الجمعة، 20 أكتوبر 2017

بناء


الحكايه بدأت بساره صديقتي الصدوقه اللي عرفتها بالصدفه في شنط رمضان
ساره بتحط بناء في جمله مڤيده مره كل ٥ دقائق ، نوزع شنط في الصعيد فين يا ساره , الاجابه بناء ، معرض ملابس ، الاجابه بناء ، ناقص نأكل فين ، الاجابه بناء !!!
المهم ايه بقه قررت اطلع اشوف شنط رمضان بتتوزع فين وازاي فطلعت قافله معاهم للمنيا
فريق عمل ما شاء الله متكامل ومحب لبعضه ومتفاني بأقصى درجه
لفيت كتير وقليل بس اللي شفته كله كوم واللي شفته في قرى الصعيد معاهم كوم تاني
البيوت اللي بيوصلوا لها حقيقي تحت خط الصفر بمىراحل طويله ، يدخلوا البيت من دول يعرفوا يجيبوا قراره ودخله ازاي وبشويه ذكاء وحب يعرفوا ايه اللي ناقصهم وفي فسوه من الزمن يوصل لاهل البيت كل احتياجاته ايا كانت سقف، اجهزه، زكاه ، رعايه، حالات زواج ايتام ، غارمين ، اطعام ، ارامل .... كل واي حاجه
ماشيين بدليل من كل قريه ومع ذلك بينزلوا استكشاف ومتابعه
عادي جدا في عز الصيف بدل ما الناس بتطلع الساحل ، همه بيستكشفوا في أقاصي الصعيد
حضرت فطار رمضان بتاعهم وكان ديش بارتي وصلاه وتراويح ، وكمان بطيخ وقصب وضحك للركب وقت الجد جد ووقت اللعب والهزار تفطس معاهم من السعاده
مره جم معايا درس الموسيقى ورجعنا عالبيت وسهرنا لمتاخر بس كلنا كنا فرحانين ومبسوطين وبنضحك  ولا كأننا الساعه ٦ بالليل وكم الاريحيه اللي كلنا حسيناها لا يوصف لدرجه اني ما نمتش يومها من كتر الفرحه والانبساط
مش بس قوافل وعمل خير لا كمان حفلات سمر وفطار رمضان وكمان مانجا بارتي ( اول مره في حياتي اكل مانجا قدام حد بره البيت كانت معاهم وده دليل عالاريحيه الشديده اللي الواحد بيحسها معاهم )
نطلع القافله ونرجع مضحضحين من التعب بس تاني يوم نقضيه سعدا في الفرحه على احداث اليوم واسترجاعها وبسرعه نطلب اللي بعدها
بنرجع مشحونين طاقه وإيجابية ونحمد ربنا على نعمه وفرحانين بفرحه الناس ونظره الشكر والامتنان منهم
في راجل غلبان انبارح من كتر شكره ودعاه لينا الواحد اتكسف واحرج منه ونظره الفرحه المخلوطه بالكسره ( لأنه حتى مش قادر يقدم أي حاجه لشكرنا أو ضيافتنا من كتر غلبه وعجزه ) بس يا سيد الناس لو تعرف اننا احنا اللي محتاجينك مكنتش تنكسف ولا تحرج ابدا
بناء همه عيله جديده دخلت وسطهم من فتره قصيره بس بجد كان الواحد يعرفهم من سنين ، البساطه والتلقائيه والأهداف المشتركه اهم بكتير من شياكه المجتمعات الممثله اللي حوالينا من كل حته
كلنا سوا من اول بشندي لحد دبايح كبرات البلاد اللي بنزورها مرورا بفطير وكحك بسكر في بيوت بعض
ضحكنا وهرجنا في الباصات وعيطنا كتير لما نشوف حالات أو نحكي لبعض عن حاجات من اللي بنشوفها
الاجمل من كل ده تبقى قاعد في امان الله تلاقي بوست كده صغنن هدايا بناء لأعضائها ( وابهاتهم وامهاتهم ) أسهم في وصلات ميه للصعيد وآبار في افريقيا
ولا يوم الاشهار اول ما تفتح عينك تلاقي مسج عظيمه تفتح لينكها تلاقي الخبر اللي كنا مستنينه بفارغ الصبر
بالذمه في اجمل من كده ؟ .
قولوا ماشاء الله لا قوه الا بالله
ربنا يديمكم في حياتي
بناء جمعيه رسميه مشهره ١٠٥٥١
لينك الصفحه على فيسبوك
https://www.facebook.com/Bena2/




الجمعة، 13 أكتوبر 2017

سيب ديابها على كلابها

سيب ديابها على كلابها
قال ايه قلت اروح النادي اغير جو
كل الجناين متاجره من الباطن ، اعياد ميلاد ومكومين الاعضاء في جنينه صغيره
الالطف أن كل عيد ميلاد بيعلي عالتاني بالديجي بتاعه فالازعاج فوق الوصف ، وقاعدين مع بعض مش سامعين بعض !!!
قررت اروح اخر حته في النادي انقل فيها لقيت برضو عيد ميلاد ، طلعت عالاداره اطلب منهم حل بتوطيه كل الأصوات كل واحد على قده ما لقيتش حد من الاداره !!!
فلفيت على كل عيد ميلاد اطلب منهم يوطوا الصوت
وطوه شويه ورجعت ريما لعادتها القديمه !!!
الكوميدي بقه أن كل فسل من أصحاب العيد ميلاد زبله عنده سنه ولا ٢ ومش فاهم حاجه وموسخين هدومهم اصلا بالطينه!!! اما الاغاني اللي شغاله اصلا مهرجانات !!! يا ريتهااغاني اطفال ظريفه !!!
اما النادي ساب ديابها على كلابها والاداره في اجازه !!!
اللي حصل النهارده مثال للتسيب في بلدنا ، كل واحد بيعمل اللي في مزاجه في غياب تام لأي سلطه لاي مسئوول !!! مع شويه عدم احترام لمساحه الآخر وفكره أن ممكن يكون في ناس غريبه زيي محتاجه تقعد في شويه هدوء أو بعد الشر تقرا ولا تتأمل في صمت !!!!
#المحروسه_قعده_شاي_بالنعناع#

http://shaybelne3na3.blogspot.com.eg/2017/10/blog-post_13.html?m=0

الأربعاء، 4 أكتوبر 2017

قال ايه ازمه مرور قال


فقط في المخروبه
احنا بس اللي ممكن المرور يقف عالكوبري عشان امين الشرطه قرر يغلس على سواق ترله على كوبري ويشوف رخصه ، مش مهم بقه أن الشارع يقف من قبل الكوبري ولا مصالح الخلق تعطل
واحنا بس اللي الشوارع زحمه عشان الصبح الناس رايح الشغل بالليل راجعه منه وفي النص من غير سبب !!!
واحنا بس اللي شوارعنا بتقف من غير سبب فجاه ربنا يفرجها وتتفتح من غير سبب
واحنا بس اللي بوكيه ورد يوقف البلد كلها مع أن جاي يومين اجازه
واحنا بس اللي الهانم والباشا قرروا يكسلوا يركنوا فوقفوا الشارع لما كل واحد رمى بوز العربيه وماكملش ركنها عشان بجيب حزمه فجل من الخضري
احنا اللي عندنا قله ادب مش ازمه مرور
#المحروسه_قعده_شاي_بالنعناع




الأحد، 1 أكتوبر 2017

اذان الشيخ محمد رفعت

اكثر ما اعشق في القنوات الارضيه الاذان بصوت محمد رفعت بعده دعاء الشعراوي 
هو هو من ايام ما كنت في ابتدائي 
بيفكرني بزمان وبلكونه جدي وقرطاس اللب والراديو الترانزستور البرتقالي بتاعه 
واحنا بنسقي الزرع في البلكونه ام ارضيه خشب وسور فيرفورجيه 
والجار تحت بيرش الشارع بجيب طراوه ويرقد التراب ، وتشمل ريحه التراب المبلول وتبص السماء تلاقي الحمام راجع الغيه بتاعته وصاحب الغيه بيصفرله ويلمه بالعلم الاحمر 
والشوارع كلها اطفال بتطير طيارات هوا 
طيارات بيتي معموله من الخشب والورق ويطيروها ويعلوها وتبقى أعلى من كل العمارات اللي حواليك 
وتطير وتسرح معاها وتقول حاطير طياره ورق معاهم بكره 
ويجي بكره وبعده وتفتكر كل ده بعد سنينننننن طوييييييله وانت بتسمع الادان في قناه ارضي وتفتكر أن عمرك ما طيرت الطياره الورق فتضحك على ابسط احلامك اللي ما حققتهاش