للي غيروا شغلهم
كتير أو حتى اتنقلوا جوه نفس الشركه كتير يعرفوا كويس قوي احلى 15 يوم في حياه اي
موظف في اي مكان
دول بقى بعد ما
يعلن انه ماشي لحد ما يمشي احيانا اكتر او اقل من 15 يوم بس يعني في المتوسط 15
يوم
دول بقى اللي
بيسلم فيها شغله ويستمتع بالبعد عن التفاصيل ويبطل يحضر اجتماعات ولا ياخد كوميتمت
على نفسه
دول بقى اللي كل
الناس عايزه تقعد معاك وقال ايه تشبع منك !!!
دول بقى اللي كل
الناس بتاخد تيلفوناتك وايملاتك ويعملوا لك ااد على الفيسبوك عشان يستمروا في الاتصال
(ملحوظه: عاده محدش بيتصل !!! لان اللي عمره ما كان عنده التفاصيل دي وانت ملقح
معاه ميت سنه عمره ما حيدور عليك اشاسا !!!) ما علينا
دول برضه اللي في
السكرته الناس حتديك السي في بتاعتهم (لو انت سايب الشركه خالص)
دول اللي برضه
حتلاقي الناس حتموت وتعرف رايح فين لو انت ما قلتش
وبرضه يزغروا لك
عشان ماشي ( ياااااا بختك)
في بقه اللي بيقى
يرسم على مكتبك ولا كرسيك ولا دولابك (احباب المنفعه و قال ايه عايز يفتكرك!!!)
في اللي فعلا بيقى
متاثر انك ماشيودول تبقى محظوظ بيهم قوي واوعى تفرط فيهم
في كمان
الفاراويله Farwell يعني ويطلع الفليب شارت المتين ويقعدوا يكتبولك
اوتوجرافات ويرسموا قلوب وعاده بياخدوا الفلوس اللي اتلمت يجيبوا بيها تورته
وياكلوها !!!! قال ايه بيحتفلوا بيك !!!
يعني اشكالل
والوان من الناس والتصرفات بس بصراحه بتبقى مسليه
انا بقى بحس فيهم
اني زي ما مخرجين السينما ما بيعملوا بطلع من الكادر وتلاقي الدوشه قلت ومش سامع
تفاصيلها
انا بحس اني بره
التفاصيل والحواديت بتفرج عليها لاول مره وما بيشغلنيش حتروح لحد فين
بحس اني بشوف فيها
الناس احيانا لاول مره
وبشوف فيها
تعاملات الناس مع بعض بتفاصيل جديده لاول مره
احينا بقول لنفسي
هو انا كنت مستحمله ده ازاي
واحيانا باحمد
ربنا اني مش كده
بس اللي انا
متاكده منه هو مقدار الراحه والسكينه اللي الواحد بيبقى فيها
وساعتها بتقول
لنفسك طب هو انا كنت شاغل نفسي بكل التفاصيل التافهه دي ازاي
اوقات باتخيل ن
الكادر ده ممكن يكون الواحد فيه مش سايب شركه ولا قسم , لاه سايب الدنيا والناس
اللي فاضله همه اللي لسه مجوش معاه ساعتها برضه حيحس ان مفيش حاجه مستهله وان كله
فسسسسسسس
يبقى الواحد يتعلم
يطلع بره الكادر بمزاجه قبل ما يكون غصب عنه ويركز في نفسه وبس ويسيب التفاصيل
والتفاهات ويخليه في كادره هو وبس مش اي كادر تاني
هااااه حتطلع زيي
بره الكادر؟ ادعيلي اعرف افضل براه انا كمان !!!!!
https://www.facebook.com/#!/562451227215431/photos/a.562476710546216.1073741828.562451227215431/567413016719252/?type=1&theater
ليست هناك تعليقات:
إرسال تعليق