new year's evening

My plans for tonight were having a walk in a mall or something , eating ice cream with family then going home paking a cake, watching a movie and praying for that z comn year is a better one

Instead I had emergency call from mam saying that dad is hospitalized due to acute severe gastroenteritis , leaving work early watching him measuring blood pressure and counting times of diharrhea per hour ,cooking lunch for mam who spent the day at the hospital

But guess what even after these worries I enjoyed my worries and pain when injecting him, I enjoyed our gathering as a family even better than my visionary of the night
Enjoy the beauty of small things even if wrapped with painful things

2014 this was your lesson to me over a complete year , u changed me a lot , you raised my bar of lots of things , really you were one of my best years despite of frustrations and disappointments , you are my year of self discovery and inner peace


2015 you have a really hard challenge let's wait for you full of hopes and anticipations

Happy new year to all of you my friends

اللي بنى مصر كان في الاصل حلواني

خبر كده في روزاليوسف سنه 2009 عن سر المقوله الشهيره: اللي بنى مصر كان في الاصل حلواني :

"إن جوهر الصقلى “بنى القاهرة الفاطمية”، وتعود أصوله إلى الأرمن فى كرواتيا، وقد ولد وعاش فيها قبل أن ينتقل إلى صقلية التى ذاعت شهرته بها. وكان يجيد صناعة الكنافة والحلوى قبل أن يباع كمملوك للخليفة المنصور بالله الذى ألحقه بالجيش وترقى فيه حتى صار أشهر قواده ولذلك سمى بالحلوانى. وقد تم بناء القاهرة والجامع الأزهر على يد القائد العسكرى “الحلوانى” وقد جاء قائدا لجيش الفاطميين واسترد مصر من الإخشيديين وقام ببناء القاهرة قبل مجىء الخليفة المعز لدين الله الفاطمى  ولكن لأن (النجم القاهر) ظهر في سمائها وقت وضع حجر الأساس لها.. وهكذا اختار جوهر الصقلي اسم القاهرة للمدينة الوليدة تيمنا بالنجم"

بس ايه السيد الحلواني شكل زباينك كانوا كتير فيهم اللي بيحبها بالمكسرات والكريما والجبنه والمانجا فطلعت صنيه الكنافه بتاعتك فيها كل حاجه وعكسها ملخبطانا ومحيرانا العمر كله ولما يهفنا الشوق لحاجه نلاقيها فيها حتى لو كانت كل حاجه وعكسها !!!

اااه يا بلد ياللي اصل اللي بناكي كنافاني !!! يا مصر يا صينيه كنافه !!!

اسمعوا الاغنيه يالا

كلمات سيد حجاب
الحان بليغ حمدي

بقلمكم : باي باي 2014

بما ان عدد اللايكس ما شاء الله في زياده , وعندنا قاعده مش بطاله من المتابعين

حبيت اشرككم معايا في البوستات :

يعني مره كده في الاسبوع نفتح موضوع وناخد اقتراحاتكم , موضوع , صوره , فكره .... وهكذا

الاسبوع ده :بقلمكم:  باي باي 2014 تحب تقول للسنه دي ايه قبل ما تسيبنا ؟ يالا ابداعاتكم

https://www.facebook.com/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431?ref=aymt_homepage_panel#!/562451227215431/photos/a.562476710546216.1073741828.562451227215431/631045830355970/?type=1&theater

 

 

اكيد سندريلا كان مقاسها 36

قريت على موقع مقاله عن معاناه صاحبه المقال اللي مقاسها 41 انها ما بتلاقيش جزمه مريحه ضحكت قوووي وقلت طب اللي ما بيلاقيش جزمه اساسا يعمل ايه بقه

ادخل المحل من دول يسالني مقاسك كام يا فندم اقوله هات الفرده اللي في الفاترينه !!! اصل من قله المقاس المنحوس ده عاده بيتحط في العرض وما ادراكم ما العرض : الشمس ضاربه فيه طول اليوم فالجلد عاده بينشف او يجرب

ويا سلام بقه لو ما كنش اساسا موجود نبدا نشوف ال37 ويا دوب تمشي خطوتين الجزمه تبرطش او تسيب رجلك فتضحكي كده زي الشاطره وتقولي له شكرا وخلاص

تبقي محظوظه جدا لو لقيتي جزمه بابزيم او خلخال او اي رباط على وش الرجل عشان تضيقيه ويا دوب تلق بس وانتي ماشيه واهو احسن ما تدوري في الاطفال على مقاسك او مثلا تجيبي كوتشي بتيك توك من بتاع الاطفال وكل اللي يشوف جزمتك يضحك عليها

او مثلا في الشغل لما يعوزوا يجيبوالكم جزم مخصوصه وتملي لهم مقاسك فاللي بيتملى يفكر نفسه سمعك غلط ويجيبلك 46 اصله يمكن عمره ما سمع عن ال36 دي فتقلب بمضحكه لما تجيلك الجزمه 46 !!!

والتريقه بقه ان بنت مين من زمايلك اللي اصغر منك بعشرين سنه بتلبس 38 او ضحكه وشويه تريقه تقومي تردي بكل ثقه ملكه انجلترا مقاسها 36 وسندريلا كمان اكيد مقاسها 36 امال قعدوا يدوروا عليها ايام كتيره ازاي ماهو اكيد في كل البيوت والبلاد اللي دوروا فيها ما كنش حد بيلبس 36 !!!!

بس قولوا للساحره الطيبه تعمل حسابي معاها في فردتين عشان عايزه جزمه جديده الايام دي !!! 

 

عيشه البنات في مجتمع لتات

حواء في مجتمع زي بتاعنا مظلووومه قووي من اول ما تتولد لحد ما تموت

يعني مثلا زمان ما كنتش تخرج من بيت ابوها غير لبيت جوزها وما تخرجش من بيت جوزها غير للمقبره ويتفنن نجيب محفوظ في وصف حاله الست امينه وبناتها في ثلاثيته العظيمه من اول الطبليه اللي تتحط للرجاله وبعدين الستات تاكل البواقي او ما تاكلش لحد مالست امينه هفها الشوق للحسين والسوارس خبطتها ورجلها اتكسرت وهو مسافر وطلقها لما رجع وعرف انها خرجت من البيت من غير اذنه مع انه هو ولاده الناحيه التانيه دايرين عط يمين وشمال !!!

شويه وظاهريا بس البنت بدأت تشم نفسها وتخرج وتتعلم بس في الحقيقه صوره سي السيد وولاده مازالت موجوده في اشكال مختلفه والادهى من كده ان احيانا الحكم والقيد بيكون من بنات جنسها , يعني مثلا مجتمعنا المحترم من اول مالبنت تتولد وهيه في اللفه لسه ما كملتش اسبوع في تهنئه الام " عقبال ما تشوفيها عروسه !!!", لعب الاطفال عرايس ومطابخ وممنوع عليها لعب الولاد ورياضاتهم مين قال ان في لعبه ورياضه رجالي ولعبه ورياضه حريمي؟

تدخل المدرسه ونبدا نفتح مخهم على حاجات اصلا مش في دماغهم ما تكلميش ولاد ما تعليش صوتك تقعدي ازاي تمشي ازاي خليكي بنوته "عشان تعجبي العرسان"  وفي الناحيه التانيه مش عايزه مياصه خليكي بنت جد " العرسان بيحبوا البنت الجد" !!! كل حاجه وعكسها

تيجي تدخل الجامعه : بلاش كليات عمليه " بيعنسوا" او حتقف في وسط عمال " هندسه" ولا حتقف بال12 كليات علميه , حتقعدي تذاكري عمرك كله "طب وصيدله" طب والجواز والخلفه , مفيش راجل يحب مراته مسترجله , مفيش راجل يحب مراته متعلمه اكتر منه .....

تتحجب : محدش حيبصلك ايه الدهوله دي , تسيب شعرها : الناس حتقول ايه اتلمي

تختار وتدقق في الجواز: هو احنا حنفصل الناس على مزاجنا " انجزي" , تتجوز على طول " مسروعه على ايه"

في الشغل : تبقى بنوته حلوه : "جايه تصطاد عريس , ايه السهوكه دي" , تبقى جد وليها في الشغل:" ايه ده بحبحيها شويه مش كده"

تروح بدري : بتستغل زمايلها يعملوا لها شغلها, تسهر: مالكيش اهل يسالوا عليكي؟ هو انت بتصرفي على يتامى !!!

تتجوز وتخلف: " يووه ادي اخره اللي يشغل بنات" , تاخر الموضوع ده " يا بنتي مش حينفع كده ما تخليش الدنيا تسرقك"

تقعد خالص في البيت " هو حيلغي كيانك لازم يعرف ان الشغل جزء منك وجزء من الباكج" , تشتغل بعد الجواز " ما عنديش ستات تتاخر, ما تخليش زمايلك الرجاله يتصلوا بيكي"

احمال الشغل والبيت والعيال والنادي والتدريب والمذاكره والتمريض وزياراتها العائليه تعبتها " مش انت اللي عايزه تشتغلي؟ " مع انه هو كمان بيشتغل بس دوامه ينتهي برجوعه البيت هيه بقه 24 ساعه 7 ايام في الاسبوع

قررت تسافر : ملهاش اهل يسالوا عليها , هربانه من قصه حب فاشله , عايزه تدور على حل شعرها .....

تقعد : هو انت كده مش نافعه في حاجه ما تتلحلحي وتشوفيلك عريس

تفضل مع جوزها وهيه قرفانه من عيشتها: ما عندناش بنات تتطلق

تتطلق: فاشله , سمعتها بطاله

تترمل: وشها نحس

تاجل الخلفه: العمر بيجري الحقي خلفي , تخلف مش حتخاويه ؟ ما تخلفش : العيب من مين ولو منها لازم يتجوز عليها او يطلقها ولو العيب منه : نصيبك حتعملي ايه

ترتاح بس يوم ما يتاويها التراب وتروح للي خالقها وكأن كان لازم تتوأد من يوم ما اتولدت عشان تريح وترتاح !!!

على النقيض الراجل كل حاجه واقل حاجه منه مقبوله في التعليم , في الشغل, في الجواز , في الحياه , في السفر في كل واي حاجه

بجد ارحمونا وسيبونا في حالنا واختيارتنا وحياتنا وكل واحد يخليه في حاله وما يحشرش دماغه ومناخيره في اللي ملهوش فيه بس عايزنكم تعاملونا على اننا بني ادم مش راجل ومش ست ده حتى لغويا بني ادم ليس لها مفرد مؤنث يعني تمشي راجل وست

ايها المجتمع " تبا لك"

https://www.facebook.com/#!/562451227215431/photos/a.562476710546216.1073741828.562451227215431/628249367302283/?type=1&theater

ما كنتوش كواليتي ستريت

علبه الماكنتوش كوالتي ستريت احد اهم مكونات طفوله الجيل بتاعنا او على الاقل اللي فينا عاش فتره في الدول العربيه

كانت اشهر واسهل هديه تاخدها في ايدك او تجيلك في تبادل الزيارات في اي مناسبه

للي ما يعرفهاش هيه مجموع مشكله من الشكولاتات بحشوات مختلفه وكل حشوه ليها لون مميز ليها اللي محشيه كراميل واللي محشيه توفي وللي محشيه جوز هند وكل واحده بسيلوفانه بلون مميز اصفر واخضر وفوشيا واحمر وازرق بدرجاته المثلثه والمدوره والمربعه

العلبه صفيح بغطا تستخدم فيما بعد لتجميع التوك او ادوات الخياطه او اي حاجات كتير صغيره بتضيع !!!

احنا كجيل كل واحد فينا كان له القطعه المميزه اللي بيدور عليها في العلبه لحد ما يخلص كل قطعها والغريب انك عمرك ما تلاقي في البيت الواحد اجماع على لون واحد ففعلا ما كنش بيفضل منها حاجه من غير ما حد يزعل او يتخانق على لون معين

انا شخصيا كنت باموت في الذهبي الطويله الرفيعه المحشيه توفي والخضرا المحشيه جوز هند

وتفضل علبه الماكنتوش مصدر البهجه بالنسبه لي من اول الوانها الجميله لحد طعمها اللي حاساه دلوقتي

كان نفسي في درسنج روم

طول عمري كل ما اقلب دولابي مع تغيير الفصول ومع استيلائي على كل دواليب البيت عشان مش مكفيه هدومي اقول ايه نفسي يبقى عندي درسنج رووم يا دوب تشيل الهدوم والجزم اللي ماليه البيت وقالبه دواليبه وبلاكاراته وجزاماته

مؤخرا اتغيرت الرغبه المحمومه دي واتحول لاني عايزه اوضه قرايه ايون اوضه قرايه

ارضيتها بااركيه والوانها فاتحه وفيها كرسي هزاز وكل حيطانها ارفف خلف خلاف املاها كتب واعمل فيها ساوندسيستم واقعد عالكرسي الهزاز واشغل التكييف في الصيف ودفايه زي اللي في الافلام القديمه في الشتاء واسمع صوت حركه الكرسي عالباركيه واتوه في كتاب وراه كتاب وراه كتاب وبعدين اروح في النوم !!!!

املى ارضياتها بافات وقطع سجاد يدوي ملون وما يدخلهاش غيري

هو انا اتجننت ولا اللي باطلبه غريب من كام يوم لقيت صاحبتي مشيره صوره بالظبط هيه تخيلي لاوضه القرايه بتاعتي وفجاه لقتني باشاور عليها واقول هيه دي بالظبط اللي انا عايزاها وكان اللي صممها كان معايا في خيالي بس نسي يغير الكرسي ويعمله هزاز

واكتشفت ان ممكن من كتر ما بتتخيل حاجه بجد ممكن تلاقيها وتتنفذ وتتصور وتجيلك على فيسبوك كمان

اتجننت؟ ولا ايه ؟ بس انا كلمياء انبسطت !!!

https://www.facebook.com/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431#!/562451227215431/photos/a.562476710546216.1073741828.562451227215431/626835544110332/?type=1&theater

فاصل ونواصل

بعد مشاهده الفيلم سرحت كده لو البني ادم فعلا كانت ذاكرته زي السمكه وبينسى الحاجات القريبه ويفتكر القديم

كنا حنعيش في ذكرياتنا الجميله ايام الطفوله والبراءه

كنا حنفضل شايفين الدنيا جميله

ما كنش حيبقى في حروب ومشاكل

ما كنش طالب طفش من المدرسه عشان مدرسته عاقبته

ولا ست طلبت الطلاق عشان خناقه عالمصروف

ولا راجل اتخانق وساب البيت عشان ملح زياده

ما كنش اتنين حبيبه اتخانقوا على مكالمه اتاخرت ولا الستاير والنجف على مين

ما كنش واحد جري ورا واحد في الشارع وعماه بالنور العالي عشان كسر عليه في ملف ولا اشاره

ولا كان ظابط قرف متهم العمر كله وكل ما يتزنق في مشبوه يروح يجيبه من قفاه

ولا كانت المحاكم اتملت مظاليم وغير مظاليم

ما كنتش الثوره قامت ولا الناس ماتت ولا كان مبارك طلع براءه

ما كنش اتنين صحاب اتخانقوا على مين يحاسب والمره اللي بعدها يتخانقوا مين عليه الدور المره دي

ماكنتش مرارتي اتفقعت من ناس ما عندهاش دم وعلى طول ما عندهاش دم

مش هو برضه الانسان من النسيان ؟ امال ليه قلوبنا سودا وما بننساش؟ ودايما نفكر نفسنا باللي مضايقنا لا ننسى !!!!

ما تيجوا نتناسى اللي مضايقنا يمكن ننسى مش هو الصبر بالتصبر, الحلم بالتحلم, العلم بالتعلم ما يمكن النسيان بالتناسي؟

مسا التماسي على عيونكم كلكم !!!!

https://www.facebook.com/#!/562451227215431/photos/a.562476710546216.1073741828.562451227215431/626108867516333/?type=1&theater

صراع الاجيال

كنا عالغدا مع مجموعه من الزميلات في متوسط العمر وكان الحديث عن بناتهم المراهقات وازاي كل واحده بتتعامل مع بنتها

القاسم المشترك الاكبر ليهم هو الغضب من تصرفاتهم وعدم الرضا عن لبسهم ولا تسريحات شعر بناتهم أو اهمال البنات لترتيب ملابسهم وغرفهم

والقاسم المشترك عن البنات هو التمرد والردود الجاهزه الحاضره

سمعت لهم باهتمام شديد وركزت قوي في الفجوه بينهم وبعد شويه قلتلهم ما تبقيش ام خنيقه منك ليها , تفهمي التمرد واحتويه وسيبيهم يختاروا شكلهم ومظهرهم ما دام لم يخرج عن العرف المعقول لان ده جزء من بناء الشخصيه والجيل اللي جاي لازم يكون مستقل وحر وفي كل اختياراته والا حنفضل موكوسين زي ما احنا

بداوا كلهم يزغروا لي واني مش فاهمه حاجه والكلمه اللي ما اتقالتش " ما هو انت مش متجوزه ولا مخلفه عشان تفهمي ده" بس والله لاه رديت على الجمله اللي ما اتقالتش وفكرتهم بامهاتنا زمان لما كنا بنتضايق من انتقادتهم وتدخله " المشروع برضه" في شؤونا

بس ما لقيتش رد فعل. ده اهالينا كانوا سايبين لينا الاختيار في كل حاجه التعليم , اللبس, تنظيم الوقت اختيار الاصحاب كل تفاصيل حياتنا والكلام ده من جيل فايت ما كنش عنده ثوره الاتصالات ولا المعلومات ولا التفتح اللي موجود عند الجيل بتاعنا  

الخلاصه من القعده ان الفجوه بين الاجيال في ازدياد وان جيل اباء وامهات الايام دي مشغول بلقمه العيش والجري في الحياه وتوفير المدرسه الدوليه وبعدها الجامعه الخاصه ولا التعليم بره , وبين جيل ابناء عندهم سما مفتوحه بين فضاءيات وانترنت وتعليم ذو مستوى متقدم وان الجيلين ماشيين في اتجاهات متضاده والصراع بينهم بيزداد صعوبه

حبوا ولادكم وخدوهم في احضانكم مع كتير من الحريه المسئوله عشان البلد محتجاهم يطلعوا كويسين ومش ضايعين

يمكن معاكم حق , يمكن معايا حق, محدش عارف