Follow by Email

الجمعة، 7 فبراير 2014

صوره الدفعه:

معرفش ايه اللي فكرني بيها النهارده
اللي يبص على صوره الدفعه بعد 14 سنه خدمه في ثانوي يكتشف اننا اتغيرنا قوي والدنيا حوالينا اتغيرت قوي بس في حاجه واحده مشتركه بينا كلنا هيه حبنا للايام دي وحنينا ليها وان الصداقه الحقيقيه اللي بدات ايامها حتى لو ما اتقابلناش ولا اتكلمنا يوم ما حنشوف بعض حنتكلم ونحكي كانا سايبين بعض انبارح !!!
اليوم ده كان يوم جميل قوي نزلنا من السكشن اعتقد كان صيدلانيات على اننا نتصور الصوره اهي كام منظر وخلاص ونرجع نكمل السكشن بس اللي حصل اننا انتشرنا في الجامعه بعدها كل جروب عايز ياخد اكبر قدر ممكن من الصور مع بعضه مع انه ما كنش اخر يوم ولا حاجه بس ما تفهمش ايه اللي خلانا نعمل كده
الدكاتره الي اتصوروا معانا ما كانوش كتير عميد الكليه والوكيل و5 او  6 دكاتره وخلاص يمكن لان المسافه في حلوان كبيره فمش كلهم كانوا موجودين او جايز ما صدقوا يخلصوا مننا فما كانوش عايزين اي ذكرى معانا ؟ يجوز !!!
الصحاب: فجاه اتفرقفنا وقت الصوره وما اتصورناش جنب بعض وكتير من الجروبات حصل عندهم كده بس الغريب ان تقريبا كل واحد اتصور مع سكشنه حتى لو مش صحابه , الكابلس طبعا كانوا مع بعض, اللي اتعينوا معيدين اتصوروا مع بعض يعني كان في اعتبارات خارجيه وقت الصوره !!!
اللي بان فينا قوي اول صفين تلاته , اللي مش ناسياه مينا لما قال ابحث عن "ن" حلوان تجد مينا
كان جبي من اليمين دولت اللي معرفش فين دلوقتي , ومن الشمال شيماء الله يرحمها, ايام ما ماتت كل اللي افتكرته واثر فيه وصدمني : دي كانت جنبي في الصوره , قد كده الصوره دي مهمه عندي لدرجه اني اختزلت علاقتي بشيماء بانها كانت جنبي في الصوره بس والله كنت بحبها قوي وزعلت عليها قوي قوي
بعد سنين لما الدفعه عملت صفحه على الفيسبوك حطينا الصوره كنوع من النوستالجيا لبعض وكوسيله لتجميع بعض اللي عارف حد يعمله تاج واهه نعرف نتلم تاني بس المفاجاه ان في ناس زعلت قوي عشان زوجاتهم ماكانوش محجبات في الصوره ودلوقتي لا يجوز فشيلناها . نسيوا كل حاجه وافتكروا دي !!!
دلوقتي لما تلاقي حد منهم بالصدفه بتبقى طاير بيه حتى لو ماكنتوش انتيم ايام الكليه لسبب واحد هو الحنين للايام الجميله دي, انا كنت ومازلت مسمياها العذاب الجميل , صعبه ومتعبه الكليه بتاعتنا بس مسليه وجميله جدا. أنا فاكره مينا مره قابلته بالصدفه في شارع رمسيس وكنت ماشيه عكس اتجاهه بالعربيه كان حيسيب اللي في ايده ومشاويره عشان يوصلني . ولا لما مره كتبت على الفيس اطلب من الناس يقولوا موقف ليه محدش قادر ينساه وساعتها دخلوا فكروني بحاجات انا نفسي نسيتها كان يوم جميل افتكرت فيه ذكريات حلوه جدا
 
الغريب ان في ناس ماكانوش صحابي ايام الكليه وبعد كده في الشغل او حتى من خلال الفيسبوك بقوا صحابي يمكن السبب الاساسي هو الحنين للايام دي أوحتى وجود ذكريات مشتركه لمكان كلنا بنحبه جايز برضه
 
اكتر حاجه مزعلاني بقه في موضوع الصوره ده الاسامي اللي اتنست لكتير منهم , ايام الصوره مامتي قالتلي اكتبي الاسامي عشان حتنسيها , قلتلها أنا انسى اساميهم ؟ لااااااا يمممممممكن !!!! بس الحقيقه ان في ناس كتيييير منهم مش فكره اساميهم ولما باشوف حد منهم باتجنب ذكر الاسم
 
في كتير منهم كمان معرفش فين اراضيهم في اللي سافر واللي هاجر واللي مات بس حتفضل الصوره دي بالذات ليها مكان خاص وذكرى خاصه  
بس اللي الدفعه كلها مش ناسياه في الصوره شخصيه مش من الدفعه ولا من معارفنا خالص سميناه فضولي زي بتاع مجله ماجد , دخل اتصور معانا في كل الصور وكل المناظر !!! ده حتى ايام ما كان كل واحد بيختار المنظر اللي عايزه يطبع له كانوا بيسموا الصوره بيه : الصوره اللي فضولي على الشمال , المنظر اللي فضولي على اليمين , .... كده يعني ويبقى السؤال اللي مش حنعرف له اجابه : هو ليه اصلا اتصور معانا ؟
 

هناك تعليق واحد: