كلهن مزز

اتعزمت على حفله حنه قررت صاحبتها تعملها في فندق وتجيب فرقه وجو كانه فرح بس يكون بناتي عشان البنات تاخد راحتها في اللبس والغنا والرقص

ولانه مش في بيت فكل المعزومات قرروا من غير اتفاق "يفكوا عن قلبهم عله" زي ما جدتي بتقول فظهرت احدث موضات السواريه والقصير والكات وغيره وغيره , بالاضافه الى احدث واشيك صيحات الميكاب والشعر

الغريب في الموضوع ان الواحده من دول تدخل القاعه عاديه جدا محجبه كانت او منتقبه وترجع من ورا البارافان المعد للقلع والتظبيط مزه المزز اه والله لدرجه ان كتير مننا ما عرفوش بعض بعد النيولوك

وكلهن بدون استثناء قمرات وفعلا احلى بكتيييير من كتير من ذوات الجمال الصناعي سواء في الاعلانات او الافلام والذي منه بالعكس جمال شيك وبدون اضافات دكاتره التجميل

ثم بدات فقرات الرقص والغناء والانطلاق وكان كل المعزومات بجد جايين " لفك عله عن قلبهم " وضحك بدون تصنع  او خوف من اي حكم من اي من المعازيم من ذوي الجنس الخشن لانهم اصلا مش موجودين 

قلت لنفسي بجد الاصل في حواء الانوثه والشياكه وكمان الدلع , بس وجود حدود العيب والمجتمع ثم الدين والحجاب بيغطوا على 90% من جمالها وانوثتها وبعدين الشغل والحياه والاعباء بتاكل ال 10% اللي فاضله لكن في اقرب فرصه ولاتفه الاسباب وبقدره قادر حواء تقدر ترجع ال100% اذا ارادت وباسهل الوسائل وساعتها والله بتكون احلى وارق من كتيييير من نجمات السينما والتلفزيون لانها ببساطه رباااااااني مش صنااااعي

الفكره ايه بقه ما تسمموش بدن البنات بانهم مهملين في نفسهم ومش واخدين بالهم  من نفسهم أو حتى مش عالموضه خصوصا المحجبات , عارف انت البنت المحجبه دي بتكون جميله جدا وعارفه كويس جدا ان الحجاب مغطي نسبه كبيره من جمالها وكل ما زادت درجه التزامها في لبسها كل ما الموضوع كان اصعب عليها وهيه كل يوم الصبح بتلبس وتسرح شعرها وتلاقي نفسها بارادتها بتغطيه

وهيه قاعده على تسريحتها وقدامها كل انواع الماكياج والعطور اللي بتستخدمهم داخل البيت وبس واللي كل يوم ممكن تستخدمهم وهيه نازله بس هيه بارادتها مش عايزه ده الا في بيتها ووسط صاحباتها ومحارمها

عارف انت البنت دي كل ما بتشوف بنت حلوه ومرتبه وبتلفت نظر الرجاله كل يوم ايه الحوارات اللي بتدور في راسها وايه الافكار عن خلع الحجاب اللي بتيجي في دماغها ؟

عارف انت لما بتتريق عليها ولا تمدح في جمال بنت تانيه مش محجبه هيه بتقولك في سره انا احلى منها بس انتوا اللي مش شايفين

عارف انت لما بتتعزم على فرح وتقرر تكسر قاعده المكياج استثنائيا وتحط رتوش بسيطه وتلبس فستانها السواريه وتبص لنفسها في المرايه وبعدين تشد تقفيله الحجاب وتلبسها وتشد الايشارب وتلبسه وتحس قد ايه جمال المنظر اتغير تماما وفقد جزء كبير من جماله بس هيه برضو حتنزل محجبه ومقفله الفستان بتقفيله الحجاب

المش محجبه حره في اختيارها , والمحجبه برضه حره في اختيارها بس اختيارها ده صعب جدا عليها

والله كلهن مزز بس انتم اللي مش شايفين !!! او مضحوك عليكم بالجمال الصناعي  فمتزودزش الصراع اللي جواهم وتصعبوها عليهم عشان الزمن ده اصلا صعب جدا