الجمعة، 7 ديسمبر 2018

ايامي الحلوه


يوم سبت بعد الافطار وامام التلفزيون مع كوب شاي بالنعناع صادفت برنامج مع الاعلاميه نهال كمال زوجه الخال 
تطرق الحديث عن الخال وكتاباته ومنها مقتطفات من حياته اللي سماها ايامي الحلوه وإذ بابتسامه سعاده وحب تعلو وجه المذيعه اللامعه وتحكي عن ايام ما كتبها ثم حولها لبرنامج لاحقا 

حماسها في الحديث عن الكتاب استفزني لدرجه اني قمت فورا بالبحث عنه في الانترنت 
وانطلقت لركني المفضل المشمس في النادي وبدأت القراءه 

يبدأ الكتاب باهداء غايه في العذوبه والرقه لبناته وزوجته عن مفهومه لايامه الحلوه وسط العالم المادي الذي تعيشه بناته والائي قد لا يفهمنه أو يستطعن التفاخر باصولهم الطبقيه بعد كتابته لهذا الكتاب ومدى سعادته في افستد ذلك عليهن !!!

الكتاب مقتطفات من حياته بدايه من فاطمه قنديل والدته التي رفضت كثير من عادات الصعيد الظالمه مصورا زواجها وهيه ١١ عاما بزوجها الاول وهروبها منه ثم طلاقها وهي ١٣ عاما وزواجها بوالده ويبدأ بقصه غايه في الطرافه عن يوم وطريقه ميلاده 

يتطرق بعد ذلك لطفولته البسيطه ومرضه من صغره والعلاجات الفلكولوريه المضحكه التي تلقاها من والدته وعماته

ثم اشتداد عوده وعمله بالرعي لاغنام الاسره والجيران ونوادره مع الاغنام في الصحراء وكيف استمتع بالركض حافيا وسندوتشات اللبن في خبز الباتاو المصنوع من دقيق الذره فصل غايه في الاضحاك والبساطة لدرجه البكاء من كم الضحك الذي سببه لي !!! 

ثم يكبر رمان او عبد الرحمن ويروي سرقته لحديقه رمان الجيران وذكاء الام الفطري بعدم إلحاق العار بابنها وإطلاق ذلك الاسم عليه للتغطيه على واقعه السرقه !!! 

ويكبر رمان ويصطاد السمك أثناء رحلات الرعي ووصفه لأنواع السمك النيلي وفلسفه كل سمكه في الحياه وحفلات الشواء التي قام بها الأطفال وقت الرعي لقتل الوقت والتغذية في نفس الوقت انها حقيقه صنعتهم رجال أشداء يعتمد عليهم بشده 

ثم حديثه المستفيض عن الكلاب في قريتهم وحكاوبها المختلفه 

مع كل فصل من الفصول السابقه يروي رمان الاغاني المرتبطه بها ليقيم العلاقه بين نشأته واهتماماته الشعريه لاحقا 

لتبدأ فصول كامله عن اغاني ومناسبات الصعيد ويبدأ بالتفصيل في سرد الاغاني الشعبيه لكل مناسبه وحتى نهايه الكتاب وكأنه أوجد العلاقه بين النشاه والبيئه ثم المستقبل اللاحق لتحوله لواحد من أهم شعراء الاغاني بالعصر الحديث بدايه من اغاني رمضان ، رعاه الجمال ، اغاني النساء في كل المناسبات وانتهاء بأبو عنتر أحد شعراء السيره الهلاليه الذي أخذ منه الرايه وجمع السيره الهلاليه لاحقا والذي انتظره حتى زاره قبل موته مباشرا لينتهي الكتاب بموت ابو عنتر وكان أيامه الحلوه ذهبت بذهاب ابو عنتر 

كتاب غايه في البساطه والمتعه والحميميه والفخر من جماله أجلت نهايته لاطيل ايام استمتاعي به قدر الإمكان والذي كان أحد مصادر حماسي كل يوم للعوده للمنزل لملاقاه رمان وقراءه نوادره واشعار جيله ليته استفاض فيها أكثر اكثر !!!

انها حقا أيامه الحلوه



الأربعاء، 5 ديسمبر 2018

البيت ليس للبيع



في تمشيه في أحد شوارع الزمالك وكل ما نعدي عليه نقعد نحط سيناريوهات عن قصه البيت واصحابه

بيت من دور واحد او فيلا بجناحين من دور واحد في موقع متميز للغايه تطل على النيل وفندق ام كلثوم 
مدخل جانبي ينقسم للجناحين


جناح مهجور ولكن بلكونته معلق فيها ثوم مجفف على طريقه الجدات ويدور الحديث الجناح ده محدش ساكن فيه ، ترد والدتي لا في سكان بدليل التوم 
النهارده قلتلها نفس الحديث المعتاد!! بس لقينا غسيل منشور مع أن شكله لا يدل على ساكنين بتاتا !!! 

الجناح التاني واضح أنه معتنى بيه ونقعد نحزر ونفزر ايه الفرق 


اخوات ورثوه وكل واحد تعامل مع نصيبه بشكل مختلف 
ولا مستاجرين بالقانون القديم اخرهم بيدفعوا ٢٠ جنيه في الشهر وأصحابه ممكن اغنيا جدا بس باعتبار ما سيكون لكن حاليا ملهمش غير الايجار المتواضع واضحك كده واقول لوالدتي دول في يوم من الايام كانوا جيران الست تخيلي الواحد من دول قاعد في بلكونه الثوم والست قدامه بتاخد الشاي في البلكونه المقابله !!!

ولا ورثه عاندين مع بعض والبيت حاله واقف ما بيتباعش
طب ايه قصه الثوم والغسيل ، لايمكن حد يكون ساكنه ده ابدا 

طب واللي ساكن مع العفاريت ده ما يبيعه أو يهده ويطلع ببرج معتبر ، طب يمكن مش معاه فلوس ؟ طب يخش شريك مع مقاول وياخد منه شقه لما يبنيه لو مش مستغني عن الزمالك والنيل !!!

شويه ولقيت قطه في بلكونه الدور الاول كأنها بتنده عالناس ، يا ترى هيه فعلا قطه ولا شبح ظهر في شكل القطه طب ما تنط يعني خوتتنا ليه يا ترى قطه مريبه فعلا

ولا شجره المانجو الفارعه اللي اعتقد من عمر البيت والجنينه المهجوره ، في يوم من الايام كان في ضيوف في الجنينه قاعدين عالنيل وبيقطفوا المانجو وياكلوا في ساعه العصاري 

كل الخيالات دي ياترى حقيقيه ولا مستواحاه من جو المطر والبلكونه المهجوره ام قطه وثوم متعلق !!! والبيت اصلا ملهوش وجود 
طب ازاي ده كل ما نعدي عليه نعلي على سيناريو المره اللي فاتت اه والله والقصه تطور مره عن مره !!!

يا ترى ايه قصه البيت ده ؟ البيت مواجه لبنك HSBC قدام فندق فلسطين و كافيتريا coffee bean اكيد في يوم حد فيكم عدى عليه ، اللي يعرف يقولي 

الصوره ليست للبيت ، من الانترنت 


الثلاثاء، 27 نوفمبر 2018

رساله الماجستير وذكرياتها

اليوم يصادف الذكرى العاشره لحصولي على الماجستير 
رحله كانت طويله ومليانه مشاكل من اول مدير المصنع اللي مكنش موافق على التفرغ اللي كل زمايلي في الشركه الحكوميه واخدينه لحضور المحاضرات كل يوم اتنين واللي بسببه بالرغم من أنه متوافق لي لم احضر ولا محاضره في general course والاحصاء كلها ذاكرتها لنفسي وجبت فيها امتياز مع أن محدش شرحها لي

ولا مشاكل شهر الامتحانات اللي وافقلي عليه ونسي وقرر انه ما حصلش وحطني في دماغه بعدها سنين مع أنه من حقي قانونا ، ما علينا ربنا يسامحه بقه


اما بقه ال special course  فكان يوم السبت اللي عندي فيه محاضرات في الجامعه الامريكيه ، تقولوا لي حضرتيه ازاي : احكيلكم محاضرات AUC   من ٩ صباحا ل ٢ الضهر مع بريك الساعه ١١ لمده ساعه ، ربنا كرمني وخلينا محاضرات الصيدله ١١ فكنت باطلع بدري ربع ساعه من AUC  اجري اركب المترو واوصل صيدله القاهره ١١ احضر المحاضره وارجع ال AUC  متأخر نص ساعه ، كنت مستأذنه من الدكتور هنا وهنا وهمه كانوا متفهمين بصراحه اخلص AUC ارجع تاني صيدله اكمل محاضراتي لآخر اليوم !!! 

خلصت التمهيدي مع دبلومه AUC   ازاي معرفش فعلا!!! اف نسيت بقه احكيلكم عن اصلا ليه رحت القاهره مع اني خريجه حلوان وديى قصه قدريه جدا : رحت اقدم في حلوان قالوا لي قفلوا الباب، زعلت قوي قوم ايه رحت لرئيس القسم قالي استني السنه الجايه ، تقولوش كنت متصربعه على ايه اقولكم وربنا ما اعرف صعبت عليه نفسي ونقحت عليه عقده اني ما اتعينتش وان زمايلي حيسبقوني وهاتك يا شحتفه ، صعبت عليه قالي قدمي في القاهره وانقلي السنه الجايه 

قدمت في القاهره تقريبا في اخر يوم وانا في اختيار القسم قصص واحلام : قلت اقدم في قسم الصيدلانيات أه ماهو انا شغاله في مصنع وده انسب مكان اتكلم مع الدكتوره اللي اختاروهالي أو كانت فاضيه معرفش ، انا باتكلم في مناطق عقيمه وهيه بتحكي في اقراص وhardness, friability    يا ست الكل انا مش شغاله اقراص وهيه مش من هنا 
نمت مغمومه حلمت اني باقدم الجاتو للضيوف في أطباق Petri dishes   اه والله حصل وربنا المهم كلمت رئيس القسم في حلوان لقيت أن الباب اتقفل زي ما حكيت فوق، من هنا اننا لحقت اخر يوم في التقديم بس في ميكروبيولوجي مش صيدلانيات 

نخلص تمهيدي ونيجي ننقل حلوان قوووووم ايه اللائحه تتغير والمواد تتغير ويبقى النتيجه اني اشيل مواد فنوصل اني حافضل في القاهره وهو يكون المشرف الخارجي والأمر لله 

نيحي للعملي كان عنده امال واحلام بنقط بحث جديده تنفع مع ضيق إمكانيات الجامعه ومكان الشغل الحكومي ، نقرا وتذاكر وناخد كورسات برمجه في هندسه وكل شويه نغير نقطه البحث كتير اشتغلت اربع نقاط بحث والله !!!!

الحقيقه هو كان دايما يقول أنا بأكبر لكم مخكم لان ايدينا متكتفه ، الشاطره تغزل برجل حمار وانا باغزل بالحمار نفسه 

دون الدخول في بعض التفاصيل ، يضطر يسافر ويسبب كل الطلبه بتوعه ، الكل يحتاس الا العبد الفقير لله لأنه اصلا مسجل في جامعه تانيه مع مشرف تاني !!! وكأن ربنا أراد أن الرساله دي تكمل لأن كتير من زمايلي بعد سفره سابوا رسائلهم وما كملوش 

احرجت من مشرفي الرئيسي اللي اصلا كان واخدني محامله لمشرف حلوان لحد ما انقل حلوان ، ايامها بدأت MBA    وكبرت دماغي من ماجستير الصيدله !!! اللي بالصدفه تقف وما تكملش فارجع الماجستير الصيدله تاني

بعدها لقيته باعتلي حد من زمايلي بيقولي انت فين وما كملتيش ليه ؟! ده بجد انت ناوي تكمل معايا بالرغم من التدبيسه دي ؟ قالي في النهايه انت طالبتي لو عايزه تعملي مسؤول اكملك 

الحقيقه ولا حاجه من اللي المشرف الاولاني بدأها تنفع تكمل لاننا كلنا مكناش فاهمين هو ناوي على ايه اصلا ولا ايه اللي في دماغه ، حكيتله عن شغلي وان من زمان قوي نفسي امسك الغرف العقيمه في صناعه الدواء من ساعه التصميمات لحد ما الدوا يخرج ،هل ده ينفع  ماجستير ! قالي تحفه 

من كتر ما شجعني وفي نفس الوقت احرجني اني مدبساه في الإشراف رحت لعمي سالته الرسايل دي بتتكتب ازاي قعد معايا كام مره فهمتي ولقيتني باكتب على قدي

رجعت المشرف بتاعي بعدها بشهر بال literature review    برقلي : انت كتبتي كمان !!! والله لا اديكي الماجستير ورجعت من عنده بارقص من الفرحه 

عينلي مشرفه تكمل معايا كتابه وكانت أول رساله تشرف عليها وعملنا  case study    لمصنع دوا كانت الأولى من نوعها في مصر وفي ٦ شهور كنت مخلصه

باتصل بيه في العيد قالي حنناقش بعد العيد ، ايه فعلا ؟!  وكانت احلى واجمل هديه وعيديه وهديه عيد ميلاد في السنه دي
وفجأه تتشكل لجنه المنافشه وتتحدد معاد كمان 

يوم المنافشه بقه واحنا رايحين الكليه يتصل عمي من السعوديه يطمنني ويقولي ما تركزيش مع حد لا من الحضور ولا من المنافشين ، اعتبريهم مش موجودين وعيني دمعت من الخوف 

اول ما دخلت القاعه اترعبت واللي جاي عليه بقى اني عايزه اخش الحمام ولفيت الكليه كلها في رحله البحث عن حمام !!!

اول ما القاعه اتملت تسلط عليه رعب اني مش حاتكلم وسشلي حيبقى وحش قدام كل الناس دي وحقيقي كنت مرعوبه 

اول ما بدأنا لقيت د عبد الجواد هاشم المشرف ورئيس القسم في صيدله القاهره في فاصل استمر تلت ساعه تقريبا من المدح في الرساله ونوعها وأنها اول واحده في تاريخ الكليه وقد ايه هيه مميزه ومختلفه ، الحقيقه اداني زقه قويه خففت رعبي وخلاني عملت البرزنتاشن واللي كانت من اجمل وأبسط مايكون لدرجه ان في ناس غير متخصصين لقيتهم في الاخر بيقولوا انهم فهموا !!!

دخلنا بقه في المنافشه اللي كانت من رئيس القسم في صيدله المنصوره ، رئيس القسم في صيدله بني سويف ومشرفي رئيس القسم في القاهره واللي عدت بسلاسه الحمد لله وبعدها د عبد الجواد يعلن " منحت درجه الماجستير ،" عشان نقفل على رساله او عده رسايل مع عده مشرفين استمرت من ٢٠٠١ ل ٢٠٠٨ بالرغم من أنها اتكتبت في ٦ شهور !!! 

النهارده بافتكرها كأنها كانت انبارح وكأني ماشفتش اي مشاكل او لخبطه خالص 
واللي الحمد لله فرقت بعد كده تماما في شغلي وفي حياتي كلها 

واللي أدين فيها وبيها بعد ربنا ل د عبد الجواد هاشم اطال الله في عمره  واللي حقيقي كان سند وعلم وكل واي حاجه حلوه بالرغم من اني اصلا كنت تدبيسه له لم تكن في حساباته نهائي ، بس كمل معايا وساعدني جدا جدا  د علي ابو سته رحمه الله عليه لتشجيعه ليه دايما ووقوفه معايا كل ما كنت بازهق أو نفسي تتصد ، وعمي الحبيب د حسن جبريل لتعليمي اكتب ازاي ومكالمه يوم المنافشه اللي حقيقي عمري ما نسيتها 

الحمد لله 

الأحد، 25 نوفمبر 2018

العمر لحظه 2


العمر لحظه

لا مش باتكلم عن روايه يوسف السباعي وان كانت ملهمه في النقطه دي بشكل او باخر  
لما تقعد بالساعات تقرا عشان في الاخر توصل لمحور القصه أو الكتاب اللي ممكن خدت من اللي كتبها سنين واخدت منك ايام عشان تقراها ويا توصل يا ما توصلش للي هو كان عايز يقوله,  عادي جدا

بس لو وصلت للحظه اللي تنور في دماغك حقيقي بتكون لحظه نور ممتعه وحقيقي ما بتستمرش كتير وكان مخك ومخ صاحب الكتاب حصل بينهم توصيله لمده لحظه سحبت فيها منه كل النور والافكار اللي جواه !!!

باعتقد اني كل ما قريت كتب كتيركل ما اللحظات الكتير دي نورت اكتر واكتر وكل ما طاقات نور فتحت في مخك اكتر واكتر واللي ممكن تنقلك عالم تاني مختلف جدا جدا لدرجه انك حتتغرب في العالم الواقعي اللي عايش جواه وتتمنى تدخل في ثقب اسود من اللحظات دي يشفطك للابد وما ترجعش منه , بس فينه ؟ !!!  

نفس اللحظات دي بتحصل في فيلم او مسرحيه او اي عمل ابداعي وعكسها تماما لما ما تفهمش المؤلف كان عايز ايه بتحس جدا انك محبط ومش مبسوط
العمر لحظه : لما تقعد بالساعات تتامل في خلق ربنا او تضرب سما او بحر او حتى سقف وتوصل لمرحله انك مركز بس في التركيز واللاشيء !!! ممكن ناس منكم تتريق على اللي باقوله بس حقيقي الموضوع متعب جدا ولكن اللحظه اللي بتوصل فيها للحظه دي بتكون كانك شديت فيشه حياتك ومخك وحقيقي بتكون لحظه نور وراحه وسعاده وحقيقي بتتلاشى بسرعه لدرجه انك اوقات لو وصلتلها بتضحك على نفسك وعليها انها ما حصلتش يمكن تطول شويه ويزيد استمتاعك بيها بس على مين بتقفشك وتتسرب منك في نفس ذات اللحظه بحد مزعج يتصل او عيل رذل ما اترباش يعيط حواليك او حتى راديو يجي صوته ما تعرفش منين يفصلك اعتقد ان الناس بتوع اليوجا بيحاولوا يوصلوا ليها بس ما عنديش فكره هيه نفس الفكره ولا لاه
العمر لحظه في صلاه او دعاء اوو قرايه قران توصل فيه لاتصال بربنا ويكون الخط مفتوح رايح جاي ودي من اصعبهم حقيقي ممكن ساعتها تبكي او تفرح او حتى تحس انك بني ادم بس وبس وبرضو تلاقي حاجه تفصلك , تيلفون يرن شيطان يبعدك او اي حاجه تافهه ترجعك تاني من اللحظه دي بس برضو بترجع مبسوط   

العمر لحظه لو امنيه اتحققت او مفاجاه مش عالبال او فكره توصل لها او حتى حلم بحد واحشك ومشي


لحظه ما تبقى تايه في بلد كان نفسك قوي تروحه وتسال هو برج ايفيل فين وبعد ما كنت تايه حد يقولك لف اهو وراك وتبص وتنبهر وعينك تدمع من المفاجاه والفرحه
لحظه نهايه العرض النهائي في ديزني لاند اللي من فرط السعاده تتشحتف فيها من البكا واللي حواليك يبصولك ويقولوا ايه الجنان ده


لحظه تنسى نفسك فيها وانت مستني القطر في باريس وانت تايه وتقعد تاكل الحمام لدرجه ان القطر يمشي ويفوتك وتقعد نص ساعه تستناه الساعه 11 باللليل بس تكون مستمتنع بالفرجه عالحمام وهو بياكل البرنجلز
او لحظه ما تلاقي كتاب بقالك كتير بتدور عليه او تلاقي تذكره لحفله دخت عليها ولقيتها بالصدفه يوم العرض ومكنتش مرتب لها

 العمر هو مجموعه اللحظات اللي بتكون فيها بني ادم مش مكنه دايره في ساقيه اللاشيء اللي عايشين فيه  , قيس عمرك باللحظات اللي فوق وحتلاقي كلنا اعمارنا صغيره قوي بالرغم من طولها بس همه دول بس اللي غالبا حتعيش وتموت وما تحققش غيرهم سيبك بقه من المناصب والفلوس والهدوم وكل الحاجات الماديه السخيفه اللي حوالينا

الاغرب وانا باسيف البوست فوجئت اني كتبت حاجه شبهه من كام سنه وبنفس ذات الاسم !!!!

هااا , عشت كام لحظه؟



السبت، 17 نوفمبر 2018

صبح على مصر ب ٥٠٠ جنيه


صبح على مصر ب ٥٠٠ جنيه
مصر حبيبتي قررت تحتفل بعيد ميلادي بتسجيل اول مخالفه قياده بعد عشر سنين سواقه ب ٥٠٠ جنيه ، قال ايه عدم طاعه رجال المرور 
اه والله زمبؤلك كده 
خدتني الجلاله والتفاؤل باني حاتظام اونلاين وحيصدقوني وحتتشال ، التظلم اترفض 
استمريت في التفاؤل وقلت حاروح النيابه واقنع وكيل النيابه وحاشيلها 
صحيت ٨ الصبح وفطرت ونزلت بس اهلي اتوتروا واخويا قرر يجي معايا معرفش كمان كميه النصائح والارشادات والتوتر من بابايا كانت ليه 

وصلنا مرور الدراسه وبدأت معركه ركن العربيه كله شرطه مفيش اي ميزه ولا مكان لاي حد مدني ما علينا المهم اخويا افتكر مكان زمان ركنوا فيه طلع دار ايتام وساحه مدرسه بيستغلوها ايام الإجازات والركنه بايصال رسمي لصالح دار الايتام ، لا أنكر أن المعيه الفكره اسعدتني لان اكيد عائد الركنه اكبر من اي تبرعات وده بسطني وخلاني اتفائلت جدا !!! 

ندخل المرور مباني قديمه من العاليه ودرابزين فيرفورجيه جميل وسلالم طويله لطيفه وفجأه باب اسود جديد وطريقك مسدود مسدود مسدود معرفش ليه المهم نزلنا ولفينا ووصلنا 

مطلوب نموذج تظلم نملاه ونقدمه عالشباك وكتبت بقه اني ماروحتش مكان المخالفه وان محدش غيري بيسوق العربيه  وإني بقالي عشر سنين مخدتش مخالفه عريضه دفاع !!!

نطلع لوكيل النيابه طلع شبه صديق اخويا اللي انا شخصيا باعزه جدا فقعدت اهزر معاه واحكيله كل العريضه اللي كتبتها 
قعد يقولي اقل من ١٥٠٠ ما بتتقبلش !!! قلتله طب ده ابو ١٥٠٠ ده اصلا يستاهل لأنه عمل مخالفات كتير قالي عارف بس ده القانون 
قلتله طب نوع المخالفه قالي صف تاني !!! قلتله انا عمري ما ركنت صف تاني او حتى ركنه فيها خوف لاني ببساطه باخاف على عربيتي سيبك من اني ملتزمه بالقانون قالي والله فاهم 

قلتله طب مفيش اي فكره ان الافندي اللي خد المخالفه نقل الرقم غلط قالي وارد وقعد طلع في نمرتي أوجه الغلط اللي ممكن تحصل قلتله طب ايه ؟! قالي برضو مش هينفع 

اعتبربها صدقه لمصر !!! قلتله مصر مش مستحقه الصدقه ، ملجأ الايتام اللي ركنت فيه هو اللي من أوجه الصدقه ضحك وقالي خساره في جنته الحكومه مش كده قلتله الحكومه بتاخد ضرايبي وملهاش اكتر من كده ، قالي انتظري رئيس النيابه 

قعدت في الاستراحه كبيره جدا يفصلها عن الموظفين شباك زجاجي والفتخه منه للسقف متقفله بمشمع عشان تحافظ لهم عالتكييف لكن باقي الصاله لها مروحه واحده 
أما عن الكراسي مكسره وحالها كرب والناس واقفه وحاجه حوسه، العنكبوت مالي الحيطان والمراوح من كتر التراب اللي عليها سودا 

رجعت تاني لمكتب الباشا بعد ساعه كان نزل وقفنا نستناه طلع المكتب قدام حمام مشترك اه والله الستات عالرجاله !! أما الحيطان شرحه وقفت اتفرج عالرخام اللي مالي المكان يكفي مصر كلها بس محدش فكر بغسله فمنظره مزري 
طب ما تاخدواكم كام خمسميايه تنضفوا بيها نيابه مصر ، عيب عليكم نيابه مصر !!! 
شويه ورجع وبرضو المخالفه ما اتشالتش 
مصر عيدت عليه ب ٥٠٠ جنيه وعشرين تظلم اونلاين وزيهم في النيابه وخمسه جنيه ضربه دمغه ٥٤٥يبقى كده اجمالي٥٤٥ جنيه هديه عيد ميلادي ونص يوم اجازه راح في نيابه مصر اللي كلها عنكبوت وتراب 
الوحيد اللي كسبان من القصه دي دار الايتام وشويه القهاوي ومكن التصوير اللي حواليها 
عمار يا مصر وكل سنه وانت طيبه يا حلوه



الجمعة، 26 أكتوبر 2018

صح النوم

صح النوم 
اول تجاربي مع يحي حقي 
البدايه يراوي يجلس في حان القريه ويعرض مجموعه من القصص القصيره عن رواد الحان تعطي انطباع أن الكتاب هو مجموعه قصص قصيره : القصاب، صاحب الخان، القزن، زوج العرجاء، الفنان 

ثم يحضر أحد أعيان القريه وهو عالم بكل أحوالها ، ثم يمرض الراوي وينتقل القاهره ومنها للعلاج بالخارج ويغيب فتره طويله عن القريه 

بعد عودته يعلم أن الرجل الغني اصبح حاكم القريه واقال العمده الفاسد واوصل القطار القريه واغلق الحان
وما يترتب من وصول القطار للقريه من تنميه ووظائف جديده وما يترتب من اغلاق الحان من تبدل احوال رواده

يدور الراوي على جميع شخصياته السابقه ليرينا التغيرات التي طرأت عليهم باغلاق الحان بما فيهم صاحب الحان الذي أصبح حانوتي القريه ونظره فلسفيه للموت والحياه بعد نظرته الفلسفيه السابقه عن الكيف والخمر !!!


كل منهم أصبح لحياته هدف عندما آفاق من سكرته وتغيرت حياته جذريا وأصبح اكثر رضا وسعاده
يقابل أصحاب المهن المستحدثه بوصول القطار ليرينا أن عدم الرضى سمه جميع 

وينتهي بذهابه لزياره العمده الجديد بناء على طلب العمده وليس رغبه الراوي ووصول وفد المتملقين الاعتيادين لكل حاكم ومعرفته هو بذلك وعدم استماعه لأي منهم 


اعتقد أن القصه رمزيه لكل زمان ومكان وأنها ترمي لصلاح الحاكم وصلاح الناس بعده والعكس في حاله فساده

أن وجود الهدف هو ما يقرب حياه الناس مهما كانوا هامشيبن وأنه بالرغم من اي صلاح أو فساد يوجد مجموعه المتملقين في كل زمان ومكان وكذا المصلحين ( الراوي) الذين يختارون البعد عن الحاكم وأنه هو من يجب أن يبحث عنهم بأنهم يستحيل أن يبحثوا عنه حتى لو كان مصلح خوفا من تصنيفهم من المتملقين إن كان مصلح ، أو من المعارضين إن كان مفسد لعلمهم أن مفيش فايده 
كبسوله قصيره لكن ممتعه 




الأربعاء، 26 سبتمبر 2018

هديه ومفاجاه

يرن جرس التلفون ، حد يكلمني ويقولي (....) صاحبتك بعتالك حاجه ، اطلعي على بوابه الشركه خديها 

(....) اصلا بره مصر ، باعتالي ايه ، بمناسبه ايه ؟ طلعت 
ما لقيتش حد اتصلت تاني ، لا هو جاي في تاكسي ابيض استني ، المهم وصل 

الاقي ايه بقه شنطه هدايا ولفه لذيذه جواها وكارت 
فتحت الكارت لقيت مكتوب فيه اهداء لطيف جدا جدا 

A good friend will know your stories
A best friend has lived them with you 
You will be my best friend forever 

تشاء الظروف اني اتعطل ربع ساعه عن الوصول لمكتبي وانا كلي تشوق اعرف ايه اللفه دي وابصلها واتخيل هيه ايه ؟ البوم صور مثلا عشان يمشي مع الإهداء ؟ لا ممكن حاجه احنا بس نعرفها ؟ جائز 
طب ايه المناسبه ، عيد ميلادي ، لسه بدري 
وبعد أحاديث طويله وصلت المكتب وبدأت افكها حبه حبه 
اللفه صعبه ، زودت الحماس 
شويه شويه لقيتهم مجموعه نوتبوك متجلدين بجلاد كلاسيكي قوي 
ملمس الورق يجنن وشكله تحفه 
طب هيه عرفت منين اني كنت عايزاهم ، عاده بافتح نوتس عالموبايل لاي افكار او خواطر 
وللفلوس اللي بتجيلي والناس بيبقوا عايزين يوجهوهم لحاجات تبعي 
رجعت للرساله وعرفت عرفت منين !!!
A good friend will know your stories
A best friend has lived them with you 
ومن عندي : النوتبوك حيخليكي كمان تعيشي معايا اللي جاي

(....) العزيزه ، you just made my day 
ربنا يسعدك 







الاثنين، 24 سبتمبر 2018

باك تو سكول قوي جدا خالص


نزلت من كام يوم مع اختي نشتري شنطه المدرسه للانسه بنتها اللي غلبتها في شرا الشنطه .
الحقيقه انبهرت بروائع الشنط اللي نازله اشكال والوان واحجام تحير من جمالها واللي خلتني شخصيا نفسي اشتري واحده لنفسي من جمالهم

ايامنا كنا بنعتبر نفسنا مرفهين وبنجيب حاجات من بره ، انا شخصيا كنت باروح المدرسه بشنطه سامسونايت من ام ارقام ولما رجعنا مصر حسيت بنقله حضاريه ايه الشنطه اللي عالكتف دي 

يوم ما نزلت مع اختي لفت نظري كمان معطيات كتير قوي ، لانش باج ملحق بالشنطه وجراب للموبايل هو ده حصل امتى ، ده انا جبت الموبايل بعد ما اتخرجت بتلات سنين بعد خناق من قلق اهلي عليه ، كنت شايفه أنه ملهوش لازمه النهارده طفله واقفه تنقي الشنطه بناء على وجودلانش باج وجراب للموبايل ولا لاه ، الفسله اللي آخرها تانيه ابتدائي حاطه مواصفات وبتدور عليها ، هيه اصلا حنعوز الموبايل في ايه في المدرسه !!!! لا وايه لابسه وعامله شعرها ولابسه اكسسوارات وتاتو ولا مراهقه في الجامعه اه وربنا !!!

ايه بقه اللانش باج والانش بوكس ؟ ايامنا اللانشبوكس كنا بنشيله في الحضانه ، كانت شنطه حديد عليها رسومات ومقسومه من جوه نصين نص للساندوتشات ونص للزمزميه ودمتم وكنا في ابتدائي ننكسف نشيلها تاني عشان دي بتاعه الاطفال !!! 

بعد كده اللانشبوكس تحول لكيس سندوتشات بيترمي أو ما يترميش لو حالته تسمح لتاني يوم !!!
اصلا سندوتشاتنا كانت تنحصر في الجبنه البيضا وتدلع بزيتون أو خيار أو طماطم ، جبنه رومي، فلمنك ، شيدر ، حلاوه ، مربى لانشون ومن النادر بسطرمه عشان بتعمل ريحه وحشه للهدوم 
حاليا أمهات الفيسبوك طول النهار افكار لام اللانشبوكس وتلاقي العيال اصلا ما بتاكلش وايشي مكسرات وايشي معجنات وتقوم الغلبانه الصبح تتكعبل تحمر كفته وبرجر وفراخ وفي الاخر العيال ترمي الاكل عشان بيخافوا يرجعوا بيه سيبكم من الفلوس انما مجهود التفكير والصحيان بدري والعمايل بدري جدا جدا !!!


ليله المدرسه كنا ما ننامش معرفش ليه مشتاقين بقه لاصحابنا ومدرسينا أو اتعودنا عالسهر ومنعرفش ننام بدري أو مبسوطين بقه من الحاجات الجديده اللي اشتريناها ، او كل دول بس كان لازم نروح اول يوم مدغمسين من قله النوم والحماس 

نرجع بقه من المدرسه بلسته الطلبات اللي بجد كانت محدوده ، شويه كراسات ونجلد الكتب بورق ديكور والكراسات بورق كرافت ، مكنش لسه الجلاد البلاستيك الجاهز نزل 
في السعوديه مكناش بنجلد الكراريس اصلا في مصر كانت كل ماده بلون عشان الكراسات ما تضيعش 
ونقعد نجلد الكراسات يوم وخلصت الليله 

دلوقتي حكايات وروايات عن لسته السابلايز والعجب اللي فيها ، حد من أصحابنا بيحلف أنهم طلبوا من بنته ورق هو ما استخدموش غير في بكالوريوس هندسه !!! طب ليه بس بتصعبوها وتعقدوها 

اليونيفورم في السعوديه كان مريله رمادي في ابتداىي وثانوي  وكحلي في متوسط ( اعدادي) وكان المصرين لازم يشيكوها بياقه دانتيل وشراب دانتيل وفيونكات في الشعر 

نزلنا مصر كان دريل أو جيبه ، الجيبه لازم تكون عالاقل تحت الركبه بشبر وعاده كانت بليسيه رفيع أو تخين , لسه شايفاه في اشيك لبس جاهز دلوقتي وقلت ياااااه دا انا ملبستوش من اعداديه ، كان لون الكرافات بيتغير على حسب المرحله بس برضو مكنش في فن قوي في لبس المدرسه 

الحقيقي احنا كانت باك تو سكول بتاعتنا اخر بساطه وشياكه وجد من غير افوره الايام دي جيل هذا الزمن حقيقي مظلوم بين تطلعات استهلاكيه وسبلايز ويونيفورم ولبس رياضه ولانش بوكس ولانشباج في منظومه اصلا فاشله وتم استغلالها لعمل احلى سبوبه وباص وخمسين لغه وعيال هويتها اصلا اتمسحت وقبل اخر امتحان بيكونوا نسيوا الكلمتين عشان يفضوا شويه رامات السنه اللي بعدها في بلد في ذيل التصنيف العالمي اصلا وحتى مدارسها الدوليه كتير منها فقد مصداقيتها بعد تسريب الامتحانات واعادتها وبوظان سمعه المدرسه والبلد اصلا
استقيموا يرحمكم الله 


الاثنين، 17 سبتمبر 2018

تاملات صيفيه

في جلستي البلكونيه الصيفيه سرحت كده عالعماره اللي قدامنا 

حي السفارات كله طلع من يجي عشرين سنه الا حتته ارض فضلت متسوره متعرفش ليه 
شويه واتعملت فيها باين محطه ميه دور واحد كان عايش فيها غفير مزاجنجي بيسلي نفسه طول الليل باغاني صوتها عالي جدا كانت بتغلوش عليه وانا باذاكر وابعتله بابا أو اخويا كل شويه يوطي الصوت 

فجاه المحطه انهدت والأرض اتباعت في المزاد وطلعت عماره اعلى من باقي العمارات بدورين بدون اي سبب

وفضلت العماره بالرغم من موقعها وناصيتها وان قدامها فاضي شققها ما بتتباعش الله اعلم ليه 

في الاول تخيلنا انها غاليه جدا او صاحبها مستني يبيعها على بعضها لوزاره من الوزارات زي ما حصل في عمارتين بتوع وزاره التعليم العالي ( فجاه شارعنا بقى فيه وزارتين بدون سابق إنذار واحده في أوله والتانيه في آخره ، التعليم العالي والبترول !!! بعد ما كان أهدى مكان في مصر !!! )

ثم سنه في سنه تتباع شقه في شقه وبرضو ما تسكنش !!!

الايام دي إذ فجأه شكل النحس اتفك ولا ايه فجاه اول دورين حينعملوا مول 
االتالت اتوضب وبدأ يبقى فيه ناس وقعده في البلكونه بسطلعت اداره المول فبعد ما نكدوا عليه بيمشوا قبل ما اروح فمش كاشفيني 

ثم ظهرت شقه الدور السابع وبتتوضب وفيها عمال 
وبعدين الرابع 

سرحت كده وقولت لروحي أرض فاضيه ، محطه ميه، عماره اشباح ثم مول وسكان 

الدور ماشاء الله شقه يعني في أسعار دلوقتي شليح من الفلوس الحقيقه 
وتسأل روحك كل شقه من دول حتبقى فيها عيله وماضي وحاضر ومستقبل الله وحده اللي يعلم تفاصيله 
من موقعي هذا كمان شايفه مستوى التشطيبات وشكل السكان حاجه كده فخيمه 
لو عرفوا أنهم ساكنين عند الغفير الغلبان اللي كان بيخوف الحراميه بصوت الراديو كانوا سكنوا فيها ؟ 
لو عرفوا انها قعدت بتاع ١٠ سنين مهجوره كانوا سكنوا فيها ؟ 
ياترى نصيبهم ايه من الفرح او حتى الحزن بعد كل التوضيبات اللي معموله 

وارجع ابص للزرع والبين باج وقعده القرايه اللي كانت مزاج عالي والراديو وام كلثوم وتظبيط السهرات الصيفيه وازعل ان كل ده حينتهي بالساكنين الجداد 

يالا مفيش حاجه دائمه !!!


الأحد، 9 سبتمبر 2018

دايت شوبنج

وانا باعمل diet shopping قلت اعدي عالخضري اجيب سلطه وفاكهه
المهم المحل واسع جدا وواضح أن العمال في اجازه فمفيش اكياس فوق الاصناف زي المعتاد
دورت فين واخدت شويه اكياس فاضيه تكفي اللي حاشتريه
ما اكترش عليكم حطيتهم في العربيه وبالف بقه لقيت طنط كده لطيفه جت خدت شويه اكياس من القاضيه من غير استئذان ، ماشي مش مشكله
شويه بارد عالتلفون راجل كباره كده وطى عالعربيه واخد اكياس والظاهر ناوي يشتري اللي نقيته قام واخد الأكياس اللي نقيتها ( لسه ماسكه العربيه يعني واضح انها حاجاتي) فضحكت كده وقلتله يا فندم الاكياس والحاجه بتوعي
وكملت كلام في الموبيل وانا بانقي فلفل ، الاقيه برضو خد الاكياس
جرى ايه يا ناس هو انا هفق ولا شفافه
حاجه بجد غريبه ومستفذه
#حدث_بالفعل_قعده_شاي_بالنعناع

الأربعاء، 22 أغسطس 2018

متحرش ومش ترندي

ينزل فيديو لبنت واقفه في الشارع ويجي واحد يستظرف عليها ويقولها نشرب كوفي تصوره وتنزله عالفيسبوك هو و فيديو تاني العربيه فيها شباب ويتكرر الموقف 
.تتباين الآراء حوالين انها غاويه شهره او بنت مش مؤدبه أو او او 

وناس تقولك اصلها مش محجبه ، اصلها كانت لابسه معرفش ازاي بطريقه هيت لك عشان تصطاد الغلبان وتجرسه اصل معرفش ايه 

شخصيا لأول وهبه معجبنيش الموضوع كله وللاسف تخيلت انها متفبركه وخلاص وسكت 

شويه بقه والافندي متصور مع نيلي كريم وشويه في الجونه الناس بتتصور معاه 

شويه كمان واون ذا ران استثمرت الواقعه في شويه اعلانات حقيقي سمجه شبه اللي حصل 

المستفز بقه أن في اليوم اللي الافندي شركه شهيره تعاقدت معاه لعمل اعلان ماهو بقه شاب روش وترندي والناس بتتصور مع جنابه نعرف أن البنت كانت بستنى باص شركتها في المكان ده كل يوم واتاري كل يوم حد بيتراذل عليها فقررت بطريقتها تهاجم وترفض اللي بيحصل ، وان بعد كده شركتها رفدتها عشان كتر الكلام !!!! 

يعني البنت بقت عواطليه والافندي بقه ستار وحسبي الله ونعم الوكيل !!!! 

حقيقياتصدمت وحقيقي زعلت من نفسي ومن سوء ظني  

اقولكم حاجه بقه : البنات والستات في مصر اي كان سنها أو شكلها او لبسها بتتعاكس وبيتراذل عليها اللي يسوى واللي ما يسواش 

محجبه ، مش محجبه ، او حتى منتقبه 
طفله ، مراهقه، انسه او مدام جاره وراها قرطه عيال كله بيتعاكس 

اقولكم كمان : بنبقى لابسين عبايات الصلاه في رمضان وعلى ايدنا سجاده الصلاه وبرضو بنتعاكس 
اقولكم كمان ماشيه بالراحه أو بسرعه او حتى واقفه بنتعاكس وبتقف لنا العربيات 

عشان ايه : عشان الرجاله مابقتش رجاله وبقت بتسمع رذاله الزباله وتسكت وتشاور وتغلط البنت !!! ليه عشان هو مش حيعرف يوقف الحيوان اللي رذل عليها عند حده فنفسيا بيسقط المسؤوليه على البنت عشان يبرأ ضميره 


طب اديكم التقيله : بره مصر الافندي المصري أو العربي مايستجراش يعمل ده مع اي واحده اجنبيه ، الأغرب بقه أنه يعاكس ويغلس على المصريه او العربيه المحجبه عشان عارف انها في بلدها مضغوطه ومكبوته ومش حتعمله حاجه لانها متربيه على أن اللي بيعاكس ما ترديش عليه وهو حيمشي لوحده !!!!.( حصلت معايا شخصيا في فينا ، باريس، بازل ) من مصرين وتوانسه واول ما وقفت ومرمط بكرامته الارض مشي جري لاني كنت حانده لهم البوليس مع أن الشارع مليان بنات كتير اكيد اجمل واروش ولبسهم ملفت اكتر مني بس كل واحد من البهوات دول لا يجرؤ يكلم اي واحده منهم وبالبلدي كده استوطى حيطتي وضايقني !!! 

اقولكم ليه وقفت وهزقتهم لاني عارفه ان في قانون وفي بوليس حياخد لي حقي ومش حيتشهر بيه لكن للاسف في بلدي مفيش الكلام ده ولو وقفت وعملت كده اول من حياجمني الستات اللي في الشارع ولو فكرت اروح البوليس حيكونوا اول من حيستظرف عليه 

المعاكسه والتحرش مش ظرف وروشنه ده قرف وضغط وانغجار في لحظه محدش بيدفع تمنه غير البنت ايا كان رد فعلها سواء بالسكوت ( من نفسها واعصابها أو خوف على اخوها أو ابوها لو حد اتراذل عليها وهمه معاها فتسكت خوف عليهم) ، الرد ( بقله أدبه واللي حواليه)  او حتى لو فكرت  استغلال السوشيال ميديا زي ما حصل مع بنت واقعه اون ذا رن 

ربوا بناتكم ما يسكتوش عن حقهم ، ربو ولادكم يحترموا البنت ويدافعوا عنها وما يسمحوش بالقرف ده يحصل قدامهم 

يمكن في يوم من الايام تختفي الظاهره السخيفه دي 

# ادعم_منه_جبران 

الجمعة، 13 يوليو 2018

شعب متدين بطبعه

كميه البوستات والفيديوهات عن معز مسعود 
بتؤكد اننا شعب فاضي لابعد الحدود 
كتير من مدعي الحريه بقه برضو بيسفوا عليه من باب أنه داعيه وأنها فرصه للسف عالدين ( ده في حاله أنه فعلا داعيه أو بيتكلم في الدين )

رجاله شمتانه فيه أو منفسنه عليه عشان كانوا ( او مازالوا ) مستكترين عليه نوعيه زوجاته السابقه والحاليه 

وستات كمان شمتانه أو غيرانه من جوازاته الكتير 

او مجموعه من الفيمنيست اللي شايفين أنه بيمارس دعاره مشروعه مع أنه اتجوز يعني ما مشيش معاهم 

او ناس بتظيط في الظيطه وتمشي مع الموجه مع الشير اللارادي 

ونطلع فيديوهات وبوستات قديمه ونشاور ونضحك !!!  وكأننا كلنا خاليين من العيوب أو الأخطاء ( ده بفرض أنه أخطأ)

مع أن في يوم من الايام احمد فراج ( من أوائل اعلاميين الدينين واللي كان مثقف اكتر من كتير من شيوخ ودعاه الايام دي ) اتجوز صباح اللي كانت مسيحيه واسلمت بعدها ( وما حجبهاش يعني ولا قعدها في البيت ) واللي بعد كده كمان رجعت للمسيحيه والدنيا لاقامت ولا قعدت لا عالجوازه ولا على الدخول او الخروج من الإسلام ولا عدم الحجاب ولا الاستمرار في الغناء والتمثيل 

لما كنا بنحترم بعض،  حريه بعض، مساحه بعض ، اختيارات بعض 
لما مصر كانت لسه مصر وكنا حقيقي ام الدنيا 

حقيقي مصدومه وقرفانه من الكام يوم اللي فاتوا 
اتكسفوا بقه واتلموا ، عيب والله

السبت، 30 يونيو 2018

قرات لكم : عندما بكى نيتشه


قصه تخيليه لمرض نفسي لفريدريك نيتشه وذهابه للعلاج عند جوزيف بريوير في فيينا ثم عناد الفيلسوف العظيم ورفضه للعلاج ثم عقد صفقه بينهما ليعالج كل منهما الاخر 

القصه عباره عن لعبه شطرنج بين التحليل النفسي والفلسفه اثناء جلساتهما سويا ثم ينفرد كل منهما بمذكراته ليدون ملاحاظاته عن الاخر لتكتشف في النهايه ان جلسات المكاشفه بينهما كشفت عن مكنونات اي وكل انسان 

ناقشم ازمه منتصف العمر ، مشاكل القلق، التوتر، الابداع ،الهوس بأشخاص أو أفكار معينه,  مشاكل اختيار الإنسان لذاته وطريقه ، بالإضافة لافكار دينيه وفلسفيه عن الوجود والتدين ثم نهايه سعيده بحل كل منهما مشكله الاخر بمجرد فتح حوار صادق مع شخص مخلص لا يهتم بتقييم او اصدار احكام عن محدثه وهو ما يحتاج له الجميع منذ قديم الأزل وحتى نهاية العالم 

ثم تأتي المفاجئة عندما يضيف المؤلف في النهايه ملحوظه عن ان كثير من احداث القصه وشخصياتها حقيقيه وهو من اوجد التشابك والحوار التخيلي بينهما من واقع دراسه مستفيضه لمذكراتهما وتاريخهما وكتب كل منهما بما فيها مذكرات سيجموند فرويد صديق الطبيب جوزيف بريوير مع كثير من تحليلات فرويد لشخصيه صديقه وصديقه نيتشه التي كانت صديقته هي الاخرى

الملفت للنظر هو المجهود الرهيب الذي قام به من دراسه وحضور محاضرات عن الطب النفسي والفلسفة ليستطيع كتابه هذه التحفة الأدبية العظيمة
بل ان كثير من الرسائل والاحلام وتفسيراتها كانت حقيقيه!!!! ومذكوره في مذكراتهم

باختصار الكتاب رحله فلسفيه نفسيه غايه في الثراء والمتعه لم اذكر كل تفاصيلها حتى لا افسد متعه قرائتها لكم 
والتي اعتقد أني سأعيد قرأتها يوما ما لمزيد من التحليل والمتعة في وقت لاحق

الاثنين، 25 يونيو 2018

Take me back to Cairo !!!

مش عارفه بجد زعلانين ليه 
الامل حلو وكل حاجه بس برضو ربنا عرفوه بالعقل هو في ايه يسر القلب عشان المنتخب يبين كرامه ؟! ولا باماره ايه كنا حنكسب يعني ؟! 

ده لما عملوا اغنيه كانت فال قطران على دماغهم , دونا عن كل الاغاني take me back to Cairo !!!


كاس العالم كان سبوبه ولقمه عيش حلوه وبح خلاويص 
اللي باع تيشرتات 
اللي نصص معاه 
شركات عملت اعلانات قرفتنا بيها شهر رمضان كله 
رامز افندي عمل برنامج ( لسه عارفه المعلومه آلفظيعه النهارده ) 


زياده البنزين عدت 
صلاح كرهوه في عيشته وزودونا احباطنا اصلا من البلد 
سمير الاسكندراني اتريقوا عليه !!! بس اهو كل عيش هو كمان 


وفد فنانين اتفسح وأتصور وعمل شوبنج، شركات سياحه كلت لقمه عيش حلوه

الحضري، صلاح، شناوي  اتكرموا


رىيش دوله كسب بونط على قفا كل المصريين 
السعودين كسبوا ماتش تخيلوا !!!
الحكم قبض 
صلاح عرف قيمه نفسه ولومكانه مش حالعب ولا. ارجع تاني 
كافيهات كسبت 
قنوات رياضيه كسبت 
الناس اتلهت شويه 
بس خلاص بيتك بيتك بقه ونرجع للواقع وتكتفي بهذا القدر 
المكسب والوحيد أن جون مجدي عبد الغني جه بداله ٢ وبرضو بتوع صلاح بالعند في مجدي افندي I  بس تخيلوا واحد يجيب جون في كأس العالم وما رضيش يحتفل بيه !!! داهيه تسد نفس كل اللي كان السبب !!!

نعود لدوله الايس كريم بقه ونتقابل سنه ... تفتكروا حنرجع امتى ؟! 

السبت، 9 يونيو 2018

عربيه الفول البناتي

كحد متبرمج في رمضان ومش بيلحق حتى ينام بالصدفه بابص من البلكونه اكتشف ايه بقققه عربيه فول قدام عمارتنا واقف عليها ٣ بنات من اشيك وانضف ما يكون 

استغلوا الكافيه اللي جنبنا واتفقوا معاه يديهم نور وكام ترابيزه فرشوها في الجنينه اللي في نص الشارع وتبادل منفعه من زبائن الكافيه بدل ما يروحوا بدري للسحور يتسحروا عندهم فصاحب الكافيه يضمن الزبائن للفجر وهمه يجيلهم زبائن عالجاهز 

معاهم ولدين يمكن عشر و١٥ سنه يسرفسوا عابترتبيزات والتقديم في أطباق فوم وعاملين نصبه شاي واومليت 

الناس سهرانه تتسحر وهمه بعد الفجر يلموا وينضفوا الدنيا وتبقى فله ولا كان في امم كانت بتتسحر 

لا ريحه ولا صوت ولا أي إزعاج ، ضيف على كده كون أصحاب النصبه بنات شجع بنات كتير تحقق حلم الاكل على عربيه الفول دون مضايقه أو احراج 

الحقيقه انا منبهره بيهم وحقيقي نفسي الحق اتسحر عندهم مره قبل رمضان ما يخلص 

اللي عجبته الفكره همه في امتداد عباس العقاد قدام اول عماره في حي السفارات 
حتنبسطوا حقيقي 

السبت، 31 مارس 2018

ارجع يا زمان. حن يا ماضي

بعد حفله الموسيقى العربيه  النهارده في ذكرى حليم  قررت وانا مروحه اكمل الدماغ الموسيقيه باني اسمع عبد الحليم وانا مروحه ، اللطيف أن في اغاني بالصدفه اتغنت في الحفله واللي بجد كانت من اجمل الحفلات اللي حضرتها على الإطلاق اتغنت في البلاي ليست اللي في العربيه واللي كانت حفله لايف برضو مش تسجيل لقيتني باسرح كده واقول كم الانبساط اللي انبستطه بمغني صوته حلو ، مابالك بقه باللي حضرة الاغنيه لايف من عبد الحليم ولا ثومه ولا اي حد من عظماء الزمن الجميل ؟! 


اعتقد ان دار الاوبرا فعلا بتبذل مجهود خرافي لإحياء الذوق العام بحفلاتها الجميله وتسمعنا اغاني طربيه او حتى وطنيه يمكن مش كلنا سمعناها في ظل الاسفاف اللي حوالينا واغاني المهرجانات والازعاج اللي عايشين فيه 


باتخيل كده الواحد يمتلك اله الزمن ويرجع ورا السبعينات ويحضر حفله لثومه ولا لحليم ولا شاديه ولا عبد الوهاب ولا نجاه يااااااه


وافتكر حيره الواحد كل شهر لما برنامج الاوبرا بينزل فيه كذا حفله موسيقى عربيه ويلاقي نفسه يجري يححزهم كلهم وانشاله ما حد حوش !!! 


واتخيل لو كنا بقه في السبعينات ونفس الموقف حصل كانت حتبقى الحيره شكلها ايه 


اللي باتعجب له كمان ذلك الزمن الجميل اللي كان في كل العمالقه دول من مغنيين ومؤلفين وملحنين ، مش بس كده وكتاب عظام وصحفيين محترمين 


شكله ايه الزمن الجميل ده وفيه كل الإرث الثقافي الثري ده وشوارعها الهادئه الشيك وناسه المحترمه وتخلص اغنيه حليم وفي دماغي سؤال واحد ياترى كنت حاختار انهي حفله عشان احضرها 

تصبحوا على فرحه

ارجع يا زمان .. حن يا ماضى
ايام الحب ماكان .. ماكان عادى
ولا كان الشوق للناس تهمه
ولا نظره عين وحنين ازمه
ولا عقل الناس خاوى وفاضى
حن يا ماضى

الأربعاء، 21 مارس 2018

شكرا شكرا شكرا يا مامتي


تقف قدام الناس تقول خطاب الخريجين في الجامعه الامريكيه واللي كان من اجمل الخطابات اللي اتقالت على حسب اراء ناس كتير في اليوم ده
وهيه نازله من المسرح تفتكر لقطه كده من زمن طويل ( مش قوي يعني :) لما كانت لسه راجعه من الدوله العربيه اللي كانوا فيها واللي مكنش فكره الpresentattion skills   من اولوياتهم خالص فبي المدارس , ولا حتى عمق واختلاف مجالات اللغات موجوده فيها في وقت مكنش فيه مدارس لغات في الدوله دي


واللي لما رجعوا مصر انطلب منهم يمتحنوها في مستوى اولى ثانوي في اولى اعدادي وقت ما كان الانجليزي بتاعها بعافيه
قعدوا الصيف كله يصحوا سته الصبح يذاكروا ويقروا ويحضروا كل يوم ل 12 بالليل , وامتحنت ونجحت ودخلت مدرسه كويسه


وافتكرت انها كانت كسوفه ولما جه الدور عليها في حصه القصه الانجليزي اتكسفت تقرا فالمدرسه اللطيفه بتاعتها قالت لها : قوووععدددي " ووشها احمر واتكسفت وقررت ما ترفعش ايدها تاني في حصه الstory


بس الام ما سكتتش ودخلتها كورسات صيف شتا عشان تجراها وتعوض اي نقص حصل في الماضي وشجعت الاذاعه المدرسيه فبقت بتتكلم عادي جدا قدام اي عدد من الناس من غير لا خوف ولا كسوف


الغريب بقه انها كانت مدرسه عربي بس مشيت كويس جدا في الكليه اللي كل دراستها انجليزي , واللي محدش تخيل انها كانت مدرسه عربي
كل ده افتكروه وهمه راجعين اليوم ده من الجامعه وقعدت الام دي تضحك وتقلب كف على كف وكان نفسها تشوف المدرسه اياها تقولها بنتي اهي احسن من كل اللي كانوا بيقروا لبلب في يوم الحصه ايايها


شكرا شكرا شكرا يا مامتي (لسه حاكيه القصه دي بالمناسبه قدام جمع محترم من اكابر شركات وجامعات في مناسبه ما كده ونالت اعجاب وتصفيق لا تتخيليه )


السبت، 24 فبراير 2018

A mircle

In a bleak midwinter's night ,
A burning tail light glow into his eyes , an orchestra sore into his ears and he felt joy.
A joy that can not be explained .
The tail lights then disappeared, the joy was shifting to confusion. He looked beside him and she was not there . He started panicking but a woman came and she was looking at him with a lovely warming smile . she placed her small hands on his forehead and said " Dont worry , you both have been saved by a miracle"
She then checked his pulse , smiled again and left.

By Aflaton


الأحد، 18 فبراير 2018

الفار فرفور


ياما عملنا في بعض مقالب 
اصعبهم عالاطلاق فعلا اول سكشن وكلنا مش عارفين نمسكهم واولاد بيجروا ورا البنات بالفيران، حاجه كانت قمه في الطفوله الحقيقه 

اذكر انه مره خد caffien وهيبر ورميته جوه الميزان وده قعد يتمرجح على كفه الميزان لما جنني 
ويااااما فتحنا إدراج لقينا الفئران بتلعب جواها من الفئران اللي اتحبست من السكشن اللي قبلنا 

اذكر قبل الامتحان اشتريت كام فار وجبتلهم مصيده وحطيتلهم اكل عشان في تجربه لو الفار مش واكل ولا شارب مش بتعرف ال unknown وحطيتلهم نشاره خشب واكل في طبق وحاجه اخر دلع حاجه شبه لينا وفرختها في مسرحيه المتزوجون !!! ,الفئران بقه سابو الاكل وكلو الطبق !!! وقلبوا ريحه البيت وماما كانت حتضردني قبلهم 


واسواهم على الإطلاق ال rithing لما كنا بنخقنه بخل وبعديه مسكن ونقيس قوه المسكن بعدد التقلصات في جننبه قبل وبعد الحقنه 
الحقيقه اوقات باحس أن الفئران دي حتجري  ورانا يوم القيامه 
ربنا يسامحنا ويرحمهم بقه 

الفيديو تحت بيوري مسكه الفار :)
https://m.facebook.com/story.php?story_fbid=1110766765721495&id=100003645454904




الخميس، 15 فبراير 2018

قرات لكم : كتب كتييير

الفتنه الكبرى 
بدأت بالعبقريات لما وصلت لعبقريه الامام ، كتير من التفاصيل كانت جديده تماما علي ، ثم ازداد فضولي  فقرات معاويه للعقاد ايضت ، ازداد الفضول ولقيت عندي في المكتبه حياه الحسين لعبد الحميد جوده السحار  ، ما كدبتش خبر قريته وكان من أكثر الكتب في حياتي اللي اصابتني بالحزن والاكتئاب لفتره طويييله جدا جدا  في فتره انا اصلا حساسه فيها جدا لاي شكل من أشكال القهر أو الظلم 

وفي دردشه مع صديقتي المثقفه بسمه قالتلي لا بقه اللي احلى منهم الفتنه الكبرى بجزئيه  لعميد الادب العربي طه حسين وتصادف هذا مع شرا التابلت فقريت الجزء الاول (عثمان) وقبل ما ادخل عالجزء التاني قريت عثمان ذي النورين  للعقاد استكمالا للصوره وبعدين قريت الفتنه الكبرى الجزء التاني لطه حسين علي وبنيه

اكتملت الصوره او خلينا نقول اقتربت من الاكتمال لفتره لم تدرس في المدارس ولم يسلط عليها الضوء بشكل كافي كفتره من اظلم فترات التاريخ الاسلامي 

المؤلم بشده هو التحول الشديد وانقسام الصف حتى بين صحابه الرسول ورحمه وهم من عاصره وعاش معه ونهل من علمه !!! وهو شيء مرعب جدا ، امال الغلابه زينا يحصل معاهم ايه !!!!

الاصعب هو احساس كل فريق أنه صاحب الحق والمدافع عنه ولو فعلا حطيت نفسك مكانه تلاقي وجهه نظره معقوله 

واللي كان فعلا بيجتهد ويحاول في ظل معطيات جديده لحياه المسلمين وتغاملهم مع امم جديده وثقافات جديده وتغير حياه التقشف في الجزيره للفتوح والغنائم 

والصراع داخلهم حتى كصحابه بين الزهد وحب الاخره ، والحب المشروع للترف والعصر الجديد متمثلا في علي ومعاوية مثلا

عجبني جدا تعليقين لطه حسين في نهايه كل جزء في الجزء الاول حلل ان الفتنه بدأت عند الفاروق لما لم يحدد خليفته وتركها شورى في وقت بدأت فيه المعطيات الجديده اللي تعبته هو شخصيا فكانت بدايه المشكله

والتحليل التاني في الجزء التاني وهو تحليل انقسامات المسلمين ووجود ثار بين الشيعه والخوارج لقتل علي ، الخوارج والشيعه لمن قتل في النهراوان، الشيعه وبنو اميه ثاران بقتل حجر ثم الحسين واهل بيته وجماعته ، وزعم بني اميه بثارهم عند الشيعه والخوارج بقتل عثمان ، بني اميه وباقي المسلمين لقتلى يوم بدر !!!! 

ليستمر سلسال الدم ليومنا هذا 

للحديث بقيه بعد قراءه فاطمه الزهراء ،الفاطميين، عمرو بن العاص للعقاد لتكتمل صوره هذه الفتره قدر الإمكان 

الأربعاء، 14 فبراير 2018

فالنتينو

عمنا فالنتينو كان قسيس زمااان كانب بيجوز المحبين ضد قوانين الامبراطوريه اللي منعت هذا وقت الحرب واللي اتقتل بعد كده وبقه اليوم ده تمثيل للحب والمحبين
لو تخيلنا ان سيادته زي الملايكه كده بيلف لفه على العشاق اللي اتقتل من كام قرن عشانهم او انه بعث لمده يوم واحد , تخيلوا كده حيشوف ايه
  • حيلاقي ناس بتراقب في صمت ومتشحتفه يا عيني وما بيتكلموش. ليه يا ابني انت وهيه تتحبسوا ورا شاشات موبيل ولابتوب
  • وفي ناس تانيه الحب عندها ولع في الدره ودلدق على الفيسبوك وجو تلزيق خالص سعادتك !!
  • وفي ناس تانيه الحمد لله عدوا ام المرحله دي واتخطبوا , دول الاكثر بؤسا بقه مسحولين في شقق وكرانيش وصيني وقزاز ونيش وبزرميط سعادتك
  • اللي عدوا كل ده بقه والحمد لله اتجوزوا محتاسين في اقساط الفرح والفشخره او بامبرز العيال والمدارس الانتناشونال
  • اللي اعدوا كل ده وقرروا يخرجوا من هذه الدايره القذره دي لو حسوا انها مش مناسبه ليهم , اتلطموا بقه في محاكم الاسره ومشاكل الرؤيه !!!
  • في بقه اللي مش واخدين بالهم وقلبوا الدنيا لبس احمر وورود ودباديب وهدايا وحولوا الموضوع لشكل تجاري بحت واوفر من هنا على هناك ان كان للحبيبه في الهدايا ولا للسناجل لزوم الشحتفه !!!!
  • الناس كلها بتكره بعض طول السنه وتيجي تطفح عليهم المشاعر الجياشه والحب يولع في الدره في يوم واحد !!! والناحيه التانيه السناجل نازلين ندب وبوستات قلش عالسوشيال ميديا
وتلاقي كده عم فالنتينو رجع وراء كده ويقولهم ثانيه واحده همه دول اللي انا اتقتلت زمان عشانهم !!! اردم يا ابني عليه تاني في قبري منكم لله يا ظلمه  حولتوا الحب ليوم في السنه وهدايا وماديات وخناقات الهي يغم نفسكم ، اردم اردم !!!



الجمعة، 9 فبراير 2018

الا لعنه الله عالدايت

تسرح كده في الشوربه السخنه ام تتبيله وحبهان بيضا كده من غير اي حاجه وتفتكر كده اعظم الاكلات المصريه وتشم وتستطعم كل اكله منهم !!!
تشم كده خبيز كيكه البلح ام قرفه وشكولاته وقلبتها في طبق جنان وتقطيعها والبلح يلسوع بقك 
ثم يخطر ليك القراقيش وكحك العيد وريحه الحواج مختلطه مع ريحه الخبيز  واللي تشمها وانت طالع من باب العماره 
وبعدبن بقه كلموني عن خلطه المحشي وهيه بتستوي وريحه الخضرا ماليه البيت ويا  سلام لو في محشي فلفل وكوسه بريحتهم المميزه وهيه معبقه البيت 
طب كلموني عن طشه الفته في العيد الكبير بالرغم من اني مش من هواه العيش ابو ميه ده إلا أنها بيوحشني جدا ولازم أدبه في العيد 
طب تومه السبانخ والملوخية ام كزبره ناشفه 
او بطايه كده متدلعه ومعمول على شوربتها قلقاس بالخضره  أو كسكسي جنبه يخني غلي لما قال يا بس وشربته بقت بني من كتر ما غلي
بلاش ده كله قولوا لي عن فرخه بلدي متحمره في سمنه بلدي ومرشوش عليها ملح وفلفل بعد ما اتحمرت 
او حمام محشي وجنبه ملوخيه خضرا في عز الموسم 
ولا صينيه رقاق مظبطه ومفلفله 
طب في خلاف عالمحرمش في صينيه مكرونه بالباشميل او حتى الرز الملسوع
يا جدعان ده حتى دقه الكشري أو بصله البصاره بعد ما تخمى على قلبك !!!
الاحلى بقه بعد اي اكله من دول كوبايه شاي تقيل بالنعناع وتانتخ وتضحك وسط لمه البيت 
صحيح ما نقدرش ناكل الكلام ده كل يوم انما بجد وحقيقي الاكل لذه ونعمه واستمتاع
كل ده عدى في خيالي وانا باشرب شوربه الفراخ المتبله وهيه لسه نازله من على النار ، مافقتش غير في اخر معلقه !!! 
الا لعنه الله عالدايت