الأحد، 2 فبراير 2014

في الصيدليه

مفيش صيدلي الا لما لازم يعدي على الصيدليه في مرحله من مراحل حياته


يعني مثلا قبل ما ربنا يفتح عليه ويشتغل في شركه ولا حتى مستشفى أو حتى لما يقرر يعتزل الحياه ويفتح لنفسه بزنس خاص
الصيدليه للصيدلي زي ما بيقولوا سواء كانت ملكيه خاصه او حتى واخد له شفت يسلي نفسه بيه

بنحصل مواقف كتيره تموت من الضحك في الصيدليه اما لان الزباين فاضيه واتعودت عليك لانهم بيعتبروك واحد من العيله أو نتيجه لساذجه اللي واقف لانه خريج جديد او حتى قليل الخبره بالتعامل مع الجمهور
اصل التعامل مع الجمهور ده فن برضه

اخر عهدي بالصيدليات كان يجي من سبع سنين بس حصلي فيها مواقف تفطس من الضحك من ايام ما كنت بنزل تدريب في الصيف او حتى في صيدليه التطعيمات في المصل واللقاح . المواقف اللي جايه دي يا حصلتلي شخصيا يا حصلت قدامي  بس وعد حتضحكوا من قلبكوا

د عزت والمسابقه : كنا حوالي 3 او 4 تدريب وكان دايما يقرا الروشته بصوت عالي ويشوف مين حيجيب الدواء الاول وساعتها كنا بنتكعبل في بعض ونخبط في بعض وكان الدليفريه بيضحكوا من قلبهم علينا واللي يجيب الشرب أقراص واللي يجيب الأقراص لبوس وكانت هيصه !!!

اول حقنه في حياتي  كنت البنت الوحيده في الصيدليه  ولسه تدريب وجت واحده حامل محتاجه حقنه حديد (ودي من ارذل الحقن اللي ممكن تديها) ود عزت عبى الحقنه ودبسني قدام الزبونه اديهالها وانا اتسمرت مكاني وقلتلها بلاش وهيه عماله تضحك وتقولي ملكيش دعوه لدرجه ان بعد ما دخلنا المعمل قعدت اتحايل عليها " يا أم بدوي بلاش .... بلاش يا أم بدوي " وهيه بتقولي ما تخافيش انا عارفه انك بتعرفي , في اليوم ده عرفت ان ايدي خفيفه لانها محستش بيها وشكرت فيه عند صاحب الصيدليه

 انا وأختي كنا بننزل نفس الصيدليه وبيقولوا اننا شبه بعض , المهم اول مره نزلت الصيديله جالي زبون ومراته وطول ماهو في الصيدليه عمال يندهني باسمها وأنا مطاوعاه ومش عايزه اكسفه وبيني وبينكم قلت ما اشوف إحنا فعلا شبه بعض ولا لاه المهم خلص وخرجوا من الصيدليه ووقف هو ومراته بره يتخانقوا على باب الصيدليه بعدين رجعوا فالست بتسالني هو انت د. ...... قلتلها انا اختها راحت دبه في الارض زي الأطفال : " شفت مش قلتلك مش هيه" اتاريهم واقفين يتراهنوا انا هيه ولا مش هيه !!!

 مره تانيه واحد عجوز متصابي اشترى صبغه واختار اللون من الكاتالوج وجبناه له صح وتاني يوم جاي بقه بدل ما شعره يبقى بني قلب احمر اتاري الصبغه المتعبيه في الانبوبه متعبيه بلون غلط بس كان منظره يموت من الضحك بس صعب علينا قوي !!!

في العيد الكبير الخروف بتاع جيراننا في الصيدليه جاله اسهال ومرضيوش يدبحوه والست خدت له كميه ادويه مش طبيعيه وكل شويه تكلمني تسال الاسهال ما وقفش ليه دي بقه اللي كانت نكته النكت !!!

محمد منير بقه جالي مره يتطعم وداخل عليه بجوز بودي جاردات ياكلوا الزلط وعنها انا ما اتحركتش من مكاني , قام قالهم معلش استنوني بره واعتذرلي بس بصراحه انسان مهذب جدا وعمري ما نسيت التصرف ده

مره تانيه صاحبه الصيدليه جالها عريس وجوزها واقف ولما قالت له اقدم لك دكتور ...... جوزي مش يسكت ويمشي من سكات لا بقه لازم يحط التاتش بتاعه : اصلك صغيره عليه , اصله شكله باباكي وكلام من ده والراجل واقف دمه بيغلي ووشه محمر ومش بيرد لانه مؤدب جدا بس هيه بقه كانت في منتهى السعاده وقعدت يومين تحكي الحدوته دي لكل ما حد يجي !!!!
 

ليست هناك تعليقات:

إرسال تعليق