السبت، 30 يناير 2016

ان شاء الله والف مبروك


كشعب مصري اصيل بيحب يظيط في الظيطه ويجود ويحط التاتش بتاعه

عمركم لاحظتوا او ركزتوا في الفرق بينا وبين اي شعب تاني في فكره المباركه لاي حاجه؟

مثلا واحده خلفت : عاده والناس الطبيعيه بتقول حمد الله على السلامه , تتربى في عزكم وكده الا اننا بنحط التاتش ولازم يتلزق فيها : عقبال ما تخاويه(ا) وكاننا لازم نحمل الست او الراجل هم تربيه النونو والسهر عليه وبعدين حمل وولاده لطفل تاني وكاننا بنقولها كملي جري وحمل هم ده الراجل ما بيكنش دفع الفاتوره الاولانيه والست ما بتكنش لسه شمت نفسها لازم ننكد عليهم يعني ؟

حد خد بكالريوس ولا ماجستبر: الناس عاده بتقول برافو , well done , تعبت وتستحقها انشاله  يا بختك اي حاجه طبيعيه اما احنا لازم نحسسه انه مش كفايه ونبدا نتمنى الشهاده اللي وراها واللي اساسا ممكن ما يكنش بيفكر فيها لانه طلع عينه في الاولانيه بس لازم نحسسه اه مش كفايه لازم تجري ورا تطلعات المجتمع منك مش مهم انت عايز ايه ولا نفسك في ايه؟

ده حتى اللي رجع من عمره او حج لازم نقوله عقبال العوده وكاننا بنقوله : لا لا مش مقبوله ابدا فكر في اللي وراها يا بابا كان غيرك اشطر !!!

مثلا واحده بتحضر مناسبه لوحده تانيه لازم نفكرها انها لسه ما عملتش الانجاز الفظيع بتاع صاحبه المناسبه ولازم ننكد عليها بعقبالك برضو !!!

يا جودعان خليكوا في حالكم ونبارك من غير تجويد ومن غير فزلكه الهي يعمر بيوتكم وعقبال عندكم وعلى راي الست الكمل انعم سالوسه " ان شاء الله والف مبروك" ده حتى لما بنقول مبروك لازم تتقال الف الف الف مبروك وكان مبروك كلمه قليله ومش كفايه مش بقولكم بنحب نجود !!!!

 

الخميس، 28 يناير 2016

خواطر : دوشه النفوخ

عن الهوسه والدوشه اللي في النفوخ من شغل وواجبات اسريه وحياتيه،  الدوشه اللي من 

شدتها اوقات بتبقي عايز تعمل mute لكل

حاجه حواليك وانشالله تخرب 

الدوشهةاللي من كترتها ما بتعرفش تركز فعلا في ولا حاجه ويبقي اوقات الحل الوحيد 

انك تطفي دماغك شويه مع موبايلاتك وتاسكاتك وكل سلاطاتك وبابا غنوجك وبجججد 

اياكش تولع 
او علي اقصي تقديىر لو مزنوق قوي في الشغل تحجز ميتنج روم وما توريش حد وشك وتملا ودنك مزيكا وتحاول ، تحاول تشتغل 

يا رب تنفع

خواطر صباحيه : فيروز

خواطر صباحيه : فيروز 


من زمان ارتبطت فيروز بالصبح البدري في كتير من الاذاعات 

وحتي اصحاب المزاج الفيروزي لو ما لقيوهاش في الراديو عندهم سي دي كده بيشتغل الصبح والصبح بس

هي ذلك الصوت الدافي العميق الحنين وفي نفس الوقت القوي والمميز مع روقان موسيقي الرحبانيه بتديك جرعه مكثفه مميزه من 

المزاج في وقت قصير جدا بالظبط زي فنجان قهوه مظبوط ومركز 

واعتقد ده سر ربط فيروز بالقهوه والدفا في الشتا 

فيروز مع برد الشتا ومطره النهارده كانت حكاااايه 

صباحكم سكر

خواطر صباحيه : المطره

 


تصحي علي صوت المطر وانت رايح عليك نومه فتقرر تبقي رايق ومش مشكله اتاخر ما انا كل يوم ياوصل فالمعاد 
تلبس وتنزل تلاقي لسعه برد محببه للنفس 

تحس كده انه دوش اجباري للبلد والشجر والناس وهمومها 

تمشي الهوينا كما يمشي الوجي الوحل وتشغل عمر خيرت وتعلي المزيكا وتستكنيص 

تنسي كل الزحمه وتتمني السكه تطول اكتر واكتر مع دفا مج الشاي ولسعه البرد وادب كل اللي سايقين 
وتنسي الدنيا مع عود وقانون عبد الوهاب وتوزيع عمر خيرت في موسيقي كل ده كان ليه 

صباحكم سكر

التشريفه

التشريفه 

في طريقي للشغل عاده باعدي علي احد القصور الرئاسيه 
والملفت للنظر فكره الطابور الطوييييل اللي مدي اللي في الشارع قفاه!!
طب خدنا ايه من وشك عشان تدينا ققاك ؟!
 
كم البؤس والشقاء للرتب الصغيره والامتعاض علي وشوش الرتب الكبيره، البرد والمطره فالشتاء والحر والرطوبه فالصيف 

طب يا سيد الناس ما في هيلكوبتر وخلاص !
بس الصراحه الضيق اللي بيجيلي بينتهي بفكره انهم واقفين في استقبالي ايوه دول بيستقبلوني ويامنولي الطريق
صباح الفل 

الأربعاء، 27 يناير 2016

كل سنه وانت طيبه يا مدونتي العزيزه




من سنتين بالظبط وفي ليله من ذات الليالي وافتكر كنا في اجازه صيانه من شغلي وقعده كده الساعه 1 بالليل قررت اعمل بلوج بدل القديم اللي نسيته واخترنا الاسم انا وصديقتي العزيزه منى على الواتساب الاول كان اسمها قصاقيص ورجعنا سمناها كذا اسم تانين ثم تم الاستقرار على الشاي ابو نعناع (كنت باشرب شاي بالنعناع ساعتها وهو بالمناسبه مشروبي المفضل)


عمل المدونه  كان بعد الحاح من بعض صحابي لما عجبتهم كتابتي على فيسبوك واللي انا شخصيا كنت مش حابه الفكره ومستتقلاها ومش متخيلاها !!!


ومن ساعتها اصبحت الملجأ بتاعي في ساعات زعل وفرحه وزهق , في خواطر بتيجي في دماغي بمناسبه او من غير مناسبه وانا سايقه وانا نايمه وانا في السينما , باسمع الراديو او حتى باشتغل


طلعت فيها كتييير من غضبي وفرحي وزعلي او حتى تهريج او تسالي  


لا انكر ان 2014 كانت وما زالت سنه ذهبيه في حياتي بما فيها البلوج اللي كان فيها 118 بوست في حين انهم كانوا50 بس في 2015

حتى النسخه الفيسبوكيه منها اتعملت في 2014 , انا اعترف كنت كسلانه ومحبطه في 2015 ويارب تكون 2016 احسن منهم الاتنين


الجديد السنه دي هو ذلك الموضوع ذو التلات اربع سطور المسمى بخواطر صباحيه واللي بقالي اسبوع باعمله ويحتوي خواطر صغننه الصبح قبل الزحمه والدوشه , مع نشر بعض البوستات القديمه في مدونه فيسبوك للي ما كنش متابعها زمان


جالي ردود لطيفه جدا ومشجعه جدا سواء في المدونه الاصليه او الفيسبوكيه

احيانا غير متوقعه زي مثلا بوست علي البدري اللي اتنشر من عشرين يوم واللي اتقرا 139285 مره وجالي عليه 242 كومنت واتعمله 1200 شير اه والله انا كنت باعد الاصفار عشان اقرا العدد صح من المفاجاه


عندنا قراء من كل حته فالعالم ازاي ما اعرفش وده باين في احصائيتها اللطيفه جدا الهي يجبر بخاطركم كلكم

اجمالي المشاهده على فيسبوك 250.000 مره تقريبا  اما المدونه الاصليه فتمت زيارتها 12259 وده رقم عظيم لم اكن اتخيله يوم 27 يناير 2014


حاليا عندنا 1928 قاريء على فيسبوك كان نفسي نوصل 2000 في العيد ميلاد رقم 2 بس ملحوقه باذن الله حنعدي 3000 في عيد ميلاد رقم تلاته همتكم في الشير واللايك محدش عارف يمكن تقلب كتاب ولا يكتر على ربنا ننزل معرض الكتاب الجاي ولا نبقى عمود في جرنان مين عارف !!!


يا رب تكون بوستاتي بتعجبكم وتضيف ليكم معلومه, بسمه, فكره او اي حاجه ممكن ما اكونش حتى فكرت فيها وزي ما قلت في اول موضوع خالص لو ما عجبتكوش طيروها في الهواء قصاقيص

مرحبا بكل التعليقات بما فيها النقد والاقتراحت في كل واي وقت

كل سنه واحنا طيبين وبالشاي بالنعناع متكيفين


تحياتي

لمياء جبريل

الاثنين، 25 يناير 2016

في الصيدليه 2





من المواقف اللطيفه  والمتكرره جدا في الصيدليه هيه العشم الزياده قوي بعض الزباين مثلا ممكن يمليلك اوردر طويل عريض وفي الاخر يقولك وبجنيه فينو وازازه زيت فحضرتك تتخض كده وتقووله افندم؟ يقوم يقولك الولد بتاع الديلفري يعدي عالفرن والسوبرماركت في طريقه ويجيبهم معاه تقوم حضرتك تقوله لا يا فندم ما ينفعش يقوم يقولك ده كل يوم بيعمل كده فيبقى شكلك قله جدا لان الديلفري شغال من الباطن

 
مره تانيه بنت الحارس  خدت ورقه الطلبات ونزلتلي طوالي ولقيتها كلها زيت وسكر وخل وملح بقولها ايه ده قالتللي هيه الهانم فوق ادتني الورقه دي فقلت ابدا بيكم , والله كتر خيرك  تشكري يا ذوق


مره تانيه بنت الحارس جايه بتقولي عايزين شامبو راس واكتاف فبقولها ايه ده ؟ قالتلي الست فوق بتقولي اسم بالانجليزي ما عرفتش انطقه قالتلي قوليهم شامبو راس واكتاف وهمه حيفهموا اتاريها عايزه head and shoulders  تخيلوا !!!
مره تانيه واحده واضح ان تعليمها على قدها واتضح انها مش بتعرف تقرا انجليزي وطلبت مني الشامبو المستورد ده اللي خدته قبل كده قلبت ملفها ما لقيتهاش وخده حاجه معينه , بسذاجتي بقولها مليني الاسم من على الازازه تقوم تقولي اكتبي كده من الشمال لليمين :اتنين بس بالمقلوب, سبعتين لازقين في بعض, واحد وفوقه نقطه , رقم اتنين بالمقلوب مرتين  اتاريها عايزه شامبو swiss formula  بس الصراحه بهرتني بحسن تصرفها !!!


واحده تانيه لطيفه جدا جدا جدا قررت تشتري عدسات ملونه عشان رايحه فرح , مفيش اي مشكله ودون الحديث عن الخوته في اختيار اللون واللي الحمد لله تمت بنجاح الا انها فجاه وبدون مقدمات قررت تلبسهم في الصيدليه عشان هيه عمرها ما حطت عدسات وقررت تخلي الدكنوره تلبسهملها فالدكتوره اللي هيه انا قالتلها انه ما ينفعش لانها ببساطه وخلقه ربنا حتقفل عينها اول ما اقرب ايدي في عينها وانها هيه اللي لازم تحطهم لنفسها وعنها واخدنا كتير؟ بتاع ساعه على بال ما تمت العمليه بنجاح

 
احد الامور الكوميديه جدا والمحرجه جدا هو ذلك الستاند ذو الالوان الزاهيه اللي عاده الخريجين الجداد ما بيفهموش ده ايه واللي بسذاجتي كنت متخيلاه اول ما اتخرجت ستاند لبان !!!


من المواقف المحرجه جدا هو عشم الزباين ورغيهم خصوصا لو الشفت زحمه وانت روحك في مناخيرك بس لازم تفضل ظريف ولطيف ومبتسم ولا جدو اللي بينزل يمشي رجله يقيس الضغط وبعدين يقولك هاتولي كرسي مش قادر اقف وبعد قياس الضغط يركن فالصيدليه ساعه مش عايز يقوم تقوم اليوم اللي بعده توصي العمال لو جه ما تجيبوش  كرسي عشان ما يطولش يقوم يقولك ما ينفعش اقيس الضغط وانا واقف ويحرجك وتضطر تجيب ام الكرسي !!!

 
ولا لو راجل جاي يجيب لبناته حاجه حريمي واللي واقف مش فاهم ويبدا يسال اساله الراجل مش فاهمها واللي بالنسبه للي واقف امور عاديه بنسال في تفاصيلها عشان نساعد الزبون يقوم الراجل يزهق ويروح وهو مستغرب ايه الغباوه دي !!!
من المواقف الغريبه بقه لما يتنصب عليك او تتسرق وانت زي الشاطر مش مستوعب الحدث الجلل اللي حصلك وفيييين لما تستوعب انك اتسرق منك دوا بالفين تلاتالاف جنيه ورد فعل صاحب الصيدليه لما يعرف ان الديلفري ساب الدوا والفلوس للراجل وانك قاعد مش عارف تتصرف طب حاعمل ايه اجري وراه فالشارع يعني

 
او الفراغ وقت ماتشات الكوره والزحمه موووت وقت الفطار في رمضان , والديش بارتي في رمضان او لما العمال يقرروا ياكلوا كشري ويقلبوا ريحه المكان صلصه وانت مكنتش متخيل مستوى الريحه لما ضحكوا عليك واقنعوك توافق انهم يجيبو كشري في الصيدليه ساعتها بتقول يا ارض انشقي وابلعيهم بريحتهم كسفونا وسط الزباين وتجري تفتح علبه بليدج ومفيش فايده الريحه نفاذه ولا نهائيه

ولا لما صاحبه الصيدليه نفسها هفتها عالبطاطا ومصر كلها دخلت الصيدليه ساعتها , وقتها كانت حتموت من الكسوف

ستات فاضيه بتنقي ماكياج واطفال شبطانه في لبان ورجاله واقفه محتاسه بطلبات وبوابين رايقين جايين يرغوا
عالم تاااني خاااالص
حواديت وحواديت لا نهايه لها بس ايام دمها خفيف وظريفه خصوصا لو معاك عمال لطاف وجو المكان حلو بتبقى احلى ايام والله
انتم بقه يا معشر الصيادله ايه احلى مواقف حصلتلكم في الصيدليه ؟ انا بقالي حلقتين باحكي احكولنا انتم بقه

لينك الجزء الاول للي ما قراهوش






 

الاثنين، 18 يناير 2016

معاك فالسكه




مش من عادتي اشغل الراديو وانا سايقه , عاده عندي اغاني طربيه وموسيقى شرقيه اصيله امشي ادندن معاها

من كام يوم قررت اكسر القاعده واشغل الراديو بشكل عشوائي تماما

اتكعبلت في برنامج اسمه معاك في السكه, المذيع في الحلقه بيتخيل موقف ويبدا الجمهور يعلق عليه , كان الموقف التخيلي هو جعل كل سواقين ميكروبصات العاصمه من السيدات



وبدا الجمهور العظيم يبدع :

اللي قالك يبقى كل الناس اللي سايقه حتتشل

واللي قال ان بدل ما تخلي الدرج اللي قدامها للفكه حتقلبه تسريحه وتملاه روج ومكياج

واللي قال الستات حنينه ومش حتلم الاجره من الزباين الكحيانه

واللي قالك مخالفات المرور حتتحول لفمين غسيل تقعد السواقه عالطشت كل ليله تاخدهم للامين او العسكري اللي حيوقفها

الحق يتقال بعضها ضحكني ولكن المجمل صدمني من كم الاستهزاء والاستخفاف بسيدات المجتمع , واللي اي واحد ظريف من اللي علقوا ما يستجريش يقولها قدام امه او اخته او صديقته او مراته من باب الاحترام بقه او الخوف او اي حاجه تانيه فكل واحد وظروفه

الصادم بالنسبه لي كمان هو تعليق المذيع اللي خلا من الموضوعيه والحياديه المطلوبه وتحول البرنامج لقعده تهريج على قهوه بلدي

الوحيد اللي جبر بخاطر الستات الغلبانات هو مستمع غلبان قالك طب ليه لاه ما نعملش ميكروباص حريمي فعلا زي ما في البينك تاكسي واللي في وجهه نظري المتواضعه مشروع اكتر من ممتاز



ايه الساده الافاضل الفكهيين ابقوا اتفرجوا على فيلم شيكمارا وانتوا تفهمو وبجد ومش بهزار ان السائق السيده هو من اكثر السائقين التزاما واحتراما اقله مش حتكسر اشاره وتنزل تبلطج على العربيات اللي حواليها , وحتحافظ على عربيتها والعربيات اللي حواليها لانها عاده عندها احساس بالمسؤوليه تجاه اللي معاها واللي حواليها

الست عموما لا تميل للمشاكل والشكل لانه عكس طبيعتها ولذلك اتصور ان معدل الحوادث حيقل لانها عالاقل مش حتضرب ترامادول ولا حتمشي تسلي نفسها بكلاكسات عالفاضي والمليان ولا حتلوث اسماع اللي معاها باغاني هابطه تخدش الحياء والذوق العام


علي الاقل الست حتعمل حساب لغيرها و مش حتقرر انها فجاءة وبدون مقدمات انها تقف في نص الشارع علشان تركب زبون ولا تترازل علي بنت ماشية في حالها ولا علشان زبالة و قررت تعمل بيبي وهي ماشية
حتعمل حساب واحدة ست طالع عينها و رجعة من الشغل و في دماغها العيال وابوهم والغدا وامها اللي مش عارفة تزورها و مديرها اللي مطلع عينها وحتهدي لحد ما تركب وتقعد ومش حتقعد تقولها يلا يا ماما اخلصي الترقة فاضية
 


اللي اعرفه ان في سائق كويس وسائق مش كويس وان الاسطوره اللي اوجدها المصريين ان الستات ما بتعرفش تسوق ده نوع من تبرير استقوائهم على الستات اللي حواليهم فالشارع كنوع من الانتقام من مديره مفتريه او زوجه عصبيه او حماه مفتريه او نوع من فرض السطوه والسيطره على كائن رقيق وضعيف حواليه عشان الغضنفر يحس شويه بقوته وجبروته لا اكثر ولا اقل



من رحمه ربنا بيه اليوم ده اني وصلت بسرعه وقفلت الحلقه المستفزه دي وقررت ارجع لسيديهاتي والاغاني بتاعتي وبلاش استظراف قال معاك فالسكه قال !!! العالم بيسيب الستات تسوق طيارات واحنى لسه بنقول حتاخد فم غسيل لامين الشرطه بدل المخالفه !!!!

الثلاثاء، 12 يناير 2016

دفاء البرد في الشتاء



حتقولي هو ايه اللي دفاء البرد في الشتاء؟ حاقولك ماهو لازم ندفي البرد بحاجه دافيه عشان ما يسقعناش, بالبلدي كده بتعملوا ايه 
عشان تدفوا في الجو اللطيف بتاعنا في الشتاء واللي ياما خدعونا في الدراسات انه حار جاف صيفا معتدل شتاء


نسيوا ان البيوت معظمها شبابيكها منفسه وان الحيطان بتدخل سقعه فظيعه واننا وبجد بيوتنا غير مستعده لبروده الشتاء
وهنا تلحأ الستوته المصريه لبدايل عظيمه جدا


في وجهه نظري المتواضعه شربه العدس من اهمها واللي بجد اللي اخترعها ده فنان كوبايه العدس الدافي من باب الشياكه لا مثيل لها فما بالكم لو الموضوع قلب بعدس وعيش ناشف وبصل اخضر وندخل ننام على طووول
احد اهم قوت مكافحه البرد هو حمص الشام الشهير بحلبسه واللي بشويه شطه وكمون وليمون بتحتاج لمطافي العاصمه عشان حتدفى بزياده


ثم ياتي العظيم الملقب بالسحلب وهو برضو من الاشياء النميسه للمصريين ويا سلام عالمكسرات بقه وتدلع كده وتشربه بالمعلقه عشان يقولوا عليك ابن ناس بدل ما يعملك شنب وانت بتشربه
ثم يتقدم عالساحه الحلبه المحوجه والمغات بالمكسرات برضو من الاشياء الخاااصه جدا بالمصريين


عندكم كمان العسل الاسود بالطحينه والعيش الناشف , ولو الحاجه عايزه تدلعك تقلبهم ثخينه ( عيش بيتحمر بزبده ويتسقي عسل اسود ويتاكل هم النم )


الكاكاو السخن ولو عايز تدلع نفسك بقه سنه نسكافيه وكريمه للتزويق
مش حاتكلم عن الحاج ابو فروه  وابداعه بس في وجهه نظري المتواضعه البطاطا تفوقه جمال وابداع خلينا في الشعبي الجميل ابو عربيه وورق بيتحرق عشان تتشوي (مش الاي كلام المعموله في الميكرويف بلاش استسهال)


عندكم كمان كل انواع المشروبات الساخنه من شاي وقهوه وينسون وشاي اخضر ونسكافيه كله بيزداد جمالا في الشتاء
وعلى النقيض لدول كلهم واللي بجد في الشتاء لا مثيل له الايس كريم ايون الايس كريم وتتمشي في الشارع والبرد يحمر مناخيرك بس بعديه بتدفا قوي معرفش ازاي



بس سيبكم من كل ده لمه العيله في اوضه بابا وماما حوالين التلفزيون هيه المصدر الاعظم للدفا 

الخميس، 7 يناير 2016

علي البدري



الكام شهر اللي فاتوا شهدوا موت كتير من الفنانين اللي منهم قريب واللي منهم عادي , الا ممدوح عبد العليم ده اللي اثر في الواحد قوي كانه واحد من العيله
والغريب اني اكتشفت ان ده احساس ناس كتير من جيلي الجيل اللي كبر في الاجازه على تمثليه الحب واشياء اخرى معاه هو واثار الحكيم في الاجازه الساعه 12 عالقناه التانيه
او ليالي الحلميه باجزاءها كلها واللي خدته من اول ما كان لسه مراهق وبيحب في زهره بنت نازاجه وسليمان غانم لحد اخر جزء مع التدرج والتحولات الكتير في شخصيته على مدار الاجزاء كلها
جيلنا كبر معاه في ليالي الحلميه ورومانسياته الكبيره  وبعد كده اتاثر بالصعيدي رفيع بيه ولدي اللي كان جاااد جدا واللي في الاخر انهار قدام منى زكي في اخر حلقه وكان عظيم الرقه والقوه ف نفس الوقت
جيلنا اللي ياما قلش بيا سااااوسن واللي كل وحده اسمها سوسن ياما اتقلش عليها بسبب رامي قشوع في بطل من ورق واللي كان بافيه الشهير ما بيعرفش يوجفها ما بيعرفش يوجفها بمنديله الاحمر ونظارته القعر كوبايه
علي البدري اللي عمل تمثيليات وافلام كتيره واللي ماحدش يفتكرله لفظ خارج او مشهد فاضح
علي البدري الشهير بقسمات وشه وتعابيرها في تمثيله واللي بالرغم من ان شكله ابن ناس الا انه تفنن برضو في دور الشيال المبهدل ابو هدوم مقطعه او البنا اللي فرق بين اتنين حبيبه في افلام تانيه
علي البدري جيلنا كبر معاه واتخض واتاثر بموته وكل اللي رن في ودنه بعد الخبر ده تتر الحلميه " ما تسرسبيش يا سنينا من بين ايدينا وما تنتهيش ده احنا يدوب ابتدينا , واللي له اول بكره حيبان له اخر , وبكره تفرج مهما ضاقت علينا "
رحمه الله عليك يا ابن سليم البدري
 

الجمعة، 1 يناير 2016

بيت جدو




ذات مومنت لما تروح تزور الجده ويقررورا يودوها للدكتور وتقعد في البيت لوحدك عشان مفيش مكان في العربيه 

تلاقي نفسك بترجع تتامل البيت ابو سقف عااالي واللي شبابيكه من كبرها قد بيبان بيتكم واللي من عمقها خالك مقفله كام شباك قالبهم مكتبه عظيمه واللي ياما قريت منها واللي لسه موجوده حتي بعد ماهو اتجوز وساب البيت 

البيت اللي لسه بيبانه عاليه واوضه جوه بعضها بالظبط زي دفي العيله وجمالها 
البيت ابو تلات بيبان عشان خصوصيه اهل البيت

وباب الصالون ابو شنكل كبيييير عشان تامين البيت 

البيت المليان زرع في بالكوناته واللي لو دعبست حتلاقي السلم والتعبان والليدو اللي ياما لعبت بيها وانت صغيىر

تحس بلسعه برد من فضاه فتقرر تعمل شاي ما تلاقيش كتل وما تعرفش تولع البوتاجاز من غير اشعال ذاتي ولما يولع تحس باحساس الانسان الاول لما عرف يولع النار !!! وبعدين تلاقي الكوبايات كلها صغننه حتي البراد صغنن فتقرر تعمل براد شاي مغلي عشان تصب منه وانت قدام التلفزيون بدل مج الشاي الكشري الماسخ بتاع بيتكم وتفتكر براد الشاي بتاع جدو 
الناس دي كل حاجه عندهم ليها طعم تاني 

وتفتكر البيت ده لما كان ما بيفضاش من الناس والزوار والضحك 

تفتكر خيلانك وسهرات نادي السينما واوسكار وقرطاس اللب المدفوس في جنب كل سرير من السراير 

تفتكر خالتك وهيه بتلف الرولو كل ليله قبل النوم وازاي كنت بتنام نوم شوارع وهيه تصحي من رجلك اللي ضربت في ضهرها ولا رقبتها 

تفتكر دروس النحو اللي جدو كان بيديهالك في اجازه الصيف ولما ينزل يصلي المغرب والعشا وتقف تستناه في البلكونه ولما يجي تقعد تتنطط في البلكونه زي الاهبل 
البلكونه ام ارضيه خشب وسور فيرفورجيه 

وقعداتكم في الصيف في البلكونه والراديو الترانزستور البرتقالي بتاعه 

السهرايه الصغننه الموجوده في الاوضه عشان بتخاف من الضلمه قال ايه دي اللي حتطمنك لو صحيت بالليل

وبعدين فجاه تقرر تزور الشوارع اللي حواليكم علي رجليك بعد ما بطلت تمشي فيها من زمن بسبب انتكه العربيه  وتجري تدور علي محمد البقال تلاقيه قفل تكمل قدام شويه تلاقي الصيدليه زي ماهيه ، تفتكر الشوارع دي وانت بتحجل مع جدك وانتوا نازلين تتمشوا وفجاه تلاقي مدرسته اللي يا ما خدك معاه فيها اتهدت ( المدرسه اللي اتصور فيها هيه فوضي) وملامح الشارع حوالين القسم اتغيرت من بعد الثوره متاريس وعربيات ترحيلات تخاف وتقرر ترجع لما تستغرب كل حاجه ، حتي المحلات فجاه تلاقيها بدل ما مشغله اغاني اذاعه ام كلثوم لقيتها مشغله مهرجانات والناس الهاديه الرايقه بيبحلقوا فيك لانك غريب وهمه مش عارفينك 

وفجاه تكتشف ان العربيات اللي في الشارع ما بقتش ١٢٨، ١٢٧، وسيات وفيات بقت ماركات اشكال والوان 
وفجاه تكتشف ان الزمن غير الزمن حتي المكان بقي غير المكان بس انت لسه من جوه البنت ام ضفاير وفستان منفوش 

تلف وترجع جري للبيت عشان خايف،  تبص من تحت العماره تلاقي الفيىفورجيه اللي في البلكونات هو هو والزرع والصبار اللي مالي البلكونات هو هو تطلع جري تلاقي شباك السلم اللي قزازه متلون هو هو 
وتجري جري تدفي بدفا البيت حتي لو لسه همه ما رجعوش وانت لسه قاعد لوحدك