بالصدفه سمعت موسيقى تتر برنامج نادي السينما
من كام يوم , اللي ما يوعاش عليه كان بيجي يوم السبت الساعه عشره ويعرض اجمل
الافلام الاجنبيه مقدمته القديره دريه شرف الدين بمقدمه عن الفيلم والابطال وبعد
ما الفيلم يخلص تقعد تحلل الفيلم ولقطاته مع احد النقاد السينمائيين
ولقيتني باسرح زمان ايام مالواحد كان يدوب
عشر سنين لما خيلاني علموني الفرجه عليه وازاي الواحد بدا يسمع ويكبر دماغه ويفهم
سينما ويحلل الفيلم ويشوف تحليله طلع صح ولا لاه وازاي اتعلم يشوف الفيلم وينصت
للموسيقى وينتبه للتفاصيل الصغيره وزوايا التصوير والرسايل بين السطور وازاي
الخناقه كانت يوم السبت قوموا ناموا عندكم مدرسه الصبح !!!
افتكرت كمان اوسكار يوم الخميس وسناء منصور
بصوتها الاذاعي المميز والبرنامج اللي شبه نادي السينما بس هنا التتر كان لقطات من
افلام عالميه حازت على الاوسكار واكتر لقطات فاكراها اليزابث تايلور في كليوباترا
, سوبر مان واي تي !!!
وازاي شويه شويه الواحد استقل واستهيف
الافلام العربي وبدا الخناق كل يوم السهره عربي ولا اجنبي بيني وبين اختي و لدرجه
ان بابا عمل لنا جدول للسهر منعا للخناق !!! اصلنا يا عيني ما كنش عندنا غير الاولى
والتانيه وبعدها بشويه التالته , التلفزيون ليله ما يطول يشطب الساعه واحده وفي
الصيف 3 . البرامج كانت تخلص بخمسه ضحك باين ولا خمسه فرفشه مش فاكره وتتره كان
اغنيه اضحك كركر لليلى مراد وبعديه يعرض مشاهد كوميديه وفجاه التلفزيون يشطب يعرض
شاشه بالوان الطيف شويه وبعدين وشششششششش من غير اي حاجه !!!
جدول السهره في بيتنا ومعظم البيوت:
السبت نادي السينما القناه الاولى
الاحد اي حاجه عربي
الاتنين تاكسي السهره : كان ينزل يلف على
السينمات ويعرض لقطات من افلام السينما يمكن ربع الفيلم مثلا واحد عربي وواحد
اجنبي !!! اللطيف انه بيلخص الفيلم لدرجه انك تستغنى عن انك تروح تشوفه اصلا !!! المذيعات:سهير
شلبي , ناديه حليم, مش فاكره الباقيين لو حد افتكرهم يقولي !!!
التلات : اخترنا لك: لقطات للساحر دايفد كوبرفيلد, السيرك الاوربي,
حلقات ماكيفر و اكس فايلز تقديم فريال صالح
الاربعاء : بانوراما فرنسيه : النسخه
الفرنسيه لاخترنا لك : حمديه حمدي ولا انا نسيت؟
الخميس :اوسكار , سناء منصور
الجمعه: عربي
بس تصدقوا احلى والطف من الهذيان بتاع العشر
الاف قناه فضائيه بتوع دلوقتي !!!
انتوا بقه ايه جدول التلفزيون عنكم ؟
مين البنت اللي في اخر تتر برنامج نادي السينما او اسم الفيلم لو سمحت
ردحذفتخيل لسه فاكر أحداثه لغاية دلوقتى
حذفممكن تقولنا اسم الفيلم
حذفمين البنت اللي في اخر تتر برنامج نادي السينما او اسم الفيلم لو سمحت
ردحذفممكن تقولنا احداثه ولو تعرف اسمه واللينك ضرورى
حذفحد شافه و قال: ان إن البنت ديه كانت على إتصال بكائنات فضائيه وعملو عليها أبحاث وإيديها كانت مفقوده بسبب حادثه ..بس قان انه مش فاكر اسمه للاسف
حذفيا جماعة اسم الفيلم Audrey Rose (1977)
ردحذفلا مش هو
حذفتصحيح فقط ، يوم الاربعاء اخترنالك ، الجمعة بانوراما فرنسية
ردحذف