السبت، 30 ديسمبر 2017

قرإت لكم : انقطاعات الموت


قرات لكم  انقطاعات الموت ( خوزيه ساراماجو) 
من سلسله الجوائز للهيئه العامه للكتاب 
ترشيح العزيزه بسمه اسماعيل 
الكتاب تخيلي لفكره ان الموت قررر ان لا يؤدي وظيفته مع بدايه العام الجديد 
مجموعه قصص قصيه داخل القصه الرئيسيه : 
مشكله الدوله التي تراكم فيها الاحياء الاموات والمستشفيات وبيوت العجزه وشركات التامين والانتاجيه التي تاثرت والمجتمع ذو الهرم المقلوب للاعمار ، في سرد مشاكل الدوله التي اسقط في يدها ليقتنع القاريء كيف ان الموت مهم وبشده لاستقامه الحياه 


القصه الثانيه : قصه الاهل الذين اسقط في يدهم وتالموا لالم الاحياء الاموات وكيف ان الموت في باقي الدول مستمر فتفتق ذهنهم عن ارسال اولئك الاحباب لهذه الدول ليموتوا في الحال ويستريح الجميع ، ثم الدوله التي قررت غض الطرف عن العبث بالحدود والمافيا التي قررت الاستفاده من الوضع!!! 

القصه الثالثه قصه قرار الموت بالعوده لممارسه وظيفته ولكن بطريقه مختلفه وهي ارسال رساله بنفسجيه للدوله لاعلامهم بعودته!!!  وكيف تعاملت الدوله ثم الافراد مع الخبر لكن الان يعطي الموت انذار استباقي للمتوفي قبل موته باسبوع لترتيب الاحوال ووداع الاصدقاء!!!! 
القصه الاخيره : قصه العازف الذي ترتد دائما مراسلاته لموت التي لم تعرف كيف التصرف معه وراحت تراقبه لتعرف السبب ثم قررت الظهور له بصوره بشريه لتقع في غرامه وتعود مجددا للاحجام عن وظيقتها بعد تعلقها به!!!! 
القصه غريبه وفلسفيه لاقصى  درجه مع هوامش لافكار الكاتب وسط القصه وكانه ينقل لنا زخم افكاره واراؤه وسط عرضه للموضوع
الاغرب هو مرحله حب القارئ للموت ثم تعاطفه معها في قصه حبها الهزائم مع ذلك العازف البائس المستعصية على  الموت!!! 
الاغرب هو اختفاؤها من جهازي بعد نهايه قرائتها!!!!  وكأنها هي شخصيا كأن  ام تكن!!!! 



الأحد، 17 ديسمبر 2017

حشيشه الليمون

قالي كده في مره بابا يعرف يجيب لي حشيشه اللمون عن طريق معارفه  وشغله؟ أصله كان غاوي زرع ونباتات نادره
قلتله جرب !! المهم ايه بابا فعلا عرف يجيبه وجالنا البيت عشان ياخده بالرغم من اني قلتله اجيبه لك لحد عندك ، قالي جمله عمري ما نسيتها ، صاحب الحاجه يسعى إليها 
في ذلك اليوم وبدون اي سبب بكيت للمره الاولى والاخيره على عدم تعييني في الجامعه نظرا لاني كنت باعتبره ابويا الروحي 
وفي ذلك اليوم برضو قرر من غير مناسبه ومن غير ما اطلب ( انا اصلا مكنتش اعرف انه يقدر يساعدني ) أنه يتوسط لي للمره الاولى والاخيره برضو عشان اشتغل في شغلي الاولاني واللي ايامها كان صعب جدا دخوله 
وتلف الايام ويفضل اعز انسان علي لأنه ساعدني من غير سبب ومن غير مقابل ومن غير ما اطلب ويعلمني اني اقف جنب اي انسان يحتاجني لو اقدر اساعده وبعد ما اساعده اسييه ( من باب عدم احراجه ) وهو اللي حيفضل يسأل ويتصل من باب الامتنان من ناحيته زي ما حصلي برضو بالظبط
ويتعب تعب كبير ومن غير سبب اتصل بيه قبل الوفاه بيوم وما اعرفش اوصله
ويمشي وما احضرش جنازته لاني نسيت ارد عالتلفون لما أهله اتصلوا بكل اللي كلمه اخر كام يوم 
وافضل مش مسامحه نفسي لحد دلوقتي 
افتكرت كل ده لما شفت حشيشه اللمون النهارده عند الخضري ، شكيت هيه ولا لاه وسألته قالي حشيشه اللمون الصدفه الأغرب أنه جه ياخدها من عندنا زي النهارده بالظبط من سنين كتييير لان بكره ذكرى اول يوم اشتغلت فيه في شغلي الاولاني ، ضحكت وسرحت وصحيت عالست اللي جنبي بتسال بتتطبخ ازاي !!!


الثلاثاء، 12 ديسمبر 2017

Heaven as it should be

There will be rivers of minted tea , trees with white chocolate, music playing everywhere , butterflies surrounding you

There will be fulfilled dreams, painless love , happy kids and pink flowers everywhere

There will be grandpa with his loving stories and people who left for better places

There will be justice , equity and peace

Heaven as it should be

Now describe ur own heaven




السبت، 9 ديسمبر 2017

البسكلته


قاعده باقرا في امان الله في النادي لقيت بنوته قمر بتجري حواليا بالبسكلته بتاعتها وسايبه شعرها وراها اللي طاير ومهفهف وشكلها يجنن ما شاء الله 
البنت كانت منفصله عن الزمان والمكان ومركزه بس في البسكلته واللف وأنها ما تقعش
افتكرت زمان سطوح بيتنا في السعوديه وطلوعي كل يوم اجري بيها شويه وبالباتيناج 
واني عشان ما اقعش بابا كان مركب لي سندات لحد ما اتعود عليها 
وان وجود السندات بقى أساسي ونسيت اشيلها زمن طويل 
ولما اتعلمت العب عليها من غير سندات كانت صغرت عليه !!! 
في اول فرصه لركوب عجله واللي كانت بعد ما نزلنا مصر في البلد عند عم والدتي وخدت العجله عشان اجري وسط الغيطان واللي كانت بقه من غير سندات وكبيره عليه فوقعت من عليها والفلاحين اتريقوا عليه ، يومها رجعت مشي والبسكلته جنبي وما ركبتهاش تاني 
لما سافرت سويسرا واللي البسكلته فيها وسيله نقل بجد مش للتسليه واللي الشوارع فيها حاره مخصوص ليها ، وليها خوذه وبلاطي للمطر سالت ااجرها منين بس خفت اقع او اتكسر وانا لوحدي فرجعت في كلامي 
النهارده افتكرت كل ده وبجد عايزه ااجر عجله واجري بيها بس تكون من غير سندات !!! 

   تفتكروا اصلا ده له دعوه بالحلم المتكرر بتاع ركوب 
البسكلته واللي بس لسه فاكره بعد ما كتبت البوست ؟! يمكن


الجمعة، 8 ديسمبر 2017

لما نكبر سوا


تشاء الظروف الغير مقصوده اني اضطر ازور مديره سابقه لي في بيتها 
السيده من ذوات الشخصيات القويه والمؤثره والمنجزه والتي لا ترضى ابدا بانصاف الحلول 
في مقاييس زماننا كان ممكن جدا تظل بلا زوج للابد لان تلك الشخصيه من النوع المخيف لاقزام هذا الزمان

طول عمري اتسائل عن شكل ذلك الزوج المتعامل مع تلك الشخصيه والتي ربت اجيال في مجالها وربت أبناؤها المتعلمين بجوده وذووا المناصب الكبرى بالرغم من ساعات عملها الطويله !!!
أثناء الزياره قابلت الزوج ، شخص مرح بشده ، مثقف، متفهم، مستمع جيد 
لم يجد من ثقتها وشخصيتها اي تهديد بالعكس تماما 
ورأيت سيده غير التي اعتدت على رؤيتها هي هنا زوجه وام تعلي قدر زوجها وتمدحه أمام الضيوف وتذكر انها لولا اهتمامه ورعايته ومساندته لم تكن لتصل لاي شيء مما وصلت له
الزوجين لا يقلوا عن السبعينات من العمر لكن البيت دافيء ومليء بالصور والتذكارات من بلاد مختلفه 
صور الاحفاد والابناء والأحاديث الدافئه يشعرك بحب ودفء وعشره طويله وايام سعيده واطفال تم مشاركه تفاصيلهم بالتساوي بين الزوجين 
وتحققت لي امنيه رؤيه زوج سيده من نوع المراه الحديديه وعرفت ان ذلك النوع لم ينقرض بعد 
ادام الله لكما السعاده والهناء 


الجمعة، 24 نوفمبر 2017

ثلاثيه غرناطه


لست الكل رضوى عاشور 
تاريخ سقوط الاندلس ومخنه العرب فيها من خلال اسره اندلسيه واجيالها المتعاقبة 
قصه وصفيه شديده التعقيد والمتعه رصدت فيها حياتهم اليوميه وعادات العرب وأحوالهم قبل السقوط 
ثم سقوط الاندلس وتدرج طمس الهويه العربيه الاسلاميه فيها من تنصير ، منع تعلم العربيه ، منع الزي العربي ، المحاكمات العشوائيه ، المقاومه الشعبيه 
تعاقب الأجيال ، سليمه ، مريمه ، نعيم ، ثم اخر افراد الاسره الطفل علي 
ثم هجرته ثم تنقله بين البلاد ولقاؤه بعمر الشاطبي وتساؤلاته اين العرب ، اين العرب 
ونهايه رفضه الترحيل وعودته للاندلس وليحدث ما يحدث فلا وحشه في قبر مريمه
قصه طويله لكن جميله ارقت عيني ليالي وايام من تشويقها والمها وتفاصيلها 
بدايه رحلتي مع رضوى عاشور 

الأربعاء، 22 نوفمبر 2017

ولاد عمو فكري


احلى جيران طول سنين الغربه 
كان الشقتين على النظام السعودي بينهم طرقه داخليه وباب خارجي 
كنت انا وصفا نلتقي كل يوم في الطرقه ونلعب ونلعب ونلعب ونلعب يكون محمد وداليا خلصوا مذاكره عشان كانوا اكبر ونديها بقه اتاري وشطرنج 
في الصيف ننتقل لشقتهم ونشوف سوا افلام ونلعب مونوبولي وكوتشينه وفي الجمعات نخرج سوا ونروح بقه جناين أو مولات أو الحي الدبلوماسي 
وأوقات نخرج بعربيه واحده ونتشحن في الشنطه أو على كبوت العربيه 
وفي هذه الاوقات يبدأ العك الغذاىي : مره خلصنا كرتونه بفك ( زي الهريدي كده في مصر) ومره كرتونه جبنه كرافت ومره عشر علبه تونه ومره صفيحه زيتون كلاماته ، كتير داليا ومحمد يقوموا بقه يعملوا كفته رز !!! ونقعد نقرقشها زي التسالي
ايام جمييييله ولا تنسى 
ننقل من شقتنا ونفضل نتقابل لأننا ما بعدناش قوي يعني احنا روحنا اخر الشارع 
ينزلوا مصر للجامعه عشان داليا وبعدهم ننزل احنا 
الدنيا تلهي الكل وداليا تتجوز ومحمد يروح امريكا ويغيروا شقه بنها وفجاه تنقطع اخبارهم 
من سنتين كده هفوا عليه دخلت ادور على فيسبوك ، لقيت صفا شكيت هيه ولا لله وكمان لقيتها قافله الاد ، دورت عندها لقيت داليا ومحمد شكلهم اتغير مكنتش متاكده اذا كانوا همه ولا لاه المهم عملت الاد مفيش لقيت محمد بيكلمني من أمريكا وداليا بعتت تطلب الموبيل وقضينا تلات اربع ساعات بنتكلم واحنا مش مصدقين اننا اتجمعنا تاني حتى ماما وهبه بتكلم مراه محمد قالت لها النهارده انا لقيت ابني اللي كان غايب
النهارده فيسبوك فكرني بهذه الذكرى ، الالطف أن محمد جه من امريكا وجه هو وداليا وصفا وولادهم وقضينا يوم من احلى ما يمكن وضحكنا ضحك وافتكرنا كل المصايب القديمه وكأننا سايبين بعض انبارح 
وماما طبعا تقف طول اليوم تجهز قاىمه بالاكل والحلويات وطبعا كفته رز !!!
كم الاريحيه والبساطة ودخولهم معانا المطبخ والضحك والسعاده كان من اجمل ما يكون وكأن ما فاتش اكتر من ٢٠ سنه على اخر مره اتقابلنا فيها 
ربنا يرحم عمو فكري وطنط مشيره ويديم ولادهم وتجميعتنا مع بعض 
كان اخواتي كانوا غايبين ولقيتهم وحشتوني يا ولاد عمو فكري 
هو احنا ليه نسينا نتصور ؟ ولا نقلب في الالبومات القديمه ؟ 
المره الجايه 


الخريف موسم الفرص الضائعه

في الخريف تتجدد الحياه 
مين قال عالخريف موسم كئيب أو متعب للجسم والروح 
اه ورق الشجر بيقع بس عشان يطلع غيره يصحصح الشجره ويكبرها 
اه هواه ساقع بس للي مش مهتم بصحته اكيد عضمه فعلا حيوجعه ويستاهل 
الخريف هو ذلك الموسم المثالي ، هو بالنسبالي موسم الفرص الاخيره 
بص كده لنفسك حتلاقيك بتلحق تلبس لبسك اللي نسيته أو طنشته طول الصيف قبل الموسم ما يخلص سواء بقه ما لبستوش عن عدم اقتناع بيه أو لأنه شيك زياده عن اللزوم ومش بتاع هلك كل يوم 

في الخريف بتنتبه لتهريجك في اكلك طول الصيف وترجع تعمل كام اسبوع دايت قبل ما الشتا وطفاسته تيجي وتلاقي نفسك ضربت ومبقاش فيك امل 

في الشغل  بنقفل بقه السنه بخيرها وشرها وممكن تعيد حسابات السنه وتعمل ال appraisal وتشوف رايح فين وجاي منين 

الخريف موسم زراعه مش حصاد تستنى الشتا يجي يروي زرعك اللي حيكبر ويرعرع بعد كام شهر فبالنسبالي موسم الامل 

الخريف هو ذلك الجو المثالي مشمس نهارا ذو لسعه محببه ليلا 

هو موسم اللبس الشيك من غير بهدله وكلفته طوبه وامشير 

هو موسم قلب دولابك بمفاجاءات من نوع فلوس منسيه في بالطو أو لبس اشتريته ونسيته او حتى وحشك من قله قيمه الصيف والحر 

الخريف هو موسم ظهور بشاير من نوع جديد ، البرتقال الاخضر ولسعه مرارته وانت بتاكله وزيته اللي يملأ ايدك وذوبان فص البرتقال في بقك وانت لاول مره تأكله في الموسم الجديد 

هو موسم ال annual self appraisal اللي بتعمله لنفسك ورضاك عنها أو حتى تانيبك ليها وحمد ربنا على نعمه سواء كانت خير أو شر 

الخريف هو فعلا موسم الفرص الضائعه والامل في أيام جديده او حتى طوي سنه عدت بخيرها وشرها

الخريف هو بدايه الحياه !!!! لان في الخريف تتجدد الحياه 


الاثنين، 6 نوفمبر 2017

بساط الريح

الاغنيه العظيمه بساط الريح الرائع فريد الاطرش ايام ما اتعملت في فيلمها يمكن كانت بهدف توزيع أو فعلا تغني بالدول العربيه المختلفه 

يتخيل عمنا فريد بساط ريح ياخده لكل الدول العربيه ويتغنى بكل واي حاجه مميزه لكل بلد 

الغريب انها وبجد أثارت حزني وشجوني وانا باتفرج عليها ، 

قالك بساط الريح جميل ومريح وكله امان ولا البولمان
- مبقاش في بولمان ، في شركات بتعمل حوادث 
- سوريا ولبنان قامات وقدود ، ربنا يحمي لبنان ويرد سوريا
- نروح بغداد بلاد امجاد ، كان في وخلص دلوقتي داعش وحروب اهليه
- مراكش فين وتونس فين , تونس اول الربيع العربي ، ربنا يحافظ عالمغرب 
- راح بقه مصر : اللي يفوت أرضنا يروح ويرجع لنا ، ما دريتش يا فريد مش السياحه انضربت 

تصدقوا الاغنيه نكدت عليه !!!!

شوفوا الكلام والاغنيه ( ١٩٤٩ )

بساط الريح جميل ومريح

وكلو امان ولا البولمان

بساط الريح بساط الريح

يا طاير فوق وكلّك ذوق

أنا مشتاق وبراني الشوق

ودواي فى سوريا وفي لبنان

نسيم لبنان شفا الأرواح

عليل القلب عليه يرتاح

ويا مشتاق لبرِّ الشام

تروح سكران بلا أقداح بلا أقداح

سوريا ولبنان قامات وقدود

عليها بشوف عيون وخدود

تزوّد نار القلب ببارود

أنا أعشق سوريا ولبنان.. سوريا ولبنان

نروح يا بساط على بغداد ... على بغداد على بغداد

بلاد خيرات بلاد أمجاد ... بلاد خيرات بلاد أمجاد

نحن هنا بالسيف نحمي ارضنا

وفي نهار الحيف نحمي عرضنا

اما الكرم للضيف مخلوق فرضنا

آه يا زلم آه يا زلم

يبه يا يابه يا يابه يا باي

يا دجلة أنا عطشان ما أقدر أرتوي

من حسنك الفتّان هذا الكسروي

فى كل رمشة عين خنجر ملتوي

لو صاب مني القلب يعدمني عدم

آه يا زلم أه يا زلم

بساط الريح يا ابو الجناحين

مراكش فين وتونس فين

بلاد الحوت، والغلة والزيتون

فيها الشفايف قوت، وللشراب عيون

ياللي عليها تفوت، إشبعْ طعام وشراب

ولا تزيد يا خي

تونس أيا خضرة يا حارقة الأكباد

غزلانك البيضة تصعب على الصياد

غزلان فى المرسى ولا فى حلق الواد

على الشطوط تعوم

بساط الريح قوام يا جميل أنا مشتاق لوادي النيل

أنا لفّيت كثير ولقيت البعد عليَّ يا مصر طويل


https://youtu.be/2A3nDkPmCvk





الجمعة، 20 أكتوبر 2017

بناء


الحكايه بدأت بساره صديقتي الصدوقه اللي عرفتها بالصدفه في شنط رمضان
ساره بتحط بناء في جمله مڤيده مره كل ٥ دقائق ، نوزع شنط في الصعيد فين يا ساره , الاجابه بناء ، معرض ملابس ، الاجابه بناء ، ناقص نأكل فين ، الاجابه بناء !!!
المهم ايه بقه قررت اطلع اشوف شنط رمضان بتتوزع فين وازاي فطلعت قافله معاهم للمنيا
فريق عمل ما شاء الله متكامل ومحب لبعضه ومتفاني بأقصى درجه
لفيت كتير وقليل بس اللي شفته كله كوم واللي شفته في قرى الصعيد معاهم كوم تاني
البيوت اللي بيوصلوا لها حقيقي تحت خط الصفر بمىراحل طويله ، يدخلوا البيت من دول يعرفوا يجيبوا قراره ودخله ازاي وبشويه ذكاء وحب يعرفوا ايه اللي ناقصهم وفي فسوه من الزمن يوصل لاهل البيت كل احتياجاته ايا كانت سقف، اجهزه، زكاه ، رعايه، حالات زواج ايتام ، غارمين ، اطعام ، ارامل .... كل واي حاجه
ماشيين بدليل من كل قريه ومع ذلك بينزلوا استكشاف ومتابعه
عادي جدا في عز الصيف بدل ما الناس بتطلع الساحل ، همه بيستكشفوا في أقاصي الصعيد
حضرت فطار رمضان بتاعهم وكان ديش بارتي وصلاه وتراويح ، وكمان بطيخ وقصب وضحك للركب وقت الجد جد ووقت اللعب والهزار تفطس معاهم من السعاده
مره جم معايا درس الموسيقى ورجعنا عالبيت وسهرنا لمتاخر بس كلنا كنا فرحانين ومبسوطين وبنضحك  ولا كأننا الساعه ٦ بالليل وكم الاريحيه اللي كلنا حسيناها لا يوصف لدرجه اني ما نمتش يومها من كتر الفرحه والانبساط
مش بس قوافل وعمل خير لا كمان حفلات سمر وفطار رمضان وكمان مانجا بارتي ( اول مره في حياتي اكل مانجا قدام حد بره البيت كانت معاهم وده دليل عالاريحيه الشديده اللي الواحد بيحسها معاهم )
نطلع القافله ونرجع مضحضحين من التعب بس تاني يوم نقضيه سعدا في الفرحه على احداث اليوم واسترجاعها وبسرعه نطلب اللي بعدها
بنرجع مشحونين طاقه وإيجابية ونحمد ربنا على نعمه وفرحانين بفرحه الناس ونظره الشكر والامتنان منهم
في راجل غلبان انبارح من كتر شكره ودعاه لينا الواحد اتكسف واحرج منه ونظره الفرحه المخلوطه بالكسره ( لأنه حتى مش قادر يقدم أي حاجه لشكرنا أو ضيافتنا من كتر غلبه وعجزه ) بس يا سيد الناس لو تعرف اننا احنا اللي محتاجينك مكنتش تنكسف ولا تحرج ابدا
بناء همه عيله جديده دخلت وسطهم من فتره قصيره بس بجد كان الواحد يعرفهم من سنين ، البساطه والتلقائيه والأهداف المشتركه اهم بكتير من شياكه المجتمعات الممثله اللي حوالينا من كل حته
كلنا سوا من اول بشندي لحد دبايح كبرات البلاد اللي بنزورها مرورا بفطير وكحك بسكر في بيوت بعض
ضحكنا وهرجنا في الباصات وعيطنا كتير لما نشوف حالات أو نحكي لبعض عن حاجات من اللي بنشوفها
الاجمل من كل ده تبقى قاعد في امان الله تلاقي بوست كده صغنن هدايا بناء لأعضائها ( وابهاتهم وامهاتهم ) أسهم في وصلات ميه للصعيد وآبار في افريقيا
ولا يوم الاشهار اول ما تفتح عينك تلاقي مسج عظيمه تفتح لينكها تلاقي الخبر اللي كنا مستنينه بفارغ الصبر
بالذمه في اجمل من كده ؟ .
قولوا ماشاء الله لا قوه الا بالله
ربنا يديمكم في حياتي
بناء جمعيه رسميه مشهره ١٠٥٥١
لينك الصفحه على فيسبوك
https://www.facebook.com/Bena2/




الجمعة، 13 أكتوبر 2017

سيب ديابها على كلابها

سيب ديابها على كلابها
قال ايه قلت اروح النادي اغير جو
كل الجناين متاجره من الباطن ، اعياد ميلاد ومكومين الاعضاء في جنينه صغيره
الالطف أن كل عيد ميلاد بيعلي عالتاني بالديجي بتاعه فالازعاج فوق الوصف ، وقاعدين مع بعض مش سامعين بعض !!!
قررت اروح اخر حته في النادي انقل فيها لقيت برضو عيد ميلاد ، طلعت عالاداره اطلب منهم حل بتوطيه كل الأصوات كل واحد على قده ما لقيتش حد من الاداره !!!
فلفيت على كل عيد ميلاد اطلب منهم يوطوا الصوت
وطوه شويه ورجعت ريما لعادتها القديمه !!!
الكوميدي بقه أن كل فسل من أصحاب العيد ميلاد زبله عنده سنه ولا ٢ ومش فاهم حاجه وموسخين هدومهم اصلا بالطينه!!! اما الاغاني اللي شغاله اصلا مهرجانات !!! يا ريتهااغاني اطفال ظريفه !!!
اما النادي ساب ديابها على كلابها والاداره في اجازه !!!
اللي حصل النهارده مثال للتسيب في بلدنا ، كل واحد بيعمل اللي في مزاجه في غياب تام لأي سلطه لاي مسئوول !!! مع شويه عدم احترام لمساحه الآخر وفكره أن ممكن يكون في ناس غريبه زيي محتاجه تقعد في شويه هدوء أو بعد الشر تقرا ولا تتأمل في صمت !!!!
#المحروسه_قعده_شاي_بالنعناع#

http://shaybelne3na3.blogspot.com.eg/2017/10/blog-post_13.html?m=0

الأربعاء، 4 أكتوبر 2017

قال ايه ازمه مرور قال


فقط في المخروبه
احنا بس اللي ممكن المرور يقف عالكوبري عشان امين الشرطه قرر يغلس على سواق ترله على كوبري ويشوف رخصه ، مش مهم بقه أن الشارع يقف من قبل الكوبري ولا مصالح الخلق تعطل
واحنا بس اللي الشوارع زحمه عشان الصبح الناس رايح الشغل بالليل راجعه منه وفي النص من غير سبب !!!
واحنا بس اللي شوارعنا بتقف من غير سبب فجاه ربنا يفرجها وتتفتح من غير سبب
واحنا بس اللي بوكيه ورد يوقف البلد كلها مع أن جاي يومين اجازه
واحنا بس اللي الهانم والباشا قرروا يكسلوا يركنوا فوقفوا الشارع لما كل واحد رمى بوز العربيه وماكملش ركنها عشان بجيب حزمه فجل من الخضري
احنا اللي عندنا قله ادب مش ازمه مرور
#المحروسه_قعده_شاي_بالنعناع




الأحد، 1 أكتوبر 2017

اذان الشيخ محمد رفعت

اكثر ما اعشق في القنوات الارضيه الاذان بصوت محمد رفعت بعده دعاء الشعراوي 
هو هو من ايام ما كنت في ابتدائي 
بيفكرني بزمان وبلكونه جدي وقرطاس اللب والراديو الترانزستور البرتقالي بتاعه 
واحنا بنسقي الزرع في البلكونه ام ارضيه خشب وسور فيرفورجيه 
والجار تحت بيرش الشارع بجيب طراوه ويرقد التراب ، وتشمل ريحه التراب المبلول وتبص السماء تلاقي الحمام راجع الغيه بتاعته وصاحب الغيه بيصفرله ويلمه بالعلم الاحمر 
والشوارع كلها اطفال بتطير طيارات هوا 
طيارات بيتي معموله من الخشب والورق ويطيروها ويعلوها وتبقى أعلى من كل العمارات اللي حواليك 
وتطير وتسرح معاها وتقول حاطير طياره ورق معاهم بكره 
ويجي بكره وبعده وتفتكر كل ده بعد سنينننننن طوييييييله وانت بتسمع الادان في قناه ارضي وتفتكر أن عمرك ما طيرت الطياره الورق فتضحك على ابسط احلامك اللي ما حققتهاش 


الاثنين، 25 سبتمبر 2017

قرات لكم : المجنون ، جبران خليل جبران


مجموعه قصصيه رمزيه ، قد تختلف رؤيتها وتفسيرها حسب شخصيه القاريء 
شخصيا وجدت فيها الإنسان الوحيد في عالم ظالم كئيب يرغب في تكرار كل الناس ليكونوا مسخ او صور مكرره لما يجدوه طبيعي او تقليدي 
ليتحول ذلك الشخص المتفرد الى مجنون من وجهه نظرهم أما لجنونه، اختلافه او حتى مثاليته
المجنون هنا هو كل شخص منبوذ من مجتمع لم يفهم اختلافه او تفرده ففضل وحدته أو وصمته بالجنون على الانخراط في مجتمع غريب عنه أو عن رؤيته للحياه وفضل وصمته بالجنون على إصابته بجنون الآخرين ( من وجهه نظره ) 
ويبقى العلم عند الله ايهم المجنون وايهم المفتون !!!! 

رائع كالعاده ايه الكاتب المجنون يتميز وتفرد كان ومازال سابق لعصره 



الخميس، 14 سبتمبر 2017

مستر حاج عبد الغفور

بالصدفه باقلب في التلفزيون لقيت لن اعيش في جلباب ابي 
ديكورات وملابس ومكياج وكوافيرات متواضعه 
الممثلين قبل الشد والنفخ 
بس بجد التمثيليه حلوه وليها طعم ، والأغرب انها من ٢٢ سنه !!! 
ايامنا بقت اشيك واحلى وانضف بس ملهاش طعم ليه 
كلها صناعي وكدب ونفاق ليه 
زمان كانوا ٣ قنوات بس كان في طعم وقيم وحاجات مخدومه في المحتوى حتى لو شكلها مش حلو او مش موضه 
دلوقتي كل حاجه متزوقه بس برضو قبيحه 
حتى الناس وشوش حلوه ولبس ماركات ومن بره وهمه من جوه لا يزيدوا عن كونهم عرايس ماريونيت أو قرود بس بصديري 
ليه يا زمن ليه 
ربنا اخرجنا من هذه القريه الظالم اهلها 

الثلاثاء، 8 أغسطس 2017

ساعتي

ساعتي
وقف الحجر بتاع ساعتي فجبت الساعه التانيه وهكذا لحد ما كل الساعات وقفت 
واضح اني زمان غيرتهم مع بعض فوقفوا مع بعض 
وكل ما اعدي عالساعاتي تلاقيه قافل فقررت تتخلى عن الساعه !!!

المهم اكتشفت أن الموبيل ماشي استخدامه كساعه وخلاص ، وفضلت الساعات في تابلوه العربيه شويه حلوين 
انبارح افتكرت وعديت عالى الساعاتي وغيرت كل احجار الساعات 
النهارده بقه رجعت البيت الساعه تاني واستغربتها جدا ذلك الشيء اللي حوالينا ايدي ، التقيل الغريب ده !!! 
مش عارفه احساس التكتيفه ده هو احساس تكتيف الوقت ولا ساعتي تقيله وعايزه تتغير 
صباحكم سكر




الخميس، 3 أغسطس 2017

قرات لكم ظل الريح للكاتب كارلوس زايفون


من مترجمات الادب الاسباني المعاصر 
روايه حديثه النشر تدور أحداثها بين الحداثه والقدم في تتابع شيق من الأحداث ذهابا وايابا
بطل الروايه طفل صغير يصطحبه والده لمقبره الكتب المنسيه ليريه إرثه وارث أجداده من الكتب الهامه التي تناساها الناس فقرر الجد الحفاظ عليها 
فكره مقبره الكتب المنسيه هيه نواه لرباعيه ألفها الكاتب وكان الابطال هنا الكتب المنسيه
يختار البطل كتاب ظل الريح ويقراه ويتمتع به ومن شده تأثره يبدأ بالبحث عن جميع كتب هذا الكاتب المغمور حيث يصاب بلعنه الكتاب والتي تصيبه لاخر لحظه فيه 

تتأثر حياته بخوليان وتبدأ اسقاطات الروايه على حياه طفلنا الصغير الذي يكبر مع الاحداث وكان القصه روايتين متوازيتين لخوليان ( كاتب ظل الريح) و دانيال الطفل والشاب ثم الرجل اليافع في نهايه الأحداث 

ويحاول دانيال معرفه مصير خوليان وينبش مواضيع الى أن تتلاقى طريقهما مع بعضها البعض في نهايه لطيفه وجديده 

الروايه بوليسيه مشوقه وليست مرعبه ملىئه بالاسقاطات والاشتباكات بين الابطال لدرجه غير متوقعه ، بها شيء من الرومانسيه المتحفظه ( اعتقد من قبل المترجم) مليئه بصور برشلونه وشوارع باريس مما زاد من متعه القاريء
تنتهي بمفاجئه توقعتها بشده لكني لم اتصور تحققها !!!

معظم الأحداث ليليه ومظلمه إمعانا في التشويق ، كبيره الحجم لكني شخصيا انهيتها في ٣ جلسات من شده جمالها 

لم ارد إفساد متعه القاريء بذكر الأحداث لكنك لن تندم على قرائتها 

الأحد، 23 يوليو 2017

دوشه

شارعنا كان ( ومازال نسبيا ) من اهدى الشوارع بالرغم من أنه عمليا امتداد الشارع المزعج المسمى عباس العقاد 


زمان كنا لما نقعد في البلكونه من النادر لما عربيه تعدي ، مكنش لسه السفارات طلع ولا العمارات اللي قبلنا طلعت 
كان البلوك بتاعنا وكام فيلا في اول الشارع والسلام ختام 
كنا نجيب العربيات من اول الشارع بسهوله ونحدد ماركه العربيه من فوانيسها ونتراهن مين حيطلع صح !!!


جدي رحمه الله عليه في مره عد الكلاب اللي في الصحراء اللي طلع فيها بعد كده السفارات من صوتها دليل عالصمت الرهيب 


من شده الهدوء كان الغفراء كل شويه يندهوا على بعض يونسوا بعض ويعملوا الشاي عالحطب ويغنوا يسلوا نفسهم 
النهارده الدوشه عاليه ( نسبيا) صوت الموتوسيكلات الغاليه دي المزعجه رايحه جايه واللي بجد مش فاهمه ايه متعهتا في الوش ده !!! وأجهزه الانذار ومعارض السيارات والكافيهات اللي خطفت نكهه وجمال صمت الشارع 


كان زمان لا يسمع الا صوت الضفادع في الجزيره اللي في النص وبس 

لكن يبقى لله الحمد والمنة فكره ان نصه معهد بحوث البترول والنص التاني كام وزاره بيخلوه اقل زحاما بالليل لان الحاجات دي صباحي بس 

 وكنا زمان بنشتكي من شده الهدوء اللي دلوقتي لا يحس الا في الأعياد والإجازات الطويله لما كل الدخلاء يسيبوه ويروحوا لاماكنهم الاصليه 

في اعتقادي المتواضع شارعنا ليس إلا عينه عشوائيه من حياتنا السريعه الصاخبه اللي ملهاش طعم بس ارجع واقول دوام الحال من المحال !!!



الثلاثاء، 11 يوليو 2017

لقيطه اسطنبول


ذلك الكتاب الذي عرض كاتبته للسجن لمساسها بتاريخ الأرمن ، تلك النقطه الشائكه عند الطرفين، الأرمن والأتراك 

قصه خياليه من واقع معايشه لأسر تركيه وارمنيه وحكايا الجدات التي ساعدت الكاتبه في نسجها ووصل خيوطها لتحل اللغز في اخر فصل من الكتاب 

طوال الأحداث تروي قصه زليخه الفتاه المتمرده والتي انجبت خارج إطار الزواج في اسره ومجتمع مليء بالمتناقضات 

الاسره التي توفي كل رجالها في سن صغيره عدا مصطفى الذي فر لامريكا هربا من المصير المحتوم ، الجده المسنه، زوجه الجد، اجيال من القطط ، خالات مختلفات : المعلمه ، قارئه الطالع، راسمه الوشم ومعلمه متشدده 

تولد اسيا (اللقيطه بدون اب) بعد فشل محاولات زليخه لاجهاضها وتنمو في هذا البيت المتناقض، تتعرف على شخصيات مثقفه متناقضه،  تحيا تفاصيل التمرد وكره المجتمع 

في امريكا الاسره الارمنيه التي تحيا على أنقاض المذبحه الشهيره والتي توقعها الظروف لتخطلت بمصطفى لتعود حفيدتهم لاسطنبول لاستكشاف حقيقه الاضطهاد التركي للأرمن وتعيش مع اسره اسيا لتتفجر مفاجاءات لم تكن متوقعه 

اثناء هذه الزياره تعرض الكاتبه لتناقضات المجتمع التركي ، الأرمني وتداخلهم مع الامريكان ، تعرض تفاصيل الحياه في اسطنبول وثراؤها واختلافها، اكلاتها الشهيه وعادتها التي تشبهنا كثيرا حتى في مشاهد النهايه وصدمه البطله / الابطال 

لم ارد حكي تفاصيل تفقد القاريء متعتها فهي روايه من شده جمالها كنت احاول اطاله وقت قراىتها قدر الامكان بالرغم من تشويق الأحداث 

لقيطه اسطنبول ، اليف شافاق 

الاثنين، 26 يونيو 2017

دعوت الله

بعد إحدى ليالي العشر الاواخر في رمضان الممتلئة بالدموع والدعوات والاهات للخالق الواحد 
ومع الارق المعتاد بالرغم من السهر الطويل في الشهر الفضيل 
استيقظت كالعاده على الصوت المزعج لجرس انذار سياره احد الجيران والذي تسبب في تغيير اصيل في عاداتي النوميه بالنوم تحت المخده وليس فوقها لعزل الاصوات المزعجه قدر الإمكان 
نسيت السهر وقله النوم ورغبتي في استكمال النوم وقاومت فكره اخذ اليوم اجازه ودعوت الله 
دعوت الله أن يعطل جرس الانذار لهذا الجار او يرزقه سياره جديده بدون انذار 
دعوت الله بهدايه ذلك الشاب المزعج ذو الدراجه البخاريه المزعجه التي تجوب شارعنا ليل نهار وتوقظ الاموات لا النيام 
دعوت الله أن يسلب صاحب معرض السيارات في عمارتنا ذلك الصوت المزعج المتحدث تحت شباك غرفتي ليل نهار 
دعوت الله أن يعطيني نوم ثقيل يريح جسمي المرهق دائما من قله النوم 
دعوت الله أن يسكت العالم المزعج حولي وداخل عقلي 
ثم تخيلت العالم بلا اصوات ، بلا موسيقى وبلا زقزقه عصافير 
بلا اصوات ابناء اختي الرقيقه والمضحكه ، بلا صوت والدي الموقظني للسحور 
بلا اصوات القران والاذان
بلا دعوات واهات الساجدين 
فاكتشفت اني احب الحياه باصواتها المزعجه والجميله 
فدعوت الله أن يديم كل ذلك ولكن يمنحني السكينه والقوه على احتمال الصخب داخل عقلي وبها وكفى !!!

الاثنين، 8 مايو 2017

خواطر صباحيه : صوت الموسيقى


زهره رامي النهارده رجعتني ٢٥ سنه لورا 
في فقرتها الطفوليه الصباحيه شغلت اغنيه صوت الموسيقى do a deer ولقيتني بارجع في حفله المدرسه اللي غنيناها فيها والبروفات والملابس والمجمايع اللي في الخلفيه وكل التفاصيل 
مش بس كده انا رجعت لما كبرت في دماغي بعد ما شفت الفيلم اني لازم في يوم من الايام اروح سالزبورج اللي فعلا روحتها من سنه 
وفجاه تلاقي نفسك شايف الفيلم وتتطيتهم في الجنينه اللي كلها تماثيل اقزام واللي انا بعد كده روحتها واتصورت فيها 
وتنتهي الاغنيه بعد ما عنيك اتملت دموع حنين لذكريات الطفوله وفرحه انك حققت حلم في يوم كنت شايف أنه كبييير قوي واهو حلم زيه كتير  ، بس احيانا الاحلام فعلا بتتحقق
صباحكم سكر 

https://youtu.be/brt0KH8q-94

السبت، 15 أبريل 2017

قرات لكم :الفاجومي السيره الذاتيه الكامله ، احمد فؤاد نجم



بقلمه شخصيا ، كتاب اكثر من ممتع ومضحك بشده يقع في ٥٣٠ صفحه من القطاع الكبير والفونت الصغير لكنه خفيف وشيق


اولكش مشهد ولادته نقلا عن والدته وكم العكوسات الحادثه في قريته تيمنا لوصوله !!! 


نشاته يتيما في الشرقيه بعد اكل ميراثه من عم ظالم ، والام الواعيه بالفطره العالمه بمواضع القوه والضعف في أبناؤها والقارضه للشعر والاغاني الشعبيه وتغنيه بجمالها وتاثيرها فيه طول الكتاب 

ثم على الشمروخ الرجل البسيط في قريتهم اللي علمه الوقوف ضد الظلم مع ذكاء فطري وشقاوه واللي استمر نجم في تذكره وتأثيره عليه لاخر الكتاب ، مواقف الطفوله المشرده ووقوفه ضد ظلم العمده والخواجه وابناء عمه الظالم وتاسيسه لعصابه من الأطفال الاشقياء في سن صغيرة !!!

النقله للمدينه وكم التلطيش في الدنيا وسجنه ثم اول ديوان ظهر له أثناء سجنه ورعايه مامور السجن له 

ثم فجاه اصبح الشاعر احمد فؤاد نجم الموظف الحكومي ولقاؤه بالشيخ امام وثنائي الابداع 

صعود وهبوط علاقتهم ببعض ومحاولات الحكومه التفريق بينهم وذياع سيطهم بعد النكسه 

ثم فجاه قرر عم نجم انهاء الكتاب لسبب غير معلوم ؟!! النهايه في عصر السادات والمحاكمات اللي تعرض لها وتعاطف النيابه والقضاء معه بالرغم من السياسه العامه ضده 

لم يتحدث مطلقا عن زوجاته ولا ابناؤه ولا حياته الخاصه وهو شيء محترم بشده 

الكتاب بالعاميه الشوارعيه ويمتلىء بالالفاظ المضحكه والخارجه احيانا إلا أنه مضحك ومسلي ومليء بالعبر 

هو ببساطه شخص بسيط استمتع بحياته الثريه بالمناسبه ، لطش في الدنيا والدنيا لطشت فيه إلا أنه استمتع برحلته الى اقصى درجه ممكن تتخيلوها، هنياله بصراحه

الكتاب من اصدارات الهيئه العامه للكتاب سلسله سير وتراجم 


الجمعة، 14 أبريل 2017

سلمى وليان


قاعده قعدتي الاسبوعيه للقرايه في النادي 
اخترق الصمت زنننن من نوع عالي جدا من طفله في الترابيزه اللي جنبي ، الأغرب انها ما نزلتش دمعه واحده توحد ربنا قدره عجيبه عالزن مع قله حيله واحراج من والدتها وجدتها 

حاولت تتغاضى واطنش ما قدرتش لان الكتاب كان دسم ومحتاج تركيز فقررت احاول 

المهم رحت نادهه عليها واخترقت زنها بأنه ازاي بنوته جميله كده تعيط وتزعج الناس بدل ما تضحك وتفرحهم ، الغريب انها سكتت في الحال !!! مع اندهاش مامتها وجدتها وندهتها هبه واختها يلعبوا مع القطط اللي عاده بتتلم حواليه متعرفش ليه 

جت الست ليان ولارا واخدت ليان على رجلي وتجاذبنا أطراف الحديث وادتني بوسه من اجمل ما يكون لدرجه ان لارا شعرت بالغيره فدلعتها شويه من باب الرفق والرحمه 

وفجاه قرروا يتصالحوا ويلعبوا حواليه وكل شويه تيجي ليان ذات التلات سنين تديني الupdate بتاع لعبهم اللي ما فهمتش منه حاجه بس اسعدني 

حبه كمان ومشيوا وجه مكانهم سلمى ومامتها ، المره دي بقه سلمى اللي قررت تيجي نتعرف عليه وتتسائل باقرا ايه مع انها لا تزيد عن اربع سنين ، وهيه لمضه ما شاء الله قررت كمان تسال في ايه في شنطتي واللي اتضح من الحديث انها بتدور على روج ومرايه !!! اه والله زمبؤلك كده 

اطفال اليوم لذاذ وعشريين بالظبط زي قطط النادي اللي بتيجي وتتلم حواليا كل ما اجي واللي بجد مش عارفه ايه سببه 

اللي اعرفه فعلا اني استمتعت بسلمى وليان اكتر من ذاك الكتاب المتفزلك اللي باقراه دلوقتي والبعيد كل البعد عن عنوانه !!! 


الأربعاء، 12 أبريل 2017

قال باعرف اسوق ، قاااال


ماشيه في حالي بالعربيه
 فجاه اللي قدامي وقف 
بصراحه اتغظت بس لقيته بينزل ست عجوزه على كرسي بعجل فهديت وكمان زعلت من نفسي 
ولان الطريق زحمه اضطريت استناه عشان اكمل وخلاص عادي دقيقتين مش قصه 
وبعدييين دخلت يمين ووقفت في اشاره فوجئت بواحد واقف يشتمني اه والله !!! الاول فكرته شحات وقال ايه كنت حاديله بسكويت من اللي معايا في التابلو للظروف دي 
ركزت كده لقيته بيزعق ويشتم وبيقولي بتعرفي تسوقي  انت اتاريه الراجل اللي كان ورايا لما وقفت 
فما كان مني غير رفعت القزاز وحطين النضاره الشمس وعلينا الكاسيت وكمان شرب الشاي 
فتحت الاشاره وطلعت ، يقوم البيه المحترم يجري ورايا ويشتمني !!!! 
سيادتك اه باعرف اسوق بس جنابك ما كانش عندك مسافه امان ودي غلطه سعادتك 
سيادتك اه باعرف اسوق بس انت اللي مش بتشوف وما فهمتش وقفت ليه 
سيادتك اه باعرف اسوق بس انت اللي مش محترم بالرغم من انك راجل معدي الخمسين بالمرتاح 
قال باعرف اسوق ، قااااال


الثلاثاء، 4 أبريل 2017

خواطر صباحيه شاهد الاذاعه

باظت بطاريه عربيتي وغي انتظار صديقتي تاخديني معاها النهارده ولاول مره في حياتي ياخدني الفضول وافتح البرنامج اللي باسمعه كل يوم في الراديو بس المره دي مشاهده من النت
الحقيقه اتصدمت وحسيت قد ايه الاذاعه بتخلي الواحد يركز مع الصوت والموسيقى والمعاني اكتر بكتير من distraction الصوره في التلفزيون 
وملل الفواصل والاعلانات تخيلوا اكتشفت اني باستمتع بالاعلانات في الراديو حاجه كده زي ما تقرا كتاب وتتصدم لما يعملوه فيلم لان كل خيالك اتهد واتفرض عليك صوره مش من صنعك  
قوم ايه بقه قفلت النت وشغلت الراديو 
 الخيال ده شيء جميل والله ، دمتم خياليين

الجمعة، 24 مارس 2017

اطفال مصر السمان


قاعده في النادي كافيه خيري شري وباشكر ربنا قطع عليه تركيز القرايه تلات بنات قرروا يبقوا رياضيين 
البنات سنا لا يزدن عن عشر سنين لكن جسما الحقيقه مدامات 
وبنظره سريعه لباقي المنطقه المحيطه اكتشفت انها فعلا ظاهره 
اطفال صغار بكروش متدليه قبيحه تعوق لعبهم ومرحهم 
طب طبيعي تشوف المنظر ده في السنين الاكبر من واقع الحياه الكسوله اللي عايشينها والاعمال المكتبيه او قله الرياضه او الرفاهيه وعدم الحركه وكل حاجه اونلاين على جلسات طويله الفيسبوك او كسل او اي اسباب اخرى زي نقص الحرق مع تقدم السن 
انما تشاهد تلك الظاهره في سن التنطيط والحركه ؟! 
اعتقد كسل من الاهل للمارسه الرياضه على اكل غير صحي سريع والاعتماد على الدليفري وزيد على كده بدل لعب استغمايه ومنديل وتلج ومايه بقوا بيلعبوا على التابلت وفيديو جيم 
من صغرنا وامي دائما كانت ب reflect مناهج المدرسه عالحياه زي مثلا نحلل وجبتنا وانها ماشيه ولا لاه مع الهرم الغذائي ولا لاه
او انها مثلا لما الواحد يبدأ يوظوظ تنبهه انه لازم يفرمل ويعمل دايت 
اما أمهات دلوقتي يا مش مركزين يا ملهيين والنتيجه هيه اللي شفتها النهارده من عيال غلابه مش قادره تلعب من كروشها اللي قدامها 
الهي يعمر بيتكم ركزوا مع عيالكم شويه وبلاش المناظر دي حافظوا عالامانه اللي ربنا ادهالكم 

الثلاثاء، 21 مارس 2017

صباح الخير يا مولاتي


مع قدوم عيد الام وازدحام وزخم التلفزيون والسوشيال ميديا بالبوستات بقه الكوميديه عالنكديه او استعراضات الهدايا في الشغل والفيسبوك 


واغاني حزينه على اغاني كىيئبه عن مجهود وكفاااااح الامهات ، زيد على كده بقه كئابه اللي والدته عيانه او مسافره او ميته او اللي ولادها طنشوها او اللي معندهاش عيال 

ايه يا جدعان انتوا عاملين عيد الام تنكدوا علينا ؟ ولا الامومه كلها نكد وشحتفه والام المثاليه عالام المش عارفه ايه، همه اه احيانا بيعزوا النكد زي عينيهم بس دي طبيعه ستاتيه ملهاش دعوه بالامهات على فكره بتبقى سفروته شبر ونص وتنكد على قاره عادي يعني 

ارحموووونا 
هو ما ينفعش الام تبقى ست كول كده وفرفوشه ؟ ولا لازم امينه رزق على عبله كامل يضربوا في الخلاط وينكدوا عاللي خلفونا ؟! 

في رايي المتواضع اجمل واروع واظرف اغنيه للام اغنيه سوسو اخت القمر صباح الخير يا مولاتي 


الست صبحت عليها بكل اللهجات ورقصت وغنت وفرفشتها وفرفشتنا معاها 


اسمه عيد الام اجدعان بلاش اله النكد يسيطر علينا وعليها في اليوم ده 


صباح الخير يا مولاتي يا ست ساميه جبريل وكل سنه وانت طيبه ( اه انا بانده ابويا وامي باساميهم مش بابا وماما )

ايوه امي اسمها ساميه جبريل لا ام لمياء ولا ام محمود ولا حرم حمدي جبريل سااااامممممييييه جبريل لا عيب ولا حرام ولا حد حيعملي عمل باسمها يا مجانين 

ساميه اللي علمت اجيال في مصر والسعوديه من اول الامراء في مدارس الرياض لحد اخر بنت وولد في مصر ، وكفايه اصلا انها علمتني !!! سفروته عندها ٤ سنين دخلوها اولى ابتدائي تخيلوا انتوا بقه المعركه اليوميه والمذاكرة عالمرجيحه وفي الحديقه وفي كل مكان  ، هيه هيه السفروته اللي رجعت من السعوديه بتعك في التعليم المصري وفجاه دابت فيه ودخلت صيدله وما بطلتش تعليم من ساعتها ( الله يسامحك !!! ) 

الست دي شقيت معايا قوي والله ولنا مقال اخر نحكي فيه براحتنا لدرجه انها نسيت ده كله يوم ما قلت كلمه الخريجين في الجامعه الامريكيه وطول الطريق واحنا راجعين كانت بتسترجع سنين الشقا والكفاح وتضحك وتقلب كف على كف مش مصدقه يا عيني  !!!


صباح الخير وكل الستات والبنات والامهات بخير باساميهم مش باسامي ولادهم ولا اجوازهم ولا عيلتهم

صباح الخير يا سمسمه وكل سنه وانت طيبه 

https://youtu.be/VsAbNEp_F3k

الثلاثاء، 7 فبراير 2017

سيندريلا سيكريت , كتاب مش للبنات بس



في الحقيقه ما كانش في لسته كتب المعرض , ولكن احدى صديقاتي طلبت مني اشتريه لها لانها مش حتلحق تروح المعرض , واتاخرت والكتاب خلص وهيه زعلت وفجاه لقيتها بتكلمني تقولي لو لسه حتروحي الحد الجاي الطبعه التانيه نزلت , وعدتها بشراه وفعلا اشتريته


روحت بيتنا وشلته وخلاص لحد ما اقابلها وكان الكتاب فيه سحر فعلا اروح وارجع ابص له واحطه , انا تقريبا اشتريت حوالي 100 كتاب محدش فيهم عمل فيه كده


لقيتني باستاذنها افره لحد ما اديهولها وفجاه خلصته في يوم !!!!من زمان مفيش كتاب عمل كده معايا
احقاقا للحق الكلام مش جديد ( كلام التنميه الذاتيه وكده ) لكن المختلف بشده هو معالجه الكاتبه وشخصيتها الطاغيه وتجاربها وكثير من الكوميديا


الحكايه حكايه كل البنات اللي اهاليهم صوروا لهم ال fairy tales  والاميره والامير واتجوزوا في تبات ونبات وخلفوا صبيان وبنات , اذكر صديقتي اللدوده وهيه بتقولي ما تحكوش الحواديت دي للبنات الصغيرين ما تدمروش حياتهم !!! واللي فيه كثير من الصحه من تراث تربيه على اساطير ديزني واللي بالمناسبه هبه السواح مسكتهم اميره اميره وحللت عقدهم النفسيه كمان دول طلعوا غلابه ومعقدين والله مش اميرات وعايشين مرتاحين , تصدقوا محدش مرتاح !!!


نرجع بقه لسيندريلا بعد ما اتجوزت ورجعت للساحره الطيبه بتشتكي من حياتها مع الامير وحماتها وباكينام بنت خاله جوزها اللي بتغير منها  وبنات زوجه والدها والمرار والحياه الصعبه !!! حتى سندريلا تعبانه تخيلوا !!!!


وفي حوار تخيلي تفتح هبه السواح الكثير من المشاكل الحياتيه لسندريلا مع الدنيا وفي تسلسل رائع للفكره من انا المسئوله  فاعل لا مفعول به, انا متوازنه وفكره السبع تانكات وازاي توازنيهم وامثله غايه في الاضحاك والامتاع , انا صاحبه نفسي , انا حره, انا حكيمه , انا مسيطره , انا مؤثره , انا والحياه مش عايزه احرقه للي حيشتريه وربط كل الافكار دي بربنا خلقنا اصلا ليه وان الحياه مليانه مطبات مش ديزني لاند وان الواحد يوسع حياته ودايره تاثيره من حياته واسرته ومجتمعه لغايه خلق الله لنا  
كتاب لطيف ممتع ومؤثر به مساحه للتفكير الذاتي باسئله للقاريء واماكن للاجابه واخذ ملحوظات , كثير من الرسوم اللكريكاتيريه  ومش حاحرقه اكتر من كده


شكرا صديقتي انك سمحتي لي اقراه قبلك والله ما تنيت الصفحه حتى عشان يوصلك بحالته 

الاثنين، 6 فبراير 2017

كاس الامم الافريقيه


ا
حب اسجل اعتراف اني شخص ملهوش في الكوره الا لو المنتخب بيلعب 

كاس الامم سنه ٢٠٠٦ كانت اول مره اوعى فيها على الماتشات وصاحب الصيدليه لما كان بيسمح بتشغيل الماتشات 

ولما كنا نتلم في البيت عالماتش ونعمل بوله فشار كبيييره ويجي بعدها الجون 

وافراحنا في الشوارع والبيوت والاعلام والعربيات ورئيس الجمهوريه لما كان يروح يحضر الماتشات بنفسه 

البطوله اللي فاتت جت في ظروف محبطه للبلد فمحدش اهتم بيها 
بطوله ٢٠١٧ أعادت للذاكره الجو القديم والماتشات والأمجاد القديمه وماتش عن ماتش يتجدد الامل بالرغم من أن مستوى الفرقه مش قد كده 

ماتش النهائي كان غريب الصراحه جون جه في لمح البصر ( النت كالعاده كان بيقطع وما شوفتوش غير عالفيسبوك بعد كده) 
وفجاه في اخر كام دقيقه الكاميرون تكسر التعادل وتكسب الماتش والناس في حاله ذهول 

اللي قالك كوبر ده نحس 
واللي قالك الحضري اتحسد 
واللي قالك مين غير ال setting بتاع الماتشات اللي فاتت فالتعوبذه ما نفعتش !! وبدأ كل واحد يراجع اللي حصل 

انا شخصيا عملت الفشار زي كل مره ، بس المره دي شعري كان حيتحرق ( بس انا اللي جايباه على جنب تحت زعبوط البيجاما وقال ايه واقفه قدام النار لا لا ملهاش دعوه انا اللي مهمله)

زهقت وقت البريك قمت عملت مولتن شوكليت يقوم بابا يقولي انت اللي غيرتي التعويذه !!! بس طلعت وحشه كمان مش ده كفايه لا خسرنا الماتش بس انا اللي غلطت وحطين كاكاو بدل شيكولاته خام الحكايه ملهاش دعوه بالماتش 

كل ده تهريج طبعا ، بس ارجع واقول على راي حد من صحابنا فرقه كانت كل التوقعات بتقول انها مش حتعدي الدور الاول تطلع التانيه عالبطوله ، لسه زعلانين ؟!  المنتخب زي اي حاجه في البلد عندها potential بس ينقصها الاداره والتوجيه الجيد 

اشمعنا يعني الكوره اللي حنفلح فيها قوموا اشتغلوا وسيبوا الفيسبوك  واحنا حنكسب المره الجايه 

الفلوس اللي اندفعت اشتراكات وقهاوي اعتقد كانت ممكن تعمل حاجات كتير قوي بس احنا لا تجيد تقييم الأولويات وتوجيه الانفاق العام 

اقول للمنتخب ولا يهمكم شرفتونا 

الثلاثاء، 31 يناير 2017

خواطر صباحيه : رادار ايه بس يا جدع


الاخوه القائمين على مرور المحروسه قرروا يظبطوا السرعه على كوبري اكتوبر !!! اه والله زمبؤلك كده 
فااااال ايه السرعه على اكتوبر مراقبه بالرادار وقال ايه حد السرعه ٤٠ كم سيادتك لو الكوبري سالك عشان اركز ما اعديش ال ٤٠ حافضل باصه عالعداد فتقريبا حاخيش في الفواصل او حاخنق اللي ورايا فحيشتمني بالاهل او لو اللي ورايا غشيم حيطس فيه 


واذ فجاه تلاقي اللوح بقت ٦٠ واذ فجاه تختفي 
ما تركزوا يا جدعان مش طالبه بقه 


رادار ايه يا جدع احنا بنتشعبط فاي حته سالكه عشان نوصل قبل الزحمه وعجبي !!!

الأحد، 29 يناير 2017

معرض الكتاب ٢٠١٧

بعد زياره خاطفه انبارح لمعرض الكتاب 
برافو وزاره الثقافه والهئه العامه للمعارض 
- مكتبه الاسره كتب قيمه جدا جدا متوسط الكتاب ٥ جنيه انا اشتريت بتاع ١٠  كتب ب ٤١ جندي اه والله 

- المركز القومي للترجمه عنده روائع في كتب عليها خصم ٩٠℅ ومش سكه والله ، الطلبه اي كارنيه خصم ٥٠℅ العادي خصم ٣٠℅ ، قبلوا كارنيه الجامعه الامريكيه 

- الهيئه العامه للكتاب عندها خيمتين واحده متوسط الاسعار قبل الخصم ٢٠:٣٠ جنيه والتانيه كله من جنيه ل ٥ بالصلاه عالنبي !!!! 

دي كانت البدايه قبل اللقط ما تخلص ، البقيه تاتي 

لينا زياره ان شاء الله لدور الهلال ، المعارف، الاهرام، الاخبار، مكتبه مصر اللي برضو عندهم كتب كويسه جدا بس كنت تعبت 

لاول مره من ساعه الثوره يسمحوا بدخول العربيات ورتب واقفه بتنظم جوه وبره 

جروب عم امين السنه دي معاهم تابلت وارشادات واقيه جدا للاتجاهات 

ما جيتش جنب الشروق ولا السور عشان دي سكه اللي يروح ما يرجعش ، سايباهم للاخر عشان الفلسان بس 

دي حصيله انبارح وربنا يقدرنا على قرايتهم

يقال إن دار الاوبرا عامله مكتبه صوتيه ، ندور عليها لانها اكيد حتستحق الزياره 

التحفظ الوحيد مصلى السيدات اتكسر وفارشين حصر في الشارع ، عيب والله نبوظ الجمال ده بس شكلهم دخلوه عند الرجاله الله اعلم ، كان يجب الانتهاء من انشاءات الكوبري الجديد لان المعرض مع الكوبري عاملين قفله 

بس نستحمل بقه


الجمعة، 27 يناير 2017

عيد ميلاد سعيد يا بلوجي العزيز (٣)

زي دلوقتي من ثلاث سنوات بالظبط اعدت فتح البلوج القديم وزي ما حكيت قبل كده مسحت كل البوستات القديمه وبدأت من اول وجديد 

٢٠١٦ شهدت تغيير في الكيف وليس الكم 
ما زلت كسوله بالرغم من وجود لسته طوييييله بالمواضيع اللي عايزه اكتبها اوحتى كتبتها بس كسلانه انشرها ؟!!!

ما زلت باكتب حاجات بنفسي وما انشرهاش او حتى انشرها بدون اسم في صفحات تانيه كمساحه اكبر للحريه بدون حكم او تفسيرات غلط لسبب كتابتها 
امتى حتتنشر هنا الله اعلم 

لكن كيفا المحتوى السنه دي كان اكثر ثراء من حيث ريفيوهات بعض الكتب او الحفلات اللي حضرتها واللي كتبتها من واقع انطباعي او احساسي بالكتاب او العرض وليس بالطريقه المتبعه لكتابه الريفيو لانه مش مكانه ولا البلوج شخصي جدا لذلك كتبتها من وجهه نظر شخصيه بحته 

كان في كمان البوستات القصيييره المسماه خواطر صباحيه عن اي حاجه قابلتها في يومي قبل ٨ الصبح واللي بجد باحبهم جدا 

كما كتبت ٦٠ بوست او بمعنى اصح نششششرت ٦٠ بوست بس هنا اتمنى في يوم انشر الكل واللي يحصل يحصل !!!

بلوج الفيسبوك مازال الاقوى من بلوجر والأسهل والاظرف الا اني مازلت بانشر في الاتنين 

مازال عندنا قراء من جنت كتير ما اعرفش حد فيها من العالم كله ازاي ما اعرفش 

ما زال عدد القراء بالمجهود الشخصي وليس بإعلانات وده بالنسبه لي كفايه جدااا

سنه سعيده علينا يا بلوجي العزيز ويارب السنه دي من احسن لاحسن وتفضلي متنفسي ومساحتي الشخصيه جدا 

كل سنه واحنا طيبين وبالشاي بالنعناع متكيفين 



الجمعة، 20 يناير 2017

من انت


في يوم من ذات الايام في طريقي الصبح باقلب فالراديو طلعتلي سعاد حسني وهيه بتغني يا واد يا تقيل 
الاغنيه من النوع المبهج بشده ولانها كتير بتتذاع الصبح المره دي سرحت في زوزو والفيلم وبدايته وهيه بتسال حسين فهمي من انت 
ودي خدتني بره الاغنيه هو كل واحد فينا عندو كام شخصيه وليه 
انا شخصيا عندي مش اقل من سبع تمان شخصيات 
في البيت ستوته البيتوتيه الكنباويه لاقصى درجه وقمه طموحي اوضه مرتبه ريحتها حلوه وكوبايه شاي رايقه وكتاب او فيلم لطيف واندفس تحت البطانيه في الشتا 

على النقيض بقه لو في خروجه اضرب الجينز والكوتشي وأبرم بالخمستاشر ساعه من غير تعب او ملل

في الشغل قطر وباحب ارتب يومي وشغلي وباكره المفاجات 

في حين اني باموت في العادي في اي مفاجاه حتى لو شمعدان احمر او كتاكيتو

مع اللي ما بعرفنيش ممكن يخاف او يكش مني واحيانا ممكن يعتبروني انطوائيه او قليطه 

اما مع صحابي محطه رغي ودعم ومسانده

ممكن اقلب الدنيا في السوبرماركت لو حد خد دوري في الطابور في حين أن في الشارع ممكن كل الناس تعديني واستنى حد لسه ما نزلش من بينهم عشان يعدي قبل ما اخرج بعربيتي 

لا اطيق الزحام ولا الصخب بس لو حته مزيكا حلوه ممكن جدا اقفل شبابيك عربيتي واشغل الكاسيت على اعلى حاجه واغني معاه ولا يهمني 

على قد ما مكتبي منظم جدا على قد ما دواليب هدومي فوق بعضها 
تقدروا تقولوا عليه فعلا كل حاجه وعكسها واحيانا كتير باكون غير متوقعه ممكن جدا اضحك وادمع واصرخ في نفس ذات اللحظه 

واوصل شغلي وتخلص يا واد يا تقيل ولسه سؤال سعاد لحسين مالوش اجابه " من انت"
بس بشويه تركيز اكتشف اني كل دول مضروبين في الخلاط لاني ببساطه مجرد انسان !!!