سكك حديد مصر : سيادتك حتتبهدل معانا !

كتب محمود جبريل:

سكك حديد مصر يعني قطر يعمل حادثة الساعة 6 الصبح و يتقلب و معدات حربية تقع و القضبان تبوظ و مع ذلك يطلعوا قطر القاهرة بتاع الساعة 8 اللي على نفس الخط بالرغم من ان الحادثة لسة ماتشالتش

سكك حديد مصر يعني تفضل مستني ساعة في القطر بينك و بين م...حطة دمنهور حاجة بسيطة و السكة مفيهاش حاجة و يسيبوا الناس تنزل على الطريق نط من القطر علشان يركبوا

سكك حديد مصر يعني توصل المحطة و تسأل ناظر المحطة اللي هو عارف الدنيا تقله القطر هيرجع القاهرة ولا هيكمل على اسكندرية و في خلال قد ايه ... يقلك استنى ساعتين على مالتعليمات ما تجيلنا ... ساعتين علشان التعليمات توصل المحطة

سكك حديد مصر يعني تسأل عمال القطر في ايه يقلولك منعرفش و تدخل تعرف الخبر من على النت و العمال ميعرفوش

سكك حديد مصر يعني تبقى مسافر الساعة8 علشان عندك اجتماع في اسكدرية الساعة 11 فمتوصلش اساسا و تولع مواعيد الناس

سكك حديد مصر يعني الناس تبقى شارية تذاكر ب50 جنيه رايح و زيهم جاي و التذكرة تروح عليك

#سكك_حديد_مصر=سيادتك_حتتبهدل_معانا

هو وهيه والناس الحشريه

لما تقعدي مع صاحباتك البنات في قعده بناتي وبالذات لو واحده داخله على جواز ولا في حفله حنه ولا حاجه كده تلاقي النصايح العظيمه رايحه جايه يمين وشمال كانها صواريخ أرض ارض وتبقي عايزه تاخدي لك ساتر وخصوصا لو القعده فيها طنط حشريه او صاحبتكم اللي اتجوزت من وانتم في الكليه أو حد قدم شويتين في الجواز بيتحولوا لارشانات معرفش ازاي . وتبدا النصايح من نوعيه " إبنك على ما تربيه و جوزك على ماتعوديه"

·        شوفي يا حبيبتي اوعي تعملي فيها ست الستوته الشطوره اصلك لو عودتيه ان كل حاجه تعمليها بنفسك حيطلع عينك ومش حيرضى يجيبلك شغاله

·        اوعي تعرفيه انك بتعرفي تكوي , خلي المكوه تخصصه ولا يودي لمكوجي بلاش هده حيل  

·        العشا وجبه ملغيه عايز يتعشى يقوم يدلعك ويعمل هو العشا

·        السوق شغلته ااه هو انت حتلاحقي منين ولا فين

·        كلمه السر " عند ماما كنا بنعمل .... اصل بابا كان معودني....." تقومي تنحرريه يعمل لك اللي انت عايزاه

·        مش لازم تطبخي كل يوم , الميه اتقطعت, جيت مالشغل تعبانه ..... يجيب اكل وهو جاي

 الناحيه التانيه بقه لو انت البت العشريه اللي الولاد في الشغل معتبرينها واحد صاحبهم أو لو بالصدفه في كانتين الشركه قعدتي قريب من ترابيزه كلهاولاد حتسمعي بعض من الاتي:

·        ادبح لها القطه , وريها العين الحمرا

·        مش لازم تسمع كلامها

·        شاوروهن وخالفوهن

·        بلاش تعرفها مرتبك

·        سد نفسها اول باول عشان ما تفوقش عليك

·        اوعى لو جالك مكافئه تعرفها , حتبقى قاعده يا معلم

·        حوش من ورا مراتك

·        يا عم هو في حد بيسمع كلام النسوان

يا عمو وطنط حشريه سيبوهم في حالهم الله يرضى عليكم , اللي يمشي مع حسنين ما يمشيش مع محمدين وصوابعكم مش زي بعضها , وانتي وانت بلاش تدوا ودانكم للناس دي وبلاش حواديت بيوتكم تروح قعدات الصحاب اصله يا حتحسدوا يا حيخربوا عليكم

• ده كده ما اتكلمناش في " مفيش حاجه في السكه" لو لسه متجوزين

• "مش حتخلفوا تاني" لو خلفوا

• "هو العيب من مين " لو ما خلفوش
• "يا اختي هو انت مش عايزه اخ للبنات " لو جابت بنات

• " هو انت مش عايز بنوته تدلعك " لو خلفوا صبيان

• "هو مين السبب" لو اتطلقوا

• " يا اختي هيه البعيده معندهاش دم" لو اتجوزت تاني بعد طلاق او ترمل

وخدوا من ده للصبح !!! الناس دي ما تجيش غير انك تغير الموضوع وتبطل تقعد او ترد عليهم اصلا

عيشوا لنفسكم وللي يرضيكم وبس مش اللي يرضي الناس وارحموا بيوتكم واهاليكم وولادكم من حشره الناس لانها مش حتخلص وعاده اللي عامل او عامله فيها عبده القوي المفتري / المفتريه بيبقوا اساسا واخدين على دماغهم في بيوتهم
ااه والله زمبئولك كده !!!

إحنا اسفين يا ست البنات ويا ست الستات

احنا اسفين كلنا كمجتمع وكأسر وكمشرعين وكناس ساكتين على كل اللي بيحصل

احنا اسفين يا كل بنت أو ست  حد قالها كلمه جرحتها من قريب أو من بعيد وهو فاكر نفسه الواد الكوول الظريف , صدقني يا خايب البنت مهما كانت صغيره بتقدر تميز المجاملة والكلمة المحترمة من التحرش اللفظي

احنا اسفين يا كل بنت أو ست  حد ضايقها بلمسه في شارع او مواصلة إحنا اسفين يا ست البنات اصل حكومتك مش قادره توفر امان في شارع ووسيله نقل محترمه

احنا اسفين يا كل بنت أو ست حاولت توقف حد ضايقها بأي صوره ولقيت الناس في الشارع او المواصلة بتهديها وتقولها محصلش حاجه وبلاش فضايح وإقسام , معلش اصلنا زي النعامه بنحط راسنا في الرمل وكل راجل او ست من دول عامل مش واخد باله ان حد من اهل بيته اكيد حصله وبيحصله وحيحصله كده بس مطنش لانه على الاقل نفسيا مش حيقدر يعملها حاجه

احنا اسفين يا كل بنت أو ست راحت قسم تشتكي اتسلوا عليها أصلهم مش حيعرفوا يجيبولك حقك عشان القوانين عندنا أي كلام فهمه بيعملوا كده دفاع نفسي انهم مش حيعرفوا يعملوا لك حاجه (خليني افترض حسن النيه)

احنا اسفين يا كل بنت أو ست اشتكت لجوزها او اخوها او ابوها من جار او قريب بيضايقها فاتقال لها انت السبب ما هو لبسك او تصرفاتك شجعته ونسي انه رباها او حتى اختارها زوجه لادبها واخلاقها !!! لانه ببساطه مش عارف يعمل لها حاجه فنفسيا بيحملها المسئوليه  

احنا اسفين يا كل بنت أو ست خافت تشكي من رئيس او مدير او استاذ جامعه او مدرس جرحها حتى بنظره مش تمام وخافت على اكل عيشها او دراستها , ما هيه مفيش قوانين في المؤسسات دي تحميكي

يا كل البنات والستات في اوربا الستات بتمشي براحتها وتنزل الانهار عادي بالبكيني وتروح في الشارع بشال او فوطه من غير ما حد يضايقها لانهم ببساطه بلاش بيؤمنوا بالحريه الشخصيه , بس على الاقل عندهم قانون يحميهم كستات ويعاقب اي متحرش

احنا اسفين يا كل بنت أو ست عايشه في هذا المجتمع وصابره وساكته خوف بقه ولا قهر ولا ستر ولا اي سبب تاني

احنا بجد اسفين منك وليكي وعليكي

 

زهره الماليزيه

 

 

كانت بتصلي جنبي في التراويح , المهم بعد النص الاولاني من التراويح  سالتني عن عنوان الدرس فقلتلها , شويه وسالتها انا شايفكي بتقري من المصحف انتي ازاي مش بتتكلمي عربي ؟

فهمت منها انهم في ماليزيا بيعلموا الاطفال في المدارس قرايه العربي حتى لو مش بيتكلموا عربي عشان ياخدوا ثواب قرايه القران وانها بدات تتعلم العربي بس لسه مش قويه قوي فيه  

كاننت مفكراني يابانيه واستغربت اني مصريه على حد قولها اللكنه المصري للانجليزي مميزه ودي مش عندي !! وان ملامحي تدي ياباني قلتلها احنا بنشوف ركن جنوب شرق اسيا ده كله شبه بعض فردت انهم همه كمان بيشوفونا شبه بعض وبدات تقولي الفروق بين الصين واليابان وماليزيا في الشكل طلعت جامده جدا واحنا مش عارفين , بس انا طلعت ياباني يا جدعان !!!

شخصيه عذبه الابتسامه بتتابع القران والشيخ بيقرا بشغف وتركيز مع انها مش فاهمه حاجه خاااااااالص

سالتها ايه اللي جايبك مصر ؟ فقالتلي في الازهر القسم الانجليزي وان الحكومه بتصرف على تعليمها عشان تعلم الناس الاسلام لما ترجع

سنها لايزيد عن 18 سنه بس عايشه في بلد غريبه لوحدها وعندها رساله وهم كبير بتنفيذها , قالتلي ان اختها بتدرس في انجلترا الهندسه فسالتها طب ليه مجتش الازهر هيه كمان , ردت ان البلد محتاجه ده وده وان حال الدين لا يستقيم من غير دنيا كويسه وان العلم بكل انواعه مهم جدا , نظريه ورؤيه مش موجوده عند ناس كتير اكبر منها بكتير

كملنا التراويح والشيخ دعا قوي وهيه مش فاهمه حاجه بس تعرفوا بعد الدعاء لقيتها معيطه اكتر بكتير من اللي فهموا هو قال ايه !!! وفي الاخر سالتني  هو دعى بايه ؟!  

إضحك كركر: أنا والألماني في القطر الألماني

صاحبتكم ايه بقه ضليعة في اللغة الألمانية ,معرفه اي واحد فيكم للياباني بالضبط !!

مره في القطر من بازل (سويسرا ) لفرايبورج(المانيا) زهقت لأني كنت لوحدي المهم ايه قلت انزل اتفرج على الدور اللي تحت في القطر اهه تسليه المهم ايه من باب الفضول ليس اكتر لقيت تواليت القطر , ولان كان ليه ذكريات اليمه في حمام قطر الصعيد وانا رايحه الاقصر (اتحبست فيه الساعة 2 بالليل والعربية كلها نايمه لحد ما بان لي صاحب فتح لي الباب والريحة ايه ما اقولكوش !!!) فقلت اما اقارن بين الاثنين

التواليت وااسع جدا تقريبا بتاع المعاقين يا اما المساحات عندهم ربنا مبارك فيها حاجه كده 2 في 3 مش حمام قطر خالص , المهم ايه بعد استخدامه قلت اشد السيفون وادور يمين وشمال مفيش سيفون . المهم لقيت زرار دست عليه , حاجه كده خليتني احس اني دوست على زرار انا مش عارفه هو ايه فبسرعه لميت هدومي وقمت وفي اقل من لحظه اذ بي اكتشف اني دوست على زرار الطواريئ

اتاريهم عاملين حسابهم لا لاي سبب وانت في بيت الراحه تضطر تنده لحد بره فبدل ما يغمن عليك من غير ما يبان لك صاحب عاملين زرار جنب التواليت للطوارئ يفتح باب التواليت !!! زيييينا بالظبط !!!!

فايه بقه باب التواليت اتفتح وانا لسه جوه والاقيلك القطر كله جاي يلحق اللي بيستغيث !!! المهم واضح ان النظره على وشي كانت كلها هلع لقيت الناس هيه كمان بتضحك قمت دست عليه تاني فالباب اتقفل وانا بقول يا ارض انشقي وابلعيني من الاحراج

شويه وغسلت ايدي ونشفتها وعدلت الاشارب على بال ماللي بره دول ما ينكشحوا ما هيه مش ناقصه كسوف اكتر من كده

وطلعت من التواليت وانا مقرره مالعبش في اي زراير في اي حته انا مش فاهمه معناها ايه !!!!

وكمان ما ادخلش تواليت اي قطر كان مصري ولا الماني !!!

الغربه

يعني ايه غربه؟

هيه الغربه احساس ولا مكان ولا هيه كده بساطه ال غ ر ب ه ؟

الغربه انك تبقى بعيد عن الوطن؟ طب يعني ايه وطن؟

عجبني وصف عمر طاهر للوطن: الوطن هو المكان اللي بتنتهي فيه محاولات الهرب !!!

الهرب؟ من ايه ومن مين وعشان ايه ومين ؟ ولا الهرب لايه وعشان ايه وعشان مين؟

اهرب من فشل في الدراسه ولا من فشل في العمل ولا من قصه حب قديمه ؟ طب لو مفيش ولا فشل في ولا حاجه من دي

طب هو كان في نجاح في اي حاجه من دي؟  

 

 

ولا الغربه هيه الوحده ؟ طب يعني ايه وحده ؟

الوحده هي انك تكون لوحدك ولا وحدك وانت في وسط الناس ؟ ولا لوحدك وسط اقرب الناس ؟

طب همه مين الناس ؟ الاصحاب؟ زمايل الشغل ؟ زمايل الدراسه ؟ اخواتك ؟ ابوك وامك؟ ولا حد مستنيه ومش عارف تلاقيه ؟ وحدك من دون الناس عارفه ومش عارفه

 

عارفه باحساسك ووجدانك , يمكن مش عارف شكله وملامحه بس عارفه , عارف انه اكيد مزاجه زي مزاجك , افكاره زي افكارك , حتى ملامح روحه واحده تمام زي ملامحك

 

مش شايفه ولا عارفه بس عارف انه موجود في مكان ما , في زمان ما وبطريقه ما حتلاقيه وتعرفه وتقعد تتكلم بالساعات معاه كانك عارفه من ميت سنه اصله اتخلق عشانك واتخلقت عشانه

هو نصك التاني لا هو كلك بس في شكل بني ادم تاني

وأرجع , أرجع تاني للمه كنت فيها :" هاه كنا بنقول ايه؟" واضحك واعمل مش واخده بالي !!!

https://www.facebook.com/#!/562451227215431/photos/a.562476710546216.1073741828.562451227215431/563361130457774/?type=1&theater

 

شنطه رمضان

بدات كلمه في قعده من مياده في اوضه ال GMP compliance في المصل واللقاح سنه 2007

وربك لما يريد في نص ساعه كبرت في دماغنا وبدانا نسال حنعملها فين, وازاي حنشتري بالشوال ونعمل الباكنج افتكرت جراج بيتنا وقلتلهم نعملها فيه وطلعنا ورقه وقلم وستات البيوت بداوا يفتكروا نزله الخزين وايه اللي بيشتروه اصناف وكميات.

كان اقصى طموحنا نعمل 50 شنطه , روحت كلمت انكل مدحت الله يرحمه صاحب بابايا المتخصص في الخير قالي كلمه عمري ما نسيتها هيه جر رجل وعمرك ما حتبطليها

لمينا الفلوس من معارفنا واصحابنا واديت الطلبيه لانكل ورحنا جبناها من التجمع من عنده (لجنه مشتريات ساذجه من عشر بنات محتاسين في عد الفلوس وحساب الكميات مش فاكره باين كان 3000 او 4000 جنيه ) المهم روحنا اتغدينا في السريع ونزلنا نعملها كان بابا حط في كل شنطه الاصناف الجاهزه(الزيت والسمنه والصلصه) وقعدنا نعمل الباكنج لباقي الاصناف بعلب الحلاوه !!! مكنش في اي سابق فكره بس والله كانت زي العسل ومخدتش ساعتين زمن

ايامها خاطر كده جالي وقلتلهم وعد نكملها حتى لو مفضيلناش مع بعض سفر بقه جواز شغل جديد ايا كان السبب , مكملتش رمضان وكنت سايبه الهيئه !!!!

سنه عن سنه الناس تغير شغلها والدايره توسع ويبقى لنا مناديب في شركات كتير تعمل ال  fund raising   ونطور في الاصناف ونحط زبيب وجوز هند في سنه , قمر الدين في سنه , وتكبر الشنطه وفرحتنا بيها تكبر اكتر واكتر

سنه عن سنه الكميات تكبر والعدد يزيد ونتعلم اكتر , بعد سنتين قررت اعملها لوحدي من الالف للياء ونزلت عمل مسح للاسعار من كل التجار والموزعين لحد ما وصلت لاحسن سعر اللي لحد دلوقتي بتعامل معاه

سنه عن سنه العدد يكبر والتوزيع يزيد ونبدا نتصل بجمعيات ومعارف ثقه نبعتها معاهم الصعيد ونفرح بردود الناس , مره ايمان حمدي صاحبتي قالتلي ان في ست سابت الشنطه باللي فيها وصحت ولادها من النوم وهيه بتعيط وتقولهم قوموا يا ولاد جالنا لفه قمر الدين عمري ما نسيتها قوي الكلمه دي

سنه عن سنه جروب الفيسبوك يكبر ويتملي events وصور وردود المجموعه

السنه اللي فاتت عملناها قبل 30 يونيو بيومين وبابايا كان خايف جدا من المظاهرات وان الناس ما تجيش بس دخلت قلت عايزينها ولا ناجلها واللي حيجي يكون ملتزم بكلمته لاني مش عايزه اجيب الحاجه وما الاقبش حد يجي في ظرف نص ساعه 30 واحد عملوا confirm بالمجي وجه اكتر من 80 واحد من 8 الصبح والله على اذان الظهر كنا مخلصين 3 طن رز !!!!

والله اوقات بحس ان الملايكه بتعملها معانا ومعرفش بتخلص ازاي !!!

السنه دي الحمد لله السنه التامنه وربنا يديمها علينا يا رب ويفتح علينا كمان وكمان

ويفضل التيم الاولاني دائما في القلب : مياده سمير (صاحبه الفكره), داليا طلعت, مي صفوت, منى حفناوي, وسام محمد , داليا صفوت,سالي حبيب, داليا أحمد والعبد الفقير الى الله ويا رب ما اكون نسيت حد فيكم

التيم الاحدث : رادا رضا, ايمان حمدي , شريهان ,مها سامي , محمود جبريل, عمر مرسي , ريهام مرسي , ايمان حسين ويا رب ما اكون نسيت حد فيكم

اصحاب المكان الجديد بعد التوسعات : علاء الدين وياسر اصحاب اخويا

ربنا يديم المعروف ويخليكم ليه كلكم واللي من غيركم بعد ربنا ما نعرف نعمل حاجه
 والله ده احلى يوم في السنه بالنسبه لي

لينك الجروب علي الفيسبوك حتلاقوا عليه الevents والصور من يوم ما بدانا

https://www.facebook.com/#!/groups/103056673078491/