من ذاق عرف

مع حمله خليك بالبيت حقيقي معجبه مبادره د ايناس عبد الدايم بعرض كنوز حفلات دار الاوبرا المصريه كل يوم الساعه ٩ 

دخلت كده منشكحه وسعيده وجدول عظيم منزلينه من حفلات الموسيقى العربيه وباليهات ومهرجان الموسيقى على حبه عروض اوركسترا القاهره السيمفوني تشكيله عظيمه الحقيقه 

زمان ايام حفلات اضواء المدينه وليالي التلفزيون كنا بنسهر للصبح نتفرج 

الايام دي بقه لما بدأت اتابعها حسيت بالفرق العظيم الحقيقه بين فرجه البيت دلوقتي وزمان ، فرجه البيت وحضور العرض في الاوبرا 

يعني مثلا مثلا ازاي اسمع عمر خيرت وانا بالبيجامه على السرير واقعد العب بالموبايل واهيس انا واصحابي ؟! 

ولا ازاي اسمع حفله لسليم سحاب وفي نصها عادي حد ينده عليه أو اقوم اخش التواليت 

أو مثلا يغلبني النوم من ملل المونتاج وسخافه التقطيع !!! 

الاوبرا لها كده اعدادات : تاخد اجازه ، تشتغل من البيت اليوم ده ، تختار حفلتك يوم جمعه ويبقى دماغك رايق وتلبس وتحط مكياجك وتشرب قهوتك وتنزل بالرايق تسمع حاجه حلوه وتمشي في وسط البلد وتوصل برواقه تشربلك كمان شاي وتقفل الموبيل وتنسط بكل جوارحك وتستمتع 

وفي الرجوع من كتر ما انت سعيد وفائق ممكن ما تنمش كويس وتقعد تتفرج عالصور اللي خدتها سرقه من الحفله 

من ذاق حضور حفله في الاوبرا فعلا عرف الفرق 

يالا معلش بصوت دلال عبد العزيز 

سفاااااااري

رحله السفاري جزء لا يتجزأ من رحله سيوه 

اول ليله في الرحله قبلها كانت عشاء في وسط الصحراء وورونا السفاري على صغنن 

تسلطت عليه فكره اني حاتخبط وسناني حتتكسر وقررت ما اطلعش وفي الوقت ده كان اصلا بيجيلي motion sickness من اي حركه فقلت بلاش قله قيمه 

المهم اسماء صديقتي قالتلي فرصه  وبيقولوا جميله  والدنيا على غير العاده مطرت وقالوا لي كده السفاري حتبق ابسط ولقيتني خاقعد لوحدي  في الفندق قلت اطلع وربنا يستر بس طلبت عربيه وسواق هادي قالوا لي طيب اتاريهم كانوا بياخدوني على قد عقلي والسواق اصلا كان شكله شارب حاجه ،ةبس ما علينا هو كان شخص كوميدي ومتنح الاتنين في نفس ذات الوقت !!!

نطلع السفاري وأشد الحزام واحكم عالعربيه كلها يتحزموا عشان ما ناذيش بعض وهمه سمعوا كلامي بصراحه

كنا ٥ بنات واورجانيزر وسواق في عربيه جيب 

ويطلع السواق ويبدأ السفاري 

وكل محطه يلموا ويستنوا بعض بس كانت حقيقي تجنن ونشغل مزيكا عاليه ويهبد بينا العربيه كل هبده والتانيه مع ارتفاع الكثبان ينزل بسرعته دريييييب ونصوت ونضحك ونطلع كل الطاقه السلبيه حقيقي كانت فظيعه 

اول محطه كانت بئر واحد وده في عز السقعه كانت ميه سخنه والناس بالمايوهات عادي جدا 

ونكمل تاني المراجيح لبئر ٢ وده ميه عذبه ساقعه زي العسل في وسط الصحراء ازاي معرفش 

وبعدين جت فقره الsand surfing ودي كانت ضحك بس ، بس بصراحه خفت اتدقلج فقررت استمتع بهدوء وغروب الصحراء لوحدي بعيد وكنا يوم جمعه فقعدت ادعي دعوتين ينفعوني مع كثير من التأمل لحد الشمس ما روحت ودي كانت من اجمل فقرات اليوم بصراحه 

نزلت الجرف العالي على رجلي بلاش تهزيق !!! وهنا بدأت فقره التهييس الجماعي عملوا راكيه شاي عالحطب وسوداني ويوستفندي وقعدنا نغني ونتصور وبعدين غنا شعبي عالنار كلام نصه امازيغي بس كان لحنه حلو وقعد يترجمه بس كان جميل بصراحه 

من كتر راكيات الشاي في الرحله دي فضلت شامه ريحه الحطب بتاع اسبوعين بعدها في كل هدومي اللي راحت معايا واللي ما راحتش 

بس احلى شاي في الدنيا تشربه منها الكوبايه بقين بالعدد وشاي صعيدي مغلي بميه الله اعلم ايه بس مش مهم  ، مع سكر من كتر غليته يكرمل ويبقى عسل ، معاه نعناع وويزا واشرب عدد لا نهائي من الشاي ولا يهمك 

ونخلص السفاري ونرجع بس بجد احلى حاجه في سيوه وحقيقي كنت حاندم لو ماطلعتهاش وخدت شويه صور اليوم ده من احلى صوري بجد 

#يوم_من_عمري_قعده_شاي_بالنعناع

اليوم العالمي للمرأه

 

8 مارس , اليوم العالمي للمرأه وظيطه بقه وناس تتصور واقوال ماثوره زاشتغالات للصبح !!! بس نفسي قبل ما تحتفلوا باليوم العلمي للمراه عايزاكم بس تشوفوا المراه دي عايشه ازاي

-        وهيه طفله اكسر للبنت ضلع يطلع لها 24

-        وهيه مراهقه مطلوب منها تخدم اخوها الشحط عشان هيه بنت وهو راجل

-        وهيه في الجامعه ما تتاخريش ما تصاحبيش ما تعليش صوتك واخوها متساب باشا يعمل اللي على مزاجه

-        لما تبدا يجيلها عرسان احنا مش حننقي الناس , البطران اخره قطران , عيشي عيشه اهلك

-        والناحيه التانيه اي بيه حواليها يتقاله اقعد عالبساط واختار ست البنات والراجل ما يعيبوش الا جيبه لا اخلاقه وتعامله يعيبوه ويعيبوا اهله كمان  

-        تتجوز تسمع الكلام ولا تناقش ولا تجادل , عيشي عشان ولادك , معندناش بنات تتطلق

-        يطين عيشتها وهيه تشتغل جوه وبره انما هو يرجع البيت يريح اعصابه , ايه مش راجل

-        تودي تمارين وتمرض عيانين , تنضف وتروق, تطبخ, تشتغل زيه زيها وفي الاخر يتقال الست ست والراجل راجل, انا بس عايزه تعريف للرجوله بصراحه , حضرتك لما تسيب لها كل حاجه مش بتعلمها تعتمد على نفسها لا بتعلمها تستغنى عنك !!!

- ما اتحوزش يتقال عليها وتتعاير في الرايحه والجايه ويتمرر عيشتها عشان يخلصوا منها أو في احسن الظروف كل كبيره وصغيره في حياتها يبقى سببها أو نتيجتها انها ما اتجوزتش ودخلت المنظومه العظيمه بتاعتكم 

-        في الشغل الترقيه والتفضيل للراجل مع انه عادي ممكن يكون بيتدلع ويتمرقع طول النهار انما لو ابنها سخن ولا تعب ولا عازت اجازه يتقال ادي الستات وشغل الستات ويوم ما تمد اجازه الوضع يققلوا التقييم السنوي ليها

-        حتى لو بقت وزيره تتحط تحت الميكروسكوب وكل شارده ووارده يتعلق عليها والدنيا تقوم ما تقعدش

-        ده عن الحضر , تعالوا بقه في الريف والصعيد : الغلبانه تصحى تخبز وتروح الغيط وتربي ماشي, تنضف تحتهم, تطبخ وتغسل وتشيل بيتها وبيت عيله جوزها وفي الاخر يتجوز عليها او يهجرها بعيالها وما تلاقيش حد يصرف عليها

-        الانيل ان بنتها عايشه وشايفه اللي بيحصل وبرضو الدايره مكمله والحياه تستمر في حلقه الظلم اللا نهائي دي

-        الاغرب بقه انه ما بيظلمش الست اكتر ظلم غير ست  زيها ويتقالك ما كنا قدكم وعملنا كل حاجه , انتم جيل بايظ

-        ترتاح بس يوم ما يتاويها التراب في بلد بتغني للبنات البنات الطف الكائنات

-        قبل ما تحتفلوا باليوم العالمي للمراه افهموها وقدروها وساعدوها مش تحطوا عليها وفي الاخر تحتفلوا بيها كام ساعه تضحكوا بيهم عليها

-        قالك اليوم العالمي للمراه , قال !!!

بنت الجيران vs تملي في قلبي

باقلب الراديو الصبح لقيت مهرجان بنت الجيران بتوزيع جديد 

اه والله زمبؤلكم كده ، موسيقى غربي وبنت بتغنيه بطريقه غربي 

سكت كده واتاخدت هو فلته زمانه يعني عشان نعيد توزيعه ، المره الجايه شرقي بقه ولا جاز 

الأغرب اني قبلها بليله كنت حاضره في الاوبرا حفله لعماد الشاروني عنوانها ذكريات الثمانينات على كام اغنيه لعبد الوهاب وفريد بتوزيعات جديده وكله كله موسيقى بس 

قلت ايش جاب لجاب وامتى وصلنا للمستوى ده هو احنا تراثنا واغنينا خلصت عشان نعيد توزيع بنت الجيران !!!

قلبت المحطه لقيت عمنا فوزي بيغني رائعته تملي في قلبي ونسيت أو تناسيت عشان ما اكدرش نفسي عالصبح
هو اه غناها في الاستاد ، برعايه الدوله ، تقديم جاسمين طه ذكي اللي مارحتش مره الاوبرا ماكنتش قاعده في نفس البنوار
ولكن برضو في يوم من الايام مع فساد وتملق الناس ايام ثوره ٥٢ بعدهاايام النكسه مالقيوش غير اغنيه فوزي وطني احببتك يا وطني تكون مناسبه للعرض وسط حاجات كتير كانت بمقايسهم فيها نفاق
مصير المعادن تبان والاذواق تنصلح والكويس يفضل مسموع زي ما استمتعت بفوزي كده النهارده الصبح

ولاد العم

الفيلم مش جديد بس كل مره باتفرج عليه بافتكر المناقشه المحتدمه اللي حصلت بيني وبين صديقتي بعد ماخرجنا منه 

كان يوم خميس وقعدنا بعده نتغدى ونشرب حاجه وندردش في الفيلم 

الدوامه اللي منى ذكي كانت فيها بين انها مصريه مسلمه ضد جوزها اللي مش بس خدعها لا كمان طلع ظابط اسرائيلي في المخابرات وخطفها هيه ولادها وهرب بيهم على إسرائيل 

والحياه المتناقضة بين انها عايزه ترجع ، خايفه على ولادها ، خايفه منه وفي نفس الوقت العشره والعيال مخوفينها تأذيه

انناقشنا ماذتعمل لو كنت مكانها ؟ قالت حاهرب بالعيال وان كان عمليا صعب 

قلتلها همه ولاده ولا يمكن يأذيهم بس ممكن ياذيني عن نفسي حاهرب وارجع 

طب والعيال ، قلتلها يفضلوا معاه لحد ما يكبروا يقرروا 

قالتلي حيغيرلهم دينهم قلتلها اصلا الأولاد مش صح يورثوا الدين ولكن يقرروا الدين لما يكبرو عشان يكون اختيار حر وساعتها همه مسؤولين عن نفسهم ولا يكلف الله نفسا إلا وسعها ، انا مش حاعرف اتصرف في هروب العيال وممكن كلنا نتاذي اصلا ، حاهرب واحاول بعد ما ارجع اعمل اي حاجه ما كنش ربنا يفرجها بعدين يمكن يموت ويرجعوا يدوروا عليه أو يحصل اي حاجه تغير مجرى الأحداث 

وخلصت القعده على خلاف جذري في التفكير والقرار 

انتوا بقه حتعملوا ايه لو كنتم مكان منى ذكي ؟! 

انا كارنينا

اكيد كلنا يا قريناها يا شفناها 

 فيلم اجنبي او حتى النسخه الممصره : نهر الحب 

القصه غريبه جدا جدا، تتفرج عليها عربي تتعاطف مع فاتن حمامه وعمر الشريف أما لو قريتها أو شفتها اجنبي تتخض كده من تعاطفك مع النسخه العربي وضميرك يصحى ويستعجب !!!

قصه مثيره للجدل والتفكير الذاتي بشده 

والانطباع ده ما اتغيرش لما شفتها باليه ، فرقه ايطالي وكعاده الفرق الاجنبيه : الموسيقى مسجله ، الديكور من ابسط ما يكون ( في حالتنا معدوم الا من بضع مناظر ابيض واسود من داتا شو وكنبتين استخدموهم كراسي، قطر، سفره، سرير كل حاجه  ) أما البطل الحقيقي هو الأداء المبدع والعظيم والرشيق والرقصات اللي بتحكي كل حاجه بمنتهى البساطة والإتقان أو حتى ملامح وانطباعات وجه الراقصين والراقصات 

باليه من ١١ فصل شديد التعقيد والتشابك والتفاصيل 

في الفاصل الاول قلت ايه ده هو ايه الباليه الفقير ده مفيش اي حاجه كده والديكور شبه معدوم وشاركتني الانطباع صديقتي اللي قابلتها في الاوبرا 

بعد الفاصل ما انتهى حصل تصاعد مرعب للأحداث وتلاقي نفسك كده في قمه الصراع والدراما ما اعرفش ازاي وانتى حصلت النقله دي 

وهنا بالرغم من أن القصه مش جديده جالي انطباع واحد واكيد أن الحاجه الاصيله حتى لو مظهرها في الاول بسيط او فقير الا انها بتظهر وتثبت نفسها في النهايه 

ويسدل الستار على اكتر باليه درامي شفته في حياتي ابسط ديكور ومناظر ولكن أعظم أداء ودراما وإحساس يوصل لاخر حد في اخر صف في البلكون فوووووق 

.شابو فرقه ميلانو للباليه، ولدار الاوبرا المصريه باستضافة الفرق الاجنبيه

  

عيد سعيد يا بلوجي العزيز