اجمل مكان ممكن تروحه هو النوبه , الطريق لانشات في النيل تاخدك من مكان اقامتك لحد ما توصل النوبه
والمزاجنجيه اللي زي حالاتي يطفشوا من الدور الاولاني بدوشه العيال ورغي الستات وسجاير الرجاله , فيطلعوا على طول الدور اللي فوق, ما تقوليش بقه مفيش سور ولا حاسبي تقعي ولا الكلام ده ساعه التامل لا تعوض تبقى محظوظ جدا لو لقيت شلته ولا كليم تقعد عليه وتستربع ولو مفيش ربنا يخلي لنا البنطلونات الجنز
ياخدك اللانش في رحله تتمنى ماترجعش منها بالظبط زي عمنا يحي الفخراني في خرج ولم يعد
زرقه النيل لا توصف واتساعه جبار وصفاء الميه ملوش وصف لدرجه انك ممكن تشوف الصخور تحت الميه
تمر في وسط صخور الصوان اللي اسوان اتسمت عليها واللي من كتر صلابتها ولا فارق معاها النيل والميه والكلام ده , ممكن تعدي كمان في وسط الهيش اللي بالرغم من انه هيش بس برضه رائع الجمال
يمين وشمال الزرع ووراه على طول الصحرا ازاي ما عرفش في لوحه فنيه غايه في الجمال
والجزر يمين وشمال والحجر يمين وشمال ومناطق الدوامات يمين وشمال والحمام والهداهد يمين وشمال ايه الروقان ده وتعدي على اغاخان وتسمع الحدوته الرومانسيه بتاعته وتعدي على بيت محمد منير وتشوف الفيو العظيم اللي ابن المحظوظه بيبص عليه كل يوم
توصل النوبه ببيوتها الجميله الملونه ومحلات العطاره بكل الوانها البديعه وروايحها الغريبه تمشي في شوارع ضيقه مليانه جمال وأحصنه
تدخل البيت النوبي ياسرك بجماله بزير الميه الساقعه اللي ملهاش مثيل وعادي جدا تشرب من الكوز الالمونيوم ما طول السنه بنشرب في الكريستال ايه المشكله !!!
تلاقي الزخارف والفستونات في الحيطه وتلاقي قفص التماسيح وتلاقي صنيه العيش الشمسي والمش والعسل الاسود اكله عاااالميه وتحلى اكتر واكتر بلمه الصحاب وصوره من اجمل ما يمكن ما حدش فيهم يقدر ينساها
وبعدين ينزل براد الشاي التمام ابو نعناع اللي تشرب وانت مربع عالمصطبه بمنتهى الانتعاش والروقان وبعدين البنات تقوم تحني ايديها بنقوشات الحنه البديعه
ثم تيجي رحله العوده تاني زي رحله الذهاب وتلاقي نفسك برضه اول واحد ينط عالدور التاني عشان يستكنيص بجمال النيل لوحده
شويه على بال مالباقي يطلع يفسد عليه خلوته
https://www.facebook.com/562451227215431/photos/a.562476710546216.1073741828.562451227215431/659951287465424/?type=1&theater
ليست هناك تعليقات:
إرسال تعليق