بحيره البجع

من شهر بالظبط نزلت حفله بحيره البجع وروحت حجزت تاني يوم , ولمده 30 يوم في انتظار هذا اليوم العظيم

لبست واتشيكت ونزلت وشغلت ثومه في الطريق , ودخلت المسرح الكبير واللي مكاني كان مميز جدا لاني حجزت بدري

ويطفوا النور ويبدا الابهار : الامير اللعبي وشله الانس بتاعته في مشهد عبثي جدا ثم تظهر الملكه ويتم فيه تتويجه رسميا وبعدين رجله تاخده للغابه وهناك يقابل بنت جميله بترقص لوحدها واول ما تشوفه تتخض وترجع بسرعه لانها مسحوره ومش المفروض حد يشوفها بصورتها الانسانيه

تستمر لوحات راقصه غاااايه في الجمال وهيه كريزه العرض بجد ومجاميع من 24 بنت في منتهى الجمال والرشاقه

الفصل التالت حفله تتويج الامير اللي المقصود منها اختيار عروسته واللي بجد ضحكتني جدا , هو ايام تشايكوفسكي سنه 1877 كان فيه جواز صالونات !!! وبنات رايحه وبنات جايه وهو مبوز للملكه الام وساب الحفله !! وبعدين الساحر يرجع ببنته اللي خلاها شبه البجعه البيضاء عشان يوقع الامير في حبها وبالتالي تفضل البجعه بتاعتنا مسحوره للابد

وهنا البجعه السوداء تتفنن في اغواء الامير لحد ما فعلا يقع في حبها ويتحايل على امه توافق عليها وهيه كحماه تزغر له وتزغر لها !!! بس في الاخر يتقدم لها وهنا تظهر البجعه البيضاء من الشباك فيتصدم ويفهم المقلب اللي اتعمل فيه ويجري عالغابه زي المجنون والملكه الام تنهار وينتهي المشهد بدراما عنيفه وتصاعد خرافي للموسيقي

نرجع بعد كده للغابه وهناك البجعات وبجعتنا البيضاء بيرقصوا بمنتهى الحزن والساحر في منتهى السعاده , والرقص من وراء شاشه سوداء عشان يوصلك احساس الحزن بتاعهم وبعدين الامير يقتل الساحر وبالتالي ينفك السحر عن كل البجعات ويخلص العرض

العرض مبهر بجد موسيقى ورقصات وديكورات واحساس الممثلين عاالي جدا , تفاصيل ضغننه زي ريش البجع اللي كل شويه يترمي من فوق المسرح او سبوتات الاضاءه او صوت رجلين المجاميع واصوات فساتينهم كفيله باسعادك بشده وكانهم ماسكين وتر وبيعزفوا على قلبك

حضرت باليه كساره البندق قبل كده وحسيت اني اتكروت بس النهارده الجرعه مظبوطه وتعدل الدماغ العرض تلات ساعات من الجمال والابهار

كان جنبي من الشمال راقصتين باليه سابقتين ودول بقه كانوا بيتفرجوا بعين الخبير والهفوه ما فاتتهمش , وعلى النقيض اللي جنبي على اليمين كان pacemaker  التسقيف في المسرح واللي سقفته كانت بتبدا تسقيف طويل لكل المسرح, انا بقه في النص زحلقت نفسي في الكرسي وسندت راسي على الظهر ودخلت معاهم في كل تفاصيلهم ونسيت كل اللي حواليه الا لما البنوته اللي قدامي تندمج وتقلدهم وترفع ايدها وترقص زيهم !!!

ويخلص العرض واخرج الاقي القمر بدر والنجوم بتلمع والشوارع فاضيه اشغل مزيكا هاديه واسوق في وسط البلد بجمالها وهيه فاضيه وينتهي يوم من اجمل ايامي 

ذات 2016

حكت ليه واحده صاحبتي عن اختها اللي بتشتغل ليل نهار واللي كمان في بيتهم قاعده عالسفره باللابتوب وازاي سمعت جوز اختها بيقول لولادهم يعني اقوم اكسر اللابتوب ده واخلص؟

بتقولي حسيت انها بقت شبه ذات مع الفارق انها استبدلت مكنه الخياطه بالابتوب وان الاخ عبدو جوز ذات هو هو قاعد مع العيال وبدل ما حيكسر المكنه حيكسر اللابتوب !!

قلتلها تصدقي صعبت عليه لانها يا عيني مطحونه جوه وبره ومش متقدره لا جوه ولا بره

وقلتلها تصدقي احنا جيل مظلووووم قوي وانضحك عليه واسيء استخدام طموحه , يعني زغللوا عيننا بفكره الاستقلال والطموح والكارير من ناحيه ومن ناحيه تانيه ربوا الصبيان نفس تربيه جدودهم مش حتى ابائهم لان عالاقل ابائهم كانوا بيقدروا امهاتهم ويساعدوهم, اما جيلنا لا حصل عنب الشام ولا بلح اليمن لا ستات ولا رجاله فكانت النتيجه ستات مطحونه جوه وبره ومن كتر الضغط تحولوا لجنس تالت لا انوثه جداتهم ولا جد امهاتهم , مره صديق شبه جيلنا بالقنفد يقولك البنت من دول تتشنج كده وتقنفد وما تفهمش هيه قلبت كده ليه !!! الحق معاه حق و في كلامه شيء كبير من الصحه

وساعه ما تفكر بس تظهر انوثتها تتهم بالميوعه وانها بتشجع الرجاله يضايقوها في الشارع بقه , في الشغل فترجع تاني "تقنفد"

المصيبه بقه انها كمان مش عاجبه وانها لو فرضنا حتتجوز يعني وان سبع البرومبه ممكن يقبل بواحده مستقله ماديا ومتعلمه ,  اعتقد ممكن جدا بسرعه تتطلق لان برضو سي عبدو مش حيحب انها عندها كيان واستقلال مادي حتى لو بتساعده في البيت والمسؤوليه وانه وقت ما يتزنق ممكن جدا يخيرها بين حياتها معاه وبين شغلها والحقيقه ده بيكون اختيار ظااالم جدا ليه وليها واي من الاختيارين غير محمود العواقب

يعني لو اختارت جناب سعادته ممكن جدا جدا برضو يقلب عليها ولا يزهقها في حياتها او عالاقل مستواهم المادي حيتاثر

ولو اختارت شغلها لان سي عبدو مش مضمون وايدها منه للارض حتشرد العيال

بجد بجد ذات مظلومه من اول الزمن لاخره

قاموس الست هنيه في شرح الشهور القبطيه

الشهور القبطيه هيه شهور من ايام الفراعنه وحتى منسوبه ليهم , دايما نسمع المصريين يتكلموا عن طوبه وامشير وشده البرد فيهم بس في شهور تانيه كتير محدش يعرفهم

عاده الفلاح المصري ربط الشهور القبطيه بالزراعه واحداث يومه وحياته , واللي بالصدفه مثلا عرفت انهم بيدرسوها في كليه الزراعه عشان المهندسين الزراعيين يعرفوا يتعاملوا مع الفلاحين

بعضها مضحك وبعضها غريب او حتى مش مفهوم , جمعتها من كذا منتدى وموقع ويا رب تعجبكم وكل مره تسمعوا فيها مثل ترجعوا لمعجم الست هنيه في شرح الشهور القبطيه

انجوي :

تـــــــــــــوت  (سبتمبر , اكتوبر) (اله الحكمه والمعرفه عند الفراعنه)
"توت ري ولا تفوت" : أي الفلاح الذي لا يستطيع أن يروي أرضه هذا الشهر لا يستفيد من زراعتها.

"توت يقول للحر موت" نسبة إلى انكسار نسبة الحرارة في هذا الشهر.
 "توت حاوي توت" أي أن الحاوي يتكلم بالعلم والمعرفة بلسان الإله توت
«في توت لا تدع الفرصة تفوت»

بابــــــــــــه (اكتوبر , نوفمبر) (شهر حابي اله النيل عند الفراعنه)
بابه خش واقفل الدرابة : أي الطاقة (النافذه الضيقة في البيوت الريفية) اتقاء للبرد في هذا الشهر.
"إن صح زرع بابه يغلب النهابة، وإن خاب زرع بابه ما يجيبش ولا لبابه" أي أن كثرة المحصول في بابة مربحة مهما انتهب منها.

هاتـــــــــــور : (نوفمبر , ديسمبر) (حتحور اله الخصب والنماء عند الفراعنه)

هاتور أبو الدهب منثور يقصد القمح.
إن فاتك هاتور اصبر لما السنة تدور.


كيهــــــــــك (ديسمبر, يناير) (شهر كا هاكا، أي شهر اجتماع الروح كا.)
كياك صباحك مساك، شيل يدك من غداك، وحطها في عشاك , إشارة إلى قصر النهار في هذا الشهر وطول الليل.

"البهايم اللى متشبعش فى كياك ادعى عليها بالهلاك".

طوبـــــــــــة (يناير, فبراير) (شهر الطوب والتطويب : اعداد الارض للزراعه)
طوبة بيخلي العجوزة كركوبة: شديد البروده  

طوبه يالي ما بلت ولا عرقوبه : لا يوجد امطار

"طوبه تخلي الصبية جلدة والعجوزة قردة".

"طوبه تزيد الشمس طوبة".

طوبه , طبطب, طباطب : ويقسم الفلاح المصري طوبة من حيث الطقس إلى ثلاثة أجزاء (طوبة) العشرة أيام الأولى من الشهر حيث يشتد البرد، و(طبطب) حيث البرد الذى يجعل الإنسان يطبطب أي يرتعش، والعشرة أيام الأخيرة (طباطب) أي تقلب الجو من الصحو إلى الممطر.


أمشــــــــير (فبراير, مارس)( اله الريح والزوابع: مشير)
أمشير أبو الزعابير الكتير ياخد العجوزة ويطير.

الاسم طوبه والفعل لامشير

"امشير يقول لبرمهات عشرة منى خد وعشرة منك هات نطير العجوز بين السفكات"

مشير, مشرشر, شراشر : مشير) ويقال لها عشرة الغنامى (الراعى) حيث ينخدع الراعى بالدفء.
مشرشر: أو عشرة الماعز حيث يعود البرد للاشتداد ويكثر هبوب الريح وسقوط المطر وتنفق الماعز من شدة البرد.
شراشر: ويطلق عليه عشرة العجوز حيث تبدأ العجائز في الحركة بعد ظهور الدفء.


برمهــــــــات (مارس, ابريل) (نسبه لفرعون امنحات)
برمهات روح الغيط وهات.
"برمهات روح الغيط وهات قمحات وعدسات وبصلات".

برمــــــــودة (ابريل, مايو) (رنودة) إلهة الحصاد.)
برمودة دق العامودة: أي دق سنابل القمح بعد نضجها.


بشنس (مايو, يونيو) (الإله (خونسو) إله القمر وابن الإله آمون، وفيه تدرس المحاصيل.)
بشنس يكنس الغيط كنس: لأنه لم يبقى في الغيط شيء

«فى بشنس خلى بالك من الشمس»


بؤونـــــــــــه (يونيو, يوليو) (با اونى، أو وادي الحجارة نسبة إلى (وادى الملوك) الشهير بالقرنة بالأقصر.)
بؤونه نقل وتخزين المونة : أي المؤنة للاحتفاظ بها بقية العام،
 بؤونة الحجر" لارتفاع الحرارة فيه.

"بؤونة تكتر فيه الحرارة الملعونة"

أبيـــــــــــب (يوليو, اغسطس) (أبيب أو هوبا أو حابى إله النيل).
أبيب فيه العنب يطيب.
أبيب مية النيل فيه تريب نسبة إلى الفيضان.

"ابيب طباخ العنب و الزبيب"
"ان كلت ملوخية فى أبيب هات لبطنك طبيب"


مســـــــرى (اغسطس, سبتمبر) (سى رى نسبة إلى إله الشمس رع)
مسرى تجرى فيه كل ترعة عسرة : وتزداد مياه الفيضان فتغمر الارض.

"عنب مسرى إن فاتك متلقاش ولا كسرة"، حث على الإسراع في زراعة الذرة

يقول القلقشندي في كتابه "صبح الأعشى في صناعة الانشا" على لسان أحد الرحالة "عرفت أكثر المعمور من الأرض، فلم أر مثل ما بمصر من ماء طوبة، ولبن أمشير، وخروب برمهات، وورد برمودة، ونبق بشنس، وتين بؤونة، وعسل أبيب، وعنب مسرى، ورطب توت، ورمان بابة، وموز هاتور، وسمك كيك.