ورقه النعناع دي ورقه غريبه جدا
ازاي بمنتهى البساطه والعذوبه والسلاسه تغير
طعم يومك لو بداته بكوبايه شاي مزاج كده بالنعناع
ويا سلام بقه لو كان نعناع بلدي وفريش بيبقى
يوم ملهوش زي
اصحاب المزاج العالي اللي زي حالاتي يعرفوا
النعناع البلدي من العادي من الجبلي
النعناع الجبلي ده بقه بتاع مرسى مطروح
والمدينه المنوره بيطلع في ارض رمليه ويتساب لحد ما ينشف على اغصانه ده
بقه مزاج المزاج
الشاي ابو النعناع ده بقه يدفيك في الشتاء,
ويروقك في الصيف, ومفيش احلى منه مع اغنيه لثومه في البلكونه في عصريه في الصيف
تنسى الدنيا باللي فيها ويومك وتعبه في الشغل
والطرق والسواقه والسياسه وكل حاجه
في كمان الشاي المغربي بالنعناع ده بقه اللي
مزاج تاني خالص , بصراحه معرفش هو متكون من ايه بالظبط بس بحبه , وجو البراد
والصينيه والبياله الصغيره ده بيجنني
اللي يعرفوني كويس يعرفوا المج الحراري
الاورانج بتاعي ده بقه معايا في كل حته , في العربيه, في الجامعه, في الشارع , في
اي مشوار واملاه شاي بالنعناع وانطلق , اصلي
ببساطه ما يعدلش مزاجي غير كوبايه شاي مزاج من صنعه ايديه بيقولوا عليه قهوجي شاطر
تشرب شاي بالنعناع؟
هههههههه اشرب...انا عايزه اقولك ان مجرد المقاله بتاعتك عنه عدلت مزاجي...ومفيش مرة شربت شاي بالنعناع يالومي الا وافتكرتك....بس انا مزاجي مع فيروز اكتر....جربي بقي باكت نعناع ايزيس اللي كل باكت متغلف لوحده هيعجبك جدااااا
ردحذفالشاى المغربى بقى يا ستى بيتكون أساساً من الشاى الأخضر والنعناع بنسب متساوية ومعاهم كمية كبييييرة من السكر وساعات بعض المغاربة ممكن يضيفوا أعشاب تانية بس مش دايماً :)
ردحذفعموماً بتفق معاكى فى مزاج الشاى بالنعاناع وخصوصاً النعناع الجبلى... أنا ف حياتى مدوقتش أجمل من نعناع المدينة المنورة ... الله عليه وعلى ريحته وطعمه ... ربنا يكتبلنا زيارة تانية للمدينة ومسجدها المعظم وأجوائها ونعناعها قولوا آمين :)
امين يا رب
ردحذفياريت تجربي الشاي ده matcha tea شاي الماتشا
ردحذف