حنين

النهارده معرفش ايه اللي فكرني بفيلم صوت الموسيقى قمت شغلته لاني من هواه كلاسيكيات السينما مصري واجنبي,  بس وانا باتفرج عليه افتكرت ايام المدرسه وحفلات الموسيقى والتدريبات الفظيعه اللي كنا بنعملها عشان حفله عيد الام

المهم الفيلم رجعني للايام دي والايام دي رجعتني لورا اكتر ايام ما كنا في السعوديه والخروجات والفسح والمولات هناك اصلها بدات هناك من اكتر من عشرين سنه وقد ايه لما الواحد كان بيحكي لولاد عمه عنها كان خيال علمي للي عايشين في مصر

افتكرت كمان اول مره نزلت مصر بالاتاري وعلامات الاندهاش والتعجب على وشهم , ولا المونوبولي دي كانت كائن فضائي جاي من بره وسهرات عمامي وخلاني عندنا لاربعه وخمسه الصبح والضحك من القلب والجيران اللي كانت تشتكي من الصوت , وصواني البيتزا اللي مامتي كانت تعملها والزرار اللي تحطه عشان اللي يلاقيه يكسب معانا حته تورته زياده ولا صينيه بيتزا

وازاي كل سنه كان لازم ارجع مصر باحدث الالعاب وشرايط الاتاري وارد الخارج !!!

ورجعنا مصر وبدات حاجات احلى بابايا الصبح وهو موصلنا المدرسه واذاعه الشرق الاوسط واغاني محمد قنديل يا حلو صبح , والثلاثي المرح : حلاوه شمسنا وبرنامج كده كان اسمه باصبح عليك واعلان لبارفان كان اسمه اورانونوس اللي كان فقره ثابته في الرنامج, انتم عارفين انا سامعاه دلوقتي . مامتي وهيه بتعملي الضفيره الهندي السنبله وتحطي لي فيها فل وكريستال دي كانت بتوقف الدنيا على رجل من جمالها

جدي الله يرحمه وتجميعه لينا اول يوم رمضان والاعياد والزياره الاسبوعيه لجدو وتيته , العيديه بتاعته ولما كان يقعدني على حجره ويقعد يقولي تعالي "لما نطرقع" ويطرقعلي صوابعي وتوجعني فيزغزغني واقعد اضحك واكركر من الضحك , ومذاكرته النحو ليه وتاسيسه ليه في العربي اصله كان موجه عربي الله يرحمه

نادي السينما يوم السبت واوسكار يوم الخميس, تاكسي السهره يوم الاتنين واخترنا لك يوم الاربع حلقات ماكيفر و اكس فايلز , الفيلم العربي بعد المدرسه يوم الخميس واماني واغاني في الاجازه , سر الارض واعلانات ابله كريمه , فيلم اسماعيليه رايح جاي وازاي قلب الدنيا لما نزل كنا في ثانوي ايامها ولا تايتانيك واحنا في ثالثه كليه

الاذاعه المدرسيه اللي كنت ماسكاها من ابتدائي لثانويه عامه في مصر والسعوديه وكل المدارس اللي اتنقلت بينها

 وبعدين جت مرحله الثانوي وازاي الواحد كان في الدفعه المزدوجه وكم الرعب من التنسيق بصراحه ما كانتش احلى حاجه بس اهي عدت وجبت المجموع ودخلت الكليه اللي عاوزاها بس عمري ما حنسى ليله نتيجه الثانويه العامه ولا يوم النتيجه وانا رايحه المدرسه مانججه بابايا لان مامتي طلع النهار سنترت على باب اللجنه من بدري وازاي لما النتيجه طلعت المجموع معجبنيش (قبل المستوى الرفيع) وقعدت اعيط وبابايا اكلني تين شوكي والراجل بتاع التين يقولي معلش يا بنتي السنه الجايه تنجحي !!! وازاي قعدت اضحك واعيط في وقت واحد

وجت الجامعه وايامها اللي ما تتعوضش ومشوار حلوان وباص الكليه ورحلاتها والمعامل والشيتات والسهر في سكاشن الكيميا والفارماكولوجي وحلم التعيين اللي محصلش بس برضه ربنا كان شايل للواحد الخير الكتير

الفطار الرمضاني في رمضان , نزول القصر العيني عشان نجيب ادوات المعمل ومحل الكشري اللي لسه موجود اللي كنا بناكل فيه واحنا راجعين ونحلي بفخفخينه من المحل اللي قدامه

منيو الخمسه بتاعه ماكدونادز وكنتاكي التحرير اللي كنا مسجلين خطر فيه من كتر الكاتشاب اللي كنا بنستخدمه , امتحانات الشفوي والنظري ونظري العملي ياااااه الواحد امتحن له وللزمن في الكليه دي ولا يوم الشفوي والأنتكه اللي الواحد كان لازم يبقى فيها الجامعه كلها كانت بتعرف ان صيدله عندهم شفوي الشباب بالبدل والبنات على سنجه عشره والله كان شكلنا يفرح

اول شغل واول قبض واول تعيين , شغلي القديم ولمتنا فيه وخروجاتنا مع بعض والزيارات من بره والسهر قبل الاوديتس واول شركه ادويه واول مره رحت الجامعه الامريكيه واول مره سجلت الماجستير ويوم المناقشه كلها ايام جميله الحمد لله مش حقول كل ده عدى بسلاسه ومن غير مشاكل بس هيه اللي بتدي الايام طعم وبتدي للنجاح قيمه لانك بتتعب قوي فبتفرح بعد كده قوي

الفكره مش في الحنين لايام قديمه ولكن الفكره انك لما ترجع شريط حياتك تكتشف ان في كل وقت له جماله وله مذاقه المميز وان الواحد مع كل فتره بيحن للي قبلها بس بعد شويه الفتره دي نفسها بيحن لها يعني هيه دواير بتسلم بعضها وفي كل دايره اكيد حتحن للي قبلها

بس الاهم من الحنين للي فات هو الشوق للي جاي والامل فيه عشان يبقى للحياه طعم اللي اكيد حيكون احلى من بعض مراره ممكن تكون في حنين الماضي لانه خلاص بقى ماضي بس اكيد وانت بتفتكره بتضحك بينك وبين نفسك واوقات بتشتاق لنفسك القديمه البسيطه اللي ممكن الايام تعقدها او تغيرها فحاول ترجعها لانها دايما احلى حاجه فيك

بس برضه لسه احلى يوم ما جاش