يوم من عمري : اول يوم رمضان بره مصر

 

سنه 2012 حبكت اني اكون مسافره لتدريب بره مصر وجه عليه رمضان هناك قضيت 6 ايام هناك

مش متخيلين مدى سخافه الاحساس باول يوم رمضان لوحدك

اولكش كان اخر يوم في اول تريننج ويوم امتحان شوفتوش غلاسه اكتر من كده !!!

انا ايامها سالت ولقيت رخصه الافطار ففطرت لان اليوم كان بتاع 18 او 19 ساعه صيام مش فاكره

المشكله مش في الصيام المشكله انك لا لاقي حد تكلمه ولا تعيد عليه  ولا في فوانيس وهيصه بتاعه مصر ولا اي حاجه خاااالص

خلصت الامتحان وروحت بدري قلت استغل اليوم فرحت متحف مفتوح في ضواحي بازل اسمه Augusta Rica  عباره عن انقاض بلد يوناني كانت هناك وهمه كملوها بالرسومات ومجسمات في شكل يشبه  treasure hunting  كده , يديك خريطه تمشي عليه فتعيد اكتشاف المنطقه باختصار عملوا جاكته على الزرار على راي سمير غانم بس مكان تحفه  

الفكره تحفه وتنفيذها يجنن والهوا كان ملهوش حل بس المشكله ان الجو قلب وادتها مطره من كل حته ومفيش صريخ ابن يومين ولازم تكمل عشان ترجع لنقطه الصفر اللي عليها المواصلات , كتير ؟؟؟ ساعتين تلاته !!!!

المهم خلصت ورجعت ولسه الدنيا نهار والساعه 8 واختكم قال ايه مكسوفه تاكل في نهار رمضان مع ان معايا رخصه بس قال ايه اتكسفت اقابل حد بحجابي ده يعرف ان المسلمين صايمين واني مش صايمه (ساذجه قوي انا مش كده ؟)

بس الجوع كافر , باتمشى لقيت مطعم سوري قلت ما بدهاش واللي شجعني ان الجارسون شخصيا كان واقف يشرب سجاير !!!

دخلت وطلبت محشي ورق عنب وتبوله وبابا غنوج وطعميه (اصل موضوع اللحوم بره ما بيرحينش بصراحه)

اكلت وحليت ببقلاوه وشاي بالنعناع , كل ده الساعه ما جتش 9 ( المغرب كان 10.30) !!!!

روحت قلت زمانهم في مصر فطروا اكلمهم واقعد معاهم شويه وفتحنا السكايبي والست جنه بنت اختي ادتها هرتله وشغل اراجوزات , وجابوا صينيه الكنافه قطعوها وكلوها قدامي من غيري !!! شويه وسابوني ونزلوا التراويح

انا كل ده مستيه العشا عشان اصلي التراويح ومفيش فايده اليوم مش عايز يخلص في الاخر روحت في النوم وخلص اليوم بس ايه ما اقلكوش اسخف اول يوم في رمضان في الوجود

بلدنا حلوه قوي , وبالذات في المواسم دي  ما تفرطوش فيها وحبوها قوي
 

 

رمضانيات : ليله الرؤيا

اللليله ذات المنظر المعتاد من كبار رجالات الدوله وهمه قاعدين في دار الافتاء مستنيين نتيجه الرؤيا بكره صيام ولا لأه

ويطل علينا المفتي بمقدمه وديباجه شهيره انه ثبتت أولا لم تثبت الرؤيا وان بكره اول يوم في الشهر الكريم ولا المتمم لشعبان وبعدين ينزل التلفزيون المصري بباقه التهاني واغنيه عبد المطلبب الجميله " رمضان جانا " سواء بتصوير فيديو أوا كارتون حسب انهي جيل تنتمي ليه سيادتك

مش ده اللي اقصده خالص , اقصد مكالمات التليفون من هنا وهناك قبل الابتلاء المسمى السمارت فون اللي خلى التهاني واتساب وفايبر وتاج على الفيسبوك

وجدي لما كان يتصل بينا واحد واحد يعيد علينا

وانك تبقى عايز تسبق الناس اللي عايز تقولهم كل سنه وانتم طيبين قبل ما همه يتصلوا بيك

وازاي شبكه التيلفون والموبيل كانت بتهنج بس الاتصالات مستمره

وماما لما تقوم تجهز لاول (فول) قصدي  سحور من التلاتين (فول) قصدي سحور

ليله الرؤيا قد تثير شجون بعض الناس زي مثلا اللي مات له حد عزيز وده اول رمضان من غيره ببس حاقولك هو(هي) في مكان احسن

او حد كان نفسه في حاجه قوي رمضان اللي فات وكان نفسه فيها رمضان ده بس حاقولك ما هيه لو كانت من مصلحتك كانت حصلت , يبقى اللي جاي احلى

او حد مسافر ومقضي رمضان بعيد عن اهله  حاقولك قدر النعمه دي وانهم كويسين وبصحه كويسه حتى لو انت مش معاهم  وان شاء الله لما ترجع تقضي معاهم باقي رمضان

بالنسبه لي الشجن الي بتفكرني بيه ليله الرؤيا هو اعلان نتيجه مجلس الكليه سنه 2001 واني ما اتعينتش في الجامعه , كانت يوم 28 شعبان , بتقل شويه شويه مع الوقت بس لسه فيها نقطه شجن , وحمد لربنا في نفس الوقت !!!

على الناحيه التانيه ليله الرؤيا يعني فرحه ان ربنا اختارك ودخلك رمضان دون عن ناس كتير ماتت في الكام اسبوع ولا شهر اللي فاتوا فمتضيعوش في شيشه وتمثيليات وقرب من ربنا قوي محدش عارف السنه الجايه فيها ايه

ليله الرؤيا لو بكره رمضان يعني تقوم جري تحضر نفسك لأول تراويح وتسلم على اصحاب الجامع اللي يمكن بقالكم سنه ما اتقابلتوش

يعني تسمي وتفتح المصحف وتبدأ أول ختمه في المصحف وتنوي تختمه اكتر من مره ان شاء الله

يعني يبدا السباق ونشوف مين حيسبق مين بس اقولكم على حاجه كلنا كسبانين ومحدش ان شاء الله خسران

قوموا كلموا بعض بالتيلفون وبلاش جو الفيسبوك والواتساب ربنا يخليكم , حسوا شويه بانسانيه التهاني بالتيلفون على الاقل , واللي حيقولي السنه الجايه تكوني في بيتك , احب اقولكم انا في بيتي . واللي حيقولي نفرح بيكي قريب , احب اقولكم انا فرحانه بنفسي

بطلوا غلاسه وما تخلنويش ابطل اتصل بيكم !!!

كل سنه وانتم طيبين

رمضان كريم

 

خدلك سيف , كمان سيف , طب كمان سيف !!!!

اخر الساعه....... قدم الساعه .......  طب كمان مره عشان البيه اخر الساعه  

النهارده كان عندي امتحان وغيرت الساعه على الموبيل قبل ما انام وظبطت المنبه , بس الظاهر التيلفون بتاعي سمارت قوووي يعني قام هو ماخرها كمان ساعه وصحيت 5 الصبح ببص في ساعه اوضتي ما بقيتش عارفه هيه على القديم ولا الجديد والموبيل لقيته راجع ساعتين نزلت الشارع بدري احتياطي ووصلت الجامعه ساعه بدري والشوارع كانت فااااضيه اتاريني مش عارفه الساعه كام وقعدت طول اليوم متنحه من لخبطه النوم

 طول عمري كنت بحب التوقيت الصيفي اصله كده ببساطه بيطول اليوم ويخليه  في بركه حلوه

بس الكلام ده قبل ما نقلب جو الخليج والزهق والحر اللي لا يطاق

بعد شويه مع دخول رمضان على الصيف بدات الناس ترجع الساعه على دخول رمضان وترجع تاخرها تاني , قال ايه الداستور يستثني رمضان من التوقيت الصيفي

شويه وبعد الثوره قرروا الغاء التوقيت الصيفي لانه وفعلا ببساطه ما بيفرقش في حاجه لان الناس ببساطه ما بتخرجش غير بعد المغرب والصيف بيحب السهر والتكييفات هيه هياها يعني اصلا كده كده مش فارقه

قوم بعد الثوره التانيه يقرروا يرجعوا التوقيت الصيفي لييييييييه ما عرفش وكم القلش والتريقه اللي جت على الفيسبوك ملهاش اخر

وبعدين على دخله رمضان نرجعه وبعد رمضان نرجع تاني للتوقيت الصيفي وبعدها بشهر نرجع للتوقيت الشتوي , ايه الجنان ده !!!!

سيبكم بقه من لخبطه الساعه البيلوجيه , ولا لخبطه الطيران والرحلات الدوليه ولا تريقه الدنيا على التخبط اللي احنا فيه , وان عدد ساعات الصيام في الاخر هيه هيه مفيش فيها اي تغيير

بس اللي فعلا يغيظ اننا في اقل من شهرين غيرنا الساعه 3 مرات من غير اي دراسه ولا تفسير وفي اتجاهنا للتغيير الرابع بعد رمضان بشهر للتوقيت الشتوي !!!!

عمل زي الفيلم : خدلك سيف , كمان سيف , طب كمان سيف !!!! لما ما كانش لاقي حاجه يقولها ولا يعملها

 

دخله رمضان

يعني ايه دخله رمضان بالنسبه لكم ؟

بالنسبه للعبد الفقير لله ضيف جميل جه ومشي من سنه وكروتنا من غير ما نحس فبنقعد نستناه كل سنه على امل انه ما يجريش مننا السنه دي وبرضه مفيش فايده

يعني تلاقي الشوارع اتملت شوادر بيع الفوانيس اشكال والوان

يعني تلاقي الشوارع مليانه زينه وفوانيس على حسب مستوى الحي الاجتماعي من اول الشراشيب المقطعه المعموله بالايد  لاغلى الالوان وافخم فروع النورالمستورده  !!!

يعني ننزل الفانوس الكبيييير بتاعنا ونلونه لو الوانه بهتت ونعلقه في البلكونه

يعني مامتي تنزل تجيب الديك الرومي اللي لازم يكون على سفره بيتنا اول يوم رمضان

يعني جدتي ترجع من المقر الصيفي للحكم (البلد) وترجع اخيرا بيتها في القاهره

يعني بابا يجيب اكبر علبه بودره سوبيا في الدنيا عشان كل يوم قبل الفطار بيبقى زهقان فيقوم يعمل احلى كوبايه سوبيا في الدنيا بس مش كل يوم يا حاج اصلي بزهق منها !!!

يعني نجهز ونعمل شنط رمضان ونفرح الناس اللي حوالينا بيها

يعني اطلع عبايات الصلاه واغسلها واجهزها للتراويح

يعني اطلع المسك واظبط موضع السجود في كل مصليات البيت لزوم الدعاء والتهجد واجهز شنطه الجامع وقزازه الميه بتاعه التراويح

يعني حد ناصح يهاديك بعلبه تمر قبل رمضان ياخد بيها ثواب افطار الصائم طول الشهر

يعني تخلي عندك ذوق وتتصل بالناس اللي بقالك ميت سنه ما كلمتهومش وكفايه  texting on watsap and facebook  كلموا بعض ربنا يخليكم

يعني تجهز لك كام دعوه تزن على ربنا بيهم لمده تلاتين يوم فرصه عمرك وجتلك ما تضيعهاش (بس ما تنسوش تدعوا لي معاكم !!)

يعني لو ربنا كاتبلك عمره وختمه في الحرم يبقى رمضان عمرك ما تنساه وتفضل تفتكره وتدمع زي حالاتي , وتفضل مستني يوم السفر على نار

يعني ضيف جميل ما تلحقش تقعد معاه وبرضه يزوغ منك وما تحسش بيه

يعني الحب والموده والتسامح وطلب الرحمه والمغفره والعتق من النار

كل سنه وانتم طيبين

نسيت اقولكم اني محضره شويه مواضيع عن رمضان ليها العجب حاسميها رمضانيات ما تنسوش تتابعوها وان شاء الله تعجبكم

كل سنه واحنا بخير ومصر احسن يا رب

 

تأملات في العتمه !!!

مع استمرار قطع النور في بلدنا المحروسه  بتلاقي نفسك بتعيد اكتشاف نفسك وانت قاعد في الضلمه مع كل مره النور بيقطع فيها  

يعني مثلا : حتكتشف انك عارف ابعاد بيتكم بالسنتي لحد ما توصل لمكان الكشاف اللي اكيد موش موجود في اوضتك لحد ما تطلع الرسبشن

حتكتشف انك لو بتملى ميه من الديسبنسر مره في مره حتعرف لإمتى الكوبايه حتتملي بعد ما تغرقك عشرين تلاتين مره , او حتكون ناصح وتحط طرف صباعك لحد ما تحس انها اتملت

حترجع مثلا تستخدم حاجات بقالك كتير ما استخدمتهاش زي الكبريت بدل الاشعال الذاتي للبوتاجاز

وكمان البراد عشان تستمتع بكوبايه شاي في الضلمه بعد سنين من استخدام الكتل اللي بصراحه لا بيخلي للشاي لا طعم ولا معنى

حترجع تقعد مع عيلتك بدل اوضتك اللي بقت فول اوبشن من تكييف ودش وتلفزيون وكمبيوتر ونت وموبايل وبقى اللي ناقص انك تعمل سلم منها للشارع وتعلن الاستقلال عن شقه العيله 

حترجع تاني تعرف قيمه الوقت وانك لازم تخلص الاولويات قبل النور ما يقطع " ما اتجلش الحاجه لبعد شويه لحسن النور يقطع يا عنيه !!!"

حترجع للتيلفون العادي وبلاش الكوردلس وعيش عيشه اهلك , الله يرحم تليفون الهيئه ابو قرص يا سيدي

يمكن كمان تستخدم الشمع وتقعد قعده رومانسيه يعني لو ماكنتش من فصيله السناجل

او حتى حتكون شخص اوتجونج وتستغل الساعه دي في انك تنزل تعمل اي مشوار كنت ماجله من باب ان الدنيا حر وخلينا قاعدين في التكييف أحسن

ممكن تكون من المتاملين وتضرب سقف في الضلمه , او تقوم تصلي ركعتين وتدعي او حتى تشد الغطا وتخش تنام

في بقه ناس مزاج عندها تخش تاخد دش في الضلمه

وفي بقه ناس كييفه تلبش اللي حواليها في الضلمه من باب الاستظراف

وفي اللي زي حالاتي عاده بيخلي ساعه الضلمه دي للكتابه أو للصلاه او للوقوف في البلكونه في الضلمه من غير ايشارب اصل كل البلكونات طافيه النور ومحدش دريان بحد او حتى منزل افلام على اللابتوب يقعد يشوفها بمزاج مع كوبايه شاي بالنوعناع

انت بقه من انهي نوع من اللي فاتوا ؟

تشرب شاي بالنعناع؟

ورقه النعناع دي ورقه غريبه جدا

ازاي بمنتهى البساطه والعذوبه والسلاسه تغير طعم يومك لو بداته بكوبايه شاي مزاج كده بالنعناع

ويا سلام بقه لو كان نعناع بلدي وفريش بيبقى يوم ملهوش زي

اصحاب المزاج العالي اللي زي حالاتي يعرفوا النعناع البلدي من العادي من الجبلي

النعناع الجبلي ده بقه بتاع مرسى مطروح والمدينه المنوره  بيطلع  في ارض رمليه ويتساب لحد ما ينشف على اغصانه ده بقه مزاج المزاج

الشاي ابو النعناع ده بقه يدفيك في الشتاء, ويروقك في الصيف, ومفيش احلى منه مع اغنيه لثومه في البلكونه في عصريه في الصيف

تنسى الدنيا باللي فيها ويومك وتعبه في الشغل والطرق والسواقه والسياسه وكل حاجه

في كمان الشاي المغربي بالنعناع ده بقه اللي مزاج تاني خالص , بصراحه معرفش هو متكون من ايه بالظبط بس بحبه , وجو البراد والصينيه والبياله الصغيره ده بيجنني

اللي يعرفوني كويس يعرفوا المج الحراري الاورانج بتاعي ده بقه معايا في كل حته , في العربيه, في الجامعه, في الشارع , في اي مشوار  واملاه شاي بالنعناع وانطلق , اصلي ببساطه ما يعدلش مزاجي غير كوبايه شاي مزاج من صنعه ايديه بيقولوا عليه قهوجي شاطر

تشرب شاي بالنعناع؟

Fantasy: The book you need to live in

Imagine that you could be shrinked to a size of book and that you could enter the book and live inside its events

·        Which book would you choose (Arabic or English and which one)?

·        Why?

·        Tell us the story of it (some of us may not read it before)

·        Which character would you prefer?

·        Why?

·        If you could change the events what would you do?

·        If it is possible to stay there would you stay?

For me and for fun sharing

I adore Heidi, the little orphan who had to move to her grandfather’s house (a very tough person) after death of her parents, he lives in Swiss Alpes and she started to change his life, she usually goes to the Alpes with Peter the goat keeper and they had lots of fun with goats and nature

Then she moved to Klara’s house the a paralyzed little girl to work there as a companion , and she changed her life too

It is an amazing story that was turned into a cartoon children series I used to watch while I was a child in KSA I don’t think it was available in Egypt

She is an amazing girl full of energy and love that could change the lives of persons around her

I would never come back from that book as I love the fancy in it, the scenes in Swiss Alpes (which I visited may be because of this story and fall in love of them too)  and playing with goats (I hear the bills in there necks now) 

I would never change the events as well

 

Yalla share your stories lets have some fun J

سكك حديد مصر : سيادتك حتتبهدل معانا !

كتب محمود جبريل:

سكك حديد مصر يعني قطر يعمل حادثة الساعة 6 الصبح و يتقلب و معدات حربية تقع و القضبان تبوظ و مع ذلك يطلعوا قطر القاهرة بتاع الساعة 8 اللي على نفس الخط بالرغم من ان الحادثة لسة ماتشالتش

سكك حديد مصر يعني تفضل مستني ساعة في القطر بينك و بين م...حطة دمنهور حاجة بسيطة و السكة مفيهاش حاجة و يسيبوا الناس تنزل على الطريق نط من القطر علشان يركبوا

سكك حديد مصر يعني توصل المحطة و تسأل ناظر المحطة اللي هو عارف الدنيا تقله القطر هيرجع القاهرة ولا هيكمل على اسكندرية و في خلال قد ايه ... يقلك استنى ساعتين على مالتعليمات ما تجيلنا ... ساعتين علشان التعليمات توصل المحطة

سكك حديد مصر يعني تسأل عمال القطر في ايه يقلولك منعرفش و تدخل تعرف الخبر من على النت و العمال ميعرفوش

سكك حديد مصر يعني تبقى مسافر الساعة8 علشان عندك اجتماع في اسكدرية الساعة 11 فمتوصلش اساسا و تولع مواعيد الناس

سكك حديد مصر يعني الناس تبقى شارية تذاكر ب50 جنيه رايح و زيهم جاي و التذكرة تروح عليك

#سكك_حديد_مصر=سيادتك_حتتبهدل_معانا

هو وهيه والناس الحشريه

لما تقعدي مع صاحباتك البنات في قعده بناتي وبالذات لو واحده داخله على جواز ولا في حفله حنه ولا حاجه كده تلاقي النصايح العظيمه رايحه جايه يمين وشمال كانها صواريخ أرض ارض وتبقي عايزه تاخدي لك ساتر وخصوصا لو القعده فيها طنط حشريه او صاحبتكم اللي اتجوزت من وانتم في الكليه أو حد قدم شويتين في الجواز بيتحولوا لارشانات معرفش ازاي . وتبدا النصايح من نوعيه " إبنك على ما تربيه و جوزك على ماتعوديه"

·        شوفي يا حبيبتي اوعي تعملي فيها ست الستوته الشطوره اصلك لو عودتيه ان كل حاجه تعمليها بنفسك حيطلع عينك ومش حيرضى يجيبلك شغاله

·        اوعي تعرفيه انك بتعرفي تكوي , خلي المكوه تخصصه ولا يودي لمكوجي بلاش هده حيل  

·        العشا وجبه ملغيه عايز يتعشى يقوم يدلعك ويعمل هو العشا

·        السوق شغلته ااه هو انت حتلاحقي منين ولا فين

·        كلمه السر " عند ماما كنا بنعمل .... اصل بابا كان معودني....." تقومي تنحرريه يعمل لك اللي انت عايزاه

·        مش لازم تطبخي كل يوم , الميه اتقطعت, جيت مالشغل تعبانه ..... يجيب اكل وهو جاي

 الناحيه التانيه بقه لو انت البت العشريه اللي الولاد في الشغل معتبرينها واحد صاحبهم أو لو بالصدفه في كانتين الشركه قعدتي قريب من ترابيزه كلهاولاد حتسمعي بعض من الاتي:

·        ادبح لها القطه , وريها العين الحمرا

·        مش لازم تسمع كلامها

·        شاوروهن وخالفوهن

·        بلاش تعرفها مرتبك

·        سد نفسها اول باول عشان ما تفوقش عليك

·        اوعى لو جالك مكافئه تعرفها , حتبقى قاعده يا معلم

·        حوش من ورا مراتك

·        يا عم هو في حد بيسمع كلام النسوان

يا عمو وطنط حشريه سيبوهم في حالهم الله يرضى عليكم , اللي يمشي مع حسنين ما يمشيش مع محمدين وصوابعكم مش زي بعضها , وانتي وانت بلاش تدوا ودانكم للناس دي وبلاش حواديت بيوتكم تروح قعدات الصحاب اصله يا حتحسدوا يا حيخربوا عليكم

• ده كده ما اتكلمناش في " مفيش حاجه في السكه" لو لسه متجوزين

• "مش حتخلفوا تاني" لو خلفوا

• "هو العيب من مين " لو ما خلفوش
• "يا اختي هو انت مش عايزه اخ للبنات " لو جابت بنات

• " هو انت مش عايز بنوته تدلعك " لو خلفوا صبيان

• "هو مين السبب" لو اتطلقوا

• " يا اختي هيه البعيده معندهاش دم" لو اتجوزت تاني بعد طلاق او ترمل

وخدوا من ده للصبح !!! الناس دي ما تجيش غير انك تغير الموضوع وتبطل تقعد او ترد عليهم اصلا

عيشوا لنفسكم وللي يرضيكم وبس مش اللي يرضي الناس وارحموا بيوتكم واهاليكم وولادكم من حشره الناس لانها مش حتخلص وعاده اللي عامل او عامله فيها عبده القوي المفتري / المفتريه بيبقوا اساسا واخدين على دماغهم في بيوتهم
ااه والله زمبئولك كده !!!

إحنا اسفين يا ست البنات ويا ست الستات

احنا اسفين كلنا كمجتمع وكأسر وكمشرعين وكناس ساكتين على كل اللي بيحصل

احنا اسفين يا كل بنت أو ست  حد قالها كلمه جرحتها من قريب أو من بعيد وهو فاكر نفسه الواد الكوول الظريف , صدقني يا خايب البنت مهما كانت صغيره بتقدر تميز المجاملة والكلمة المحترمة من التحرش اللفظي

احنا اسفين يا كل بنت أو ست  حد ضايقها بلمسه في شارع او مواصلة إحنا اسفين يا ست البنات اصل حكومتك مش قادره توفر امان في شارع ووسيله نقل محترمه

احنا اسفين يا كل بنت أو ست حاولت توقف حد ضايقها بأي صوره ولقيت الناس في الشارع او المواصلة بتهديها وتقولها محصلش حاجه وبلاش فضايح وإقسام , معلش اصلنا زي النعامه بنحط راسنا في الرمل وكل راجل او ست من دول عامل مش واخد باله ان حد من اهل بيته اكيد حصله وبيحصله وحيحصله كده بس مطنش لانه على الاقل نفسيا مش حيقدر يعملها حاجه

احنا اسفين يا كل بنت أو ست راحت قسم تشتكي اتسلوا عليها أصلهم مش حيعرفوا يجيبولك حقك عشان القوانين عندنا أي كلام فهمه بيعملوا كده دفاع نفسي انهم مش حيعرفوا يعملوا لك حاجه (خليني افترض حسن النيه)

احنا اسفين يا كل بنت أو ست اشتكت لجوزها او اخوها او ابوها من جار او قريب بيضايقها فاتقال لها انت السبب ما هو لبسك او تصرفاتك شجعته ونسي انه رباها او حتى اختارها زوجه لادبها واخلاقها !!! لانه ببساطه مش عارف يعمل لها حاجه فنفسيا بيحملها المسئوليه  

احنا اسفين يا كل بنت أو ست خافت تشكي من رئيس او مدير او استاذ جامعه او مدرس جرحها حتى بنظره مش تمام وخافت على اكل عيشها او دراستها , ما هيه مفيش قوانين في المؤسسات دي تحميكي

يا كل البنات والستات في اوربا الستات بتمشي براحتها وتنزل الانهار عادي بالبكيني وتروح في الشارع بشال او فوطه من غير ما حد يضايقها لانهم ببساطه بلاش بيؤمنوا بالحريه الشخصيه , بس على الاقل عندهم قانون يحميهم كستات ويعاقب اي متحرش

احنا اسفين يا كل بنت أو ست عايشه في هذا المجتمع وصابره وساكته خوف بقه ولا قهر ولا ستر ولا اي سبب تاني

احنا بجد اسفين منك وليكي وعليكي