Follow by Email

الاثنين، 20 أبريل، 2015

قصر الامير محمد علي


في زياره خاطفه لقصر الامير محمد علي بالمنيل بعد افتتاحه بعد ترميم دام 10 سنين وبعد 20 سنه من اول زياره له (كنت لسه في اللفه !!!) والحقيقه القصر من العنايه بيه بعد الترميم بيبرق فعلا والاهتمام والصرف كمان واضح


تلاقي المشرفين بينظموا الدخول والخروج ويمنعوا فلاش الكاميرات ويمنعوا الرحلات من الصعود للأدوار العليا خوفا عليها وفاهمين ودارسين والاهم عارفين قيمه المكان وتاريخه ويحكوا بحب وود وفخر منقطع النظير


القصر عباره عن مسجد الامير وسراي الاقامه وسراي الاستقبال وقاعه العرش بناه الامير محمد علي انتظارا لتتويجه ملك مصر والسودان بعد موت الملك فؤاد صممه بنفسه واشرف على تنفيذه بنفسه واخد 40 سنه في بناه


ولكن عبده مشتاق الملك فؤاد اداله مقلب عمره لما اتجوز نازلي وخلف فاروق !!! وبالرغم من كده اتجدد الامل عنده لما فؤاد مات قبل فاروق ما يتم 18 سنه قوم ايه الست نازلي تحسب عمره بالهجري فتتطلع منه اوت للمره التانيه وفاروق يبقى الملك !!! فقري الله يرحمه


بس الصراحه اهدى لنا قطعه منقطعه النظير من الجمال والابداع وواضح انه كان perfectionist  من الدرجه الاولى حيث تجد الفسيفساء في كل مكان ونمانم الخشب والصدف في كل مكان ابداع بقه حب للجمال يمكن بس الاكيد انه كان صاحب مزاج
انا شخصيا من فرط احساسي بالجمال والسعاده الغامره في المسجد مثلا بكيت من شده التاثر بالجمال والله بكيت من كتر الجمال
تلاقي كمان صور ولوحات تمثل لك الصالونات الثقافيه المعموله في المكان وتشوف وتسمع المظ وعبده الحامولي، وتشوف رفاعه الطهطاوي ومحمد عبده وصورهم
وصور السلاطين وقعداتهم الخصوصي
وصالونات كامله اتنقلت من الشام واسطنبول وهدايا وتذكارات من كل حته في الدنيا لدرجه تسمعك قعداتهم ونقاشاتهم واغانيهم شيء غايه في الروعه والجمال بجد


وبالرغم من الجمال والابداع في غرف الشعر والمكتب والاستقبال والصالونات الا ان مثلا غرفه نوم الامير غااااايه في البساطه المنقطعه النظير !!! اوضه اقل من العاديه وكانها دخيل على صوره الجمال المحكم في كل مكان وكانه اختار لنفسه البساطه والهدوء في مكانه الخصوصي


متحف الصيد والفراشات واجزاء كتيره بما فيها الجناين لسه لم تفتتح بس اكيد في يوم من الايام حاروحه تاني وافضل بالانطباع بتاع من عشرين سنه فاتوا واللي عمري ما نسيته انه من اجمل مناطق مصر الاثريه



صاحبتي بتقولي في الاخر ا ازي الواحد يبقى عنده بيت زي ده ؟ سكت شويه وقلت لها نصوم ونصلي ونعبد ربنا بذمه وحيدينا اللي اجمل منه بكتير في الجنه ان شاء الله بس المره دي من غير مقالب زي بتاعه فؤاد ونازلي للامير المتعوس 


الجمعة، 17 أبريل، 2015

شم النسيم

شم النسيم احد اكثر الاعياد المصريه اصاله وقدم من ايام جدو فرعون , احتفال المصريين بالربيع اللي هو يوم الزينه المذكور في القران لما فرعون والسحره تحدوا سيدنا موسى


اليوم ده يوم مميز جدا ومهم جدا عند كل المصريين مسلمين ومسيحين لانه اساسا ملهوش دعوه باي دين هو عيد  لللمصريييييين وبس


البيض الملون ورمزه للحياه والتجدد والطبيعه وسحرها , الاسماك اللملحه باشكالها والوانها كجزء من تقديس النيل !!!!
البصل مثلا رمز لقهر الموت والتغلب على الامراض


بيتنا في اليوم ده وتحديدا اليوم اللي قبله له طقوس ثابته من سنين : مامتي تبداه بتحضير الترمس والحمص وخلطهم على بعض مع عصير الليمون

العناب بقه (تمر هندي على كركديه) لزوم الرنجه والهضم

سلطه الرنجه تخصص للحاجه مع كثيييير من عصير الليمون والطحينه عشان ما تحماش عالقلب

الاهم من كل ده ريحه الخبيز لاشهر المخبوزات للفطار : شريك بالسكر , بريوش, كيك, فطيره شم النسيم واي حد من دول مع كوبايه الشاي باللبن لهم طعم مختلف في اليوم ده عن اي يوم


تلوين البيض بقه تخصص زقرده الصغننه بنت اختي لازم تلون البيضه بالوانها الخشب وده اليوم الوحيد  اللي بتاكل فيه البيضه المسلوقه من غير وجع قلب اومال ايه مش هيه ملوناها


ناخد المولد ه كله ونتجه للنادي من 8 الصبح في ترابيزه ثابته من سنين ونستمتع بقه بالنسيم العليل والخضره الجميله

انا باحب شم النسيم قوي باحس انه يوم بينسرق من السنه بين برد الشتا ولسعه الحر في الصيف , يوم بتلون فيه حياتك وتخرج مع عيلتك وتنبسط لاول واخر مره في السنه بدوشه وونس المصريين 

الخميس، 9 أبريل، 2015

نادي السينما

بالصدفه سمعت موسيقى تتر برنامج نادي السينما من كام يوم , اللي ما يوعاش عليه كان بيجي يوم السبت الساعه عشره ويعرض اجمل الافلام الاجنبيه مقدمته القديره دريه شرف الدين بمقدمه عن الفيلم والابطال وبعد ما الفيلم يخلص تقعد تحلل الفيلم ولقطاته مع احد النقاد السينمائيين


ولقيتني باسرح زمان ايام مالواحد كان يدوب عشر سنين لما خيلاني علموني الفرجه عليه وازاي الواحد بدا يسمع ويكبر دماغه ويفهم سينما ويحلل الفيلم ويشوف تحليله طلع صح ولا لاه وازاي اتعلم يشوف الفيلم وينصت للموسيقى وينتبه للتفاصيل الصغيره وزوايا التصوير والرسايل بين السطور وازاي الخناقه كانت يوم السبت قوموا ناموا عندكم مدرسه الصبح !!!


افتكرت كمان اوسكار يوم الخميس وسناء منصور بصوتها الاذاعي المميز والبرنامج اللي شبه نادي السينما بس هنا التتر كان لقطات من افلام عالميه حازت على الاوسكار واكتر لقطات فاكراها اليزابث تايلور في كليوباترا , سوبر مان واي تي !!!
وازاي شويه شويه الواحد استقل واستهيف الافلام العربي وبدا الخناق كل يوم السهره عربي ولا اجنبي بيني وبين اختي و لدرجه ان بابا عمل لنا جدول للسهر منعا للخناق !!! اصلنا يا عيني ما كنش عندنا غير الاولى والتانيه وبعدها بشويه التالته , التلفزيون ليله ما يطول يشطب الساعه واحده وفي الصيف 3 . البرامج كانت تخلص بخمسه ضحك باين ولا خمسه فرفشه مش فاكره وتتره كان اغنيه اضحك كركر لليلى مراد وبعديه يعرض مشاهد كوميديه وفجاه التلفزيون يشطب يعرض شاشه بالوان الطيف شويه وبعدين وشششششششش من غير اي حاجه !!!

جدول السهره في بيتنا ومعظم البيوت:
السبت نادي السينما القناه الاولى
الاحد اي حاجه عربي

الاتنين تاكسي السهره : كان ينزل يلف على السينمات ويعرض لقطات من افلام السينما يمكن ربع الفيلم مثلا واحد عربي وواحد اجنبي !!! اللطيف انه بيلخص الفيلم لدرجه انك تستغنى عن انك تروح تشوفه اصلا !!! المذيعات:سهير شلبي , ناديه حليم, مش فاكره الباقيين لو حد افتكرهم يقولي !!!


التلات : اخترنا لك:  لقطات للساحر دايفد كوبرفيلد, السيرك الاوربي, حلقات ماكيفر و اكس فايلز تقديم فريال صالح
الاربعاء : بانوراما فرنسيه : النسخه الفرنسيه لاخترنا لك : حمديه حمدي ولا انا نسيت؟  


الخميس :اوسكار , سناء منصور
الجمعه: عربي


بس تصدقوا احلى والطف من الهذيان بتاع العشر الاف قناه فضائيه بتوع دلوقتي !!!

انتوا بقه ايه جدول التلفزيون عنكم ؟