معالي وزيره السعاده

في قعده تهييس بناتي جت سيره معالي وزيره السعاده الاماراتيه وبدانا نتساءل عن دورها والاهداف المرجوه منها فكان الرد ببساطه تشوف الناس عايزه ايه وتعمله وهنا بدا الحوار الشيق اللي استاذنتهم اشارككم فيه

ردت واحده قالت يعني تعمل اي حاجه تفرح الناس , قلتلها زي ايه قالتلي مثلا لو واحده تخينه تخليها تخس ولو واحده رفيع تخليها تتخن

ردت واحده تانيه او تمنع الحاجات اللي تزعل الناس , فقلنا لها زي ايه ردت بكوميديا : يعني لو جاره غسيلها بينقط على اللي تحتها تمنعها او تركب لهم تنده !!!!

وبعدين قلتلهم خليكم جد بقه انتم ايه اللي يسعدكم؟ فاتفقنا ان السعاده شيء نسبي يختلف من فرد لفرد ومن سن لسن ومن ظرف لظرف

واحده قالت الفلوس , قلنالها مش شرط ردت ان الفلوس وسيله وليست غايه يعني حيبقى عندي فلوس الف الدنيا واعمل اللي عايزاه , اعمل مثلا استثمار بره واخد بيه الجنسيه لاي بلد سالناها فين وكام قالت 2 مليون عشان اروح انجلترا (200 الف استرليني) بس مش عارفه حنلحق فرق العمله ولا لاه !!

حد تاني قالت  الاحساس بالامان في البيت والشارع والوظيفه وانك لو حاسس بامان مش حتضايق اللي حواليك في الشارع او الشغل وحتتطمن جوه بيتك وان  السلطه والنظام وتطبيقه حيتنفذوا وده في حد ذاته حيوجد عدل بين الناس واللي بالتبعيه حيبسط الكل  وان عمر الفلوس ما تجيب السعاده , انا اتفقت معاها ان ممكن اكل في اغلى واشيك مكان مثلا وما انبسطش وعلى النقيض كوز دره في تمشيه يسعدني جدا (فقريه بقه تقولوا ايه , واننا كبلد عندنا ونس وحميميه بين العيله الواحده او حتى في الشارع مش موجوده في اي مكان بره وده فعلا حقيقي

ردت واحده تانيه ان الاستمتاع بالحياه نفسها مصدر حقيقي للسعاده فقاطعتها الاولانيه انه لازم فلوس عشان الحكايه دي بس برضو انا ما اتفقت معاهم

حد تالت قال ان الحياه المنظمه الهاديه الخاليه من التوتر في حد ذاتها سعاده وان الرضا وراحه البال وعمل الخير ممكن يكون اسعد يوم في حياتها

انتهينا من المناقشه ان فعلا مفيش تعريف واضح ومحدد وصريح للسعاده وان مثلا بلد زي سويسرا فيها كل اللي قلناه ومع ذلك اعلى معدلات الانتحار فيها  وان مهمه معالي الوزيره شاااقه جدا  

اتنم بقه لو وصلتوا لمعالي وزيره السعاده حتطلبوا منها ايه ؟