علبه الماكنتوش كوالتي ستريت احد اهم مكونات
طفوله الجيل بتاعنا او على الاقل اللي فينا عاش فتره في الدول العربيه
كانت اشهر واسهل هديه تاخدها في ايدك او
تجيلك في تبادل الزيارات في اي مناسبه
للي ما يعرفهاش هيه مجموع مشكله من
الشكولاتات بحشوات مختلفه وكل حشوه ليها لون مميز ليها اللي محشيه كراميل واللي
محشيه توفي وللي محشيه جوز هند وكل واحده بسيلوفانه بلون مميز اصفر واخضر وفوشيا
واحمر وازرق بدرجاته المثلثه والمدوره والمربعه
العلبه صفيح بغطا تستخدم فيما بعد لتجميع
التوك او ادوات الخياطه او اي حاجات كتير صغيره بتضيع !!!
احنا كجيل كل واحد فينا كان له القطعه
المميزه اللي بيدور عليها في العلبه لحد ما يخلص كل قطعها والغريب انك عمرك ما
تلاقي في البيت الواحد اجماع على لون واحد ففعلا ما كنش بيفضل منها حاجه من غير ما
حد يزعل او يتخانق على لون معين
انا شخصيا كنت باموت في الذهبي الطويله
الرفيعه المحشيه توفي والخضرا المحشيه جوز هند
وتفضل علبه الماكنتوش مصدر البهجه بالنسبه لي
من اول الوانها الجميله لحد طعمها اللي حاساه دلوقتي
ليست هناك تعليقات:
إرسال تعليق