سحسيات 2: ليلى بقت مودمازيل , ليلى في المظاهره !!!

مشهد غريب جدا وفي وجهه نظري مقدمه لفرض القيود على ليلى ": تكتشف فجاه في المدرسه انها بلغت وتصرفات البنات حواليها لتدارك المشكله والمفاجاه ورجوعها بسرعه للبيت ووجوم بنت خالتها الاكبر منها لمعرفتها بما سيلي هذا الحدث من فروض وقيود فرضت عليها في الماضي

رد فعل الام بعد معرفتها وضحك الاب ثم وجومه عندما ابلغته الام وترقب ليلى ومشاهدتها للحديث من بعيد بين امها وابوها

ثم قائمه التعليمات التي اصدرت لها اثناء العشاء وما تبعها من تعليمات لاخيها بعدم جلب اصدقاؤه في البيت  وعدم جلب مجلات اباحيه في البيت , شوف واعمل اللي عايزه بره وكان العيب مش المجلات ولكن باستخدامها في البيت !!! عشان فيه بنات

ثم استثناء عصام ابن خالتها  من قائمه الممنوعات , هيه حتتغطى على عصام على حد قول امها ( وكانهم بيمهدوا لقصه الحب الفاشله اللي حتحصل واللي في حد ذاتها مقدمه لسحس)

المشهد ده في وحهه نظري بدايه فرض السيطره والحدود لليلى وغيرها من البنات في مجتمعنا اللطيف وهو ايضا بدايه الحدود والقيود التي تؤدي لاحقا لمشاكل للجنسين عند الارتباط والجواز واللي القصه فردت له مساحات واسعه جدا في حديثها عن جوازه جميله بنت خالتها واللي في رايي مهدت برضو لسحس 

تلى ذلك مشهد المظاهره المشهد بسييييط جدا جدا بدايه مظاهره في الشارع من مدرسه الاولاد اللي قدام مدرستهم وحاله ثورجيه في حوش مدرسه البنات تتزعمها ساميه اللي في توجيهيه علمي وتطلع مدرسه في الميكروفون البنات مكانهم البيت وتربيه الاولاد وترد ساميه ان الانجليز لما قتلوا ما فرقوش بين راجل وست وتتجمهر المظاهره وتتردد ليلى وتمانعها بنت خالتها الا انها غصب عنها تتشال على الاكتاف وتمشي في الزحمه غصب عنها

حتى وهيه متشاله شايفه ابوها ومتخيله رد فعل امها الا انها فجاه حست بالخفه والحريه وكملت وصوتها طلع

وبعدين نتنقل لبيتهم وخناقه ابوها وامها وضربها بالشبشب ومشهد اكتر من مؤثر وحبسها لنفسها في اوضتها وبعدين اخوها (محمود) يظهر ويحاول يقنعها انها غلطانه بالرغم من انه ثورجي قديم الا انها في المناقشه تغلبه وتقنعه ان كلامه عن الحريه كلام نظري انتهى مع اول محك وهو نزولها المظاهره

المشهد مش مختلف كتير عن ثوره يناير لما البنات نزلوا والكلام اللي حصل من اهالي منعت بناتها لكلام سيء اتقال وتصرفات غلط حصلت لمقاومه ثوره ونزول البنات لححححد حوادث التحرش في ميادين الثوره  بالرغم من 50 سنه فرق مش باقولكم مفيش فرق حصل من يوم مالروايه اتكتبت؟؟؟

مشهد المظاهره في رايي هو فرشه قويه ومدخل لثوره ليلى على كل اللي حواليها واللي حيبان في الكام حلقه اللي جايين اللي كلهم بيمهدوا لظهور سحس

سحسيات 1 مقدمه :

في الحقيقه هي مجموعه من البوستات القديمه مؤجله النشر (المنشوره سابقا بدون اسم في احد صفحات الانترنت ) عن روايه الباب المفتوح للدكتوره لطيفه الزيات  عن "حسين" أو "سحس" هو السيد او الفارس حسين بطل الروايه / الفيلم العربي  

ذلك الفيلم الناعم الرقيق السابق لزمانه بزمان فبالرغم من انه انتاج 1963 الا انه فعلا كان سابق لزمانه بزمان من حيث فكره حريه المراه وتفكيرها في مجتمع تقليييدي جدا يكاد يحبس المراه في سجن التقاليد والاعراف الخاطئه من المقام الاول

فاتن حمامه الفتاه المدلله  لاسره صغيره تكتشف فجاه خطا اختيارها لابن خالتها والصدمه منه وتقرر قفل باب قلبها امام الحب والحياه

ثم يظهر سحس فيقلب ميزان حياتها وحياتنا لسنين طويله ويخلق مثال اعلى تنشده فتيات كثيره جدا لاجيال طويله

سحس او الباب المفتوح من وجهه نظري المتواضعه ليس فقط علاقه رجل بامراه جميله ولكن فيه اسقاطات كثيره جدا على المجتمع المصري , وضع المراه فيه , تقاليده وعاداته , مصر كدوله وكثيييير من الاسقاطات السياسيه في روايه اكثر من رائعه لكاتبه واستاذه جامعيه عريقه

سحسيات حتكون حلقه اسبوعيه  لمده 12 اسبوع في 12 حلقه, مجرد القاء الضوء عن البنات حبته لحد دلوقتي ليه ,في كل حلقه حنلقي الضوء عن جانب من جوانب الشخصيه ونفتح باب للمناقشه لجميع الاطراف سيدات ورجال وليه سحس اصبح شخصيه مش موجوده في الوجود من وجهه نظر البنات وايه رد  والرجاله  عن الراي ده

مش بس كده ده الموضوع استفزني لدرجه اني بحثت عن الروايه لاسابيع طويله ولم اجدها الا مستعمله من سور الازبكيه لانها مش مشهوره قوي , قريت الروايه واللي من وجهه نظري اكثر ثراء من الفيلم واستفزتني لدرجه اني حاوسع فكره سحسيات شويتين لمناقشه ليلى والمجتمع وقتها ولدلوقتي واللي للاسف ما اختلفش كتير ويمكن يكون تخلف كمان

في انتظار مشاركاتكم وتفاعلكم مع سحسيات كل اسبوع , باقي الاسبوع لو ربنا فتح عليه ببوستات غير سحس حننشرها عادي لكن سحس حيكون السبت او الحد من كل اسبوع  

كان نفسك تطلع ايه لما تكبر

سؤال سالته على صفحتي من باب التهريج إلا أنه بهرني من حيث كم الردود ، ردود من ناس عاده ما بنعلقش عندي، ردود غير متوقعه، بساطه الاحلام واحنا صغيرين وغيرها كتير خواطر مضحكه ومهن عجيبه اتقالت 

كم الردود حوالي ١٠٠ كومنت في نص ساعه !!! 

ردود ناس كنت نسيت اصلا انهم عندي ،ةقد كده سؤال بسيط قد يستفز الناس للمشاركه من باب التهريج اوالنوستالجيا أو الفضفضه 

ردود غير متوقعه : اصحابي كلهم ناس كبرات ومحترمين وولاد ناس جدا إلا أن ناس قالت كانت عايزه تطلع بقال، كمساري، عامله نظافه واكثرهم اضحاك على الاطلاق سموحه اللي عايزه تطلع خدامه واللي بعدها كلمتني من نمره جديده باقول مين قالتلي الخدامه بمنتهى الكوميديا والعفويه والاضحاك كالعاده وقعدت تحكي على فيلم نحن لا نزرع الشوك والله يا زمن لا بأيدينا زرعنا الشوك 😛😛

بساطه الاحلام اووسذاجتها زي أن محدش كتير اهتم بالمنصب أو الفلوس هو شاف حد عجبته شغلته أتمناها بغض النظر عن الوضع الاجتماعي أو نظره المجتمع واللي مش باقول انها صح لان اي شغلانه شريفه طبعا محترمه بس اقصد فطره الاطفال وبساطتتهم دون أي اعتبارات 

زي مثلا اللي شايف الكاشير أو الكمساري أغنياء لانهم بيجمعوا فلوس كتير حتى لو مش بتاعتهم أو أن البقال بياكل حلويات وشيبسي بدون حساب عشان صاحب المحل وكده !!

النوستالجيا ناس حسيت من كلامهم حنين أو حسره لاحلام ما اتحققتش مع انها مثلا يمكن لو حصلت ماكانوش نجحوا فيها أو حتى اشتغلوها بشغف بالرغم من أن دول مثلا وبالذات ناس ناجحين وبشده  بس حتفضل حته كده تنغص كل ما يفتكروها زي اي قصه حب مراهق ما كملتش أو حتى كملت وانتهت لاي سبب 

عن نفسي استهوتني قوي مضيفه الطيران من زمان لأننا مكناش في مصر وكنت اقعد اراقبها طول السفر واقلدها طول الاجازه بس طلعت قصيره واكيد ماكانوش حياخدوني ويمكن عوضتها بحبي للسفر ومازلت باحب اراقب المضيفين في اي رحله باطلعها 

والمذيعه ولاني فعلا حققتها طول سنين المدرسه كنت ماسكه اذاعه المدرسه فعلا وفي الاجازه كنت باسجل برامج في الكاسيت واستضيف ضيوف ممكن بابا وماما أو اختي أو اخنف أو ارفع أو اتخن صوتي والعب واعمل ضيفه ، وامنتج وادخل اغاني وفقرات واسجلها من التلفزيون جوه الكاسيت أو اقطع ورق كاني بافتح جوابات اصدقاء البرنامج !!! واللي لو دعبست اكيد حتلاقي الشرائط دي في مكتبتنا ، ادعبس عنها فعلا 

كميه خيال بيضحكني ويبكيني لما افتكر بساطه الاحلام وأننا كنا جيل استمتع بطفولته قبل التابلت والموبايل والجيمز واللعب الممله لاطفال الايام دي 

إلا أن الصيدله مثلا كانت حلم حصل في تانيه اعدادي لما بدأنا ناخد كيمياء ونوزن المعادلات وسألت أيامها امي ، وبعدها مدرستي ايه الكليه اللي فيها كيمياء اجمعوا من غير اتفاق على صيدله وقد كان ميس هدى شرف لك هذا الفضل ما حييت ⁦♥️⁩⁦♥️⁩

بوست أكثر من مبهج ضحكني جدا وامتعني وانا باكتبه 

حتشبسوت يا حتشبسوت قفلوا عليكي يا حلوه تابوت

اول معرفتي بست الهوانم والبهوات كانت في فيلم غرام في الكرنك وبعدها حادث الدير البحري في التسعينات 

اول مره سافرت الاقصر بهرني معبدها وتميزه الشديد عن كل المزارات اللي رحتها ويومها اتصورت فيه كميه صور غير طبيعيه 

شدني الكتاب من اصدارات المركز القومي للترجمه ولأنه كتاب ضخم خفت اقعد فيه وقت طويل فكالعاده مع الكتب دي سبته لاجازه العيد 

الغريب اني كنت بإقرا فيه كتير جدا بدون وعي من كتر

 اسلوبه وجماله 

 المؤلف بدأ بمقدمه عن جده حتشبسوت احمس نفىتاري اللي كان ليها دور في طرد الهكسوس وكمان اللي استحدثت الزوجه الالاهيه في وظائف الملكه ودورها الديني وصلاتها بالكهنه واللي كانت بدايه تربيه جيل من السيدات اووالملكات القويات اللي دخلوا في عبائه الكهنه والسياسه اللي عدى على احمس تاشريت والده حتشبسوت ومنها لحتشبسوت 

 ثم قصص وفاه الأبناء الذكور لوالدها تحوتمس الاول والابن الوحيد ابن غير شرعي لسيده من خارج الاسره الملكيه ( تحوتمس الثاني) 

 ازاي الام والجده ربوا البنت واسلموها لسنموت اللي تعهد بالتنشئه والتربيه ورسم المسار والخطط البديله لوصول الاميره الجميله لسده الحكم ودهاؤه وتخطيطه سنين طويله وكانت هيه تلميذه نجيبه طموحه نفذت الخطه بجداره وإتقان 

 ثم زواجها من اخوها ومناصفه الحكم بينهم وبرضو خلفت بنات بس وهو كمان خلف ابن غير شرعي من سيده غير ملكيه ( رمرمه ملوك أبا عن جد ماعلينا) 

 وبعدين سنموت يرسم مسار انها الابنه الجسديه لأمون واسطوره أن امون سلمها الحكم لإضفاء شرعيه لوراثتها الحكم بعد وفاه تحوتمس الاول واسطوره الزوجه الالهيه والزوجه الملكيه وصعودها للحكم مناصفه مع اخوها وجوزها تحوتمس الثاني 

 ثم وفاه تحوتمس الثاني ووصايتها على تحوتمس الثالث وإعلان نفسها فرعون مصر حتى بوجود تحوتمس الثالث ملك معاها 

 قصص وأساطير ومعابد ولوح وشرحها واكتشافها اللي كمان يعتبر اسطوري وضرب من الخيال وكأنها ترسل إشارات لاكتشافها من العالم الاخر لاستكمال الاسطوره 

 يستكمل الكاتب سرد إنجازاتها في حضاره مصر الفرعونيه وتطوير المعابد والجيش ونقل كنوز الحبشه وبخورها وزراعتها وامتداد حكم مصر وتركيزها على الحضاره اكتر من الحرب 

 والدور الرهيب لسنموت من وراها لدرجه تدهورها بعد موته واشاعات أن بناتها مش بنات تحتمس الثاني ولكن بنات سنموت شخصيا !!

 اختتام الكتاب بوفاتها وملاحقه الملوك بعدها لذكراها وللنظام السياسي اللي ارسته وكمان كل ذكرى ليها وطمس اسمها من كل المعابد 

 ولكن دهاء سنموت اخفى اسمها وقصصها في كل أثر بنته واللي اكتشفوها خلال مئات السنين حتى المومياء المطموسه عرفوا يوصلوا انها ليها لانه ابى ان يطمس ذلك الانجاز التاريخي وتطوير الحكم وتغير ثقافه شعب لا لشيء إلا لأنه من إنجاز امراه من اقوى من انجبت مصر المحروسه والفضل للام والجده والمعلم اللي كان لهم بعد نظر ودهاء وتخطيط اجيال وأجيال 

 كتاب أكثر من رائع أذهلني إنجاز هذا الكم من الصفحات في اسبوعين فقط 

 وتفتكر عمنا العزبي وهو بيغنيلها حتشبسوت يا حتشبسوت قفلوا عليكي يا حلوه تابوت