Follow by Email

الجمعة، 18 مارس، 2016

بقلمكم : خليك زي حرف ال آي

بقلمكم : النهارده بدايه حقيقيه ل"بقلمكم " اي حد عنده فكره عايزها تتنشر عالبلوج يبعتها وحانشرها باسمه , قبل كده كانت محاولات بسيطه بس دي بدايه بجد 

صديقه الطفوله من زمان (مش من زمان قوي ) اميره قنديل حتنورنا بمقالها اللذيذ , اتمنى يعجبكم وتعملوا زيها , استمتعوا بيه معايا يالا





خليك زي حرف ال آي

النهاردة عايزة اكلمكوا علي حرف   i   ، حرف غريب اوي طول عمرة واحنا صغيريين كان حرف مالوش لازمة وحرف سهل وصغيركدة ولما كنا بناخدة كان اسهل حرف بيتكتب عصاية وعليها نقطة حتي الكلمة اللي حفظناها للحرف سهلة جدا كانت دايما   i   اينك و كان حرف مش باين في وسط الحروف من كتر ما هو صغير.
 وسبحان الله فجأة وبدون سابق انذار حرف    بقي مشهور جدا بقيت كل حاجة حلوة ومهمة  تبدأ ب.    i ..بقي حرف i  ا لية شنة ورنة والاولاد الصغيرين عايزين يمسكوا اي حاجة تبدأ ب  ... i

معقول! معقول من حرف    i  مش باين لأشهر حرف في الحروف يا تري مين اللي اكتشفة مين اللي خد باله منة واخد بالة انة ممكن يبقي حاجة كبيرة ..

عارفين دة معناة اية!! معناة ان ممكن يكون حد وهو صغير انسان عادي جدا ومالوش اي اهتمامات و لما يكبر يبقي حاجة كبيرة علشان حد اكتشفة وعرف يطلع احلي ما فية وممكن يكون شاف فية حاجة صغيرة ممكن تتنمي وتبقي حاجة كبيرة.

يعني المدرس مينفعش يهمل اي طفل لمجرد انة طفل هادي ومش متفاعل او طفل شقي ومش بيذاكر  او او ..لازم يدور في كل طفل علي احلي حاجة فية ويحاول ينميها ويظهرها لباقي الاولاد ممكن يكون السبب ان الولد دة يبقي حاجة كبيرة.

يعني المدير مينفعش يلاقي موظف مبتدأ ومحتاس ويقول دة مفيش منة امل، لأ لازم يحاول معاة ويشجعة ويخلية يطلع احسن ما فية  واكيد الموظف دة حيفضل يدعي للمدير دة طول العمر لانة خلاة يكتشف نفسة من اول وجديد ويكتشف انة ممكن يعمل حاجات كان عمرة ما يتخيل انة حيعملها بس نتيجة تشجيع المدير وتحفيزة ليةعملها.

يعني الام وما اجمل الام اللي تعرف تفهم ابنها و وتكون عارفة ان تربية الاولاد دية تحدي وكفاح لان كل طفل سبحان الله غير التاني وكل واحد فيهم محتاج معاملة خاصة وكل واحد فيهم طباعة مختلفة والام محتاجة انها تتعلم وتدرس علشان تفهم ابنها وتكتشف مواهبه مهما كانت صغيرة اكيد مع دعائها وسعيها حتخلية احسن طفل في الدنيا
وكل دة بقي حيرجعا  لحرف الأي الجميل بتاعنا دة  وناخد منة العبرة ونتعلم نكون زية ويحاول كل واحد يقلدة ويكون مهم زية كدة.
علشان كد خليك زي حرف 

بقلم:اميرة قنديل

الأحد، 13 مارس، 2016

خواطر صباحيه اتوبيس التفاؤل :

ماشيه في حالي راحه الشغل الاقيلكم هذا الاتوبيس علي ظهره " كل شيء هالك 

الا وجهه" وعلي الجنب " حاجه كده برضو مش فاكراها 
ايه المواعظ دي عالصبح ، ما اعترضناش علي كلام ربنا والله بس ده اتوبيس 

شغل او مدارس مش عربيه نقل موتي والله ، ايه الحكم والمواعظ دي عالصبح يا شيخ للي حيركبوا معاك

حبه تفاؤل الهي يعمر بيتك ، انا شخصيا كنت حاعمل حادثه عشان اصوره !!!
وحدووووووه
صباحكم سكر

بتونس بيك

بافتح الراديو الاقيلكم ايه بقه ؟ المبدعه ورده الجزائريه وبتونس بيك 
ايه الجمال ده يا ست ، موسيقى رائعه وكلمات واداء عصري وفي نفس الوقت راااقي 
تقاسيم الاغنيه تفرفش وتعلي المزاج الصبح والحاله كلها صباحيه طربيه في وقت واحد، ازااااي معرفش
والغريب انها فيها كل حاجه وعكسه حتي في الكلمات 
عمر بطيشه وصلاح الشرنوبي ابدعوا بجد 

انجوي اللينك اهي

صباحكم سكر 


https://www.youtube.com/watch?v=xEl0FZpmrnM


حلوه ....ماشيه



شله صحاب بيتغدوا سوا وظهر احد الافراد مشغول البال ، وفي محاوله بائسه لشد الكلام منه سالته احدى الحاضرات اخبار الدنيا ايه ؟ حلوه ؟ 
رد قالها : ماشيه !!
ردت : حلوه يعني 
قالها : ماشششيه وسكت 
لاحظت الحوار الداير بين اتنين خريجين جداد لسه الدنيا ملطشتش فيهم 
ورجعت للمشكله اللي بتتمرجح في نفوخي 
اهي ماشيه !!!


خواطر صباحيه : شاي بالنعناع




ازاي كده انت كده ؟ من اول ما الهفه تيجي والواحد يقوم يغلي الميه ويدفي الكوبايه القزاز الشفافه 
وبعدين معلقه ونص شاي العروسه ومش الخرز ، وعود النعناع الاخضر ( الزعزوعه اللي فوق احلي حته في العود) 
او حتي يفرك نعناع ناشف بس متنشف برواقه !

وتنزل بالميه السخنه اللي تطير زيت النعناع فيوصل مناخيرك في التو واللحظه وينعشك من قبل ما تاخد ولا شفطه من الشاي 

وتستمتع بلون الشاي المظبوط اللي بجد جزء كبير من المتعه وتشرب كوبايه شايك بمزاج عالي 
تدفيك في الشتا وتروقك في الصيف ، تخليك تركز اكتر لو محتاج تركيز او حتي تنسي اي حاجه شاغله تفكيرك لمده عشر دقايق 

بجد بجد انت ازاي كده ؟

صباحكم سكر


كتب كتاب




عم الشبخ ماذون قال سلام عليكم في الميكروفون وهنا اتشقلب حال العريس والعروسه اللي كانوا مهيبرين في الزفه العروسه اتخضت كده وارتبكت ده بجد مش هزار

 اما العربس الظاهر شاف زغره  ابو العروسه ليه اللي فكرتني بعادل امام في عريس من جهه امنيه اللي هو انا باكبرها السنين دي كلها وتيجي انت تاخدها عالجاهز 

وده مشهد بيتكرر في وجهه نظري في كل الافراح اللي يشوف استعجال الاهالي علي جواز بناتهم ما يشوفش نظره الكره اللي بيبص بيها الاب لجوز بنته مش من واقع الكره ولا حاجه ولكن اعتقد بيكون مستخسرها فيه مهما كان العريس كويس لان الاب دايما ما بيلقاش حد جدير ببنته مهما كان علي عكس الام اللي اصلا بتبقي مش شايفه قدامها من تجهيزات الفرح واللي بتبقي كانها خلصت امتحانات وحتقول هيييييه حنرتاح من المشاوير والتعب

 نرجع للعروسه اللي اعتقد كانت علي تكه ويا تعيط يا تقوم من التوتر 

العريس من ربكته قعد يهزر وطلب اعاده الحديث بتاع طاعه الزوج لدرجه ان الماذون قاله لو عايز تسمعه تالت ابقي شوفه في الفيديو ، فكهي هو كمان

 مش عايزين نحكي علي نظرات المعازيم بقه واللي تتراوح بين الفرحه والدموع والتاثر او حتي النفسنه يالا بلاش نجيب في سير الناس 

 الماذون خلص كتب الكتاب ولاول مره ما حدش يشد المنديل ، النكته دي الظاهر بقت موضه قديمه 

 وبمجرد ما دعى للعرسان والكتاب خلص وكانهم حطوا العريس والعرروسه في الفيشه رقص ورزع ودربكه وفرتكه !!! ده طلع في اغنيه اسمها فرتكه وانا ما اعرفش !!! وايه السكسكه دي كمان ؟ 

محدثكم من قلب الحدث حد زهق من الدربكه والفرتكه ومش عارف ايه السكسكه !!!!

غناء تحت المطر




الجيل اللي زي حالاتي اتربى على برنامج اوسكار الشهير يوم الخميس , بلقطات من اشهر افلام كلاسيكيات السينما الامريكيه

اكتر فيلم كان بيبهرني كان فيلم singing in the rain  بخفه رقصاته ولحنه البسييط والمميز وخفه ورشاقه البطل وتنطيطه في الميه زي الاطفال بمنتهى الرشاقه , الاغنيه كانت one shot  وده في حد ذاته شيء مبهر فعلا بالنسبه لي مغلطش غلطه , ولا اتزحلق ولا نهج ولا اي حاجه بس استمتع ومتعنا الى الابد , مجرد ما قفل الشمسيه وقلع البرنيطه والكاميرا عملت كلوز على وشه الغرقان بالمطره وابتسامه وشه ده كفيل باسعادي الى الابد وكان السعاده سهله وبسيطه للي ناوي ينبسط ويفرح



وتخيلوا طفله من عشاق السينما كل اسبوع تشوف رقصه الفيلم والمطره والشمسيه والنطه الخفيفه على عمود اانور وهو بيغني

تكبر وتعشق الشتا والمطر والمشي او حتى الجري في المطر , ريحه المطر واختلاطها بالشجر تحس فيها بالنظافه والنمو , ولما تختلط بالتراب ترقده وتخلصنا منه وتحس كده ان الارض بتجهز لنمو وزراعه وطرح جديد , تنزل عالعربيات تغسلها , تنزل عالناس تنعشهم



الشتا والمطر من اجمل مظاهر الكون بالنسبه لي تحسها نظافه اجباريه وانتعاش اجباري لارواح ملاها التراب والعفار واللي المطره تنزل تصحصها وتقولها فوقي من ترابك


ناس تجري وناس تدعي وناس تخاف منها وانا دائما وابدا افتكر الفيلم , الاغنيه واوسكار يوم الخميس الساعه عشره

شوفوا الاغنيه معايا واتمتعوا بيها زيي
https://www.youtube.com/watch?v=w40ushYAaYA