الأربعاء، 30 أبريل 2014

جواز الصالونات


سيناريو 1: يرن التيلفون عاده بين سبعه وتسعه(معرفش ليه) شويه وتلاقيهم يندهوا بسعاده غامره كده (برضه معرفش ليه) وتعرف ان طنط من الطناطيت جايبه احد معارفها المحترمين كعريس واحيانا ما بتكونش تعرفه !!! اه والله ما بتكونش تعرفه تلاقي واحده من معارفها تعرف واحده من معارفه وفي قعده نميمه في النادي ولا شات روم على النت جابوا في سير الناس ومنهم سيادتك وسيادته قوم ايه قررورا يوفقوا راسين في الحلال!!!

سيناريو 2: حد من زمايلك الولاد حب يخدمك ويفك عقدتك (اصله يا عيني مفكر مفيش في دماغك غير العقده دي !!! فقرر يساعدك ويكسب فيكي ثواب ) فيقولك عايزك في الميتنج روم وتبقي متوقعه مصيبه في الشغل تلاقيه يدي مقدمات ازاي انتم صحاب واخوات (وعاده هو بيبقى مكسوف اكتر منك !!! )وبعديين يقعد يحكي لك عن حد من صحابه وازاي هو لقطه اللقط وماجابتوش ولاده ويقعد لحد المعاد اللي تحدديه ياكل دماغك انت واللي خلفوكي عن صاحبه او قريبه السوبر دوبر ويرفع سقف توقعاتك لحد ما دماغك تلبس في السقف

سيناريو 3: واحده من صحباتك المنفسنين تقولك ايه اصل انا (او حد من قريابها او اخواتها لو كانت متجوزه) اتقدملي (او اتقدم لها)معرفش مين بس انا مش حبااه او اصلي مرتبطشه ومش قايله لاهلي وقلت ايه اكسب فيكي ثواب (قصدي انت اولى الملافظ سعد يا مرزوق) وكيت وكيت وكيت ولكلكلكلكلك

المهم في التلات سيناريوهات يبدا عرض لسته المواصفات الفظيعه من شقه ووظيفه وعربيه  والطول والوزن !!!!  والذي منه واهله واخواته ومين في عيلتهم شغال فين ومين الباشا الفلاني اللي عدى جنب شقتهم من سبعه الاف سنه وهكذا (كل ده ما يدخلش دماغي ببصله اصلها مش بيعه وشروه دي حياه وشراكه ومستقبل مش مين حيدفع كام مقابل ايه !!!!) وما هواش job offer والله ده مستقبلك لاخر العمر

 وبعد ما سيادتك تحددي المعاد (من باب الاخذ بالاسباب مش اكتر لانك مش مقتنعه بالطريقه العجيبه دي) تلبسي وتتشيكي اهي فرجه ببلاش !!! والسيد الوالد يضرب البدله التمام والست الوالده تديها الذهب والمجوهرات وتنزلي في مكان المقابله ( ما بحبش ادخل حد بيتنا يتفرج عليه) ويا سلام بقه لو الواسطه ققرت فجاه يبقى عندها ذوق وتنسحب (قال يعني اصل دي خصوصيات !!! ) فتبقي فعلا رايحه ( blind date) على اصوله مش عارفه شكل المحروس ايه (مش بقولكم ايام سودا)

وفجاه تخبط دماغك في السقف !!! وتزهقي بعد خمس دقايق من ال interview العظيم اصله يا عيني ما بيبقاش لاقي حاجه يقولها فتلاقيه كانه رايح مقابله وظيفه يقعد يحكي تاريخ حياته وشغله مش واخد باله انه مش جاي يشتغل ده جاي يتجوز!!! ده لو جاي لوحده اما بقه لو جايب الست والدته ولا اخواته ولا الاتنين دي بقه اللي بتبقى فرجه ومنظره وفشخره كدابه من الطرفين !!!!

المهم عاده بيبقى فيه اشاره لاهلك انه مش مبلوع عشان يقوموا بقه وكفايه وش, فهمه يقرروا يدوكي فرصه !!! ويقعدوا شويه وانت مش طايقه ويا سلام بقه لو قرروا يتفرجوا على النادي ويسوبوكي معاه لوحدك (دي بقه بتبقى نيله النيله !!! )

في بقه اللي يقعد يسبلك ويقولك دي عنيكي ولا عدسات ( لا مؤاخذه اتنيل انت تعرفني منين عشان تسبلي !!!) , وفي اللي يسالك عن الطبيخ وبتعرفي تعملي ايه (فتستحضري نور الدمرداش في صغيره على الحب) , وفي اللي يسالك لما نتجوز عايزه كام عيل (هو سيادتك دخلت بيتنا اشاساسا عشان تتكلم في الامور دي!!!!! ايه الفصلان ده ؟؟؟ ) وفي اللي من رحم ربي يسالك عن شغلك او سفرك او كليتك او يحاول يوجد مساحه مشتركه قدر الامكان او اي موضوع عام اهه مبلوع شويه, وفي اللي بيتكلم في السياسه ويقول كل حاجه وعكسها فتكتشفي انه ضايع وفي وفي وفي اشكال والوان يا ما ورد على الواحد المهم حبقى اعملكم حلقه مخصوص عنهم تغلب عايزه بلوج اتجوز !!!! المهم تخلص القعده و تروحوا ويا دار ما خلك شر

في بقى اللي يتصل تاني او تالت يوم , وفي اللي ما يتصلش (رضينا باهم والهم مش راضي بينا !!!) وفي اللي يتصل يعتذر (ودول باححترمهم جدا لانه احترم وقتك وعلى الاقل قرر يحترم لقاء محتمل بالغلط والدنيا اللي صغيره )

وعادي يا جماعه زي ما هو ممكن ما يعجبكيش وارد جدا انك ما تعجبيهوش nothing personal ) )!!!

المصيبه لو قرر سيادته يشوفك تاني يا اختييييييي دي بقه اللي بتبقى غرزه خصوصا لو ما بلعتيش حضرته فبتبقى مش عارفه تتصرفي ازاي ويا سلام بقه لو اهلك ققرورا يجي البيت , يا لالهول !!! وسيادته يضرب التورته المتينه , والصيني والكريستال يطلع من النيش (النيش ده لوحده قصه لا تنتهي!!!) والفضيه والي واللي واللي

ونقعد نتمنظر على بعض بالعيله وعيله العيله واي كلام مش اتنين يمكن يكونوا محتاجين يعرفوا بعض اكتر!!! ده المفروض انه لو الموضوع كمل حيشوف سيادتك بعبلك وانت لسه صاحيه من النوم , وحيشوفك في المطبخ والبصله في ايدك , وحيشوفك وانت قامطه القمطه لو الست بتنضف عندكم ووووووووو وانت كمان حتشوفيه وهو بيشخر وهو نايم , وهو دقنه طويله وهو ناكش شعره يبقى ما ينفعش نمثل على بعض
المهم على احسن تقدير القعده الاولانيه لن تزيد عل ساعه وقولوا التانيه ساعتين يعني مطلوب من سيادتك لو سيادته حن عليكي ورضي بيكي تقرري حياتك ومستقبلك بناء على تلات ساعات تمثيل وتلاقي الباشا بيتصل قال ايه عايز يحدد قرايه فاتحه !!! ما تختم القران كله بعيد عني انا مال اهلي !!!!

ولما تقولي لاه (لو ما عجبكيش : لحد دلوقتي ما صادفتش الي اقول عليه ااه) يقعدوا ينكدوا عليكي (مش بالضروره اهلك ممكن واسطه الخير ) وعلى اللي خلفوكي وعندك كام سنه وجالك كام عريس وانك معندكيش رفاهيه الاختيار والهري ده , ولو حد من قرايبك للي جايبه العيله كلها تعرف وتتصيتي !!!

الفكره في يتصل او ما يتصلش الفكره انه ازاي في القرن الواحد والعشرين لسه في حد متخيل ان البنت اللي اشتغلت واتعلمت





وسافرت وشافت رجاله اشكال والوان لسه ممكن تتجوز بالطريقه دي ده كل عيلتي اعمام وخيلان وخالات ما اتجوزوش كده وكان في سابق معرفه او استلطاف قبل العريس ما يشرف يبقى عايزيني دلوقتي اروح كافيتريا او نادي ادور على واحد قاعد في كافتريا ولابس بدله معرفش لونها ايه وحاطط كتاب ولا ورده ولا اي علامه مميزه اشوفه واتجوزه واعيش عمري معاه بدون سابق معرفه !!!! طب ازاي ؟؟؟ لا وكمان المطلوب لو جنابه عايز يقعدني في البيت اقعد, ولو عايز يسافر اسافر هو انا اعرفك منين عشان اعمل كل ده ؟؟



ده حتى بنظريه الاحتمالات : اعجبه وما يعجبنيش, يعجني وما اعجبوش, ما نعجبش بعض من الاساس , نعجب بعض احنا الاتنين, نعجب بعض واهالينا ما يعجبوش بعض, ...... او كل ده يحصل وبرضه ما يبقاش في نصيب او او او !!!!! يعني بنسبه صغيره بنتكلم في 20 -30% على احسن تقدير !!!! وبعد كده نقول نسبه الطلاق معرفش كام في الميه ولا الخيانه ولا الفتور ولا ولا ولا

انا مش معترضه على اللي مقتنعين بالطريقه دي همه احرار بس همه كمان ما يعترضوش على قراري او عدم اقتناعي ويا سيدي ويا ستي كل واحد حر وربنا محلي له دماغه اللي مريحاه فيطلع من دماغي اللي برضه عجباني و مريحاني وساعه ما النصيب يجي محدش عارف حيكون ازاي (تبقى نكته لو كان صالونات) مش حاعترض عليه لانه ساعه القدر يعمى البصر !!!!

هناك 9 تعليقات:

  1. متفقه معاكى فى حاجات كتير برغم إن تجربتى مش شخصية أنا إتجوزت عن حب , لكن أختى بقى كانت رحلة عذاب بعيد عنك وشوفنا بلاوى كتير وفى بلاوى أنا حوشتها عنها ولحد النهارده هى ماتعرفهاش :)
    المهم يعنى الطريقه دى مش دايما وحشة ساعات بتبقى فرصة لأن الناس المحترمة تعرف بعضها من حيث الأصل والأخلاق وكده لكن فى الأخر القبول النفسى ده حاجة بتاعت ربنا ممكن يكون الطرفين يبانوا بيرفكت لكن مايطيقوش بعض عااااااادى حقهم :)
    لكن فى رأيى نسب الطلاق إللى زادت والفتور والخيانة والحاجات دى كلها لها أسباب كتير من إللى قولتيها وبس فى مثلا الأختيار الخاطئ من البداية وإختلاف الأولويات عند الزوجين , معظم الشباب دلوقتى وخصوصا الرجالة عندهم فكرة مشوهة تماما عن الجواز , أما البنات بقى فحدث ولا حرج فى منهم بردوا بيبقوا ضاربين دماغ مهلبيه على الأخر ....... الفيصل فى الموضوع إن الطرفين لازم يحددوا اولوياتهم قبل الدخول فى أى إرتباط سواء بقى صالونات أو غيره علشان مانرجعش نعيط فى الاخر
    Rasha Azzam

    ردحذف
  2. بصى الموضوع ده عايز مجلدات يا لومى ومعاااكى قوى حسيت بيكى قوى ولمستنى سقف التوقعات كل واحدة او واحد يتحفنا بعريس يحسسك ان انتونيو بانديرس مستنى بس انا عن نفسى كنت مقتنعة ان ممكن يجى منهم حاجة بس الولاد اللى مش عارفة مالهم دلوقتى باشوف صصحاب جوزى او اخواتى وهم بيفكروا فى عرايس مواصفاتهم غريبة عايزين واحدة ضحكتها مش عارفة ازاى وصوتها صوت نانسى وطول هيفاء ودلع اليسا وتدين حنان ترك حاجة كده تجيب مغص .داليا صفوت

    ردحذف
    الردود
    1. كل المواصفات دي وهو ما بصش لروحه في المرايا!!!!

      حذف
  3. مقال فوق الرائع...الفكرة بتكمن في ليه الناس بتلجا لجواز الصالونات....لو كان عشان السن او الشكل الاجتماعي او شر لابد منه او او او فتاكدي ان ده احسن وافضل خطه اتوضعت لافشال منظومة الجواز....ولو علشان انا مش مهتمه اني احب قبل الخطوبه يبقي عادي بس ده لايمنع برضه ان كلامك صح جدا في نقطه انه مينفعش تبني كل حياتك علي معرفه ٣ ساعات...لازم في جواز الصالونات علي الاقل يتقابلوا ١٠ مرات ولازم اهل العروسه يدخلوا بيت اهل العريس كذا مرة ويقروهم صح....نرجع بقي للمشكله الاكبر وهي المجتمع المتخلف اللي شايف ان اي بنت مهما بلغت منزلتها العلمية والفكرية والاجتماعيه ناقصه اذا مكانتش مانكجه في ايد العريس مع ان احيانا ممكن العريس ده يضيع حياتها ومستقبلها وصحتها وعقلها كمان

    ردحذف
    الردود
    1. !يا مروه هو انا مقلتش يبقي في ب وجو مشحرن قبل الخطوبه يا ريت لو حصل بس علي الاقل يكون في سابف معرفه، مساحه مشتركه، سابق استلطاف بلاش لو صالوناتي يبقي في كيميا وقبول مش يتقالك ' ماله بقي ماهو زي الفل هو احنا حنفصل الناس علي مزاجنا ' وانت مش طايقه ساعتين قعدهم معاكي!!!

      حذف
  4. مهما كان اللي جايبلك العريس دا يا لومي فهو من وجهة نظره (تفكير المجتمع الشرقي اللي احنا عايشين فيه) ان البنت لازم تتجوز وكل ما كان بدري يبقى احسن لها.
    المهم انك ممكن تتكلمي معاهم بصراحه عن اولوياتك (الشخصية و التفاهم والميول واسلوب التفكير ..... الخ)
    فهميهم وجهة نظرك و مش عيب انك تقعدي معاه مرة و اتنين وتلاته وعشرة تتكلموا وتتفاهموا
    متقفليش دماغك من الفكرة بالعكس دي ممكن تقربلك حد كويس قوي مش موجود في المجتمع المحيط بيكي و هو كمان مش عاجبه حد من المجتمع المحيط بيه ;)
    اللي انا عايزة اقوله حاولي على قد متقدري تحددي اولوياتك و تركزي على هدفك يمكن تلاقيه جايلك لغاية عندك بس انتي اللي مقفلة مخك

    ردحذف
    الردود
    1. انا مش مقفله دماغي بس بجد الطريقه دي اثبتت فشلها معايا
      اصل لو مفيش مساحه مشتركه ومفيش كيميا نقعد تاني وتالت ليه؟ دي حاجه بتبلن بعد عشر دقايق
      ولو مش طايقه تقعدب ظعاه ساعتين تعيشي معاه ازاي؟
      الفكره بقه ان اللي حواليكي بيشوفوا ده دلع بنات وما بيفهموش ده وتسمعي العجب
      الناحيه التانيه انا مش بتاعه صحوبيه والجو ده طب نحلها ازاي؟
      معلش مش واخده بالي ايمان خاطر مين؟

      حذف
  5. من جمل التعليقات اللي شوفتها على وال احد الاصدقاء من احد اصدقاؤه :

    احنا شعب بطبيعته بيدخل فكره الجواز فى دماغ البنت من و هى فى اللفه..مجرد ان الدكتوره تطلع تقولك مبروك بنت "ده لو مشفتش سونار يعنى" و تبدأ خطه زرع فكره ان البنت خلقت فقط للزواج من كل العائله الكريمه..
    ما شاء الله ربا يحميها و تشوفوها عروسه, ايه القمر ده خلاص انا عندى العريس "عاده دى خالتها او عمتها و عندها ولد اكبر بشويه" و هكذا.
    و بعدين تبدأ اصدقاء الام و كل واحده بتحجز فيها لابنها اللى ربنا رزقها بيه "عشان تكمل الخطه ضد بنتى" او جى فى السكه...
    و تكبر البنت و تفضل مؤامره الزواج..فكل ما نعدى و لا ندخل بيها فى حته "ان شاء الله تشوفوها عروسه..طب ليه مش دكتوره, او كاتبه او ناجحه فى حياتها اشمعنا عروسه؟!؟!؟!؟؟!"...و تدخل البنت المدرسه و يا سلام لو مشتركه و تبدأ الهمز و اللمز كل ما حد يشوفها بتلعب مع ولد "او لو بتلعب مع ابن خالتها و لا عمتها..و تبدأ مرحله الاستظراف و كل شويه ده انتم لايقين..الواد بيحبها و لا ايه و الخ من الاستظراف و التعليقات اللى فى ظاهرها فكاهيه و فى باطنها ضمن المؤامره على البنت"

    و يا سلام لو رحتم فرح و يجيبوا كل الولد اللى عليه العين و يتصور جنب البنت فى الكوشه "ده زى التبرك او الفال الحسن" و الصور تلف فيسبوك تحت تعليقات و الله لايقين على بعض و الكلام الفاضى ده!!!

    و تكبر البنت و تبقى فى ثانوى و الجامعه و تبدا المؤامره تاخد شكل تانى..و هنا اقناعها انها تبقى محترمه و متكلمش الولاد بالساهل عشان تتجوز "اة ممكن ان الام تسيبها شويه و تغض البصر عن بعض التليفونات و الذى منه و لو الاب اتكلم الرد جاهز..زماننا غير زمانهم و سيبها حد ييجى يشيلها و تستريح يا ابو عفاف مع ضحكات شيطانيه و طبعا الاب امام هذا التبرير يسكت"..!!!!!

    لما تتخرج و تبدا تشتغل تبدأ الام فى الدعاء لبنتها عشان تشتغل فى مكان كويس "مش للنجاح حاشا لله و لكن عشان تقابل نصيبها!!!!!" و ميضرش شويه نصايح من اللى بجيبوا الديب من ديله...و بصراحه فى نسبه كبيره من البنات بيبقى ده تفكيرها فعلا و بيبقى الجواز محور حياتهم و كانهم خلقوا للزواج و ظل راجل و لا ظل حيطه, و الست من غير راجل و لا حاجه و الكلام الفاضى اللى جابنا ورا ده...و اللى عنده بنت يخلى خده مداس للانجاس و هلما جرا من الامثال الذكوريه اللى خلت دور البنت الجواز..

    طبعا مش كل الامهات كده و لا كل البنات كده و لكن للاسف هو ده الحال فعلا و ان ربنا رزقك ببنت كأن ربنا رزقك بمصيبه لازم تخطط عشات تزيحها فى اول فرصه "صالونات بقى و لا مش صالونات مش حتفرق" و عاده مش بنوصل للصالونات الا فى حاله الفشل فى تحقيق اهداف المؤامره !!!!

    ردحذف
  6. تلخيص سليم للواقع فعلا داليا صفوت

    ردحذف