عيد سعيد يا بلوجي العزيز

٢٥ يناير بقالها تسع سنين !!!

٢٥ يناير ٢٠١١ سمعنا عن مظاهرات يوم عيد الشرطه ، ابويا خاف علينا مانزلتش الشغل ( كان يوم اربعاء اظن والشركه قالت خدوه الخميس عشان تبقى لونج ويكاند ) 

المهم خدت اليوم وعدى تمام ومكناس نعرف أن التلفزيون المصري مش ناقل كل حاجه وعادي بقه  وخدت الخميس مع الباقيين 

اللي خلانا نركز بقه يوم الجمعه ٢٧ يناير ، في فجأه مفيش تيلفونات فجأه مفيش نت ، هو ايه اللي بيجرا، فجأه حظر تجول وال١٨ يوم كروا بصراحه 

اعترف اني كنت من المغيبين قبل الثوره، هو ايه اللي الناس في التحرير عايزاه ، روحوا بقه، كفايه خراب وكلمتين من دول 

الحقيقه ٢٥ يناير نقطه فاصله في تاريخ جيلنا ، حاجه كده شبه ٦٧ ايام اهالينا مع الفارق طبعا ، نقطه تغير منظور الأشخاص للأمور والأحداث 

فجأه الواحد بقى يقرا ويسمع للرأي الآخر ويدور في كل وجهات النظر وما يسمعش لمصدر واحد 

فجاه قرينا الدستور ونزلنا انتخابات 

فجاه سهرنا نبحث وندور ليله انتخابات مجلس الشعب 

فجأه بقينا بنتكلم ونناقش 

مش حنتكلم في الوكسه اللي حصلت بعد كده ولا سده النفس والإحباط العام ولا اي حاجه حصلت صح بقه او غلط مش موضوعنا دلوقتي لكن في نسبه كبيره وانا منهم فجاه اتغيرت وجهه نظرها 

اعتقد دي لوحدها كفايه بغض النظر عن النتائج ويمكن دول في يوم من الايام يغيروا الطريقه اللي حيربوا بيها ولادهم ويطلع جيل مختلف يمكن يقدر يغير اي حاجه 

٢٥ يناير هو يوم فاصل وبس في تاريخ جيلنا يوم مختلف وخلاص تتفق أو تختلف معاه بس هو يوم من اللي بيعملوا paradigm shift أو تغيير في وجهه النظر 

٢٥ يناير سلام على أرواح الطيبين اللي كانوا اطهر من أنهم يكملوا على الأرض 

معرض الكتاب، بلاستيك

هي زياره سنويه اعتبرها اجمل يوم في السنه 

في البدايات كنت بالوش حبه هنا على حبه من هناك وبعدين منتديات القراءه بدأت اجمع منها لسته المعرض على مدار السنه 

وبعدين بدأت اقلل الروايات وادخل الكتب 

أكاد ادعي اني ليه حاسه سادسه من عناوين الكتب ، لا باقف افر الكتاب ولا اقرا ملخصه في الاخر ، اسم الكاتب ، العنوان ودار النشر وخلاص 

صحيح اوقات باقع في كتب ممله بس في الأغلب الاعم الحمد لله باختصار كتب لطيفه 

المعرض الجديد : السنه اللي فاتت كان ليه ظروف صحيه خلتني بادوخ واقع فرحته زياره سريعه جدا اقتصرت على هيئه الكتاب والمركز القومي للترجمه ساعتين زمن ومشيت ، مالحقتش اكون عنه فكره نهائي 

السنه دي تعتبر أول انطباع ، مكان شيك ، بيلمع ،

فيه اماكن ادميه الحمامات ، الصلاه ، الكافتريات ، اسلوب العرض، التكييف 

بمقايس النجوم اديله خمس نجوم 

ولكن ، مفيش روح ، حقيقي بلاستيك جدا زي حاجات كتير قوي في حياتنا 

قبل ما اروح نزلت الابليكاشن ، اه عملوا له ابليكشن وحددت القاعات والاماكن وحاجه اخر جمال بس حتتغير كل سنه زي ما اتغيرت عن السنه اللي فاتت !!! يا جدعان خلونا نكون ذاكره مكانيه للمعرض ونربطه ببعضه كده زي القديم 

وتمشي فيه ، الناس بتتصور مع النافوره والمباني ،ىفين روح المعرض ؟ فين الخيم اللي اتربينا عليها ؟ فين اول ما تدخل من باب الاستاد تلاقي مدبولي عاليمين ،الشروق ومصر عالشمال ومعاهم الجامعه الامريكيه ؟ كمل حتلاقي نهضه مصر عاليمين وبعدين شارع يقطعك بالعرض ، خش يمين في شمال حتلاقي مكتبه الاسره عالناصيه وفي اخر الشارع الجامع 

كمل الناصيه التانيه للأخر حتلاقي السور والمركز القومي للترجمه 

ارجع للشارع اللي بالعرض خشه يمين حتلاقي خيم الاهرام والاخبار والهلال وقبلهم الخيم الثقافيه 

يا جدعان احنا حفظناه واتربينا فيه وكنا بنمشي مغمضين فيه 

ايه المعرض ابو ابليكشن ومن غير روح ده 

ايه المعرض اللي في الهو ده  وماله مبعزق ومترامي القاعات كده وكل قاعه ملحق بيها مول ، مول في معرض الكتاب ياجدغان قولوا كلام غير ده !!! 

لو رحت بعربيتك تتبهدل في الركنه ولو رحت مواصلات اقعد استنى بقه 

يعني لو موظف بسيط يروح بولاده ازاي وبكام ؟ الناس اللي بتتشتري كتب السنه كلها تطلع بيها الاتوبيس في الهو ازاي ؟ هو احنا اصلا ليه اتوبيساتنا سلالمها عاليه كده وغير مناسبه لذوي الاحتياجات الخاصه او حد جارر شنطه ؟ ايه الفكره في التلات درجات كل واحده نص متر دي ؟ وفي الاخر تقولي اصلنا عملنا له مواصلات ؟! 

ارمي المعرض في الهو لمعارض عقاريه ولا معارض عربيات ولا اي حاجه لاي حد غير عامه الشعب اللي بيحوش تمن الكتب من السنه للسنه 

يعني الراجل اللي واقف جنبي بأربع بنات ده يركب رايح راجع بكام ولا لو حب يريح بناته ويصونهم وياخد تاكسي ، حيدفع كام ؟ ده محطه المترو في المعرض القديم كانت بتحل ازمه والله 

احلى وأعظم خبر موظف في هيئه الكتاب قاله امبارح ، أنه حيرجع ارض المعارض السنه الجايه وده كان أهم خبر سمعته وابتسمت من الودن دي للودن دي على الله يكون صحيح 

أما لو كان اي كلام معرفش بعد كام سنه حاكون نسيت المعرض القديم وتعايشت مع الجديد ولا ايه 

ولا انا باقاوم التغيير 

انا عايزه المعرض ابو روح مش البلاستيك دهههووون 

حبيبتي من تخون

خماسيه من نصيبي وقسمتك 

ولاني شخص مش غاوي تلفزيون باتفرج عليها لاول مره 

باختصار شيري بنت جد ، بنت من تلاته تربيه صحفي ومثقف وعلى حد تعبيره انا ربيت رجاله ، لما مراته استغربت موافقته أن بنته التانيه وبنت أخوه قرروا يعملوا نصبه اكل في الشارع 

شيري تتخطب لرجل أعمال مقطع السمكه وديلها وليله كتب الكتاب ينتشر عالفيسبوك فيديو فاضح ليها 

وتتراوح ردود الفعل بين الشماته، الاستغراب، الشك بمافيهم جوزها 

لكن الاجمل والاروع على الاطلاق هو رد فعل الاب اللي حتى ما شكش وماحاولش يتهمها أو يسألها لانه عارف بنته قبل تربيته 

البنت اللي ابوها يقف في ضهرها محدش بكسرها والعكس صحيح 

جوزها بقه اخوها اختها أو حتى امها ، كله بلح 

معرفش الخماسيه حتخلص على ايه بس الحلقه كانت حقيقي تجنن ومحدش يحرقها معرفش حلاقيها عالنت ولا مضطره استنى باقيته ليوم الخميس 

أن غدا لناظره قريب 

العروسه لاحسه المغرفه

مروحه في المطره ومشغله فيروز وماشيه على أقل من مهلي 

يطلع لي من الزحمه عربيه عروسه متزوقه دانتيل وبوكيه ورد كان شكله حلو إلا أن المطره لحوست الدانتيل وبوظت الورد

شويه ووقفت بسيب ونش بيطلع عفش عروسه وتحت ذات نفس العماره كوافير خارجه منه عروسه مكلفتينها في خيمه وتقريبا مشلحين الفستان عشان ما يبوظوش من المطره 

اول ما تبادر لذهني هو المثل الشهير بتاع العروسه لاحسه المغرفه وهو ما يطلق عن أي عروسه الدنيا تمطر يوم فرحها قال ايه وهيه صغيره لحست مغرفه ( كانو عاملين كيكه ولا رز بلبن ولا مهلبيه ولا تورته وهيه لحست اخر جزء من المغرفه أو الحله ) 

بس سؤال يعني هو مين فينا ماعملش الحركه دي اصلا وهو كبير مش بس وهو صغير ؟! العروسه ما لحستش المغرفه هيه بس قررت تتجوز يوم واحد طوبه !!!
بس نفس المثل برضو بيقول طوبه مابلت ولا عرقوبه ؟! تفتكروا فعلا تكون فعلا العروسه لاحسه المغرفه؟!
هزيت دماغي كده نفضت الفكره ورجعت لفيروز وهيه بتقول اخر ايام الصيفيه !!!

٣١ ديسمبر ٢٠١٩

طلعت في دماغي اروح سيوه ، مشوار ظريف جدا جدا ركبنا ٣٠ ديسمبر ١٠ بالليل وصلنا ٣١ ديسمبر ١٠ الصبح 

ننام ونصحى، ونصحى وننام والسكه طوييييله 

المهم وصلنا وادونا راحه للنوم ل ٣ العصر 

صحينا ونزلنا اول المزارات جزيره فطناس في وسط الواحه والنخل والعيون الرومانيه وحضرت اخر غروب في ٢٠١٩ وسط الميه والنخل والهوا البارد بشده وحواديت عن الواحه واغانيها وتراثه

بعدين طلعنا عالصحراء بعربيات جيب وكانت بروڤه على صغنن للسفاري وسط الصحراء بالليل 

كنا في هلال اول الشهر والنجوم تجنن ، البدو مزوقين الجبل بالشموع على مصاطب واشكال في منتهى الجمال ومتنطوره عشان تنور السكه عشان محدش يتكعبل لكن مكناش شايفين كفوفنا حتى 

بدانا بخروج الفراخ المردومه وهيه بتتحط في براميل تحتها فحم وفوقها حطب وتستوي عالرايق قوي جدا ، طول عمرنا كنا بناكلها في السعوديه بس بيسموها مندي مع اختلاف التتبيله بس هيه نفس الفكره ، كنت اول مره اشوف خروجها من الرمل 

ولأننا كنا تقريبا مكلناش لمده ١٢ ساعه الاكل اتحط عالترابيزات مفيش كان خلص 

كانت طبالي مستطيله كبيره والناس قعدت داير داير عالارض ، من كتر ما كنا جعانين محدش صور !!! 

خلصنا فقره الاكل في الخيمه خرجنا على راكيه نار قعدنا حواليها 

شخصيا كنت لابسه ٣ بلوزات فوقهم سويتشيرت، صديري فرو فوقه جاكت ، كوفيه، ايسكاب، جوانتي تلج ، ثيرمال ، شرابات صوف، قاعده في سليبنج باج وسقعانه 

الخلفيه كانت اغاني بدوي وشاي حطب بس حقيقي كنا تعبانين جدا 

كنا مستنين نص الليل عشان نطير منطادات صغننه وفايروركس بس الواحد كان مش مسنحمل من البرد والتعب 

نمت على شنطتي ووشي للسماء ماهو الدنيا ضلمه اصلا ومحدش شايف حد ، المنظر بديع في غياب القمر والنجوم ومجاميعها كانت رائعه ، ناس طلعوا ابليكاشن موبيل وقعدوا يشوفوا اساميها ، انا اكتفيت بالتركيز فيها 

حاجات تنور قوي وتنطفي ، حاجات تنور بس ، حاجات تتحرك حركات بسيطه 

معرفش ده تأثير التعب ولا دخان النار عمل تهيؤات ولا انا كنت نائمه ، الله اعلم 

غفلت لحظات وبعدين فجاه ناس قرروا يمشوا ولقيت عربيه ترجعني الفندق نطيت فيها 

مع أن كان فاضل تلت ساعه ويبدأ الشو بتاع المنطادات الصغيره والفايروركس بس ما قدرتش تعب، إجهاد ، ولا خفت المنطاد ما يطيرش أو يحرقني الله اعلم 

كنت سايبه التكييف سخن في الاوضه وفي لحظه كنت مغيره وفي سابع نومه 

وكالعاده استقبلت السنه الجديده في جزيره القطن بس المره دي في وسط الصحراء