Follow by Email

السبت، 31 ديسمبر، 2016

يا حلاوتك يا جمالك




اغنيه فايزه احمد يا حلاوتك يا جمالك 
الصوت عذب بشده 
والست بتغني بعذوبه ودلع ( نوعا ما !!) 
الكلمات ظريفه جدا 
واللحن خفيف وظريف 
بس لما افتكرت انها كانت بتتغزل في اسماعيل يس اصبت بكريزه ضحك 
الست كان نفسها حلوه والله 
صباحكم سكر

حواجب عيني


وانا باشرب شاي الصبح في العربيه الاقيلكم ايه بقه اغنيه ان كنت ليا وانا ليك للجميله شاديه
اغنيه فلكلور صعيدي وموسيقى بديعه على مزامير عمار الشريعي
الاغنيه دي كان بابا بيشغلها زماااان في العربيه وانا بتاعه سبع سنين مثلا
لقيتني فاكراها كلمه كلمه واللحن بعربه لحظه لحظه وباغنيها مع شاديه كمان 
واكتشفت مش بس من الاغنيه دي ان بجد الحاجات اللي بتسمعها في طفولتك بتتنقش زي الحجر في روحك وتشكل ذوقك العام كمان
رجعت بيها لخروجاتنا زمان في الرياض يوم الجمعه واحنا بنغنيها مع الست شاديه ربنا يديها الصحه
لللي ما سمعهاش بجد فايتكم كتير ، الكلمات والاغنيه جبتهالكم انبسطوا بيها زيي
صباحكم سكر
ان كنت ليا وانا ليك
على كيفي يا غزالي اتعاجب
شبك الهوى مطروح حواليك
سلم بطرف الحواجب عيني
***
عيني عليا..
عيني عليا انا خايفة عليك
خايفة من الزمن الغادر
لا يخلى بيا ويلعب بيك
اصله على العشاق قادر
***
شرياك يا عمري..
شرياك يا عمري وشارية عينيك
لانا عايزه قصر ولا حراير
بحلم ايديا تنام في ايديك
ملهوف عليك قلبي وحاير
***
ولفين ياعمري..
واخدك لفين مشوار الليل
وانت اللي محتاج لحناني
واقول لروحي الصبر جميل
والفرح ييجي معاك تاني
شادية, عمار الشريعي, عبد الرحيم منصور

كساره البندق كمان وكمان




من سنه بالظبط حجزت كساره البندق , اليوم ده اختي وبنتها كانوا معايا يوم الحجز سبتهم ونزلت قطعت التذاكر ورجعت فزقرده 
بتقولي هو انت رايحه فين قولتلها, فانقمصت كده وقالتلي ليه ما خدتنيش معاكي؟ بس كانوا اخر تذكرتين في الحفله وكنت خلاص 
قلت لاخويا انه جاي معايا فانكسفت ارجع في كلامي


ولانه باليه تدور احداثه في الكريسماس فمش بيتعمل غير في ديسمبر
الحقيقه كانت ليله جميله وفضلت ضميري بيانبني سنه تقريبا بالرغم من اني اخدتها معايا سندريلا بعد كده
السنه دي حجزت لها معايا وجم وقبل ما ننزل حدثتني نفسي بالتاكيد على التذاكر قبل النزول فاذ بي اكتشف اني ضيعت واحده منهم , ادور هنا وهناك مفيش فايده شكيت اني نسيتها في الشباك الا اني افتكرت اني بصيت عليهم يوم حفله نصير شمه عشان احدد 
مكانهم بالنسبه لمكاني في حفله نصير شمه

ادور في الشنطه مفيش شكيت اني بدل ما ارمي تذكره نصير شمه رميت تذكره الباليه وفجاه افتكرت اني اصلا باستخدم تذاكر الاوبرا ك book mark  فجريت على مكتبتي لقيتها بعد بحث وحرقه دم استمرت ساعه !!!


نزلنا وشغلت انغام واستمتعت بوسط البلد وفضا الشوارع وزخات المطره , حاله جميله من البهجه والترقب لباليه اقل وصف له انه جرعه سعاده وبهجه عظيمه وطفوله ورومانسيه مختلطه بعذوبه مع رقه انغام تشايكوفسكي


وصلنا واتصورنا وحكيت لجنه الحدوته عشان تقدر تتابعه لما يبدا بس مش معنى ده انها بطلت اسئله , خااااالص استمرت في الاسئله بس لم تفقدني الاتصال بالعرض ازاي ما اعرفش !!!


الباليه عباره عن حلم لطفله صغيره مع لعبه كساره البندق اللي فجاه تتحول لامير جميل ويرقصوا مع بعض فالسات غايه في الجمال والرقه والرومانسيه ومعظم ابطاله اصلا اطفال


وانطلاقهم في رحله في مدينه الحلوى ورقصات عربيه وصينيه واسبانيه وروسيه وفالسات ومزيد من الفالسات ثم تصحى كلارا و فجاه اليوم خلص يا عم حزمبل وتنزل الستاره وتخلص الحفله


من اقصر الباليهات كمان في زمنه واعتقد انه قصد يوصل فكره الحلم اللي فجاه بيخلص تمام زي عم حزمبل , الحقيقه لم اتوقع ان تتكرر حااله البهجه اللي حصلتلي السنه اللي فاتت باعتبار التكرار , لكن على النقيض استمتعت وبشده والحقيقه همه كمان زودوا شويه تفاصيل اجمل او انا اللي مختدش بالي منها المره اللي فاتت مش عارفه . والمكان كان احلى من السنه اللي فاتت, المره دي بدات ادرس موسيقى فبدات اشوف تفاصيل المايسترو والالات والاشارات بتاعته وازاي العازفين لموا ادواتهم وقفلوها في شنطها وهمه خايفين على اوتارها تمام زي ما باعمل في الاله بتاعتي

اكتشفت ان التفاصيل لا تنتهي لمن يعطيها العنايه والانتباه !!!


ونخرج من الاوبرا ونمشي تاني في وسط البلد وانغام تغني بس المره دي الشوارع افضى وافضى وانوار كوبري قصر النيل والفنادق حواليه باجواءها الاحتفاليه وانا ماشيه باسترجع الحفله وجوها المبهج الرومانسي الطفولي الجميل  واروح كالعاده ما اعرفش انام من فرط البهجه والسعاده بعد ليله كانت مبهجه وجميله لاقصى درجه بس المره دي صنعت شويه ذكريات لطفله عندها 8 سنين يمكن تفتكرها في يوم من الايام او حتى ما تفتكرهاش بس انا مش حانساها عالاقل لاني كتبتها وشاركتها معاكم

الصوره من الانترنت نظرا لمنع التصوير في دار الاوبرا المصريه  



السبت، 26 نوفمبر، 2016

شاي بالنعناع عالنصبه

في انتظار عرض تنوره الغوري وبعد يوم شاق جدا حسيت اني حاموت على شاي بالنعناع وفي نفس الوقت الفيشاوي بغيده والوقت قصير جدا قررت اطلع للقهوه البلدي المجاوره لوكاله الغوري اخد شاي في كوبايه بلاستيك ، القهوجي ملقاش عنده كوبايات بلاستيك 


ولان الكيف بيذل قررت اشتري اي كوبايه زجاج من اي بياع فارش في الشارع ارجع بيها للقهوجي وخلاص ، اللمح  ايه بقققه واحد بنصبه في الشارع وعنده كوبايات بلاستيك 


سلام عليكم عايزه شاي في كوبايه ورق ، عندك نعناع قال اه بس قبل ما يحط النعناع سالني كشري ولا بفتله قلتله بفتله 
صب لي الشاي طلبت منه يملى الكوبايه للاخر  عشان انا باقريف من الكوبايه الناقصه وقعدت على سور وكاله الغوري اشرب الشاي ، اجمل كوبايه شاي ممكن تشتريها في حياتك خلصت ورجعت جري الحق العرض فوجئت ان لسه تلت ساعه 


اتلككت بصاحبه مامتي كيفه الشاي زيي عشان اشرب شاي تاني 


من غير مااقوله هو خلاص عرف طلبي ، ابنه جاي يحط النعاع قاله سيبه وغسله وحطه بعد ما شطف ايده وملأ الكويايه من غير ما اطلب منه 


باسال الولد بتروح المدرسه قالي امال يتمرمط زي ابوه ؟ بيسالني الشاي عجبك قلتله ما كنتش رجعت اشرب منه تاني ولانه شايف معايا حد بدا يتكلم معايا بس المره اللي فاتت ماحاولش لاني كنت لوحدي بيفهم في الاصول ومحترم لذلك خدت واديت معاه في الكلام 


بالرغم من انه واقف في الشارع الا انه يتمتع بذكاء فطري وبيفهم في الاصول ،وفهم اني طلبت كوبايه ورق غسل النعناع في المرتين ، وفهم اني باحب الكوبايه مليانه فمسالش في المره التانيه وقعد يقولي الشاي انا باعمله لنفسي مش للزباين عشان كده حلو ( اشرب شاي من ايد كييف شاي تتكيف بجد حتى لو ميه سخنه وتي باج على راي صديقتي اللي حتتجنن من حلاوه الشاي اللي باعمله ) 


الشاي بقه اللي بيتصب في كوبايات قزاز بيشطف الكوبايه بميه سخنه قبل ما يصبه تمام زي الكتاب ما بيقول 


اللطيف انه كمان بدا يسوق للقهوه واحنا واقفين وازاي البن محوج والوش لاخر شفطه ، الراجل ده مزاجنجي والله


وانا واقفه عرف اني رابحه التنوره قالي زمان كان احمد فؤاد نجم والشيخ امام بيجوا الوكاله وكانت مليانه فنانين وكان المكان بيشع طاقه وحب ، انتوا زمانكم صعب مع ان الواحد حينزل قبره لوحده لا فلوس ولا جاه ولا منصب عمله وبس وقالب طوب حتى قالب الطوب اللي حينيموه عليه حياخدوه ويدوه للي بعده يعني هو كمان مش دائم 


الحقيقه استمتعت بشايه وكلامه وذكاؤه الفطري وحكمته البسيطه وحاشرب من عنده شاي كل ما اروح الحته دي 
مكانه قدام الغوري مكان الكوبري القبيح اللي كانوا بيبنوه ووقف من كام شهر ارشحه وبشده ، تصدقوا ان شايه احلى من شاي الفيشاوي وزينب خاتون !!!
يا ريت تنفعوه انتوا كمان 

الاثنين، 21 نوفمبر، 2016

بنوته الموتوسيكل

في طريق العوده النهارده وقف بقه مين قدامي؟
واحد بموتوسيكل عادي يعني 
بس اللي مش عادي البنوته اللي جت وراه على طول ووقفت كده بكل شجاعه على الموتوسيكل بتاعها 
انا شخصيا اول مره اشوف بنت في بلدنا راكبه موتوسيكل فللحظه كده استهيالي انها راكبه وراه طلع لااااه هيه راكبه موتوسيكل وسايقاه بنت في العشرينات لابسه جينز وابشارب فوشيا وفارده ضهرها وسايقه بكل ثقه 
الولد بص وراه وعمل بالظبط زييي رجع بص تاني يتاكد من اللي شافه ، كل اللي في الاشاره بص عليها ورجع بص تاني عشان يتاكد تاني !!!
طلعت الموبيل كالعاده لما اشوف حاجه تستحق التصوير في شوارع المحروسه ومن كتر ما عايزه اصورها ما عرفتش اصورها !!!! 
فتحت الاشاره وصاحبتنا فريره بمنتهى الثقه شقت صفوف العربيات واختفت وكانها حلم وعدى بسرعه 


سالت نفسي البنت دي خدت القرار ده ليه وازاي ؟ زهق كده من قرف الشوارع والمواصلات والناس اللي حواليها ؟ 
رد فعل اهلها ايه لما قالت لهم قرارها ؟ 


الجيران وزمايل الجامعه او الشغل عملوا ايه 
الشارع كل يوم بيرجع يبص ويبص ويستاكد من اللي شافه زي كل اللي في الاشاره ما عملوا ؟ وهيه اكيد اتعودت على ده وفارده ضهرها وواخده في وشها :) 


اللي بيمون لها في البنزينه ، اللي بيصفر وهيه ماشيه ، تعليقات الصيع في الشوارع والمتزمتين والستات اللي حواليها نفسهم شكلها ايه 


انا بقه شايفاها واحده شجاعه وصاحبه قرار ونفذته وبتضحك وتنبسط بيه كل يوم وكل ساعه 


اعتقد ثقتها في نفسها ما لهاش حدود وده اكيد انعكس على جامعتها وشغلها 


من الاخر دي صاحبه قرار وعارفه انها تقدر تكون رائده في كل حاجه لا مدير يقدر عليها ولا زميل يسخف او يقلل من قدرها 


حتربي في يوم من الايام اطفال متميزين جدا بنات وصبيان ، بنات يقدروا يقرروا ويخطوا خطوات واسعه وجريئه ، وصبيان يحترموا الست ويقدروها ويشيلوها على دماغهم 


كمان اللي حتتجوزه حيكون انسان مختلف ومتميز وعقليته مختلفه 


احيبها بشده على قرار، تنفيذ، صمود ومثابره 
لو حد شافها يصورها ويبعتلي صورتها  ويسلملي عليها قووووي 
بصراحه فرحانه بيها قووووي

الاثنين، 7 نوفمبر، 2016

انا والبرتقان وهواك


كشخص عاشق للبرتقال الشتا هو فصلي المفضل 
مش بس دفسه البطانيه مع كتاب حلو وكوبايه كاگاو تحت اباجوره القرايه بتاعتي تؤتؤ خاالص 
تقشيره اول برتقانه في الشتا دي احساس بالحنين لحد واحشك جدا جدا وتقوله كده انت فين من زمان 
ريحه زيت البرتقانه وانت بتقشرها وتملا الجو دي مزاج وبقاؤها في ضوافرك كام ساعه ملهاش مثيل 
دوبان البرتقانه فص فص وهنا اقصد حبيبات الفص الواحد حاجه ملهاش مثيل 
من عشقي في البرتقان الشتا اكتر فصل باعمل فيه دايت ممكن اكل في الاسبوع تلاته اربعه كيلو لوحدي 
تقشير البرتقان له كذا طريقه حسب الغزاله ، اروقها الحلزونه وهيه انك تقشرها حلزونه وتجمع القشره تاني فتركب البرتقانه بس تبقى مفرغه من جوه 
برتقان الشتا ده بالنسبه لي قطعه من الجنه بكل اشكاله بصره ، بلدي ، يوستفاندي او حتى جريب فروت 
اما عصير البرتقان الفريش وكرواسان بالزبده على اصوله هو اجمل فطار ممكن تدلعوني بيه 
البرتقان ممكن يكون فطار وغدا وعشا وكفى 
تاخد فص ؟! 

الجمعة، 21 أكتوبر، 2016

قرات لكم : الطريق الى الكعبه


جرعه روحانيه مكثفه تبدا بوصف يوم عرفه وتساوي الناس ومشاعرهم على صعيد عرفه وحوار متخيل مع شخص مادي للرد على شبهات وثنيه مشاعر الحج لاضهاء شكل حسي للحب الالهي 

ثم وصف الطريق للمدينه والمرور باماكن احد وبدر وفلاش باك للمعارك بشكل يجعل القاريء يسمع الاصوات ويرى غبار المعركه ثم الوصول لقبر الرسول ومشهد وفاته البالغ الرقه 

ثم حكايات الطواف والحجر الاسود وقصص هدم الكعبه وسرقه الحجر الاسود اكثر من مره وان الكعبه ليست تلك الكعبه ايام الرسول ولكنها رمز الوحدانيه والمشاعر الفياضه كما ان المصحف ليس الورق ولكن كلام الله 

ثم الحديث عن الصوفيه وفخها وان الدين لم يطلب التصوف وأسباب ذلك في رد بالغ الاهميه عن فكره العمل وتعمير الارض 

كتاب سلس ورقيق وروحاني واكثر من رائع و٧٧ صفحه !!! يمكن انجازه في جلسه 

شكرا د مصطفى محمود 

الأربعاء، 19 أكتوبر، 2016

الفيس زفت



انا زهقت من 
صور الميتين في سينا 
صور اللي بياكلوا من الزباله في القاهره 
صور اسعار العربيات اللي يا عيني غليت
صور اسعار العملات 
صور جروب surviving hegabb اللي مافورين بصراحه سيبتهم على فكره
بوستات confession of married womenجتكم القرف بصراحه سيبتهم برضو حد( دخلني من باب الغلاسه مش اكتر )
جروبات الموضه والاكسسوارات في الطريق لسيابانهم وقد ايه صاحبه البوست محتاره جوه البروفه مش عارفه تختار ، فقعتوا مرارتي منكم للله

صور اللي عايشين في ميه البطيخ وكل يوم في حته 
اخبار مين زعلان ومين طهقان ومين ياعيني دماغه بتوجعه 
فريند ريكوست  من ناس ما اغرفهاش 
ناس اعرفهم ما بيردووش او يشوفوا ماسجات ويطنشوا الرد 
شكاوي الماميز من اللانشبوكس البامبرز ، الدوا ،
 بوستات المخطوفين 
بوستات دينيه مشمومه وهبله 
اخبار غبيه 
ابليكاشنس عبيطه 
ريكوستات العاب 
بوستات ممممله وتزهق 

الناحيه التانيه جروبات الجامعه ، الخير ،شنطه رمضان، البلوج بتاعي ، جروبات تانيه محترمه 

طب نعمل ايه في ام الفيس زفت ده نقفله ولا نخليه؟

الأحد، 9 أكتوبر، 2016

قرات لكم : انا حره


اولى تجاربي مع احسان عبد القدوس 
الروايه سلسه ورقيقه لدرجه اني انجزتها في جلسه في النادي ، وهذا حدث جلل لم يحدث من سنين !!!!

امينه فتاه صغيره تولت عمتها تربيتها بعد انفصال ابويها ، زواج امها وطريقه حياه والدها التحرريه لم تناسب تربيه طفله صغيره في مجتمع محافظ 

تربت في بيت العمه في حي العباسيه ، ويرصد للمجتمع المحافظ جدا وانغلاق الاسره الا من بعض المشاركات الاجتماعيه الهادفه لتزويج البنات

تميز امينه المدرسي، الموسيقي ، الشخصيه المميزه جعلها هدف للفتيات داخل المدرسه لا خارجها ، مرصد للشباب كالفاكهه المحرمه التي يشتاقوا لها ولا يقربوها 
واغتياظها من عباس الفتى الاوحد الذي لم يحاول الاقتراب منها اصلا

احساسها بالتميز جعلها تكره الحي وتنطلق لحي الظاهر المختلط باليهود والاجانب بحجه تعلم اللغه من فتاه يهوديه وهناك تتعلم الرقص من اخيها وتبدا والاختلاط بعوالم جديده 

محاولات هرب من المدرسه لقضاء اوقات لطيفه والعوده سريعا للبيت ثم جس نبض الاسره بالتاخر قليلا والثوره عندما رفضوا ذلك

الصراع النفسي داخلها طلبا للحريه وحديثها لنفسها انها لن تنال الحريه بلا شهاده وبلا وظيفه ، محاولات العند على كل شيء اثباتا للوجود لا غير 

المحكمه التي تنصبها كل ليله لنفسها عن تصرفات اليوم وعدم النوم لو كانت مذنبه خير دليل على ذلك الصراع 

خطبتها لشاب محترم والملفت للنظر انها رفضته الا ان شخصيته جذبتها فوافقت عليه ثم تراجعها عنه ( كرفته) لمجرد معارضته وضعها (روج) ثم قرار دخول الجامعه ومعارضه العمه وتدخل الاب وانتقالها لبيته في وسط البلد 

الحياه الجديده في مكان جديد وتعاملها مع الجيران الاجانب ودخولها الجامعه الامريكيه وتغير نمط حياتها لنمط اكثر تحررا وتجاربها الطائشه في الجامعه لكن بحساب لمجرد خرق المالوف والمعتاد 

تخرجها وعملها بشركه امريكيه ومرتبها الكبير واحساسها اخيرا بحريتها ثم رغبتها في اظهار ما وصلت له لعباس ذلك الفتى الذي طالما شغل تفكيرها

ثم توجهها له لتريه ما ال له حالها وكيف حصلت على الشهاده والوظيفه والحريه ثم رده بانها ليست حره ولكن عبده لعملها وشركتها في حوار في رايي هو محور الروايه ( الحب هو العذر الوحيد الشريف للعبوديه )

ثم انشغالهم ببعض وتطور الاحداث وحديثها لعباس عن كل تفاصيل حياتها وتجاربها وتقبله لذلك ثم  اختيارها لعباس وحياه عباس وتفاصيل عباس وتنازلها بمحض ارادتها عن كل شيء لعباس وذلك لإيمانها بعباس الكاتب الصحفي الذي تطور ونمى بوجودها خلفه وتذكرها انكارها ذلك لعمتها مع زوج عمتها واباؤهم !!!!  لكن هذه المره كان اختيار لا اجبار لانها اصبحت حره الاختيار بشهاده وعمل واختيار 

اتصور انها كانت سابقه لعصرها واثارت جدلا واسعا ايام نشرها 

( الحب هو العذر الوحيد الشريف للعبوديه )



الخميس، 6 أكتوبر، 2016

كلب شوارع

وانا مروحه استوقفتني بنت شكلها في الجامعه كانت بتتكلم في الموبايل ولقيتها وقفت لكلب في الشارع وكانه ندهها او هيه حست بحاجه انا مش فاهماها ، انا شخص باخاف من الكلاب بس مش باكرههم ، لقيتها بتميل عليه وتلمس على راسه وتلعب بايدها بين عينيه ولقيت الكلب بيتفاعل معاها ويهدا خااالص ، فجاه قفلت الموبايل وكنت انا قربت منهم شفت حاجه عمري ما حانساها : نظره الكلب ليها والله فيها الفه وامتنان وحب ما فهمتهمش وكانه اول مره حد يعامله برفق في حياته ، ساعتها بس فهمت هيه ليه قفلت الموبايل غالبا حست مع الكلب ده بالفه وود ما كانوش مع البني ادم اللي كانت بتكلمه عالموبيل حتى لو مع كلب شارع وكانها هيه اللي كانت محتاجه للكونكشن دي مش كلب الشارع وعجبي !!!!



الجمعة، 30 سبتمبر، 2016

شكرا ابو عزام

خواطر صباحيه : 
شكرا ابو عزام 
استلمتني عربيه خضره حبه كويسين النهارده 
فضلت ماشيه قدامي بتاع عشر دقايق والحقيقه كانوا من اجمل ما يكون

امتزاج روائح الشبت والبقدونس والنعناع كان عظيم !!!

وتداعي لفكري طبق ورق عنب لذيذ بالزبادي، او عجه بيض جميله من بتاعه ماما ، او مطبق من بتاع السعوديين 

للاسف اضطريت اخد اليوترن عشان وصلت الشركه وافترقت انا وابو عزام لللي كان نفسي اصور عربيته للذكرى بس خفت اعمل حادثه 

اللي يشوفه يقوله شكككرا ابو عزام 
صباحكم سكر
#خواطر_شاي_بالنعناع

خواطر صباحيه : العلم والايمان

في تقليد اكثر من رائع نغم اف ام بتلخص حلقات د مصطفى محمود عشر دقايق الصبح من تمانيه الا خمسه كده

حلقه النهارده كانت عن هجره السلمون من البحار للانهار وزاي هيه عكس التيار وبتنط شلالات بالعكس 
الغريب اني لقينني باستدعي الحلقه البصريه من الذاكره واللي شفتها زمااااان جدا 

استمتعت بتركيب الصوره على كلام د مصطفى !!! 
اكتشفت لا اتاكدت ان الحلقات اللي كان بابا يقعدنا نشوفها كأسره حتى حتى لو مش فاهمينها محفوره في الذاكره وان بجد التعلم في الصغر مهم جدا 

ما اعرفش بقه كلهم كده ولا فكره السباحه ضد التيار هيه اللي تاصلت في الذاكره ؟!

#خواطر_شاي_بالنعناع

قنابل الست الوالده


امي ربنا يديها الصحه من اصحاب مدرسه الاكل المتكلف المعمول بمزاج 

عندكم مثلا طبق البليله الشتوي العظيم ده الناس كلها تحط لبن وخلاص ، احنا بقه لازم زبده وجوز هند ومكسرات  وقشطه 


البطاطا كل الناس تشويها وتاكلها من سكات اخنا بقه نعملها صينيه بزبده وقشطه ومكسرات 


الثخينه الاكله الرسميه للنقنقه في الشتا ودي فضله خيركم عيش متحمر في زبده ومسقي عسل اسود لزوم الدفا


في كمان تورته البلح وزيها الاناناس وهي عباره عن بلح او اناناس متغطس في كرامل ويتصب فوقه الكيك وبعد ما تتخبز تتسقي شربات وتتقلب وتقدم ملهلبه اه والله زمبؤلك كده !!!


ده خلاف بقه الرز بالخلطه والحمام المحشي والرز المعمر وصواني الرقاق والمشلتت  وغيرهم كتييييير 


القنبله بقه النهارده كانت على الفطار لما حمرت البلح السماني في الزبده ورشت عليه سمسم كتحليه بعد فطار الجمعه العظيم دي بقه كانت تحليه عالماشي :) 


في قنابل كتير جدا بس دول اللي جم في بالي دلوقتي للمشكله بقققه انها بعد كورسات التغذيه العظيمه دي تسكت كده من وقت التاني وتقول شكلك تخنتي ، ابقي اعملي دايت !!! ماشي يا حاجه حاعمل دايت :) 


الاثنين، 26 سبتمبر، 2016

في قلبي انثى عبريه





الكاتبه ذكرت انها قصه حقيقيه بتصرف لمحي تفاصيل صاحبه القصه 

القصه لفتاه بهوديه من ام يهوديه واب مسلم 
تقع الاحداث بين تونس ولبنان ورصد لهروب الام ببناتها للبنان وزواجها بمسيحي والعائله  المختلطه من مسلمين ويهود ومسيحيين
الحقيقه اعجبتني فكره التعايش ومعها الطفله المسلمه القادمه للعائله في مهمه قصيره 
على الجانب الاخر شباب المقاومه واحتياجهم لعلاج في فيلا الاسره السابق ذكرها دون علم الاهل ونمو الحب بينهم 

فجاه تسارعت الاحداث وتموت الصغيره ويختفي المقاوم وتسلم الفتاه اليهوديه
وتكون السبب في اسلام باقي الشخصيات حولها 
حماس الكاتبه قد يكون افقدها الموضوعيه خصوصا حداثه عهد اسلام ندى لا يؤهلها الدعوه والرد على الشبهات 
اضافه لفقدان احمد للذاكره والصراع النفسي لكل الابطال 
تسارع الاحداث وفقدانها الموضوعيه اضعف النصف الثاني الروايه ، كما احتواىها على كم من الشبهات والردود عليها افقد الاحداث تشويقها وافثد بريق الروايه 
صراع الابطال ونهايته بطريقه بطوليه لحسان كذلك افتقد المنطقيه 

الروايه لطيفه ، بدات اكثر من ممتازه ثم مرت بتصاعد للاحداث خلطت فيه الماضي بالحاضر والمستقبل كان اكثر من لطيف ثم استرسالها للدعوه والرد على الشبهات ثم قصه فقدان الذاكره اضعف الروايه والنهايه 
في رايي لا تستحق الضجه حولها 
تقييمي ٣ من ٥

الجمعة، 23 سبتمبر، 2016

خلف الدهشوري خلف


في يوم من ذات الايام وانا معديه على جامعه القاهره وماما بتتغزل في القبه الكبيره بتاعتها لقيتني باقولها دي قاعه الاحتفالات الكبرى

وسرحت كده ان كان ليه حفله تخرج فيها بعد الماجستير بس ما حضرتهاش ولقيتني باقولها تصدقي انا ما ليش بخت في حفلات التخرج خااالص مع كل الشهادات اللي خدتها


البكالوريوس بالرغم من اني التامنه عالدفعه كانت حفله مسلوقه والاهتمام الاكبر كان بالدفعه اللي قبلنا واللي اوجدوا فيها اماكن للاوائل وزوجاتهم اه والله
اما دفعتنا الغلبانه اول عن اخر كان لينا بتاع ست كراسي فما لقيتش مكان اقعد فيه مع الاوائل ورجعت ورا مع اهلي وكانت حفله اي كلام لدرجه اني مش فاكره اني اتصورت فيها كتير ولا لاقيه الصور اصلا


بعد كده قلت لنفسي باقيه في حفله الماجستير وكنت سعيده جدا بقاعه الاحتفالات الكبرى اللي اتخرج منها عظماء مصر بس الحفله حصلت وانا مسافره سويسرا وما حضرتهاش


ولقيتني باقولها انا ليه حفله المفروض من اكتر من سنه في الجامعه الامريكيه بس شكلي كده اتنسيت منها او مش حتتعمل
مفيش يومين تلاته لقيت الايميل بيتبعت ان الحفله بعد العيد , وفي عز يوم ضلمه من ضغط الشغل الاقي الجامعه بتتصل تبلغني باختياري عشان اقول كلمه الخريجين اه والله تخيلوا !!!


وتحصل حفله من اجمل ما يكون ومارش الدفعات والشهادات على انغام اوبرا عايده وصورخدناها كتيييير قوي وتيجي الكلمه بتاعتي وانزل من اول القاعه للمسرح وانا مقتنعه اني حاقع وكل الناس دي حتضحك عليه بس ما وقعتش !!! واقول الكلمه اللي بجد طلعت تحفه قدام عدد مهول من الحضور وانا نفسي رايح ومرعوبه بس كل ده ما ظهرش بالعكس لاقت استحسان فظيع من كل اللي شافها



وتتفك عقده حفلات التخرج اخيرا , اللطيف ان كل حد ما يشوفها يفتكر صعيدي في الجامعه الامريكيه ويتقالي خلف الدهشوري خلف وفي لحظه تهريج نسترجع الفيلم والفينال بتاعه انه امي عملت ايه يا ابوي لما عرفت اني نجحت  قاله صينيه بطاطس , الظربف فعلا ان ماما اليوم ده كانت وبجد وفعلا مغدياني صينيه بطاطس !!!! 


الخميس، 25 أغسطس، 2016

حفله الست




بقالي كذا خميس اروح تعبااانه ومفياش دماغ لا لقرايه ولا لمتابعه افلام ولا اياتوها حاجه

كل مره اعمل كوبايه شاي بالنعناع وامارس هوايتي في تقليب القنوات بلا هدف , وكل مره تستوقفني حفله الست على روتانا كلاسيك الساعه عشره بالليل وكل مره لا اراديا احط الريموت واستمتع بيها

الست ورسوها على المسرح وجلستها الشامخه في بدايه الحفله واستماعها للمقدمه الموسيقيه وحاله الترقب والتبريق من الجمهور في انتظار ايه اللي حتقوله الليله

ايه الفرقه الموسيقيه دي مره عديت الكامنجات طلعوا بتاع عشرين عالاقل ولا العواد ولا القانونجي دول لوحدهم كوم تاني

ولا في انت عمري التشيلو وهو بيقسم وياخد ويدي مع القانون اعجاز موسيقي لا مثيل له

الاغنيه دي مثلا كانت مفضلتي لحد ما اتفرجت عليها حفله اسرتني اكتر واكتر

الجمهور قمه في الرقي والشياكه والاندماج وكل واحد سارح في ملكوته مع كلام الاغنيه في اللي سرحان وفيه الي بيبتسم وفيه اللي بيهلل معاهاه وفي اللي بيطالبها بالاعاده وياما سمعنا عن نوادر للجمهور في الحفلات

اما الست بقه بساطه الاناقه واناقه البساطه لا يمكن تلبس اكتر من قطعه مجوهرات ملفته اما الحلق او البروش لا اكثر ولا اقل مش بقه مجال لاستعراض الالماظات من خواتم وعقود واساور لاااااا خاااالص وتسريحه شعر عاده تتناسب مع مود الاغنيه وكذا الفستان

الست تضحك وقت ما الابتسام مناسب فيظهر ده في صوتها, تغضب او حتى تبكيك وكانها بطله بتؤدي دور فني سولو هيه وبس , تبعد عن المكرفون وقت اللزوم وتقرب وقت اللزوم لزوم مود الاغنيه

الاغنيه بحسها قصه او فيلم بتحكيه وتتصاعد الاحداث وبعدين تهدى لحد ما تتنتهي

كنت وما زلت من عشاق الست وهيه بس اللي بتطفي دوشه نفوخي بعد يوم شغل صعب او مشوار دمه تقيل مش بس كده ممكن اتلكع في السكه عشان اخلص الاغنيه قبل ما اوصل انما بقه حفلاتها طلعت مشكله بالنسبه لي  لا املك فيها الا التناحه والتبريق وسرحه طوييييله اني رجعت زمانها وباحضرلها حفله واستمتع زي الناس دي يا بختهم ويا خسارتنا

عربيه اسعاف في الميدان


 واقفين في الاشاره تنظيما لمرور حته لما بتقفل مصر الجديده وحدايق القبه والاميريه والبقاع المجاوره بتتقفل


 المهم اول ماجه الدور علينا الناحيه التانيه وصلت عربيه اسعاف ، العسكري ضرب لخمه واحتاس وساب الوضع زي ماهو بعد ما وقفت عشان هيه تعدي مافتحش الناحيه التانيه وكل الناس اتسمرت !!! عديت بسرعه وفتحت الشباك وزعقتله عشان يفوق من التسميره دي " افتح للاسعاااااف" ...
 



هز دماغه وفي ثانيه الشارع مشي 


 حسيت ان العيان اللي جواها رفع لي ايده يشكرني
وفجاه سرحت فيه وفي اهله يا ترى حيلحقوه ولا حيتقفل عليهم في اشاره تانيه ؟ مع عسكري حيضرب نفس اللخمه !!!

والدمعه والسرحه المعهوده مع كل عربيه اسعاف تصادفني انه يا رب يلحقوه 

وبعدين منير خطفني بالاغنيه اللي كانت في الراديو زي ما كلنا بنتخطف بالحياه اليوميه 


صباحكم سكر

الثلاثاء، 9 أغسطس، 2016

فينيسيا اااه من فينيسيا

قررت سرقه يوم في فينيسيا علي امل المرور بمدينه الاحلام ولو لسويعات بسيطه 
الخطه كانت الذهاب لفيرونا ثم في اليوم التالي الذهاب لفينيسيا 
اكتشفت ان قطار العوده سيوصلني في منتصف الليل او مغادره فينيسيا في الرابعه عصرا !!! 

طول الليل تفكير في جدوي الزياره او تغيير الفندق في اخر لحظه 
بعد استيقاظي قررت تبديل الايام لمنع الوصول المتاخر 
ولحسن الحظ كان معي جداول كل القطارات من والي فينيسيا ، فيرونا 

وبالفعل قررت تبديل الايام لقضاء اطول وقت في فينيسيا وتجنب الرجوع المتاخر من فيرونا 

بدات الرحله في الخامسه والربع صباحا ووصلت فيرونا ٩.١٥ ، كان يجب شراء تذكره فينيسيا واللحاق بالقطار في ١٦ دقيقه وجريت جري في محطه القطر لا يصدق 
من شباك القطار ايطاليا : الجبال اكثر حده من النمسا وسويسرا ، انهار ماليه الطريق ، اشجار العنب بمساحات شااااسعه اوديه وانهار غايه في الجمال 


الناس شبه المصريين، صوت عالي ، لغه معبره بكثير من التمديدات وحركات الايدي وتعبيرات الوجوه  ، شعب ضحوك بشده ،ةشباب روش جدا 


الشوارع ملاي برسومات الجرافيتي ، شخبطه عالحيطان بالظبط مثل مصر , غسيل منشور عالحبال ، شبابيك بشيش وزجاج مثل مصر بالظبط ، بلكونات شبيهه  بوسط البلد، بيوت قديمه وغير مصانه محتاجه صيانه وبياض زينا تمام

حتي القطر مستواه متواضع ، حمام غير نظيف ، شبابيك غير نظيفه ولكن احسن بكتير من احسن قطر في مصر 
ما زالت مواعيد القطارات بالثانيه 


في اتجاهي لفينيسا بعد تغيير مفاجيء الخطه كانت ومازالت حلم لا استطيع تصديق انه متبقي عليه ساعه ونصف 

وصلت فينيسيا لاول وهله صدمه !!! هيه دي فينيسيا مياه راكده مليئه بالطحالب وخضرا ، شباب غير متعاون في مكتب السياحه في محطه القطر كل اللي كان مهم بالنسبه لي بيع خريطه !!! 

الجندول معرفش ليه اخترت ما اركبوش ، حاركبه لوحدي ؟! مش مهم، المره الجايه :)


مشيت ولفيت في الشوارع ضيقه بشده اوسع شارع عرضه متر قررت اتعامل مع ام البلد دي اشتريتpostcardvوبدات اسال عن الاماكن الموجوده فيها ، بدات اسال الناس في الشوارع الي ان دلني راجل ظريف جدا بشراء تذكره يوم في البواخر بتاعتهم ، حاجه كده شبه الاتوبيس النهري بس انضف وقالي علي الاماكن والخطوط المرشحه وايدني في فكره ان شباب مكتب السياح غير متعاونين


وظهر وجه اخر لفينيسيا خرجنا للبحر الادرياتيكي بدل القنوات الضيقه ووصلنا للقديس زكريا ميدان غايه في الجمال مليان سياح ومطاعم وكنائس وحمام !! اتصورت وانا باكل الحمام صوره من اجمل صوري عالاطلاق، المطاعم بها فرق موسيقيه حيه تعزف اجمل الاغاني الكلاسيكيه في جو رائع


اتجهت بعدها لجزيره مورانو في رحله حوالي ساعه الا ربع  ثم مصانع الزجاج في عرض حي لطرق عمل الزجاجايات الشهيره لهم ومحلات تملا الشوارع باشكال والوان متنوعه واكثر من رائعه 
في طريق العوده منظر المدينه من البحر لا يوصف والجندول بالقرب منها في مناظر راىعه وغايه في الرومانسبه والجمال 


قررت اسال الناس عن كيفيه قضاء باقي اليوم والتمشيه في شوارعها وزياره ال academia ثم جسر ال reality الشهير ثم العوده في ال grand canal الشوارع هنا كانت اجمل وارقي والجو العام حالم وخيالي 
ورجعت للقطر اذ بي اكتشف ان جمال المدينه نساني اكل واشرب طول النهار واني تقريبا مشيت تسع ساعات دون ان اشعر ، اشتريت بسرعه اكل وشرب في انتظار القطار

ظبطت المنبه علي ميعاد الوصول لفيرونا خوفا من سبات عميق ينسيني النزول في محطتي


وقد كان !!! لكن المنبه ايقظني في الوقت المناسب لينتهي يوم لن انساه ما حييت  

الاثنين، 1 أغسطس، 2016

عن الشبكه واشياء اخرى




الكام يوم اللي فاتو وفي ظل ارتفاع اسعار الذهب والازمه الاقتصاديه تابعنا كلنا حملات بلاها شبكه ، والشبكه الفضه والكلام ده 

وزيي زي ناس كتير بنقرا الخبر والتعليقات اللي في المجمل اثبتوا فشل منظومه الجواز المصريه زي كل حاجه حوالينا 

الشبكه ما هي الا صوره مودرن جدا لفكره المهر اللي ربنا شرعه وجعله حق من حقوق الزوجه وما هواش تمن الزوجه والتخريف اللي بيتقال لانه في الوقت الحالي الجواز اتحول لاتفاق ومناصفه بين العروسين وما بقيتش العروسه تاخد مهر زي ما ربنا قال 

المشكله مش في الشبكه ولا في الجهاز ولا في الاتفاق ولكن في المنظومه نفسها 

ربنا قال مهر المثل ، المثل هو اللي في مقامها وظروفها ومستواها الاجتماعي لان الدين نفسه عامل مبدا الكفاءه والتكافؤ في المستوى الاجتماعي والتعليمي كاساس مهم جدا لنجاح الجواز 

والله هيه وعن طيب خاطر تنازلت او تساهلت عن ده يبقى فضل وكرم منهاوتشيلها على راسك من فوق مش وقت الجد تعايرها بمرجلتها معاك
 والله هو مش قادر على ده يبقى يطلب تاخيره زيه زي مؤخر الصداق كده حين ميسره وما يضرش يا سيدي عايزه

انما الامور تتصاعد وجوازات تبوظ وناس تانيه لو سهلت يتقال لها انا خدتك ببلاش والجو ده ، بلدي قوي يا حسين على راي الفيلم 

نيجي بقه لحاجه تانيه اهم في اعتقادي الشخصي الخمسميه معلقه وشوكه وال٢٠٠ فوطه وملايه لازمتهم ايه ؟ احنا بنحمل نفسنا فوق طاقتها بجد وزي ما الازواج بيطالبوا بتصغير الشبكه العروسه كمان مش مطلوب من اهلها يجيبوا كل الرفايع دي واللي احيانا بتكون اكتر بكتييير من تمن العفش والشبكه 

والحموات الفاتنات يبطلوا النقوزه والفشخره اللي ملهاش تلاتين لازمه وام العريس بلاش تخش تفتح الدواليب والنيش وتعد الشوك والسكاكين وتتريق على البراقع والستاير 


والعروسه تقعد شهور تشتري وتلف وامها من وهيه في اللفه تشتري وتحوش للجهاز

اتذكر البنت الماليزيه اللي كانت جنبي في الاتوبيس في سالزبرج لما اتعرفنا على بعض وجايين نعمل ايه حكتلي انها مع عريسها عايشين في ميونخ واهلهم في ماليزيا فبدل ما يسافروا اخر الدنيا يعملوا فرح قرروا يجيبوا أهلهم ويتفسحوا معاهم في سالزبرج قبل الفرح بصيتلها وافتكرت اصحابي قبل جوازهم واللف والخساسان ورص الدواليب والنيش ولقيت دي بتتفسح وتاخد سيلفي وبتعمل شهر عسل قبل الجواز !!

لو مشيناعالدين يا نمشي عليه للاخر يا ما نمشيش شرعا لا عليها عفش ولا رفايع ولا اي حاجه بس برضو هو يعمل اللي يقدر عليه بيته وهو حر فيه 

المغالاه الزائده ملهاش اي لازمه من اي من الطرفين ولا ان البنت تنزل المزاد للي يدفع اكتر ويجيب شقه وشبكه اكبر 
او الجوازه تبوظ عشان ستاره وسجاده 

لو البني ادم كويس كله حيجي في وقته ولو اي كلام وعنده فلوس الدنيا كلها ملهوش برضو لازمه ولا قايمه ولا شبكه ولا تامين الدنيا حينفعها وحترميله الجمل بما حمل وتنفد بجلدها منه ومن عيشته

استقيموا يرحمكم الله 

الأحد، 17 يوليو، 2016

صيدله حلوان دفعه 2000 على السوشيال ميديا:


تبدا بنكشه على جروب ماسج على فيسبوك اول يوم في السنه عشان نعيد على بعض وفجاه قرروا يعملوها جروب واتساب وتكبر شويه شويه لما يبقوا بتاع 35 واحد في ظرف ساعتين ولقيت نفسي واحده من الادمنز ماشي يالا مش مشكله
اليوم الاول :  حوالي 20000 ماسج كانهم كانوا مع بعض انبارح  , مسافه المرواح 500 مسج في ساعه لدرجه اني عملت mute  لصوت النوتيفيكاشن شويه لحد مايهدوا


ايوم التاني :  البنات بيشتكوا من المذاكره والعيال وارجاله من غسيل المواعين !!! جو صعبناني حزايني شويه


اليوم التالت: استكمال اليوم التاني


اليوم الرابع : مناقشه عن  نعمل دكتوراه  ولا ال MBA   ومستوى مناقشه عااالي جدا بدل التهريج بتاع انبارح , نفس اليوم اقتراح بارسال الصور عشان في ناس مش عارفه بعض: البنات فعلا زي ماهمه : الولاد : في ناس ما عرفتهاش اصلا , في ناس زي ماهيه وفي ناس الزمن اكل عليها وشرب يعني صلعه على كرش كده يعني ثم تريقه الولاد على ان صور البنات فوتوشوب ودفاع البنات انه لاه ثم تريقه الولاد عللى بعض


اللطيف ان البنات بعتوا صور فرداني اما الولاد طالعين شايلين العيال ومحتاسين بيهم !!! ضحك وتهريج بجد من القلب , واحد ما عرفنهوش وقعد يحلف انه كان معانا !!!


الاغرب اننا بعد ما حطينا الصور اتلخبطنا اكتر فقررنا نحط الصور زمان والان !!! وكم المفاجاه الرهيب اللي حصل لا تتخيلوه شنبه طلعت وشنبه اختفت ,و شوش شكلها اتغير ناس صغرت وناس كبرت , ناس تخنت وناس خست !!! العز بان على ناس والشقا كمان على ناس تانيين


كان وائل زميلنا متخصص كل شويه يشير كوميكس بره موضوع المناقشه !!! قمه الفصلان والضحك والناس تسيب الموضوع ويقعدوا يتخانقوا معاه او يهزروا على حسب !!!


بعد كام يوم قلبنا عالرجيم بعدها مدارس العيال


المهم في الموضوع هو التواصل بيننا كاننا ما سبناش بعض من 15 سنه والتلقائيه والطاق البهجه عالجروب وكل الناس بجد بتتكلم براحتها وعلى طبيعتها


بعد كام شهر على جروب فيسبوك بقه مشاركه من ال quotes  الشهيره لبعض الدكاتره في محاضراتهم وناس تكمل لناس ال quotes  دي ثم يتحول مجرى الحديث عن دكاتره تانيه وامتحانات الشفوي ومين حصل له ايه
كميه مفارقات مضحكه وكاننا سايبين بعض انبارح وكاننا كلنا كنا شله واحده بالرغم من ان فيهم ناس انت اصلا مش فاكرهم !!!
المشترك بين الناس دي هو النوستالجيا لايام جميله فاتت من كام سنه واننا عندنا كم من البهجه والبساطه مع بعض يمكن ما كنش ايام الكليه


ما اعرفش ده في دفعتنا احنا بس ولا مع كل الناس , ليه وازاي بضو ما اعرفش س اللي تعرفه كويس جدا انك بتحس معاهم انك لسه ورور ماشي شايل البالطو تتمنظر بيه وانت رايح مدرج 16 اللي في اخر الجامعه حتى لو مش ناوي تدخله وناوي تركن شويه في كافيتريا chez l’amie  في النص قال ايه حتجيب شاي عشان تركز في محاضره الكيميا الصيدليه !!!


كل شويه حد يسافر يقوم ينده على اخواته ويقالبهم ويغيظونا بالصور , ناس تعيا في ساعه زمن الدواء يجي من اي حته في الدنيا , ناس تعزي ناس تبارك ناس تساند بيت وعيله واخوات اكتر من العيله والاخوات

بعدها بسنتين يقرروا يتجمعوا في اول  reunion ده بقه حاحكيلكم عليه البوست الجاي