Follow by Email

الثلاثاء، 31 يناير 2017

خواطر صباحيه : رادار ايه بس يا جدع


الاخوه القائمين على مرور المحروسه قرروا يظبطوا السرعه على كوبري اكتوبر !!! اه والله زمبؤلك كده 
فااااال ايه السرعه على اكتوبر مراقبه بالرادار وقال ايه حد السرعه ٤٠ كم سيادتك لو الكوبري سالك عشان اركز ما اعديش ال ٤٠ حافضل باصه عالعداد فتقريبا حاخيش في الفواصل او حاخنق اللي ورايا فحيشتمني بالاهل او لو اللي ورايا غشيم حيطس فيه 


واذ فجاه تلاقي اللوح بقت ٦٠ واذ فجاه تختفي 
ما تركزوا يا جدعان مش طالبه بقه 


رادار ايه يا جدع احنا بنتشعبط فاي حته سالكه عشان نوصل قبل الزحمه وعجبي !!!

الأحد، 29 يناير 2017

معرض الكتاب ٢٠١٧

بعد زياره خاطفه انبارح لمعرض الكتاب 
برافو وزاره الثقافه والهئه العامه للمعارض 
- مكتبه الاسره كتب قيمه جدا جدا متوسط الكتاب ٥ جنيه انا اشتريت بتاع ١٠  كتب ب ٤١ جندي اه والله 

- المركز القومي للترجمه عنده روائع في كتب عليها خصم ٩٠℅ ومش سكه والله ، الطلبه اي كارنيه خصم ٥٠℅ العادي خصم ٣٠℅ ، قبلوا كارنيه الجامعه الامريكيه 

- الهيئه العامه للكتاب عندها خيمتين واحده متوسط الاسعار قبل الخصم ٢٠:٣٠ جنيه والتانيه كله من جنيه ل ٥ بالصلاه عالنبي !!!! 

دي كانت البدايه قبل اللقط ما تخلص ، البقيه تاتي 

لينا زياره ان شاء الله لدور الهلال ، المعارف، الاهرام، الاخبار، مكتبه مصر اللي برضو عندهم كتب كويسه جدا بس كنت تعبت 

لاول مره من ساعه الثوره يسمحوا بدخول العربيات ورتب واقفه بتنظم جوه وبره 

جروب عم امين السنه دي معاهم تابلت وارشادات واقيه جدا للاتجاهات 

ما جيتش جنب الشروق ولا السور عشان دي سكه اللي يروح ما يرجعش ، سايباهم للاخر عشان الفلسان بس 

دي حصيله انبارح وربنا يقدرنا على قرايتهم

يقال إن دار الاوبرا عامله مكتبه صوتيه ، ندور عليها لانها اكيد حتستحق الزياره 

التحفظ الوحيد مصلى السيدات اتكسر وفارشين حصر في الشارع ، عيب والله نبوظ الجمال ده بس شكلهم دخلوه عند الرجاله الله اعلم ، كان يجب الانتهاء من انشاءات الكوبري الجديد لان المعرض مع الكوبري عاملين قفله 

بس نستحمل بقه


الجمعة، 27 يناير 2017

عيد ميلاد سعيد يا بلوجي العزيز (٣)

زي دلوقتي من ثلاث سنوات بالظبط اعدت فتح البلوج القديم وزي ما حكيت قبل كده مسحت كل البوستات القديمه وبدأت من اول وجديد 

٢٠١٦ شهدت تغيير في الكيف وليس الكم 
ما زلت كسوله بالرغم من وجود لسته طوييييله بالمواضيع اللي عايزه اكتبها اوحتى كتبتها بس كسلانه انشرها ؟!!!

ما زلت باكتب حاجات بنفسي وما انشرهاش او حتى انشرها بدون اسم في صفحات تانيه كمساحه اكبر للحريه بدون حكم او تفسيرات غلط لسبب كتابتها 
امتى حتتنشر هنا الله اعلم 

لكن كيفا المحتوى السنه دي كان اكثر ثراء من حيث ريفيوهات بعض الكتب او الحفلات اللي حضرتها واللي كتبتها من واقع انطباعي او احساسي بالكتاب او العرض وليس بالطريقه المتبعه لكتابه الريفيو لانه مش مكانه ولا البلوج شخصي جدا لذلك كتبتها من وجهه نظر شخصيه بحته 

كان في كمان البوستات القصيييره المسماه خواطر صباحيه عن اي حاجه قابلتها في يومي قبل ٨ الصبح واللي بجد باحبهم جدا 

كما كتبت ٦٠ بوست او بمعنى اصح نششششرت ٦٠ بوست بس هنا اتمنى في يوم انشر الكل واللي يحصل يحصل !!!

بلوج الفيسبوك مازال الاقوى من بلوجر والأسهل والاظرف الا اني مازلت بانشر في الاتنين 

مازال عندنا قراء من جنت كتير ما اعرفش حد فيها من العالم كله ازاي ما اعرفش 

ما زال عدد القراء بالمجهود الشخصي وليس بإعلانات وده بالنسبه لي كفايه جدااا

سنه سعيده علينا يا بلوجي العزيز ويارب السنه دي من احسن لاحسن وتفضلي متنفسي ومساحتي الشخصيه جدا 

كل سنه واحنا طيبين وبالشاي بالنعناع متكيفين 



الجمعة، 20 يناير 2017

من انت


في يوم من ذات الايام في طريقي الصبح باقلب فالراديو طلعتلي سعاد حسني وهيه بتغني يا واد يا تقيل 
الاغنيه من النوع المبهج بشده ولانها كتير بتتذاع الصبح المره دي سرحت في زوزو والفيلم وبدايته وهيه بتسال حسين فهمي من انت 
ودي خدتني بره الاغنيه هو كل واحد فينا عندو كام شخصيه وليه 
انا شخصيا عندي مش اقل من سبع تمان شخصيات 
في البيت ستوته البيتوتيه الكنباويه لاقصى درجه وقمه طموحي اوضه مرتبه ريحتها حلوه وكوبايه شاي رايقه وكتاب او فيلم لطيف واندفس تحت البطانيه في الشتا 

على النقيض بقه لو في خروجه اضرب الجينز والكوتشي وأبرم بالخمستاشر ساعه من غير تعب او ملل

في الشغل قطر وباحب ارتب يومي وشغلي وباكره المفاجات 

في حين اني باموت في العادي في اي مفاجاه حتى لو شمعدان احمر او كتاكيتو

مع اللي ما بعرفنيش ممكن يخاف او يكش مني واحيانا ممكن يعتبروني انطوائيه او قليطه 

اما مع صحابي محطه رغي ودعم ومسانده

ممكن اقلب الدنيا في السوبرماركت لو حد خد دوري في الطابور في حين أن في الشارع ممكن كل الناس تعديني واستنى حد لسه ما نزلش من بينهم عشان يعدي قبل ما اخرج بعربيتي 

لا اطيق الزحام ولا الصخب بس لو حته مزيكا حلوه ممكن جدا اقفل شبابيك عربيتي واشغل الكاسيت على اعلى حاجه واغني معاه ولا يهمني 

على قد ما مكتبي منظم جدا على قد ما دواليب هدومي فوق بعضها 
تقدروا تقولوا عليه فعلا كل حاجه وعكسها واحيانا كتير باكون غير متوقعه ممكن جدا اضحك وادمع واصرخ في نفس ذات اللحظه 

واوصل شغلي وتخلص يا واد يا تقيل ولسه سؤال سعاد لحسين مالوش اجابه " من انت"
بس بشويه تركيز اكتشف اني كل دول مضروبين في الخلاط لاني ببساطه مجرد انسان !!!


الاثنين، 16 يناير 2017

عزيزتي بوفو ريجيولاريس سامحينا يا غاليه



واحنا بتتفرج على عشماوي لقينني بافسر لامي نظريه الشنق وانه بيكسر النخاع الشوكي طبعا ماما تخيلت المعرفه الفظيعه دي باعتبار اني دكتوره قد الدنيا 
الست ما تعرفش اني في يوم من الايام كنت انا عشماوي للغلبانه بوفون ريجيولاريس 
مين بوفون ريجيولاريس؟ 
دي الضفدعه صديقه الطلبه من اعدادي صيدله 
اول حاجه شيلنا البالطو الابيض واتعايقنا بيه في المترو عشان عندنا سكشن 
ودخلنا السكشن وكل واحد استلم طبق تشريح وبعدين المعيد قال اخبطوها على ضهرها عشان تخدروها 
وفي اللي رزعها على دماغه فالغلبانه نزفت بصراحه الصبيان كانوا مفتريين قوي
يا اما بابره في عده التشريح تقطموا الحبل الشوكي بتاعنا تمام زي عشماوي وهنا تسمع طرقعه تحت ابره التشريح حاجه كده ساديه وقاسيه جدا ، انا شخصيا كنت باخدرها بسبرتوا اسهل وأقل الما ليه وليها بس لو كانت متغذيه كويس ممكن ترفس بعد شويه في طبق التشريح وتحس كده أن الموضوع قلب فيلم رعب !!!!


وبعدين قال دبسوها في الطبق  ويا عيني صعبت علينا وعضمها بيقرقش تحت الدبابيس 
وكل اسبوع نشرح جهاز فيها وفي اللي ربنا رزقه بfemale مبطرخه وما عرفش يشوف اي حاجه 
وفي اللي امعاىها ما اتربطتش كويس ففرقعت في الطبق 
وفي اللي ياما شمع طبق التشريح فصل فالميه ما غطتهاش واحتاس 
ولا لما دخلنا عالبيات الشتوي وكان وصولك الضفدعه شيء نادر الوجود !!! ايامها ابويا راح بجردل الحديقه الدوليه وخلى عمال النظافه يلموا له ضفادع الجنينه كلها وخزنتهم في الطين عندي في المخزن وكنا بنسقيهك وناكلهم عشان كل كام يوم اشرحلي واحده 
فاكره مره ماما قال ايه حبت تتفرج على بنتها الدكتوره وشويه وسابتني وقامت رجعت !!! هو صحيح ايه القرف اللي كنا بنعمله ده !!!
ولا لما تركي المترو وما تلاقيش مكان فتقف وتلاقي حد يعزم عليك يشيلك شنطك بتنبهم أن الكيس فيه ضفادع فيسيبلك العربيه وينزل !!! الناس تشيل اكل ولعب ونحط في شنطها مكياج واحنا حاطين ضفادع !!! ايه ده صحيح !!!
يااااه ده احنا بهدلناها  وبهدلتنا في اعدادي 


وروحي يا ايام وتعالي يا ايام وترجعلنا تاني في الفارما والستركنين لما كان يخشبها ولا لما قالوا لنا اعملوا decapitation دي اقسى حاجه اتعملت في الكليه كلها وهي باختصار دبح الضفدعه بس عمري لا عملتها ولا بصيت وهيه بتتعمل وكنت بازوغ من المعيدين عشان ما اعملش التجارب دي


ثم سكاشن الbioassay ولما رسمنا رسم للعضلات ومنها كانت عضلات الضفدعه ( عدينا في السكه على امعاء الارانب وخنازير غينيا عالماشي) 

طبعا كلكم قرفانين من البوست ده بس كل اللي عدى على طلبتنا الجميله حيقراه ويضحك ويفتكر ايام بجد جميله 
عزيزتي بوفو سامحيني بجد كان غصب عنا !!!  

الخميس، 12 يناير 2017

المذيع والمذيعه


 كل واحد كان عنده برنامج لوحده اكتر من رائع 
 قوم ايه بقه الاذاعه الطماعه قررت تعمل merge بينهم وتضربهم في الخلاط ويعمل برنامج برم طراخ جامد اخر حاجه 
 النتيجه فشل ذريع 
 وكل واحد بيحاول فرض سيطرته والتهكم على التاني عالهواء 
 الحقيقه البنت اكتر من مهذبه وبتتعامل بتطنيش وتضحك وتعدي بس وقت اللزوم بتلسعه 
 اما هو فتلطيش وتريقه قال ايه بيروش 
 تصدقوا انا اول ما يجوا باقلبهم بس اختيارات الاغاني مازال لطيف 
 مش كل اتنين لوحدهم كويسين مع بعض حيبقوا كويسين 
 في شغل، في صحوبيه او حتى في جواز 
 تاملات اتش اريه عالصبح 
 ومحدش يسال برنامج ايه سايباها لذكاؤكم انتوا لو قلبتوا الراديو الصبح حتعرفوا لوحدكم 
 صباحكم سكر 
 #خواطر_صباحيه_قعده_شاي_بالنعناع#

الأربعاء، 11 يناير 2017

اجججري


اجري خلص اكشنات الشهر عشان الديدلاين
اجري الحق روح عشان الدايت لا يسمح باكل بعد ٨ مساء 
اجري الحق اتغدى في الكانتين لا يطلع لك خازوق ما تكلش لحد المرواح 
اجري الحق اقرا الكتاب بتاع شلتك عشان ده حقك على نفسك 
اجري الحق تمرين عشان ده حق جسمك عليك 
اجري الحق تروح عشان تنام عشان في شغل بكره 
الحق صلي بسرعه عشان في ميتنج 
حتى درس المزيكا عاملي تايمر لازم امشي عليه مع كل نغمه لدرجه اني فجاه فصلت فقالي قومي روحي يقطع المترونوم على بيت سنينه السودا
الحق الحق الحق الحق 
سباق مع نفسك ومع الزمن ومع الدنيا 
الموتور ده حينطفي امتى 
محتاجين نرتاح شويه 
محتاجين حاجات كتير ، لا هيه حاجات صغيره بس محدش فاهم 
عارفين محتاجين ايه ؟ محتاجين كل واحد يخليه في حاله مش حال غيره 
رجاء بس رجاء ارحمونا وسيبونا في حالنا كل واحد متنيل واخد نصيبه هو وبس ومش واخد منك اي حاجه 
وانت it is perfect to be imperfect ارحم نفسك وما تقساش عليها 
ربنا ولا تحملنا ما لا طاقه لنا به 
#خواطر_قعده_شاي_بالنعناع#

الجمعة، 6 يناير 2017

مذكرات الولد الشقي لمحمود السعدني



كتاب من الطف ما يكون حاجه كده شبه المسلسلات المنفصله المتصله 
يروي نوادره في سن الطفوله وبدايات الشباب وحياته بالطول والعرض والمقالب وحكايات شلل البوظان 


مقالب في عساكر الانجليز والقهوجيه وبياعين الاكشاك 
وقرب النهايه ذكر اول كام ليله في التخشيبه واول كام قصه حب فاشله واول مقال كتبه وكانها مقدمات النضوج


وانتهى الكتاب بشهرته وعمله وسفره وكيف اقام في بلاد اوربيه وافخم الفنادق وكذا ارصفه وحدائق وشوارع القاهره 

وكيف هو إحساسه بالوحشه خارج مصر ورغبته ترك كل ذلك وشراء ارض وغيط وبيت في بلدهم وعمل مقبره له وسط الاحياء لخوفه من الحياه وسط الاموات بعد الموت 
في اعتقادي هي اشاره عظيمه لحبه لتراب الارض وكذا حب الحياه 


كتاب اقل وصف له أنه جرعه مركزه من البهجه والسعاده وسط الحياه الصعبه وياما فرج عليه الناس وانا باكركر من الضحك وانا باقراه 


اقروه حيبسطكم وعد 

الأحد، 1 يناير 2017

قرات لكم : من اوراق السادات


بقلم انيس منصور على لسان السادات 
الكتاب اكثر من ممتع بالرغم من بدايته الممله نوعا ما 
والتي تعكس ملله من مراوغات الروس وصبره الطويل عليهم من ايام جمال عبد الناصر وحتى ١٩٧٢ 

رجل بسيط لم يخجل من أصوله البسيطه ولا دخوله الجيش بواسطه رجل انجليزي 

الاصول الريفيه تجلت في صوره وتشبيهاته وحتى الامثال الشعبيه التي اوردها 

رجل امن بنفسه وبتفردها بشده بالرغم من العقبات التي كان من الممكن أن تهدمه مرات ومرات 

قاريء واعي ومثقف ، تعلم عده لغات واستغل سجنه لاكتشاف نفسه وتثقيفها إلى أبعد درجه ذو ذاكره حديديه وصلت لوصف ملابس محاوره وتفاصيل الحوار في كثير من المواضع 

داهيه وسياسي محنك ويعرف كيف يصل لما يريد 

ايقاع الكتاب يتحول ١٨٠ درجه عند حديثه عن حرب اكتوبر بشكل مذهل وحماسي الى اقصى درجه 

ثم تتهادى الاحداث بعد ذلك وكأنه كان بيستعد للاعتزال 
شخص متسامح مع نفسه ومع من ظلموه شخصيا لاقصى درجه ووصف عده مواقف تنازل فيها واكرم من اهانوه في الماضي طالما كان الثار شخصيا الا فيما يتعلق بالوطن فلا تسامح ابدا 

لم يتطرق لاي مواضيع شخصيه ولا تصفيه اي حسابات ، السرد موضوعي بشده ومحايد لدرجه كبيره 

الكتاب طويل نوعا ما ٥٠٤ صفحه من الحجم الكبير والفونت الصغير 
الا انه ممتع وبشده