الفصلان

لغويا ملهوش تعريف

انما الشيا " من الالش" هو شخص ظريف ولطيف جدا شغلته في العادي يطلعك من المود بقصد او من غير قصد

يعني تبقى بتكتب ستاتس على فيسبوك يخش ويقولك اصلك كتبت الكلمه بطريقه غلط عربي كان او لغات

نبقى بنسمع مزيكا كويسه يدخل مثلا يقولك هات سماعه من الاتنين بتوعك

تكون بتشوف حاجه في التلفزيون يقلب الدش من بره

تبقى عامل مناقشه لطيفه على موضوع يدخل يغير الموضوع

تعمل شير لحاجه يقعد يتفلسف وخلاص

المهم يطلعك من المود قاصد بقه وغلاسه ولا مجرد بينكشك هو وضميره

بس عاده بيكون شخص طيب ودمه خفيف

كلنا هذا الشخص الفصيل بقصد او من غير !!!

يا حلولي يا حلولي

مزاج مزاج المزاج  

مفيش حاجه في الدنيا احلى من كتاب حلو تغطس فيه , ومن جماله يبقى نفسك ما يخلصش

ولا هو فيه احلى من كتاب حلو في جنينه النادي في الشمس في الشتا ومزيكا هاديه في ودانك وكوبايه فراوله ساقعه

حتى في الصيف عالبحر في حته بعيده وصوت الموج في الخلفيه ؟

طب هو فيه ادفا ولا اامن ولا احن من الزنقور بتاعي في سريري ومخده سانده بيها ضهري مع كوبايه شاي حلوه وكتاب لذيذ ؟

طب هو فيه احساس بالانجاز اكتر من انك تنزل معرض الكتاب بلسته وتجيبها كلها وزياده ؟ ولا كتافك لما توجعك من تقل الكتب وتقرر المره الجايه حانزل بشنطه بترولي عشان ما ارجعش لاني تعبت من الشيل !!!

مفيش احلى من تفانينك في رص الكتب رصه حلوه في مكتبتك ناحيه عربي وناحيه انجليزي  ولما تيجي تختار كتاب تحس ان كل واحد بيشدك ويقولك انا انا اقراني انا

 

في احساس بالانجاز احلى من نقل كتاب من رف " اللي بقراه" لرف " اللي قريته" وتلاقي الرف بيتملي ويخلص وتنقل على اللي بعده وتحس معاه ان عقلك بيوسع ويكبر

 حلو احساس من كل بستان زهره مره عربي مره انجليزي , مره تاريخ , مره دين, مره ثقافه

ولا في احلى من ابتسامتك وانت بتحكي عن كتاب عجبك؟

ويا سلام لما تخطط في كتاب وبعد سنين تفتحه وتقرا اللي خططته فتعيش لحظات الاستمتاع دي تاني وتاني

كل مره باقرا كتاب بافتكر فيلم الكرتون اللي الكتكوت الفصيح كان عمال يغني ويقول:

يا حلولي يا حلولي                           ده ايه ده اللي بيحصلي

كل ما باعرف اكتر واكتر                   باكبر سنتي وميلي

 https://www.facebook.com/#!/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431?fref=ts

بنت هاي كواليتي

هيه البنت اللي عارفه قيمه نفسها بس مش مغروره

مقدره مكانتها كويس قوي , وحاطه كل حاجه في مقاسها

في الشكل شخصيه بسيطه في ملامحها , في لبسها, في شعرها لو مش محجبه,  او حتى في لفه الايشارب لو محجبه

المكياج عندها لكل مقام مقال لو بتحط حيكون بسيط او حتى معدوم في الشغل او الكليه ولو بعد الظهر حيكون مناسب من غير بهرجه

البنت الهاي كواليتي شايفه ان جمال الشخصيه وصفاء الروح مهم جدا , عندها الجوهر  اهم بكتير من المظهر

البنت الهاي كواليتي شايفه ان العقل زينه ومهم جدا يليه الشكل

عمرها ما حتحط نفسها في منافسه مقامها الشكل أو اللبس أو حتى في منافسه مع اي واحده عشان واحد مهما كان مهم ليها

لكن حتلاقيها رهيبه في الشغل أو المذاكره أو الخير

وقت الجد لما تلبس وتتشيك محدش يقدر يجاريها لانها بتعمل كل حاجه بذمه وضمير فمثلا لو شفتها في حفله او سهره حتلاقي اناقه منقطعه النظير بس في نفس الوقت قمه في البساطه عندها ميكس سحري مش سهل لاي حد

البنت الهاي كواليتي مهتمه بكاريرها وتعليمها لاقصى درجه بس يوم ما تحب وتتجوز حتكون اعظم زوجه واقوى ام

حتخلي ولادها قدوه تفرح اللي حواليها لانها زي ما قلت بتعمل كل حاجه بضمير

البنت الهاي كواليتي حتوفق كويس قوي بين بيتها وجوزها وشغلها

البنت الهاي كواليتي شخصيه عمليه لاقصى درجه بس في الرومانسيه الحب الحب الشوق الشوق

البنت الهاي كواليتي حتلاقيها برضه لطيفه وظريفه ولللللكككككن بحدود يعني ما تسمحش لنفسك بالاستظراف معاها لانها مش حتسمح لك بده لانها عامله لنفسها مكان ومكانه لانها عارفه قيمه نفسها كويس بس من غير غرور

البنت الهاي كواليتي  ممكن تعمل حوالين نفسها صدفه مش سهل اختراقها عشان كده لازم تتعب وتبذل مجهود عشان توصل لها وتحسسها انك جدير بيها

البنت الهاي كواليتي مش سهل اي حد يفهمها بس اللي حيفهمها ويعرف يتعامل معاها (في كل الاتجاهات) تديه عينيها

البنت الهاي كواليتي فعلا هاي كواليتي وجديره بالمجهود عشان تكسبها صديقه وزميله أو اي حاجه تانيه

https://www.facebook.com/#!/562451227215431/photos/a.562476710546216.1073741828.562451227215431/565001520293735/?type=1&theater

باحب الرز الملسوع !!!

لما تلاقي نفسك اسعد واحد في الدنيا لما تلسع حله الرز وتاكله مقرمش واللي حوايك شايفينك لاسع زيه بالظبط

او تتعمد تقرمش صينيه مكرونه في الفرن لنفس السبب!!

لما تتجنن من ريحه الصابون على جلد الاطفال

أو مودك يتظبط من ريحه المطر في يوم في الشتا

احساسك بلسعه البرد بدري في الشتا ينشط جسمك وروحك وعقلك دون عن كل الناس المدفوسه تحت البطاطين

وانتعاشك بدوش دافي بدري في الصيف

لون كوبايه شاي مظبوطه في كوبايه قزاز , أو حتى ريحه قهوه محوجه في ساعه روقان

جمله مزيكا حلوه تسمعها بالصدفه وانت بتقلب الراديو

أو حتى اغنيه تلعب على اوتارك من غير مناسبه

ابتسامه حد في الشارع ما تعرفوش حتى لو كانت بالغلط

أو حد تصعب عليه فيوقف لك الاسانسير وانت داخل عماره تجري

حد واحشك مات من سنين جالك في الحلم وطبطب عليك

غفوه في يوم حر وتعب تفوق بعدها ساعات وتنجز الل عمرك ما حلمت بيه

خروجه وغدوه وسينما مع صحابك من غير ترتيب

حاجات صغيره تبسطك وتسعدك  بس اللي حواليك شايفينك لاسع بالظبط زي حله الرز اللي نسيتها عالنار !!!

https://www.facebook.com/#!/562451227215431/photos/a.562476710546216.1073741828.562451227215431/563366520457235/?type=1&theater

مكان اسمه الوطن

لفت نظري بوست لاحد الاصدقاء عن تعريف الوطن وردود الناس عليه , تذكرت عمر طاهر " الوطن هو المكان الذي تتوقف فيه محاولتك عن الهرب" تعريف عام وشامل لفكره الوطن بعيدا عن الحدود والجغرفيا والجنسيات

تتوقف عن الهرب من اي شيء وكل شيء فيصبح ذلك المكان ملك لك وان لم تملكه , سكن ومأوى وان لم يكن محسوس أو ملموس وان لم تسكنه !!!

وطن المؤمن قلبه وروحه المستأنسين بالله ومناجاته من صلاه وقران وذكر مهما كانت الحياه صعبه خارجه

وطن العالم معمله ينسى فيه كل الاحباطات والعوائق خارجه

وطن القاريء صفحات كتاب يعزله عن العالم يغرق في افكاره ثم يبحث عن الكتاب التالي والتالي والتالي بلا نهايه ولا شاطيء لرحاه الطويله

وطن المجتهد حيث يقدره العالم ويرفع مكانته

وطن الجندي ساحه قتاله حتى النصر او الشهاده

حتى الضائع قد يجد الوطن في كاس خمر او مخدرات تنسيه العالم وقسوته

وطن المحب عيون حبيبه

وطن الام مائده تجمع ابنائها بعد اشتياق

قد تتكون محاولات التوقف عن الهرب رجوعا للماضي عند مرضى الزهايمر مثلا

او تكون سفر في المستقبل في احلام اليقظه

هو فعلا حيث تتوقف محاولاتك عن الهرب

ماهو الوطن بالنسبه لك ؟ شوف الفيديو وقول لنا رأيك

 

 

كان عندي بلوج بقوا اتنين

البلوج دي من تلات اربع سنين , غضبت عليها وقفلتها شويتين ونسيت بيدخلوا لها ازاي حتى

 

من 8 شهور فاتوا قررت انساها واعمل واحده جديده بدل اللي ضاعت فدخلت عشان اعمل واحه جديده , اللطيف اني لقيتها فغيرت اسمها ومسحت بوستاتها القديمه وقلت اهي تسالي

اللطيف انها عجبت الناس وجالي ردود فعل كويسه جدا وبيقولوا عليها دمها خفيف

بس الناس كان عندها دايما مشكله انها تقيله , الكومنتس مش سهله الا للي عنده اكونت على جوجل او حتى كسل من الناس فصاحبتي العزيزه مروه قالتلي ما تعملي صفحه على فيسبوك

 

المهم قلت ان الصفحه مش حلوه , وبيني وبينكم البلوج شكل رسمي ومحترم وفيها احصائيات للقرايه والمشاركات وجو كده انا باحبه بس اكتشفت ان الكوميونتي على فيسبوك بتدي نفس الأوبشنات وسهله والناس تقدر تتعامل معاها بطريقه ظريفه ,قررت اعمل كوميونتي بنفس اسم البلوج انشر فيها بوستات البلوج وبرضه حاخلي البلوج مش حاقفلها

 

البوستات الجديده حتتنشر هنا , وكل فتره حاجيب حاجه من القديم او البوستات اللي عجبتكم على البلوج أو اي حاجه مناسبه للموقف وساعتها حاقولكم انها " من قديمه"

 

يا رب تعجبكم

البلوج والكوميونتي ملهاش خط ولا تيمه ثابته هيه اي وكل حاجه تيجي على بالي او افتكرها في حياتي اليوميه

كان في تسميات في البلوج " كانها ابواب في مجله" حنشوف لها حل في الكوميونتي

بس اللي فيكم كان بيعرف يتعامل مع البلوج بلاش يستسهل الكوميونتي انا مش عايزه اقفل البلوج , لو عجبتكم اعملوا لها شير وانفيتاشن مع اصحابكم ومعارفكم

 

صباحكم سكر وايامكم عسل

 

https://www.facebook.com/#!/562451227215431/photos/a.562476710546216.1073741828.562451227215431/562641640529723/?type=1&theater 

ابيض واسود

ما اعرفش ايه سر ان الصور الابيض واسود بتخطفني كده

ومفهوم ابيض واسود مش الصور القديمه بس ولكن الصور الحديثه المعموله بالابيض واسود برضه

يمكن السر انها لونين وبس يا ابيض يا اسود مفيش دوشه الالوان الكتيره اللي ممكن تخفي مشاعر واحاسيس الصوره بالرغم من اني باحب الالوان جدا بس احيانا فعلا الصور الابيض واسود بتكون معبره جدا

ويا سلام بقه لو المصور طلع فنان وعمل شويه editing   وزوم في حاجات وشويه زغلله في حاجات يااااه بتخطفني فعلا

بس دايما احلى حاجه في اي صوره هيه الضحكه الصافيه اللي من القلب واللي بتبان في العينين

مش همه بيقولوا اضحك الصوره تطلع حلوه ؟

ربنا يجعل كل صوركم وايامكم حلوه

https://www.facebook.com/#!/562451227215431/photos/a.562476710546216.1073741828.562451227215431/562501097210444/?type=1&theater

 

البوم صور

في يوم عيد ميلاد بابا افتكرنا موقف قديم قفام بابا دور على البوم صوره,  وصوره في صوره البوم في البوم فتحنا تلات اربع ساعات بنقلب في الصور

تشوف ناس ماتت وناس سافرت وناس نسيت , تشوف اطفال كبرت واصحاب اتفرقوا , تضحك من قلبك وتخبي دمعه من عينك

اكتشفت ان كل مناسبه , كل مصيف, كل موقف كان ليه البوم صور وانه عشان تتصور تاني لازم تحمض الفيلم اللي فات عشان كده كانت الصور بتطبع وتملا البومات

اما الالبومات كانت بتشغلها بزمبلك بمزيكا تعيشك في صورها , والله كانوا رايقين

الصور تتحط في الالبومات بوضعيات جميله وحواليها فريمات او وردات او اي حاجه برضه كان فيها فن مش بس صور تترص والسلام

كانوا بيعرفوا ينبسطوا مره وهمه بياخدوا الصور, مره وهمه بيرصوا الصور وبعدين وهمه بيتفرجوا على الصور

لقيت دلفه كامله من مكتبتنا مليانه صور

صور اصلا ممكن صحابها ما شافوهاش أو نسيوها

وتكتشف ملامح جديده من اللي حواليك , وتنسى اسامي ناس كانوا في بعض الصور

دلوقتي الصور فولدرز جوه فولدرز على الهارد اللي لو ضرب او اتمسح بالغلط راحت الصور

يعني بدوسه زر تمسح ذكريات وايام زيها زي حاجات كتير دلوقتي في حياتنا

بنتصور كتير قوي , موبايلتنا مليانا كاميرات وصور بس ذكرياتنا ذاكرتها قصيره قوي بتروح بدوسه زر بالغلط او بالقصد لو عزت تفضي مساحه من الهارد !!!!

ولو حبينا يعني نحافظ على الصور نعملها في اونلاين البوم على فيسبوك ده يبقى قمه الحفاظ على الذكريات اللي بقت اليكترونيه مش ملموسه ومحسوسه وملهاش برضه لا طعم ولا لون ولا ريحه

تصدقوا ان اخر البوم طبعته كان يوم صور الدفعه , مع اني عندي 70 جيجا صور عالهارد!!!!

المضحك في الموضوع اني قمت عامله البوم لأحلى صور ليه وانا صغيره بس برضه اونلاين فيسبوك البوم , مش بقولكم ...... مفيش فايده !!!!

https://www.facebook.com/#!/562451227215431/photos/a.562476710546216.1073741828.562451227215431/562476627212891/?type=1&theater



المريله الكحلي

هيه ما كنتش مريله بس كانت جيب بليسيه تحت الركبه بسيكا وكرافات كحلي وقميص لبني ده كان اليونيفورم في ثانوي السن اللي الكنج كان بيغنيله المريله الكحلي  وديل حصان يطير مع الهوا , وكرافاته مربوطه صح جدا مش بمياصه البنات في الوقت ده وشميز تحت القميص عشان ما يكونش شفاف مش زي باقي البنات

افتكرتها وانا بادور عربيتي النهارده ولقيت الكنج بيغنيها

وافتكرت معاها الخطوه السريعه للمدرسه الساعه سبعه الا ربع عشان الحق الاذاعه المدرسيه اصلي طول عمري كنت ماسكاها انما في ثانوي كنت الريسه اه والله الريسه !!!

وافتكرت معاها الاحلام البريئه بالثاويه العامه والمجموع ايام ما كان واحد زائد واحد بيساوي اتنين

تذاكر تنجح, تدح تجيب مجموع وتفضل في فصل المتفوقين وتدخل الكليه اللي انت عايزها

لسه ما كنش في حسابات ال  presentation skills, communication skills and other skills

لسه كان الحلم اللي ممكن تحلم بيه يتحقق ويفرح اهلك ويخليهم فخورين بيك

كانت المشاكل بسييييطه  امتحان ولا شيت وبس كده , حتى في الجامعه برضه ما كنتش فيه مشاكل اكتر من ان نظري العملي بعد عشر دقايق في مدرج 16 اللي في اخر الجامعه وانك عايز تلحق توصل وتلحق مكان في اول صف !!! ولا ان اليوم  طويل بعد السكشن وباص الجامعه فاتك فمضطر تركب المترو عشان تروح من حلوان الساعه 7 بالليل ونضطر نروح حلوان عشان نرجع في المترو وهو راجع عشان نعرف نقعد مع بعض ونفضل نضحك ونكركر على احداث اليوم

كانت الضحكه لسه صافيه وطالعه من القلب , ومكنش الواحد شايل للدنيا اي هم

كانت الصحوبيه للصحوبيه مش للمصالح وكنا بنتمنظر بالبلاطي في المترو وكأن الواحد جاب نجمه من السما !!!

الواحد كان متخيل انه حيمسك النجوم بايده ويطول السما برقبته ويعمل كل اللي عايزه بمجهوده وان الدنيا لسه فيها عدل

كنت لسه باحضن كتبي بايدي واضمهم لقلبي (بعد كده عرفت انها  defensive mechanism لحمايه القلب والمشاعر !!! ) اصل جاهين ماكنش عارف كده لما كتبها !!

 تهت وسرحت السرحه دي كلها وما فوقتش غير والاغنيه بتخلص وتهت بعدها في زحمه القاهره وانا مروحه زي ناس كتير تاهو في الزحمه وما كنتش سامعه غير منير بالرغم من ان الراديو كان لسه على اذاعه الاغاني

 يا بنت يام المريلة كحلي
يا شمس هالله و طالله من الكولة
لو قلت عنك في الغزل قولة ؟
ممنوع عليا ولا مسموح لي

أنا أحب أقول الشعر في الحلوين
و الحلو أقول له يا حلو فى عيونه
و لو إبتديت بشفايفك النونو
ما يكفنيش فيهم سبع دواوين!

يا ملاك يا جنية يا ست الحسن
يعجبني توهانك في أحلامك
يعجبنى شد الخصر بحزامك
يعجبني أخدك للكتب بالحضن

راحوا الصبايا والصبايا جم
أجمل ما فيهم مين غير بنتي
و أجمل ما فيك يا بنتي إن إنت
في عينيك من نينتي حنان الأم
---------------------------------

لازم ندوش الدوشه بدوشه أدوش منها عشان ما تدوشناش

خدوا الحكمه من افواه المجانين !!!!

جمله عبقريه في احد افلام محمود ابو زيد يمكن الكيف او العار مش فاكره بس فعلا بتبعبر عن واقع الشارع المصري المنحوس

النهارده مثلا قرر جار جار جارنا (بعدنا بخمس ست عماير) انه يقلب جراجه لمعرض سيارات مع العلم ان حاليا الحي واقف بالمرصاد لكل اللي عمل كده في عمايرنا ورافع عليهم ( وعلينا ) قضايا

بس واضح ان جار جار جارنا ممشي حاله مش بس كده ده مطلع لسانه لكل جيرانه وقرر سيادته يعمل افتتاح ضخم يمكن بيوصل بيه رساله انه في السليم وكله تمام يا باشا

ما علينا نرجع لموضوعنا الساعه 7 ونص قبل المغرب صواريخ في السما وبدا التسخين وبعدين ورده ولولا الملامه قلت كويس شويه مزيكا كويسين واهي ساعه عصاري وبلاهه كورس الماركتنج اللي محتاسه في مذاكرته

شويه وقلب باغاني عجيبه الشكل والمنظر وبعدين ضرب نار وصواريخ تاني

اللطيف في الموضوع انه من شده الدوشه اجهزه الانذار بتاعه كل عربيات الحي اشتغلت وساهمت في الجراند اوبننج اللي حاصل وكانها جايه تنقط الرقاصه والطبال زينا زي اي فرح شعبي من اللي بنشوفهم في التلفزيون

بعد شويه جراند خناقه دبت في الشارع معرفش ازاي يا اما عيال جايه تتفرج وسخفوا على بعض يا امه الجراند اوبننج كان فيه الشيء لزوم الشئ (مخدرات والذي منه) وقاموا دبوا في بعض بتاع عشرين عيل وصوت وزعيق لاخر مدينه نصر

اللطيف في الموضوع ان كوكتيل الدوشه ده  جايلك من كل حته لدرجه انك ما تعرفش تميز اي حاجه غير شعور رهيب بالغثيان  من حالنا وصخب شوارعنا وعدم مراعاه اي جار ممكن يكون عيان او بيذاكر او عايز ينام او حتى من حقه يقعد بهدوء في بيته اخر النهار

بصراحه كان نفسي قوي النور يقطع عليهم وعلينا واهو عليه وعلى اعدائي بس للاسف النهارده بالذات النور ما قطعش !!!!

الوش ده كمان خلاني مش عارفه اعمل اي حاجه غير اني احاول اقرا , معرفتش, اتفرج عالتلفزيون مفيش فايده فقررت اكتب لكم عنها اهو ابقى استفدت منها شويه ما هو لازم ندوش الدوشه بدوشه ادوش منها عشان ما تدوشناش !!!

تصدقوا ان يدوب خلصت البوست النور اتقطع !!! يا ريتني افتكرت مليون جنيه , حانشره بكره والامر لله (ملحوظه الساعه 12 بالليل !!!! قررورا يخففوا الاحمال 12 بالليل بعد مال دي جي اقفل بخمس دقايق  مش باقولكم بيرسل رساله واضحه وصريحه انه كله متظبط وتمام يا باشا حتى الراجل ابو عشين جنيه طلع تبعه !!!! واستنى الحفله تخلص قبل ما ينزل السكينه , قطعوا بيها رقبتك يا بعيد !!!! )

تصبحوا على خير

هدووووووووووووووووء !!!!!

حلوه يا بلدي

مصر دي عامله زي بستان كبير مليان ورود على كل شكل ولون , طبق فروت سلاد في من كل فاكهه طعم ولون , أو حتى في احلك الظروف طبق سلاطه بلدي ملخبط او حتى طرشي !!!

احنا بلد culturally rich   قوي  يعني لو ماشي في وسط البلد حتلاقي مباني فشر اوروبا  في عزها بس برضه حتلاقي ورش وهدوم عالرصيف !!!  اطلع على مصر الجديده شرحه نفس الصوره تقريبا

خش على الازهر والحسين حتلاقي مباني من الاف السنين كلها حضاره وقوه وحتلاقي اغاني عبد الباسط حموده وبياعين الدره والتين الشوكي

حتلاقي في وسط ريحه التاريخ ريحه الرطوبه اللي طالعه من الحيطان واللي ممكن تنخر فيها لما تهدها !!!!

في شارع محمد على حتلاقي الالاتيه وبياعين بدل الرقص ولو ركزت شويه وبصيت وانت نازل من الكوبري حتلاقي العوالم ناشرين بدلهم على الاسطح وحتلاقي الناحيه التانيه بتوع السيرما اللي كانوا بيعملوا كسوه الكعبه , اااه والله زي ما بقولك كده !!!!

 

قدام الازهر والحسين حتلاقي بياعين التحف وجنبهم على طول ( وجنب الجوامع كمان) بياعين بدل الرقص والصاجات والرق والطبل !!!!

 في وسط نقوش الكنيسه المعلقه والمعبد اليهودي في مجمع الاديان حتلاقي نقوش كنت زمان مفكاراها فن اسلامي بس اتضح انها موجوده في فنون التلات ديانات (في مصر بس) واكتشفت من مرشد سياحي كان بيفسحني انها فن م ص ر ي لا اسلامي ولا يهودي ولا مسيحي  فن مصري وبس

 

بلدنا حتلاقي فيها اللي بيقدم في العزا كحك !!! اصل المرحومه ماتت ليله العيد وكانت كريمه فاهلها عايزين المعزيين يدعولها بالرحمه ( والله حصلت)

بلدنا هيه اللي ممكن جار يمنع ولاده من تشغيل التلفزيون ( وفي بعض الاماكن يحرمهم من اكلات معينه زي المحشي والملوخيه!!معرفش ليه ) لما جارهم يموت وتكتشف انهم قبل الوفاه كانوا متخانقين وبقالهم سنين ما بيتكلموش !!! اصل الاصول كده

 

في بلدنا حتلاقي المسيحي بيسمع عبد الباسط والمسلم بيولع شمعه لسانت تريز عشان ولاده ينجحوا

وحتلاقي واحد في مدخل مجمع الاديان  اسمه الحركي عم احمد وهو يهودي اساسا وبيلم تبرعات من الزوار اليهود للمعبد ويضربها في جيبه !!!

بلدنا دي كل حاجه وعكسها في نفس ذات الوقت بس هيه واحنا كده وحنفضل كده وده سر جمالها وجمالنا

حلوه يا بلدي

اسمعوا داليدا معايا بقه

 

 

النسا بين السجن والسجان

عن مسلسل سجن النسا بتكلم:

 بدايه من التتر وانغام العود والرق تعزف على اوتار القلب , لحن بديع بكل ما تحمله الكلمة من معاني ماشي قوي مع الاحداث اللي كلها دراما وشجن واحيانا صراعات وقليل قوي ابتسامات هو بالضبط كده زيه زي احداث المسلسل

شخصيات التمثيلية كلها اختلاف وتناقض زيها زي حياتنا واحيانا نفس الشخصية يبقى فيها كذا شخصيه:

-        بكيزه هانم اللي في اول لقطه ليها كانت مصدومة من دخول السجن وخايفه من حشراته واللي في اخر لقطه "الاغنيه المجمعه لكل تهم وعنابر السجن واقفه تسقف وتغني معاهم بالبلدي رقعت بالصوت بنت صلطح بابا على راي يوسف بك وهبي", واللي كانت متخصصه في الطلبات الغريبه : تواليت افرنجي, حضانه لابن غاليه, مشغل ومكن لغاليه ....

-        زوززه او عزيزه: تاجره المخدرات بنت البلد اللي بتشيل القضايا عن جوزها ( اللي بالمناسبه اتجوز عليها الصبيه بتاعتها) واللي شايله السجن كله وواقفه بميت راجل جنب السجينات واللي على النقيض انتقمت شر انتقام من صبيتها بعد ما اتجوزت جوزها

-        دريه المفتريه: تاجره الكوكايين الهانم اللي بتاكل سوشي في السجن واللي بتعلم السجينات الايروبكس في اخر مشهد ليها !!!

-        دلال: اللي لما دخلت في قضيه اداب ظلم واللي بعد ما حاولت تنتحر في الاول اتحولت بعد كده لصاحبه شبكه دعاره دوليه واللي في الاخر حتلاقيها داخله خارجه من السجن عادي جدا !!!

-        زينات اللي بتزوق البنات: البنت الفرفوشه النعنوشه اللي على النقيض شايله هم الدنيا واللي حيسرقوا كليتها وترازي في خلق الله عشان ترجع السجن عشان تتعالج واللي يوم ما ماتت السجن كله بكى عليها من اول المامور لحد السجينات

-        رضا: الغلبانه اللي ابوها نزلها مصر عشان تصرف على تعليم اخواتها الصبيان واللي اتعلمت لغوه مصر ولبس مصر واللي ولعت في صاحبه البيت عشان غلست عليها واللي برضه بكتنا من قلوبنا وهيه بتكلم شبح اللي قتلتها ويوم اعدامها روبي انت مفاجئه بصراحه

-        غاليه : السجانه اللي في لحظه اتحولت لمسجونه في الاول ظلم واللي بعد كده لما انتقمت رجعت السجن ونظرتها كلها انتصار واحساس برفع الراس لان القانون ما نصفهاش لم ا كانت مظلومه

-        حياه مريضه الوسواس القهري الل سممت ولادها وجوزها ونفسها عشان تخلص من العالم الظالم الملوث واللي لما ما ماتتش رفضت الكلام مع اي حد وكان غايه املها انهم يعدموها عشان تروحلهم هيه كمان

-        حتى الهنجريه (النشالين ) اللي لاول مره اعرف ان الستات عندهم هيه اللي بتشتغل وتصرف على الرجاله اللي بتربي العيال واللي في مشهد كوميدي جدا طلبوا مهر لبنتهم 300 الف جنيه عشان ده استثمار للعريس ابرك من فايده البنك لانها حتشيله هو وولاده ومش حتخليه ناقصه اي حاجه واللي لما خلفت العروسه ولد كان نهار مش فايت !!!

-        اللي قتلت جوزها لانه اعتدى على بنتها واخر حوار ليها مع بنتها قبل الاعدام اللي قالتلها اوعي في يوم اناس تعايرك بامك وقوليلهم كانت بتحافظ على شرفي واللي تعليمك هو اللي حيحميكي ويرفع راسك

-        السجانات اللي عندهم كل تناقضات الدنيا: تنفذ القانون , تمشي حالها مع تاجره المخدرات, اللي سامحت غاليه لما حاولت تقتلها, اللي عملوا السبوع لابن غاليه وبرضه عملوا له ميتم لما مات واللي في اخر لقطه بصت لقاتله بنتها نظره لوم وشفقه في نفس الوقت !!!!!

-        حتى مامور القسم اللي بيحضر افراحهم وجوازتهم واللي بيعمل صدقه على روح ابن واحده منهم واللي بيكسر القوانين احيانا تفهما للوضع الانساني

من احلى الحوارات:

-        مشهد عنبر الاعدام لما اتفتح بالليل عشان يدخلوا رضا لما السجينات فكروا الدور جه على حد فيهم وبداوا الصريخ وانهم مش بيناموا غير لما الفجر يطلع عشان عاده تنفيذ حكم الاعدام بيكون بالليل واللي لما جه الدور على رضا واحده اشتكت انها جت الاول وانها عايزه تموت لان وقوع البلا ولا انتظاره شيء مؤلم بجد وحوار رهييب

-        حوار زينات ورضا عن الدنيا اللي لطشت فيهم وان ربنا عايز يخلص منهم في الدنيا عشان يغفر لهم في الاخره

-        حواراااار رضا مع شبح القتيله وانها اكيد في الجنه وانهم مش حيتقابلوا لانها حتروح النار وانها بتستسمحها تسامحها عشان ربنا يدخلها الجنه وانها حتكون تحت رجلها لو ده حصل " انذار لاي ظالم والله المشهد ده"

-        غاليه وهيه بتقنع صابر بشغلها سجانه "السجن يا صابر مش سور عالي وباب مقفول عليك . السجن ممكن يكون في هِدمه مش عاوز تلبسها . ناس مش عاوز تشوفها . شُغلانة مش حاببها ، السجن كسرة وقهرة نفس " ..

كميه تفاصيل غايه في الانسانيه وان المسجون ده في وقت ممكن تتعاطف معاه وتخاف انك تكون مكانه لان كم الظلم والصدف اللي اتعرضوا ليها مخييييف جدا وان اي حد فينا ممكن يكون مكان اي حد فيهم لا سمح الله

 

رساله في رايي المتواضع ان السجن مش السجن العالي ابو سور وقضبان ولكن المجتمع الظالم اللي كلنا فيه

السجان ممكن يكون واحد استغل مشاعر واحده طيبه وقشطها وكان السبب في دخولها السجن (غاليه) , السجان ممكن يكون ابن عاق ساب امه اللي دخلت بداله السجن وهاجر بره البلد (دريه المفتريه) , السجان ممكن يكون ام اتخلت عن بنتها بعد غلطه اتظلمت فيها وكانت السبب انها اتحولت لمتمرسه في الاداب !! (دلال أو شمس الشموس في الاخر), السجان ممكن يكون المرض وقله اهتمام المجتمع بالستات دي فيبقى الحل انها تسيب السجن الكبير وترجع السجن الصغير عشان تتعالج (زينات ), السجان ممكن يكون اب رمى بنته تشتغل في البيوت عشان تصرف على اخواتها الصبيان وتعليمهم ويمشي عريس كانت عايزاه عشان محتاج مرتبها (رضا) , السجان زوج قاعد يسرح شعر البنات ومستني مراته تصرف عليه (الهنجريه) , السجان اهل جهله ما علجوش بنتهم المريضه نفسيا وضربوها عشان يصرفوا العفريت اللي لابسها!!!, السجان عقول وافكار مجتمع ظالم بينصب نفسه قاضي وجلاد في نفس الوقت وخلاهم كلهم يهربوا منه ويحبوا يرجعوا لسجنهم الصغير ابو سور وقضبان اللي كلهم همهم فيه واحد وشايلين فيه بعض وعايشين فيه مع بعض من غير لوم او معايره

السجن مش سور عالي وباب مقفول عليك . السجن ممكن يكون في هِدمه مش عاوز تلبسها . ناس مش عاوز تشوفها . شُغلانة مش حاببها ، السجن كسرة وقهرة نفس " ..