع حرفيا وقدام معهد ناصر في قارعه الطريق ومش بس كده حضرته بيرش يمين وشمال ومستمتع الى اقصى درجه

هو الحقيقه ضحكني جدا بالرغم من صدمه المنظر بس برضو عمل اللي كلنا نفسنا نعمل على شوارعنا العبثيه بالناس اللي فيها اللي وبجد ينقصها موسيقى السيرك ليكتمل المشهد !!!  قالك يوم تلات قاااال

 



انسانيه المولد

ماشيين في الشارع لقينا اللي بيوقفنا بابتسامه ، تخيلت أنه افتتاح فبقوله ايه ده قالي كل سنه وانتم طيبين مولد النبي 

وأصر يدي لكل اللي في العربيه

ودي كانت احلى انسانيه ( مسمى لعائلتنا الكريمه عن المفاجئات الساره ) اتعملت

مقلتلوش غير اللللللله كل سنه وانت طيب 

شربات ورد متقطع فيه موز وطعمه كان فريش ومسكر وجميل 

لسه فيها حاجه حلوه 

مزززيكا

حد من أصحابنا بره حط بوست أن في فرح اجانب عايزين اغاني مصري على سبيل التغيير 

اللي دخل قاله مهرجانات عمري ما سمعت عنها وحاجات غريبه 

العبد لله قاله شويه اغاني قديمه على جديده حاجات هادئه وظريفه من وجهه نظري المتواضعة، بعدين قلتله بلاش مهرجانات 

وعينكم ما تشوف الا النور واحد دخل فيه تهزيق ليه مهرجانات ولا عشان بتاعه الناس الفقراء !!!! ايه العلاقه مش فاهمه ، انا مش بنت نجيب ساويرس حررتك عادي كلنا ولاد تسعه !!! 

قلتله ده ذوقي ووجهه نظري وان المهرجانات فيها اسفاف ودوشه ومفيهاش قيمه 

دخل اداني محاضره في قد ايه اني متعاليه وشايفه أن ذوقي متعالي  

سبحان الله والله ده اللي المفروض بقه شكله فنان بقه وعايش بره دخل فيه تهزيق وشتيمه في الاغاني الشرقيه والربع تون .....

هو ايه القيمه اللي المهرجانات بتقدمها لما يقول أنا شارب سجاره بني وحاسس أن دماغي بتاكلني !!! 

ولا التاني ده اللي بيقول هاتي بوسه يا بت 

انا حي الله قلتله شغل : دقوا المزاهر ، زغروته حلوه رنت في بيتنا ، عارفه ، لما النسيم ، الزين والزينه وحاولت اخد من كل فيلم وذوق اغنيه العادي، القديم، اللي بيرقص وخلاص هو حر بقه يشغل ايه 

الحقيقه انا اشتريت دماغي خالص وتركت المنافسه وعملت turn off notification واشتريت دماغي توفيرا بحرقه الدم وإخراج صاحب البوست اللي ماردش على حد من باب اننا الاتنين أصحابه

وسحبت نفسي ان شاله ما سمعوا حاجه ولا محتاجه بلا هرشه نفوخ !!! 

ادي بوست تافه خد هلك وطاقه بدون اي مناسبه !!! ابببببه يا جدعان بس !!!!

وعجبي

النادي عندنا فجاه اكتشف أن القانون يحتم انتخاب وليس تعيين مجلس اداره 

قوم عشان يتحايل عالقانون يطلع كل من هو ليس في هيئه الطرق والكباري ويسميهم أعضاء زائرين عشان ما يخشوش الانتخابات وعشان شويه شويه يبقوا ضيوف في النادي اللي اصلا قائم على اشتراكاتهم لان التانين عايشين اصلا سفلقه علينا 

قوم الأعضاء يرفعوا عليهم قضايا ويبهدلوا بعض ويكسبوا القضايا بس اللي ما رفعش القضيه وكان قاعد يتفرج عالكنبه يتقاله روح ارفع انت كمان قضيه. 

مع أن ايام ما بدا وعملنا العضويه من ٤٠ سنه مكنش في غيره في الحي اللي متسمي اصلا على اسمه ولا كان في ذكر للطرق والكباري اللي فجاه بقه اسمه نادي م نصر للطرق والكباري 

في يوم من الايام كان بسعر الاهلي م نصر ٧٠٠ جندي بحالهم 

النهارده عرفت أن عضويه الاهلي من السنه الجديده حتبقى بمليون بلبل 

اه والله زمبؤلك كدهووون 

وعجبي 

بوست مش سياسي خااالص والله 😆😆😆

ان الله يحب اذا عمل احدكم عمل ان يتقفنه مش ينجزه

مشكله بلدنا مش في اللامسؤلين ، لا ابسولوتلي خالص

ولا المطبلاتيه ولا المبرراتيه ولا حتى العملاء ولا الاخوان ولا العلمانين خااالص

مشكلتنا أن جيناتنا حتى في حياتنا نظريه السهل السريع اللي هو خلص من عالوش وانجز وخلص

مذاكره ننشن على المهم

شغل من عالوش

حتى الشارع تلاقي اللي ماشي عالقواعد مركون في الصف والبلطجي الحلنجي هو اللي لف من أقصى اليمين ودخل اليوترن وعدى ووقف الشارع وهو برضو اللي حيوصل الاول والتانيين لسه في الصف

ويتقال على الاشكال دي مخلصه ومدقدقه وتعرف توصل

أما التانيين يتقال عليهم معقدين، نمكيين، محبكين ، مزودين
وهمه اللي بيفضلوا في اخر الطابور وهمه همه اللي بيتقال عليهم ثورجيه أو مزعجين او مش ممشين حالهم وهمه اللي في الاخر بينجننوا من كل الأشكال السابق ذكرها

وهو هو اللي بعد يومين حترجع فيه ريما لعادتها القديمه

المجتمع هو اللي شجع الثقافه دي وهو هو اللي امبارح ياعيني اتفاجيء أن الدنيا بظرميت في حته صغنونه قااااد كده هيه الطرق والكباري اللي فلقوا دماغنا بانجازاتها في احياء اصلا مصنفه أنها راقيه !!!!

مستغربين أن الطريق الدائري الجديد اسفلته هبط وقفلوه النهارده ده لو امي عامله كيكه اسفنجيه حتبقى ماسكه نفسها يومين ولا حاجه !!! كام مليار اتهلبوا في كل الانجازات دي

احنا البلد اللي اكتر آثارها عمرها بآلاف السنين واخر إنجازاتها اتهدت في غمضه عين لو بتسموها انجازات

احنا البلد اللي احلى لقطه في استقبال أو وداع سائح هي perfection leads to eternity وحاطينها على صور آثارها وللأسف هيه هيه البلد اللي نفس ذات المطار غرق امبارح !!!

ربوا عيالكم ابوس ايدكم وان مكنش عندكم خلق للتربيه الهي يعمر بينكم بلاش تتنيلوا تخلفوا كفايه عاهات

علموهم أن الله يحب إذا عمل أحدكم عمل أن يتقنه مش أن ينجزه !!!

اللي احنا فيه ده قله ضمير ، قله ضمير ناتجه عن قله التربيه

يارب القيامه تقوم ونخلص بقه

وعند الله تجتمع الخصوم