Follow by Email

الخميس، 31 يوليو، 2014

اول يوم في الجنه

بما ان ربنا انعم علينا برمضان وبعده العيد وان شاء الله نكون من المقبولين وعتقاؤه من النار
تخيلوا كده اول يوم أو حتى اسبوع ( يعني لو الموضوع خد معاكوا قوي في الخيال) بعد ما ندخل الجنه
حتعملوا فيه اي؟
 
ابدا بنفسي:
حانتخ في جنينه القصر بتاعي واشرب كوبايه لبن بالعسل من الانهار بتاعتي ويمكن اطلب نهر شكولاته اشرب منه على طول وانا بقرا في كتاب ظريف تحت شجره مانجا وانا قاعده في الشمس  بشعري من غير ايشارب وحسيب الهوا يطير شعري زي زمان , ويمكن انزل ابلبط فيه !!!
 
حاحجز تذكره على بساط الريح اللي حيلف بيه في كل اماكن الجنه والمكان اللي حيعجبني حانزل الفلف فيه شويه أو حتى حالفها بسكوتر او باتيناج
 
في الجنه يا باشا حناكل كل اللي عايزينه من غير ما نتخن !!! حنلبس كل اللي احنا عايزينه في اي وقت وفي كل وقت
حاعمل ديش بارتي لصحابي وحنقعد نرقص ونغني للصبح
 
في الجنه حاشوف كل حبايبي اللي ماتوا ووحشوني , حاقعد على رجل جدي واغني والعب معاه , في الجنه حارجع كل الايام الجميله صوت وصوره وحاعيشها مليون مره
 
في الجنه مالا عين رات ولا اذن سمعت ولا خطر على قلب بشر
هااااه انتوا حتعملوا ايه؟
 

الأربعاء، 30 يوليو، 2014

ما تيجو نعيل كل فتره؟

اول يوم العيد لقيت الدنيا ملل وارهاق ولان من طبع المصريين الاصيل في العيد اللعب بالبمب اللي السنه دي  مش بمب ده قنابل صوتها مرعب جدا فمفيش نوم

كنت مقريفه جدا والقعده ملل فقررت اكسر الملل,  معرفش ايه اللي فكرني بالاتاري وشرايطها فطلعناها والغريب انها اشتغلت !!! لا تتخيلوا السعاده اللي كنا فيها , وبنت اختي المجرمه في الاول استغربت الشيئ الغريب اللي طلع بس بعد شويه اندمجت معانا ولعبنا واتنططنا كاننا رجعنا ورا 20 سنه !!!
شويه وكبرت في دماغي فطلعت المنوبولي وبدانا نلعب بيها, في الاول كنت مش في المود ناسيه القواعد بتاعتهابس شويه واللعب سخن والبيوت والفنادق اتبنت والخم والغش اشتغل واللعب سخن كميه ضحك وبهجه لا تتخيلوها
 
افتكرت زمان لما كنا انا وولاد عمامي نلعبها والدور يستمر بالخمس ست ساعات وقد  ايه كنا بنلعبها لما النهار يطلع 
لا تتخيلوا السعاده اللي الواحد كان فيها , شويه وحطينا الصور على الفيسبوك وعملنا لهم تاج في اللي رد واللي لسه ما شفهوهاش
بس بجد اليوم اتغير والمود اتظبط جدا
السر في العوده للطفوله ولا اللعب طلع كل الطاقه السلبيه ولا الاتنين معرفش بس اكتشفت ان الواحد لازم كل فتره يعيل شويه عشان الروح ما تعجزش تلعب بلي بقه, صلح, تروح تتلهي في الملاهي .... اي حاجه تعمل بهجه
 
جربوا تعملوا اي حاجه من بتوع زمان انشالله تلعبوا   صلح!!!! حتفرق قوي في يومكم  

الاثنين، 28 يوليو، 2014

طفوله


كان معزوم عندنا عيلتين باطفالهم الاعمار : 2, 3, 6 سنين

ولان بيتنا مفيهوش اطفال فمعندناش لعب , بس اكتشفت ان دي مش مشكله خااالص لان ببساطه كل واحده اخدت الموبيل او التابلت بتاع مامتها وبداوا يلعبوا بيه

قارنت بينا في طفولتنا وبينهم اكتشفت اننا كجيل كنا اسعد بكتير يعني في لمه زي دي كنا بنعمل تمثيليات واحداث ونكملها الزياره اللي بعدها , او حتى لو بنات كنا بنالف طبخه ونعملها , ولو ولاد يالفوا حرب ويعملوها ده في السن الصغير

بعد شويه ظهرت الgames  والاتاري اللي برضه كان فيها لعب جماعيه ومشاركه واللطيف اننا في الزياره دي قعدنا نفتكر الاتاري وشرايطها وكمبيوتر صخر وال جوي ستيكيس بتاعتهم , وبعد كده لما عملوا الكاسيت ابو شرايط للجيمس عشان تنتشر اكتر


احنا الجيل اللي باربي ظهرت فيه بكل الاوبشنات بتاعتها ولبسها وبيتها وصاحبها وعيالها وكله كله
وإحنا الجيل اللي اللعب في المدرسه : الاولى والمنديل عند البنات وكهربا وتلج وميه !!! , ومن غير كلام وحتى البلي اللي كنا بنلعب بيها , وكتالوجات بم بم وسانتوب والصور اللي كنا بنبدلها مع بعض وانشطه المدارس

واحنا الجيل بتاع المنوبولي وبنك الحظ والليدو والسلم والتعباان
والله احنا كنا جيل محظوظ ومبتكر زي ما لعب ألعاب الجيل القديم كان عندنا الكمبيوتر والجيمس والاتاري برضه
نرجع تاني للتلات بنات
بعد شويه التلات بنات اتخانقوا على الموبايلات فقررت الامهات تشيل الادوات دي من المشهد فالغريب انهم هديوا , اكتشفت ان الحاجات دي بتشيطنهم فعلا !!!
شويه وجبنا لهم بلالين اشكال والوان الطويله والصغيره والمدوره والوان كتيييير جدا فالمشهد إتغير تمماما وفجاه ضحكات وبهجه غير عاديه واكتر بكتير من بتاعه الموبيل والتابلت
فاكتشت ان الطفل هو الطفل وان البهجه في الحاجات البسيطه قد تكون احلى واكبر من الاجهزه الحديثه وان احنا اللي بنعقد حياتنا وحياتهم بالتكنولوجيا الاوفر
البساطه والطفوله هيه الحل " شعار المرحله" !!!! 

الأحد، 27 يوليو، 2014

رمضانيات : انت جيت يا رمضان؟ انت مشيت يا رمضان


انت جيت يا رمضان؟

انت مشيت يا رمضان؟

كاننا كنا انبارح مستنيين الرؤيه وبنقول لبعض كل سنه واحنا طيبين

خدتنا في دوكه وجيت ومشيت كالعاده من غير ما نحس بيك

ضيف خفيف لذيذ مليان بركه ورحمه ولانه جميل قوي جه ومشي من غير ما يتقل علينا

احساس غريب وانت بتصلي اخر تراويح واخر تهجد واخر سحور واخر يوم صيام

مكانك في التراويح, وجيرانك في الصلاه وطقوسك اليوميه كلها من بكره حتتغير تاني

وتاخدنا الدنيا تاني في دوامتها لحد رمضان اللي بعده

يا ترى لسه في في العمر بقيه لرمضان تاني ؟ ولا في صحه ولا في فراغ ؟

العلم عند الله

 يا بركه رمضان خليكي في الدار

يا بركه رمضان املي بيتنا عمار

خليكي في الدار

خليكي في الدار

الاغنيه دي كل ما باسمعها قلبي بيوجعني

 كل سنه وانتم طيبين وبالف صحه وعافيه

 

الأربعاء، 23 يوليو، 2014

رمضانيات : تلاتين فول

مامتي انبارح بعد الفطار لقيناها فجاه بتقول : " بصوا بقه انا مش حاتسحر فول النهارده " بمنتهى الحرقه والزهق
اصله بصراحه ضيف ثقيل مليل وما بيزهقش ولا يتكسفش من على سفره سحور المصريين
مهما شيكتوه وغيرتوه , هو هو طبق الفول بالزيت , بالزبده, بالبيض, بالطحينه , أو حتى كباب أو بالسلطه مفيش فايده هو بغباوته وشكله العفش
احنا شعب لطيف قوي مهما كانت الاصناف على سفره السحور : جبن, بطاطس, بيض باشكاله, سلطات, لحوم, او حتى زبادي وفاكهه لازم تلاقي صحن الفول المعتبر موجود سنتر بيس كده على السفره !!!
ده حتى اوقات من الزهق ممكن ماما تقول انا مش حاتسحر عشان اتكسفت من طبق الفول اللي اوقات بيكون هو هو كل يوم نشيله ونحطه زي ما هو وبالرغم من كده ما نستجراش نشيله من على السفره ولا كانه واخد علينا وصولات امانه بيهددنا بيها !!!
انا شخصيا ما بمدش ايدي في طبق الفول غير اول تلا اربع ايام لحد ما اخد على الصيام وبعد كده الجبنه هيه الملكه في السحور بتاعي
ده رمضان مش تلاتين يوم , ده تلاتين فول !!!  


الاثنين، 21 يوليو، 2014

رمضانيات : تيجي نفطر في الحرم؟


الفطار في الحرم بقه ايه ملهوش مثيل

مبدأيا قبل المغرب بعشر دقايق تلقي رولات مشمع بتترمي بحرفيه شديده تجيب الصف من اوله لاخره وبعدين يبدواوا يحطوا الاكل على المشمع

في المدينه تلاقي البلح والزبادي واللبن وفطاير بالعجوه ووفطير بالشمر وقهوه عربي

وفي مكه مش مسموح غير بالتمر والقهوه

وتلاقي الاكل جايلك من كل حته والناس تتحايل عليك تاخد منهم اي حاجه حد لاقي ثواب افطار صائم في الحرم

عاده بيكونوا اهل البلد مش عمار زينا زوار

و بعد الاذان ما ين الناس تاكل وفي 5 دقايق المشمع يتلم باللي عليه والدنيا تبقى فله ونقوم نصلي المغرب

احلى واخف واظرف اكل ممكن تاكله في الدنيا

بره الملك بيكون بيوزع وجبات ساخنه ولحمه ورز وجو كده 
تيجي نفطر في الحرم ؟ بس جوه مش بره , بلاش طفاسه

 يارب

 

الأحد، 20 يوليو، 2014

رمضانيات : عشره مرق وعشره خلق وعشره حلق !!!


كانت جدتي دايما تقول اصل رمضان ده تلات عشرات : عشره مرق وعشره خلق وعشره حلق !!! دي ال version  المصري من رمضان اوله رحمه واوسطه مغفره واخره عتق من النار

اصلنا كشعب اصيل في جذور الاكل والطفاسه كل حاجه عندنا مرتبطه بالاكل

للي ما فهمش المقصود بالمثل:

عشره مرق يعني المطبخ والعزايم والاكل الكتير كالعاده

وعشره خلق: ينزلوا يجيبوا لبس العيد لعيالهم في العشره الاواسط

وعشره حلق: مقصود بيها الكحك والبسكوت والغريبه عشان بيكون شكلها مدور زي الحلقات

وده تلاقيه وتعرفه من الجامع : اول اسبوع الدنيا زحمه موت والناس الغربال الجديد له شده وكله بيصلي ويدعي, ديتها اول جمعه تيجي والناس تنشغل في العزايم وهبه الجامع يفضى في العشره الاواسط

يمكن يرجع يزحم تاني في العشره الاواخر بس احنا اصلنا شعب نيشانجي من ايام الامتحانات تلاقي الجامع موووت في الليالي الفرديه ويفضي في الزوجيه ليه اصلهم بيعملوا الكحك !!! ويجوا الليله اللي بعدها بعلب الكحك بتاع انبارح !!!

والله احنا شعب مفرفش ولذيذ جدا !!!

واول ما ليله 27 تخلص يفضى الجامع تاني طب عرفتوا منين ما يمكن ليله القدر تطلع 29 ؟ ونسيتوا ان اخر ليله من رمضان ربنا بيعتق فيها من النار قد اللي عتقه طول الشهر ؟ اجمدوا امال ده العد التنازلي شغال


من موقعي هذا باعلن ليكم عن label    جديد في البلوج عن الامثال كل فتره كده حاجيبلكم مثل من بتوع تيته ومناسبته وقصته حبه فرفشه بقه

الثلاثاء، 15 يوليو، 2014

بمناسبه نتيجه الثانويه العامه : نتيجه الثانويه العامه


"اشوفك مفضوحه على صفحات الجرايد " كانت دايما دعوه خالتي ليه ايام ثانوي لما نتيجه الاوائل تطلع

معرفش ليه ايامنا اوائل الثانويه العامه كان فعلا بيتعمل لهم مولد وزفه وجرايد وبرامج ولا ستار اكادمي الايام دي , وكان الواحد بيبص لهم نظره اعجاب وتقدير واجلال معرفش ليه !!!

وبرضه معرفش ليه الثانويه العامه ايامنا كان ليها هيبه كده قبل سبوبه الجامعات الخاصه ما تساوي الروس ببعض دلوقتي

انا من جيل الدفعه المزدوجه اللي في الابتدائيه كان في 6 , و5 ابتدائي , كنا 2 مليون في الثانويه العامه وده كان ضغط زياده في حد ذاته لان المقاعد في الجامعه هيه هيه بس الطلب متضاعف

بعد الامتحانات ما خلصت ولحد ظهور النتيجه القلق والتوتر والترقب من كل الناس , العيله نفسها كنا حوالي 7 في الثانويه العامه والمقارنه والانتظار موجوده من كل الناس

ليله النتيجه كانت ليله سودا وحاولنا نجيبها كنترول من قبلها ما عرفناش

انا فاكره زوجه عمي تتصل بماما وتسالها لسه عايشه ولا فطستي ويضحكوا ويعيطوا سوا في نفس ذات الوقت , وحد جه زارنا وقعد يحكي عن نفسه وجارهم اللي كانوا في الثانويه العامه وازاي ان الشاطر ما جبش مجموع والخايبان جاب مجموع !!! بشروا ولا تنفروا يا عم الحج !!!

نزلت اتمشيت لحد الحديقه الدوليه ورجعت وبرضه مفيش فايده التوتر هو هو , دخلت انام قال ايه عشان بكره يجي بسرعه اني انام , مفيش نوم خااااالص !!!

مامتي طلع النهار سنترت قدام المدرسه بس بابايا لما لقاني نمت شويه سابني يمكن لعشره الصبح ولبست بلوزه بيضاء وجيبه احمر في ابيض في اسود انا فاكره الطقم ده كويس  وانجت بابايا ورحنا المدرسه مشي (كان دراعه مكسور ايامها !!!)

وقفنا استنينا يفتحوا الباب مفيش المهم بابا كان في مجلس الاباء فاستغل نفوذه ودخل المدرسه من باب الاداره

طلعوالي النتيجه قبل المستوى الرفيع وكانت 89.5 (ايامنا كان رقم على فكره) وانا اللي جه عليه بالعياط لاني كنت حاسبه لنفسي 92.5

اصريت اخد الاستماره بس قالولي ساعه وتعالي بابا حب يضيع الوقت ويكسر التوتر قالي تعالي نشرب حاجه طلعنا بره لقينا عربيه تين شوكي فقلتله طب ناكل تين وانا باعيط الراجل بتاع العربيه قالي معلش يا بنتي السنه الجايه تنجحي !!! زعقت فيه وانا باضحك واعيط في نفس الوقت قلتله انا نجحت بس المجموع مش عاجبني

لفينا ورجعنا خدنا الاستماره لقيت فيها 3% مستوى رفيع تخيلوا وجبت المجموع اللي كنت حاسباه !!! ربنا اصله كريم قوي اصلي العربي والفيزياء اتظلمت فيهم فبالظبط اللي نقصته فيهم جولي مستوى رفيع اللي مكنتش مذاكراه تخيلوا !!!

رجعنا البيت بدات فكره طب ولا صيدله ولا هندسه , طول عمري كان نفسي في صيدله بس المجموع زغلل عينيه وعين مامتي وكنت المرحله الاولى في المرحله الاولى

بس ربنا حسمها وفرق الطب معايا على نص نمره الحمد لله

الفكره ان الثانويه العامه ليه ليها الرهبه دي , قول يا شغل ويا كاريير مش يا كليه , ياما اطباء صيع على القهاوي وياما خريجين كليات عاديه نجحوا في حياتهم العمليه او لقيوا نفسهم في مشروع او هوايه اتحولت لبزنس بعد كده

انا ضد مسميات كليات القمه وكليات القاع !!! احنا اللي بدعنا وبنبدع الفاظ رنانه لحاجات عاديه جدا

كمان الثانويه العامه زيها زي اي موقف او شده بتعدي بيها بتوريك مين فعلا قلقان عليك ومين جاي يبشر في وشك ومين جاي يلخبطك (في اختيار الكليه) ومين فعلا قلبه على مصلحتك ودول كلهم عرفتهم من زمااان قوي !!!! حتى في الهدايا بعد كده مين فعلا فرحان ليك ومين بيقضي واجب والسلام

وتفضل اغنيه عبد الحليم حافظ يوم نتيجه الثانويه العامه " وحياه قلبي وافراحه" ليها مذاق خاص عندي كل سنه

انا لسه بعيط لما باسمعها !!!

انتوا بقه ايه ذكرياتكم في اليوم ده؟


 

الاثنين، 14 يوليو، 2014

رمضانيات :بوحي وطمطم والصبر في الملاحات

  حاخدكم وارجع لورا لما كان عندي حاجه بتاعه 6 أو سبع سنين
كنا في الصيف في رمضان وكنا بنفطر عند جدو سيد الله يرحمه . وبعدين وقت الفطار العبد الفقير كان عايز يشوف بوجي وطمطم لانها كانت ببتعرض في وقت الفطار
قام جدوا خلاهم ينقلوا الاكل في الأوضه جوه عند التلفزيون وفتحنا التلفزيون
خالي بقه كان بيسمع وقتها الصبر في الملاحات في الاذاعه فشغل الراديو فحصل تداخل في الصوت والتلفزيون شوش على الراديو, فخالي وطى التلفزيون فزعلت وقلتله علي التلفزيون فشخط فيه
قام جدي زعقله وقاله اطفي الراديو وعلي التلفزيون اعملها اللي هيه عايزاه فخالي إتقمص وساب الفطر عشان يسمع الحلقه في الأوضه التانيه وبعدين يكمل فطار لما الحلقه تخلص
فانا ايه بقه بزهوه المنتصروبمنتهى المعيله قلتله : جدو حبيبي عملي اللي انا عايزاه !!! غلسه قوي مش كده ؟
الله يرحمه كان بيحبنا قوي
معرفش ليه عمري ما نسيت الحدوته دي وكل ما افتكرها أو اشوف بوجي وطمطم اضحك واقراله الفاتحه
اقروهاله انتوا كمان
 

الأحد، 13 يوليو، 2014

رمضانيات : في مصلى السيدات (3 ) : مريم وتسنيم


زهرات الجامع او البنات الصغيره اللي بتاعه 10 سنين بالكتير اللي يا دوب بدات تنتظم في الصلاه ومش بس كده كمان جايه تصلي القيام بصراحه بيبهروني ما شاء الله

جت صلاتها جنبي في يوم , بنوته انا لاول وهله اديتها 6 سنين لاقيتها واقفه تصلي وتركز , ولابسه عبايه وطرحه بيضاء وواضح ان العبايه بتاعه السنه اللي فاتت لانها قصرت عليها سيكا فايه وقت الركوع بتدوس بطرف رجلها عليها عشان تداري رجلها , حركه واضح انها بتقلد فيه حد كبير

لاول وهله تخيلت انها جايه لوحدها لحد ما صاحبه مامتها شافتها وسالتها ماما فين يا مريم ؟ وشويه وسالتها هو انتي ليه مش جنب ماما فردت وقالتلها كل واحد يصلي في المكان اللي هو عاوزه انا بارتاح هنا بمنتهى الثقه في نفسها

سالتها في الاستراحه اسمك ايه قالتلي مريم عندك كام سنه قالتلي في رابعه ابتدائي شويه وقامت تجيب مصحف وقعدت تقرا فيه

اللطيف انها لما قامت طلبت مني احجز لها المكان واللي جنبها عملت نفس الشئ فلم  مريم جت قلتلها احجزي لللي جنبك عشان عايزه اصلي السنه فلما جت صاحبه المكان ردت مريم اصل المكان محجوز فضحكت البنت وقالتلها ماهو انا صاحبه المكان

كل يوم باشوفها برضه بتصلي لوحدها ما شاء الله شخصيه !!!

تسنيم بقه بنوته صوماليه بتاعه 7 سنين بتصلي بخشوع وتركيز ما شاء الله عليها مش زي ناس كتير حركتها كتير من غير لازمه

بعد العشاء باسالها اسمك ايه قالتلي تسنيم باسالها بتعرفي عربي قالتلي " قليلا" فبقولها عارفه يعني ايه تسنيم ما عرفتش فقلتلها ابتسمت ابتسامه تجنن ما شاء الله

اللذيذ بقه انها كل يوم بتيجي باسدال شكل وكمان تشيكه بورده أو بدبوس , انتوكه قوي وابتسامتها بديعه

همه دول زهرات الجامع مش العيال الزنانه الرغايه اللي جايه تلعب وتلك وهمه دول الامل في بكره ربنا يبارك لامهاتهم فيهم قولوا ماشاء الله لاحسن نحسدهم 

الجمعة، 11 يوليو، 2014

رمضانيات : في مصلى السيدات (2)


المره اللي فاتت بحبحت معاكم عن شويه حاجات غايظاني في مصلى السيدات

بس ان جيتوا للحق في شويه حاجات برضه ما تلاقوهاش غير عندنا في مصلى السيدات ما هو احنا كده الاكستريم على طول!!!

يعني  مثلا دله القهوه العربي السخنه المظبوطه قوي مش حتلاقوها غير عندنا , او حتى ترمس شاي تمام بين الصلوات وبالذات في العشره الاواخر عشان الناس تصحصح وتدعي لصاحبه الشاي او القهوه

يمكن الرجاله بيلموا تبرعات لتحديث الجامع بس مثلا عمرهم ما لموا 250 الف جنيه في ليله واحده ومعاهم شويه خواتم واساور وخاتم الماظ !!! اه والله زي ما بقولكم كده حصلت في مسجد بلال ايام التوسعات بتاعته في ليله 23 رمضان

كمان فكره انهم يسحروا المصلين ليله 27 ما تطلعش غير من عندنا عشان الناس تركز في الصلاه وما يحملوش هم الاكل والرجوع للبيت عشان السحور

ولا البنات الصغنانين اللي بيلفوا بين الصفوف بميه زمزم يسقوا كل مشتاق

وكمان حطين على ظهرهم احاديث وايات خلق الزحمه عشان الناس تستحمل بعض بالذات في العشره الاواخر

مش حتلاقي حد ماشي بالمسك يعطر مواضع السجود للناس حواليه غير عندنا

ولا حتلاقي حد بيلف بين الصفوف ببلح وبونبون عشان الناس تصحصح وتتقوى على الصلاه

مراه البواب مش حتشوفها لابسه احسن جلابيه عندها وحاطه بارفان وروج مش حيكون غير في مصلى السيدات عشان هيه هنا زيها زي اي ست تانيه جايه الجامع وعايز تاخذ زينتها عند المسجد

اللي حيلم فلوس عشان كيس العيد حتكون ست في مصلى الستات وتيجي يوم العيد باكياس مليانه بونبون ولعب وشكولاته للاطفال

وكمان يمكن يزوقوا الجامع بالبلالين من باب فرحه العيد

التفاصيل الصغيره دي مش حتلاقيها غير في مصلى السيدات

وكمان تسنيم ومريم مش حتلاقيهم غير في مصلى السيدات , مين تسنيم ومريم؟ حاحكيلكوا عنهم البوست الجاي

 

الثلاثاء، 8 يوليو، 2014

رمضانيات : في مصلي السيدات (1)

للاشخاص الغريبه اللي زي حالاتي بتحصلهم صدمه من كتير من تصرفات الستات في اماكن تجمعهم : الافراح (كتبتلكم عنها قبل كده), عربيه السيئات قصدي السيدات  في المترو واخيرا مصلى السيدات بالذات في رمضان خصوصا لو سيادتك رايحه لوحدك فتبقي في حاله ذهول من كتير من تصرفاتهم
عندك مثلا اللي تقعد تتفرج على التلفزيون بعد الفطار وتنزل تتكعبل عشان التراويح فتدخل الجامع وتحشر نفسها في اي صف أو ممر مش مهم بقه تزنق الصف ولا تضايق الناس
ولا اللي تيجي مع صاحبتها وهاتك يا رغي بين الركعات فأي وكل حاجه مناسبه او غير مناسبه لبيت ربنا
أما بقه اللي جايه تخطب لابنها أه والله سامعه واحده منهم مقابله بنت كانت تعرفها واول ما شافتها قالتلها " ايه ده هو انت اتخطبتي " وهيه زعلانه قوي !! " طب بوصي بقه عايزاكي تشوفي لي واحده من صاحباتك تكون حلوه كده وبيضا وطويله " تقولوش بتنقي تلاجه !!!
أو اللي بتتمنظر بجهاز ابنها اللي حيتجوز على العيد وازاي مطلعه عين نسايبها في طلباتها
ده كده ايه بين الصلوات , نيجي بقه على وقت الصلاه:
خد عندك اللي عايشه دور القائد الهمام المسئول عن تنظيم الصفوف وان الكعب على الخط يا ستات طب واللي رجله بتوجعه من حز السجاده يعمل ايه يا طنط
ولا اللي تنسى تقفل الموبايل وتسمع نانسي عجرم في اغنيه " يا بنات يا بنات يا بنات " طول الصلاه , أو نغمه المسلسل التركي للي حضرتها بتحبه . مش تقفله بقه بعد مالإمام يخلص لاه تسيبه شغال اصل الوزاره بتتشكل يا جماعه وهيه مستنيه مكالمه مهمه !!!
في بقه اللاته في الدعاء , ما اعترضناش بس مش لازم الجامع كله يسمع بتدعي بايه خليها سر بينك وبين ربنا وبعدين ادعي ازاي انا وانت مشوشه عليه في السجود ؟! ده انا لسه انبارح سامعه الدعاء بتاع واحده قدامي بصفين !!!!
وفي اللي obsessed  بفكره سد الفرج في الصفوف وتقعد تلزق رجلها في رجلك وكتفها في كتفك  وتبعدي رجلك تجري وراكي لحد ما تسيبي لها الصف بحاله !!! , حضرتك الكلام ده عند الرجاله مش عندنا , مش مطلوب مني كبنت افتح رجلي بزاويه 150  درجه عشان اسد الفرج في الصف على فكره .
اما بقه على العشره الاواخر وبالذات في الاجزاء الاخيره اللي كتير حافظها فايه بقه تلاقيهم بيسمعوا مع الامام , اه والله وبصوت عالي فتغلوش عليكي وتطلعك من خشوعك
غير بقه اللي جايبه معاه تلات اربع عيال ويقلب الجامع حضانه والناس ما تعرفش تصلي , قلنا ميت مره قعادك في بيتك بالشياطين بتوعك ابرك ليكي ولينا وثوابه اكبر . واللي ينقط ان في مكان مخصص للي معاها اطفال ومع ذالك لازمن وحتما ولا بد يجيو القاعه بتاعتنا !!! مش بس كده لازم الاطفال دي تتعلم انه خذوا زينتكم عند كل مسجد وانه ما ينفعش يجوا الجامع بالبجامه
وان الشحط ابنك اللي عدى 7 سنين ما ينفعش تعتبريه نغه وتجيبيه مصلى الستات !!
في كمان على العشره الاواخر يطلع الكحك والبتيفور ويتحول الجامع للجنه تذوق وكحك مين احلى من مين والطريقه ازاي ويبقى ناقص يفتحوا تيلفون وبث مباشر لتلقي اتصال المشاهدين !!!
مره كمان كنت بصلي في مسجد مشهور لقارئ مشهور وتقريبا فطرت بلح وشربه عشان الحق مكان في الجامع , وادخل الجامع الاقيهم عاملين ديش بارتي وحلل الكبسه وصواني الرقاق وروايح ايه ما اقلكوش , طب حتصلوا ازاي بس بعد المهزله اللي عملتوها دي !!!
الفكره ايه ان الجامع ده بيت ربنا ليه قدسيته وخصوصيته ولازم كمان احترم مساحه اللي حواليه وما اضيقهموش عشان ما اشيلش ذنوب والحواديت بتاعه خالتي اللتاته دي مكانها في النادي او في بيوتكم مش في الجامع
الشئ الملحوظ ان مستوى الحي الاجتماعي ما بفرقش , جنسيه الستات ما بتفرقش في حاجات شبه كده بس طبعا اهدى شويه في الحرم شخصيا بس هما المتطوعات هناك بيعملوا كنترول انما لو سابوهم حيبقى نفس الوضع
اكتر ناس بحبهم وبدور عليهم واقعد جنبه همه الماليزيات فعلا رايحين يصلوا ويتعبدوا وصوتهم واطي ومحترمين جدا
للإنصاف في حاجات كويسه في مصلى السيدات , دي بقه موضوع البوست الجاي