الأربعاء، 25 مارس 2015

عمرها قلبت معاك بجد؟


انا من جيل كان سه خياله واسع وهو طفل
يعني عادي جدا مجموعه اطفال يالفوا تمثيليه ويرتجلوا احداثها ويمثلوها سوا
وكل مالمجموعه كبرت كل مالخيال كان بيشطح , يعجبهم فيلم يمثلوه تعجبهم شغلانه يعملوا بطل التمثيليه هو صاحب المهنه دي ويبداوا ينسجوا بخيالهن احداثها

مره كوافير, مره امثل فيلم , مره اقلد حد من قرايبنا بس دول ما طولوش قوي معايا بس شخصيه زي شخصيه مضيفه الطيران كانت بتجنني وافضل اتفرج عليها واحنا راجعين مصر في الصيف طول الرحله واخزن حركاتها وتصرفاتها وانسج من خيالي احداث وتمثيليات , ضربت مره معايا كمان بعد الفرجه على فيلم الطائره المفقوده فكانت الحكايه اوفردوز مضيفه وفيلم دي بقه كانت حدووووته , اللذيذ في الموضوع ان كان عندي لعبه عباره عن عربيه شاي ودي بقه كانت عربيه الاكل ودوخت كل ضيوفنا اللي زارونا بيها


من المهن اللي سيطرت عليه كمان كانت المذيعه ودي بقه كانت نكته النكت كنت باقف على التواليت عشان اطول  وامسك الممسحه اعملها مكرفون وابدا في فقرات الاذاعه واستغل صدى الصوت في الخمام كان الميكرفون اشتغل !!!
وبعد شويه اتعلمت اسجل شرايط اذاعيه وبرامج وبقيت اسجل من التلفزيون والراديو فواصل اغاني وفقرات واقطع ورق عشان صوته يطلع في الكاسيت كاني بافتح جوابات المستمعين !!! لو دعبست شويه حلاقي الشرايط دي !! وكنت باغير صوتي واعمل مذيعه وضيف ا والله مش بهزر وكتير كنت باتسم بالخنفان !!! بس بصفه عامه كانوا لذاذ

بس دي قلبت معايا بجد لما مسكت الاذاعه المدرسيه من رابعه ابتدائي لثانويه عامه

طفولتنا كانت بسيطه وفي نفس الوقت لذيذه , ما اعرفش اطفال دلوقتي يعرفوا يعملوا كده ولا لاه بس اكيد اللي اخترع كيدزانيا كان بيعمل كده وهو صغير !!
انت بقه عمرها قلبت معاك(ي) بجد؟




الاثنين، 23 مارس 2015

انت عايش وللللاااا؟

فكره الحياه الاخرى فكره ازليه بتسيطر عالبني دم من قديم الازل والى قيام الساعه وفي كل الحضارات والثقافات والديانات
جد جد جدي المصري القديم امن بفكره البعث والخلود وحضر ليها الميت مهما كان مستواه المادي او مكانته الاجتماعيه ورحله البني ادم للغرب وتلاقيها مسيطره في وادي الملوك وحجر الدفن وادوات الميت والبعث والحساب

وبدات المقابر بغرف دفن وبعدين مصاطب وبعدين اهرام دهشور ولحححححد الهرم الاكبر مش بس كده احنا كمصريين ولحد دلوقتي تلاقي شواهد القبور والمبنى اللي فوقها مستوحاه من الاهرام وكمصريين وبس يعني حتلاقي المسلمين والمسيحين عندهم فكره الحوش والسور والمكان اللي حوالين القبر موجوده هنا وهنا وطقوس زي الخميس والاربعين ملهاش دعوه بديانه ولكنها ميراث فرعوني

في شعوب تانيه تلاقي فكره الحرق ونثر رفات الميت في الاماكن اللي كان بيحبها او اللي كان نفسه يزورها مستمده برضو من فكره الازليه والخلود

وتلاقي الخواجات بيعملوا احتفالات بالموت مش حزن وهم وغم زي حالاتنا ويستقبلوا الناس ويقعدوا يحتفلوا بذكرى الميت ومميزاته وحساناته وازاي هو انتقل لعالم احلى واجمل وعشان كده بيحتفلوا !!!

عندنا تلاقي الناس الكبار بعد الانتهاء من تعليم العيال وتامين مستقبلهم او تزويجخم ينتقلوا لمرحله " نفسي في تربه" اه والله وتلاقيهم حركانين يدوروا يمين وشمال لحد ما يحققوا الحلم ده !!! اصله برضو بيدور على مكان دفنه ويبدا في تجهيزه وزراعته وتعيين حارس على قبر فاضي

عجبني قوي مشهد يوسف داوود في العسل المر لما قاله الناس تلف يمين وشمال وترجع تقولك نفسي اندفن في بلدي وكان البلد اتحولت لتربه !!!

هو التربه هيه الوطن؟ هيه المئال النهائي للانسان ؟ ده حقيقي فعلا لو بتؤمن انك في رحله وان البدايه هيه بالموت ومش النهايه هيه الموت ,  الغريق تربته البحر اللي بلعه , الحريق تربته النار اللي كلته , الميت في اي مكان كان,  تربته مش حفره يترمي فيها ويجوا يقروا له الفاتحه ولكنها الغرفه اللي بيوضبها لنفسه من يوم تكليفه , ويبنيها بذكر وصلاه ويعمرها بخلق حسن مش بوسعها وحته رخام تتلزق على شاهد قبر ولا بحوش يتملي زرع

 ناس كتير عايشين مدفونين بالحياه في شغانه مش على مزاجهم او جوازه مش على كيفهم او حياه مش بتاعتهم او ظروف اتفرضت عليهم وعلى النقيض اموات كتير عايشين من الاف السنين بعمل صالح وسيره كويسه وعلم متساب وذكرى حلوه عشان كده اؤمن بشده بكلمه قالها لي راجل بسيط قووي " السيره أطول من العمر" هاه بقه انت عايش ولللللاااااا؟


الأربعاء، 18 مارس 2015

المايسترو

اخيرا عرفت اجيب تذاكر لعمر خيرت في الاوبرا , ولا تتخيلوا كم السعاده والترقب من ساعه ما مسكت التذاكر لمعاد الحفله بالليل لان اصلا وصلت للتذاكر بالصدفه وفي اخر لحظه وربنا رتب توصيلهم ليه صحيح كانوا اغلى من سعرهم شويه بس مش 
مشكله


روحت ولبست واتشيكت ونزلت والجو كان فيه لسعه برد مبهجه , وصلنا الاوبرا والجو العام يبعث على السعاده ناس لابسه ومتشيكه , ستات راحت للكوافير ولابسه الاماظات ورجاله متايفه اخر حاجه والكل يشترك في ترقب السعاده مع دخول الاوركسترا
دخل العظيم عمر خيرت ومعه موجه تصفيق حاد لمده عشر دقايق ثم بكل الحزم والحسم شاور للحضور وقوفا للسلام الجمهوري 
, يااااه ده انا اخر مره وقفت للسلام الجمهوري كان في المدرسه في ثانويه عامه !!!


ثم بدا العزف على اوتار قلوبنا كم من البهجه والسعاده لا توصف , تذكرتي كانت بلكون يعني عاليه عن المسرح واكتشفت انها كانت ميزه عظيمه لاني ادعي أن لي اذن موسيقيه فكانت كل اله تدخل في اللحن اتنقل ليها بسهوله مع المنظور العلوي كانك بتشوف فيلم سينما والمخرج بينقل من مشهد للتاني وتفرح بروحك انك حددت الاله صح جدا


يتميز عمر خيرت بانه بيدي لكل اله مقطوعه موسيقيه تكون سائده فيها وبعد الناس ما تسقف للاله وصاحبها يقدمه,  قائد بكل ما تحمل الكلمه من معنى


منال محي على الهارب تحس انها حوريه نازله من الجنه او طالعه من اسطوره فرعونيه وهيه حاضنه التها وناسيه فيها الدنيا باللي فيها


ونسمه على المارينبا قطعه من البهجه والابتسام والسعاده بترقص مع الايقاع بايدها ورجلها ودماغها وشعرها وتقدر من اخر كرسي تشوف ضحكتها وتسمعها في الاله بتاعتها وزي النسمه تتنقل من الدرامز للمارينبا للدف وكل شويه تغير العصيان بتاعتها فالايقاع يتغير معاها


صولو الكمان عمر خيرت قام وقفله ومن كتر اندماجه لقينا عمر خيرت عايش في حاله كانه ماسك كمان وبيعزف عليها ايه التوحد والاندماج ده يا بختكم باستمتاعكم بالحياه وشغلكم وان شغلكم هو العشق بتاعكم
مع مقطوعات زي عارفه او مافيا او والله ماطلعت شمس ولا غربت يدخل العازفين المشهد ككورس بيغني في تناغم غير طبيعي
حتى عازفي الايقاع تحس انهم كلهم ممسوكين بخيط واحد وواحد من فوق بيشد ايدهم ويرخيها يعني لو سرحت شويه يتهيالك انهم عازف واحد


عمر خيرت في ساقيه الصاوي غير الاوبرا خااالص وتجسيم الصوت والاضاءه وتوزيعها وحجم الاوركسترا يفرض عليك جلال ورهبه وسعاده منقطعه النظير


وبعدين يرجع تاني يقدم الفرقه فرد فرد وفي الاخر يقول وانتم وانا لان الجمهور كمان عازف قدير بتشجيعه وتسقيفه
 وتخلص الحفله ويولع النور ونرجع تاني لزحمه القاهره في انتظار حفله تانيه نرجع فيها للمود العظيم ده ولو لساعتين كل كام سنه !!!!



الاثنين، 16 مارس 2015

بانده عليه مالتاكسي في اوضه الجلوس !!!

صدفه اكتر من لطيفه وانا بقلب في الراديو وانا مروحه لقيت برنامج اسمه منتهى 
الطرب على اذاعه الاغاني حوالي 8.30 يوم الخميس

فعلا هو منتهى الطرب وجايب اغاني قديمه ويدي نبذه عن الاغنيه وتسجيلها
الحقيقه استمتعت بيه وفجاه قرر يعرض اغاني لشكوكو , اه والله لشكوكو


واحده اسمها انده عليه من التاكسي " اه بجد اسمها كده" اغنيه كوميديه خفيفه جدا
 ومضحكه جدا جدا لدرجه تنسى معاها قبح صوت شكوكو اللي هنا هو عارف كويس جدا انه مش مطرب بس حد حيضحك قوووي اللي حيسمعها وله شخصيه متميزه في اداؤه تفرض عليك احترامه بارغم من خفته بس مش مبتذل
تخلص الاغنيه والمفاجاه انها الحان محمد عبد الوهاب " والله زمبؤلك كده" محمد عبد الوهاب بشنته ورنته !!!


ثم ينتقل المذيع لاغنيه تاني لشكوكو برضه " من ادب الادباتي سجلت لبرنامج الى ربات البيوت" هو بالظبط قال كده سنه 
1960
والمره دي الاغنيه "اوضه الجلوس وقت الزيارات " تربويه جدا وبتتكلم عن الضيوف والمفاجات بتاعتهم والعيال ودوشتهم وازاي الضيف ممكن يضايق اصحاب البيت ويزعجهم , وبرضه بالرغم من الكوميديا الا انها هايله جدا والمفاجاه بالنسبه لي اني لقيت نفسي حفظت اجزاء منها من اول مره سماع من كتر ماهيه موزونه ومضحكه في نفس الوقت , بقولك ايه : " وفي عز الزحمه يجووا يعملوا لبخه والبيت ما فهوش لحمه نقوم نبعت نجيب بلوبيف بجنيه " !!!


الناس دي بالرغم من البساطه والفطره الا انهم كانوا عارفين بيقولوا ايه وليهم هدف مغلف بغلاف سكر لدرجه انهم خلوني دورت عليها عالنت وسجلت بياناتي على منتدى اغاني في انتظار قبول العضويه عشان اسمع الاغاني دي تاني , عمري ما كنت اتخيل اني ادور على اغنيه لشكوكو !!!
اول ما يتوافق عالعضويه حاعملكوا شير للاغاني !!!

الاثنين، 9 مارس 2015

جيل ملعوب في شجرته

افتكرت جمله في فيلم خالتي فرنسا لما سالته منى زكي عن سر تسميه عبله كامل بفرنسا لما قالها عن ظلم جدتها انها غلطت مع عسكري فرنساوي لما خلفت بنت عينها ملونه (قال يعني كانت عينها ملونه!!! ) وانهم بالبحث والتمحيص اكتشفوا ان الجدود كان 
فيهم العينين الملونه وختم القصه بانه " يظهر اننا عيله ملعوب في شجرتها " في عباره تهكميه لذيذه


سرحت مع نفسي ان الجيل كله ملعوب في شجرته او قصدي في دماغه : جيل اتعلم واتنور كل انواع العلوم ولسه بيتشائم لما 
يشوف قطه سودا الصبح


جيل له صداقات عادي من هنا وهناك مصريين وخواجات بس اول ما يخطب كل واحد يقفش عالتاني ويخنقه مين ده ومين دي
جيل رجالته سافرت وشافت يمين وشمال بس لما يجي يتجوز عايز واحده صوره من الحاجه او حتى نقاوه الحاجه
جيل يؤمن بحريه المراه طول ما هي بره حدود "حريمه" اخواته بقه , خطيبته , بنته ...


جيل اتفرج على افلام اجنبي لما قال يا بس لدرجه شوهت توقعاته من الحياه وفي الحياه سواء بقه في التفكير, في الجواز , في شويه افكار مغلوطه عن الحريه


جيل مظلوم قوي كان اوله بيلعب الاولى في الشارع وعدى عالواكمان والاتاري وفجاه لقى نفسه قاعد عالفيسبوك طول النهار من قمه الانفتاح واللعب الجماعيه لقمه الانطواء والانعزال التكنولوجي


جيل ببساطه دماغه انضربت في الخلاط لدرجه لا تصدق , جيل فعلا ملعوب في شجرته على راي ابو فرنسا 

الجمعة، 6 مارس 2015

الاتنين ريحتهم لها نفس العفن.

في زياره غير مخططه بالمره لمسجد الرفاعي بالقاهره , لقيت نفسي قريبه رحت داخلاه
اللطيف في الموضوع اني رحت السلطان حسن قبل كده بس المرشد السياحي قالي زي بعض واختاروا واحد عشان الوقت فالناس 
اللي معايا يومها اختاروا السلطان حسن

وفضل الرفاعي في الخطه لحد لما لقيت نفسي جنبه رحت داخلاه

الطف حاجه هيه محاضره العملي لطلبه كليه الاثار اللي المعيده قعدتهم وبدات في اعطاء الدرس عن تاريخ المسجد وعمارته وتميزها وغيره, وازاي خوشيار هانم والده الخديوي اسماعيل قررت بناؤه وانه قعد وقت طويل لحد ما خلص
وانها قلدت فيه السلطان حسن وزودت عليه اماكن لمقابر الاسره الملكيه
لحد هنا والموضوع خلص


بنتمشى بعد كده انا وبابايا ومامتي وبنسال عن اماكن الاضرحه دي من باب الفضول  لقينا الحارس بيقول لبابا عايزين تدخلوه يا حج بابا قاله هو مش مفتوح قاله لاه بس لو عايز افتحهم لك بابا قاله ماشي, قام الحارس بسلاسل المفاتيح وفتحهم واحد واحد لانهم غرف مؤديه لبعض


ولن تتخيلوا العز والابهه في الاضرحه دي غرف للام وغرف للزوجات غرفه لشاه ايران وغرف للاميرات وبهو كبييير بعده ضريح فاروق وبهو تاني بخشب العود لحد من السلاطين لحد دلوقتي ريحه العود ماليه الضريح كانهم لسه مبخرين
والرخام الصناعه اليدوي والسجاجيد العجمي في مساحات مهوله


وازاي القبه في السقف نفس الرسمه للصره في السجاد شيء غير عادي
اما رخام الارضيه في ضريح شاه ايران قال ايه بيسخن في الشتاء ويبرد في الصيف !!!


لفت نظري جدا الجامع اللي اتبنى في 40 سنه واللي ذو طراز حقيقي مختلف بس اللي لفت نظري جدا فكره الاضرحه والابهه اللي فيها بشكل مباااالغ فيه بجد واننا كمصرين مسيطره علينا فكره القبر وعظمته من ايام الاهرام مرورا بالاسره العلويه ولحد النهارده وان القبر عندنا مهم جدا ويستمد مكانته وعظمته من مكانه صاحبه بغض النظر عن ظروف صاحب القبر جوه القبر اللي ربنا وحده يعلم بيها وان ممكن جدا راجل غلبان في مقابر الصدفه اهله نسيوا اسمه يكون عند الله احسن من ناس كتييير  


افتكرت قوي عمنا جاهين في رباعيته العظيمه :
ضريح رخام فيه السعيد اندفن.
 و حفره فيها الشريد من غير كفن.
مريت عليهم .. قلت يا للعجب.
 لاتنين ريحتهم لها نفس العفن.
عجبي

الاثنين، 2 مارس 2015

الفراولة بتاع الفراولة


انها تلك الثمره الصغننه اللي بسهوله كده تدخل البهجه والسعاده على نفسك بمنتهى السهوله وبمنتهى الصعوبه هيه فعلا السهل الممتنع من اول اللون المبهج من جوه ومن بره مرورا بالريحه الجمييييله جدا وبعدين طعمها وبذورها المنمنه اللي تسيب اثرها في بقك شويتين بعد ما تخلص اكل
يا سلام بقه على كوبايه عصير فراوله في يوم مشمس في النادي مع مزيكا هاديه وكتاب ظريف ساعتها اصل للسماء من السعاده 
والبهجه
ولو الدايت زنقك ممكن مع كوبايه زبادي ومعلقه عسل تحس انك اسعد واحد في الدنيا
اما بقه لو الغزاله رايقه وقمت عملت تورتايه فراوله وزوقتها بالجلي (فراوله برضه ) تكون عملت احلى دماغ ومزاج
ويا سلام على يوم ما مامتي تنزل تشتري قفص الفراوله التمام وتقوم تعمل مربى الفراوله ريحه البيت تجيب لاخر الشارع من 
جمالها
او لو دخلت في فروت سلاد شخصيتها تفرض نفسها على كل الفواكه حواليها ببساطه من اللون والطعم والريحه
او لو حتى طلعت مززه شويه وماما عملتها بالسكر كمبوت برضه جميله ومنعشه
في وجه نظري المتواضعه هيه اثبات لنظريه ان اكثر الاشياء اسعادا اكثرها بساطه هيه فعلا السهل الممتنع !!!
امال همه غنوا للفراوله ليه ؟ الفراوله بتاع الفراوله قرب اشتري مني يالا
اي كلام مش كده؟