الأربعاء، 29 يناير 2014

في معرض الكتاب: زياره الكتب لمعرض البني ادمين !!!!


اللي يلف في معرض الكتاب ويتفرج على وشوش الناس يحس انه في عينه عشوائيه ممثله للحياه (زي ما بتوع الإحصاء بيقولوا):


يعني حتلاقي اللي بيدور على اللي هو عايزه ويلف ويحفى لحد ما يلاقيه وما يحسش لا بالتعب ولا بالوقت ولو ملاقاش اللي هو عايزه يفضل برضو يدور عليه لحد ما يلاقيه . دول بقه اللي في الحياه عارفين همه عايزين ايه وما بيستسلموش
 

وحتلاقي اللي بيرضى باللي يلاقيه ويعتبره أحسن من مفيش . اللي يلاقيه ده بمعنى إعتبارات السعر بقه أو الطبعه أو حتى كتاب تاني للكاتب وخلاص بقه اللي الدنيا تجود بيه , النوع اللي راضي بالمقسوم ودول كتير قوي
 
النوع الثالث بقه النوع اللي أاساسا مش عارف عايز ايه وبيلف ويدور وما يعرفش يختار يقلب يمين وشمال , ويوزن الكتاب بسعره او حتى عدد صفحاته وغالبا بيروح زي ما راح زي ما جه ودول السواد الاعظم زي ما المثقفين بيقولوا  

 في كمان النوع اللي ظايط في الظيطه تلاقيه حوالين الكافتريا وبياكل فشار ويحلي بشاورما !!! وعاملها فسحه او حتى ساحب الموزه وعامل فيها الشاب المثقف وده غالبا كل معرض مع واحده (أو واحده شكل) !!!

في كمان الستات بتوع كتب الطبيخ اللي غالبا حيجيبوا كل الكتب اللي في الدنيا وتروح برضه تعمل لاولادها فاصوليا ورز زي كده اللي تقعد طول النهار تشوف فتافيت وبرضه تعمل فاصوليا ورز بطريقه جده جدتها !!!

حتلاقي كمان بتوع كتب السحر والجن والتعاويذ وعذاب القبر , بس يا عم الحج ما احنا عايشين عذاب القبر صوت وصوره كل يوم ناقصه كمان نقراها !!!!

وفي الأب الغلبان اللي إيده مش طايله وواخد ولاده يعلمهم قيمه العلم والقرايه واللي بيحاول يوازن بين لقمه العيش وغذاء العقل , سامعه واحد منهم النهارده بيقول لابنه : حبيبي إنت صرفت كتير النهارده وهو زعلان انه مش قادر يجيب له اللي هو عايزه

غالبا الولد ده حيكبر وهو عارف قيمه الكتاب كويس ويا رب يطلع بعد كده من النوع الأولاني وظروفه ما تحكمش عليه يكون نمره 2 .غالبا ده حيحوش طول السنه عشان لما يجي المعرض يجيب كل اللي هو عايزه وبرضه حيجيب ولاده معاه ويعلمهم ان العقل كمان محتاج يتغذى مش بس ياكل شاورما
https://www.facebook.com/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431#!/562451227215431/photos/a.562476710546216.1073741828.562451227215431/655752951218591/?type=1&theater
 

 

 

الثلاثاء، 28 يناير 2014

بحب السيما !!!!


معرفش امتى قصه الحب دي بدات ولا حتى امتى اكتشفتها !!!

حب من نوع خاص

دماغ ومزاج من نوع خاص

مهما كانت الدنيا مزعلاني ولا حتى مصاحباني

 ادخل السينما واطلع بمزاج تاني

والغريب اني من حبي فيها

 بحب استفرد بيها

مبوصلش للمود ده وانا مع اي حد بس وانا لوحدي

البس واشيك كاني رايحه معاد مع صاحبي

واروح اختار كرسيه لوحدي

 واتفرج على الفيلم برضه لوحدي

ويا سلام بقه لو كمان كنت في السينما لوحدي

 

لا بجد والله ما بهزر

مفيش حاجه في الدنيا تساوي دماغ فيلم حلو , طب يا ترى ايه السر ؟

هل لان اوقات بتتوحد مع البطل او البطله ؟ طب أحيانا لا يمكن تكون متوحد معاه لا في مكانه ولا في زمانه

امال ايه اللي بيحصل؟

الموسيقى اللي في فيلم السينما ما بتسمعهاش ولا تحسها غير جوه الفيلم

خطوات البطل أو البطله على لحن او ريتم ما بتتعيشهاش غير جوه الفيلم

 اصل في حياتنا مفيش ريتم

طب حتى الصدف ما بتعيشهاش غير جوه الفيلم

حتى القصه أو المشكله ما ببتحلش غير جوه الفيلم

طب هو حتى قصص الحب ما بتكملش غير جوه الفيلم

الخير ما بينتصرش بسرعه غير جوه الفيلم

في ساعتين زمن تسيب زمانك ومكانك وتروح عالم تاني

بمود تاني

بشكل تاني

عارفين امتى بازعل ؟

لما النور ينور والفيلم يخلص والتتر ينزل وارجع تاني للعالم الأولاني L   

 

الاثنين، 27 يناير 2014

في النادي

مشهد نهار خارجي في احد انديه القاهره المشمسه
الاسره المصريه تنحصر في احد المشاهد التاليه
الست قاعده ماسكه الموبيل وبترغي مع بنت خالتها في اي كلام والعيال قاعده تلعب
مشهد اتنين الراجل قاعد بيلغ زي المفجوع وهيه تعلوا وجهها منظر " ايه البغل اللي انا اتجوزته ده؟؟؟ "
مشهد تلاته : هيه بتجر الكلام من حنكه وهو ضارب وشه في الجرنان ومقالش كلمه
مشهد اربعه : قاعده تذاكر للعيال وهو خلع مع صحابه
مشهد خمسه : سرب مراته وقاعد يرغي في الموبيل
الا ما في اتنين بيتكلموا مع بعض
الحمد لله علي الكتاب وعصير الفراوله والتامل!!! داهيه تصد نفسكم كلكم


ابدايت : المفجوع ومراته قاموا وسابوا بقايا فطيره السكر علي الترابيزه بس الغربان قامت بمهمه ال line clearance!!!
ابو جرنان ومراته قاموا ورزع الكرسي حته رزعه وهو قايم وهيه لسان حالها بيقول يلعن ابو الخروج علي اللي عايز يخرج مع اشكالك!!!


بعد ربع ساعه:
الراجل لسه رازع ابنه حته قلم خنفه يخربيت القسوه وتلاقي السبب هايف
عقدتوا اجيال الله يخرب بيوتكم


بعد شويه:
بنتين لسه واصلين وايه ماسكين ودان بعض ما اقولكوش
95 في الميه في راجل في الموضوع!!!


بعد شويتين :
راجل ومراته وصاحبتها قاعدبن سوا
بس عينه منزلتش من عليها ودالق مراته حته دلقه ماقولكوش!!!

وهيه محتاسه بتاكل العيال !!! جتك خيبه

شويه ولقيت  جدو وتيته بقه عصفورين كناريا قاعدين
والله لسه في امل!!!!


وهنا قررت امشي وانا شايفه حاجه ايجابيه لحسن الاوضاع تتنيل اكتر من كده

 

الشتاء


هو في احلى من الشتاء؟
هو في احلى من ريحه البرتقال في ايدك بعد ما تقشرها؟
طب في احلي من يوستفندايه تولع فيها شمعه تملى الاوضه بريحه زيتها؟
طب هو في احلى من ريحه القهوه الصبح؟
ولا الشكولاته السخنه بالليل وانت متغطي وبتقرا كتاب حلو؟
طب في احلي ولا ادفا من مطبخ امي يوم الجمعه؟
طب في احلي من وقفتنا وراء الشباك في المطره ورسومات بخار الميه علي القزاز؟
طب في احلي من ريحه المطر؟ والشجر المغسول بعد المطر؟
طب في احلي من لسعه البرد الصبح بدري؟
ولا الشمس في النادي يوم الجمعه ؟

طب في الذ ولا ادفا من البطاطا السخنه ولا البليله في ليله برد ؟

طب في اشيك من اللبس الشتوي؟
 هو بجد في حاجه احلي من الشتاء؟

https://www.facebook.com/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431#!/562451227215431/photos/a.562476710546216.1073741828.562451227215431/642073005919919/?type=1&theater

قصاقيص !!!


هيه فعلا قصاقيص ملهاش اتجاه ولا خط ثابت حاكتب في اي وكل حاجه

زمان كان اللي بيجي على بالي باكتبه : في كراسه , في كتاب, في ورقه في اي حاجه تيجي في ايدي

لا كان لسه نت ولا بلوج

وارمي القصقوصه من دول وراء كتبي في مكتبتي

مره كنت باقلب في مكتبتي لقيتهم وقريتهم وافتكرت وضحكت ودمعت اصل كل قصقوصه كان ليها حكايه كان ليها ذكرى او حتى امل في بكره

وبعدين سالتهم هو انتم مفروض تفضلوا كده مرميمن وسط الكتب ؟ مدفوسين حتى مني

لا لازم تتهووا وتشوفوا النور والناس كمان تشوفكم

عشان كده عملت البلوج دي

اتمنى لو عجبكم البلوج بتاعي تتكلموا معايا وتحكوا معايا وتعرفوها لصحابكم ولو معجبتكوش اهي قصاقيص !!! طيروها عصافير من شباككم برضه تشوف النور
يمكن بالعربي يمكن بالفصحى وساعات حتقلب انجليزي !!!