حاجات بسيطه قوي تفرق في يومك وأحيانا تحسسك
انك محظوظ , اه والله محظوظ !!!
يعني مثلا لو الصبح بتدور عربيتك او حتى راكب
ميكروباص وتلاقي الراديو جايب اغنيه لفيروز
أو مثلا جه على بالك حد لقيته بيتصل بيك
لو بنوته صغيره في عريبه ضحكتلك من غير سبب
ولا شاورتلك باي
او طفل اول مره يشوفك ويضحك لك
أو حتى وحشك حد مات وجالك في الحلم
لو في عز ما انت زعلان سمعت سوره يوسف
بالصدفه وتحس انها بتطبطب عليك
لو في عز يوم تقيل تروح تاخد دش وتقلب
القنوات تلاقي فيلم بتحبه
لو في ييوم بتقلب في صور جت في بالك ذكرى يوم
حلو مع صحاب
قعده حلوه مع عيلتك واكله حلوه وضحكه من
القلب
ابوك او امك اللي في العادي صادد نفسك تسمعه
من وراك بيمدح فيك وانك احسن ابن او بنت
حد اديته صدقه وضحك في وشك ودعى لك
حته شغل حلوه تعملها بمزاج عشان مزاجك مش
عشان مديرك
مزيكا حلوه وكتاب جميل في جنينه في يوم شمس في
الشتاء
كوبايه فراوله ساقعه
ايس كريم في الشتاء
كوبايه شاي بالنعنعاع وانت بتكتب في بلوج
بنفس الاسم
كلمه مالك من صاحب قريب وتقول مفيش يقولك على
بابا !!! مالك وتلاقي حنفيه دموع فتحت من غير سبب بعدها راحه ورضى ملهمش سبب لانك
حسيت ان حد حس بيك وشاف روحك ووجعك وريحك من غير حتى ما يقصد
سجده ودمعه ودعوه متشاله لك وقت عوزه
يوم ما رجع لك حقك او حتى حد رد غيبتك
دعوه في يوم وانت نازل
او حتى مشوار كنت حامل همه ولقيت اللي يعمله
لك
حفله او اكله مكنتش موجود ولقيت اللي شايل لك
منابك بكل حب وود اصلها مش حكايه اكل اصلها حكايه ود
حاجات كتير ممكن تشوفها وتحسها او حتى تعرف
بيها بعد وقتها بس بتحس فيها انك موجود , محظوظ , انسان وبس بتفرق معاه الحاجات
الصغيره وبس الصغيره !!!! اصلها في الحقيقه مش صغيره اصلها كبيره قوي عند اللي
يحسها ويقدرها !!! اصلها ببساطه بتحسسك انك لسه انسان !!!!!
ليست هناك تعليقات:
إرسال تعليق