من اكتر من عشرين سنه ومع دخول مصر في عالم
الابهار والعروض العالمية واللي تزامن مع عيد ميلاد بابايا قررت ماما تعزمنا على
عرض الجميلة والوحش في هذا اليوم
وكان الحقيقة عرض من اجمل ما يمكن ومن اكترها
ابهارا وجمالا وموسيقى وديكور وحتى الاحداث كانت أسطورية مبهره
الحقيقة السهرة دي انحفرت في ذهننا ولم
ننساها ابببدا بالرغم من قدم الحدث
وروحي يا ايام وتعالي يا ايام واختي تقرر
تودي بنتها عرض ice age بالضبط زي ماما ما عملت من
سنين , وتسمعها وهي بتحكي لجوزها عن مدى جمال العرض وابهاره وانه يوم لم تنساه وان
بنتها لازم تروح نفس العرض
يوم العرض انا شخصيا كنت في حاله من الترقب والسعادة
في انتظار تكرار حاله الانبهار القديمة وروحنا انا والأنسة جنه
الحقيقة انا انصدمت بالرغم من ان الموسيقى
عظيمه جدا وتجسيم الصوت حصل في تطور ظريف جدا واستخدام الجرافيكس والخدع زاد جدا بالمقارنة
مع عرض العشرين سنه اللي فاتوا ولكن
فين
الانبهار ما اعرفش !!!
العرض القديم كان ديكوراته احلى ؟ يمكن
العرض القديم كانت رقصاته اجمل ؟ جايز
العرض القديم كان قصه أسطورية وجو ال fairy tales
؟ يجوز
العرض القديم كانت القصة احلى ؟ مش عارفه
العرض الجديد اعتمد على الابهار والخدع وقصر
في الرقصات والديكور؟ يمكن
بس اللي أتأكدت منه ان وصول الانسان لمرحله
الابهار والمفاجأة هو اللي يمكن اتغير وهو السبب الاساسي لخيبه املي انبارح
سببه ايه يمكن فققايع كتيير حوالينا زي
التطور والنت والقدرة على الوصول لكل واي حاجه في اي وقت وكم الجرافيكس والفوتوشوب
حوالينا اللي من السهل جدا يخليك تسمع وتشوف اي حاجه في اي وقت وبالتالي يقلل
انبهارك ومفاجئتك , يجوز
الغريب جدا وعلى النقيض بقه اني تاني يوم
روحنا سينما لفيلم عااادي جدا وانه فعلا ابهرني واسعدني يبقى الانبهار والمفاجأة
لسه موجوده امال ايه اللي حصل ؟ قد يكون فعلا عرض ice age كان اي كلام وقد يكون سقف التوقعات هو اللي كان عالي فيه
وما كنش موجود في فيلم السينما وده بالضبط اللي خلاني انبسطت جدا جدا من الفيلم
ومش من العرض الحي
بس الاكيد الاكيد ان الشخص اللي حضر العرض من
عشرين سنه مش هو اللي حضره انبارح
ليست هناك تعليقات:
إرسال تعليق