السبت، 31 يناير 2015

عندي وجع قلب بحلم


 وجع اسمه المشردين في الارض بني ادمين زينا بالظبط لا بيت ولا عيله ولا حياه اصلا . الفرش اسفلت والغطا السما اما الجيران قطط وكلاب الشوارع
الاكل فضله خيركم , ماهو فعلا فضله خيركم بس بعد ما عدى على اشكال والوان زباله وتلوث على شويه تحلل ماهو مش بمزاجهم
...
حتقولي يشتغل حاقولكم نصهم مرضى نفسيين , او اطفال هربت من قسوه زوج ام او مراه اب
حلمي بيت في كل حي يلمهم وينضقهم ويعالجهم ويعيد تاهليهم ويعلمهم صنعه يسترزقوا منها ويفضلوا فيه برضه بس المره دي يدفعوا ايجار ويردوا الجميل للي بعدهم لحد ما يقفوا على رجلهم ويسيبوا الدار
ماهو البني ادم اكيد مش عايز يعيش في الشارع ولا ياكل من الزباله فلما تنضفه وتعلمه وتاهله اكيد مش حيرضى يرجع تاني
وجعوا قلبي في الكام يوم البرد اللي فاتوا لا غطا ولا ستر ولا لقمه نضيفه
اقولك , يمكن لما تبني انسان يكون عند رب الانسان احسن من بيوت رب الانسان اللي اوقات كتير فاضيه ومقفوله
ما تيجو نحلم سوا الحلم ده واللي فيكم يقدر يوصل صوتنا لجمعيات ومنظمات تتبنى الفكره وتنفذها
حننقذ ناس كتير قوووي واولهم نفسنا من طوفان من المشردين واطفال الشوارع اللي في زياده مرعبه كل يوم, ومن حساب ربنا لينا اننا شفناهم وبصينا لهم بقرف وما عملناش لهم اي حاجه
I Have a pain turned into a dream
Pain called homeless people , normal people who sleep in streets, cover with sky and their
neighbors are street animals and rodents
Their food is your trash after being mixed with all sorts of decay and contamination
You may say they should work, and I will say the majority are psychopathic
My dream is shelter in each district where they are rehabilitated, trained and treated with humanity , teach them a manual job from which they can earn money and return to normal human
They will remain in shelter but this time paying return for the coming generation until they become capable of being independent and return normal citizens
And I am sure that afterwards they will never
go back to street as it is a human need to be a human, treated as human, to have proper home, food, and family
Lets dream together and whomever of you can promote the idea and make it reachable to NGOs who sponsor and fund the idea to save them and us from the pain and suffering in their sides , pain and suffering from our conscious
دي لينك صفحه جديده عملتها بعد ردودكم على يوميات غلبان بردان
لو تنشروا الفكره , يمكن الحلم يبقى حقيقه , مين عارف smile emoticon

قعده شاي بالنعناع , شكرا

كان زمان اسمها يوميات بنوته مفروسه وكنت باتكلم فيها عن مجتمعنا العظيم , وما عرفش ليه ما كنتش قايله انها بتاعتي وكاني كنت  اكتب باسم مستعار وعشان كده ما انتشرتش
فجاه قلبت عليها وبطلت اكتب فيها ونسيت حتى بادخل عليها ازاي ...
من سنه بالظبط قررت اجرب انشر الخواطر من اللي بنكتبها في كتاب وأنا باذاكر ولا في قصقوه وتدفسها في مكتبك ولا اي مكان وكان ده الهدف منها , وكنت في اجازه سنويه في ليله بالليل قوي , دخلت على بلوجر عشان اعمل واحده تانيه , لقيت الاولانيه بس من باب التفاؤل والتغيير قررت اغير الاسم وافتحها تاني , والغريب ان البوستات القديمه ما لقيتهاش فقلت بدايه جديده وبالمره قررت اني اقول انها بتاعتي وانشرها بين صحابي

وبوست عن بوست اكتشفت انهاعجبتكم مع فرقعه لكام بوست زودوا القرايه والمتابعين, بس فضلت مشكله انها تقيله من عالموبايلات , او ان الناس مش بتعرف تبعت ردود لو ما عندهمش حسابات على جوجل بلس ففتحت الفرع التاني ليها على فيسبوك وده اللي كان مفاجاه بالرغم من اني كنت حابه المدونه الاصليه وخايفه عليها خوفي على طفل لسه بيحبي لا يقع ويتوه من نسخه الفيسبوك
صفحه فيسبوك لقيت فانز كتير والبوستات انتشرت قوي وبقت شويه مشهوره وتفاعلكم معاها كان مفاجاه ليه
النهارده بقالي سنه بعد اعاده فتح البلوج , بقولك يا مدونتي العزيزه انا بحبك قوي وطلعتي كل الطاقه السلبيه جوايه , شوفتي كل الغضب من الناس والبلد والمجتمع, بكتيني كتير وانا بكتب بعض بوستاتك, فرحتيني بناس فوجئت بمتابعتهم ليكي , وردود فعل الناس حواليه

 لكل واي حاجه كرهاها او خايفه منها ما بقيتش لا كرهاها ولا خايفه منها لاني ببساطه اتشجعت وكتبت عنها وبصوت عالي وعلى الملا من غير خوف ولا غضب
مدونتي العزيزه ليكي ناس بتقراكي من بلاد يمكن ما اعرفش فيها حد امريكا وكندا والمانيا وسويسرا والصين , وروسيا واندونسيا , اليابان, المغرب , الجزائر ,اوكرانيا, السعوديه الكويت, الامارات, البحرين ,عمان الاردن , انجلترا, تركيا ,سوريا , تونس, السودان حتى اسرائيل !!!

المدونه الاصليه زارها 9500 زاير في سنه وصفحه الفيسبوك14000 في خمس شهور , وعندنا 404 فانز رسميين على فيسبوك
البوست ده هو البوست 144 يعني انا رسمي ام 144 بوست !!! , لا اخفيكم سرا ان في بوستات كتير ما اتنشرتش سواء لخصوصيتها الشديده او لان الدور لسه ما جاش عليها اصل الغزاله لما بتروق ممكن اكتب 4 او 5 بوستات مره واحده وممكن اقعد بالاسابيع مفيش اي مزج او افكار .
شكرا لكل اللي قرالي وشجعني ورد عليه وتفاعل معايا , شكرا ليكم كلكم ويا رب ما اقفلها زي ما عملت قبل كده
ايه رايكم فيها وبصراحه ووالله ما حازعل من اي نقد او عتاب او توجيه
ايه اكتر بوستات عجبتكم فيها وبرضه ايه اللي ما عجبكوش فيه؟
كل سنه واحنا طيبين


https://www.facebook.com/562451227215431/photos/a.562476710546216.1073741828.562451227215431/651918198268733/?type=1&theater

السبت، 24 يناير 2015

السي في


لسي في او السيره الذاتيه هيه ملف من 3 او 4 ورقات على الاكتر تحكي فيه سيرتك المهنيه من يوم ما اتخرجت لحد يوم ما تقدمها لاي حد او مكان على حسب الهدف لمطلوب منها

تقعد تاخد في كورسات عشان " السي في"

تنقل من مكان لمكان عشان " السي في"

تسافر وتتغرب عشان " السي  في"

وتكتب فيها اول باول لا تنسي تنتوفه صغيره من هنا ولا هناك

وتنسى " السي في " الاهم : كتاب حياتك اللي حتقدمه لربنا يوم القيامه

تنسى انك 24 \ 7 بتكتب فيه كل واي حاجه بتعملها وتفكر فيها من يوم ما اتكلفت ليوم ما تموت ومش بس كده ده انت مش بتكتب ده انت بيتكتب لك فيه من كاتبين مالكش عليهم اي تصرف ولا تقدر تفبرك ولا تغير في الاحداث

لفت نظري قوي الموضوع ده من كام يوم والفكره الحت اكتر مع موت ملك السعوديه والمقدمات اللي تبارت فيه القنوات لتلخيص " السي في" بتاعه الملك الجديد وولي العهد وولي ولي العهد مع ان كل الناس دي يمكن ما لفتش نظرها ان الملك الراحل شخصيا 
اتشال ملفوف في كفن واتساب في حفره في الارض وخلاص  


الجمعة، 16 يناير 2015

طوبى للغرباء


مره باحكي مع واحده صاحبتي فقالت لي : تعرفي انا بادعي على اهل فلانه عشان قله التربيه وسوء الاخلاق , ازاي اهل يقدموا للمجتمع نموذج بهذا السوء وهيه بعد كده تطلع ولادها اسوا ويفضل السلسال مكمل من سئ لاسوأ

بس تعرفوا ايه اللي اسوأ من اهل فلانه دي؟ الاهل اللي بيربوا ولادهم زياده عن اللزوم

ربوا ولادكم انهم يبقى عندهم اخلاق بس يفهموا ان حيقابلوا قله الاخلاق برضه

ربوا ولادكم عالصدق والامانه بس برضه ربوهم عالحرص من الكدب والخيانه والقدره عالتميز

ربوا ولادكم ان الكدب حرام بس ده مش حيمنع وجود كدابين كتير قوي

ربوا ولادكم عالوفاء والاحترام بس برضه يفهموا ان الخيانه موجوده

ربوا ولادكم عالاتقان بس تقبل ان هيبقى في اللي بيهمكوا ويمكن يوصلوا قبلهم وهمه فاضيين من جوه

ربوا ولادكم ان ممكن جدا الناس تضحك في وشك وفي ضهرك يخبطوك باتلم سكينه

ربوا ولادكم عالثقه في الناس ببس برضه الحرص منهم

ربوا ولادكم انهم يخلقوا لنفسهم قوقعه او صدفه من الامان الداخلي ورمي طوبه العالم من حواليهم عشان تحميهم من صدمه اكتشاف كل ده

ربوا ولادكم عالغربه مع الناس والصحبه مع النفس

ربوا ولادكم انه طوبى للغرباء

الخميس، 15 يناير 2015

يوميات غلبان بردان


يوم الانسان الطبيعي يبدا من الصبح وينتهي بالليل انما هو يومه بيبدا مع غروب الشمس , مع غروب المصدر الرباني للدفا ويبدا يدور حيعمل ايه حيتاوي في جنينه ولا تحت كوبري ولا جوه عربيه مهجوره

ويا اريت على كده حيتغطى بايه بكرتونه مرميه ولا خيشه مرميه ده في الايام العاديه

اما بقى ايام السقعه الشديده يروح يدور على شويه خشب يولعهم يتدفى بيهم وفي الوقت اللي سيادتك قدام التلفزيون تحت البطانيه وعمال تشرب سحلب وتاكل بليله هو يا دوب بيحاول يتحرك بشويه الهلاهيل اللي لابسهم يدور على لقمه مرميه جنب الحيط ولا في صفيحه زباله , عمره ما سمع عن مج الشربه الدافيه ولا ابو فروه

في ليالي المطر يبدا يدور على سور ولا قاعده كوبري يتشعبط فيهم تحميه من بلوله الرصيف اللي بينام عليه كل ليله

مش حاحكيلك عن جيرانه من الفيران والحشرات ولا الكلاب والقطط الضاله اللي بيشاركوه في لقمه مرميه وسط الزباله خ

ما عندوش مشكلتك في سقعه دخول الحمام بالليل لانه بقاله كام يوم لا كل ولا شرب ولانه ببساطه صاحي طول الليل لا يموت مالبرد

ولا عنده مشكلتك في سقعه الميه في غسيل الوش او الشاور لانه بقاله شهور ما استحماش ولا غسل وشه

مشكله الشباك اللي جنبك و مفوت صاروخ هوا في قفاك مش مأرقاه لانه ببساطه في الطل ليل ونهار

ولا المنبه اللي بيزعجك وقت الصحيان بيزعجه لان طلوع النهار بالنسبه له نعمه وشيء انتظره طول الليل عشان الدفى الرباني يوصل حتى لو الناس سقعانه ودرجه الحراره 5 او 6 فهي ارحم من الصفر اللي قضى الليل فيه

ارحموهم ودفوهم بجاكيت قديم ولا بطانيه بعشرين جنيه ولا حتى كوز بطاطا سخنه ولا كوبايه بليله

معلش استغنوا عن مج نسكافيه من كوستا ولا خروجه ولا تذكره سينما ودفوه

وبلاش تبصولهم بقرف ولا شفقه وانتم بتعملوا ده ااه صحيح شكلهم مترب ووشهم ملحوس بس همه ما اختروش ده ونصهم مرضى نفسيين فمتبقوش انتم والناس عليهم 

 

السبت، 10 يناير 2015

يوميات انسان سقعان



درسونا زمان ان مناخ مصر يقع ضمن مناخ البحر المتوسط : حار جاف صيفا معتدل مطير شتاء , كدابين قووي يا شيخ

مع غزو الشتاء الاوربي لبلادنا الحبيبه الشتا شخصيا اتلخبط يعني بره الدنيا بتبقى تحت الصفر والناس عادي يعني البيوت متجهزه والمكاتب والمحلات لمواجهه الشتا ده , المطره شغاله وسبحان الله الشوارع ناشفه

انما عندنا الشتا بالرغم من جماله في المطلق الا انه في الكام يوم السقعه المطره البلد كلها تصاب باختلال اتزان

يعني في المطره تتحول لبرك ومستنقعات ومطالع الكباري تتحول لبحيرات ويبتدي الناس ترقص باليه في الشوارع

اما عن موجات البرد فعاده البيوت بتكون اسقع من الشوارع ازاي ماعرفش يمكن من الشبابيك المنفسه والحيطان اللي بتبك ساقعه وعدم تهيئه البيوت بصفه عامه للجو ده همه السبب

كلوز ان كمان على الانسان السقعان فده يا كبدي يواجه الامرين فوهو نايم عليه عشر بطاطين ولحافين كاتمين على قلبه مش مخلينه عارف يتقلب , ومن قبل النوم بكام ساعه مفيش ميه ولا سوايل عشان ما يضطرش يروح الحمام بالليل

رنه المبه بالنسبه له امر من نفير الحرب وشر لا بد منه , وبعد مداولات مع نفسه يضطر يقوم وخلاص ماهو قايم قايم , دخول الحمام شيء من العذاب اصل اختراع الشطاف اللي فيه خلاط سخن وبارد ده المصريين ما يسمعوش عنه , قاعده التوالي شخصيا سقعانه

غسيل الوش والسنان مقدور عليهم ماهو في سخان , المشكله بقه في ما بعد الغسيل ده من بروده في الجسم لا تحتمل , فكره الدش الصباحي او حتى الاسبوعي ملغيه تماما لحد البرد ده ما يروح بالسلامه ولو حصل لازم يكون يوم اجازه عشان يدفي الحمام والاوضه والجيران ويتدفس بعده تحت البطانيه باقي اليوم

يجي نازل الشغل الكوفيه الصوف والبالطو والشراب الصوف والبنطلون الداخلي (الثرمال او في روايه اخرى الكلسون !!!) اللي في الغالب رفيق الكفاح في البيت وبره البيت

في الشغل بقه يكون محظوظ لو الشبابيك معزوله او مقفوله كويس والا وقعته بيضا وفيها كتكوت كمان

نرجع بقه للبيت بعد الشغل تبدا طقوس حله العدس المتينه (اصيله يا ام العيال) قمه الرومانسيه من الست المصريه !!!

ثم تجد البيجامه (وتحتها الثرمال قصدي الكلسون) وفوقها الروب الصوف والشراب واللكلوك وفي بعض الاحيان الزعبوط وعاده البنات بتتدلع على باهباهاتها وتعلق الروب الصوف الجميل ده بتاع زمان

ثم يبدا ترحيل الصلوات لاخر الوقت عشان ما نتوضاش كتير ثم الاندفاس قدام التلفزيون تحت البطانيه لحد النوم ولو الظروف اضطرتك لمرواح المطبخ خد البطانيه معاك عادي جدا

يخترق ده اكواب السحلب والبليله والبطاطا المشويه واي ضيوف غير مرحب بيهم الا اذا جم قعدوا معانا تحت البطانيه غير كده لو الباب رن كله يعمل نفسه من بنها ومحدش يقوم يفتح

كل ده كوم ولو جاله برد كوم تاني تبدا سلسله العطسات والكحه وعلب المناديل تبقى افري وير ثم سلاطين الشوربه السخنه والاجازات المرضي تشتغل  

الله يرحمه عمر سليمان كان زمانه دلوقتي بيقول الشعب المصري غير مهيء للشتاء

بكره الجزء التاني تصبحوا على خير

الجمعة، 9 يناير 2015

الى كل الإخوه التوبلس !!!


ايه الاصدقاء والزملاء من الجنس الخشن ايه موضوع صوركم التوبلس اللي ماليه الفيسبوك

مش دي المشكله خااالص  كل واحد حر يعمل اللي هو عايزه ويستعرض العضلات وفورمه الساحل والبطن المشفوط او حتى الكرش هو حر فعلا , صورته وبراحته

المشكله في ان كل السمارتفونات عامله synchronize  لصور حضراتكم من على فيسبوك على الموبيلات يعني ببساطه لما سيادتك تتصل بيه او انا اتصل بسعادتك التيلفون المحترم حيروح يجيب صوره سيادتك التوبلس ويطلعها على الشاشه

فتخيل سيادتك لوكنت سايبه الموبيل عالترابيزه و حد  زي ابويا والا جدتي  شافها وما يعرفش حكايه الsyncronize  دي شكلي انا حيبقى ايه ودماغه حتودي وتجيب في ايه ؟ مش بس كده ده لو بالصدفه حد تاني اتصل (ت) بيه حيقول عليه ايه كل دي صور عندي لناس كده يعني ؟

فلو تسمح حضرتك وحضرته ارحموا حضرتي وحضرتها وخلوا الصور العظيمه دي لنفسكم وريحونا الهي يعمر بيتكم !!!! ده حتى الجو اليومين دول سقعه ومش طالبه الموضوع ده بتاتا !!

الثلاثاء، 6 يناير 2015

عن ااهات الست


ثومه دي عجيبه جدا

في وجهه نظري المتواضعه هي اكبر واقدر ممثله صوتيه في التاريخ

يعني بسهوله وسلاسه كده تنقلك الحاله اللي الاغنيه بتتكلم عنها , وتقنعك بيها بمنتهى البساطه والعذوبه ومش بس كده تعيشك كمان فيها

تضحكك وتبكيك وتخليك تتنهد وتفكر وتفرح او تبكي على حسب الحاله اللي هيه والاغنيه فيها حتى لو عمرك ما جربت الحاله اللي الاغنيه بتحكي عنها !!!

اهاتها في اغدا القاك تحسسك بحاله الترقب والخوف والانتظار اللي هيه فيها

ولا " كاااان زمان "  في لسه فاكر تحسسك كده انها شمتانه في الحبيب السابق

ولا " يااااا رب تفضل حلاوه سلام اول لقا في ايدينا " في الف ليله وليله تحس فعلا بالدعوه اللي من القلب

ولا الحيره في "حيرت قلبي معاك " ولا انت الحب دي بقه اللي فعلا حكايه ملهاش حل فعلا من احلى اغانيها بالذات " واححححشني وانت قصاااااد عيني وشاغلني وانت بعيد " تحس كده بكل حرف اتقال كام مره بكام مده ايه الابداع ده  

اما الاطلال تشوف الصور بتتحرك قدامك ولا " اعطني حريتي أطلق يدي" يااااه يا ست ايه الجمال ده الله عليكي

اما بقه عن فات المعاد فحدث ولا حرج " ستاير النسيان نزلت بقالها زمان "

ولا " وااااهي غلطه ومش حتعوود ولا ون الشوووق موجود " للصبر حدود

ام كلثوم هيه الحاجه الوحيده اللي تخليني اعمل شغل بمزاج عالي , وهيه اللي كوبايه الشاي بالنعناع في العصاري في الصيف في البلكونه ما تحلاش غير بيها , وهيه اللي بتهون عليك زحمه طريق طويل ومش بس كده لما ربنا يفرجها والسكه تمشي تلاقي نفسك بتتلكع وتقلل السرعه عشان الاغنيه تخلص يا دوب وانت واصل البيت وما يفوتكش منها ولا كلمه وتفضل تدندنها بقيه يومك ولو بالليل تصحى مروق ومزاجك فل الفل وتفضل تدندنها لحد ما تفاصيل اليوم تفصلك وترجعك تاني لارض النفاق  

يااااااه يا ستتتت الله يرحمك

 

الاثنين، 5 يناير 2015

جرب العروسه


تقول الاسطوره ان الجيرب  بكسر الجيبم "بوكيه الورد اللي العروسه بتبقى شايلاه" لما بترميه بعد تقطيع التورته " اللي الناس بتقعد تعدها كام دور دي" وان اللي بتلقف الجرب هيه اللي ببتجوز على طول بعد العروسه دوغري , تقليعه خواجاتي ل" اقرصيها في ركبتها تحصليها في جمعتها " !!!

وتلاقي البنات تقف صف وراها ويبداوا يحلقوا عليه واللي تضرب اللي قدامها واللي تخبط اللي وراها واللي تربط مع العروسه واللي يلقفه راجل واللي يلقفه طفل واللي الورد يدخل في عنيها !!! يعني بيكون مصحوب بحوادث واصابات على ايه معرفش

اول مره لقفت الجيرب " اصلهم كتيير قوي" كان في فرح نيفين صاحبتي ورجعت بيه البيت وانا عندي احساس الفاتحين المنتصرين !!! على ايه ما تعرفوش وقعدت اغير له الميه واعتني بيه يجي اسبوع وبعدين نشفته قال ايه حاحتفظ بيه للابد !!!

المره اللي بعدها كان في فرح مروه صاحبتي الانتيم وفي المره دي رجلي اتلوت بعد الصوره الشهيره مع العروسه وكنت حاقع وانا نازله من عالسلم

المره اللي بعدها كان بتاع رشا صاحبتي ودي جالي بالصدفه البحته وكنت بصراحه مزه في الفرح ده وبعدها الفرح كله كان بيتفرج عالبنت اللي لقفت الجرب لدرجه اني انكسفت وروحت

المره اللي بعدها كان بتاع ريهام ودي انا برضه ما قصدتش اخده وكان حمى العروسه من مديرين الشغل القديم فالهيئه كلها اتفرجت عليه وانا واخداها واتصيت في الشغل!!!

بعد كده بقيت باترفع عن الوقفه واللمه الغريبه دي واقعد اضضضضضحك قوي عالبنات وحركاتهم في لقف الجرب

اصلي اقتنعت الن العريس هو اللي حيجيب الجيرب مش الجيرب هو اللي حيجيب العريس

انتوا بقه ايه حكايتكم مع جرب العروسه؟

السبت، 3 يناير 2015

عروسه المولد !!!


لفت نظري جدا كم اعلانات الmake artist  اللي شغالين في الافراح وعاملين صفحات على الفيسبوك والقاسم المشترك الاكبر بينهم هو العروسه الحلاوه !!! اه والله العروسه الحلاوه يعني تلاقي صوره العروسه من دول حاطه كميه مكياج ليها وللمعازيم وفوقهم جليترز وبعدين التاج والطرحه أما الفستان بقه كميه تطريز تقيييييييييييييله تخلي العروسه شخصيا مش قادره تتحرك وتصاب بشلل مؤقت وقت لبس الفستان حاجه كده تفكرك بالتراث المصري اللي لامناسبه عمري ما شفته بجد الا في الافلام التسجيليه للشيء المسمى بعروسه المولد اللي كان بيتم تلطيشها بكم صبغات رهيبه عشان البنات تاكلها في مولد النبي

المصيبه مش في كميه المكياج والكحل والسموكي ايز ولا فإن ممكن فعلا يوحش شكلها ويخليها فعلا وبجد زي العروسه الحلاوه , المصيبه ان سيادتها لما تديها رقص بذمه وضمير حتعرق والمكياج حيسيح ويتفنن اصحابها في تنشيف عرقها فيبقى وشها منقر مكان العرق والكلينكس اللي اشتغل بحسن ااو سوء نيه وكل واحد وضميره!!!

ده حتى اجمل اشكال اي بنت وشها بعد ما تغسل المكياج بتاعها لما البواقي البسيييطه دي تحط تاتش شيك وملائكي لوشها

ما انتوا بتقلدوا الخواجات في كل حاجه اشمعنا العروسه الحلاوه مش قادرين تستغنوا عنها ؟

كن بسيطا تكن جميلا

 

الخميس، 1 يناير 2015

هابي نيو يير


الكام يوم اللي فاتوا كتر قوي الكلام عن ان 2014 " اسوا سنه" عند ناس, " احلى سنه" عند ناس تانيين ويتفنن كل من الطرفين في ايجاد الدلائل على كلامه في محاوله لاثبات خطأ الطرف التاني

وان ازاي الامل بقه في 2015 وان يا رب يجعلها بيضا عالحريم سودا عاللئيم منيله بستين نيله عالي ينكد عالحريم !!!

هو احنا ليه بنتلكك في اننا نستنى يوم الجمعه عشان نرتاح, ونستنى أول الشهر عشان نخرج وننبسط, ونستنى اول السنه عشان قرارات مهمه تتاخد ؟

ليه من زمان فكره نحط جدول للمذاكره وبعد التخطيط العظيم نخش ننام اصلنا حنبدأ من بكره

أو حنبدا الدايت لما القمر يبقى بدر ؟ قال ايه بيساعد في الخسسان ونديها اكل يزودنا عشره كيله على بال ما الفول موون يجي !!!

ليه دايما عايشين قرارات واماني مؤجله للصيف, للسنه الجديده, لاول الشهر, للويكاند؟

لو عندك قرار مهم ابدا من اللحظه دي مش من الساعه الجايه

ربنا كل يوم بيدينا فرصه جديديه ويوم جديد واحنا بنستنى السنه لما تبقى جديده ؟

جر خط ونقطه ومن اول السطر وابدا من دلوقتي وبلاش لكاعه منك ليها

كل سنه وانتم طيبين