الثلاثاء، 8 أبريل 2014

العمر لحظه


في لحظه كده تيجي تلاقي فيها كل الدوشه اختفت وتلاقي فيها هدوء وسكينه وروحك متواصله مع اللحظه اللي انت فيها

وتنسى كل اللي حواليك , وتنسى الدنيا باللي فيها , ومتسمعش غبر الحاجه اللي روحك اتواصلت معاها

اللحظه دي تيجي في لحظه وكمان تمشي في لحظه بسبب دوشه تظهر فجاه تطلعك منها

لحظه ما روحك تعلى قوي وانت بتسمع القران في التراويح في وسط قرايه طويله وتيجي ايه تدوسلك على جرح او تطمنك قبل ما واحد يعطس جنبك !!!

لحظه ما تسمع جمله موسيقى حلوه وتنسى الايقاع ووترواحد بس يعزف على روحك وقلبك قبل ما حد يصرخ جنبك !!!

لحظه ما تدعي جامد وروحك وقلبك تحس انهم رقوا قوي ودموعك نزلت قبل ما  التيلفون يرن!!!

لحظه ما انت قاعد على البحر وفجاه ماتسمعش غير صوت الموج قبل ما الدي جي يشتغل !!!

لحظه ما طفل يبصلك ويضحك لك  من غير سبب قبل ما يكشر فجاه وبرضوا من غير سبب !!!

لحظه ما تتفرج على فيلم وتتوحد مع احداثه قبل ما طفل يصرخ ولا موبيل يرن!!!

لحظه ما تتفرج على صور قديمه وتضحك من قلبك قبل ما حد يفكرك بموقف بايخ حصل في اليوم ده !!!

لحظه سهر مع صحابك في رحله قبل ما بابا يتصل يقول كفايه كده اطلعوا بقه !!!

لحظه ما تكون بتكتب البوست ده في الضلمه قبل ما النور يرجع !!!

اللحظه دي لازم تمسكها بايدك وسنانك لانها لحظه وفجاه تتسرق منك أو حد فصيل يفصلك بس بتبقى حلوة قوي

مش همه بيقولوا العمر لحظه؟

 

هناك 3 تعليقات:

  1. و في كمان لحظة الـ "ولا حاجة" دي بأة لحظة عظيمة و مش بتيجي كتير خالص، لحظة تبقى فيها مش عايز حاجة و مش مستني حاجة و مش شايل هم حاجة و مش فاكر اي حد ولا اي حاجة و مش زعلان من حاجة ولا مبسوط من حاجة.. يااااااااااااااااااااه يا عبد الصمد.. لحظة السكينة.. دي بتكون جزء من جزء من الثانية بس لما بتفوق منها بيكون احساس بايخ اوي و زي مايكون جبل و نزل فوق دماغك من تاني
    بس خلاص دي اللحظة اللي عشتها قريب و مطولتش معايا بس احساسي بيها كان رائع

    ردحذف
    الردود
    1. بالتدريب بتيجي يعني اروح النادي واضرب سما وشجر ويا سلام بقه لو كات يوم الشيدات في البيسين بعد شاور معتبر واقعد اتفرج علي شعاع الشمس بين غصون الشجر
      او حركه الحشيش مع الهوا
      نمكن اقعد خمس ست ساغات كده!!!! بس اقعدت سنين علي ما بقيت اعرق اجيبها

      حذف
  2. الله عليك...اروع ماكتبتي

    ردحذف