الاثنين، 31 أغسطس 2015

حادثه :(

احلي حاجه في حادثه النهارده بالرغم من كل السلبيات والقرف واني لا خدت منه لا حق ولا باطل ولا ان الظابط اللي نعرفه ما رضيش يوديني القسم عشان ما اتبهدلش !!! ولا اني حتي ما شوفتش رخصه قيادته اللي اظن انها ما كانتس معاه : 


لسه ممكن لو واحده في ورطه في الشارع الف واحد يجي يساعد 


لما الراجل كان حيكت بالعربيه الناس وقفوا له 


لسه في ناس جميله قوي راحت جابت بولش ونظفت مكان الخبطه عشان يهدوني انها مش كبيره


واللي يوريني صور حادثته وانها قضا اخف من قضا  
واللي يفكرني ان كلنا سلام 


واللي يهديني ويقولي خشي العربيه من الشمس 
مكالماتكم وبوستاتكم واللي عايز يجي لي واللي بيطمن علينا من هنا وهناك 


واحلي واهم حاجه ابويا اللي كان واقف لهم اسد 
واخويا اللي جالي في خمس دقايق من شغله ودخل مسرح الجريمه بحته امريكاني سد مخرج البيه اللي كان حيهرب منه 
الحمد لله علي كل حاجه 

اكتشفت كمان ان الشخص البارد هو اللي بيسيطر عالوضع وبيكسب بطريقه او باخري حتي لو هو اللي غلطان  وده طبعا ما كنش انا !!!

 واني عيطت كتير قوي واتقهرت قوي فبقيت مكسره وعايزه انااااام ومش عارفه

انا في الاخر بصيت للسما وقلتله حاختصمك يوم القيامه عند ربنا وفوضت الامر لصاحب الامر المنتقم الجبار 


ما اعرفش انا جبت القوه دي في قمه قهرتي ازاي لدرجه اني 

شوفت نظره خوف في عينه وده لوحده عندي كفايه 


,
الحمد لله

الأحد، 23 أغسطس 2015

مقالي في نون : الكبيره قبل الصغيره

تاملات


في يوم من ذات الايام وفي وقت الغروب عالبلاج وفي حاله تامل عمييييك عميييك يعني ممكن توصلها بعد محاولات طويله من التركيز في التركيز انك ما تركزش في حاجه غير انك تكون مركز في ولا حاجه ( والله وبجد ومن غير تريقه بتوصلها بعد معاناه وممكن تستمر ثواني او دقايق انت وحظك , بس بجد بجد فجاه بتلاقي سكووون وراحه وهدوء حتى لو كنت في ميدان التحرير) والحاله دي بتحتاج تدريب كتير قوي ومشقه انك ما تسمحش للدوشه انها تدوشك اعتقد اليوجا كده بس مش متاكده

اليوم ده بدا معايا من قبل المغرب بساعه ولحد بعد العشاء بساعه

مع غروب الشمس واحده واحده بلونها الذهبي الفظيع اللي بالرغم من حزنه كمشهد بالنسبه لي مع نهايه يوم من عمر اي واحد فينا مش حيعوضه ليوم القيامه وحيتسال عنه بحذافيره , الا انه بالنسبه لي قد يكون نهايه ليوم ايا كان عدى ازاي بحلوه ومره , وووعد بيوم جديد احتمال يكون احلى او فيه حل لاي مشكله ممكن تكون فيها

غروب الشمس بالرغم من شجنه الا انه فيه راحه وهدوء عالاقل للشمس اللي كانت تعبانه معانا طول اليوم تروح تنام ننه وترجع بكره . زي ما كانوا بيقولوا لنا زمان  

في ذلك اليوم العظيم واثناء التامل الفظيع اللي حكيت لكم عليه فوجئت ان البحر كانه له صوت ونفس ودقات قلب , ولما تركز فيه حتلاقيه له اربع اصوات

الصوت الاولاني: صوت ضربه الموج في الشط وده بيكون عنيف ومزعج جدا

الصوت التاني : صوت رجوع الموج للبحر وده كله رقه وحنيه وعذوبه

الصوتين دول تحس فيهم انهم شهيق وزفير للبحر وفعلا فعلا لو ركزت فيهم حتسمعهم كده

الصوت التالت: صوت الموجه اللي راجعه لما تخبط في للي قبلها وده بتحس فيه بالحركه والنشاط  

اما بقه الصوت الرابع وده ما تقدرش تسمعه غير لما كل اللي على الشط يهونا ويتكلوا يعني حتى بعد ما الشمس تغرب وده صوت خروج الموجه من وسط البحر وده بجد اللي مخيف وله عمق غريب

اللي اجمل من الحاله دي لما فعلا الدنيا تليل وتكون السما صافيه وفجاه تسترجع جغرافيا ثانوي وتركز قوي وتشوف الدب الاصغر وتعده بالسبع نجوم بتوعه معرفش ده ببجد ولا تهيؤات بس هيه فعلا كانت السين المقلوبه اللي قالوا لنا عليها

او لما تركز وسط البحر في نور مركب بعيده وتشوفه بيتحرك ببطء شديد بس لطيف

او لما تتخيل اخوك اللي قاعد قدامك مباشره بس عالشط التاني يا ترى اسمه ايه ولا شكله ايه , بيعمل زيك ومهيس في ملكوت صاحب الملكوت ولا بيغني ويرقص, مبسوط ولا زعلان , في انهي بلد والساعه في ايده كام؟ قضى يومه ازاي ومستني ايه في بكره

وتكتشف انك ضغننننن قوي في ملكوت ربنا وحجمك ضئييييل جدا ويمكن حتى ما لكش تلاتين لازمه او حتى اهم واحد في دنيتك , مش مهم  

الاهم فعلا اني عملت دماغ سما وبحر لا يمكن ابدا نساها  وروحت هاديه ومسترخيه الى اقصى درجه  

الأحد، 2 أغسطس 2015

نظارتي حبيبتي


كان عندي سنتين وكان بابا وماما في اجازه فققرورا يغيروا نظاره بابا فراحوا لدكتور عيون د. خالد عياده من اشهر دكاتره العيون وقتها , المهم عمل لبابا الكشف وبابايا نظره ضعيييف قوي فالدكتور لفت نظرهم اني ممكن اكون اخدت الحكايه دي منه فقررورا يعملوا لي انا كمان كشف بعدها الدكتور قالهم ان نظري ناقص سيكا واني من المستحسن البس النظاره عشان يحافظوا عليه ولبست النظاره في يومها

تخيلوا طفله يادوب بتمشي حطوا لها فاترينه على وشها حيكون رد فعلها ايه؟ كراهيه شديده لهذا الشئ العجيب

ماما جابتها مره من الزباله ومره من درج المعالق ومره من جزمه بابا عشان يبقى هو اللي كثرها (كسرها) يعني مع انهم كانوا جايبنها ملونه وتحفه بس برضه ما اقتنعتش بالموضوع ده

فضل ده الحال لحد ما دخلت المدرسه وما لبستهاش غير لما ماما اشتكت لمدرستي كانت فلسطينيه واسمها رفقه وهيه فعلا كانت رفقه , لما تسالني ال homework  ده اتعمل بالنظاره ولا لاه فلو اه حتى لو كله غلط كانت تحطلي نجوم وتخلي الفصل كله يسقف لي , والعكس لو من غيرها حتى لو صح كانت تشطب عليه وتعيدهولي

فضلنا كده لحد ما اقتنعت ان النظاره دي حاجه حلوه خالص واقتنعت بيها !!! لدرجه إني كان لازم ارسم النظاره على اول الصفحه قال ايه عشان اشوف كويس والميس كمان تعرف اني كنت لابسها !!!

في ابتدائي كانوا البنات السعوديات يغلسوا عليه ويقولوا لي " يا ام اربع عيون " بس ماما اقنعتني اني دكتوره واني عشان كده اشطر واحده في الفصل !!! وكبرت في دماغي وطلعت فعلا دكتوره !!!

فضلت صاحبتي قوي معايا في كل مكان وكل مناسبه وكمان مامتي طول عمرها ملبساني ماركات واللي عدساتها بمبي واللي الوان مختلفه عشان تمشي مع لبسي والجو ده

مع ان مقاسي مش كبير بس ما كنتش باركز من غيرها , اوقات بنام بيها, اوقات باستحمى بيها انزل بيها البحر, تشبر في الحر , تلسع وشي في الشمس .... يعني مواقف وطرائف

راحت وجت معايا هنا وهناك زي ضلي, شافت فرح وحزن ودموع زيي بالظبط

بس هيه صاحبتي قوي وجزء لا يتجزأ مني الف للعدسات وارجع لها , افكر في الليزك وارجع في كلامي كده يعني اصلها نظارتي حبيبتي !!!!

فجاه حسيتها حدود وحواجز لنفسي فطلعت  في دماغي اعمل الليزك وفعلا عملتها من سنه بالظبط بعد تردد كبييير قوووي  ولحد دلوقتي بدور عليها بعد ما اتوضى , وكتير ازق البريدج فمالقيهاش !!! وكتير لما اتوتر اعدل النظاره فمالقهاش !!! يعني لسه ما نسيتهاش بس برضه التغيير حلو

الشيء الغريب اني بامشي اتفرج على نظارات الناس دلوقتي وبتعجبني جدا وكتير لما ابص لنفسي في المرايه باستغرب شكلي جدا !!!! اصلها عشره برضه ومش حاقولكم كام سنه !!!!

https://www.facebook.com/#!/562451227215431/photos/a.562476710546216.1073741828.562451227215431/748837995243419/?type=1&theater