في كروز النيل من اسوان للاقصر طلعت على الصن ديك , خدت كرسي وروحت لمقدمه السفينه , حطيت سماعاتي في وداني وشغلت مزيكتي المفضله ميكس كده من مزيكا هاديه على شويه تانجو , ونظارتي الشمس وضربت سما وصحرا ونيل ومناظر ومزيكا لمده 5 ساعات من احلى 5 ساعات من سنتين ( من اخر نفس القعده دي من سنتين)
تجربه مريحه للاعصاب بشكل لا تتخيلوه , ودفا الشمس نازل على وشك ونسمه الهوا تحرك روحك , ولما تاخد اعمق شهيق تقدر تاخده ويوصل الهوا النضيف النقي ده لاخر خليه في جسمك حاجه كده تعمل استرخاء لكل جسمك خليه خليه مع كل نفس تتنفسه
ولما تعلي المزيكا دوشتها في ودانك بصوتها المجسم تظهر تقاسيم توزيع الالات تجيلك الدرامز في الودن اليمين واوتار الجيتار في الشمال في احلى مزيكا لاتيني تسمعها فتلاقي نفسك شايف كابل حلوين بيرقصوا عليها صلصا ولا تانجو, ولما التراك يقلب ويجيب تانجو saint of a woman تشوف ال باتشينوا في مشهد الرقص الشهير بتاعه وتقرر انك في يوم من الايام حتتعلم تانجو وترقصه كمان (نفس القرار ده خدته من سنتين برضه !!!)
على مدد الشوف النيل وااااااسع ونضيف ولونه ازررررق ونقطه التقاؤه مع السما تتوه الازرقين في بعض لدرجه ما تميزش فيها مين السما ومين النيل ولو سرحت في السما تتخيل اشكال السحاب مره قطه ومره بطه انت وظروفك بقه !!!
تبص يمين تلاقي مزارع النخيل وخضره هايله وتلاقي نخلتين تلاته وساعات لحد خمسه طالعين من نفس الساق في مشهد اكتر من بديع وتبص شمال تلاقي الجبال والصحراء وفي نفس اللقطه تظهرلك جزيره في وسط النيل ومزارع رايق وتتخيل غناه وهو بيسلي نفسه مع كل ضربه للفاس في الارض, وفلوكه صغيره بتنقل كام واحد من البر الغربي للبر الشرقي وتلاقي نفسك سامع صوت المراكبي بيسلي الزباين على غناه وتسقيف زباينه وانسجامهم كلهم بالرغم من ان كلهم ممكن ما يكون شمعاهم تمن اكل العيال اللي في البيت بس اهه بيزقوا في اليوم ويعاندو مع الدنيا
وتلاقيك قاصد تقعد قدام قوي وكانك سايب المركب باللي فيها او حياتك حتى باللي فيها ورا ظهرك ماهي الدوشه موجوده موجوده حتروح فين يعني فتعمل نفسك مش شايفها ولا سامعها وتعلي المزيكا اكتر واكتر فتكتشف ان الغصن اللي في الزرعه اللي قدامك هو كمان بيرقص لاتينو مع الكابل اللي شفتهم من شويه
تبص في الميه تلاقي سرب طيور ماشي يتمتخر وشويه ويطيروا سوا ويتقسموا اتنين اتنين وتحسدهم على الحريه والطيران والحياه البسيييطه وتتمنى لو ربنا خلقك بجناحين عشان تعيش حر في وسط الروعه والجمال ده
وبعدين فجاه المشهد البديع ده يتفصل برنه الموبيل وتلاقي النمره غلط !!! قمه الفصلان يالا نتقابل الكروز الجاي بس يا ترى حاكون
اتعلمت التانجو ولا لسه ما حدش عارف !!!!
https://www.facebook.com/562451227215431/photos/a.562476710546216.1073741828.562451227215431/658429314284288/?type=1&theater
ليست هناك تعليقات:
إرسال تعليق